The Rigveda: Metrically Restored Text

Metrically Restored Text

Karen Thomson and Jonathan Slocum

Index

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191

---

N.B. An earlier version of this text was published in electronic form as:

RIG VEDA, A METRICALLY RESTORED TEXT, edited by Barend A. van Nooten and Gary B. Holland, Harvard Oriental Series, vol. 50.

That electronic text, itself derived from a much earlier UT Linguistics Research Center electronic text, bore the legend:

Copyright with the authors and Harvard Oriental Series. The electronic text may be used for research but not for commercial purposes.

Our use here is for research. The electronic text has been much revised (see our Introduction) and converted to Unicode/HTML in this online edition; re: the significance of color and smaller type size in particular, see the Popular Rigveda. Copyright to all revisions and HTML tagging is assigned to the University of Texas, though responsibility for content lies with the authors. This HTML edition may be used for research but not for commercial purposes.

---

1

1.001.01a     agním īḷe puróhitaṃ
1.001.01b     yajñásya devám r̥tvíjam
1.001.01c     hótāraṃ ratnadhā^́tamam

1.001.02a     agníḥ pū^́rvebhir ŕ̥ṣibhir
1.001.02b     ī^́ḍiyo nū^́tanair utá
1.001.02c     sá devā^́m̐ éhá vakṣati

1.001.03a     agnínā rayím aśnavat
1.001.03b     póṣam evá divé-dive
1.001.03c     yaśásaṃ vīrávattamam

1.001.04a     ágne yáṃ yajñám adhvaráṃ
1.001.04b     viśvátaḥ paribhū^́r ási
1.001.04c     sá íd devéṣu gachati

1.001.05a     agnír hótā kavíkratuḥ
1.001.05b     satyáś citráśravastamaḥ
1.001.05c     devó devébhir ā^́ gamat

1.001.06a     yád aṅgá dāśúṣe tuvám
1.001.06b     ágne bhadráṃ kariṣyási
1.001.06c     távét tát satyám aṅgiraḥ

1.001.07a     úpa tvāgne divé-dive
1.001.07b     dóṣāvastar dhiyā^́ vayám
1.001.07c     námo bháranta émasi

1.001.08a     rā^́jantam adhvarā^́ṇãṃ
1.001.08b     gopā^́m r̥tásya dī^́divim
1.001.08c     várdhamānaṃ suvé dáme

1.001.09a     sá naḥ pitéva sūnáve
1.001.09b     ágne sūpāyanó bhava
1.001.09c     sácasvā naḥ suastáye

2

1.002.01a     vā^́yav ā^́ yāhi darśata
1.002.01b     imé sómā áraṃkr̥tāḥ
1.002.01c     téṣām pāhi śrudhī^́ hávam

1.002.02a     vā^́ya ukthébhir jarante
1.002.02b     tuvā^́m áchā jaritā^́raḥ
1.002.02c     sutásomā aharvídaḥ

1.002.03a     vā^́yo táva prapr̥ñcatī^́
1.002.03b     dhénā jigāti dāśúṣe
1.002.03c     urūcī^́ sómapītaye

1.002.04a     índravāyū imé sutā^́
1.002.04b     úpa práyobhir ā^́ gatam
1.002.04c     índavo vām uśánti hí

1.002.05a     vā^́yav índraś ca cetathaḥ
1.002.05b     sutā^́nāṃ vājinīvasū
1.002.05c     tā^́v ā^́ yātam úpa dravát

1.002.06a     vā^́yav índraś ca sunvatá
1.002.06b     ā^́ yātam úpa niṣkr̥tám
1.002.06c     makṣú itthā^́ dhiyā^́ narā

1.002.07a     mitráṃ huve pūtádakṣaṃ
1.002.07b     váruṇaṃ ca riśā^́dasam
1.002.07c     dhíyaṃ ghr̥tā^́cīṃ sā^́dhantā

1.002.08a     r̥téna mitrāvaruṇāv
1.002.08b     r̥tāvr̥dhāv r̥taspr̥śā
1.002.08c     krátum br̥hántam āśathe°

1.002.09a     kavī^́ no mitrā^́váruṇā
1.002.09b     tuvijātā^́ urukṣáyā
1.002.09c     dákṣaṃ dadhāte apásam

3

1.003.01a     áśvinā yájvarīr íṣo
1.003.01b     drávatpāṇī śúbhas patī
1.003.01c     púrubhujā canasyátam

1.003.02a     áśvinā púrudaṃsasā
1.003.02b     nárā śávīrayā dhiyā^́
1.003.02c     dhíṣṇiyā vánataṃ gíraḥ

1.003.03a     dásrā yuvā^́kavaḥ sutā^́
1.003.03b     nā^́satyā vr̥ktábarhiṣaḥ
1.003.03c     ā^́ yātaṃ rudravartanī

1.003.04a     índrā^́ yāhi citrabhāno
1.003.04b     sutā^́ imé tuvāyávaḥ
1.003.04c     áṇvībhis tánā pūtā^́saḥ

1.003.05a     índrā^́ yāhi dhiyéṣitó
1.003.05b     víprajūtaḥ sutā^́vataḥ
1.003.05c     úpa bráhmāṇi vāghátaḥ

1.003.06a     índrā^́ yāhi tū^́tujāna
1.003.06b     úpa bráhmāṇi harivaḥ
1.003.06c     suté dadhiṣva naś cánaḥ

1.003.07a     ómāsaś carṣaṇīdhr̥to
1.003.07b     víśve devāsa ā^́ gata
1.003.07c     dāśvā^́ṃso dāśúṣaḥ sutám

1.003.08a     víśve devā^́so aptúraḥ
1.003.08b     sutám ā^́ ganta tū^́rṇayaḥ
1.003.08c     usrā^́ iva svásarāṇi

1.003.09a     víśve devā^́so asrídha
1.003.09b     éhimāyāso adrúhaḥ
1.003.09c     médhaṃ juṣanta váhnayaḥ

1.003.10a     pavākā^́+ naḥ sárasvatī
1.003.10b     vā^́jebhir vājínīvatī
1.003.10c     yajñáṃ vaṣṭu dhiyā^́vasuḥ

1.003.11a     codayitrī^́ sūnŕ̥tānāṃ
1.003.11b     cétantī sumatīnã^́m
1.003.11c     yajñáṃ dadhe sárasvatī

1.003.12a     mahó árṇaḥ sárasvatī
1.003.12b     prá cetayati ketúnā
1.003.12c     dhíyo víśvā ví rājati

4

1.004.01a     surūpakr̥tnúm ūtáye
1.004.01b     sudúghām iva godúhe
1.004.01c     juhūmási dyávi-dyavi

1.004.02a     úpa naḥ sávanā^́ gahi
1.004.02b     sómasya somapāḥ piba
1.004.02c     godā^́ íd reváto mádaḥ

1.004.03a     áthā te ántamānãṃ
1.004.03b     vidyā^́ma sumatīnã^́m
1.004.03c     mā^́ no áti khya ā^́ gahi

1.004.04a     párehi vígram ástr̥tam
1.004.04b     índram pr̥chā vipaścítam
1.004.04c     yás te sákhibhya ā^́ váram

1.004.05a     utá bruvantu no nído
1.004.05b     nír anyátaś cid ārata
1.004.05c     dádhānā índra íd dúvaḥ

1.004.06a     utá naḥ subhágām̐ arír
1.004.06b     vocéyur dasma kr̥ṣṭáyaḥ
1.004.06c     syā^́méd índrasya śármaṇi

1.004.07a     ém āśúm āśáve bhara
1.004.07b     yajñaśríyaṃ nr̥mā^́danam
1.004.07c     patayán mandayátsakham

1.004.08a     asyá pītvā^́ śatakrato
1.004.08b     ghanó vr̥trā^́ṇām abhavaḥ
1.004.08c     prā^́vo vā^́jeṣu vājínam

1.004.09a     táṃ tvā vā^́jeṣu vājínaṃ
1.004.09b     vājáyāmaḥ śatakrato
1.004.09c     dhánānām indra sātáye

1.004.10a     yó rāyó avánir mahā^́n
1.004.10b     supāráḥ sunvatáḥ sákhā
1.004.10c     tásmā índrāya gāyata

5

1.005.01a     ā^́ tu étā ní ṣīdata
1.005.01b     índram abhí prá gāyata
1.005.01c     sákhāya stómavāhasaḥ

1.005.02a     purūtámam purūṇã^́m
1.005.02b     ī^́śānaṃ vā^́riyāṇãm
1.005.02c     índraṃ sóme sácā suté

1.005.03a     sá ghā no yóga ā^́ bhuvat
1.005.03b     sá rāyé sá púraṃdhiyām
1.005.03c     gámad vā^́jebhir ā^́ sá naḥ

1.005.04a     yásya saṃsthé ná vr̥ṇváte
1.005.04b     hárī samátsu śátravaḥ
1.005.04c     tásmā índrāya gāyata

1.005.05a     sutapā^́vne sutā^́ imé
1.005.05b     śúcayo yanti vītáye
1.005.05c     sómāso dádhiāśiraḥ

1.005.06a     tuváṃ sutásya pītáye
1.005.06b     sadyó vr̥ddhó ajāyathāḥ
1.005.06c     índra jyaíṣṭhyāya sukrato

1.005.07a     ā^́ tvā viśantu āśávaḥ
1.005.07b     sómāsa indra girvaṇaḥ
1.005.07c     śáṃ te santu prácetase

1.005.08a     tuvā^́ṃ stómā avīvr̥dhan
1.005.08b     tuvā^́m ukthā^́ śatakrato
1.005.08c     tuvā^́ṃ vardhantu no gíraḥ

1.005.09a     ákṣitotiḥ saned imáṃ
1.005.09b     vā^́jam índraḥ sahasríṇam
1.005.09c     yásmin víśvāni paúṃsiyā

1.005.10a     mā^́ no mártā abhí druhan
1.005.10b     tanū^́nām indra girvaṇaḥ
1.005.10c     ī^́śāno yavayā vadhám

6

1.006.01a     yuñjánti bradhnám aruṣáṃ
1.006.01b     cárantam pári tasthúṣaḥ
1.006.01c     rócante rocanā^́ diví

1.006.02a     yuñjánti asya kā^́miyā
1.006.02b     hárī vípakṣasā ráthe
1.006.02c     śóṇā dhr̥ṣṇū^́ nr̥vā^́hasā

1.006.03a     ketúṃ kr̥ṇvánn aketáve
1.006.03b     péśo maryā apeśáse
1.006.03c     sám uṣádbhir ajāyathāḥ

1.006.04a     ã^́d áha svadhā^́m ánu
1.006.04b     púnar garbhatvám eriré
1.006.04c     dádhānā nā^́ma yajñíyam

1.006.05a     vīḷú cid ārujatnúbhir
1.006.05b     gúhā cid indra váhnibhiḥ
1.006.05c     ávinda usríyā ánu

1.006.06a     devayánto yáthā matím
1.006.06b     áchā vidádvasuṃ gíraḥ
1.006.06c     mahā^́m anūṣata śrutám

1.006.07a     índreṇa sáṃ hí dŕ̥kṣase
1.006.07b     saṃjagmānó ábibhyuṣā
1.006.07c     mandū^́ samānávarcasā

1.006.08a     anavadyaír abhídyubhir
1.006.08b     makháḥ sáhasvad arcati
1.006.08c     gaṇaír índrasya kā^́miyaiḥ

1.006.09a     átaḥ parijman ā^́ gahi
1.006.09b     divó vā rocanā^́d ádhi
1.006.09c     sám asminn r̥ñjate gíraḥ

1.006.10a     itó vā sātím ī^́mahe
1.006.10b     divó vā pā^́rthivād ádhi
1.006.10c     índram mahó vā rájasaḥ

7

1.007.01a     índram íd gāthíno br̥hád
1.007.01b     índram arkébhir arkíṇaḥ
1.007.01c     índraṃ vā^́ṇīr anūṣata

1.007.02a     índra íd dháriyoḥ sácā
1.007.02b     sámmiśla ā^́ vacoyújā
1.007.02c     índro vajrī^́ hiraṇyáyaḥ

1.007.03a     índro dīrghā^́ya cákṣasa
1.007.03b     ā^́ sū^́ryaṃ rohayad diví
1.007.03c     ví góbhir ádrim airayat

1.007.04a     índra vā^́jeṣu no ava
1.007.04b     sahásrapradhaneṣu ca
1.007.04c     ugrá ugrā^́bhir ūtíbhiḥ

1.007.05a     índraṃ vayám mahādhaná
1.007.05b     índram árbhe havāmahe
1.007.05c     yújaṃ vr̥tréṣu vajríṇam

1.007.06a     sá no vr̥ṣann amúṃ carúṃ
1.007.06b     sátrādāvann ápā vr̥dhi
1.007.06c     asmábhyam ápratiṣkutaḥ

1.007.07a     tuñjé-tuñje yá úttare
1.007.07b     stómā índrasya vajríṇaḥ
1.007.07c     ná vindhe asya suṣṭutím

1.007.08a     vŕ̥ṣā yūthéva váṃsagaḥ
1.007.08b     kr̥ṣṭī^́r iyarti ójasā
1.007.08c     ī^́śāno ápratiṣkutaḥ

1.007.09a     yá ékaś carṣaṇīnã^́ṃ
1.007.09b     vásūnãm irajyáti
1.007.09c     índraḥ páñca kṣitīnã^́m

1.007.10a     índraṃ vo viśvátas pári
1.007.10b     hávāmahe jánebhiyaḥ
1.007.10c     asmā^́kam astu kévalaḥ

8

1.008.01a     ā^́ indra sānasíṃ rayíṃ
1.008.01b     sajítvānaṃ sadāsáham
1.008.01c     várṣiṣṭham ūtáye bhara

1.008.02a     ní yéna muṣṭihatyáyā
1.008.02b     ní vr̥trā^́ ruṇádhāmahai
1.008.02c     tuvótāso ní árvatā

1.008.03a     índra tvótāsa ā^́ vayáṃ
1.008.03b     vájraṃ ghanā^́ dadīmahi
1.008.03c     jáyema sáṃ yudhí spŕ̥dhaḥ

1.008.04a     vayáṃ śū^́rebhir ástr̥bhir
1.008.04b     índra tváyā yujā^́ vayám
1.008.04c     sāsahyā^́ma pr̥tanyatáḥ

1.008.05a     mahā^́m̐ índraḥ paráś ca nú
1.008.05b     mahitvám astu vajríṇe
1.008.05c     diyaúr ná prathinā^́ śávaḥ

1.008.06a     samohé vā yá ā^́śata
1.008.06b     náras tokásya sánitau
1.008.06c     víprāso vā dhiyāyávaḥ

1.008.07a     yáḥ kukṣíḥ somapā^́tamaḥ
1.008.07b     samudrá iva pínvate
1.008.07c     urvī^́r ā^́po ná kākúdaḥ

1.008.08a     evā^́ hí asya sūnŕ̥tā
1.008.08b     virapśī^́ gómatī mahī^́
1.008.08c     pakvā^́ śā^́khā ná dāśúṣe

1.008.09a     evā^́ hí te víbhūtaya
1.008.09b     ūtáya indra mā^́vate
1.008.09c     sadyáś cit sánti dāśúṣe

1.008.10a     evā^́ hí asya kā^́miyā
1.008.10b     stóma uktháṃ ca śáṃsiyā
1.008.10c     índrāya sómapītaye

9

1.009.01a     índréhi mátsi ándhaso
1.009.01b     víśvebhiḥ somapárvabhiḥ
1.009.01c     mahā^́m̐ abhiṣṭír ójasā

1.009.02a     ém enaṃ sr̥jatā suté
1.009.02b     mandím índrāya mandíne
1.009.02c     cákriṃ víśvāni cákraye

1.009.03a     mátsvā suśipra mandíbhi
1.009.03b     stómebhir viśvacarṣaṇe
1.009.03c     sácaiṣú sávaneṣu ā^́

1.009.04a     ásr̥gram indra te gíraḥ
1.009.04b     práti tvā^́m úd ahāsata
1.009.04c     ájoṣā vr̥ṣabhám pátim

1.009.05a     sáṃ codaya citrám arvā^́g
1.009.05b     rā^́dha indra váreṇiyam
1.009.05c     ásad ít te vibhú prabhú

1.009.06a     asmā^́n sú tátra codaya
1.009.06b     índra rāyé rábhasvataḥ
1.009.06c     túvidyumna yáśasvataḥ

1.009.07a     sáṃ gómad indra vā^́javad
1.009.07b     asmé pr̥thú śrávo br̥hát
1.009.07c     viśvā^́yur dhehi ákṣitam

1.009.08a     asmé dhehi śrávo br̥hád
1.009.08b     dyumnáṃ sahasrasā^́tamam
1.009.08c     índra tā^́ rathínīr íṣaḥ

1.009.09a     vásor índraṃ vásupatiṃ
1.009.09b     gīrbhír gr̥ṇánta r̥gmíyam
1.009.09c     hóma gántāram ūtáye

1.009.10a     suté-sute níokase
1.009.10b     br̥hád br̥hatá éd aríḥ
1.009.10c     índrāya śūṣám arcati

10

1.010.01a     gā^́yanti tvā gāyatríṇo
1.010.01b     árcanti arkám arkíṇaḥ
1.010.01c     brahmā^́ṇas tvā śatakrata
1.010.01d     úd vaṃśám iva yemire

1.010.02a     yát sā^́noḥ sā^́num ā^́ruhad
1.010.02b     bhū^́ri áspaṣṭa kártuvam
1.010.02c     tád índro árthaṃ cetati
1.010.02d     yūthéna vr̥ṣṇír ejati

1.010.03a     yukṣvā^́ hí keśínā hárī
1.010.03b     vŕ̥ṣaṇā kakṣiyaprã^́
1.010.03c     áthā na indra somapā
1.010.03d     girā^́m úpaśrutiṃ cara

1.010.04a     éhi stómām̐ abhí svara
1.010.04b     abhí gr̥ṇīhi ā^́ ruva
1.010.04c     bráhma ca no vaso sácā
1.010.04d     índra yajñáṃ ca vardhaya

1.010.05a     ukthám índrāya śáṃsiyaṃ
1.010.05b     várdhanam puruniṣṣídhe
1.010.05c     śakró yáthā sutéṣu ṇo
1.010.05d     rāráṇat sakhiyéṣu ca

1.010.06a     tám ít sakhitvá īmahe
1.010.06b     táṃ rāyé táṃ suvī^́riye
1.010.06c     sá śakrá utá naḥ śakad
1.010.06d     índro vásu dáyamānaḥ

1.010.07a     suvivŕ̥taṃ sunirájam
1.010.07b     índra tvā^́dātam íd yáśaḥ
1.010.07c     gávām ápa vrajáṃ vr̥dhi
1.010.07d     kr̥ṇuṣvá rā^́dho adrivaḥ

1.010.08a     nahí tvā ródasī ubhé
1.010.08b     r̥ghāyámāṇam ínvataḥ
1.010.08c     jéṣaḥ súvarvatīr apáḥ
1.010.08d     sáṃ gā^́ asmábhya° dhūnuhi

1.010.09a     ā^́śrutkarṇa śrudhī^́ hávaṃ
1.010.09b     nū^́ cid dadhiṣva me gíraḥ
1.010.09c     índra stómam imám máma
1.010.09d     kr̥ṣvā^́ yujáś cid ántaram

1.010.10a     vidmā^́ hí tvā vŕ̥ṣantamaṃ
1.010.10b     vā^́jeṣu havanaśrútam
1.010.10c     vŕ̥ṣantamasya hūmaha
1.010.10d     ūtíṃ sahasrasā^́tamām

1.010.11a     ā^́ tū^́ na indra kauśika
1.010.11b     mandasānáḥ sutám piba
1.010.11c     návyam ā^́yuḥ prá sū^́ tira
1.010.11d     kr̥dhī^́ sahasrasā^́m ŕ̥ṣim

1.010.12a     pári tvā girvaṇo gíra
1.010.12b     imā^́ bhavantu viśvátaḥ
1.010.12c     vr̥ddhā^́yum ánu vŕ̥ddhayo
1.010.12d     júṣṭā bhavantu júṣṭayaḥ

11

1.011.01a     índraṃ víśvā avīvr̥dhan
1.011.01b     samudrávyacasaṃ gíraḥ
1.011.01c     rathī^́tamaṃ rathī^́nãṃ
1.011.01d     vā^́jānāṃ sátpatim pátim

1.011.02a     sakhyé ta indra vājíno
1.011.02b     mā^́ bhema śavasas pate
1.011.02c     tuvā^́m abhí prá ṇonumo
1.011.02d     jétāram áparājitam

1.011.03a     pūrvī^́r índrasya rātáyo
1.011.03b     ná ví dasyanti ūtáyaḥ
1.011.03c     yádī vā^́jasya gómata
1.011.03d     stotŕ̥bhyo máṃhate maghám

1.011.04a     purā^́m bhindúr yúvā kavír
1.011.04b     ámitaujā ajāyata
1.011.04c     índro víśvasya kármaṇo
1.011.04d     dhartā^́ vajrī^́ puruṣṭutáḥ

1.011.05a     tuváṃ valásya gómato
1.011.05b     ápāvar adrivo bílam
1.011.05c     tuvā^́ṃ devā^́ ábibhyuṣas
1.011.05d     tujyámānāsa āviṣuḥ

1.011.06a     távāháṃ śūra rātíbhiḥ
1.011.06b     práty āyaṃ síndhum āvádan
1.011.06c     úpātiṣṭhanta girvaṇo
1.011.06d     vidúṣ ṭe tásya kārávaḥ

1.011.07a     māyā^́bhir indra māyínaṃ
1.011.07b     tuváṃ śúṣṇam ávātiraḥ
1.011.07c     vidúṣ ṭe tásya médhirās
1.011.07d     téṣāṃ śrávāṃsi út tira

1.011.08a     índram ī^́śānam ójasā
1.011.08b     abhí stómā anūṣata
1.011.08c     sahásraṃ yásya rātáya
1.011.08d     utá vā sánti bhū^́yasīḥ

12

1.012.01a     agníṃ dūtáṃ vr̥ṇīmahe
1.012.01b     hótāraṃ viśvávedasam
1.012.01c     asyá yajñásya sukrátum

1.012.02a     agním-agniṃ hávīmabhiḥ
1.012.02b     sádā havanta viśpátim
1.012.02c     havyavā^́ham purupriyám

1.012.03a     ágne devā^́m̐ ihā^́ vaha
1.012.03b     jajñānó vr̥ktábarhiṣe
1.012.03c     ási hótā na ī^́ḍiyaḥ

1.012.04a     tā^́m̐ uśató ví bodhaya
1.012.04b     yád agne yā^́si dūtíyam
1.012.04c     devaír ā^́ satsi barhíṣi

1.012.05a     ghŕ̥tāhavana dīdivaḥ
1.012.05b     práti ṣma ríṣato daha
1.012.05c     ágne tuváṃ rakṣasvínaḥ

1.012.06a     agnínāgníḥ sám idhyate
1.012.06b     kavír gr̥hápatir yúvā
1.012.06c     havyavā^́ḍ juhúvāsiyaḥ

1.012.07a     kavím agním úpa stuhi
1.012.07b     satyádharmāṇam adhvaré
1.012.07c     devám amīvacā^́tanam

1.012.08a     yás tvā^́m agne havíṣpatir
1.012.08b     dūtáṃ deva saparyáti
1.012.08c     tásya sma prāvitā^́ bhava

1.012.09a     yó agníṃ devávītaye
1.012.09b     havíṣmām̐ āvívāsati
1.012.09c     tásmai pavāka⁺ mr̥̄ḷaya⁺

1.012.10a     sá naḥ pavāka⁺ dīdivo
1.012.10b     ágne devā^́m̐ ihā^́ vaha
1.012.10c     úpa yajñáṃ havíś ca naḥ

1.012.11a     sá na stávāna ā^́ bhara
1.012.11b     gāyatréṇa návīyasā
1.012.11c     rayíṃ vīrávatīm íṣam

1.012.12a     ágne śukréṇa śocíṣā
1.012.12b     víśvābhir deváhūtibhiḥ
1.012.12c     imáṃ stómaṃ juṣasva naḥ

13

1.013.01a     súsamiddho na ā^́ vaha
1.013.01b     devā^́m̐ agne havíṣmate
1.013.01c     hótaḥ pavāka⁺ yákṣi ca

1.013.02a     mádhumantaṃ tanūnapād
1.013.02b     yajñáṃ devéṣu naḥ kave
1.013.02c     adyā^́ kr̥ṇuhi vītáye

1.013.03a     nárāśáṃsam ihá priyám
1.013.03b     asmín yajñá úpa hvaye
1.013.03c     mádhujihvaṃ haviṣkŕ̥tam

1.013.04a     ágne sukhátame ráthe
1.013.04b     devā^́m̐ īḷitá ā^́ vaha
1.013.04c     ási hótā mánurhitaḥ

1.013.05a     str̥ṇītá barhír ānuṣág
1.013.05b     ghr̥tápr̥ṣṭham manīṣiṇaḥ
1.013.05c     yátrāmŕ̥tasya cákṣaṇam

1.013.06a     ví śrayantām r̥tāvŕ̥dho
1.013.06b     dvā^́ro devī^́r asaścátaḥ
1.013.06c     adyā^́ nūnáṃ ca yáṣṭave

1.013.07a     náktoṣā^́sā supéśasā
1.013.07b     asmín yajñá úpa hvaye
1.013.07c     idáṃ no barhír āsáde

1.013.08a     tā^́ sujihvā^́ úpa hvaye
1.013.08b     hótārā daíviyā kavī^́
1.013.08c     yajñáṃ no yakṣatām imám

1.013.09a     íḷā sárasvatī mahī^́
1.013.09b     tisró devī^́r mayobhúvaḥ
1.013.09c     barhíḥ sīdantu asrídhaḥ

1.013.10a     ihá tváṣṭāram agriyáṃ
1.013.10b     viśvárūpam úpa hvaye
1.013.10c     asmā^́kam astu kévalaḥ

1.013.11a     áva sr̥jā vanaspate
1.013.11b     déva devébhiyo havíḥ
1.013.11c     prá dātúr astu cétanam

1.013.12a     svā^́hā yajñáṃ kr̥ṇotana
1.013.12b     índrāya yájvano gr̥hé
1.013.12c     tátra devā^́m̐ úpa hvaye

14

1.014.01a     aíbhir agne dúvo gíro
1.014.01b     víśvebhiḥ sómapītaye
1.014.01c     devébhir yāhi yákṣi ca

1.014.02a     ā^́ tvā káṇvā ahūṣata
1.014.02b     gr̥ṇánti vipra te dhíyaḥ
1.014.02c     devébhir agna ā^́ gahi

1.014.03a     indravāyū^́ bŕ̥haspátim
1.014.03b     mitrā^́gním pūṣáṇam bhágam
1.014.03c     ādityā^́n mā^́rutaṃ gaṇám

1.014.04a     prá vo bhriyanta índavo
1.014.04b     matsarā^́ mādayiṣṇávaḥ
1.014.04c     drapsā^́ mádhvaś camūṣádaḥ

1.014.05a     ī^́ḷate tvā^́m avasyávaḥ
1.014.05b     káṇvāso vr̥ktábarhiṣaḥ
1.014.05c     havíṣmanto araṃkŕ̥taḥ

1.014.06a     ghr̥tápr̥ṣṭhā manoyújo
1.014.06b     yé tvā váhanti váhnayaḥ
1.014.06c     ā^́ devā^́n sómapītaye

1.014.07a     tā^́n yájatrām̐ r̥tāvŕ̥dho
1.014.07b     ágne pátnīvatas kr̥dhi
1.014.07c     mádhvaḥ sujihva pāyaya

1.014.08a     yé yájatrā yá ī^́ḍiyās
1.014.08b     té te pibantu jihváyā
1.014.08c     mádhor agne váṣaṭkr̥ti

1.014.09a     ā^́kīṃ sū^́ryasya rocanā^́d
1.014.09b     víśvān devā^́m̐ uṣarbúdhaḥ
1.014.09c     vípro hótehá vakṣati

1.014.10a     víśvebhiḥ somiyám mádhu
1.014.10b     ágna índreṇa vāyúnā
1.014.10c     píbā mitrásya dhā^́mabhiḥ

1.014.11a     tuváṃ hótā mánurhito
1.014.11b     ágne yajñéṣu sīdasi
1.014.11c     sémáṃ no adhvaráṃ yaja

1.014.12a     yukṣvā^́ hí áruṣī ráthe
1.014.12b     haríto deva rohítaḥ
1.014.12c     tā^́bhir devā^́m̐ ihā^́ vaha

15

1.015.01a     índra sómam píba rtúnā
1.015.01b     ā^́ tvā viśantu índavaḥ
1.015.01c     matsarā^́sas tádokasaḥ

1.015.02a     márutaḥ píbata rtúnā
1.015.02b     potrā^́d yajñám punītana
1.015.02c     yūyáṃ hí ṣṭhā^́ sudānavaḥ

1.015.03a     abhí yajñáṃ gr̥ṇīhi no
1.015.03b     gnā^́vo néṣṭaḥ píba rtúnā
1.015.03c     tuváṃ hí ratnadhā^́ ási

1.015.04a     ágne devā^́m̐ ihā^́ vaha
1.015.04b     sādáyā yóniṣu triṣú
1.015.04c     pári bhūṣa píba rtúnā

1.015.05a     brā^́hmaṇād indra rā^́dhasaḥ
1.015.05b     píbā sómam r̥tū^́m̐r ánu
1.015.05c     távéd dhí sakhyám ástr̥tam

1.015.06a     yuváṃ dákṣaṃ dhr̥tavrata
1.015.06b     mítrāvaruṇa dūḷábham
1.015.06c     r̥túnā yajñám āśathe°

1.015.07a     draviṇodā^́ dráviṇaso
1.015.07b     grā^́vahastāso adhvaré
1.015.07c     yajñéṣu devám īḷate

1.015.08a     draviṇodā^́ dadātu no
1.015.08b     vásūni yā^́ni śr̥ṇviré
1.015.08c     devéṣu tā^́ vanāmahe

1.015.09a     draviṇodā^́ḥ pipīṣati
1.015.09b     juhóta prá ca tiṣṭhata
1.015.09c     neṣṭrā^́d r̥túbhir iṣyata

1.015.10a     yát tvā turī^́yam r̥túbhir
1.015.10b     dráviṇodo yájāmahe
1.015.10c     ádha smā no dadír bhava

1.015.11a     áśvinā píbatam mádhu
1.015.11b     dī^́diagnī śucivratā
1.015.11c     r̥túnā yajñavāhasā

1.015.12a     gā^́rhapatyena santiya
1.015.12b     r̥túnā yajñanī^́r asi
1.015.12c     devā^́n devayaté yaja

16

1.016.01a     ā^́ tvā vahantu hárayo
1.016.01b     vŕ̥ṣaṇaṃ sómapītaye
1.016.01c     índra tvā sū^́racakṣasaḥ

1.016.02a     imā^́ dhānā^́ ghr̥tasnúvo
1.016.02b     hárī ihópa vakṣataḥ
1.016.02c     índraṃ sukhátame ráthe

1.016.03a     índram prātár havāmaha
1.016.03b     índram prayatí adhvaré
1.016.03c     índraṃ sómasya pītáye

1.016.04a     úpa naḥ sutám ā^́ gahi
1.016.04b     háribhir indra keśíbhiḥ
1.016.04c     suté hí tvā hávāmahe

1.016.05a     sémáṃ na stómam ā^́ gahi
1.016.05b     úpedáṃ sávanaṃ sutám
1.016.05c     gauró ná tr̥ṣitáḥ piba

1.016.06a     imé sómāsa índavaḥ
1.016.06b     sutā^́so ádhi barhíṣi
1.016.06c     tā^́m̐ indra sáhase piba

1.016.07a     ayáṃ te stómo agriyó
1.016.07b     hr̥dispŕ̥g astu śáṃtamaḥ
1.016.07c     áthā sómaṃ sutám piba

1.016.08a     víśvam ít sávanaṃ sutám
1.016.08b     índro mádāya gachati
1.016.08c     vr̥trahā^́ sómapītaye

1.016.09a     sémáṃ naḥ kā^́mam ā^́ pr̥ṇa
1.016.09b     góbhir áśvaiḥ śatakrato
1.016.09c     stávāma tvā suādhíyaḥ

17

1.017.01a     índrāváruṇayor aháṃ
1.017.01b     samrā^́jor áva ā^́ vr̥ṇe
1.017.01c     tā^́ no mr̥̄ḷāta⁺ īdŕ̥śe

1.017.02a     gántārā hí stho ávase
1.017.02b     hávaṃ víprasya mā^́vataḥ
1.017.02c     dhartā^́rā carṣaṇīnã^́m

1.017.03a     anukāmáṃ tarpayethām
1.017.03b     índrāvaruṇa rāyá ā^́
1.017.03c     tā^́ vāṃ nédiṣṭham īmahe

1.017.04a     yuvā^́ku hí śácīnãṃ
1.017.04b     yuvā^́ku sumatīnã^́m
1.017.04c     bhūyā^́ma vājadā^́vnãm

1.017.05a     índraḥ sahasradā^́vnãṃ
1.017.05b     váruṇaḥ śáṃsiyānãm
1.017.05c     krátur bhavati ukthíyaḥ

1.017.06a     táyor íd ávasā vayáṃ
1.017.06b     sanéma ní ca dhīmahi
1.017.06c     siyā^́d utá prarécanam

1.017.07a     índrāvaruṇa vām aháṃ
1.017.07b     huvé citrā^́ya rā^́dhase
1.017.07c     asmā^́n sú jigyúṣas kr̥tam

1.017.08a     índrāvaruṇa nū^́ nú vāṃ
1.017.08b     síṣāsantīṣu dhīṣú ā^́
1.017.08c     asmábhyaṃ śárma yachatam

1.017.09a     prá vām aśnotu suṣṭutír
1.017.09b     índrāvaruṇa yā^́ṃ huvé
1.017.09c     yā^́m r̥dhā^́the sadhástutim

18

1.018.01a     somā^́naṃ suáraṇaṃ
1.018.01b     kr̥ṇuhí brahmaṇas pate
1.018.01c     kakṣī^́vantaṃ yá auśijáḥ

1.018.02a     yó revā^́n yó amīvahā^́
1.018.02b     vasuvít puṣṭivárdhanaḥ
1.018.02c     sá naḥ siṣaktu yás turáḥ

1.018.03a     mā^́ naḥ śáṃso áraruṣo
1.018.03b     dhūrtíḥ práṇaṅ mártiyasya
1.018.03c     rákṣā ṇo brahmaṇas pate

1.018.04a     sá ghā vīró ná riṣyati
1.018.04b     yám índro bráhmaṇas pátiḥ
1.018.04c     sómo hinóti mártiyam

1.018.05a     tuváṃ tám brahmaṇas pate
1.018.05b     sóma índraś ca mártiyam
1.018.05c     dákṣiṇā pātu áṃhasaḥ

1.018.06a     sádasas pátim ádbhutam
1.018.06b     priyám índrasya kā^́miyam
1.018.06c     saním medhā^́m ayāsiṣam

1.018.07a     yásmād r̥té ná sídhyati
1.018.07b     yajñó vipaścítaś caná
1.018.07c     sá dhīnā^́ṃ yógam invati

1.018.08a     ā^́d r̥dhnoti havíṣkr̥tim
1.018.08b     prā^́ñcaṃ kr̥ṇoti adhvarám
1.018.08c     hótrā devéṣu gachati

1.018.09a     nárāśáṃsaṃ sudhŕ̥ṣṭamam
1.018.09b     ápaśyaṃ sapráthastamam
1.018.09c     divó ná sádmamakhasam

19

1.019.01a     práti tyáṃ cā^́rum adhvaráṃ
1.019.01b     gopīthā^́ya prá hūyase
1.019.01c     marúdbhir agna ā^́ gahi

1.019.02a     nahí devó ná mártiyo
1.019.02b     mahás táva krátum paráḥ
1.019.02c     marúdbhir agna ā^́ gahi

1.019.03a     yé mahó rájaso vidúr
1.019.03b     víśve devā^́so adrúhaḥ
1.019.03c     marúdbhir agna ā^́ gahi

1.019.04a     yá ugrā^́ arkám ānr̥cúr
1.019.04b     ánādhr̥ṣṭāsa ójasā
1.019.04c     marúdbhir agna ā^́ gahi

1.019.05a     yé śubhrā^́ ghorávarpasaḥ
1.019.05b     sukṣatrā^́so riśā^́dasaḥ
1.019.05c     marúdbhir agna ā^́ gahi

1.019.06a     yé nā^́kasyā^́dhi rocané
1.019.06b     diví devā^́sa ā^́sate
1.019.06c     marúdbhir agna ā^́ gahi

1.019.07a     yá īṅkháyanti párvatān
1.019.07b     tiráḥ samudrám arṇavám
1.019.07c     marúdbhir agna ā^́ gahi

1.019.08a     ā^́ yé tanvánti raśmíbhis
1.019.08b     tiráḥ samudrám ójasā
1.019.08c     marúdbhir agna ā^́ gahi

1.019.09a     abhí tvā pūrvápītaye
1.019.09b     sr̥jā^́mi somiyám mádhu
1.019.09c     marúdbhir agna ā^́ gahi

20

1.020.01a     ayáṃ devā^́ya jánmane
1.020.01b     stómo víprebhir āsayā^́
1.020.01c     ákāri ratnadhā^́tamaḥ

1.020.02a     yá índrāya vacoyújā
1.020.02b     tatakṣúr mánasā hárī
1.020.02c     śámībhir yajñám āśata

1.020.03a     tákṣan nā^́satiyābhiyām
1.020.03b     párijmānaṃ sukháṃ rátham
1.020.03c     tákṣan dhenúṃ sabardúghām

1.020.04a     yúvānā pitárā púnaḥ
1.020.04b     satyámantrā r̥jūyávaḥ
1.020.04c     r̥bhávo viṣṭí akrata

1.020.05a     sáṃ vo mádāso agmata
1.020.05b     índreṇa ca marútvatā
1.020.05c     ādityébhiś ca rā^́jabhiḥ

1.020.06a     utá tyáṃ camasáṃ návaṃ
1.020.06b     tváṣṭur devásya níṣkr̥tam
1.020.06c     ákarta catúraḥ púnaḥ

1.020.07a     té no rátnāni dhattana
1.020.07b     trír ā^́ sā^́ptāni sunvaté
1.020.07c     ékam-ekaṃ suśastíbhiḥ

1.020.08a     ádhārayanta váhnayo
1.020.08b     ábhajanta sukr̥tyáyā
1.020.08c     bhāgáṃ devéṣu yajñíyam

21

1.021.01a     ihéndrāgnī^́ úpa hvaye
1.021.01b     táyor ít stómam uśmasi
1.021.01c     tā^́ sómaṃ somapā^́tamā

1.021.02a     tā^́ yajñéṣu prá śaṃsata
1.021.02b     indrāgnī^́ śumbhatā naraḥ
1.021.02c     tā^́ gāyatréṣu gāyata

1.021.03a     tā^́ mitrásya práśastaya
1.021.03b     indrāgnī^́ tā^́ havāmahe
1.021.03c     somapā^́ sómapītaye

1.021.04a     ugrā^́ sántā havāmaha
1.021.04b     úpedáṃ sávanaṃ sutám
1.021.04c     indrāgnī^́ éhá gachatām

1.021.05a     tā^́ mahā^́ntā sádaspátī
1.021.05b     índrāgnī rákṣa ubjatam
1.021.05c     áprajāḥ santu atríṇaḥ

1.021.06a     téna satyéna jāgr̥tam
1.021.06b     ádhi pracetúne padé
1.021.06c     índrāgnī śárma yachatam

22

1.022.01a     prātaryújā ví bodhaya
1.022.01b     aśvínāv éhá gachatām
1.022.01c     asyá sómasya pītáye

1.022.02a     yā^́ suráthā rathī^́tama
1.022.02b     ubhā^́ devā^́ divispŕ̥śā
1.022.02c     aśvínā tā^́ havāmahe

1.022.03a     yā^́ vāṃ káśā mádhumatī
1.022.03b     áśvinā sūnŕ̥tāvatī
1.022.03c     táyā yajñám mimikṣatam

1.022.04a     nahí vām ásti dūraké
1.022.04b     yátrā ráthena gáchathaḥ
1.022.04c     áśvinā somíno gr̥hám

1.022.05a     híraṇyapāṇim ūtáye
1.022.05b     savitā^́ram úpa hvaye
1.022.05c     sá céttā devátā padám

1.022.06a     apā^́ṃ nápātam ávase
1.022.06b     savitā^́ram úpa stuhi
1.022.06c     tásya vratā^́ni uśmasi

1.022.07a     vibhaktā^́raṃ havāmahe
1.022.07b     vásoś citrásya rā^́dhasaḥ
1.022.07c     savitā^́raṃ nr̥cákṣasam

1.022.08a     sákhāya ā^́ ní ṣīdata
1.022.08b     savitā^́ stómiyo nú naḥ
1.022.08c     dā^́tā rā^́dhāṃsi śumbhati

1.022.09a     ágne pátnīr ihā^́ vaha
1.022.09b     devā^́nām uśatī^́r úpa
1.022.09c     tváṣṭāraṃ sómapītaye

1.022.10a     ā^́ gnā^́ agna ihā^́vase
1.022.10b     hótrāṃ yaviṣṭha bhā^́ratīm
1.022.10c     várūtrīṃ dhiṣáṇāṃ vaha

1.022.11a     abhí no devī^́r ávasā
1.022.11b     maháḥ śármaṇā nr̥pátnīḥ
1.022.11c     áchinnapatrāḥ sacantām

1.022.12a     ihéndrāṇī^́m úpa hvaye
1.022.12b     varuṇānī^́ṃ suastáye
1.022.12c     agnā^́yīṃ sómapītaye

1.022.13a     mahī^́ dyaúḥ pr̥thivī^́ ca na
1.022.13b     imáṃ yajñám mimikṣatām
1.022.13c     pipr̥tā^́ṃ no bhárīmabhiḥ

1.022.14a     táyor íd ghr̥távat páyo
1.022.14b     víprā rihanti dhītíbhiḥ
1.022.14c     gandharvásya dhruvé padé

1.022.15a     siyonā^́ pr̥thivi bhava
1.022.15b     anr̥kṣarā^́ nivéśanī
1.022.15c     yáchā naḥ śárma sapráthaḥ

1.022.16a     áto devā^́ avantu no
1.022.16b     yáto víṣṇur vicakramé
1.022.16c     pr̥thivyā^́ḥ saptá dhā^́mabhiḥ

1.022.17a     idáṃ víṣṇur ví cakrame
1.022.17b     trẽdhā^́ ní dadhe padám
1.022.17c     sámūḷham asya pāṃsuré

1.022.18a     trī^́ṇi padā^́ ví cakrame
1.022.18b     víṣṇur gopā^́ ádābhiyaḥ
1.022.18c     áto dhármāṇi dhāráyan

1.022.19a     víṣṇoḥ kármāṇi paśyata
1.022.19b     yáto vratā^́ni paspaśé
1.022.19c     índrasya yújiyaḥ sákhā

1.022.20a     tád víṣṇoḥ paramám padáṃ
1.022.20b     sádā paśyanti sūráyaḥ
1.022.20c     divī^́va cákṣur ā^́tatam

1.022.21a     tád víprāso vipanyávo
1.022.21b     jāgr̥vā^́ṃsaḥ sám indhate
1.022.21c     víṣṇor yát paramám padám

23

1.023.01a     tīvrā^́ḥ sómāsa ā^́ gahi
1.023.01b     āśī^́rvantaḥ sutā^́ imé
1.023.01c     vā^́yo tā^́n prásthitān piba

1.023.02a     ubhā^́ devā^́ divispŕ̥śā
1.023.02b     indravāyū^́ havāmahe
1.023.02c     asyá sómasya pītáye

1.023.03a     indravāyū^́ manojúvā
1.023.03b     víprā havanta ūtáye
1.023.03c     sahasrākṣā^́ dhiyás pátī

1.023.04a     mitráṃ vayáṃ havāmahe
1.023.04b     váruṇaṃ sómapītaye
1.023.04c     jajñānā^́ pūtádakṣasā

1.023.05a     r̥téna yā^́v r̥tāvŕ̥dhāv
1.023.05b     r̥tásya jyótiṣas pátī
1.023.05c     tā^́ mitrā^́váruṇā huve

1.023.06a     váruṇaḥ prāvitā^́ bhuvan
1.023.06b     mitró víśvābhir ūtíbhiḥ
1.023.06c     káratāṃ naḥ surā^́dhasaḥ

1.023.07a     marútvantaṃ havāmaha
1.023.07b     índram ā^́ sómapītaye
1.023.07c     sajū^́r gaṇéna tr̥mpatu

1.023.08a     índrajyeṣṭhā márudgaṇā
1.023.08b     dévāsaḥ pū^́ṣarātayaḥ
1.023.08c     víśve máma śrutā hávam

1.023.09a     hatá vr̥tráṃ sudānava
1.023.09b     índreṇa sáhasā yujā^́
1.023.09c     mā^́ no duḥśáṃsa īśata

1.023.10a     víśvān devā^́n havāmahe
1.023.10b     marútaḥ sómapītaye
1.023.10c     ugrā^́ hí pŕ̥śnimātaraḥ

1.023.11a     jáyatām iva tanyatúr
1.023.11b     marútām eti dhr̥ṣṇuyā^́
1.023.11c     yác chúbhaṃ yāthánā naraḥ

1.023.12a     haskārā^́d vidyútas pári
1.023.12b     áto jātā^́ avantu naḥ
1.023.12c     marúto mr̥̄ḷayantu⁺ naḥ

1.023.13a     ā^́ pūṣañ citrábarhiṣam
1.023.13b     ā^́ghr̥ṇe dharúṇaṃ diváḥ
1.023.13c     ā^́jā naṣṭáṃ yáthā paśúm

1.023.14a     pūṣā^́ rā^́jānam ā^́ghr̥ṇir
1.023.14b     ápagūḷhaṃ gúhā hitám
1.023.14c     ávindac citrábarhiṣam

1.023.15a     utó sá máhyam índubhiḥ
1.023.15b     ṣáḍ yuktā^́m̐ anuséṣidhat
1.023.15c     góbhir yávaṃ ná carkr̥ṣat

1.023.16a     ambáyo yanti ádhvabhir
1.023.16b     jāmáyo adhvarīyatā^́m
1.023.16c     pr̥ñcatī^́r mádhunā páyaḥ

1.023.17a     amū^́r yā^́ úpa sū^́riye
1.023.17b     yā^́bhir vā sū^́riyaḥ sahá
1.023.17c     tā^́ no hinvantu adhvarám

1.023.18a     apó devī^́r úpa hvaye
1.023.18b     yátra gā^́vaḥ píbanti naḥ
1.023.18c     síndhubhyaḥ kártuvaṃ havíḥ

1.023.19a     apsú antár amŕ̥tam apsú bheṣajám
1.023.19b     apā^́m utá práśastaye
1.023.19c     dévā bhávata vājínaḥ

1.023.20a     apsú me sómo abravīd
1.023.20b     antár víśvāni bheṣajā^́
1.023.20c     agníṃ ca viśváśambhuvam
1.023.20d     ā^́paś ca viśvábheṣajīḥ

1.023.21a     ā^́paḥ pr̥ṇītá bheṣajáṃ
1.023.21b     várūthaṃ tanúve máma
1.023.21c     jiyók ca sū^́riyaṃ dr̥śé

1.023.22a     idám āpaḥ prá vahata
1.023.22b     yát kíṃ ca duritám máyi
1.023.22c     yád vāhám abhidudróha
1.023.22d     yád vā śepá utā^́nr̥tam

1.023.23a     ā^́po adyā^́nv acāriṣaṃ
1.023.23b     rásena sám agasmahi
1.023.23c     páyasvān agna ā^́ gahi
1.023.23d     tám mā sáṃ sr̥ja várcasā

1.023.24a     sám māgne várcasā sr̥ja
1.023.24b     sám prajáyā sám ā^́yuṣā
1.023.24c     vidyúr me asya devã^́
1.023.24d     índro vidyāt sahá ŕ̥ṣibhiḥ

24

1.024.01a     kásya nūnáṃ katamásyāmŕ̥tānām
1.024.01b     mánāmahe cā^́ru devásya nā^́ma
1.024.01c     kó no mahyā^́ áditaye púnar dāt
1.024.01d     pitáraṃ ca dr̥śéyam mātáraṃ ca

1.024.02a     agnér vayám prathamásyāmŕ̥tānām
1.024.02b     mánāmahe cā^́ru devásya nā^́ma
1.024.02c     sá no mahyā^́ áditaye púnar dāt
1.024.02d     pitáraṃ ca dr̥śéyam mātáraṃ ca

1.024.03a     abhí tvā deva savitar
1.024.03b     ī^́śānaṃ vā^́riyāṇãm
1.024.03c     sádāvan bhāgám īmahe

1.024.04a     yáś cid dhí ta itthā^́ bhágaḥ
1.024.04b     śaśamānáḥ purā^́ nidáḥ
1.024.04c     adveṣó hástayor dadhé

1.024.05a     bhágabhaktasya te vayám
1.024.05b     úd aśema távā^́vasā
1.024.05c     mūrdhā^́naṃ rāyá ārábhe

1.024.06a     nahí te kṣatráṃ ná sáho ná manyúṃ
1.024.06b     váyaś canā^́mī^́ patáyanta āpúḥ
1.024.06c     némā^́ ā^́po animiṣáṃ cárantīr
1.024.06d     ná yé vā^́tasya praminánti ábhvam

1.024.07a     abudhné rā^́jā váruṇo vánasya
1.024.07b     ūrdhváṃ stū^́paṃ dadate pūtádakṣaḥ
1.024.07c     nīcī^́nā sthur upári budhná eṣām
1.024.07d     asmé antár níhitāḥ ketávaḥ syuḥ

1.024.08a     urúṃ hí rā^́jā váruṇaś cakā^́ra
1.024.08b     sū^́ryāya pánthām ánuetavā^́ u
1.024.08c     apáde pā^́dā prátidhātave 'kar
1.024.08d     utā^́pavaktā^́ hr̥dayāvídhaś cit

1.024.09a     śatáṃ te rājan bhiṣájaḥ sahásram
1.024.09b     urvī^́ gabhīrā^́ sumatíṣ ṭe astu
1.024.09c     bā^́dhasva dūré nírr̥tim parācaíḥ
1.024.09d     kr̥táṃ cid énaḥ prá mumugdhi asmát

1.024.10a     amī^́ yá ŕ̥kṣā níhitāsa uccā^́
1.024.10b     náktaṃ dádr̥śre kúha cid díveyuḥ
1.024.10c     ádabdhāni váruṇasya vratā^́ni
1.024.10d     vicā^́kaśac candrámā náktam eti

1.024.11a     tát tvā yāmi bráhmaṇā vándamānas
1.024.11b     tád ā^́ śāste yájamāno havírbhiḥ
1.024.11c     áheḷamāno varuṇehá bodhi
1.024.11d     úruśaṃsa mā^́ na ā^́yuḥ prá moṣīḥ

1.024.12a     tád ín náktaṃ tád dívā máhyam āhus
1.024.12b     tád ayáṃ kéto hr̥dá ā^́ ví caṣṭe
1.024.12c     śúnaḥśépo yám áhuvad gr̥bhītáḥ
1.024.12d     só asmā^́n rā^́jā váruṇo mumoktu

1.024.13a     śúnaḥśépo hí áhuvad gr̥bhītás
1.024.13b     triṣú ādityáṃ drupadéṣu baddháḥ
1.024.13c     ávainaṃ rā^́jā váruṇaḥ sasr̥jyād
1.024.13d     vidvā^́m̐ ádabdho ví mumoktu pā^́śān

1.024.14a     áva te héḷo varuṇa námobhir
1.024.14b     áva yajñébhir īmahe havírbhiḥ
1.024.14c     kṣáyann asmábhyam asura pracetā
1.024.14d     rā^́jann énāṃsi śiśrathaḥ kr̥tā^́ni

1.024.15a     úd uttamáṃ varuṇa pā^́śam asmád
1.024.15b     ávādhamáṃ ví madhyamáṃ śrathāya
1.024.15c     áthā vayám āditiya vraté táva
1.024.15d     ánāgaso áditaye siyāma

25

1.025.01a     yác cid dhí te víśo yathā
1.025.01b     prá deva varuṇa vratám
1.025.01c     minīmási dyávi-dyavi

1.025.02a     mā^́ no vadhā^́ya hatnáve
1.025.02b     jihīḷānásya rīradhaḥ
1.025.02c     mā^́ hr̥ṇānásya manyáve

1.025.03a     ví mr̥̄ḷīkā^́ya⁺ te máno
1.025.03b     rathī^́r áśvaṃ ná sáṃditam
1.025.03c     gīrbhír varuṇa sīmahi

1.025.04a     párā hí me vímanyavaḥ
1.025.04b     pátanti vásyaïṣṭaye
1.025.04c     váyo ná vasatī^́r úpa

1.025.05a     kadā^́ kṣatraśríyaṃ náram
1.025.05b     ā^́ váruṇaṃ karāmahe
1.025.05c     mr̥̄ḷīkā^́yorucákṣasam⁺

1.025.06a     tád ít samānám āśate°
1.025.06b     vénantā ná prá yuchataḥ
1.025.06c     dhr̥távratāya dāśúṣe

1.025.07a     védā yó vīnã^́m padám
1.025.07b     antárikṣeṇa pátatām
1.025.07c     véda nāváḥ samudríyaḥ

1.025.08a     véda māsó dhr̥távrato
1.025.08b     duvā^́daśa prajā^́vataḥ
1.025.08c     védā yá upajā^́yate

1.025.09a     véda vā^́tasya vartaním
1.025.09b     urór r̥ṣvásya br̥hatáḥ
1.025.09c     védā yé adhiā^́sate

1.025.10a     ní ṣasāda dhr̥távrato
1.025.10b     váruṇaḥ pastíyāsu ā^́
1.025.10c     sā^́mrājiyāya sukrátuḥ

1.025.11a     áto víśvāni ádbhutā
1.025.11b     cikitvā^́m̐ abhí paśyati
1.025.11c     kr̥tā^́ni yā^́ ca kártuvā

1.025.12a     sá no viśvā^́hā sukrátur
1.025.12b     ādityáḥ supáthā karat
1.025.12c     prá ṇa ā^́yūṃṣi tāriṣat

1.025.13a     bíbhrad drāpíṃ hiraṇyáyaṃ
1.025.13b     váruṇo vasta nirṇíjam
1.025.13c     pári spáśo ní ṣedire

1.025.14a     ná yáṃ dípsanti dipsávo
1.025.14b     ná drúhvāṇo jánānãm
1.025.14c     ná devám abhímātayaḥ

1.025.15a     utá yó mā^́nuṣeṣu ā^́
1.025.15b     yáśaś cakré ásāmi ā^́
1.025.15c     asmā^́kam udáreṣu ā^́

1.025.16a     párā me yanti dhītáyo
1.025.16b     gā^́vo ná gávyūtīr ánu
1.025.16c     ichántīr urucákṣasam

1.025.17a     sáṃ nú vocāvahai púnar
1.025.17b     yáto me mádhu ā^́bhr̥tam
1.025.17c     hóteva kṣádase priyám

1.025.18a     dárśaṃ nú viśvádarśataṃ
1.025.18b     dárśaṃ rátham ádhi kṣámi
1.025.18c     etā^́ juṣata me gíraḥ

1.025.19a     imám me varuṇa śrudhī
1.025.19b     hávam adyā^́ ca mr̥̄ḷaya⁺
1.025.19c     tuvā^́m avasyúr ā^́ cake

1.025.20a     tuváṃ víśvasya medhira
1.025.20b     diváś ca gmáś ca rājasi
1.025.20c     sá yā^́mani práti śrudhi

1.025.21a     úd uttamám mumugdhi no
1.025.21b     ví pā^́śam madhyamáṃ cr̥ta
1.025.21c     ávādhamā^́ni jīváse

26

1.026.01a     vásiṣvā hí miyedhiya
1.026.01b     vástrāṇi ūrjãm pate
1.026.01c     sémáṃ no adhvaráṃ yaja

1.026.02a     ní no hótā váreṇiyaḥ
1.026.02b     sádā yaviṣṭha mánmabhiḥ
1.026.02c     ágne divítmatā vácaḥ

1.026.03a     ā^́ hí ṣmā sūnáve pitā^́
1.026.03b     āpír yájati āpáye
1.026.03c     sákhā sákhye váreṇiyaḥ

1.026.04a     ā^́ no barhī^́ riśā^́daso
1.026.04b     váruṇo mitró aryamā^́
1.026.04c     sī^́dantu mánuṣo yathā

1.026.05a     pū^́rviya hotar asyá no
1.026.05b     mándasva sakhiyásya ca
1.026.05c     imā^́ u ṣú śrudhī gíraḥ

1.026.06a     yác cid dhí śáśvatā tánā
1.026.06b     deváṃ-devaṃ yájāmahe
1.026.06c     tuvé íd dhūyate havíḥ

1.026.07a     priyó no astu viśpátir
1.026.07b     hótā mandró váreṇiyaḥ
1.026.07c     priyā^́ḥ suagnáyo vayám

1.026.08a     suagnáyo hí vā^́riyaṃ
1.026.08b     devā^́so dadhiré ca naḥ
1.026.08c     suagnáyo manāmahe

1.026.09a     áthā na ubháyeṣãm
1.026.09b     ámr̥ta mártiyānãm
1.026.09c     mitháḥ santu práśastayaḥ

1.026.10a     víśvebhir agne agníbhir
1.026.10b     imáṃ yajñám idáṃ vácaḥ
1.026.10c     cáno dhāḥ sahaso yaho

27

1.027.01a     áśvaṃ ná tvā vā^́ravantaṃ
1.027.01b     vandádhyā agníṃ námobhiḥ
1.027.01c     samrā^́jantam adhvarā^́ṇām

1.027.02a     sá ghā naḥ sūnúḥ śávasā
1.027.02b     pr̥thúpragāmā suśévaḥ
1.027.02c     mīḍhvā^́m̐ asmā^́kam babhūyāt

1.027.03a     sá no dūrā^́c ca āsā^́c ca
1.027.03b     ní mártiyãd aghāyóḥ
1.027.03c     pāhí sádam íd viśvā^́yuḥ

1.027.04a     imám ū ṣú tvám asmā^́kaṃ
1.027.04b     saníṃ gāyatráṃ návyāṃsam
1.027.04c     ágne devéṣu prá vocaḥ

1.027.05a     ā^́ no bhaja paraméṣu
1.027.05b     ā^́ vā^́jeṣu madhyaméṣu
1.027.05c     śíkṣā vásvo ántamasya

1.027.06a     vibhaktā^́si citrabhāno
1.027.06b     síndhor ūrmā^́ upāká ā^́
1.027.06c     sadyó dāśúṣe kṣarasi

1.027.07a     yám agne pr̥tsú mártiyam
1.027.07b     ávā vā^́jeṣu yáṃ junā^́ḥ
1.027.07c     sá yántā śáśvatīr íṣaḥ

1.027.08a     nákir asya sahantiya
1.027.08b     parietā^́ káyasya cit
1.027.08c     vā^́jo asti śravā^́yiyaḥ

1.027.09a     sá vā^́jaṃ viśvácarṣaṇir
1.027.09b     árvadbhir astu tárutā
1.027.09c     víprebhir astu sánitā

1.027.10a     járābodha tád viviḍḍhi
1.027.10b     viśé-viśe yajñíyāya
1.027.10c     stómaṃ rudrā^́ya dŕ̥śīkam

1.027.11a     sá no mahā^́m̐ animānó
1.027.11b     dhūmáketuḥ puruścandráḥ
1.027.11c     dhiyé vā^́jāya hinvatu

1.027.12a     sá revā^́m̐ iva viśpátir
1.027.12b     daívyaḥ ketúḥ śr̥ṇotu naḥ
1.027.12c     ukthaír agnír br̥hádbhānuḥ

1.027.13a     námo mahádbhyo námo arbhakébhyo
1.027.13b     námo yúvabhyo náma āśinébhyaḥ
1.027.13c     yájāma devā^́n yádi śaknávāma
1.027.13d     mā^́ jyā^́yasaḥ śáṃsam ā^́ vr̥kṣi devāḥ

28

1.028.01a     yátra grā^́vā pr̥thúbudhna
1.028.01b     ūrdhvó bhávati sótave
1.028.01c     ulū^́khalasutānãm
1.028.01d     ávéd u indra jalgulaḥ

1.028.02a     yátra dvā^́v iva jaghánā
1.028.02b     adhiṣavaṇíyā kr̥tā^́
1.028.02c     ulū^́khalasutānãm
1.028.02d     ávéd u indra jalgulaḥ

1.028.03a     yátra nā^́rī apacyavám
1.028.03b     upacyaváṃ ca śíkṣate
1.028.03c     ulū^́khalasutānãm
1.028.03d     ávéd u indra jalgulaḥ

1.028.04a     yátra mánthāṃ vibadhnáte
1.028.04b     raśmī^́n yámitavā^́ iva
1.028.04c     ulū^́khalasutānãm
1.028.04d     ávéd u indra jalgulaḥ

1.028.05a     yác cid dhí tváṃ gr̥hé-gr̥ha
1.028.05b     úlūkhalaka yujyáse
1.028.05c     ihá dyumáttamaṃ vada
1.028.05d     jáyatām iva dundubhíḥ

1.028.06a     utá sma te vanaspate
1.028.06b     vā^́to ví vāti ágram ít
1.028.06c     átho índrāya pā^́tave
1.028.06d     sunú sómam ulūkhala

1.028.07a     āyajī^́ vājasā^́tamā
1.028.07b     tā^́ hí uccā^́ vijarbhr̥táḥ
1.028.07c     hárī 'vā^́ndhāṃsi° bápsatā

1.028.08a     tā^́ no adyá vanaspatī
1.028.08b     r̥ṣvā^́v r̥ṣvébhiḥ sotŕ̥bhiḥ
1.028.08c     índrāya mádhumat sutam

1.028.09a     úc chiṣṭáṃ camúvor bhara
1.028.09b     sómam pavítra ā^́ sr̥ja
1.028.09c     ní dhehi gór ádhi tvací

29

1.029.01a     yác cid dhí satya somapā
1.029.01b     anāśastā^́ iva smási
1.029.01c     ā^́ tū^́ na indra śaṃsaya
1.029.01d     góṣu áśveṣu śubhríṣu
1.029.01e     sahásreṣu tuvīmagha

1.029.02a     śíprin vājānãm pate
1.029.02b     śácīvas táva daṃsánā
1.029.02c     ā^́ tū^́ na indra śaṃsaya
1.029.02d     góṣu áśveṣu śubhríṣu
1.029.02e     sahásreṣu tuvīmagha

1.029.03a     ní ṣvāpayā mithūdŕ̥śā
1.029.03b     sastā^́m ábudhyamāne
1.029.03c     ā^́ tū^́ na indra śaṃsaya
1.029.03d     góṣu áśveṣu śubhríṣu
1.029.03e     sahásreṣu tuvīmagha

1.029.04a     sasántu tyā^́ árātayo
1.029.04b     bódhantu śūra rātáyaḥ
1.029.04c     ā^́ tū^́ na indra śaṃsaya
1.029.04d     góṣu áśveṣu śubhríṣu
1.029.04e     sahásreṣu tuvīmagha

1.029.05a     sám indra gardabhám mr̥ṇa
1.029.05b     nuvántam pāpáyāmuyā^́
1.029.05c     ā^́ tū^́ na indra śaṃsaya
1.029.05d     góṣu áśveṣu śubhríṣu
1.029.05e     sahásreṣu tuvīmagha

1.029.06a     pátāti kuṇḍr̥ṇā^́ciyā
1.029.06b     dūráṃ vā^́to vánād ádhi
1.029.06c     ā^́ tū^́ na indra śaṃsaya
1.029.06d     góṣu áśveṣu śubhríṣu
1.029.06e     sahásreṣu tuvīmagha

1.029.07a     sárvam parikrośáṃ jahi
1.029.07b     jambháyā kr̥kadāśúvam
1.029.07c     ā^́ tū^́ na indra śaṃsaya
1.029.07d     góṣu áśveṣu śubhríṣu
1.029.07e     sahásreṣu tuvīmagha

30

1.030.01a     ā^́ va índraṃ kríviṃ yathā
1.030.01b     vājayántaḥ śatákratum
1.030.01c     máṃhiṣṭhaṃ siñca índubhiḥ

1.030.02a     śatáṃ vā yáḥ śúcīnãṃ
1.030.02b     sahásraṃ vā sámāśirām
1.030.02c     éd u nimnáṃ ná rīyate

1.030.03a     sáṃ yán mádāya śuṣmíṇa
1.030.03b     enā^́ hí asya udáre
1.030.03c     samudró ná vyáco dadhé

1.030.04a     ayám u te sám atasi
1.030.04b     kapóta iva garbhadhím
1.030.04c     vácas tác cin na ohase

1.030.05a     stotráṃ rādhānãm pate
1.030.05b     gírvāho vīra yásya te
1.030.05c     víbhūtir astu sūnŕ̥tā

1.030.06a     ūrdhvás tiṣṭhā na ūtáye
1.030.06b     asmín vā^́je śatakrato
1.030.06c     sám anyéṣu bravāvahai

1.030.07a     yóge-yoge tavástaraṃ
1.030.07b     vā^́je-vāje havāmahe
1.030.07c     sákhāya índram ūtáye

1.030.08a     ā^́ ghā gamad yádi śrávat
1.030.08b     sahasríṇībhir ūtíbhiḥ
1.030.08c     vā^́jebhir úpa no hávam

1.030.09a     ánu pratnásya ókaso
1.030.09b     huvé tuvipratíṃ náram
1.030.09c     yáṃ te pū^́rvam pitā^́ huvé

1.030.10a     táṃ tvā vayáṃ viśvavāra
1.030.10b     ā^́ śāsmahe puruhūta
1.030.10c     sákhe vaso jaritŕ̥bhyaḥ

1.030.11a     asmā^́kaṃ śipríṇīnãṃ
1.030.11b     sómapāḥ somapā^́vnãm
1.030.11c     sákhe vajrin sákhīnãm

1.030.12a     táthā tád astu somapāḥ
1.030.12b     sákhe vajrin táthā kr̥ṇu
1.030.12c     yáthā ta uśmásīṣṭáye

1.030.13a     revátīr naḥ sadhamā^́da
1.030.13b     índre santu tuvívājāḥ
1.030.13c     kṣumánto yā^́bhir mádema

1.030.14a     ā^́ gha tvā^́vān tmánā āptá
1.030.14b     stotŕ̥bhyo dhr̥ṣṇav iyānáḥ
1.030.14c     r̥ṇór ákṣaṃ ná cakríyoḥ

1.030.15a     ā^́ yád dúvaḥ śatakratav
1.030.15b     ā^́ kā^́maṃ jaritr̥̄ṇã^́m
1.030.15c     r̥ṇór ákṣaṃ ná śácībhiḥ

1.030.16a     śáśvad índraḥ pópruthadbhir jigāya
1.030.16b     nā^́nadadbhiḥ śā^́śvasadbhir dhánāni
1.030.16c     sá no hiraṇyaratháṃ daṃsánāvān
1.030.16d     sá naḥ sanitā^́ sanáye sá no 'dāt

1.030.17a     ā^́ aśvināv áśvāvatyā
1.030.17b     iṣā^́ yātaṃ śávīrayā
1.030.17c     gómad dasrā híraṇyavat

1.030.18a     samānáyojano hí vāṃ
1.030.18b     rátho dasrāv ámartiyaḥ
1.030.18c     samudré aśvinéyate

1.030.19a     ní aghniyásya mūrdháni
1.030.19b     cakráṃ ráthasya yemathuḥ
1.030.19c     pári dyā^́m anyád īyate

1.030.20a     kás ta uṣaḥ kadhapriye
1.030.20b     bhujé márto amartiye
1.030.20c     káṃ nakṣase vibhāvari

1.030.21a     vayáṃ hí te ámanmahi
1.030.21b     ā^́ ántād ā^́ parākã^́t
1.030.21c     áśve ná citre aruṣi

1.030.22a     tuváṃ tiyébhir ā^́ gahi
1.030.22b     vā^́jebhir duhitar divaḥ
1.030.22c     asmé rayíṃ ní dhāraya

31

1.031.01a     tuvám agne prathamó áṅgirā ŕ̥ṣir
1.031.01b     devó devā^́nām abhavaḥ śiváḥ sákhā
1.031.01c     táva vraté kaváyo vidmanā^́paso
1.031.01d     ájāyanta marúto bhrā^́jadr̥ṣṭayaḥ

1.031.02a     tuvám agne prathamó áṅgirastamaḥ
1.031.02b     kavír devā^́nām pári bhūṣasi vratám
1.031.02c     vibhúr víśvasmai bhúvanāya médhiro
1.031.02d     dvimātā^́ śayúḥ katidhā^́ cid āyáve

1.031.03a     tuvám agne prathamó mātaríśvana
1.031.03b     āvír bhava sukratūyā^́ vivásvate
1.031.03c     árejetāṃ ródasī hotr̥vū^́riye
1.031.03d     ásaghnor bhārám áyajo mahó vaso

1.031.04a     tuvám agne mánave dyā^́m avāśayaḥ
1.031.04b     purūrávase sukŕ̥te sukŕ̥ttaraḥ
1.031.04c     śvātréṇa yát pitarór⁺ múcyase pári
1.031.04d     ā^́ tvā pū^́rvam anayann ā^́param púnaḥ

1.031.05a     tuvám agne vr̥ṣabháḥ puṣṭivárdhana
1.031.05b     údyatasruce bhavasi śravā^́yiyaḥ
1.031.05c     yá ā^́hutim pári védā váṣaṭkr̥tim
1.031.05d     ékāyur ágre víśa āvívāsasi

1.031.06a     tuvám agne vr̥jinávartaniṃ náraṃ
1.031.06b     sákman piparṣi vidáthe vicarṣaṇe
1.031.06c     yáḥ śū^́rasātā páritakmiye dháne
1.031.06d     dabhrébhiś cit sámr̥tā háṃsi bhū^́yasaḥ

1.031.07a     tuváṃ tám agne amr̥tatvá uttamé
1.031.07b     mártaṃ dadhāsi śrávase divé-dive
1.031.07c     yás tātr̥ṣāṇá ubháyāya jánmane
1.031.07d     máyaḥ kr̥ṇóṣi práya ā^́ ca sūráye

1.031.08a     tuváṃ no agne sanáye dhánānāṃ
1.031.08b     yaśásaṃ kārúṃ kr̥ṇuhi stávānaḥ
1.031.08c     r̥dhyā^́ma kárma apásā návena
1.031.08d     devaír dyāvāpr̥thivī prā^́vataṃ naḥ

1.031.09a     tuváṃ no agne pitarór⁺ upástha ā^́
1.031.09b     devó devéṣu anavadya jā^́gr̥viḥ
1.031.09c     tanūkŕ̥d bodhi prámatiś ca kāráve
1.031.09d     tuváṃ kalyāṇa vásu víśvam ópiṣe

1.031.10a     tuvám agne prámatis tvám pitā^́si nas
1.031.10b     tuváṃ vayaskŕ̥t táva jāmáyo vayám
1.031.10c     sáṃ tvā rā^́yaḥ śatínaḥ sáṃ sahasríṇaḥ
1.031.10d     suvī^́raṃ yanti vratapā^́m adābhiya

1.031.11a     tuvā^́m agne prathamám āyúm āyáve
1.031.11b     devā^́ akr̥ṇvan náhuṣasya viśpátim
1.031.11c     íḷām akr̥ṇvan mánuṣasya śā^́sanīm
1.031.11d     pitúr yát putró mámakasya jā^́yate

1.031.12a     tuváṃ no agne táva deva pāyúbhir
1.031.12b     maghóno rakṣa tanúvaś ca vandiya
1.031.12c     trātā^́ tokásya tánaye gávām asi
1.031.12d     ánimeṣaṃ rákṣamāṇas táva vraté

1.031.13a     tuvám agne yájyave pāyúr ántaro
1.031.13b     aniṣaṅgā^́ya caturakṣá idhyase
1.031.13c     yó rātáhavyo avr̥kā^́ya dhā^́yase
1.031.13d     kīréś cin mántram mánasā vanóṣi tám

1.031.14a     tuvám agna uruśáṃsāya vāgháte
1.031.14b     spārháṃ yád rékṇaḥ paramáṃ vanóṣi tát
1.031.14c     ādhrásya cit prámatir ucyase pitā^́
1.031.14d     prá pā^́kaṃ śā^́ssi prá díśo vidúṣṭaraḥ

1.031.15a     tuvám agne práyatadakṣiṇaṃ náraṃ
1.031.15b     vármeva syūtám pári pāsi viśvátaḥ
1.031.15c     svādukṣádmā yó vasataú siyonakŕ̥j
1.031.15d     jīvayājáṃ yájate sópamā^́ diváḥ

1.031.16a     imā^́m agne śaráṇim mīmr̥ṣo na
1.031.16b     imám ádhvānaṃ yám ágāma dūrā^́t
1.031.16c     āpíḥ pitā^́ prámatiḥ somiyā^́nām
1.031.16d     bhŕ̥mir asi r̥ṣikŕ̥n mártiyānām

1.031.17a     manuṣvád agne aṅgirasvád aṅgiro
1.031.17b     yayātivát sádane pūrvavác chuce
1.031.17c     ácha yāhi ā^́ vahā daíviyaṃ jánam
1.031.17d     ā^́ sādaya barhíṣi yákṣi ca priyám

1.031.18a     eténāgne bráhmaṇā vāvr̥dhasva
1.031.18b     śáktī vā yát te cakr̥mā^́ vidā^́ vā
1.031.18c     utá prá ṇeṣi abhí vásyo asmā^́n
1.031.18d     sáṃ naḥ sr̥ja sumatī^́° vā^́javatyā

32

1.032.01a     índrasya nú vīríyāṇi prá vocaṃ
1.032.01b     yā^́ni cakā^́ra prathamā^́ni vajrī^́
1.032.01c     áhann áhim ánu apás tatarda
1.032.01d     prá vakṣáṇā abhinat párvatānām

1.032.02a     áhann áhim párvate śiśriyāṇáṃ
1.032.02b     tváṣṭāsmai vájraṃ svaríyaṃ tatakṣa
1.032.02c     vāśrā^́ iva dhenávaḥ syándamānā
1.032.02d     áñjaḥ samudrám áva jagmur ā^́paḥ

1.032.03a     vr̥ṣāyámāṇo avr̥ṇīta sómaṃ
1.032.03b     tríkadrukeṣu apibat sutásya
1.032.03c     ā^́ sā^́yakam maghávādatta vájram
1.032.03d     áhann enam prathamajā^́m áhīnām

1.032.04a     yád indrā^́han prathamajā^́m áhīnām
1.032.04b     ā^́n māyínām ámināḥ prótá māyā^́ḥ
1.032.04c     ā^́t sū^́riyaṃ janáyan dyā^́m uṣā^́saṃ
1.032.04d     tādī^́tnā śátruṃ ná kílā vivitse

1.032.05a     áhan vr̥tráṃ vr̥tratáraṃ víaṃsam
1.032.05b     índro vájreṇa mahatā^́ vadhéna
1.032.05c     skándhāṃsīva kúliśenā vívr̥kṇā
1.032.05d     áhiḥ śayata upapŕ̥k pr̥thivyā^́ḥ

1.032.06a     ayoddhéva durmáda ā^́ hí juhvé
1.032.06b     mahāvīráṃ tuvibādhám r̥jīṣám
1.032.06c     nā^́tārīd asya sámr̥tiṃ vadhā^́nāṃ
1.032.06d     sáṃ rujā^́nāḥ pipiṣa índraśatruḥ

1.032.07a     apā^́d ahastó apr̥tanyad índram
1.032.07b     ā^́sya vájram ádhi sā^́nau jaghāna
1.032.07c     vŕ̥ṣṇo vádhriḥ pratimā^́nam búbhūṣan
1.032.07d     purutrā^́ vr̥tró aśayad víastaḥ

1.032.08a     nadáṃ ná bhinnám amuyā^́ śáyānam
1.032.08b     máno rúhāṇā áti yanti ā^́paḥ
1.032.08c     yā^́ś cid vr̥tró mahinā^́ paryátiṣṭhat
1.032.08d     tā^́sām áhiḥ patsutaḥśī^́r babhūva

1.032.09a     nīcā^́vayā abhavad vr̥tráputrā
1.032.09b     índro asyā áva vádhar jabhāra
1.032.09c     úttarā sū^́r ádharaḥ putrá āsīd
1.032.09d     dā^́nuḥ śaye sahávatsā ná dhenúḥ

1.032.10a     átiṣṭhantīnām aniveśanā^́nāṃ
1.032.10b     kā^́ṣṭhānām mádhye níhitaṃ śárīram
1.032.10c     vr̥trásya niṇyáṃ ví caranti ā^́po
1.032.10d     dīrgháṃ táma ā^́śayad índraśatruḥ

1.032.11a     dāsápatnīr áhigopā atiṣṭhan
1.032.11b     níruddhā ā^́paḥ paṇíneva gā^́vaḥ
1.032.11c     apā^́m bílam ápihitaṃ yád ā^́sīd
1.032.11d     vr̥tráṃ jaghanvā^́m̐ ápa tád vavāra

1.032.12a     áśviyo vā^́ro abhavas tád indra
1.032.12b     sr̥ké yát tvā pratyáhan devá ékaḥ
1.032.12c     ájayo gā^́ ájayaḥ śūra sómam
1.032.12d     ávāsr̥jaḥ sártave saptá síndhūn

1.032.13a     nā^́smai vidyún ná tanyatúḥ siṣedha
1.032.13b     ná yā^́m míham ákirad dhrādúniṃ ca
1.032.13c     índraś ca yád yuyudhā^́te áhiś ca
1.032.13d     utā^́parī^́bhyo maghávā ví jigye

1.032.14a     áher yātā^́raṃ kám apaśya indra
1.032.14b     hr̥dí yát te jaghnúṣo bhī^́r ágachat
1.032.14c     náva ca yán navatíṃ ca srávantīḥ
1.032.14d     śyenó ná bhītó átaro rájāṃsi

1.032.15a     índro yātó ávasitasya rā^́jā
1.032.15b     śámasya ca śr̥ṅgíṇo vájrabāhuḥ
1.032.15c     séd u rā^́jā kṣayati carṣaṇīnā^́m
1.032.15d     arā^́n ná nemíḥ pári tā^́ babhūva

33

1.033.01a     étā^́yāma úpa gavyánta índram
1.033.01b     asmā^́kaṃ sú prámatiṃ vāvr̥dhāti
1.033.01c     anāmr̥ṇáḥ kuvíd ā^́d asyá rāyó
1.033.01d     gávāṃ kétam páram āvárjate naḥ

1.033.02a     úpéd aháṃ dhanadā^́m ápratītaṃ
1.033.02b     júṣṭāṃ ná śyenó vasatím patāmi
1.033.02c     índraṃ namasyánn upamébhir arkaír
1.033.02d     yá stotŕ̥bhyo háviyo ásti yā^́man

1.033.03a     ní sárvasena iṣudhī^́m̐r asakta
1.033.03b     sám aryó gā^́ ajati yásya váṣṭi
1.033.03c     coṣkūyámāṇa indra bhū^́ri vāmám
1.033.03d     mā^́ paṇír bhūr asmád ádhi pravr̥ddha

1.033.04a     vádhīr hí dásyuṃ dhanínaṃ ghanénam̐
1.033.04b     ékaś cárann upaśākébhir indra
1.033.04c     dhánor ádhi viṣuṇák té ví āyann
1.033.04d     áyajvānaḥ sanakā^́ḥ prétim īyuḥ

1.033.05a     párā cic chīrṣā^́ vavr̥jus tá indra
1.033.05b     áyajvāno yájvabhi spárdhamānāḥ
1.033.05c     prá yád divó hariva sthātar ugra
1.033.05d     nír avratā^́m̐ adhamo ródasīyoḥ

1.033.06a     áyuyutsann anavadyásya sénām
1.033.06b     áyātayanta kṣitáyo návagvāḥ
1.033.06c     vr̥ṣāyúdho ná vádhrayo níraṣṭāḥ
1.033.06d     pravádbhir índrāc citáyanta āyan

1.033.07a     tuvám etā^́n rudató jákṣataś ca
1.033.07b     áyodhayo rájasa indra pāré
1.033.07c     ávādaho divá ā^́ dásyum uccā^́
1.033.07d     prá sunvatá stuvatáḥ śáṃsam āvaḥ

1.033.08a     cakrāṇā^́saḥ parīṇáham pr̥thivyā^́
1.033.08b     híraṇyena maṇínā śúmbhamānāḥ
1.033.08c     ná hinvānā^́sas titirus tá índram
1.033.08d     pári spáśo adadhāt sū^́riyeṇa

1.033.09a     pári yád indara⁺ ródasī ubhé
1.033.09b     ábubhojīr mahinā^́ viśvátaḥ sīm
1.033.09c     ámanyamānām̐ abhí mányamānair
1.033.09d     nír brahmábhir adhamo dásyum indra

1.033.10a     ná yé diváḥ pr̥thivyā^́ ántam āpúr
1.033.10b     ná māyā^́bhir dhanadā^́m paryábhūvan
1.033.10c     yújaṃ vájraṃ vr̥ṣabháś cakra índro
1.033.10d     nír jyótiṣā támaso gā^́ adukṣat

1.033.11a     ánu svadhā^́m akṣarann ā^́po asya
1.033.11b     ávardhata mádhya ā^́ nāvíyānām
1.033.11c     sadhrīcī^́nena mánasā tám índra
1.033.11d     ójiṣṭhena hánmanāhann abhí dyū^́n

1.033.12a     ní āvidhyad ilībíśasya dr̥̄ḷhā^́+
1.033.12b     ví śr̥ṅgíṇam abhinac chúṣṇam índraḥ
1.033.12c     yā^́vat táro maghavan yā^́vad ójo
1.033.12d     vájreṇa śátrum avadhīḥ pr̥tanyúm

1.033.13a     abhí sidhmó ajigād asya śátrūn
1.033.13b     ví tigména vr̥ṣabhéṇā púro 'bhet
1.033.13c     sáṃ vájreṇa asr̥jad vr̥trám índraḥ
1.033.13d     prá svā^́m matím atirac chā^́śadānaḥ

1.033.14a     ā^́vaḥ kútsam indara⁺ yásmi° cākán
1.033.14b     prā^́vo yúdhyantaṃ vr̥ṣabháṃ dáśadyum
1.033.14c     śaphácyuto rẽṇúr nakṣata dyā^́m
1.033.14d     úc chvaitreyó nr̥ṣā^́hiyāya tasthau

1.033.15a     ā^́vaḥ śámaṃ vr̥ṣabháṃ túgriyāsu
1.033.15b     kṣetrajeṣé maghavañ chvítriyaṃ gā^́m
1.033.15c     jiyók cid átra tasthivā^́ṃso akrañ
1.033.15d     chatrūyatā^́m ádharā védanākaḥ

34

1.034.01a     tríś cin no adyā^́ bhavataṃ navedasā
1.034.01b     vibhúr vāṃ yā^́ma utá rātír aśvinā
1.034.01c     yuvór hí yantráṃ himiyéva vā^́saso
1.034.01d     abhyāyaṃsényā bhavatam manīṣíbhiḥ

1.034.02a     tráyaḥ paváyo madhuvā^́hane ráthe
1.034.02b     sómasya venā^́m ánu víśva íd viduḥ
1.034.02c     tráya skambhā^́sa skabhitā^́sa ārábhe
1.034.02d     trír náktaṃ yāthás trír u aśvinā dívā

1.034.03a     samāné áhan trír avadyagohanā
1.034.03b     trír adyá yajñám mádhunā mimikṣatam
1.034.03c     trír vā^́javatīr íṣo aśvinā yuváṃ
1.034.03d     doṣā^́ asmábhyam uṣásaś ca pinvatam

1.034.04a     trír vartír yātaṃ trír ánuvrate jané
1.034.04b     tríḥ suprāvíye trẽdhéva śikṣatam
1.034.04c     trír nāndíyaṃ vahatam aśvinā yuváṃ
1.034.04d     tríḥ pŕ̥kṣo asmé akṣáreva pinvatam

1.034.05a     trír no rayíṃ vahatam aśvinā yuváṃ
1.034.05b     trír devátātā trír utā^́vataṃ dhíyaḥ
1.034.05c     tríḥ saubhagatváṃ trír utá śrávāṃsi nas
1.034.05d     triṣṭháṃ vāṃ sū^́re duhitā^́ ruhad rátham

1.034.06a     trír no aśvinā diviyā^́ni bheṣajā^́
1.034.06b     tríḥ pā^́rthivāni trír u dattam adbhiyáḥ
1.034.06c     omā^́naṃ śaṃyór mámakāya sūnáve
1.034.06d     tridhā^́tu śárma vahataṃ śubhas patī

1.034.07a     trír no aśvinā yajatā^́ divé-dive
1.034.07b     pári tridhā^́tu pr̥thivī^́m aśāyatam
1.034.07c     tisró nāsatyā rathiyā parāváta
1.034.07d     ātméva vā^́taḥ svásarāṇi gachatam

1.034.08a     trír aśvinā síndhubhiḥ saptámātr̥bhis
1.034.08b     tráya āhāvā^́s trẽdhā^́ havíṣ kr̥tám
1.034.08c     tisráḥ pr̥thivī^́r upári pravā^́ divó
1.034.08d     nā^́kaṃ rakṣethe dyúbhir aktúbhir hitám

1.034.09a     kúva trī^́ cakrā^́ trivŕ̥to ráthasya
1.034.09b     kúva tráyo vandhúro yé sánīḷāḥ
1.034.09c     kadā^́ yógo vājíno rā^́sabhasya
1.034.09d     yéna yajñáṃ nāsatiyopayātháḥ

1.034.10a     ā^́ nāsatyā gáchataṃ hūyáte havír
1.034.10b     mádhvaḥ pibatam madhupébhir āsábhiḥ
1.034.10c     yuvór hí pū^́rvaṃ savitóṣáso rátham
1.034.10d     r̥tā^́ya citráṃ ghr̥távantam íṣyati

1.034.11a     ā^́ nāsatyā tribhír ekādaśaír ihá
1.034.11b     devébhir yātam madhupéyam aśvinā
1.034.11c     prā^́yus tā^́riṣṭaṃ nī^́ rápāṃsi mr̥kṣataṃ
1.034.11d     sédhataṃ dvéṣo bhávataṃ sacābhúvā

1.034.12a     ā^́ no aśvinā trivŕ̥tā ráthena
1.034.12b     arvā^́ñcaṃ rayíṃ vahataṃ suvī^́ram
1.034.12c     śr̥ṇvántā vām ávase johavīmi
1.034.12d     vr̥dhé ca no bhavataṃ vā^́jasātau

35

1.035.01a     hváyāmi agním prathamáṃ suastáye
1.035.01b     hváyāmi mitrā^́váruṇāv ihā^́vase
1.035.01c     hváyāmi rā^́trīṃ jágato nivéśanīṃ
1.035.01d     hváyāmi deváṃ savitā^́ram ūtáye

1.035.02a     ā^́ kr̥ṣṇéna rájasā vártamāno
1.035.02b     niveśáyann amŕ̥tam mártiyaṃ ca
1.035.02c     hiraṇyáyena savitā^́ ráthena
1.035.02d     ā^́ devó yāti bhúvanāni páśyan

1.035.03a     yā^́ti deváḥ pravátā yā^́ti udvátā
1.035.03b     yā^́ti śubhrā^́bhyāṃ yajató háribhyām
1.035.03c     ā^́ devó yāti savitā^́ parāváto
1.035.03d     ápa víśvā duritā^́ bā^́dhamānaḥ

1.035.04a     abhī^́vr̥taṃ kŕ̥śanair viśvárūpaṃ
1.035.04b     híraṇyaśamyaṃ yajató br̥hántam
1.035.04c     ā^́sthād ráthaṃ savitā^́ citrábhānuḥ
1.035.04d     kr̥ṣṇā^́ rájāṃsi táviṣīṃ dádhānaḥ

1.035.05a     ví jánāñ chyāvā^́ḥ śitipā^́do akhyan
1.035.05b     ráthaṃ híraṇyapraügaṃ váhantaḥ
1.035.05c     śáśvad víśaḥ savitúr daíviyasya
1.035.05d     upásthe víśvā bhúvanāni tasthuḥ

1.035.06a     tisró dyā^́vaḥ savitúr dvā^́ upásthām̐
1.035.06b     ékā yamásya bhúvane virāṣā^́ṭ
1.035.06c     āṇíṃ ná ráthyam amŕ̥tā^́dhi tasthur
1.035.06d     ihá bravītu yá u tác cíketat

1.035.07a     ví suparṇó antárikṣāṇi akhyad
1.035.07b     gabhīrávepā ásuraḥ sunītháḥ
1.035.07c     kúvedā^́nīṃ sū^́riyaḥ káś ciketa
1.035.07d     katamā^́ṃ dyā^́ṃ raśmír asyā^́ tatāna

1.035.08a     aṣṭaú ví akhyat kakúbhaḥ pr̥thivyā^́s
1.035.08b     trī^́ dhánuva yójanā saptá síndhūn
1.035.08c     hiraṇyākṣáḥ savitā^́ devá ā^́gād
1.035.08d     dádhad rátnā dāśúṣe vā^́riyāṇi

1.035.09a     híraṇyapāṇiḥ savitā^́ vícarṣaṇir
1.035.09b     ubhé dyā^́vāpr̥thivī^́ antár īyate
1.035.09c     ápā^́mīvām bā^́dhate véti sū^́riyam
1.035.09d     abhí kr̥ṣṇéna rájasā dyā^́m r̥ṇoti

1.035.10a     híraṇyahasto ásuraḥ sunītháḥ
1.035.10b     sumr̥̄ḷīkáḥ⁺ suávām̐ yātu arvā^́ṅ
1.035.10c     apasédhan rakṣáso yātudhā^́nān
1.035.10d     ásthād deváḥ pratidoṣáṃ gr̥ṇānáḥ

1.035.11a     yé te pánthāḥ savitaḥ pūrviyā^́so
1.035.11b     areṇávaḥ súkr̥tā antárikṣe
1.035.11c     tébhir no adyá pathíbhiḥ sugébhī
1.035.11d     rákṣā ca no ádhi ca brūhi deva

36

1.036.01a     prá vo yahvám purūṇã^́ṃ
1.036.01b     viśā^́ṃ devayatī^́nãm
1.036.01c     agníṃ suuktébhir vácobhir īmahe
1.036.01d     yáṃ sīm íd anyá ī^́ḷate

1.036.02a     jánāso agníṃ dadhire sahovŕ̥dhaṃ
1.036.02b     havíṣmanto vidhema te
1.036.02c     sá tváṃ no adyá sumánā ihā^́vitā^́
1.036.02d     bhávā vā^́jeṣu santiya

1.036.03a     prá tvā dūtáṃ vr̥ṇīmahe
1.036.03b     hótāraṃ viśvávedasam
1.036.03c     mahás te sató ví caranti arcáyo
1.036.03d     diví spr̥śanti bhānávaḥ

1.036.04a     devā^́sas tvā váruṇo mitró aryamā^́
1.036.04b     sáṃ dūtám pratnám indhate
1.036.04c     víśvaṃ só agne jayati tváyā dhánaṃ
1.036.04d     yás te dadā^́śa mártiyaḥ

1.036.05a     mandró hótā gr̥hápatir
1.036.05b     ágne dūtó viśā^́m asi
1.036.05c     tuvé víśvā sáṃgatāni vratā^́ dhruvā^́
1.036.05d     yā^́ni devā^́ ákr̥ṇvata

1.036.06a     tuvé íd agne subháge yaviṣṭhiya
1.036.06b     víśvam ā^́ hūyate havíḥ
1.036.06c     sá tváṃ no adyá sumánā utā^́paráṃ
1.036.06d     yákṣi devā^́n suvī^́riyā

1.036.07a     táṃ ghem itthā^́ namasvína
1.036.07b     úpa svarā^́jam āsate
1.036.07c     hótrābhir agním mánuṣaḥ sám indhate
1.036.07d     titirvā^́ṃso áti srídhaḥ

1.036.08a     ghnánto vr̥trám ataran ródasī apá
1.036.08b     urú kṣáyāya cakrire
1.036.08c     bhúvat káṇve vŕ̥ṣā diyumnī^́ ā^́hutaḥ
1.036.08d     krándad áśvo gáviṣṭiṣu

1.036.09a     sáṃ sīdasva mahā^́m̐ asi
1.036.09b     śócasva devavī^́tamaḥ
1.036.09c     ví dhūmám agne aruṣám miyedhiya
1.036.09d     sr̥já praśasta darśatám

1.036.10a     yáṃ tvā devā^́so mánave dadhúr ihá
1.036.10b     yájiṣṭhaṃ havyavāhana
1.036.10c     yáṃ káṇvo médhiyātithir dhanaspŕ̥taṃ
1.036.10d     yáṃ vŕ̥ṣā yám upastutáḥ

1.036.11a     yám agním médhiyātithiḥ
1.036.11b     káṇva īdhá r̥tā^́d ádhi
1.036.11c     tásya préṣo dīdiyus tám imā^́ ŕ̥cas
1.036.11d     tám agníṃ vardhayāmasi

1.036.12a     rāyás pūrdhi svadhāvó ásti hí té
1.036.12b     ágne devéṣu ā^́piyam
1.036.12c     tuváṃ vā^́jasya śrútiyasya rājasi
1.036.12d     sá no mr̥̄ḷa⁺ mahā^́m̐ asi

1.036.13a     ūrdhvá ū ṣú ṇa ūtáye
1.036.13b     tíṣṭhā devó ná savitā^́
1.036.13c     ūrdhvó vā^́jasya sánitā yád añjíbhir
1.036.13d     vāghádbhir vihváyāmahe

1.036.14a     ūrdhvó naḥ pāhi áṃhaso ní ketúnā
1.036.14b     víśvaṃ sám atríṇaṃ daha
1.036.14c     kr̥dhī^́ na ūrdhvā^́ñ caráthāya jīváse
1.036.14d     vidā^́ devéṣu no dúvaḥ

1.036.15a     pāhí no agne rakṣásaḥ
1.036.15b     pāhí dhūrtér árāvaṇaḥ
1.036.15c     pāhí rī^́ṣata utá vā jíghāṃsato
1.036.15d     bŕ̥hadbhāno yáviṣṭhiya

1.036.16a     ghanéva víṣvag ví jahi árāvaṇas
1.036.16b     tápurjambha yó asmadhrúk
1.036.16c     yó mártiyaḥ śíśīte áti aktúbhir
1.036.16d     mā^́ naḥ sá ripúr īśata

1.036.17a     agnír vavne suvī^́riyam
1.036.17b     agníḥ káṇvāya saúbhagam
1.036.17c     agníḥ prā^́van mitrótá médhiyātithim
1.036.17d     agníḥ sātā^́ upastutám

1.036.18a     agnínā turváśaṃ yádum parāváta
1.036.18b     ugrā^́devaṃ havāmahe
1.036.18c     agnír nayan návavāstvam br̥hádrathaṃ
1.036.18d     turvī^́tiṃ dásyave sáhaḥ

1.036.19a     ní tvā^́m agne mánur dadhe
1.036.19b     jyótir jánāya śáśvate
1.036.19c     dīdétha káṇva r̥tájāta ukṣitó
1.036.19d     yáṃ namasyánti kr̥ṣṭáyaḥ

1.036.20a     tveṣā^́so agnér ámavanto arcáyo
1.036.20b     bhīmā^́so ná prátītaye
1.036.20c     rakṣasvínaḥ sádam íd yātumā^́vato
1.036.20d     víśvaṃ sám atríṇaṃ daha

37

1.037.01a     krīḷáṃ vaḥ śárdho mā^́rutam
1.037.01b     anarvā^́ṇaṃ ratheśúbham
1.037.01c     káṇvā abhí prá gāyata

1.037.02a     yé pŕ̥ṣatībhir r̥ṣṭíbhiḥ
1.037.02b     sākáṃ vā^́śībhir añjíbhiḥ
1.037.02c     ájāyanta svábhānavaḥ

1.037.03a     ihéva śr̥ṇva eṣãṃ
1.037.03b     káśā hásteṣu yád vádān
1.037.03c     ní yā^́mañ citrám r̥ñjate

1.037.04a     prá vaḥ śárdhāya ghŕ̥ṣvaye
1.037.04b     tveṣádyumnāya śuṣmíṇe
1.037.04c     deváttam bráhma gāyata

1.037.05a     prá śaṃsā góṣu ághniyaṃ
1.037.05b     krīḷáṃ yác chárdho mā^́rutam
1.037.05c     jámbhe rásasya vāvr̥dhe

1.037.06a     kó vo várṣiṣṭha ā^́ naro
1.037.06b     diváś ca gmáś ca dhūtayaḥ
1.037.06c     yát sīm ántaṃ ná dhūnuthá

1.037.07a     ní vo yā^́māya mā^́nuṣo
1.037.07b     dadhrá ugrā^́ya manyáve
1.037.07c     jíhīta párvato giríḥ

1.037.08a     yéṣām ájmeṣu pr̥thivī^́
1.037.08b     jujurvā^́m̐ iva viśpátiḥ
1.037.08c     bhiyā^́ yā^́meṣu réjate

1.037.09a     sthiráṃ hí jā^́nam eṣãṃ
1.037.09b     váyo mātúr níretave
1.037.09c     yát sīm ánu dvitā^́ śávaḥ

1.037.10a     úd u tyé sūnávo gíraḥ
1.037.10b     kā^́ṣṭhā ájmeṣu atnata
1.037.10c     vāśrā^́ abhijñú yā^́tave

1.037.11a     tiyáṃ cid ghā dīrghám pr̥thúm
1.037.11b     mihó nápātam ámr̥dhram
1.037.11c     prá cyāvayanti yā^́mabhiḥ

1.037.12a     máruto yád dha vo bálaṃ
1.037.12b     jánām̐ acucyavītana
1.037.12c     girī^́m̐r acucyavītana

1.037.13a     yád dha yã^́nti marútaḥ
1.037.13b     sáṃ ha bruvate ádhvan ā^́
1.037.13c     śr̥ṇóti káś cid eṣãm

1.037.14a     prá yāta śī^́bham āśúbhiḥ
1.037.14b     sánti káṇveṣu vo dúvaḥ
1.037.14c     tátro ṣú mādayādhuvai

1.037.15a     ásti hí ṣmā mádāya vaḥ
1.037.15b     smási ṣmā vayám eṣãm
1.037.15c     víśvaṃ cid ā^́yu° jīváse

38

1.038.01a     kád dha nūnáṃ kadhapriyaḥ
1.038.01b     pitā^́ putráṃ ná hástayoḥ
1.038.01c     dadhidhvé vr̥ktabarhiṣaḥ

1.038.02a     kúva nūnáṃ kád vo árthaṃ
1.038.02b     gántā divó ná pr̥thivyā^́ḥ
1.038.02c     kvà vo gā^́vo ná raṇyanti

1.038.03a     kúva vaḥ sumnā^́ návyāṃsi
1.038.03b     márutaḥ kúva suvitā^́
1.038.03c     kúvo víśvāni saúbhagā

1.038.04a     yád yūyám pr̥śnimātaro
1.038.04b     mártiāsaḥ° siyā^́tana
1.038.04c     stotā^́ vo amŕ̥taḥ siyāt

1.038.05a     mā^́ vo mr̥gó ná yávase
1.038.05b     jaritā^́ bhūd ájoṣiyaḥ
1.038.05c     pathā^́ yamásya gād úpa

1.038.06a     mā^́ ū° ṣú ṇaḥ párā-parā
1.038.06b     nírr̥tir durháṇā vadhīt
1.038.06c     padīṣṭá tŕ̥ṣṇayā sahá

1.038.07a     satyáṃ tveṣā^́ ámavanto
1.038.07b     dhánvañ cid ā^́ rudríyāsaḥ
1.038.07c     míhaṃ kr̥ṇvanti avātā^́m

1.038.08a     vāśréva vidyún mimāti
1.038.08b     vatsáṃ ná mātā^́ siṣakti
1.038.08c     yád eṣāṃ vr̥ṣṭír ásarji

1.038.09a     dívā cit támaḥ kr̥ṇvanti
1.038.09b     parjányenodavāhéna
1.038.09c     yát pr̥thivī^́ṃ viundánti

1.038.10a     ádha svanā^́n marútãṃ
1.038.10b     víśvam ā^́ sádma pā^́rthivam
1.038.10c     árejanta prá mā^́nuṣāḥ

1.038.11a     máruto vīḷupāṇíbhiś
1.038.11b     citrā^́ ródhasvatīr ánu
1.038.11c     yātém ákhidrayāmabhiḥ

1.038.12a     sthirā^́ vaḥ santu nemáyo
1.038.12b     ráthā áśvāsa eṣãm
1.038.12c     súsaṃskr̥tā abhī^́śavaḥ

1.038.13a     áchā vadā tánā girā^́
1.038.13b     jarā^́yai bráhmaṇas pátim
1.038.13c     agním mitráṃ ná darśatám

1.038.14a     mimīhí ślókam āsíye
1.038.14b     parjánya iva tatanaḥ
1.038.14c     gā^́ya gāyatrám ukthíyam

1.038.15a     vándasva mā^́rutaṃ gaṇáṃ
1.038.15b     tveṣám panasyúm arkíṇam
1.038.15c     asmé vr̥ddhā^́ asann ihá

39

1.039.01a     prá yád itthā^́ parāvátaḥ
1.039.01b     śocír ná mā^́nam ásyatha
1.039.01c     kásya krátvā marutaḥ kásya várpasā
1.039.01d     káṃ yātha káṃ ha dhūtayaḥ

1.039.02a     sthirā^́ vaḥ santu ā^́yudhā parāṇúde
1.039.02b     vīḷū^́ utá pratiṣkábhe
1.039.02c     yuṣmā^́kam astu táviṣī pánīyasī
1.039.02d     mā^́ mártiyasya māyínaḥ

1.039.03a     párā ha yát sthiráṃ hathá
1.039.03b     náro vartáyathā gurú
1.039.03c     ví yãthana vanínaḥ pr̥thiviyā^́
1.039.03d     ví ā^́śāḥ párvatānãm

1.039.04a     nahí vaḥ śátrur vividé ádhi dyávi
1.039.04b     ná bhū^́miyāṃ riśādasaḥ
1.039.04c     yuṣmā^́kam astu táviṣī tánā yujā^́
1.039.04d     rúdrāso nū^́ cid ādhŕ̥ṣe

1.039.05a     prá vepayanti párvatān
1.039.05b     ví viñcanti vánaspátīn
1.039.05c     pró ārata maruto durmádā iva
1.039.05d     dévāsaḥ sárvayā viśā^́

1.039.06a     úpo rátheṣu pŕ̥ṣatīr ayugdhuvam
1.039.06b     práṣṭir vahati róhitaḥ
1.039.06c     ā^́ vo yā^́māya pr̥thivī^́ cid aśrod
1.039.06d     ábībhayanta mā^́nuṣāḥ

1.039.07a     ā^́ vo makṣū^́ tánāya káṃ
1.039.07b     rúdrā ávo vr̥ṇīmahe
1.039.07c     gántā nūnáṃ no ávasā yáthā purā^́
1.039.07d     itthā^́ káṇvāya bibhyúṣe

1.039.08a     yuṣméṣito maruto mártiyeṣita
1.039.08b     ā^́ yó no ábhva ī^́ṣate
1.039.08c     ví táṃ yuyota śávasā ví ójasā
1.039.08d     ví yuṣmā^́kābhir ūtíbhiḥ

1.039.09a     ásāmi hí prayajyavaḥ
1.039.09b     káṇvaṃ dadá pracetasaḥ
1.039.09c     ásāmibhir maruta ā^́ na ūtíbhir
1.039.09d     gántā vr̥ṣṭíṃ ná vidyútaḥ

1.039.10a     ásāmi ójo bibhr̥thā sudānavo
1.039.10b     ásāmi dhūtayaḥ śávaḥ
1.039.10c     r̥ṣidvíṣe marutaḥ parimanyáva
1.039.10d     íṣuṃ ná sr̥jata dvíṣam

40

1.040.01a     út tiṣṭha brahmaṇas pate
1.040.01b     devayántas tuvemahe
1.040.01c     úpa prá yantu marútaḥ sudā^́nava
1.040.01d     índra prāśū^́r bhavā sácā

1.040.02a     tuvā^́m íd dhí sahasas putra mártiya
1.040.02b     upabrūté dháne hité
1.040.02c     suvī^́riyam maruta ā^́ suáśviyaṃ
1.040.02d     dádhīta yó va ācaké

1.040.03a     prá etu bráhmaṇas pátiḥ
1.040.03b     prá devī^́ etu sūnŕ̥tā
1.040.03c     áchā vīráṃ náriyam paṅktírādhasaṃ
1.040.03d     devā^́ yajñáṃ nayantu naḥ

1.040.04a     yó vāgháte dádāti sūnáraṃ vásu
1.040.04b     sá dhatte ákṣiti śrávaḥ
1.040.04c     tásmā íḷāṃ suvī^́rām ā^́ yajāmahe
1.040.04d     suprátūrtim anehásam

1.040.05a     prá nūnám bráhmaṇas pátir
1.040.05b     mántraṃ vadati ukthíyam
1.040.05c     yásminn índro váruṇo mitró aryamā^́
1.040.05d     devā^́ ókāṃsi cakriré

1.040.06a     tám íd vocemā vidátheṣu śambhúvam
1.040.06b     mántraṃ devā anehásam
1.040.06c     imā^́ṃ ca vā^́cam pratiháryathā naro
1.040.06d     víśvéd vāmā^́ vo aśnavat

1.040.07a     kó devayántam aśnavaj
1.040.07b     jánaṃ kó vr̥ktábarhiṣam
1.040.07c     prá-pra dāśuvā^́n pastíyābhir asthita
1.040.07d     antarvā^́vat kṣáyaṃ dadhe

1.040.08a     úpa kṣatrám pr̥ñcītá hánti rā^́jabhir
1.040.08b     bhayé cit sukṣitíṃ dadhe
1.040.08c     nā^́sya vartā^́ ná tarutā^́ mahādhané
1.040.08d     ná árbhe asti vajríṇaḥ

41

1.041.01a     yáṃ rákṣanti prácetaso
1.041.01b     váruṇo mitró aryamā^́
1.041.01c     nū^́ cit sá dabhyate jánaḥ

1.041.02a     yám bāhúteva píprati
1.041.02b     pã^́nti mártiyaṃ riṣáḥ
1.041.02c     áriṣṭaḥ sárva edhate

1.041.03a     ví durgā^́ ví dvíṣaḥ puró
1.041.03b     ghnánti rā^́jāna eṣãm
1.041.03c     náyanti duritā^́ tiráḥ

1.041.04a     sugáḥ pánthā anr̥kṣará
1.041.04b     ā^́dityāsa r̥táṃ yaté
1.041.04c     nā^́trāvakhādó asti vaḥ

1.041.05a     yáṃ yajñáṃ náyathā nara
1.041.05b     ā^́dityā r̥júnā pathā^́
1.041.05c     prá vaḥ sá dhītáye naśat

1.041.06a     sá rátnam mártiyo vásu
1.041.06b     víśvaṃ tokám utá tmánā
1.041.06c     áchā gachati ástr̥taḥ

1.041.07a     kathā^́ rādhāma sakhāya
1.041.07b     stómam mitrásya aryamṇáḥ
1.041.07c     máhi psáro váruṇasya

1.041.08a     mā^́ vo ghnántam mā^́ śápantam
1.041.08b     práti voce devayántam
1.041.08c     sumnaír íd va ā^́ vivāse

1.041.09a     catúraś cid dádamānād
1.041.09b     bibhīyā^́d ā^́ nídhātoḥ
1.041.09c     ná duruktā^́ya spr̥hayet

42

1.042.01a     sám pūṣann ádhvanas tira
1.042.01b     ví áṃho vimuco napāt
1.042.01c     sákṣvā deva prá ṇas puráḥ

1.042.02a     yó naḥ pūṣann aghó vŕ̥ko
1.042.02b     duḥśéva ādídeśati
1.042.02c     ápa sma tám pathó jahi

1.042.03a     ápa tyám paripanthínam
1.042.03b     muṣīvā^́ṇaṃ huraścítam
1.042.03c     dūrám ádhi srutér aja

1.042.04a     tuváṃ tásya dvayāvíno
1.042.04b     agháśaṃsasya kásya cit
1.042.04c     padā^́bhí tiṣṭha tápuṣim

1.042.05a     ā^́ tát te dasra mantumaḥ
1.042.05b     pū^́ṣann ávo vr̥ṇīmahe
1.042.05c     yéna pitr̥̄^́n ácodayaḥ

1.042.06a     ádhā no viśvasaubhaga
1.042.06b     híraṇyavāśīmattama
1.042.06c     dhánāni suṣáṇā kr̥dhi

1.042.07a     áti naḥ saścáto naya
1.042.07b     sugā^́ naḥ supáthā kr̥ṇu
1.042.07c     pū^́ṣann ihá krátuṃ vidaḥ

1.042.08a     abhí sūyávasaṃ naya
1.042.08b     ná navajvāró ádhvane
1.042.08c     pū^́ṣann ihá krátuṃ vidaḥ

1.042.09a     śagdhí pūrdhí prá yaṃsi ca
1.042.09b     śiśīhí prā^́si udáram
1.042.09c     pū^́ṣann ihá krátuṃ vidaḥ

1.042.10a     ná pūṣáṇam methāmasi
1.042.10b     sūktaír abhí gr̥ṇīmasi
1.042.10c     vásūni dasmám īmahe

43

1.043.01a     kád rudrā^́ya prácetase
1.043.01b     mīḷhúṣṭamāya távyase
1.043.01c     vocéma śáṃtamaṃ hr̥dé

1.043.02a     yáthā no áditiḥ kárat
1.043.02b     páśve nŕ̥bhyo yáthā gáve
1.043.02c     yáthā tokā^́ya rudríyam

1.043.03a     yáthā no mitró váruṇo
1.043.03b     yáthā rudráś cíketati
1.043.03c     yáthā víśve sajóṣasaḥ

1.043.04a     gāthápatim medhápatiṃ
1.043.04b     rudráṃ jálāṣabheṣajam
1.043.04c     tác chaṃyóḥ sumnám īmahe

1.043.05a     yáḥ śukrá iva sū^́riyo
1.043.05b     híraṇyam iva rócate
1.043.05c     śréṣṭho devā^́nãṃ vásuḥ

1.043.06a     śáṃ naḥ karati árvate
1.043.06b     sugám meṣā^́ya meṣíye
1.043.06c     nŕ̥bhyo nā^́ribhiyo gáve

1.043.07a     asmé soma śríyam ádhi
1.043.07b     ní dhehi śatásya nr̥̄ṇā^́m⁺
1.043.07c     máhi śrávas tuvinr̥mṇám

1.043.08a     mā^́ naḥ somaparibā^́dho
1.043.08b     mā^́rātayo juhuranta
1.043.08c     ā^́ na indo vā^́je bhaja

1.043.09a     yā^́s te prajā^́ amŕ̥tasya
1.043.09b     párasmin dhā^́mann r̥tásya
1.043.09c     mūrdhā^́ nā^́bhā soma vena
1.043.09d     ābhū^́ṣantīḥ soma vedaḥ

44

1.044.01a     ágne vívasvad uṣásaś
1.044.01b     citráṃ rā^́dho amartiya
1.044.01c     ā^́ dāśúṣe jātavedo vahā tuvám
1.044.01d     adyā^́ devā^́m̐ uṣarbúdhaḥ

1.044.02a     júṣṭo hí dūtó ási havyavā^́hano
1.044.02b     ágne rathī^́r adhvarā^́ṇām
1.044.02c     sajū^́r aśvíbhyām uṣásā suvī^́riyam
1.044.02d     asmé dhehi śrávo br̥hát

1.044.03a     adyā^́ dūtáṃ vr̥ṇīmahe
1.044.03b     vásum agním purupriyám
1.044.03c     dhūmáketum bhā^́r̥jīkaṃ víuṣṭiṣu
1.044.03d     yajñā^́nām adhvaraśríyam

1.044.04a     śréṣṭhaṃ yáviṣṭham átithiṃ súāhutaṃ
1.044.04b     júṣṭaṃ jánāya dāśúṣe
1.044.04c     devā^́m̐ áchā yā^́tave jātávedasam
1.044.04d     agním īḷe víuṣṭiṣu

1.044.05a     staviṣyā^́mi tuvā^́m aháṃ
1.044.05b     víśvasyāmr̥ta bhojana
1.044.05c     ágne trātā^́ram amŕ̥tam miyedhiya
1.044.05d     yájiṣṭhaṃ havyavāhana

1.044.06a     suśáṃso bodhi gr̥ṇaté yaviṣṭhiya
1.044.06b     mádhujihvaḥ súāhutaḥ
1.044.06c     práskaṇvasya pratiránn ā^́yu° jīváse
1.044.06d     namasyā^́ daíviyaṃ jánam

1.044.07a     hótāraṃ viśvávedasaṃ
1.044.07b     sáṃ hí tvā víśa indháte
1.044.07c     sá ā^́ vaha puruhūta prácetaso
1.044.07d     ágne devā^́m̐ ihá dravát

1.044.08a     savitā^́ram uṣásam aśvínā bhágam
1.044.08b     agníṃ víuṣṭiṣu kṣápaḥ
1.044.08c     káṇvāsas tvā sutásomāsa indhate
1.044.08d     havyavā^́haṃ suadhvara

1.044.09a     pátir hí adhvarā^́ṇãm
1.044.09b     ágne dūtó viśā^́m ási
1.044.09c     uṣarbúdha ā^́ vaha sómapītaye
1.044.09d     devā^́m̐ adyá suvardŕ̥śaḥ

1.044.10a     ágne pū^́rvā ánūṣáso vibhāvaso
1.044.10b     dīdétha viśvádarśataḥ
1.044.10c     ási grā^́meṣu avitā^́ puróhito
1.044.10d     ási yajñéṣu mā^́nuṣaḥ

1.044.11a     ní tvā yajñásya sā^́dhanam
1.044.11b     ágne hótāram r̥tvíjam
1.044.11c     manuṣvád deva dhīmahi prácetasaṃ
1.044.11d     jīráṃ dūtám ámartiyam

1.044.12a     yád devā^́nām mitramahaḥ puróhito
1.044.12b     ántaro yā^́si dūtíyam
1.044.12c     síndhor iva prásvanitāsa ūrmáyo
1.044.12d     agnér bhrājante arcáyaḥ

1.044.13a     śrudhí śrutkarṇa váhnibhir
1.044.13b     devaír agne sayā^́vabhiḥ
1.044.13c     ā^́ sīdantu barhíṣi mitró aryamā^́
1.044.13d     prātaryā^́vāṇo adhvarám

1.044.14a     śr̥ṇvántu stómam marútaḥ sudā^́navo
1.044.14b     agnijihvā^́ r̥tāvŕ̥dhaḥ
1.044.14c     píbatu sómaṃ váruṇo dhr̥távrato
1.044.14d     aśvíbhyām uṣásā sajū^́ḥ

45

1.045.01a     tuvám agne vásūm̐r ihá
1.045.01b     rudrā^́m̐ āditiyā^́m̐ utá
1.045.01c     yájā suadhvaráṃ jánam
1.045.01d     mánujātaṃ ghr̥taprúṣam

1.045.02a     śruṣṭīvā^́no hí dāśúṣe
1.045.02b     devā^́ agne vícetasaḥ
1.045.02c     tā^́n rohidaśva girvaṇas
1.045.02d     tráyastriṃśatam ā^́ vaha

1.045.03a     priyamedhavád atriváj
1.045.03b     jā^́tavedo virūpavát
1.045.03c     aṅgirasván mahivrata
1.045.03d     práskaṇvasya śrudhī hávam

1.045.04a     máhikerava ūtáye
1.045.04b     priyámedhā ahūṣata
1.045.04c     rā^́jantam adhvarā^́ṇãm
1.045.04d     agníṃ śukréṇa śocíṣā

1.045.05a     ghŕ̥tāhavana santiya
1.045.05b     imā^́ u ṣú śrudhī gíraḥ
1.045.05c     yā^́bhiḥ káṇvasya sūnávo
1.045.05d     hávante ávase tuvā

1.045.06a     tuvā^́ṃ citraśravastama
1.045.06b     hávante vikṣú jantávaḥ
1.045.06c     śocíṣkeśam purupriya
1.045.06d     ágne havyā^́ya vóḷhave

1.045.07a     ní tvā hótāram r̥tvíjaṃ
1.045.07b     dadhiré vasuvíttamam
1.045.07c     śrútkarṇaṃ sapráthastamaṃ
1.045.07d     víprā agne díviṣṭiṣu

1.045.08a     ā^́ tvā víprā acucyavuḥ
1.045.08b     sutásomā abhí práyaḥ
1.045.08c     br̥hád bhā^́ bíbhrato havír
1.045.08d     ágne mártāya dāśúṣe

1.045.09a     prātaryā^́vṇaḥ sahaskr̥ta
1.045.09b     somapéyāya santiya
1.045.09c     ihā^́dyá daíviyaṃ jánam
1.045.09d     barhír ā^́ sādayā vaso

1.045.10a     arvā^́ñcaṃ daíviyaṃ jánam
1.045.10b     ágne yákṣva sáhūtibhiḥ
1.045.10c     ayáṃ sómaḥ sudānavas
1.045.10d     tám pāta tiróahniyam

46

1.046.01a     eṣó uṣā^́ ápūrviyā
1.046.01b     ví uchati priyā^́ diváḥ
1.046.01c     stuṣé vām aśvinā br̥hát

1.046.02a     yā^́ dasrā^́ síndhumātarā
1.046.02b     manotárā rayīṇã^́m
1.046.02c     dhiyā^́ devā^́ vasuvídā

1.046.03a     vacyánte vāṃ kakuhā^́so
1.046.03b     jūrṇā^́yām ádhi viṣṭápi
1.046.03c     yád vāṃ rátho víbhiṣ pátāt

1.046.04a     havíṣā jāró apã^́m
1.046.04b     píparti pápurir narā
1.046.04c     pitā^́ kúṭasya carṣaṇíḥ

1.046.05a     ādāró vām matīnã^́ṃ
1.046.05b     nā^́satyā matavacasā
1.046.05c     pātáṃ sómasya dhr̥ṣṇuyā^́

1.046.06a     yā^́ naḥ pī^́parad aśvinā
1.046.06b     jyótiṣmatī támas tiráḥ
1.046.06c     tā^́m asmé rāsathām° íṣam

1.046.07a     ā^́ no nāvā^́ matīnã^́ṃ
1.046.07b     yātám pārā^́ya gántave
1.046.07c     yuñjā^́thām aśvinā rátham

1.046.08a     arítraṃ vāṃ divás pr̥thú
1.046.08b     tīrthé síndhūnãṃ ráthaḥ
1.046.08c     dhiyā^́ yuyujra índavaḥ

1.046.09a     divás kaṇvāsa índavo
1.046.09b     vásu síndhūnãm padé
1.046.09c     sváṃ vavríṃ kúha dhitsathaḥ

1.046.10a     ábhūd u bhā^́ u aṃśáve
1.046.10b     híraṇyam práti sū^́riyaḥ
1.046.10c     ví akhyaj jihváyā^́sitaḥ

1.046.11a     ábhūd u pārám étave
1.046.11b     pánthā r̥tásya sādhuyā^́
1.046.11c     ádarśi ví srutír diváḥ

1.046.12a     tát-tad íd aśvínor ávo
1.046.12b     jaritā^́ práti bhūṣati
1.046.12c     máde sómasya pípratoḥ

1.046.13a     vāvasānā^́ vivásvati
1.046.13b     sómasya pītiyā^́ girā^́
1.046.13c     manuṣvác chambhū ā^́ gatam

1.046.14a     yuvór uṣā^́ ánu śríyam
1.046.14b     párijmanor upā^́carat
1.046.14c     r̥tā^́ vanatho aktúbhiḥ

1.046.15a     ubhā^́ pibatam aśvinā
1.046.15b     ubhā^́ naḥ śárma yachatam
1.046.15c     avidriyā^́bhir ūtíbhiḥ

47

1.047.01a     ayáṃ vām mádhumattamaḥ
1.047.01b     sutáḥ sóma r̥tāvr̥dhā
1.047.01c     tám aśvinā pibataṃ tiróahniyaṃ
1.047.01d     dhattáṃ rátnāni dāśúṣe

1.047.02a     trivandhuréṇa trivŕ̥tā supéśasā
1.047.02b     ráthenā^́ yātam aśvinā
1.047.02c     káṇvāso vām bráhma kr̥ṇvanti adhvaré
1.047.02d     téṣāṃ sú śr̥ṇutaṃ hávam

1.047.03a     áśvinā mádhumattamam
1.047.03b     pātáṃ sómam r̥tāvr̥dhā
1.047.03c     áthādyá dasrā vásu bíbhratā ráthe
1.047.03d     dāśvā^́ṃsam úpa gachatam

1.047.04a     triṣadhasthé barhíṣi viśvavedasā
1.047.04b     mádhvā yajñám mimikṣatam
1.047.04c     káṇvāso vāṃ sutásomā abhídyavo
1.047.04d     yuvā^́ṃ havante aśvinā

1.047.05a     yā^́bhiḥ káṇvam abhíṣṭibhiḥ
1.047.05b     prā^́vataṃ yuvám aśvinā
1.047.05c     tā^́bhiḥ ṣú asmā^́m̐ avataṃ śubhas patī
1.047.05d     pātáṃ sómam r̥tāvr̥dhā

1.047.06a     sudā^́se dasrā vásu bíbhratā ráthe
1.047.06b     pŕ̥kṣo vahatam aśvinā
1.047.06c     rayíṃ samudrā^́d utá vā divás pári
1.047.06d     asmé dhattam puruspŕ̥ham

1.047.07a     yán nāsatyā parāváti
1.047.07b     yád vā sthó ádhi turváśe
1.047.07c     áto ráthena suvŕ̥tā na ā^́ gataṃ
1.047.07d     sākáṃ sū^́ryasya raśmíbhiḥ

1.047.08a     arvā^́ñcā vāṃ sáptayo adhvaraśríyo
1.047.08b     váhantu sávanéd úpa
1.047.08c     íṣam pr̥ñcántā sukŕ̥te sudā^́nava
1.047.08d     ā^́ barhíḥ sīdataṃ narā

1.047.09a     téna nāsatiyā^́ gataṃ
1.047.09b     ráthena sū^́riyatvacā
1.047.09c     yéna śáśvad ūháthur dāśúṣe vásu
1.047.09d     mádhvaḥ sómasya pītáye

1.047.10a     ukthébhir arvā^́g ávase purūvásū
1.047.10b     arkaíś ca ní hvayāmahe
1.047.10c     śáśvat káṇvānāṃ sádasi priyé hí kaṃ
1.047.10d     sómam papáthur aśvinā

48

1.048.01a     sahá vāména na uṣo
1.048.01b     ví uchā duhitar divaḥ
1.048.01c     sahá dyumnéna br̥hatā^́ vibhāvari
1.048.01d     rāyā^́ devi dã^́svatī

1.048.02a     áśvāvatīr gómatīr viśvasuvído
1.048.02b     bhū^́ri cyavanta vástave
1.048.02c     úd īraya práti mā sūnŕ̥tā uṣaś
1.048.02d     códa rā^́dho maghónãm

1.048.03a     uvā^́soṣā^́ uchā^́c ca nú
1.048.03b     devī^́ jīrā^́ ráthānãm
1.048.03c     yé asyā · ācáraṇeṣu dadhriré
1.048.03d     samudré ná śravasyávaḥ

1.048.04a     úṣo yé te · prá yā^́meṣu yuñjáte
1.048.04b     máno dānā^́ya sūráyaḥ
1.048.04c     átrā^́ha tát káṇva eṣāṃ káṇvatamo
1.048.04d     nā^́ma gr̥ṇāti nr̥̄ṇã^́m⁺

1.048.05a     ā^́ ghā yóṣeva sūnárī
1.048.05b     uṣā^́ yāti prabhuñjatī^́
1.048.05c     jaráyantī vŕ̥janam padvád īyata
1.048.05d     út pātayati pakṣíṇaḥ

1.048.06a     ví yā^́ sr̥játi sámanaṃ ví arthínaḥ
1.048.06b     padáṃ ná veti ódatī
1.048.06c     váyo nákiṣ ṭe paptivā^́ṃsa āsate
1.048.06d     víuṣṭau vājinīvati

1.048.07a     eṣā^́yukta parāvátaḥ
1.048.07b     sū^́ryasyodáyanād ádhi
1.048.07c     śatáṃ ráthebhiḥ subhágā uṣā^́ iyáṃ
1.048.07d     ví yāti abhí mā^́nuṣān

1.048.08a     víśvam asyā nānāma cákṣase jágaj
1.048.08b     jyótiṣ kr̥ṇoti sūnárī
1.048.08c     ápa dvéṣo maghónī duhitā^́ divá
1.048.08d     uṣā^́ uchad ápa srídhaḥ

1.048.09a     úṣa ā^́ bhāhi bhānúnā
1.048.09b     candréṇa duhitar divaḥ
1.048.09c     āváhantī bhū^́ri asmábhyaṃ saúbhagaṃ
1.048.09d     viuchántī díviṣṭiṣu

1.048.10a     víśvasya hí prā^́ṇanaṃ jī^́vanaṃ tuvé
1.048.10b     ví yád uchási sūnari
1.048.10c     sā^́ no ráthena br̥hatā^́ vibhāvari
1.048.10d     śrudhí citrāmaghe hávam

1.048.11a     úṣo vā^́jaṃ hí váṃsuva
1.048.11b     yáś citró mā^́nuṣe jáne
1.048.11c     ténā^́ vaha sukŕ̥to adhvarā^́m̐ úpa
1.048.11d     yé tvā gr̥ṇánti váhnayaḥ

1.048.12a     víśvān devā^́m̐ ā^́ vaha sómapītaye
1.048.12b     antárikṣād uṣas tuvám
1.048.12c     sā^́smā^́su dhā gómad áśvāvad ukthíyam
1.048.12d     úṣo vā^́jaṃ suvī^́riyam

1.048.13a     yásyā rúśanto arcáyaḥ
1.048.13b     práti bhadrā^́ ádr̥kṣata
1.048.13c     sā^́ no rayíṃ viśvávāraṃ supéśasam
1.048.13d     uṣā^́ dadātu súgmiyam

1.048.14a     yé cid dhí tvā^́m ŕ̥ṣayaḥ pū^́rva ūtáye
1.048.14b     juhūré ávase mahi
1.048.14c     sā^́ na stómām̐ abhí gr̥ṇīhi rā^́dhasā
1.048.14d     úṣaḥ śukréṇa śocíṣā

1.048.15a     úṣo yád adyá bhānúnā
1.048.15b     ví dvā^́rāv r̥ṇávo diváḥ
1.048.15c     prá no yachatād avr̥kám pr̥thú chardíḥ
1.048.15d     prá devi gómatīr íṣaḥ

1.048.16a     sáṃ no rāyā^́ br̥hatā^́ viśvápeśasā
1.048.16b     mimikṣvā^́ sám íḷābhir ā^́
1.048.16c     sáṃ dyumnéna viśvatúrā uṣo mahi
1.048.16d     sáṃ vā^́jair vājinīvati

49

1.049.01a     úṣo bhadrébhir ā^́ gahi
1.049.01b     diváś cid rocanā^́d ádhi
1.049.01c     váhantu aruṇápsava
1.049.01d     úpa tvā somíno gr̥hám

1.049.02a     supéśasaṃ sukháṃ ráthaṃ
1.049.02b     yám adhyásthā uṣas tuvám
1.049.02c     ténā suśrávasaṃ jánam
1.049.02d     prā^́vādyá duhitar divaḥ

1.049.03a     váyaś cit te patatríṇo
1.049.03b     dvipác cátuṣpad arjuni
1.049.03c     úṣaḥ prā^́rann r̥tū^́m̐r ánu
1.049.03d     divó ántebhiyas pári

1.049.04a     viuchántī hí raśmíbhir
1.049.04b     víśvam ābhā^́si rocanám
1.049.04c     tā^́ṃ tvā^́m uṣar vasūyávo
1.049.04d     gīrbhíḥ káṇvā ahūṣata

50

1.050.01a     úd u tyáṃ jātávedasaṃ
1.050.01b     deváṃ vahanti ketávaḥ
1.050.01c     dr̥śé víśvāya sū^́riyam

1.050.02a     ápa tyé tāyávo yathā
1.050.02b     nákṣatrā yanti aktúbhiḥ
1.050.02c     sū^́rāya viśvácakṣase

1.050.03a     ádr̥śram asya ketávo
1.050.03b     ví raśmáyo jánām̐ ánu
1.050.03c     bhrā^́janto agnáyo yathā

1.050.04a     taráṇir viśvádarśato
1.050.04b     jyotiṣkŕ̥d asi sūriya
1.050.04c     víśvam ā^́ bhāsi rocanám

1.050.05a     pratyáṅ devā^́nãṃ víśaḥ
1.050.05b     pratyáṅṅ úd eṣi mā^́nuṣān
1.050.05c     pratyáṅ víśvaṃ súvar dr̥śé

1.050.06a     yénā pavāka⁺ cákṣasā
1.050.06b     bhuraṇyántaṃ jánām̐ ánu
1.050.06c     tuváṃ varuṇa páśyasi

1.050.07a     ví dyā^́m eṣi rájas pr̥thú
1.050.07b     áhā mímāno aktúbhiḥ
1.050.07c     páśyañ jánmāni sūriya

1.050.08a     saptá tvā haríto ráthe
1.050.08b     váhanti deva sūriya
1.050.08c     śocíṣkeśaṃ vicakṣaṇa

1.050.09a     áyukta saptá śundhyúvaḥ
1.050.09b     sū^́ro ráthasya naptíyaḥ
1.050.09c     tā^́bhir yāti sváyuktibhiḥ

1.050.10a     úd vayáṃ támasas pári
1.050.10b     jyótiṣ páśyanta úttaram
1.050.10c     deváṃ devatrā^́ sū^́riyam
1.050.10d     áganma jyótir uttamám

1.050.11a     udyánn adyá mitramaha
1.050.11b     āróhann úttarāṃ dívam
1.050.11c     hr̥drogám máma sūriya
1.050.11d     harimā^́ṇaṃ ca nāśaya

1.050.12a     śúkeṣu me harimā^́ṇaṃ
1.050.12b     ropaṇā^́kāsu dadhmasi
1.050.12c     átho hāridravéṣu me
1.050.12d     harimā^́ṇaṃ ní dadhmasi

1.050.13a     úd agād ayám ādityó
1.050.13b     víśvena sáhasā sahá
1.050.13c     dviṣántam máhya° randháyan
1.050.13d     mó aháṃ dviṣaté radham

51

1.051.01a     abhí tyám meṣám puruhūtám r̥gmíyam
1.051.01b     índraṃ gīrbhír madatā vásvo arṇavám
1.051.01c     yásya dyā^́vo ná vicáranti mā^́nuṣā
1.051.01d     bhujé máṃhiṣṭham abhí vípram arcata

1.051.02a     abhī^́m avanvan suabhiṣṭím ūtáyo
1.051.02b     antarikṣaprā^́ṃ táviṣībhir ā^́vr̥tam
1.051.02c     índraṃ dákṣāsa r̥bhávo madacyútaṃ
1.051.02d     śatákratuṃ jávanī sūnŕ̥tā^́ruhat

1.051.03a     tuváṃ gotrám áṅgirobhyo 'vr̥ṇor ápa
1.051.03b     utā^́traye śatádureṣu gātuvít
1.051.03c     saséna cid vimadā^́yāvaho vásu
1.051.03d     ājā^́v ádriṃ vāvasānásya nartáyan

1.051.04a     tuvám apā^́m apidhā^́nāvr̥ṇor ápa
1.051.04b     ádhārayaḥ párvate dā^́numad vásu
1.051.04c     vr̥tráṃ yád indra śávasā^́vadhīr áhim
1.051.04d     ā^́d ít sū^́ryaṃ diví ā^́rohayo dr̥śé

1.051.05a     tuvám māyā^́bhir ápa māyíno 'dhamaḥ
1.051.05b     svadhā^́bhir yé ádhi śúptāv ájuhvata
1.051.05c     tuvám pípror nr̥maṇaḥ prā^́rujaḥ púraḥ
1.051.05d     prá rjíśvānaṃ dasyuhátyeṣu āvitha

1.051.06a     tuváṃ kútsaṃ śuṣṇahátyeṣu āvitha
1.051.06b     árandhayo atithigvā^́ya śámbaram
1.051.06c     mahā^́ntaṃ cid arbudáṃ ní kramīḥ padā^́
1.051.06d     sanā^́d evá dasyuhátyāya jajñiṣe

1.051.07a     tuvé víśvā táviṣī sadhríag ghitā^́
1.051.07b     táva rā^́dhaḥ somapīthā^́ya harṣate
1.051.07c     táva vájraś cikite bāhuvór hitó
1.051.07d     vr̥ścā^́ śátror áva víśvāni vŕ̥ṣṇiyā

1.051.08a     ví jānīhi ā^́riyān yé ca dásyavo
1.051.08b     barhíṣmate randhayā śā^́sad avratā^́n
1.051.08c     śā^́kī bhava yájamānasya coditā^́
1.051.08d     víśvét tā^́ te sadhamā^́deṣu cākana

1.051.09a     ánuvratāya randháyann ápavratān
1.051.09b     ābhū^́bhir índraḥ śnatháyann ánābhuvaḥ
1.051.09c     vr̥ddhásya cid várdhato dyā^́m ínakṣata
1.051.09d     stávāno vamró ví jaghāna saṃdíhaḥ

1.051.10a     tákṣad yát ta uśánā sáhasā sáho
1.051.10b     ví ródasī majmánā bādhate śávaḥ
1.051.10c     ā^́ tvā vā^́tasya nr̥maṇo manoyúja
1.051.10d     ā^́ pū^́ryamāṇam avahann abhí śrávaḥ

1.051.11a     mándiṣṭa yád uśáne kāviyé sácām̐
1.051.11b     índro vaṅkū^́ vaṅkutárā^́dhi tiṣṭhati
1.051.11c     ugró yayíṃ nír apáḥ srótasāsr̥jad
1.051.11d     ví śúṣṇasya dr̥ṃhitā^́ airayat púraḥ

1.051.12a     ā^́ smā ráthaṃ vr̥ṣapā^́ṇeṣu tiṣṭhasi
1.051.12b     śāryātásya prábhr̥tā yéṣu mándase
1.051.12c     índra yáthā sutásomeṣu cākáno
1.051.12d     anarvā^́ṇaṃ ślókam ā^́ rohase diví

1.051.13a     ádadā árbhām mahaté vacasyáve
1.051.13b     kakṣī^́vate vr̥cayā^́m indra sunvaté
1.051.13c     ménābhavo vr̥ṣaṇaśvásya sukrato
1.051.13d     víśvét tā^́ te sávaneṣu pravā^́ciyā

1.051.14a     índro aśrāyi sudhíyo nireké
1.051.14b     pajréṣu stómo dúriyo ná yū^́paḥ
1.051.14c     aśvayúr gavyū^́ rathayúr vasūyúr
1.051.14d     índra íd rāyáḥ kṣayati prayantā^́

1.051.15a     idáṃ námo vr̥ṣabhā^́ya svarā^́je
1.051.15b     satyáśuṣmāya taváse avāci
1.051.15c     asmínn indra vr̥jáne sárvavīrāḥ
1.051.15d     smát sūríbhis táva śárman siyāma

52

1.052.01a     tiyáṃ sú meṣám mahayā suvarvídaṃ
1.052.01b     śatáṃ yásya subhúvaḥ sākám ī^́rate
1.052.01c     átyaṃ ná vā^́jaṃ havanasyádaṃ rátham
1.052.01d     éndraṃ vavr̥tyām ávase suvr̥ktíbhiḥ

1.052.02a     sá párvato ná dharúṇeṣu ácyutaḥ
1.052.02b     sahásramūtis táviṣīṣu vāvr̥dhe
1.052.02c     índro yád vr̥trám ávadhīn nadīvŕ̥tam
1.052.02d     ubjánn árṇāṃsi járhr̥ṣāṇo ándhasā

1.052.03a     sá hí dvaró dvaríṣu vavrá ū^́dhani
1.052.03b     candrábudhno mádavr̥ddho manīṣíbhiḥ
1.052.03c     índraṃ tám ahve suapasyáyā dhiyā^́
1.052.03d     máṃhiṣṭharātiṃ sá hí páprir ándhasaḥ

1.052.04a     ā^́ yám pr̥ṇánti diví sádmabarhiṣaḥ
1.052.04b     samudráṃ ná subhúvaḥ svā^́ abhíṣṭayaḥ
1.052.04c     táṃ vr̥trahátye ánu tasthur ūtáyaḥ
1.052.04d     śúṣmā índram avātā^́ áhrutapsavaḥ

1.052.05a     abhí svávr̥ṣṭim máde asya yúdhyato
1.052.05b     raghvī^́r iva pravaṇé sasrur ūtáyaḥ
1.052.05c     índro yád vajrī^́ dhr̥ṣámāṇo ándhasā
1.052.05d     bhinád valásya paridhī^́m̐r iva tritáḥ

1.052.06a     párīṃ ghr̥ṇā^́ carati titviṣé śávo
1.052.06b     apó vr̥tvī^́ rájaso budhnám ā^́śayat
1.052.06c     vr̥trásya yát pravaṇé durgŕ̥bhiśvano
1.052.06d     nijaghántha hánuvor indra tanyatúm

1.052.07a     hradáṃ ná hí tvā nir̥ṣánti ūrmáyo
1.052.07b     bráhmāṇi indra táva yā^́ni várdhanā
1.052.07c     tváṣṭā cit te yújiyaṃ vāvr̥dhe śávas
1.052.07d     tatákṣa vájram abhíbhūtiojasam

1.052.08a     jaghanvā^́m̐ u háribhiḥ sambhr̥takratav
1.052.08b     índra vr̥trám mánuṣe gātuyánn apáḥ
1.052.08c     áyachathā bāhuvór vájram āyasám
1.052.08d     ádhārayo diví ā^́ sū^́riyaṃ dr̥śé

1.052.09a     br̥hát sváścandram ámavad yád ukthíyam
1.052.09b     ákr̥ṇvata bhiyásā róhaṇaṃ diváḥ
1.052.09c     yán mā^́nuṣapradhanā índram ūtáyaḥ
1.052.09d     súvar nr̥ṣā^́co marútó 'madann ánu

1.052.10a     diyaúś cid asya ámavām̐ áheḥ svanā^́d
1.052.10b     áyoyavīd bhiyásā vájra indra te
1.052.10c     vr̥trásya yád badbadhānásya rodasī
1.052.10d     máde sutásya śávasā^́bhinac chíraḥ

1.052.11a     yád ín nú indra pr̥thivī^́ dáśabhujir
1.052.11b     áhāni víśvā tatánanta kr̥ṣṭáyaḥ
1.052.11c     átrā^́ha te maghavan víśrutaṃ sáho
1.052.11d     diyā^́m ánu śávasā barháṇā bhuvat

1.052.12a     tvám asyá pāré rájaso víomanaḥ
1.052.12b     svábhūtiojā ávase dhr̥ṣanmanaḥ
1.052.12c     cakr̥ṣé bhū^́mim pratimā^́nam ójaso
1.052.12d     apáḥ súvaḥ paribhū^́r eṣi ā^́ dívam

1.052.13a     tuvám bhuvaḥ pratimā^́nam pr̥thivyā^́
1.052.13b     r̥ṣvávīrasya br̥hatáḥ pátir bhūḥ
1.052.13c     víśvam ā^́prā antárikṣam mahitvā^́
1.052.13d     satyám addhā^́ nákir anyás tuvā^́vān

1.052.14a     ná yásya dyā^́vāpr̥thivī^́ ánu vyáco
1.052.14b     ná síndhavo rájaso ántam ānaśúḥ
1.052.14c     nótá svávr̥ṣṭim máde asya yúdhyata
1.052.14d     éko anyác cakr̥ṣe víśvam ānuṣák

1.052.15a     ā^́rcann átra marútaḥ sásmin ājaú
1.052.15b     víśve devā^́so amadann ánu tvā
1.052.15c     vr̥trásya yád bhr̥ṣṭimátā vadhéna
1.052.15d     ní tvám indra práti ānáṃ jaghántha

53

1.053.01a     ní ū ṣú vā^́cam prá mahé bharāmahe
1.053.01b     gíra índrāya sádane vivásvataḥ
1.053.01c     nū^́ cid dhí rátnaṃ sasatā^́m ivā^́vidan
1.053.01d     ná duṣṭutír draviṇodéṣu śasyate

1.053.02a     duró áśvasya durá indra gór asi
1.053.02b     duró yávasya vásuna inás pátiḥ
1.053.02c     śikṣānaráḥ pradívó 'kāmakarśanaḥ°
1.053.02d     sákhā sákhibhyas tám idáṃ gr̥ṇīmasi

1.053.03a     śácīva indra purukr̥d dyumattama
1.053.03b     távéd idám abhítaś cekite vásu
1.053.03c     átaḥ saṃgŕ̥bhya abhibhūta ā^́ bhara
1.053.03d     mā^́ tvāyató jaritúḥ kā^́mam ūnayīḥ

1.053.04a     ebhír dyúbhiḥ sumánā ebhír índubhir
1.053.04b     nirundhānó ámatiṃ góbhir aśvínā
1.053.04c     índreṇa dásyuṃ daráyanta índubhir
1.053.04d     yutádveṣasaḥ sám iṣā^́ rabhemahi

1.053.05a     sám indra rāyā^́ sám iṣā^́ rabhemahi
1.053.05b     sáṃ vā^́jebhiḥ puruścandraír abhídyubhiḥ
1.053.05c     sáṃ deviyā^́ prámatī° vīráśuṣmayā
1.053.05d     góagrayā áśvavatyā° rabhemahi

1.053.06a     té tvā mádā amadan tā^́ni vŕ̥ṣṇiyā
1.053.06b     té sómāso vr̥trahátyeṣu satpate
1.053.06c     yát kāráve dáśa vr̥trā^́ṇi apratí
1.053.06d     barhíṣmate ní sahásrāṇi barháyaḥ

1.053.07a     yudhā^́ yúdham úpa ghéd eṣi dhr̥ṣṇuyā^́
1.053.07b     purā^́ púraṃ sám idáṃ haṃsi ójasā
1.053.07c     námyā yád indra sákhiyā parāváti
1.053.07d     nibarháyo námuciṃ nā^́ma māyínam

1.053.08a     tuváṃ kárañjam utá parṇáyaṃ vadhīs
1.053.08b     téjiṣṭhayā atithigvásya vartanī^́
1.053.08c     tuváṃ śatā^́ váṅgr̥dasyābhinat púro
1.053.08d     anānudáḥ páriṣūtā r̥jíśvanā

1.053.09a     tuvám etā^́ñ janarā^́jño duvír dáśa
1.053.09b     abandhúnā suśrávasopajagmúṣaḥ
1.053.09c     ṣaṣṭíṃ sahásrā navatíṃ náva śrutó
1.053.09d     ní cakréṇa ráthiyā duṣpádāvr̥ṇak

1.053.10a     tvám āvitha suśrávasaṃ távotíbhis
1.053.10b     táva trā^́mabhir indra tū^́rvayāṇam
1.053.10c     tvám asmai kútsam atithigvám āyúm
1.053.10d     mahé rā^́jñe yū^́ne arandhanāyaḥ

1.053.11a     yá udŕ̥ci indara⁺ devágopāḥ
1.053.11b     sákhāyas te śivátamā ásāma
1.053.11c     tuvā^́ṃ stoṣāma tuváyā suvī^́rā
1.053.11d     drā^́ghīya ā^́yuḥ prataráṃ dádhānāḥ

54

1.054.01a     mā^́ no asmín maghavan pr̥tsú áṃhasi
1.054.01b     nahí te ántaḥ śávasaḥ parīṇáśe
1.054.01c     ákrandayo nadíyo róruvad vánā
1.054.01d     kathā^́ ná kṣoṇī^́r bhiyásā sám ārata

1.054.02a     árcā śakrā^́ya śākíne śácīvate
1.054.02b     śr̥ṇvántam índram maháyann abhí ṣṭuhi
1.054.02c     yó dhr̥ṣṇúnā śávasā ródasī ubhé
1.054.02d     vŕ̥ṣā vr̥ṣatvā^́ vr̥ṣabhó nir̥ñjáte

1.054.03a     árcā divé br̥haté śūṣíyaṃ vácaḥ
1.054.03b     svákṣatraṃ yásya dhr̥ṣató dhr̥ṣán mánaḥ
1.054.03c     br̥hácchravā ásuro barháṇā kr̥táḥ
1.054.03d     puró háribhyāṃ vr̥ṣabhó rátho hí ṣáḥ

1.054.04a     tuváṃ divó br̥hatáḥ sā^́nu kopayo
1.054.04b     áva tmánā dhr̥ṣatā^́ śámbaram bhinat
1.054.04c     yán māyíno vrandíno mandínā dhr̥ṣác
1.054.04d     chitā^́ṃ gábhastim aśánim pr̥tanyási

1.054.05a     ní yád vr̥ṇákṣi śvasanásya mūrdháni
1.054.05b     śúṣṇasya cid vrandíno róruvad vánā
1.054.05c     prācī^́nena mánasā barháṇāvatā
1.054.05d     yád adyā^́ cit kr̥ṇávaḥ kás tuvā pári

1.054.06a     tvám āvitha náriyaṃ turváśaṃ yáduṃ
1.054.06b     tuváṃ turvī^́tiṃ vayíyaṃ śatakrato
1.054.06c     tuváṃ rátham étaśaṃ kŕ̥tviye dháne
1.054.06d     tuvám púro navatíṃ dambhayo náva

1.054.07a     sá ghā rā^́jā sátpatiḥ śūśuvaj jáno
1.054.07b     rātáhavyaḥ práti yáḥ śā^́sam ínvati
1.054.07c     ukthā^́ vā yó abhigr̥ṇā^́ti rā^́dhasā
1.054.07d     dā^́nur asmā úparā pinvate diváḥ

1.054.08a     ásamaṃ kṣatrám ásamā manīṣā^́
1.054.08b     prá somapā^́ ápasā santu néme
1.054.08c     yé ta indra dadúṣo vardháyanti
1.054.08d     máhi kṣatráṃ stháviraṃ vŕ̥ṣṇiyaṃ ca

1.054.09a     túbhyéd eté bahulā^́ ádridugdhāś
1.054.09b     camūṣádaś camasā^́ indrapā^́nāḥ
1.054.09c     ví aśnuhi tarpáyā kā^́mam eṣām
1.054.09d     áthā máno vasudéyāya kr̥ṣva

1.054.10a     apā^́m atiṣṭhad dharúṇahvaraṃ támo
1.054.10b     antár vr̥trásya jaṭháreṣu párvataḥ
1.054.10c     abhī^́m índro nadíyo vavríṇā hitā^́
1.054.10d     víśvā anuṣṭhā^́ḥ pravaṇéṣu jighnate

1.054.11a     sá śévr̥dham ádhi dhā dyumnám asmé
1.054.11b     máhi kṣatráṃ janāṣā^́ḷ indra távyam
1.054.11c     rákṣā ca no maghónaḥ pāhí sūrī^́n
1.054.11d     rāyé ca naḥ suapatyā^́ iṣé dhāḥ

55

1.055.01a     diváś cid asya varimā^́ ví papratha
1.055.01b     índraṃ ná mahnā^́ pr̥thivī^́ caná práti
1.055.01c     bhīmás túviṣmāñ carṣaṇíbhya ātapáḥ
1.055.01d     śíśīte vájraṃ téjase ná váṃsagaḥ

1.055.02a     só arṇavó ná nadíyaḥ samudríyaḥ
1.055.02b     práti gr̥bhṇāti víśritā várīmabhiḥ
1.055.02c     índraḥ sómasya pītáye vr̥ṣāyate
1.055.02d     sanā^́t sá yudhmá ójasā panasyate

1.055.03a     tuváṃ tám indra párvataṃ ná bhójase
1.055.03b     mahó nr̥mṇásya dhármaṇām irajyasi
1.055.03c     prá vīríyeṇa devátā^́ti cekite
1.055.03d     víśvasmā ugráḥ kármaṇe puróhitaḥ

1.055.04a     sá íd váne namasyúbhir vacasyate
1.055.04b     cā^́ru jáneṣu prabruvāṇá indriyám
1.055.04c     vŕ̥ṣā chándur bhavati haryató vŕ̥ṣā
1.055.04d     kṣémeṇa dhénām maghávā yád ínvati

1.055.05a     sá ín mahā^́ni samithā^́ni majmánā
1.055.05b     kr̥ṇóti yudhmá ójasā jánebhiyaḥ
1.055.05c     ádhā caná śrád dadhati tvíṣīmata
1.055.05d     índrāya vájraṃ nighánighnate vadhám

1.055.06a     sá hí śravasyúḥ sádanāni kr̥trímā
1.055.06b     kṣmayā^́ vr̥dhāná ójasā vināśáyan
1.055.06c     jyótīṃṣi kr̥ṇvánn avr̥kā^́ṇi yájyave
1.055.06d     áva sukrátuḥ sártavā^́ apáḥ sr̥jat

1.055.07a     dānā^́ya mánaḥ somapāvan astu te
1.055.07b     arvā^́ñcā hárī vandanaśrud ā^́ kr̥dhi
1.055.07c     yámiṣṭhāsaḥ sā^́rathayo yá indra te
1.055.07d     ná tvā kétā ā^́ dabhnuvanti bhū^́rṇayaḥ

1.055.08a     áprakṣitaṃ vásu bibharṣi hástayor
1.055.08b     áṣāḷhaṃ sáhas tanúvi śrutó dadhe
1.055.08c     ā^́vr̥tāso avatā^́so ná kartŕ̥bhis
1.055.08d     tanū^́ṣu te krátava indra bhū^́rayaḥ

56

1.056.01a     eṣá prá pūrvī^́r áva tásya camríṣo
1.056.01b     átyo ná yóṣām úd ayaṃsta bhurváṇiḥ
1.056.01c     dákṣam mahé pāyayate hiraṇyáyaṃ
1.056.01d     rátham āvŕ̥tyā háriyogam ŕ̥bhvasam

1.056.02a     táṃ gūrtáyo nemanníṣaḥ párīṇasaḥ
1.056.02b     samudráṃ ná saṃcáraṇe saniṣyávaḥ
1.056.02c     pátiṃ dákṣasya vidáthasya nū^́ sáho
1.056.02d     giríṃ ná venā^́ ádhi roha téjasā

1.056.03a     sá turváṇir mahā^́m̐ areṇú paúṃsiye
1.056.03b     girér bhr̥ṣṭír ná bhrājate tujā^́ śávaḥ
1.056.03c     yéna śúṣṇam māyínam āyasó máde
1.056.03d     dudhrá ābhū^́ṣu rāmáyan ní dā^́mani

1.056.04a     devī^́ yádi táviṣī tvā^́vr̥dhotáya
1.056.04b     índraṃ síṣakti uṣásaṃ ná sū^́riyaḥ
1.056.04c     yó dhr̥ṣṇúnā śávasā bā^́dhate táma
1.056.04d     íyarti reṇúm br̥hád arhariṣváṇiḥ

1.056.05a     ví yát tiró dharúṇam ácyutaṃ rájo
1.056.05b     átiṣṭhipo divá ā^́tāsu barháṇā
1.056.05c     súvarmīḷhe yán máda indra hárṣiyā
1.056.05d     áhan vr̥tráṃ nír apā^́m aubjo arṇavám

1.056.06a     tuváṃ divó dharúṇaṃ dhiṣa ójasā
1.056.06b     pr̥thivyā^́ indra sádaneṣu mā^́hinaḥ
1.056.06c     tuváṃ sutásya máde ariṇā apó
1.056.06d     ví vr̥trásya samáyā pāṣíyārujaḥ

57

1.057.01a     prá máṃhiṣṭhāya br̥haté br̥hádraye
1.057.01b     satyáśuṣmāya taváse matím bhare
1.057.01c     apā^́m iva pravaṇé yásya durdháraṃ
1.057.01d     rā^́dho viśvā^́yu śávase ápāvr̥tam

1.057.02a     ádha te víśvam ánu hāsad iṣṭáya
1.057.02b     ā^́po nimnéva sávanā havíṣmataḥ
1.057.02c     yát párvate ná samáśīta haryatá
1.057.02d     índrasya vájraḥ śnáthitā hiraṇyáyaḥ

1.057.03a     asmaí bhīmā^́ya námasā sám adhvará
1.057.03b     úṣo ná śubhra ā^́ bharā pánīyase
1.057.03c     yásya dhā^́ma śrávase nā^́ma indriyáṃ
1.057.03d     jyótir ákāri haríto ná áyase

1.057.04a     imé ta indra té vayám puruṣṭuta
1.057.04b     yé tvārábhya cárāmasi prabhūvaso
1.057.04c     nahí tvád anyó girvaṇo gíraḥ sághat
1.057.04d     kṣoṇī^́r iva práti no harya tád vácaḥ

1.057.05a     bhū^́ri ta indra vīríyaṃ táva smasi
1.057.05b     asyá stotúr maghavan kā^́mam ā^́ pr̥ṇa
1.057.05c     ánu te dyaúr br̥hatī^́ vīríyam mama
1.057.05d     iyáṃ ca te pr̥thivī^́ nema ójase

1.057.06a     tuváṃ tám indra párvatam mahā^́m urúṃ
1.057.06b     vájreṇa vajrin parvaśáś cakartitha
1.057.06c     ávāsr̥jo nívr̥tāḥ sártavā^́ apáḥ
1.057.06d     satrā^́ víśvaṃ dadhiṣe kévalaṃ sáhaḥ

58

1.058.01a     nū^́ cit sahojā^́ amŕ̥to ní tundate
1.058.01b     hótā yád dūtó ábhavad vivásvataḥ
1.058.01c     ví sā^́dhiṣṭhebhiḥ pathíbhī rájo mama
1.058.01d     ā^́ devátātā havíṣā vivāsati

1.058.02a     ā^́ suvám ádma yuvámāno ajáras
1.058.02b     tr̥ṣú aviṣyánn ataséṣu tiṣṭhati
1.058.02c     átyo ná pr̥ṣṭhám pruṣitásya rocate
1.058.02d     divó ná sā^́nu stanáyann acikradat

1.058.03a     krāṇā^́ rudrébhir vásubhiḥ puróhito
1.058.03b     hótā níṣatto rayiṣā^́ḷ ámartiyaḥ
1.058.03c     rátho ná vikṣú r̥ñjasāná āyúṣu
1.058.03d     ví ānuṣág vā^́riyā devá r̥ṇvati

1.058.04a     ví vā^́tajūto ataséṣu tiṣṭhate
1.058.04b     vŕ̥thā juhū^́bhiḥ sŕ̥ṇiyā tuviṣváṇiḥ
1.058.04c     tr̥ṣú yád agne vaníno vr̥ṣāyáse
1.058.04d     kr̥ṣṇáṃ ta éma rúśadūrme ajara

1.058.05a     tápurjambho vána ā^́ vā^́tacodito
1.058.05b     yūthé ná sāhvā^́m̐ áva vāti váṃsagaḥ
1.058.05c     abhivrájann ákṣitam pā^́jasā rája
1.058.05d     sthātúś carátham bhayate patatríṇaḥ

1.058.06a     dadhúṣ ṭuvā bhŕ̥gavo mā^́nuṣeṣv ā^́
1.058.06b     rayíṃ ná cā^́ruṃ suhávaṃ jánebhyaḥ
1.058.06c     hótāram agne átithiṃ váreṇyam
1.058.06d     mitráṃ ná śévaṃ diviyā^́ya jánmane

1.058.07a     hótāraṃ saptá juhúvo yájiṣṭhaṃ
1.058.07b     yáṃ vāgháto vr̥ṇáte adhvaréṣu
1.058.07c     agníṃ víśveṣām aratíṃ vásūnāṃ
1.058.07d     saparyā^́mi práyasā yā^́mi rátnam

1.058.08a     áchidrā sūno sahaso no adyá
1.058.08b     stotŕ̥bhyo mitramahaḥ śárma yacha
1.058.08c     ágne gr̥ṇántam áṃhasa uruṣya
1.058.08d     ū^́rjo napāt · pūrbhír ā^́yasībhiḥ

1.058.09a     bhávā várūthaṃ gr̥ṇaté vibhāvo
1.058.09b     bhávā maghavan maghávadbhyaḥ śárma
1.058.09c     uruṣyá agne áṃhaso gr̥ṇántam
1.058.09d     prātár makṣū^́ dhiyā^́vasur jagamyāt

59

1.059.01a     vayā^́ íd agne agnáyas te anyé
1.059.01b     tuvé víśve amŕ̥tā mādayante
1.059.01c     vaíśvānara nā^́bhir asi kṣitīnā^́ṃ
1.059.01d     sthū^́ṇeva jánām̐ upamíd yayantha

1.059.02a     mūrdhā^́ divó nā^́bhir agníḥ pr̥thivyā^́
1.059.02b     áthābhavad aratī^́ ródasīyoḥ
1.059.02c     táṃ tvā devā^́so 'janayanta deváṃ
1.059.02d     vaíśvānara jyótir íd ā^́riyāya

1.059.03a     ā^́ sū^́riye ná raśmáyo dhruvā^́so
1.059.03b     vaiśvānaré dadhire 'gnā^́ vásūni
1.059.03c     yā^́ párvateṣu óṣadhīṣu apsú
1.059.03d     yā^́ mā^́nuṣeṣu ási tásya rā^́jā

1.059.04a     br̥hatī^́ iva sūnáve ródasī
1.059.04b     gíro hótā manuṣíyo ná dákṣaḥ
1.059.04c     súvarvate satyáśuṣmāya pūrvī^́r
1.059.04d     vaiśvānarā^́ya nŕ̥tamāya yahvī^́ḥ

1.059.05a     diváś cit te br̥ható jātavedo
1.059.05b     vaíśvānara prá ririce mahitvám
1.059.05c     rā^́jā kr̥ṣṭīnā^́m asi mā^́nuṣīṇāṃ
1.059.05d     yudhā^́ devébhyo várivaś cakartha

1.059.06a     prá nū^́ mahitváṃ vr̥ṣabhásya vocaṃ
1.059.06b     yám pūrávo vr̥traháṇaṃ sácante
1.059.06c     vaiśvānaró dásyum agnír jaghanvā^́m̐
1.059.06d     ádhūnot kā^́ṣṭhā áva śámbaram bhet

1.059.07a     vaiśvānaró mahimnā^́ viśvákr̥ṣṭir
1.059.07b     bharádvājeṣu yajató vibhā^́vā
1.059.07c     śātavaneyé śatínībhir agníḥ
1.059.07d     puruṇīthé jarate sūnŕ̥tāvān

60

1.060.01a     váhniṃ yaśásaṃ vidáthasya ketúṃ
1.060.01b     suprāvíyaṃ · dūtáṃ sadyóartham
1.060.01c     dvijánmānaṃ rayím iva praśastáṃ
1.060.01d     rātím bharad bhŕ̥gave mātaríśvā

1.060.02a     asyá śā^́sur ubháyāsaḥ sacante
1.060.02b     havíṣmanta uśíjo yé ca mártāḥ
1.060.02c     diváś cit pū^́rvo ní asādi hótā
1.060.02d     āpŕ̥chiyo viśpátir vikṣú vedhā^́ḥ

1.060.03a     táṃ návyasī hr̥dá ā^́ jā^́yamānam
1.060.03b     asmát sukīrtír mádhujihvam aśyāḥ
1.060.03c     yám r̥tvíjo vr̥jáne mā^́nuṣāsaḥ
1.060.03d     práyasvanta āyávo jī^́jananta

1.060.04a     uśík pavākó⁺ vásur mā^́nuṣeṣu
1.060.04b     váreṇiyo hótā adhāyi vikṣú
1.060.04c     dámūnā · gr̥hápatir dáma ā^́m̐
1.060.04d     agnír bhuvad rayipátī rayīṇā^́m

1.060.05a     táṃ tvā vayám pátim agne rayīṇā^́m
1.060.05b     prá śaṃsāmo matíbhir gótamāsaḥ
1.060.05c     āśúṃ ná vājambharám marjáyantaḥ
1.060.05d     prātár makṣū^́ dhiyā^́vasur jagamyāt

61

1.061.01a     asmā^́ íd u prá taváse turā^́ya
1.061.01b     práyo ná harmi stómam mā^́hināya
1.061.01c     ŕ̥cīṣamāya ádhrigava óham
1.061.01d     índrāya · bráhmāṇi rātátamā

1.061.02a     asmā^́ íd u práya iva prá yaṃsi
1.061.02b     bhárāmi āṅgūṣám bā^́dhe suvr̥ktí
1.061.02c     índrāya hr̥dā^́ mánasā manīṣā^́
1.061.02d     pratnā^́ya pátye dhíyo marjayanta

1.061.03a     asmā^́ íd u tyám upamáṃ suvarṣā^́m
1.061.03b     bhárāmi · āṅgūṣám āsíyena
1.061.03c     máṃhiṣṭham · áchoktibhir matīnā^́ṃ
1.061.03d     suvr̥ktíbhiḥ · sūríṃ vāvr̥dhádhyai

1.061.04a     asmā^́ íd u · stómaṃ sáṃ hinomi
1.061.04b     ráthaṃ ná · táṣṭeva tátsināya
1.061.04c     gíraś ca · gírvāhase suvr̥ktí
1.061.04d     índrāya viśvaminvám médhirāya

1.061.05a     asmā^́ íd u sáptim iva śravasyā^́
1.061.05b     índrāya arkáṃ juhúvā sám añje
1.061.05c     vīráṃ dānáokasaṃ vandádhyai
1.061.05d     purā^́ṃ gūrtáśravasaṃ darmā^́ṇam

1.061.06a     asmā^́ íd u tváṣṭā takṣad vájraṃ
1.061.06b     suápastamaṃ svaríyaṃ ráṇāya
1.061.06c     vr̥trásya cid · vidád yéna márma
1.061.06d     tujánn ī^́śānas tujatā^́ kiyedhā^́ḥ

1.061.07a     asyéd u mātúḥ sávaneṣu sadyó
1.061.07b     maháḥ pitúm papivā^́ñ cā^́ru ánnā
1.061.07c     muṣāyád víṣṇuḥ pacatáṃ sáhīyān
1.061.07d     vídhyad varāháṃ tiró ádrim ástā

1.061.08a     asmā^́ íd u · gnā^́ś cid devápatnīr
1.061.08b     índrāya arkám ahihátya ūvuḥ
1.061.08c     pári dyā^́vāpr̥thivī^́ jabhra urvī^́
1.061.08d     ná asya té mahimā^́nam pári ṣṭaḥ

1.061.09a     asyéd evá prá ririce mahitváṃ
1.061.09b     divás pr̥thivyā^́ḥ pári antárikṣāt
1.061.09c     svarā^́ḷ índro dáma ā^́ viśvágūrtaḥ
1.061.09d     svarír ámatro vavakṣe ráṇāya

1.061.10a     asyéd evá · śávasā śuṣántaṃ
1.061.10b     ví vr̥ścad · vájreṇa vr̥trám índraḥ
1.061.10c     gā^́ ná vrāṇā^́ · avánīr amuñcad
1.061.10d     abhí śrávo · dāváne sácetāḥ

1.061.11a     asyéd u tveṣásā ranta síndhavaḥ
1.061.11b     pári yád · vájreṇa sīm áyachat
1.061.11c     īśānakŕ̥d · dāśúṣe daśasyán
1.061.11d     turvī^́taye · gādháṃ turváṇiḥ kaḥ

1.061.12a     asmā^́ íd u prá bharā tū^́tujāno
1.061.12b     vr̥trā^́ya vájram ī^́śānaḥ kiyedhā^́ḥ
1.061.12c     gór ná párva · ví radā tiraścā^́
1.061.12d     íṣyann árṇāṃsi apā^́ṃ carádhyai

1.061.13a     asyéd u · prá brūhi pūrviyā^́ṇi
1.061.13b     turásya · kármāṇi návya ukthaíḥ
1.061.13c     yudhé yád · iṣṇāná ā^́yudhāni
1.061.13d     r̥ghāyámāṇo niriṇā^́ti śátrūn

1.061.14a     asyéd u bhiyā^́ giráyaś ca dr̥̄ḷhā^́+
1.061.14b     dyā^́vā ca bhū^́mā janúṣas tujete
1.061.14c     úpo venásya jóguvāna oṇíṃ
1.061.14d     sadyó bhuvad · vīríyāya nodhā^́ḥ

1.061.15a     asmā^́ íd u tyád ánu dāyi eṣām
1.061.15b     éko yád vavné bhū^́rer ī^́śānaḥ
1.061.15c     prá étaśaṃ sū^́riye paspr̥dhānáṃ
1.061.15d     saúvaśviye · súṣvim āvad índraḥ

1.061.16a     evā^́ te hāriyojanā suvr̥ktí
1.061.16b     índra bráhmāṇi gótamāso akran
1.061.16c     ā^́ eṣu viśvápeśasaṃ dhíyaṃ dhāḥ
1.061.16d     prātár makṣū^́ dhiyā^́vasur jagamyāt

62

1.062.01a     prá manmahe śavasānā^́ya śūṣám
1.062.01b     āṅgūṣáṃ gírvaṇase aṅgirasvát
1.062.01c     suvr̥ktíbhi stuvatá r̥gmiyā^́ya
1.062.01d     árcāma arkáṃ náre víśrutāya

1.062.02a     prá vo mahé máhi námo bharadhvam
1.062.02b     āṅgūṣíyaṃ śavasānā^́ya sā^́ma
1.062.02c     yénā naḥ pū^́rve pitáraḥ padajñā^́
1.062.02d     árcanto áṅgiraso gā^́ ávindan

1.062.03a     índrasya · áṅgirasāṃ ca iṣṭaú
1.062.03b     vidát sarámā tánayāya dhāsím
1.062.03c     bŕ̥haspátir bhinád ádriṃ vidád gā^́ḥ
1.062.03d     sám usríyābhir vāvaśanta náraḥ

1.062.04a     sá suṣṭúbhā sá stubhā^́ saptá vípraiḥ
1.062.04b     svaréṇa ádriṃ svaríyo návagvaiḥ
1.062.04c     saraṇyúbhiḥ phaligám indra śakra
1.062.04d     valáṃ ráveṇa darayo dáśagvaiḥ

1.062.05a     gr̥ṇānó áṅgirobhir dasma ví var
1.062.05b     uṣásā sū^́riyeṇa góbhir ándhaḥ
1.062.05c     ví bhū^́myā aprathaya indra sā^́nu
1.062.05d     divó rája úparam astabhāyaḥ

1.062.06a     tád u práyakṣatamam asya kárma
1.062.06b     dasmásya cā^́rutamam asti dáṃsaḥ
1.062.06c     upahvaré yád úparā ápinvan
1.062.06d     mádhuarṇaso nadíyaś cátasraḥ

1.062.07a     dvitā^́ ví vavre sanájā sánīḷe
1.062.07b     ayā^́siya stávamānebhir arkaíḥ
1.062.07c     bhágo ná méne paramé víomann
1.062.07d     ádhārayad · ródasī sudáṃsāḥ

1.062.08a     sanā^́d dívam pári bhū^́mā vírūpe
1.062.08b     punarbhúvā yuvatī^́ svébhir évaiḥ
1.062.08c     kr̥ṣṇébhir aktā^́ uṣā^́ rúśadbhir
1.062.08d     vápurbhir ā^́ carato anyā^́anyā

1.062.09a     sánemi sakhyáṃ suapasyámānaḥ
1.062.09b     sūnúr dādhāra śávasā sudáṃsāḥ
1.062.09c     āmā^́su cid dadhiṣe pakvám antáḥ
1.062.09d     páyaḥ kr̥ṣṇā^́su rúśad róhiṇīṣu

1.062.10a     sanā^́t sánīḷā avánīr avātā^́
1.062.10b     vratā^́ rakṣante amŕ̥tāḥ sáhobhiḥ
1.062.10c     purū^́ sahásrā jánayo ná pátnīr
1.062.10d     duvasyánti svásāro áhrayāṇam

1.062.11a     sanāyúvo námasā návyo arkaír
1.062.11b     vasūyávo matáyo dasma dadruḥ
1.062.11c     pátiṃ ná pátnīr uśatī^́r uśántaṃ
1.062.11d     spr̥śánti tvā śavasāvan manīṣā^́ḥ

1.062.12a     sanā^́d evá táva rā^́yo gábhastau
1.062.12b     ná kṣī^́yante nópa dasyanti dasma
1.062.12c     dyumā^́m̐ asi krátumām̐ indra dhī^́raḥ
1.062.12d     śíkṣā śacīvas táva naḥ śácībhiḥ

1.062.13a     sanāyaté gótama indra návyam
1.062.13b     átakṣad bráhma hariyójanāya
1.062.13c     sunīthā^́ya naḥ śavasāna nodhā^́ḥ
1.062.13d     prātár makṣū^́ dhiyā^́vasur jagamyāt

63

1.063.01a     tuvám mahā^́m̐ indara⁺ yó ha śúṣmair
1.063.01b     dyā^́vā jajñānáḥ pr̥thivī^́ áme dhāḥ
1.063.01c     yád dha te víśvā giráyaś cid ábhvā
1.063.01d     bhiyā^́ dr̥̄ḷhā^́saḥ⁺ kiráṇā ná aíjan

1.063.02a     ā^́ yád dhárī indara⁺ vívratā vér
1.063.02b     ā^́ te vájraṃ jaritā^́ bāhuvór dhāt
1.063.02c     yénāviharyatakrato amítrān
1.063.02d     púra iṣṇā^́si puruhūta pūrvī^́ḥ

1.063.03a     tuváṃ satyá indara⁺ dhr̥ṣṇúr etā^́n
1.063.03b     tuvám r̥bhukṣā^́ náriyas tuváṃ ṣā^́ṭ
1.063.03c     tuváṃ śúṣṇaṃ vr̥jáne pr̥kṣá āṇaú
1.063.03d     yū^́ne kútsāya dyumáte sácāhan

1.063.04a     tuváṃ ha tyád indara⁺ codīḥ sákhā
1.063.04b     vr̥tráṃ yád vajrin vr̥ṣakarman ubhnā^́ḥ
1.063.04c     yád dha śūra vr̥ṣamaṇaḥ parācaír
1.063.04d     ví dásyūm̐r yónāv ákr̥to vr̥thāṣā^́ṭ

1.063.05a     tuváṃ ha tyád indara⁺ áriṣaṇyan
1.063.05b     dr̥̄ḷhásya⁺ cin mártiānām° ájuṣṭau
1.063.05c     ví asmád ā^́ kā^́ṣṭhā árvate var
1.063.05d     ghanéva vajriñ chnathihi amítrān

1.063.06a     tuvā^́ṃ ha tyád indara⁺ árṇasātau
1.063.06b     súvarmīḷhe nára ājā^́ havante
1.063.06c     táva svadhāva iyám ā^́ samaryá
1.063.06d     ūtír vā^́jeṣu atasā^́yiyā bhūt

1.063.07a     tuváṃ ha tyád indara⁺ saptá yúdhyan
1.063.07b     púro vajrin purukútsāya dardaḥ
1.063.07c     barhír ná yát · sudā^́se vŕ̥thā várg
1.063.07d     aṃhó rājan várivaḥ pūráve kaḥ

1.063.08a     tuváṃ tyā^́ṃ na indara⁺ deva citrā^́m
1.063.08b     íṣam ā^́po ná pīpayaḥ párijman
1.063.08c     yáyā śūra práti asmábhya° yáṃsi
1.063.08d     tmánam ū^́rjaṃ ná viśvádha kṣáradhyai

1.063.09a     ákāri ta indara⁺ gótamebhir
1.063.09b     bráhmāṇi óktā námasā háribhyām
1.063.09c     supéśasaṃ · vā^́jam ā^́ bharā naḥ
1.063.09d     prātár makṣū^́ dhiyā^́vasur jagamyāt

64

1.064.01a     vŕ̥ṣṇe śárdhāya súmakhāya vedháse
1.064.01b     nódhaḥ suvr̥ktím prá bharā marúdbhiyaḥ
1.064.01c     apó ná dhī^́ro mánasā suhástiyo
1.064.01d     gíraḥ sám añje vidátheṣu ābhúvaḥ

1.064.02a     té jajñire divá r̥ṣvā^́sa ukṣáṇo
1.064.02b     rudrásya máryā ásurā arepásaḥ
1.064.02c     pavākā^́saḥ⁺ śúcayaḥ sū^́riyā iva
1.064.02d     sátvāno ná drapsíno ghorávarpasaḥ

1.064.03a     yúvāno rudrā^́ ajárā abhoggháno
1.064.03b     vavakṣúr ádhrigāvaḥ párvatā iva
1.064.03c     dr̥̄ḷhā^́+ cid víśvā bhúvanāni pā^́rthivā
1.064.03d     prá cyāvayanti diviyā^́ni majmánā

1.064.04a     citraír añjíbhir vápuṣe ví añjate
1.064.04b     vákṣassu rukmā^́m̐ ádhi yetire śubhé
1.064.04c     áṃseṣu eṣāṃ ní mimr̥kṣur r̥ṣṭáyaḥ
1.064.04d     sākáṃ jajñire svadháyā divó náraḥ

1.064.05a     īśānakŕ̥to dhúnayo riśā^́daso
1.064.05b     vā^́tān vidyútas táviṣībhir akrata
1.064.05c     duhánti ū^́dhar diviyā^́ni dhū^́tayo
1.064.05d     bhū^́mim pinvanti páyasā párijrayaḥ

1.064.06a     pínvanti apó marútaḥ sudā^́navaḥ
1.064.06b     páyo ghr̥távad vidátheṣu ābhúvaḥ
1.064.06c     átyaṃ ná mihé ví nayanti vājínam
1.064.06d     útsaṃ duhanti stanáyantam ákṣitam

1.064.07a     mahiṣā^́so māyínaś citrábhānavo
1.064.07b     giráyo ná svátavaso raghuṣyádaḥ
1.064.07c     mr̥gā^́ iva hastínaḥ khādathā vánā
1.064.07d     yád ā^́ruṇīṣu táviṣīr áyugdhuvam

1.064.08a     siṃhā^́ iva nānadati prácetasaḥ
1.064.08b     piśā^́ iva supíśo viśvávedasaḥ
1.064.08c     kṣápo jínvantaḥ pŕ̥ṣatībhir r̥ṣṭíbhiḥ
1.064.08d     sám ít sabā^́dhaḥ śávasā^́himanyavaḥ

1.064.09a     ródasī · ā^́ vadatā gaṇaśriyo
1.064.09b     nŕ̥ṣācaḥ śūrāḥ śávasā^́himanyavaḥ
1.064.09c     ā^́ vandhúreṣu amátir ná darśatā^́
1.064.09d     vidyún ná tasthau maruto rátheṣu vaḥ

1.064.10a     viśvávedaso rayíbhiḥ sámokasaḥ
1.064.10b     sámmiślāsas táviṣībhir virapśínaḥ
1.064.10c     ástāra íṣuṃ dadhire gábhastiyor
1.064.10d     anantáśuṣmā vŕ̥ṣakhādayo náraḥ

1.064.11a     hiraṇyáyebhiḥ pavíbhiḥ payovŕ̥dha
1.064.11b     újjighnanta āpathíyo ná párvatān
1.064.11c     makhā^́ ayā^́saḥ svasŕ̥to dhruvacyúto
1.064.11d     dudhrakŕ̥to marúto bhrā^́jadr̥ṣṭayaḥ

1.064.12a     ghŕ̥ṣum pavākáṃ⁺ vanínaṃ vícarṣaṇiṃ
1.064.12b     rudrásya sūnúṃ havásā gr̥ṇīmasi
1.064.12c     rajastúraṃ tavásam mā^́rutaṃ gaṇám
1.064.12d     r̥jīṣíṇaṃ vŕ̥ṣaṇaṃ saścata śriyé

1.064.13a     prá nū^́ sá mártaḥ śávasā jánām̐ áti
1.064.13b     tasthaú va ūtī^́ maruto yám ā^́vata
1.064.13c     árvadbhir vā^́jam bharate dhánā nŕ̥bhir
1.064.13d     āpŕ̥chiyaṃ krátum ā^́ kṣeti púṣyati

1.064.14a     carkŕ̥tiyam marutaḥ pr̥tsú duṣṭáraṃ
1.064.14b     dyumántaṃ śúṣmam maghávatsu dhattana
1.064.14c     dhanaspŕ̥tam ukthíyaṃ viśvácarṣaṇiṃ
1.064.14d     tokám puṣyema tánayaṃ śatáṃ hímāḥ

1.064.15a     nũ^́ ṣṭhirám maruto vīrávantam
1.064.15b     r̥tīṣā^́haṃ rayím asmā^́su dhatta
1.064.15c     sahasríṇaṃ śatínaṃ śūśuvā^́ṃsam
1.064.15d     prātár makṣū^́ dhiyā^́vasur jagamyāt

65

1.065.01a     paśvā^́ ná tāyúṃ gúhā cátantaṃ
1.065.01b     námo yujānáṃ námo váhantam
1.065.02a     sajóṣā dhī^́rāḥ padaír ánu gmann
1.065.02b     úpa tvā sīdan víśve yájatrāḥ

1.065.03a     r̥tásya devā^́ ánu vratā^́ gur
1.065.03b     bhúvat páriṣṭir diyaúr ná bhū^́ma
1.065.04a     várdhantīm ā^́paḥ panvā^́ súśiśvim
1.065.04b     r̥tásya yónā gárbhe sújātam

1.065.05a     puṣṭír ná raṇvā^́ kṣitír ná pr̥thvī^́
1.065.05b     girír ná bhújma kṣódo ná śambhú
1.065.06a     átyo ná ájman sárgaprataktaḥ
1.065.06b     síndhur ná kṣódaḥ ká īṃ varāte

1.065.07a     jāmíḥ síndhūnām bhrā^́teva svásrām
1.065.07b     íbhyān ná rā^́jā vánāni atti
1.065.08a     yád vā^́tajūto vánā ví ásthād
1.065.08b     agnír ha dāti rómā pr̥thivyā^́ḥ

1.065.09a     śvásiti apsú haṃsó ná sī^́dan
1.065.09b     krátvā cétiṣṭho viśā^́m uṣarbhút
1.065.10a     sómo ná vedhā^́ r̥táprajātaḥ
1.065.10b     paśúr ná śíśvā vibhúr dūrébhāḥ

66

1.066.01a     rayír ná citrā^́ sū^́ro ná saṃdŕ̥g
1.066.01b     ā^́yur ná prāṇó nítyo ná sūnúḥ
1.066.02a     tákvā ná bhū^́rṇir vánā siṣakti
1.066.02b     páyo ná dhenúḥ śúcir vibhā^́vā

1.066.03a     dādhā^́ra kṣémam óko ná raṇvó
1.066.03b     yávo ná pakvó jétā jánānām
1.066.04a     ŕ̥ṣir ná stúbhvā vikṣú praśastó
1.066.04b     vājī^́ ná prītó váyo dadhāti

1.066.05a     durókaśociḥ krátur ná nítyo
1.066.05b     jāyéva yónāv áraṃ víśvasmai
1.066.06a     citró yád ábhrāṭ chvetó ná vikṣú
1.066.06b     rátho ná rukmī^́ tveṣáḥ samátsu

1.066.07a     séne 'va sr̥ṣṭā^́ ámaṃ dadhāti
1.066.07b     ástur ná didyút tveṣápratīkā
1.066.08a     yamó ha jātó yamó jánitvaṃ
1.066.08b     jāráḥ kanī^́nām pátir jánīnām

1.066.09a     táṃ vaś carā^́thā vayáṃ vasatyā^́
1.066.09b     ástaṃ ná gā^́vo nákṣanta iddhám
1.066.10a     síndhur ná kṣódaḥ prá nī^́cīr ainon
1.066.10b     návanta gā^́vaḥ súvar dŕ̥śīke

67

1.067.01a     váneṣu jāyúr márteṣu mitró
1.067.01b     vr̥ṇīté śruṣṭíṃ rā^́jevājuryám
1.067.02a     kṣémo ná sādhúḥ krátur ná bhadró
1.067.02b     bhúvat suādhī^́r hótā havyavā^́ṭ

1.067.03a     háste dádhāno nr̥mṇā^́ víśvāni
1.067.03b     áme devā^́n dhād gúhā niṣī^́dan
1.067.04a     vidántīm átra náro dhiyaṃdhā^́
1.067.04b     hr̥dā^́ yát taṣṭā^́n mántrām̐ áśaṃsan

1.067.05a     ajó ná kṣā^́ṃ dādhā^́ra pr̥thivī^́ṃ
1.067.05b     tastámbha diyā^́m mántrebhiḥ satyaíḥ
1.067.06a     priyā^́ padā^́ni paśvó ní pāhi
1.067.06b     viśvā^́yur agne guhā^́ gúhaṃ gāḥ

1.067.07a     yá īṃ cikéta gúhā bhávantam
1.067.07b     ā^́ yáḥ sasā^́da dhā^́rām r̥tásya
1.067.08a     ví yé cr̥tánti r̥tā^́ sápanta
1.067.08b     ā^́d íd vásūni prá vavācāsmai

1.067.09a     ví yó vīrútsu ródhan mahitvā^́
1.067.09b     utá prajā^́ utá prasū^́ṣv antáḥ
1.067.10a     cíttir apã^́ṃ dáme viśvā^́yuḥ
1.067.10b     sádmeva dhī^́rāḥ sammā^́ya cakruḥ

68

1.068.01a     śrīṇánn úpa sthād dívam bhuraṇyú
1.068.01b     sthātúś carátham aktū^́n ví ūrṇot
1.068.02a     pári yád eṣām éko víśveṣām
1.068.02b     bhúvad devó devā^́nām mahitvā^́

1.068.03a     ā^́d ít te víśve krátuṃ juṣanta
1.068.03b     śúṣkād yád deva jīvó jániṣṭhāḥ
1.068.04a     bhájanta víśve devatváṃ nā^́ma
1.068.04b     r̥táṃ sápanto amŕ̥tam évaiḥ

1.068.05a     r̥tásya préṣā r̥tásya dhītír
1.068.05b     viśvā^́yur víśve ápāṃsi cakruḥ
1.068.06a     yás túbhyaṃ dā^́śād yó vā te śíkṣāt
1.068.06b     tásmai cikitvā^́n rayíṃ dayasva

1.068.07a     hótā níṣatto mánor ápatye
1.068.07b     sá cin nú āsām pátī rayīṇā^́m
1.068.08a     ichánta réto mithás tanū^́ṣu
1.068.08b     sáṃ jānata svaír dákṣair ámūrāḥ

1.068.09a     pitúr ná putrā^́ḥ krátuṃ juṣanta
1.068.09b     śróṣan yé asya śā^́saṃ turā^́saḥ
1.068.10a     ví rā^́ya aurṇod dúraḥ purukṣúḥ
1.068.10b     pipéśa nā^́kaṃ stŕ̥bhir dámūnāḥ

69

1.069.01a     śukráḥ śuśukvā^́m̐ uṣó ná jāráḥ
1.069.01b     paprā^́ samīcī^́ divó ná jyótiḥ
1.069.02a     pári prájātaḥ krátvā babhūtha
1.069.02b     bhúvo devā^́nām pitā^́ putráḥ sán

1.069.03a     vedhā^́ ádr̥pto agnír vijānánn
1.069.03b     ū^́dhar ná gónāṃ svā^́dmā pitūnā^́m
1.069.04a     jáne ná śéva āhū^́riyaḥ sán
1.069.04b     mádhye níṣatto raṇvó duroṇé

1.069.05a     putró ná jātó raṇvó duroṇé
1.069.05b     vājī^́ ná prītó víśo ví tārīt
1.069.06a     víśo yád áhve nŕ̥bhiḥ sánīḷā
1.069.06b     agnír devatvā^́ víśvāni aśyāḥ

1.069.07a     nákiṣ ṭa etā^́ vratā^́ minanti
1.069.07b     nŕ̥bhyo yád ebhyáḥ śruṣṭíṃ cakártha
1.069.08a     tát tú te dáṃso yád áhan samānaír
1.069.08b     nŕ̥bhir yád yuktó vivé rápāṃsi†

1.069.09a     uṣó ná jāró vibhā^́vā usráḥ
1.069.09b     sáṃjñātarūpaś cíketad asmai
1.069.10a     tmánā váhanto dúro ví r̥ṇvan
1.069.10b     návanta víśve súvar dŕ̥śīke

70

1.070.01a     vanéma pūrvī^́r aryó manīṣā^́
1.070.01b     agníḥ suśóko víśvāni aśyāḥ
1.070.02a     ā^́ daíviyāni vratā^́ cikitvā^́n
1.070.02b     ā^́ mā^́nuṣasya jánasya jánma

1.070.03a     gárbho yó apā^́ṃ gárbho vánānāṃ
1.070.03b     gárbhaś ca sthātā^́ṃ gárbhaś caráthām
1.070.04a     ádrau cid asmā antár duroṇé
1.070.04b     viśā^́ṃ ná víśvo amŕ̥taḥ svādhī^́ḥ

1.070.05a     sá hí kṣapā^́vām̐ agnī^́ rayīṇā^́ṃ
1.070.05b     dā^́śad yó asmā áraṃ suuktaíḥ
1.070.06a     etā^́ cikitvo bhū^́mā ní pāhi
1.070.06b     devā^́nāṃ jánma mártāṃś ca vidvā^́n

1.070.07a     várdhān yám pūrvī^́ḥ kṣapó vírūpā
1.070.07b     sthātúś ca rátham† r̥tápravītam
1.070.08a     árādhi hótā súvar níṣattaḥ
1.070.08b     kr̥ṇván víśvāni ápāṃsi satyā^́

1.070.09a     góṣu práśastiṃ váneṣu dhiṣe
1.070.09b     bháranta víśve balíṃ súvar ṇaḥ
1.070.10a     ví tvā náraḥ purutrā^́ saparyan
1.070.10b     pitúr ná jívrer ví védo bharanta

1.070.11a     sādhúr ná gr̥dhnúr áste 'va śū^́ro
1.070.11b     yā^́te 'va bhīmás tveṣáḥ samátsu

71

1.071.01a     úpa prá jinvann uśatī^́r uśántam
1.071.01b     pátiṃ ná nítyaṃ jánayaḥ sánīḷāḥ
1.071.01c     svásāraḥ śyā^́vīm áruṣīm ajuṣrañ
1.071.01d     citrám uchántīm uṣásaṃ ná gā^́vaḥ

1.071.02a     vīḷú cid dr̥̄ḷhā^́+ pitáro na ukthaír
1.071.02b     ádriṃ rujann áṅgiraso ráveṇa
1.071.02c     cakrúr divó br̥ható gātúm asmé
1.071.02d     áhaḥ súvar vividuḥ ketúm usrā^́ḥ

1.071.03a     dádhann r̥táṃ dhanáyann asya dhītím
1.071.03b     ā^́d íd aryó didhiṣúvo víbhr̥trāḥ
1.071.03c     átr̥ṣyantīr apáso yanti áchā
1.071.03d     devā^́ñ jánma práyasā vardháyantīḥ

1.071.04a     máthīd yád īṃ víbhr̥to mātaríśvā
1.071.04b     gr̥hé-gr̥he · śyetó jéniyo bhū^́t
1.071.04c     ā^́d īṃ rā^́jñe ná sáhyase° sácā sánn
1.071.04d     ā^́ dūtíyam bhŕ̥gavāṇo vivāya

1.071.05a     mahé yát pitrá īṃ rásaṃ divé kár
1.071.05b     áva tsarat pr̥śaníyaś cikitvā^́n
1.071.05c     sr̥jád ástā dhr̥ṣatā^́ didyúm asmai
1.071.05d     svā^́yāṃ devó duhitári tvíṣiṃ dhāt

1.071.06a     svá ā^́ yás túbhyaṃ dáma ā^́ vibhā^́ti
1.071.06b     námo vā dā^́śād uśató ánu dyū^́n
1.071.06c     várdho agne váyo asya dvibárhā
1.071.06d     yā^́sad rāyā^́ saráthaṃ yáṃ junā^́si

1.071.07a     agníṃ víśvā abhí pŕ̥kṣaḥ sacante
1.071.07b     samudráṃ ná sravátaḥ saptá yahvī^́ḥ
1.071.07c     ná jāmíbhir ví cikite váyo no
1.071.07d     vidā^́ devéṣu prámatiṃ cikitvā^́n

1.071.08a     ā^́ yád iṣé nr̥pátiṃ téja ā^́naṭ
1.071.08b     chúci réto níṣiktaṃ dyaúr abhī^́ke
1.071.08c     agníḥ śárdham anavadyáṃ yúvānaṃ
1.071.08d     suādhíyaṃ janayat sūdáyac ca

1.071.09a     máno ná yó ádhvanaḥ sadyá éti
1.071.09b     ékaḥ satrā^́ sãro vásva īśe
1.071.09c     rā^́jānā mitrā^́váruṇā supāṇī^́
1.071.09d     góṣu priyám amŕ̥taṃ rákṣamāṇā

1.071.10a     mā^́ no agne sakhiyā^́ pítriyāṇi
1.071.10b     prá marṣiṣṭhā abhí vidúṣ kavíḥ sán
1.071.10c     nábho ná rūpáṃ jarimā^́ mināti
1.071.10d     purā^́ tásyā abhíśaster ádhīhi

72

1.072.01a     ní kā^́viyā vedhásaḥ śáśvatas kar
1.072.01b     háste dádhāno náriyā purū^́ṇi
1.072.01c     agnír bhuvad rayipátī rayīṇā^́ṃ
1.072.01d     satrā^́ cakrāṇó amŕ̥tāni víśvā

1.072.02a     asmé vatsám pári ṣántaṃ ná vindann
1.072.02b     ichánto víśve amŕ̥tā ámūrāḥ
1.072.02c     śramayúvaḥ padavíyo dhiyaṃdhā^́s
1.072.02d     tasthúḥ padé paramé cā^́ru agnéḥ

1.072.03a     tisró yád agne śarádas tuvā^́m íc
1.072.03b     chúciṃ ghr̥téna śúcayaḥ saparyā^́n
1.072.03c     nā^́māni cid dadhire yajñíyāni
1.072.03d     ásūdayanta tanúvaḥ sújātāḥ

1.072.04a     ā^́ ródasī br̥hatī^́ vévidānāḥ
1.072.04b     prá rudríyā jabhrire yajñíyāsaḥ
1.072.04c     vidán márto nemádhitā cikitvā^́n
1.072.04d     agním padé paramé tasthivā^́ṃsam

1.072.05a     saṃjānānā^́ úpa sīdann abhijñú
1.072.05b     pátnīvanto namasíyaṃ namasyan
1.072.05c     ririkvā^́ṃsas tanúvaḥ kr̥ṇvata svā^́ḥ
1.072.05d     sákhā sákhyur nimíṣi rákṣamāṇāḥ

1.072.06a     tríḥ saptá yád gúhiyāni tuvé ít
1.072.06b     padā^́vidan níhitā yajñíyāsaḥ
1.072.06c     tébhī rakṣante amŕ̥taṃ sajóṣāḥ
1.072.06d     paśū^́ñ ca sthātr̥̄^́ñ caráthaṃ ca pāhi

1.072.07a     vidvā^́m̐ agne vayúnāni kṣitīnā^́ṃ
1.072.07b     ví ānuṣák churúdho jīváse dhāḥ
1.072.07c     antarvidvā^́m̐ ádhvano devayā^́nān
1.072.07d     átandro dūtó abhavo havirvā^́ṭ

1.072.08a     suādhíyo divá ā^́ saptá yahvī^́
1.072.08b     rāyó dúro ví r̥tajñā^́ ajānan
1.072.08c     vidád gávyaṃ sarámā dr̥̄ḷhám⁺ ūrváṃ
1.072.08d     yénā nú kam mā^́nuṣī bhójate víṭ

1.072.09a     ā^́ yé víśvā svapatiyā^́ni tasthúḥ
1.072.09b     kr̥ṇvānā^́so amr̥tatvā^́ya gātúm
1.072.09c     mahnā^́ mahádbhiḥ pr̥thivī^́ ví tasthe
1.072.09d     mātā^́ putraír áditir dhā^́yase véḥ

1.072.10a     ádhi śríyaṃ ní dadhuś cā^́rum asmin
1.072.10b     divó yád akṣī^́ amŕ̥tā ákr̥ṇvan
1.072.10c     ádha kṣaranti síndhavo ná sr̥ṣṭā^́ḥ
1.072.10d     prá nī^́cīr agne áruṣīr ajānan

73

1.073.01a     rayír ná yáḥ pitr̥vittó vayodhā^́ḥ
1.073.01b     supráṇītiś cikitúṣo ná śā^́suḥ
1.073.01c     siyonaśī^́r átithir ná priṇānó°
1.073.01d     hóteva sádma vidható ví tārīt

1.073.02a     devó ná yáḥ savitā^́ satyámanmā
1.073.02b     krátvā nipā^́ti vr̥jánāni víśvā
1.073.02c     purupraśastó amátir ná satyá
1.073.02d     ātméva śévo didhiṣā^́yiyo bhūt

1.073.03a     devó ná yáḥ pr̥thivī^́ṃ viśvádhāyā
1.073.03b     upakṣéti hitámitro ná rā^́jā
1.073.03c     puraḥsádaḥ śarmasádo ná vīrā^́
1.073.03d     anavadyā^́ pátijuṣṭeva nā^́rī

1.073.04a     táṃ tvā náro dáma ā^́ nítyam iddhám
1.073.04b     ágne sácanta kṣitíṣu dhruvā^́su
1.073.04c     ádhi dyumnáṃ ní dadhur bhū^́ri asmin
1.073.04d     bhávā viśvā^́yur dharúṇo rayīṇā^́m

1.073.05a     ví pŕ̥kṣo agne maghávāno aśyur
1.073.05b     ví sūráyo dádato víśvam ā^́yuḥ
1.073.05c     sanéma vā^́jaṃ samithéṣu aryó
1.073.05d     bhāgáṃ devéṣu śrávase dádhānāḥ

1.073.06a     r̥tásya hí dhenávo vāvaśānā^́ḥ
1.073.06b     sumádūdhnīḥ° pīpáyanta dyúbhaktāḥ
1.073.06c     parāvátaḥ sumatím bhíkṣamāṇā
1.073.06d     ví síndhavaḥ samáyā sasrur ádrim

1.073.07a     tuvé agne sumatím bhíkṣamāṇā
1.073.07b     diví śrávo dadhire yajñíyāsaḥ
1.073.07c     náktā ca cakrúr uṣásā vírūpe
1.073.07d     kr̥ṣṇáṃ ca várṇam aruṇáṃ ca sáṃ dhuḥ

1.073.08a     yā^́n rāyé mártān súṣūdo agne
1.073.08b     té siyāma maghávāno vayáṃ ca
1.073.08c     chāyéva víśvam bhúvanaṃ sisakṣi
1.073.08d     āpaprivā^́n ródasī antárikṣam

1.073.09a     árvadbhir agne árvato nŕ̥bhir nr̥̄^́n
1.073.09b     vīraír vīrā^́n vanuyāmā tuvótāḥ
1.073.09c     īśānā^́saḥ pitr̥vittásya rāyó
1.073.09d     ví sūráyaḥ śatáhimā no aśyuḥ

1.073.10a     etā^́ te agna ucáthāni vedho
1.073.10b     júṣṭāni santu mánase hr̥dé ca
1.073.10c     śakéma rāyáḥ sudhúro yámaṃ te
1.073.10d     ádhi śrávo devábhaktaṃ dádhānāḥ

74

1.074.01a     upaprayánto adhvarám
1.074.01b     mántraṃ vocema agnáye
1.074.01c     āré asmé ca śr̥ṇvaté

1.074.02a     yáḥ snī^́hitīṣu pūrviyáḥ
1.074.02b     saṃjagmānā^́su kr̥ṣṭíṣu
1.074.02c     árakṣad dāśúṣe gáyam

1.074.03a     utá bruvantu jantáva
1.074.03b     úd agnír vr̥trahā^́jani
1.074.03c     dhanaṃjayó ráṇe-raṇe

1.074.04a     yásya dūtó ási kṣáye
1.074.04b     véṣi havyā^́ni vītáye
1.074.04c     dasmát kr̥ṇóṣi adhvarám

1.074.05a     tám ít suhavyám aṅgiraḥ
1.074.05b     sudeváṃ sahaso yaho
1.074.05c     jánā āhuḥ subarhíṣam

1.074.06a     ā^́ ca váhāsi tā^́m̐ ihá
1.074.06b     devā^́m̐ úpa práśastaye
1.074.06c     havyā^́ suścandra vītáye

1.074.07a     ná yór upabdír áśviyaḥ
1.074.07b     śr̥ṇvé ráthasya kác caná
1.074.07c     yád agne yā^́si dūtíyam

1.074.08a     tuvóto vājī^́ áhrayo
1.074.08b     abhí pū^́rvasmād áparaḥ
1.074.08c     prá dāśvā^́m̐ agne asthãt

1.074.09a     utá dyumát suvī^́riyam
1.074.09b     br̥hád agne vivāsasi
1.074.09c     devébhyo deva dāśúṣe

75

1.075.01a     juṣásva sapráthastamaṃ
1.075.01b     váco devápsarastamam
1.075.01c     havyā^́ júhvāna āsáni

1.075.02a     áthā te aṅgirastama
1.075.02b     ágne vedhastama priyám
1.075.02c     vocéma bráhma sānasí

1.075.03a     kás te jāmír jánānãm
1.075.03b     ágne kó dāśúadhvaraḥ
1.075.03c     kó ha kásminn asi śritáḥ

1.075.04a     tuváṃ jāmír jánānãm
1.075.04b     ágne mitró asi priyáḥ
1.075.04c     sákhā sákhibhya ī^́ḍiyaḥ

1.075.05a     yájā no mitrā^́váruṇā
1.075.05b     yájā devā^́m̐ r̥tám br̥hát
1.075.05c     ágne yákṣi suváṃ dámam

76

1.076.01a     kā^́ ta úpetir mánaso várāya
1.076.01b     bhúvad agne śáṃtamā kā^́ manīṣā^́
1.076.01c     kó vā yajñaíḥ pári dákṣaṃ ta āpa
1.076.01d     kéna vā te mánasā dãśema

1.076.02a     éhi agna ihá hótā ní ṣīda
1.076.02b     ádabdhaḥ sú puraetā^́ bhavā naḥ
1.076.02c     ávatāṃ tvā ródasī viśvaminvé
1.076.02d     yájā mahé saumanasā^́ya devā^́n

1.076.03a     prá sú víśvān rakṣáso dhákṣi agne
1.076.03b     bhávā yajñā^́nām abhiśastipā^́vā
1.076.03c     áthā^́ vaha sómapatiṃ háribhyām
1.076.03d     ātithyám asmai cakr̥mā sudā^́vne

1.076.04a     prajā^́vatā vácasā váhnir āsā^́
1.076.04b     ā^́ ca huvé ní ca satsīhá devaíḥ
1.076.04c     véṣi hotrám utá potráṃ yajatra
1.076.04d     bodhí prayantar janitar vásūnām

1.076.05a     yáthā víprasya mánuṣo havírbhir
1.076.05b     devā^́m̐ áyajaḥ kavíbhiḥ kavíḥ sán
1.076.05c     evā^́ hotaḥ satyatara tvám adyá
1.076.05d     ágne mandráyā juhúvā yajasva

77

1.077.01a     kathā^́ dāśema agnáye kā^́ asmai
1.077.01b     devájuṣṭā ucyate bhāmíne gī^́ḥ
1.077.01c     yó mártiyeṣu amŕ̥ta r̥tā^́vā
1.077.01d     hótā yájiṣṭha ít kr̥ṇóti devā^́n

1.077.02a     yó adhvaréṣu śáṃtama r̥tā^́vā
1.077.02b     hótā tám ū námobhir ā^́ kr̥ṇudhvam
1.077.02c     agnír yád vér · mártiāya° devā^́n
1.077.02d     sá cā bódhāti mánasā yajāti

1.077.03a     sá hí krátuḥ sá máriyaḥ sá sādhúr
1.077.03b     mitró ná bhūd · ádbhutasya rathī^́ḥ
1.077.03c     tám médheṣu prathamáṃ devayántīr
1.077.03d     víśa úpa bruvate dasmám ā^́rīḥ

1.077.04a     sá no nr̥ṇã^́ṃ nŕ̥tamo riśā^́dā
1.077.04b     agnír gíro ávasā vetu dhītím
1.077.04c     tánā ca yé maghávānaḥ śáviṣṭhā
1.077.04d     vā^́japrasūtā iṣáyanta mánma

1.077.05a     evá agnír gótamebhir r̥tā^́vā
1.077.05b     víprebhir · astoṣṭa jātávedāḥ
1.077.05c     sá eṣu dyumnám pīpayat sá vā^́jaṃ
1.077.05d     sá puṣṭíṃ yāti jóṣam ā^́ cikitvā^́n

78

1.078.01a     abhí tvā gótamā girā^́
1.078.01b     jā^́tavedo vícarṣaṇe
1.078.01c     dyumnaír abhí prá ṇonumaḥ

1.078.02a     tám u tvā gótamo girā^́
1.078.02b     rāyáskāmo duvasyati
1.078.02c     dyumnaír abhí prá ṇonumaḥ

1.078.03a     tám u tvā vājasā^́tamam
1.078.03b     aṅgirasvád dhavāmahe
1.078.03c     dyumnaír abhí prá ṇonumaḥ

1.078.04a     tám u tvā vr̥trahántamaṃ
1.078.04b     yó dásyūm̐r avadhūnuṣé
1.078.04c     dyumnaír abhí prá ṇonumaḥ

1.078.05a     ávocāma ráhūgaṇā
1.078.05b     agnáye mádhumad vácaḥ
1.078.05c     dyumnaír abhí prá ṇonumaḥ

79

1.079.01a     híraṇyakeśo rájaso visāré
1.079.01b     áhir dhúnir vā^́ta iva dhrájīmān
1.079.01c     śúcibhrājā · uṣáso návedā
1.079.01d     yáśasvatīr apasyúvo ná satyā^́ḥ

1.079.02a     ā^́ te suparṇā^́ aminantam̐ évaiḥ
1.079.02b     kr̥ṣṇó nonāva vr̥ṣabhó yádīdám
1.079.02c     śivā^́bhir ná smáyamānābhir ā^́gāt
1.079.02d     pátanti míha stanáyanti abhrā^́

1.079.03a     yád īm r̥tásya páyasā píyāno
1.079.03b     náyann r̥tásya pathíbhī rájiṣṭhaiḥ
1.079.03c     aryamā^́ mitró váruṇaḥ párijmā
1.079.03d     tvácam pr̥ñcanti úparasya yónau

1.079.04a     ágne vā^́jasya gómata
1.079.04b     ī^́śānaḥ sahaso yaho
1.079.04c     asmé dhehi jātavedo máhi śrávaḥ

1.079.05a     sá idhānó vásuṣ kavír
1.079.05b     agnír īḷéniyo girā^́
1.079.05c     revád asmábhya° purvaṇīka dīdihi

1.079.06a     kṣapó rājann utá tmánā
1.079.06b     ágne vástor utóṣásaḥ
1.079.06c     sá tigmajambha rakṣáso daha práti

1.079.07a     ávā no agna ūtíbhir
1.079.07b     gāyatrásya prábharmaṇi
1.079.07c     víśvāsu dhīṣú vandiya

1.079.08a     ā^́ no agne rayím bhara
1.079.08b     satrāsā^́haṃ váreṇiyam
1.079.08c     víśvāsu pr̥tsú duṣṭáram

1.079.09a     ā^́ no agne sucetúnā
1.079.09b     rayíṃ viśvā^́yupoṣasam
1.079.09c     mārḍīkáṃ dhehi jīváse

1.079.10a     prá pūtā^́s tigmáśociṣe
1.079.10b     vā^́co gotami agnáye
1.079.10c     bhárasva sumnayúr gíraḥ

1.079.11a     yó no agne 'bhidā^́sati
1.079.11b     ánti dūré padīṣṭá sáḥ
1.079.11c     asmā^́kam íd vr̥dhé bhava

1.079.12a     sahasrākṣó vícarṣaṇir
1.079.12b     agnī^́ rákṣāṃsi sedhati
1.079.12c     hótā gr̥ṇīta ukthíyaḥ

80

1.080.01a     itthā^́ hí sóma ín máde
1.080.01b     brahmā^́ cakā^́ra várdhanam
1.080.01c     śáviṣṭha vajrin ójasā
1.080.01d     pr̥thivyā^́ níḥ śaśā áhim
1.080.01e     árcann ánu svarā^́jiyam

1.080.02a     sá tvāmadad vŕ̥ṣā mádaḥ
1.080.02b     sómaḥ śyenā^́bhr̥taḥ sutáḥ
1.080.02c     yénā vr̥tráṃ nír adbhiyó
1.080.02d     jaghántha vajrin ójasā
1.080.02e     árcann ánu svarā^́jiyam

1.080.03a     préhi abhī^́hi dhr̥ṣṇuhí
1.080.03b     ná te vájro ní yaṃsate
1.080.03c     índra nr̥mṇáṃ hí te śávo
1.080.03d     háno vr̥tráṃ jáyā apó
1.080.03e     árcann ánu svarā^́jiyam

1.080.04a     nír indra bhū^́miyā ádhi
1.080.04b     vr̥tráṃ jaghantha nír diváḥ
1.080.04c     sr̥jā^́ marútvatīr áva
1.080.04d     jīvádhanyā imā^́ apó
1.080.04e     árcann ánu svarā^́jiyam

1.080.05a     índro vr̥trásya dódhataḥ
1.080.05b     sā^́nuṃ vájreṇa hīḷitáḥ
1.080.05c     abhikrámyā^́va jighnate
1.080.05d     apáḥ sármāya codáyann
1.080.05e     árcann ánu svarā^́jiyam

1.080.06a     ádhi sā^́nau ní jighnate
1.080.06b     vájreṇa śatáparvaṇā
1.080.06c     mandāná índro ándhasaḥ
1.080.06d     sákhibhyo gātúm ichati
1.080.06e     árcann ánu svarā^́jiyam

1.080.07a     índra túbhyam íd adrivo
1.080.07b     ánuttaṃ vajri° vīríyam
1.080.07c     yád dha tyám māyínam mr̥gáṃ
1.080.07d     tám u tvám māyáyāvadhīr
1.080.07e     árcann ánu svarā^́jiyam

1.080.08a     ví te vájrāso asthiran
1.080.08b     navatíṃ nāvíyā ánu
1.080.08c     mahát ta indra vīríyam
1.080.08d     bāhuvós te bálaṃ hitám
1.080.08e     árcann ánu svarā^́jiyam

1.080.09a     sahásraṃ sākám arcata
1.080.09b     pári ṣṭobhata viṃśatíḥ
1.080.09c     śataínam ánv anonavur
1.080.09d     índrāya bráhma údyatam
1.080.09e     árcann ánu svarā^́jiyam

1.080.10a     índro vr̥trásya táviṣīṃ
1.080.10b     nír ahan sáhasā sáhaḥ
1.080.10c     mahát tád asya paúṃsiyaṃ
1.080.10d     vr̥tráṃ jaghanvā^́m̐ asr̥jad
1.080.10e     árcann ánu svarā^́jiyam

1.080.11a     imé cit táva manyáve
1.080.11b     vépete bhiyásā mahī^́
1.080.11c     yád indra vajrin ójasā
1.080.11d     vr̥trám marútvām̐ ávadhīr
1.080.11e     árcann ánu svarā^́jiyam

1.080.12a     ná vépasā ná tanyatā^́
1.080.12b     índraṃ vr̥tró ví bībhayat
1.080.12c     abhy ènaṃ vájra āyasáḥ
1.080.12d     sahásrabhr̥ṣṭir āyata
1.080.12e     árcann ánu svarā^́jiyam

1.080.13a     yád vr̥tráṃ táva cāśániṃ
1.080.13b     vájreṇa samáyodhayaḥ
1.080.13c     áhim indra jíghāṃsato
1.080.13d     diví te badbadhe śávo
1.080.13e     árcann ánu svarā^́jiyam

1.080.14a     abhiṣṭané te adrivo
1.080.14b     yát sthā^́ jágac ca rejate
1.080.14c     tváṣṭā cit táva manyáva
1.080.14d     índra vevijyáte bhiyā^́
1.080.14e     árcann ánu svarā^́jiyam

1.080.15a     nahí nú yā^́d adhīmási
1.080.15b     índraṃ kó vīríyā paráḥ
1.080.15c     tásmin nr̥mṇám utá krátuṃ
1.080.15d     devā^́ ójāṃsi sáṃ dadhur
1.080.15e     árcann ánu svarā^́jiyam

1.080.16a     yā^́m átharvā mánuṣ pitā^́
1.080.16b     dadhiáṅ dhíyam átnata
1.080.16c     tásmin bráhmāṇi pūrváthā
1.080.16d     índra ukthā^́ sám agmata
1.080.16e     árcann ánu svarā^́jiyam

81

1.081.01a     índro mádāya vāvr̥dhe
1.081.01b     śávase vr̥trahā^́ nŕ̥bhiḥ
1.081.01c     tám ín mahátsu ājíṣu
1.081.01d     utém árbhe havāmahe
1.081.01e     sá vā^́jeṣu prá no 'viṣat

1.081.02a     ási hí vīra séniyo
1.081.02b     ási bhū^́ri parādadíḥ
1.081.02c     ási dabhrásya cid vr̥dhó
1.081.02d     yájamānāya śikṣasi
1.081.02e     sunvaté bhū^́ri te vásu

1.081.03a     yád udī^́rata ājáyo
1.081.03b     dhr̥ṣṇáve dhīyate dhánā
1.081.03c     yukṣvā^́ madacyútā hárī
1.081.03d     káṃ hánaḥ káṃ vásau dadho
1.081.03e     asmā^́m̐ indra vásau dadhaḥ

1.081.04a     krátvā mahā^́m̐ anuṣvadhám
1.081.04b     bhīmá ā^́ vāvr̥dhe śávaḥ
1.081.04c     śriyá r̥ṣvá upākáyor
1.081.04d     ní śiprī^́ hárivān dadhe
1.081.04e     hástayor vájram āyasám

1.081.05a     ā^́ paprau pā^́rthivaṃ rájo
1.081.05b     badbadhé rocanā^́ diví
1.081.05c     ná tvā^́vām̐ indra káś caná
1.081.05d     ná jātó ná janiṣyate
1.081.05e     áti víśvaṃ vavakṣitha

1.081.06a     yó aryó martabhójanam
1.081.06b     parādádāti dāśúṣe
1.081.06c     índro asmábhya° śikṣatu
1.081.06d     ví bhajā bhū^́ri te vásu
1.081.06e     bhakṣīyá táva rā^́dhasaḥ

1.081.07a     máde-made hí no dadír
1.081.07b     yūthā^́ gávām r̥jukrátuḥ
1.081.07c     sáṃ gr̥bhāya purū^́ śatā^́
1.081.07d     ubhayāhastiyā^́ vásu
1.081.07e     śiśīhí rāyá ā^́ bhara

1.081.08a     mādáyasva suté sácā
1.081.08b     śávase śūra rā^́dhase
1.081.08c     vidmā^́ hí tvā purūvásum
1.081.08d     úpa kā^́mān sasr̥jmáhe
1.081.08e     áthā no avitā^́ bhava

1.081.09a     eté ta indra jantávo
1.081.09b     víśvam puṣyanti vā^́riyam
1.081.09c     antár hí khyó jánānãm
1.081.09d     aryó védo ádāśuṣāṃ
1.081.09e     téṣāṃ no véda ā^́ bhara

82

1.082.01a     úpo ṣú śr̥ṇuhī^́ gíro
1.082.01b     mághavan mā^́tathā iva
1.082.01c     yadā^́ naḥ sūnŕ̥tāvataḥ
1.082.01d     kára ā^́d artháyāsa íd
1.082.01e     yójā nú indra te hárī

1.082.02a     ákṣann ámīmadanta hí
1.082.02b     áva priyā^́ adhūṣata
1.082.02c     ástoṣata svábhānavo
1.082.02d     víprā náviṣṭhayā matī^́
1.082.02e     yójā nú indra te hárī

1.082.03a     susaṃdŕ̥śaṃ tuvā vayám
1.082.03b     mághavan vandiṣīmáhi
1.082.03c     prá nūnám pūrṇávandhura
1.082.03d     stutó yāhi váśām̐ ánu
1.082.03e     yójā nú indra te hárī

1.082.04a     sá ghā táṃ vŕ̥ṣaṇaṃ rátham
1.082.04b     ádhi tiṣṭhāti govídam
1.082.04c     yáḥ pā^́traṃ hāriyojanám
1.082.04d     pūrṇám indra cíketati
1.082.04e     yójā nú indra te hárī

1.082.05a     yuktás te astu dákṣiṇa
1.082.05b     utá savyáḥ śatakrato
1.082.05c     téna jāyā^́m úpa priyā^́m
1.082.05d     mandānó yāhi ándhaso
1.082.05e     yójā nú indra te hárī

1.082.06a     yunájmi te bráhmaṇā keśínā hárī
1.082.06b     úpa prá yāhi dadhiṣé gábhastiyoḥ
1.082.06c     út tvā sutā^́so rabhasā^́ amandiṣuḥ
1.082.06d     pūṣaṇvā^́n vajrin sám u pátniyāmadaḥ

83

1.083.01a     áśvāvati prathamó góṣu gachati
1.083.01b     suprāvī^́r indra mártiyas távotíbhiḥ
1.083.01c     tám ít pr̥ṇakṣi vásunā bhávīyasā
1.083.01d     síndhum ā^́po yáthābhíto vícetasaḥ

1.083.02a     ā^́po ná devī^́r úpa yanti hotríyam
1.083.02b     aváḥ paśyanti vítataṃ yáthā rájaḥ
1.083.02c     prācaír devā^́saḥ prá ṇayanti devayúm
1.083.02d     brahmapríyaṃ joṣayante varā^́ iva

1.083.03a     ádhi dváyor adadhā ukthíyaṃ váco
1.083.03b     yatásrucā mithunā^́ yā^́ saparyátaḥ
1.083.03c     ásaṃyatto vraté te kṣeti púṣyati
1.083.03d     bhadrā^́ śaktír yájamānāya sunvaté

1.083.04a     ā^́d áṅgirāḥ prathamáṃ dadhire váya
1.083.04b     iddhā^́gnayaḥ śámiyā yé sukr̥tyáyā
1.083.04c     sárvam paṇéḥ sám avindanta bhójanam
1.083.04d     áśvāvantaṃ gómantam ā^́ paśúṃ náraḥ

1.083.05a     yajñaír átharvā prathamáḥ pathás tate
1.083.05b     tátaḥ sū^́ryo vratapā^́ vená ā^́jani
1.083.05c     ā^́ gā^́ ājad uśánā kāviyáḥ sácā
1.083.05d     yamásya jātám amŕ̥taṃ yajāmahe

1.083.06a     barhír vā yát suapatyā^́ya vr̥jyáte
1.083.06b     arkó vā · ślókam āghóṣate diví
1.083.06c     grā^́vā yátra vádati kārúr ukthíyas
1.083.06d     tásyéd índro abhipitvéṣu raṇyati

84

1.084.01a     ásāvi sóma indra te
1.084.01b     śáviṣṭha dhr̥ṣṇav ā^́ gahi
1.084.01c     ā^́ tvā pr̥ṇaktu indriyáṃ
1.084.01d     rájaḥ sū^́ryo ná raśmíbhiḥ

1.084.02a     índram íd dhárī vahato
1.084.02b     ápratidhr̥ṣṭaśavasam
1.084.02c     ŕ̥ṣīṇāṃ ca stutī^́r úpa
1.084.02d     yajñáṃ ca mā^́nuṣāṇãm

1.084.03a     ā^́ tiṣṭha vr̥trahan ráthaṃ
1.084.03b     yuktā^́ te bráhmaṇā hárī
1.084.03c     arvācī^́naṃ sú te máno
1.084.03d     grā^́vā kr̥ṇotu vagnúnā

1.084.04a     imám indra sutám piba
1.084.04b     jyéṣṭham ámartiyam mádam
1.084.04c     śukrásya tvābhí akṣaran
1.084.04d     dhā^́rā r̥tásya sā^́dane

1.084.05a     índrāya nūnám arcata
1.084.05b     ukthā^́ni ca bravītana
1.084.05c     sutā^́ amatsur índavo
1.084.05d     jyéṣṭhaṃ namasyatā sáhaḥ

1.084.06a     nákiṣ ṭuvád rathī^́taro
1.084.06b     hárī yád indra yáchase
1.084.06c     nákiṣ ṭuvā^́nu majmánā
1.084.06d     nákiḥ suáśva ānaśe

1.084.07a     yá éka íd vidáyate
1.084.07b     vásu mártāya dāśúṣe
1.084.07c     ī^́śāno ápratiṣkuta índro aṅgá

1.084.08a     kadā^́ mártam arādhásam
1.084.08b     padā^́ kṣúmpam iva sphurat
1.084.08c     kadā^́ naḥ śuśravad gíra índro aṅgá

1.084.09a     yáś cid dhí tvā bahúbhya ā^́
1.084.09b     sutā^́vām̐ āvívāsati
1.084.09c     ugráṃ tát patyate śáva índro aṅgá

1.084.10a     svādór itthā^́ viṣūváto
1.084.10b     mádhvaḥ pibanti gauríyaḥ
1.084.10c     yā^́ índreṇa sayā^́varīr
1.084.10d     vŕ̥ṣṇā mádanti śobháse
1.084.10e     vásvīr ánu svarā^́jiyam

1.084.11a     tā^́ asya pr̥śanāyúvaḥ
1.084.11b     sómaṃ śrīṇanti pŕ̥śnayaḥ
1.084.11c     priyā^́ índrasya dhenávo
1.084.11d     vájraṃ hinvanti sā^́yakaṃ
1.084.11e     vásvīr ánu svarā^́jiyam

1.084.12a     tā^́ asya námasā sáhaḥ
1.084.12b     saparyánti prácetasaḥ
1.084.12c     vratā^́ni asya saścire
1.084.12d     purū^́ṇi pūrvácittaye
1.084.12e     vásvīr ánu svarā^́jiyam

1.084.13a     índro dadhīcó asthábhir
1.084.13b     vr̥trā^́ṇi ápratiṣkutaḥ
1.084.13c     jaghā^́na navatī^́r náva

1.084.14a     ichánn áśvasya yác chíraḥ
1.084.14b     párvateṣu ápaśritam
1.084.14c     tád vidac charyaṇā^́vati

1.084.15a     átrā^́ha gór amanvata
1.084.15b     nā^́ma tváṣṭur apīcíyam
1.084.15c     itthā^́ candrámaso gr̥hé

1.084.16a     kó adyá yuṅkte dhurí gā^́ r̥tásya
1.084.16b     śímīvato bhāmíno durhr̥ṇāyū^́n
1.084.16c     āsánniṣūn hr̥tsuváso mayobhū^́n
1.084.16d     yá eṣām bhr̥tyā^́m r̥ṇádhat sá jīvāt

1.084.17a     ká īṣate tujyáte kó bibhāya
1.084.17b     kó maṃsate sántam índraṃ kó ánti
1.084.17c     kás tokā^́ya ká íbhāyotá rāyé
1.084.17d     ádhi bravat tanúve kó jánāya

1.084.18a     kó agním īṭṭe havíṣā ghr̥téna
1.084.18b     srucā^́ yajātā r̥túbhir dhruvébhiḥ
1.084.18c     kásmai devā^́ ā^́ vahān āśú hóma
1.084.18d     kó maṃsate vītíhotraḥ sudeváḥ

1.084.19a     tuvám aṅgá prá śaṃsiṣo
1.084.19b     deváḥ śaviṣṭha mártiyam
1.084.19c     ná tvád anyó maghavann asti marḍitā^́
1.084.19d     índra brávīmi te vácaḥ

1.084.20a     mā^́ te rā^́dhāṃsi mā^́ ta ūtáyo vaso
1.084.20b     asmā^́n kádā canā^́ dabhan
1.084.20c     víśvā ca na upamimīhí mānuṣa
1.084.20d     vásūni carṣaṇíbhya ā^́

85

1.085.01a     prá yé śúmbhante jánayo ná sáptayo
1.085.01b     yā^́man rudrásya sūnávaḥ sudáṃsasaḥ
1.085.01c     ródasī hí marútaś cakriré vr̥dhé
1.085.01d     mádanti vīrā^́ vidátheṣu ghŕ̥ṣvayaḥ

1.085.02a     tá ukṣitā^́so mahimā^́nam āśata
1.085.02b     diví rudrā^́so ádhi cakrire sádaḥ
1.085.02c     árcanto arkáṃ janáyanta indriyám
1.085.02d     ádhi śríyo dadhire pŕ̥śnimātaraḥ

1.085.03a     gómātaro yác chubháyante añjíbhis
1.085.03b     tanū^́ṣu śubhrā^́ dadhire virúkmataḥ
1.085.03c     bā^́dhante víśvam abhimātínam ápa
1.085.03d     vártmāni eṣām ánu rīyate ghr̥tám

1.085.04a     ví yé bhrā^́jante súmakhāsa r̥ṣṭíbhiḥ
1.085.04b     pracyāváyanto ácyutā cid ójasā
1.085.04c     manojúvo yán maruto rátheṣu ā^́
1.085.04d     vŕ̥ṣavrātāsaḥ pŕ̥ṣatīr áyugdhuvam

1.085.05a     prá yád rátheṣu pŕ̥ṣatīr áyugdhvaṃ
1.085.05b     vā^́je ádrim maruto raṃháyantaḥ
1.085.05c     utā^́ruṣásya ví ṣiyanti dhā^́rāś
1.085.05d     cármevodábhir ví undanti bhū^́ma

1.085.06a     ā^́ vo vahantu sáptayo raghuṣyádo
1.085.06b     raghupátvānaḥ prá jigāta bāhúbhiḥ
1.085.06c     sī^́datā^́ barhír urú vaḥ sádas kr̥tám
1.085.06d     mādáyadhvam maruto mádhvo ándhasaḥ

1.085.07a     té 'vardhanta svátavaso mahitvanā^́
1.085.07b     ā^́ nā^́kaṃ tasthúr urú cakrire sádaḥ
1.085.07c     víṣṇur yád dhā^́vad vŕ̥ṣaṇam madacyútaṃ
1.085.07d     váyo ná sīdann ádhi barhíṣi priyé

1.085.08a     śū^́rā ivéd yúyudhayo ná jágmayaḥ
1.085.08b     śravasyávo ná pŕ̥tanāsu yetire
1.085.08c     bháyante víśvā bhúvanā marúdbhiyo
1.085.08d     rā^́jāna iva tveṣásaṃdr̥śo náraḥ

1.085.09a     tváṣṭā yád vájraṃ súkr̥taṃ hiraṇyáyaṃ
1.085.09b     sahásrabhr̥ṣṭiṃ suápā ávartayat
1.085.09c     dhattá índro nári ápāṃsi kártave
1.085.09d     áhan vr̥tráṃ nír apā^́m aubjad arṇavám

1.085.10a     ūrdhváṃ nunudre avatáṃ tá ójasā
1.085.10b     dādr̥hāṇáṃ cid bibhidur ví párvatam
1.085.10c     dhámanto vāṇám marútaḥ sudā^́navo
1.085.10d     máde sómasya ráṇiyāni cakrire

1.085.11a     jihmáṃ nunudre avatáṃ táyā diśā^́
1.085.11b     ásiñcann útsaṃ gótamāya tr̥ṣṇáje
1.085.11c     ā^́ gachantīm ávasā citrábhānavaḥ
1.085.11d     kā^́maṃ víprasya tarpayanta dhā^́mabhiḥ

1.085.12a     yā^́ vaḥ śárma śaśamānā^́ya sánti
1.085.12b     tridhā^́tūni dāśúṣe yachatā^́dhi
1.085.12c     asmábhyaṃ tā^́ni maruto ví yanta
1.085.12d     rayíṃ no dhatta vr̥ṣaṇaḥ suvī^́ram

86

1.086.01a     máruto yásya hí kṣáye
1.086.01b     pāthā^́ divó vimahasaḥ
1.086.01c     sá sugopā^́tamo jánaḥ

1.086.02a     yajñaír vā yajñavāhaso
1.086.02b     víprasya vā matīnã^́m
1.086.02c     márutaḥ śr̥ṇutā^́ hávam

1.086.03a     utá vā yásya vājíno
1.086.03b     ánu vípram átakṣata
1.086.03c     sá gántā gómati vrajé

1.086.04a     asyá vīrásya barhíṣi
1.086.04b     sutáḥ sómo díviṣṭiṣu
1.086.04c     ukthám mádaś ca śasyate

1.086.05a     asyá śroṣantu ā^́ bhúvo
1.086.05b     víśvā yáś carṣaṇī^́r abhí
1.086.05c     sū^́raṃ cit sasrúṣīr íṣaḥ

1.086.06a     pūrvī^́bhir hí dadāśimá
1.086.06b     śarádbhir maruto vayám
1.086.06c     ávobhiś carṣaṇīnã^́m

1.086.07a     subhágaḥ sá prayajyavo
1.086.07b     máruto astu mártiyaḥ
1.086.07c     yásya práyāṃsi párṣatha

1.086.08a     śaśamānásya vā naraḥ
1.086.08b     svédasya satyaśavasaḥ
1.086.08c     vidā^́ kā^́masya vénataḥ

1.086.09a     yūyáṃ tát satyaśavasa
1.086.09b     āvíṣ karta mahitvanā^́
1.086.09c     vídhyatā vidyútā rákṣaḥ

1.086.10a     gū^́hatā gúhiyaṃ támo
1.086.10b     ví yāta víśvam atríṇam
1.086.10c     jyótiṣ kartā yád uśmási

87

1.087.01a     prátvakṣasaḥ prátavaso virapśíno
1.087.01b     ánānatā ávithurā r̥jīṣíṇaḥ
1.087.01c     júṣṭatamāso nŕ̥tamāso añjíbhir
1.087.01d     ví ānajre ké cid usrā^́ iva stŕ̥bhiḥ

1.087.02a     upahvaréṣu yád ácidhuvaṃ yayíṃ
1.087.02b     váya iva marutaḥ kéna cit pathā^́
1.087.02c     ścótanti kóśā úpa vo rátheṣu ā^́
1.087.02d     ghr̥tám ukṣatā mádhuvarṇam árcate

1.087.03a     praíṣām ájmeṣu vithuréva rejate
1.087.03b     bhū^́mir yā^́meṣu yád dha yuñjáte śubhé
1.087.03c     té krīḷáyo dhúnayo bhrā^́jadr̥ṣṭayaḥ
1.087.03d     svayám mahitvám panayanta dhū^́tayaḥ

1.087.04a     sá hí svasŕ̥t pŕ̥ṣadaśvo yúvā gaṇó
1.087.04b     ayā^́ īśānás táviṣībhir ā^́vr̥taḥ
1.087.04c     ási satyá r̥ṇayā^́vā ánediyo
1.087.04d     asyā^́ dhiyáḥ prāvitā^́thā vŕ̥ṣā gaṇáḥ

1.087.05a     pitúḥ pratnásya jánmanā vadāmasi
1.087.05b     sómasya jihvā^́ prá jigāti cákṣasā
1.087.05c     yád īm índraṃ śámi ŕ̥kvāṇa ā^́śata
1.087.05d     ā^́d ín nā^́māni yajñíyāni dadhire

1.087.06a     śriyáse kám bhānúbhiḥ sám mimikṣire
1.087.06b     té raśmíbhis tá ŕ̥kvabhiḥ sukhādáyaḥ
1.087.06c     té vā^́śīmanta iṣmíṇo ábhīravo
1.087.06d     vidré priyásya mā^́rutasya dhā^́manaḥ

88

1.088.01a     ā^́ vidyúnmadbhir marutaḥ
1.088.01b     suarkaí ráthebhir yāta
1.088.01c     r̥ṣṭimádbhir áśvaparṇaiḥ
1.088.01d     ā^́ várṣiṣṭhayā na iṣā^́
1.088.01e     váyo ná paptatā sumāyāḥ

1.088.02a     té aruṇébhir váram ā^́ piśáṅgaiḥ
1.088.02b     śubhé káṃ yānti rathatū^́rbhir áśvaiḥ
1.088.02c     rukmó ná citráḥ svádhitīvān
1.088.02d     pavyā^́ ráthasya jaṅghananta bhū^́ma

1.088.03a     śriyé káṃ vo ádhi tanū^́ṣu vā^́śīr
1.088.03b     medhā^́ vánā ná kr̥ṇavanta ūrdhvā^́
1.088.03c     yuṣmábhyaṃ · kám marutaḥ sujātās
1.088.03d     tuvidyumnā^́so dhanayante ádrim

1.088.04a     áhāni gŕ̥dhrāḥ pári ā^́ va ā^́gur
1.088.04b     imā^́ṃ dhíyaṃ vārkāriyā^́ṃ ca devī^́m
1.088.04c     bráhma kr̥ṇvánto gótamāso arkaír
1.088.04d     ūrdhváṃ nunudra utsadhím píbadhyai

1.088.05a     etát tiyán ná yójanam aceti
1.088.05b     sasvár ha yán maruto gótamo vaḥ
1.088.05c     páśyan híraṇyacakrān
1.088.05d     áyodaṃṣṭrān vidhā^́vato varā^́hūn

1.088.06a     eṣā^́ syā^́ vo maruto anubhartrī^́
1.088.06b     práti ṣṭobhati vāgháto ná vā^́ṇī
1.088.06c     ástobhayad vŕ̥thā āsām
1.088.06d     ánu svadhā^́ṃ gábhastiyoḥ

89

1.089.01a     ā^́ no bhadrā^́ḥ krátavo yantu viśváto
1.089.01b     ádabdhāso áparītāsa udbhídaḥ
1.089.01c     devā^́ no yáthā sádam íd vr̥dhé ásann
1.089.01d     áprāyuvo rakṣitā^́ro divé-dive

1.089.02a     devā^́nām bhadrā^́ sumatír r̥jūyatā^́ṃ
1.089.02b     devā^́nāṃ rātír abhí no ní vartatām
1.089.02c     devā^́nāṃ sakhyám úpa sedimā vayáṃ
1.089.02d     devā^́ na ā^́yuḥ prá tirantu jīváse

1.089.03a     tā^́n pū^́rvayā nivídā hūmahe vayám
1.089.03b     bhágam mitrám áditiṃ dákṣam asrídham
1.089.03c     aryamáṇaṃ váruṇaṃ sómam aśvínā
1.089.03d     sárasvatī naḥ subhágā máyas karat

1.089.04a     tán no vā^́to mayobhú vātu bheṣajáṃ
1.089.04b     tán mātā^́ pr̥thivī^́ tát pitā^́ diyaúḥ
1.089.04c     tád grā^́vāṇaḥ somasúto mayobhúvas
1.089.04d     tád aśvinā śr̥ṇutaṃ dhiṣṇiyā yuvám

1.089.05a     tám ī^́śānaṃ jágatas tasthúṣas pátiṃ
1.089.05b     dhiyaṃjinvám ávase hūmahe vayám
1.089.05c     pūṣā^́ no yáthā védasām ásad vr̥dhé
1.089.05d     rakṣitā^́ pāyúr ádabdhaḥ suastáye

1.089.06a     suastí na · índro vr̥ddháśravāḥ
1.089.06b     suastí naḥ · pūṣā^́ viśvávedāḥ
1.089.06c     suastí nas tā^́rkṣyo áriṣṭanemiḥ
1.089.06d     suastí no bŕ̥haspátir dadhātu

1.089.07a     pŕ̥ṣadaśvā marútaḥ pŕ̥śnimātaraḥ
1.089.07b     śubhaṃyā^́vāno vidátheṣu jágmayaḥ
1.089.07c     agnijihvā^́ mánavaḥ sū^́racakṣaso
1.089.07d     víśve no devā^́ ávasā^́ gamann ihá

1.089.08a     bhadráṃ kárṇebhiḥ śr̥ṇuyāma devā
1.089.08b     bhadrám paśyema akṣábhir yajatrāḥ
1.089.08c     sthiraír áṅgais tuṣṭuvā^́ṃsas tanū^́bhir
1.089.08d     ví aśema deváhitaṃ yád ā^́yuḥ

1.089.09a     śatám ín nú śarádo ánti devā
1.089.09b     yátrā naś cakrā^́ jarásaṃ tanū^́nām
1.089.09c     putrā^́so yátra pitáro bhávanti
1.089.09d     mā^́ no madhyā^́ rīriṣatā^́yu° gántoḥ

1.089.10a     áditir dyaúr áditir antárikṣam
1.089.10b     áditir mātā^́ sá pitā^́ sá putráḥ
1.089.10c     víśve devā^́ áditiḥ páñca jánā
1.089.10d     áditir jātám áditir jánitvam

90

1.090.01a     r̥junītī^́ no váruṇo
1.090.01b     mitró nayatu vidvā^́n
1.090.01c     aryamā^́ devaíḥ sajóṣāḥ

1.090.02a     té hí vásvo vásavānās
1.090.02b     té ápramūrā máhobhiḥ
1.090.02c     vratā^́ rakṣante viśvā^́hā

1.090.03a     té asmábhyaṃ śárma yaṃsann
1.090.03b     amŕ̥tā mártiyebhiyaḥ
1.090.03c     bā^́dhamānā ápa dvíṣaḥ

1.090.04a     ví naḥ patháḥ suvitā^́ya
1.090.04b     ciyántu índro marútaḥ
1.090.04c     pūṣā^́ bhágo vándiyāsaḥ

1.090.05a     utá no dhíyo góagrāḥ
1.090.05b     pū^́ṣan víṣṇav évayāvaḥ
1.090.05c     kártā naḥ suastimátaḥ

1.090.06a     mádhu vā^́tā r̥tāyaté
1.090.06b     mádhu kṣaranti síndhavaḥ
1.090.06c     mā^́dhvīr naḥ santu óṣadhīḥ

1.090.07a     mádhu náktam utóṣáso
1.090.07b     mádhumat pā^́rthivaṃ rájaḥ
1.090.07c     mádhu dyaúr astu naḥ pitā^́

1.090.08a     mádhumān no vánaspátir
1.090.08b     mádhumām̐ astu sū^́riyaḥ
1.090.08c     mā^́dhvīr gā^́vo bhavantu naḥ

1.090.09a     śáṃ no mitráḥ śáṃ váruṇaḥ
1.090.09b     śáṃ no bhavatu aryamā^́
1.090.09c     śáṃ na índro bŕ̥haspátiḥ
1.090.09d     śáṃ no víṣṇur urukramáḥ

91

1.091.01a     tuváṃ soma prá cikito manīṣā^́
1.091.01b     tuváṃ rájiṣṭham ánu neṣi pánthām
1.091.01c     táva práṇītī pitáro na indo
1.091.01d     devéṣu rátnam abhajanta dhī^́rāḥ

1.091.02a     tuváṃ soma krátubhiḥ sukrátur bhūs
1.091.02b     tuváṃ dákṣaiḥ sudákṣo viśvávedāḥ
1.091.02c     tuváṃ vŕ̥ṣā vr̥ṣatvébhir mahitvā^́
1.091.02d     dyumnébhir dyumní abhavo nr̥cákṣāḥ

1.091.03a     rā^́jño nú te váruṇasya vratā^́ni
1.091.03b     br̥hád gabhīráṃ táva soma dhā^́ma
1.091.03c     śúciṣ ṭvám asi priyó ná mitró
1.091.03d     dakṣā^́yiyo aryamévāsi soma

1.091.04a     yā^́ te dhā^́māni diví yā^́ pr̥thivyā^́ṃ
1.091.04b     yā^́ párvateṣu óṣadhīṣu apsú
1.091.04c     tébhir no víśvaiḥ sumánā áheḷan
1.091.04d     rā^́jan soma práti havyā^́ gr̥bhāya

1.091.05a     tuváṃ somāsi sátpatis
1.091.05b     tuváṃ rā^́jotá vr̥trahā^́
1.091.05c     tuvám bhadró asi krátuḥ

1.091.06a     tuváṃ ca soma no váśo
1.091.06b     jīvā^́tuṃ ná marāmahe
1.091.06c     priyástotro vánaspátiḥ

1.091.07a     tuváṃ soma mahé bhágaṃ
1.091.07b     tuváṃ yū^́na r̥tāyaté
1.091.07c     dákṣaṃ dadhāsi jīváse

1.091.08a     tuváṃ naḥ soma viśváto
1.091.08b     rákṣā rājann aghāyatáḥ
1.091.08c     ná riṣyet tvā^́vataḥ sákhā

1.091.09a     sóma yā^́s te mayobhúva
1.091.09b     ūtáyaḥ sánti dāśúṣe
1.091.09c     tā^́bhir no avitā^́ bhava

1.091.10a     imáṃ yajñám idáṃ váco
1.091.10b     jujuṣāṇá upā^́gahi
1.091.10c     sóma tváṃ no vr̥dhé bhava

1.091.11a     sóma gīrbhíṣ ṭuvā vayáṃ
1.091.11b     vardháyāmo vacovídaḥ
1.091.11c     sumr̥̄ḷīkó⁺ na ā^́ viśa

1.091.12a     gayasphā^́no amīvahā^́
1.091.12b     vasuvít puṣṭivárdhanaḥ
1.091.12c     sumitráḥ soma no bhava

1.091.13a     sóma rārandhí no hr̥dí
1.091.13b     gā^́vo ná yávaseṣu ā^́
1.091.13c     márya iva svá okíye

1.091.14a     yáḥ soma sakhiyé táva
1.091.14b     rāráṇad deva mártiyaḥ
1.091.14c     táṃ dákṣaḥ sacate kavíḥ

1.091.15a     uruṣyā^́ ṇo abhíśasteḥ
1.091.15b     sóma ní pāhi áṃhasaḥ
1.091.15c     sákhā suśéva edhi naḥ

1.091.16a     ā^́ pyāyasva sám etu te
1.091.16b     viśvátaḥ soma vŕ̥ṣṇiyam
1.091.16c     bhávā vā^́jasya saṃgathé

1.091.17a     ā^́ pyāyasva madintama
1.091.17b     sóma víśvebhir aṃśúbhiḥ
1.091.17c     bhávā naḥ suśrávastamaḥ sákhā vr̥dhé

1.091.18a     sáṃ te páyāṃsi sám u yantu vā^́jāḥ
1.091.18b     sáṃ vŕ̥ṣṇiyāni abhimātiṣā^́haḥ
1.091.18c     āpyā^́yamāno amŕ̥tāya soma
1.091.18d     diví śrávāṃsi uttamā^́ni dhiṣva

1.091.19a     yā^́ te dhā^́māni havíṣā yájanti
1.091.19b     tā^́ te víśvā paribhū^́r astu yajñám
1.091.19c     gayasphā^́naḥ pratáraṇaḥ suvī^́ro
1.091.19d     ávīrahā prá carā soma dúryān

1.091.20a     sómo dhenúṃ sómo árvantam āśúṃ
1.091.20b     sómo vīráṃ karmaṇíyaṃ dadāti
1.091.20c     sādaníyaṃ vidathíyaṃ sabhéyam
1.091.20d     pitr̥śrávaṇaṃ yó dádāśad asmai

1.091.21a     áṣāḷhaṃ yutsú pŕ̥tanāsu pápriṃ
1.091.21b     suvarṣā^́m apsā^́ṃ vr̥jánasya gopā^́m
1.091.21c     bhareṣujā^́ṃ sukṣitíṃ suśrávasaṃ
1.091.21d     jáyantaṃ tvā^́m ánu madema soma

1.091.22a     tuvám imā^́ óṣadhīḥ soma víśvās
1.091.22b     tuvám apó ajanayas tuváṃ gā^́ḥ
1.091.22c     tvám ā^́ tatantha urú antárikṣaṃ
1.091.22d     tuváṃ jyótiṣā ví támo vavartha

1.091.23a     devéna no mánasā deva soma
1.091.23b     rāyó bhāgáṃ sahasāvann abhí yudhya
1.091.23c     mā^́ tvā^́ tanad ī^́śiṣe vīríyasya
1.091.23d     ubháyebhyaḥ prá cikitsā gáviṣṭau

92

1.092.01a     etā^́ u tyā^́ uṣásaḥ ketúm akrata
1.092.01b     pū^́rve árdhe rájaso bhānúm añjate
1.092.01c     niṣkr̥ṇvānā^́ ā^́yudhānīva dhr̥ṣṇávaḥ
1.092.01d     práti gā^́vo áruṣīr yanti mātáraḥ

1.092.02a     úd apaptann aruṇā^́ bhānávo vŕ̥thā
1.092.02b     suāyújo áruṣīr gā^́ ayukṣata
1.092.02c     ákrann uṣā^́so vayúnāni pūrváthā
1.092.02d     rúśantam bhānúm áruṣīr aśiśrayuḥ

1.092.03a     árcanti nā^́rīr apáso ná viṣṭíbhiḥ
1.092.03b     samānéna yójanenā^́ parāvátaḥ
1.092.03c     íṣaṃ váhantīḥ sukŕ̥te sudā^́nave
1.092.03d     víśvéd áha yájamānāya sunvaté

1.092.04a     ádhi péśāṃsi vapate nr̥tū^́r iva
1.092.04b     áporṇute vákṣa usréva bárjaham
1.092.04c     jyótir víśvasmai bhúvanāya kr̥ṇvatī^́
1.092.04d     gā^́vo ná vrajáṃ ví uṣā^́ āvar támaḥ

1.092.05a     práti arcī^́ rúśad asyā adarśi
1.092.05b     ví tiṣṭhate bā^́dhate kr̥ṣṇám ábhvam
1.092.05c     sváruṃ ná péśo vidátheṣu añjáñ
1.092.05d     citráṃ divó duhitā^́ bhānúm aśret

1.092.06a     átāriṣma támasas pārám asyá
1.092.06b     uṣā^́ uchántī vayúnā kr̥ṇoti
1.092.06c     śriyé chándo ná smayate vibhātī^́
1.092.06d     suprátīkā saumanasā^́yājīgaḥ

1.092.07a     bhã^́svatī nayitrī^́+ sūnŕ̥tānāṃ
1.092.07b     divá stave duhitā^́ gótamebhiḥ
1.092.07c     prajā^́vato nr̥váto áśvabudhyān
1.092.07d     úṣo góagrām̐ úpa māsi vā^́jān

1.092.08a     úṣas tám aśyāṃ yaśásaṃ suvī^́raṃ
1.092.08b     dāsápravargaṃ rayím áśvabudhyam
1.092.08c     sudáṃsasā śrávasā yā^́ vibhā^́si
1.092.08d     vā^́japrasūtā subhage br̥hántam

1.092.09a     víśvāni devī^́ bhúvanābhicákṣyā
1.092.09b     pratīcī^́ cákṣur urviyā^́ ví bhāti
1.092.09c     víśvaṃ jīváṃ caráse bodháyantī
1.092.09d     víśvasya vā^́cam avidan manāyóḥ

1.092.10a     púnaḥ-punar jā^́yamānā purāṇī^́
1.092.10b     samānáṃ várṇam abhí śúmbhamānā
1.092.10c     śvaghnī^́va kr̥tnúr víja āminānā^́
1.092.10d     mártasya devī^́ jaráyanti ā^́yuḥ

1.092.11a     viūrṇvatī^́ divó ántām̐ abodhi
1.092.11b     ápa svásāraṃ sanutár yuyoti
1.092.11c     praminatī^́ manuṣíyā yugā^́ni
1.092.11d     yóṣā jārásya cákṣasā ví bhāti

1.092.12a     paśū^́n ná citrā^́ subhágā prathānā^́
1.092.12b     síndhur ná kṣóda urviyā^́ ví aśvait
1.092.12c     áminatī daíviyāni vratā^́ni
1.092.12d     sū^́ryasya ceti raśmíbhir dr̥śānā^́

1.092.13a     úṣas tác citrám ā^́ bhara
1.092.13b     asmábhyaṃ vājinīvati
1.092.13c     yéna tokáṃ ca tánayaṃ ca dhā^́mahe

1.092.14a     úṣo adyéhá gomati
1.092.14b     áśvāvati vibhāvari
1.092.14c     revád asmé ví ucha sūnr̥tāvati

1.092.15a     yukṣvā^́ hí vājinīvati
1.092.15b     áśvām̐ adyā^́ruṇā^́m̐ uṣaḥ
1.092.15c     áthā no víśvā saúbhagāni ā^́ vaha

1.092.16a     áśvinā vartír asmád ā^́
1.092.16b     gómad dasrā híraṇyavat
1.092.16c     arvā^́g ráthaṃ sámanasā ní yachatam

1.092.17a     yā^́v itthā^́ ślókam ā^́ divó
1.092.17b     jyótir jánāya cakráthuḥ
1.092.17c     ā^́ na ū^́rjaṃ vahatam aśvinā yuvám

1.092.18a     éhá devā^́ mayobhúvā
1.092.18b     dasrā^́ híraṇyavartanī
1.092.18c     uṣarbúdho vahantu sómapītaye

93

1.093.01a     ágnīṣomāv imáṃ sú me
1.093.01b     śr̥ṇutáṃ vr̥ṣaṇā hávam
1.093.01c     práti sūktā^́ni haryatam
1.093.01d     bhávataṃ dāśúṣe máyaḥ

1.093.02a     ágnīṣomā yó adyá vām
1.093.02b     idáṃ vácaḥ saparyáti
1.093.02c     tásmai dhattaṃ suvī^́riyaṃ
1.093.02d     gávām póṣaṃ suáśviyam

1.093.03a     ágnīṣomā yá ā^́hutiṃ
1.093.03b     yó vāṃ dā^́śād dhavíṣkr̥tim
1.093.03c     sá prajáyā suvī^́riyaṃ
1.093.03d     víśvam ā^́yur ví aśnavat

1.093.04a     ágnīṣomā céti tád vīríyaṃ vāṃ
1.093.04b     yád ámuṣṇītam avasám paṇíṃ gā^́ḥ
1.093.04c     ávātiratam bŕ̥sayasya śéṣo
1.093.04d     ávindataṃ jyótir ékam bahúbhyaḥ

1.093.05a     yuvám etā^́ni diví rocanā^́ni
1.093.05b     agníś ca soma sákratū adhattam
1.093.05c     yuváṃ síndhūm̐r abhíśaster avadyā^́d
1.093.05d     ágnīṣomāv ámuñcataṃ gr̥bhītā^́n

1.093.06a     ā^́nyáṃ divó mātaríśvā jabhāra
1.093.06b     ámathnād anyám pári śyenó ádreḥ
1.093.06c     ágnīṣomā bráhmaṇā vāvr̥dhānā^́
1.093.06d     urúṃ yajñā^́ya cakrathur ulokám†

1.093.07a     ágnīṣomā havíṣaḥ prásthitasya
1.093.07b     vītáṃ háryataṃ vr̥ṣaṇā juṣéthām
1.093.07c     suśármāṇā suávasā hí bhūtám
1.093.07d     áthā dhattaṃ yájamānāya śáṃ yóḥ

1.093.08a     yó agnī^́ṣómā havíṣā saparyā^́d
1.093.08b     devadrī^́cā mánasā yó ghr̥téna
1.093.08c     tásya vratáṃ rakṣatam pātám áṃhaso
1.093.08d     viśé jánāya máhi śárma yachatam

1.093.09a     ágnīṣomā sávedasā
1.093.09b     sáhūtī vanataṃ gíraḥ
1.093.09c     sáṃ devatrā^́ babhūvathuḥ

1.093.10a     ágnīṣomāv anéna vāṃ
1.093.10b     yó vāṃ ghr̥téna dā^́śati
1.093.10c     tásmai dīdayatam br̥hát

1.093.11a     ágnīṣomāv imā^́ni no
1.093.11b     yuváṃ havyā^́ jujoṣatam
1.093.11c     ā^́ yātam úpa naḥ sácā

1.093.12a     ágnīṣomā pipr̥tám árvato na
1.093.12b     ā^́ pyāyantām usríyā havyasū^́daḥ
1.093.12c     asmé bálāni maghávatsu dhattaṃ
1.093.12d     kr̥ṇutáṃ no adhvaráṃ śruṣṭimántam

94

1.094.01a     imáṃ stómam árhate jātávedase
1.094.01b     rátham iva sám mahemā manīṣáyā
1.094.01c     bhadrā^́ hí naḥ prámatir asya saṃsádi
1.094.01d     ágne sakhyé mā^́ riṣāmā vayáṃ táva

1.094.02a     yásmai tuvám āyájase sá sādhati
1.094.02b     anarvā^́ kṣeti dádhate suvī^́riyam
1.094.02c     sá tūtāva naínam aśnoti aṃhatír
1.094.02d     ágne sakhyé mā^́ riṣāmā vayáṃ táva

1.094.03a     śakéma tvā samídhaṃ sādháyā dhíyas
1.094.03b     tuvé devā^́ havír adanti ā^́hutam
1.094.03c     tvám ādityā^́m̐ ā^́ vaha tā^́n hí uśmási
1.094.03d     ágne sakhyé mā^́ riṣāmā vayáṃ táva

1.094.04a     bhárāmedhmáṃ kr̥ṇávāmā havī^́ṃṣi te
1.094.04b     citáyantaḥ párvaṇā-parvaṇā vayám
1.094.04c     jīvā^́tave prataráṃ sādhayā dhíyo
1.094.04d     ágne sakhyé mā^́ riṣāmā vayáṃ táva

1.094.05a     viśā^́ṃ gopā^́ asya caranti jantávo
1.094.05b     dvipác ca yád utá cátuṣpad aktúbhiḥ
1.094.05c     citráḥ praketá uṣáso mahā^́m̐ asi
1.094.05d     ágne sakhyé mā^́ riṣāmā vayáṃ táva

1.094.06a     tvám adhvaryúr utá hótāsi pūrviyáḥ
1.094.06b     praśāstā^́ pótā janúṣā puróhitaḥ
1.094.06c     víśvā vidvā^́m̐ ā^́rtvijyā dhīra puṣyasi
1.094.06d     ágne sakhyé mā^́ riṣāmā vayáṃ táva

1.094.07a     yó viśvátaḥ suprátīkaḥ sadŕ̥ṅṅ ási
1.094.07b     dūré cit sán taḷíd ivā^́ti rocase
1.094.07c     rā^́tryāś cid ándho áti deva paśyasi
1.094.07d     ágne sakhyé mā^́ riṣāmā vayáṃ táva

1.094.08a     pū^́rvo devā bhavatu sunvató rátho
1.094.08b     asmā^́kaṃ śáṃso abhí astu dūḍhíyaḥ
1.094.08c     tád ā^́ jānīta utá puṣyatā váco
1.094.08d     ágne sakhyé mā^́ riṣāmā vayáṃ táva

1.094.09a     vadhaír duḥśáṃsām̐ ápa dūḍhíyo jahi
1.094.09b     dūré vā yé ánti vā ké cid atríṇaḥ
1.094.09c     áthā yajñā^́ya gr̥ṇaté sugáṃ kr̥dhi
1.094.09d     ágne sakhyé mā^́ riṣāmā vayáṃ táva

1.094.10a     yád áyukthā aruṣā^́ róhitā ráthe
1.094.10b     vā^́tajūtā vr̥ṣabhásyeva te rávaḥ
1.094.10c     ā^́d invasi vaníno dhūmáketunā
1.094.10d     ágne sakhyé mā^́ riṣāmā vayáṃ táva

1.094.11a     ádha svanā^́d utá bibhyuḥ patatríṇo
1.094.11b     drapsā^́ yát te yavasā^́do ví ásthiran
1.094.11c     sugáṃ tát te tāvakébhyo ráthebhiyo
1.094.11d     ágne sakhyé mā^́ riṣāmā vayáṃ táva

1.094.12a     ayám mitrásya váruṇasya dhā^́yase
1.094.12b     avayātā^́m marútāṃ héḷo ádbhutaḥ
1.094.12c     mr̥̄ḷā^́+ sú no bhū^́tu eṣām mánaḥ púnar
1.094.12d     ágne sakhyé mā^́ riṣāmā vayáṃ táva

1.094.13a     devó devā^́nām asi mitró ádbhuto
1.094.13b     vásur vásūnām asi cā^́rur adhvaré
1.094.13c     śárman siyāma táva sapráthastame
1.094.13d     ágne sakhyé mā^́ riṣāmā vayáṃ táva

1.094.14a     tát te bhadráṃ yát sámiddhaḥ suvé dáme
1.094.14b     sómāhuto járase mr̥̄ḷayáttamaḥ⁺
1.094.14c     dádhāsi rátnaṃ dráviṇaṃ ca dāśúṣe
1.094.14d     ágne sakhyé mā^́ riṣāmā vayáṃ táva

1.094.15a     yásmai tuváṃ sudraviṇo dádāśo
1.094.15b     anāgāstvám adite sarvátātā
1.094.15c     yám bhadréṇa śávasā codáyāsi
1.094.15d     prajā^́vatā rā^́dhasā té siyāma

1.094.16a     sá tvám agne saubhagatvásya vidvā^́n
1.094.16b     asmā^́kam ā^́yuḥ prá tirehá deva
1.094.16c     tán no mitró váruṇo māmahantām
1.094.16d     áditiḥ síndhuḥ pr̥thivī^́ utá dyaúḥ

95

1.095.01a     duvé vírūpe carataḥ suárthe
1.095.01b     anyā^́nyā vatsám úpa dhāpayete
1.095.01c     hárir anyásyām bhávati svadhā^́vāñ
1.095.01d     chukró anyásyāṃ dadr̥śe suvárcāḥ

1.095.02a     dáśemáṃ tváṣṭur janayanta gárbham
1.095.02b     átandrāso yuvatáyo víbhr̥tram
1.095.02c     tigmā^́nīkaṃ sváyaśasaṃ jáneṣu
1.095.02d     virócamānam pári ṣīṃ nayanti

1.095.03a     trī^́ṇi jā^́nā pári bhūṣanti asya
1.095.03b     samudrá ékaṃ diví ékam apsú
1.095.03c     pū^́rvām ánu prá díśam pā^́rthivānām
1.095.03d     r̥tū^́n praśā^́sad ví dadhāv anuṣṭhú

1.095.04a     ká imáṃ vo niṇiyám ā^́ ciketa
1.095.04b     vatsó mātr̥̄^́r janayata svadhā^́bhiḥ
1.095.04c     bahvīnā^́ṃ gárbho apásām upásthān
1.095.04d     mahā^́n kavír níś carati svadhā^́vān

1.095.05a     āvíṣṭiyo vardhate cā^́rur āsu
1.095.05b     jihmā^́nām ūrdhváḥ sváyaśā upásthe
1.095.05c     ubhé tváṣṭur bibhyatur jā^́yamānāt
1.095.05d     pratīcī^́ siṃhám práti joṣayete

1.095.06a     ubhé bhadré joṣayete ná méne
1.095.06b     gā^́vo ná vāśrā^́ úpa tasthur évaiḥ
1.095.06c     sá dákṣāṇāṃ dákṣapatir babhūva
1.095.06d     añjánti yáṃ dakṣiṇató havírbhiḥ

1.095.07a     úd yaṃyamīti savitéva bāhū^́
1.095.07b     ubhé sícau yatate bhīmá r̥ñján
1.095.07c     úc chukrám átkam ajate simásmān
1.095.07d     návā māṭŕ̥bhyo vásanā jahāti

1.095.08a     tveṣáṃ rūpáṃ kr̥ṇuta úttaraṃ yát
1.095.08b     sampr̥ñcānáḥ sádane góbhir adbhíḥ
1.095.08c     kavír budhnám pári marmr̥jyate dhī^́ḥ
1.095.08d     sā^́ devátātā sámitir babhūva

1.095.09a     urú te jráyaḥ pári eti budhnáṃ
1.095.09b     virócamānam mahiṣásya dhā^́ma
1.095.09c     víśvebhir agne sváyaśobhir iddhó
1.095.09d     ádabdhebhiḥ pāyúbhiḥ pāhi asmā^́n

1.095.10a     dhánvan srótaḥ kr̥ṇute gātúm ūrmíṃ
1.095.10b     śukraír ūrmíbhir abhí nakṣati kṣā^́m
1.095.10c     víśvā sánāni jaṭháreṣu dhatte
1.095.10d     antár návāsu carati prasū^́ṣu

1.095.11a     evā^́ no agne samídhā vr̥dhānó
1.095.11b     revát pavāka⁺ śrávase ví bhāhi
1.095.11c     tán no mitró váruṇo māmahantām
1.095.11d     áditiḥ síndhuḥ pr̥thivī^́ utá dyaúḥ

96

1.096.01a     sá pratnáthā sáhasā jā^́yamānaḥ
1.096.01b     sadyáḥ kā^́vyāni báḷ adhatta víśvā
1.096.01c     ā^́paś ca mitráṃ dhiṣáṇā ca sādhan
1.096.01d     devā^́ agníṃ dhārayan draviṇodā^́m

1.096.02a     sá pū^́rvayā nivídā kavyátāyór
1.096.02b     imā^́ḥ prajā^́ ajanayan mánūnām
1.096.02c     vivásvatā cákṣasā dyā^́m apáś ca
1.096.02d     devā^́ agníṃ dhārayan draviṇodā^́m

1.096.03a     tám īḷata prathamáṃ yajñasā^́dhaṃ
1.096.03b     víśa ā^́rīr ā^́hutam r̥ñjasānám
1.096.03c     ūrjáḥ putrám bharatáṃ sr̥prádānuṃ
1.096.03d     devā^́ agníṃ dhārayan draviṇodā^́m

1.096.04a     sá mātaríśvā puruvā^́rapuṣṭir
1.096.04b     vidád gātúṃ tánayāya suvarvít
1.096.04c     viśā^́ṃ gopā^́ janitā^́ ródasīyor
1.096.04d     devā^́ agníṃ dhārayan draviṇodā^́m

1.096.05a     náktoṣā^́sā várṇam āmémiyāne
1.096.05b     dhāpáyete śíśum ékaṃ samīcī^́
1.096.05c     dyā^́vākṣā^́mā rukmó antár ví bhāti
1.096.05d     devā^́ agníṃ dhārayan draviṇodā^́m

1.096.06a     rāyó budhnáḥ saṃgámano vásūnāṃ
1.096.06b     yajñásya ketúr manmasā^́dhano véḥ
1.096.06c     amr̥tatváṃ rákṣamāṇāsa enaṃ
1.096.06d     devā^́ agníṃ dhārayan draviṇodā^́m

1.096.07a     nū^́ ca purā^́ ca sádanaṃ rayīṇā^́ṃ
1.096.07b     jātásya ca jā^́yamānasya ca kṣā^́m
1.096.07c     satáś ca gopā^́m bhávataś ca bhū^́rer
1.096.07d     devā^́ agníṃ dhārayan draviṇodā^́m

1.096.08a     draviṇodā^́ dráviṇasas turásya
1.096.08b     draviṇodā^́ḥ sánarasya prá yaṃsat
1.096.08c     draviṇodā^́ vīrávatīm íṣaṃ no
1.096.08d     draviṇodā^́ rāsate dīrghám ā^́yuḥ

1.096.09a     evā^́ no agne samídhā vr̥dhānó
1.096.09b     revát pavāka⁺ śrávase ví bhāhi
1.096.09c     tán no mitró váruṇo māmahantām
1.096.09d     áditiḥ síndhuḥ pr̥thivī^́ utá dyaúḥ

97

1.097.01a     ápa naḥ śóśucad aghám
1.097.01b     ágne śuśugdhí ā^́ rayím
1.097.01c     ápa naḥ śóśucad aghám

1.097.02a     sukṣetriyā^́ sugātuyā^́
1.097.02b     vasūyā^́ ca yajāmahe
1.097.02c     ápa naḥ śóśucad aghám

1.097.03a     prá yád bhándiṣṭha eṣãm
1.097.03b     prā^́smā^́kāsaś ca sūráyaḥ
1.097.03c     ápa naḥ śóśucad aghám

1.097.04a     prá yát te agne sūráyo
1.097.04b     jā^́yemahi prá te vayám
1.097.04c     ápa naḥ śóśucad aghám

1.097.05a     prá yád agnéḥ sáhasvato
1.097.05b     viśváto yánti bhānávaḥ
1.097.05c     ápa naḥ śóśucad aghám

1.097.06a     tuváṃ hí viśvatomukha
1.097.06b     viśvátaḥ paribhū^́r ási
1.097.06c     ápa naḥ śóśucad aghám

1.097.07a     dvíṣo no viśvatomukha
1.097.07b     áti nāvéva pāraya
1.097.07c     ápa naḥ śóśucad aghám

1.097.08a     sá naḥ síndhum 'va° nāváyā
1.097.08b     áti parṣā suastáye
1.097.08c     ápa naḥ śóśucad aghám

98

1.098.01a     vaiśvānarásya sumataú siyāma
1.098.01b     rā^́jā hí kam bhúvanānām abhiśrī^́ḥ
1.098.01c     itó jātó víśvam idáṃ ví caṣṭe
1.098.01d     vaiśvānaró yatate sū^́riyeṇa

1.098.02a     pr̥ṣṭó diví pr̥ṣṭó agníḥ pr̥thivyā^́m
1.098.02b     pr̥ṣṭó víśvā óṣadhīr ā^́ viveśa
1.098.02c     vaiśvānaráḥ sáhasā pr̥ṣṭó agníḥ
1.098.02d     sá no dívā sá riṣáḥ pātu náktam

1.098.03a     vaíśvānara táva tát satyám astu
1.098.03b     asmā^́n rā^́yo maghávānaḥ sacantām
1.098.03c     tán no mitró váruṇo māmahantām
1.098.03d     áditiḥ síndhuḥ pr̥thivī^́ utá dyaúḥ

99

1.099.01a     jātávedase sunavāma sómam
1.099.01b     arātīyató ní dahāti védaḥ
1.099.01c     sá naḥ parṣad áti durgā^́ṇi víśvā
1.099.01d     nāvéva síndhuṃ duritā^́ti agníḥ

100

1.100.01a     sá yó vŕ̥ṣā vŕ̥ṣṇiyebhiḥ sámokā
1.100.01b     mahó diváḥ pr̥thiviyā^́ś ca samrā^́ṭ
1.100.01c     satīnásatvā háviyo bháreṣu
1.100.01d     marútvān no bhavatu índra ūtī^́

1.100.02a     yásyā^́nāptaḥ sū^́riyasyeva yā^́mo
1.100.02b     bháre-bhare vr̥trahā^́ śúṣmo ásti
1.100.02c     vŕ̥ṣantamaḥ sákhibhiḥ svébhir évair
1.100.02d     marútvān no bhavatu índra ūtī^́

1.100.03a     divó ná yásya rétaso dúghānāḥ
1.100.03b     pánthāso yánti śávasā^́parītāḥ
1.100.03c     taráddveṣāḥ sāsahíḥ paúṃsiyebhir
1.100.03d     marútvān no bhavatu índra ūtī^́

1.100.04a     só áṅgirobhir áṅgirastamo bhūd
1.100.04b     vŕ̥ṣā vŕ̥ṣabhiḥ sákhibhiḥ sákhā sán
1.100.04c     r̥gmíbhir r̥gmī^́ gātúbhir jyáyiṣṭho⁺
1.100.04d     marútvān no bhavatu índra ūtī^́

1.100.05a     sá sūnúbhir ná rudarébhir⁺ ŕ̥bhvā
1.100.05b     nr̥ṣā^́hiye sāsahuvā^́m̐ amítrān
1.100.05c     sánīḷebhiḥ śravasíyāni tū^́rvan
1.100.05d     marútvān no bhavatu índra ūtī^́

1.100.06a     sá manyumī^́ḥ samádanasya kartā^́
1.100.06b     asmā^́kebhir nŕ̥bhiḥ sū^́riyaṃ sanat
1.100.06c     asmínn áhan sátpatiḥ puruhūtó
1.100.06d     marútvān no bhavatu índra ūtī^́

1.100.07a     tám ūtáyo raṇayañ chū^́rasātau
1.100.07b     táṃ kṣémasya kṣitáyaḥ kr̥ṇvata trā^́m
1.100.07c     sá víśvasya karúṇasyeśa éko
1.100.07d     marútvān no bhavatu índra ūtī^́

1.100.08a     tám apsanta śávasa utsavéṣu
1.100.08b     náro náram ávase táṃ dhánāya
1.100.08c     só andhé cit támasi jyótir vidan
1.100.08d     marútvān no bhavatu índra ūtī^́

1.100.09a     sá savyéna yamati vrā^́dhataś cit
1.100.09b     sá dakṣiṇé sáṃgr̥bhītā kr̥tā^́ni
1.100.09c     sá kīríṇā cit sánitā dhánāni
1.100.09d     marútvān no bhavatu índra ūtī^́

1.100.10a     sá grā^́mebhiḥ sánitā sá ráthebhir
1.100.10b     vidé víśvābhiḥ kr̥ṣṭíbhir nú adyá
1.100.10c     sá paúṃsiyebhir abhibhū^́r áśastīr
1.100.10d     marútvān no bhavatu índra ūtī^́

1.100.11a     sá jāmíbhir yát samájāti mīḷhé
1.100.11b     ájāmibhir vā puruhūtá évaiḥ
1.100.11c     apā^́ṃ tokásya tánayasya jeṣé
1.100.11d     marútvān no bhavatu índra ūtī^́

1.100.12a     sá vajrabhŕ̥d dasyuhā^́ bhīmá ugráḥ
1.100.12b     sahásracetāḥ śatánītha ŕ̥bhvā
1.100.12c     camrīṣó ná śávasā pā^́ñcajanyo
1.100.12d     marútvān no bhavatu índra ūtī^́

1.100.13a     tásya vájraḥ krandati smát suvarṣā^́
1.100.13b     divó ná tveṣó raváthaḥ śímīvān
1.100.13c     táṃ sacante sanáyas táṃ dhánāni
1.100.13d     marútvān no bhavatu índra ūtī^́

1.100.14a     yásyā^́jasraṃ śávasā mā^́nam ukthám
1.100.14b     paribhujád ródasī viśvátaḥ sīm
1.100.14c     sá pāriṣat krátubhir mandasānó
1.100.14d     marútvān no bhavatu índra ūtī^́

1.100.15a     ná yásya devā^́ devátā ná mártā
1.100.15b     ā^́paś caná śávaso ántam āpúḥ
1.100.15c     sá praríkvā tvákṣasā kṣmó diváś ca
1.100.15d     marútvān no bhavatu índra ūtī^́

1.100.16a     rohíc chyāvā^́ sumádaṃśur lalāmī^́r
1.100.16b     diyukṣā^́ rāyá r̥jarā^́śuvasya
1.100.16c     vŕ̥ṣaṇvantam bíbhratī dhūrṣú rátham
1.100.16d     mandrā^́ ciketa nā^́huṣīṣu vikṣú

1.100.17a     etát tiyát ta indra vŕ̥ṣṇa uktháṃ
1.100.17b     vārṣāgirā^́ abhí gr̥ṇanti rā^́dhaḥ
1.100.17c     r̥jrā^́śuvaḥ práṣṭibhir ambarī^́ṣaḥ
1.100.17d     sahádevo bháyamānaḥ surā^́dhāḥ

1.100.18a     dásyūñ chímyūṃś ca puruhūtá évair
1.100.18b     hatvā^́ pr̥thivyā^́ṃ śáruvā ní barhīt
1.100.18c     sánat kṣétraṃ sákhibhiḥ śvitniyébhiḥ
1.100.18d     sánat sū^́ryaṃ sánad apáḥ suvájraḥ

1.100.19a     viśvā^́héndro adhivaktā^́ no astu
1.100.19b     áparihvr̥tāḥ sanuyāma vā^́jam
1.100.19c     tán no mitró váruṇo māmahantām
1.100.19d     áditiḥ síndhuḥ pr̥thivī^́ utá dyaúḥ

101

1.101.01a     prá mandíne pitumád arcatā váco
1.101.01b     yáḥ kr̥ṣṇágarbhā niráhann r̥jíśvanā
1.101.01c     avasyávo vŕ̥ṣaṇaṃ vájradakṣiṇam
1.101.01d     marútvantaṃ sakhiyā^́ya havāmahe

1.101.02a     yó víaṃsaṃ jāhr̥ṣāṇéna manyúnā
1.101.02b     yáḥ śámbaraṃ yó áhan píprum avratám
1.101.02c     índro yáḥ śúṣṇam aśúṣaṃ ní ā^́vr̥ṇaṅ
1.101.02d     marútvantaṃ sakhiyā^́ya havāmahe

1.101.03a     yásya dyā^́vāpr̥thivī^́ paúṃsiyam mahád
1.101.03b     yásya vraté váruṇo yásya sū^́riyaḥ
1.101.03c     yásyéndrasya síndhavaḥ sáścati vratám
1.101.03d     marútvantaṃ sakhiyā^́ya havāmahe

1.101.04a     yó áśvānāṃ yó gávāṃ gópatir vaśī^́
1.101.04b     yá āritáḥ kármaṇi-karmaṇi sthiráḥ
1.101.04c     vīḷóś cid índro yó ásunvato vadhó
1.101.04d     marútvantaṃ sakhiyā^́ya havāmahe

1.101.05a     yó víśvasya jágataḥ prāṇatás pátir
1.101.05b     yó brahmáṇe prathamó gã^́ ávindat
1.101.05c     índro yó dásyūm̐r ádharām̐ avā^́tiran
1.101.05d     marútvantaṃ sakhiyā^́ya havāmahe

1.101.06a     yáḥ śū^́rebhir háviyo yáś ca bhīrúbhir
1.101.06b     yó dhā^́vadbhir hūyáte yáś ca jigyúbhiḥ
1.101.06c     índraṃ yáṃ víśvā bhúvanābhí saṃdadhúr
1.101.06d     marútvantaṃ sakhiyā^́ya havāmahe

1.101.07a     rudrā^́ṇām eti pradíśā vicakṣaṇó
1.101.07b     rudrébhir yóṣā tanute pr̥thú jráyaḥ
1.101.07c     índram manīṣā^́ abhí arcati śrutám
1.101.07d     marútvantaṃ sakhiyā^́ya havāmahe

1.101.08a     yád vā marutvaḥ paramé sadhásthe
1.101.08b     yád vāvamé vr̥jáne mādáyāse
1.101.08c     áta ā^́ yāhi adhvaráṃ no áchā
1.101.08d     tvāyā^́ havíś cakr̥mā satyarādhaḥ

1.101.09a     tvāyéndra sómaṃ suṣumā sudakṣa
1.101.09b     tvāyā^́ havíś cakr̥mā brahmavāhaḥ
1.101.09c     ádhā niyutvaḥ ságaṇo marúdbhir
1.101.09d     asmín yajñé barhíṣi mādayasva

1.101.10a     mādáyasva háribhir yé ta indra
1.101.10b     ví ṣyasva śípre ví sr̥jasva dhéne
1.101.10c     ā^́ tvā suśipra hárayo vahantu
1.101.10d     uśán havyā^́ni práti no juṣasva

1.101.11a     marútstotrasya vr̥jánasya gopā^́
1.101.11b     vayám índreṇa sanuyāma vā^́jam
1.101.11c     tán no mitró váruṇo māmahantām
1.101.11d     áditiḥ síndhuḥ pr̥thivī^́ utá dyaúḥ

102

1.102.01a     imā^́ṃ te dhíyam prá bhare mahó mahī^́m
1.102.01b     asyá stotré dhiṣáṇā yát ta ānajé
1.102.01c     tám utsavé ca prasavé ca sāsahím
1.102.01d     índraṃ devā^́saḥ śávasāmadann ánu

1.102.02a     asyá śrávo nadíyaḥ saptá bibhrati
1.102.02b     dyā^́vākṣā^́mā pr̥thivī^́ darśatáṃ vápuḥ
1.102.02c     asmé sūryācandramásābhicákṣe
1.102.02d     śraddhé kám indra carato vitarturám

1.102.03a     táṃ smā rátham maghavan prā^́va sātáye
1.102.03b     jaítraṃ yáṃ te anumádāma saṃgamé
1.102.03c     ājā^́ na indra mánasā puruṣṭuta
1.102.03d     tvāyádbhiyo maghavañ chárma yacha naḥ

1.102.04a     vayáṃ jayema tuváyā yujā^́ vŕ̥tam
1.102.04b     asmā^́kam áṃśam úd avā bháre-bhare
1.102.04c     asmábhyam indra várivaḥ sugáṃ kr̥dhi
1.102.04d     prá śátrūṇām maghavan vŕ̥ṣṇiyā ruja

1.102.05a     nā^́nā hí tvā hávamānā jánā imé
1.102.05b     dhánānāṃ dhartar ávasā vipanyávaḥ
1.102.05c     asmā^́kaṃ smā rátham ā^́ tiṣṭha sātáye
1.102.05d     jaítraṃ hí indra níbhr̥tam mánas táva

1.102.06a     gojítā bāhū^́ ámitakratuḥ simáḥ
1.102.06b     kárman-karmañ chatámūtiḥ khajaṃkaráḥ
1.102.06c     akalpá índraḥ pratimā^́nam ójasā
1.102.06d     áthā jánā ví hvayante siṣāsávaḥ

1.102.07a     út te śatā^́n maghavann úc ca bhū^́yasa
1.102.07b     út sahásrād ririce kr̥ṣṭíṣu śrávaḥ
1.102.07c     amātráṃ tvā dhiṣáṇā titviṣe mahī^́
1.102.07d     ádhā vr̥trā^́ṇi jighnase puraṃdara

1.102.08a     triviṣṭidhā^́tu pratimā^́nam ójasas
1.102.08b     tisró bhū^́mīr nr̥pate trī^́ṇi rocanā^́
1.102.08c     átīdáṃ víśvam bhúvanaṃ vavakṣitha
1.102.08d     aśatrúr indra janúṣā sanā^́d asi

1.102.09a     tuvā^́ṃ devéṣu prathamáṃ havāmahe
1.102.09b     tuvám babhūtha pŕ̥tanāsu sāsahíḥ
1.102.09c     sémáṃ naḥ kārúm upamanyúm udbhídam
1.102.09d     índraḥ kr̥ṇotu prasavé rátham puráḥ

1.102.10a     tuváṃ jigetha ná dhánā rurodhitha
1.102.10b     árbheṣu ājā^́ maghavan mahátsu ca
1.102.10c     tuvā^́m ugrám ávase sáṃ śiśīmasi
1.102.10d     áthā na indra hávaneṣu codaya

1.102.11a     viśvā^́héndro adhivaktā^́ no astu
1.102.11b     áparihvr̥tāḥ sanuyāma vā^́jam
1.102.11c     tán no mitró váruṇo māmahantām
1.102.11d     áditiḥ síndhuḥ pr̥thivī^́ utá dyaúḥ

103

1.103.01a     tát ta indriyám paramám parācaír
1.103.01b     ádhārayanta kaváyaḥ purédám
1.103.01c     kṣamédám anyád diví anyád asya
1.103.01d     sám ī pr̥cyate samanéva ketúḥ

1.103.02a     sá dhārayat pr̥thivī^́m papráthac ca
1.103.02b     vájreṇa hatvā^́ nír apáḥ sasarja
1.103.02c     áhann áhim ábhinad rauhiṇáṃ ví
1.103.02d     áhan víaṃsam maghávā śácībhiḥ

1.103.03a     sá jātū^́bharmā śraddádhāna ójaḥ
1.103.03b     púro vibhindánn acarad ví dā^́sīḥ
1.103.03c     vidvā^́n vajrin dásyave hetím asya
1.103.03d     ā^́ryaṃ sáho vardhayā dyumnám indra

1.103.04a     tád ūcúṣe mā^́nuṣemā^́ yugā^́ni
1.103.04b     kīrténiyam maghávā nā^́ma bíbhrat
1.103.04c     upaprayán dasyuhátyāya vajrī^́
1.103.04d     yád dha sūnúḥ śrávase nā^́ma dadhé

1.103.05a     tád asyedám paśyatā bhū^́ri puṣṭáṃ
1.103.05b     śrád índrasya dhattana vīríyāya
1.103.05c     sá gā^́ avindat só avindad áśvān
1.103.05d     sá óṣadhīḥ só apáḥ sá vánāni

1.103.06a     bhū^́rikarmaṇe vr̥ṣabhā^́ya vŕ̥ṣṇe
1.103.06b     satyáśuṣmāya sunavāma sómam
1.103.06c     yá ādŕ̥tyā paripanthī^́va śū^́ro
1.103.06d     áyajvano vibhájann éti védaḥ

1.103.07a     tád indra préva vīríyaṃ cakartha
1.103.07b     yát sasántaṃ vájreṇā^́bodhayó 'him
1.103.07c     ánu tvā pátnīr hr̥ṣitáṃ váyaś ca
1.103.07d     víśve devā^́so amadann ánu tvā

1.103.08a     śúṣṇam pípruṃ kúyavaṃ vr̥trám indra
1.103.08b     yadā^́vadhīr ví púraḥ śámbarasya
1.103.08c     tán no mitró váruṇo māmahantām
1.103.08d     áditiḥ síndhuḥ pr̥thivī^́ utá dyaúḥ

104

1.104.01a     yóniṣ ṭa indra niṣáde akāri
1.104.01b     tám ā^́ ní ṣīda svānó ná árvā
1.104.01c     vimúcyā váyo avasā^́ya áśvān
1.104.01d     doṣā^́ vástor váhīyasaḥ prapitvé

1.104.02a     ó tiyé nára índram ūtáye gur
1.104.02b     nū^́ cit tā^́n sadyó ádhvano jagamyāt
1.104.02c     devā^́so manyúṃ dã^́sasya ścamnan
1.104.02d     té na ā^́ vakṣan suvitā^́ya várṇam

1.104.03a     áva tmánā bharate kétavedā
1.104.03b     áva tmánā bharate phénam udán
1.104.03c     kṣīréṇa snātaḥ kúyavasya yóṣe
1.104.03d     haté té syātām pravaṇé śíphāyāḥ

1.104.04a     yuyópa nā^́bhir úparasya āyóḥ
1.104.04b     prá pū^́rvābhis tirate rā^́ṣṭi śū^́raḥ
1.104.04c     añjasī^́ · kuliśī^́ vīrápatnī
1.104.04d     páyo hinvānā^́ udábhir bharante

1.104.05a     práti yát syā^́ nī^́thā ádarśi dásyor
1.104.05b     óko nā^́chā sádanaṃ jānatī^́ gāt
1.104.05c     ádha smā no maghavañ carkr̥tā^́d ín
1.104.05d     mā^́ no maghéva niṣṣapī^́ párā dāḥ

1.104.06a     sá tváṃ na indra sū^́riye só apsú
1.104.06b     anāgāstvá ā^́ bhaja jīvaśaṃsé
1.104.06c     mā^́ ántarām bhújam ā^́ rīriṣo naḥ
1.104.06d     śráddhitaṃ te mahatá indriyā^́ya

1.104.07a     ádhā manye śrát te asmā adhāyi
1.104.07b     vŕ̥ṣā codasva mahaté dhánāya
1.104.07c     mā^́ no ákr̥te puruhūta yónāv
1.104.07d     índra kṣúdhyadbhyo váya āsutíṃ dāḥ

1.104.08a     mā^́ no vadhīr indara⁺ mā^́ párā dā
1.104.08b     mā^́ naḥ priyā^́ bhójanāni prá moṣīḥ
1.104.08c     āṇḍā^́ mā^́ no maghavañ chakra nír bhen
1.104.08d     mā^́ naḥ pā^́trā bhet sahájānuṣāṇi

1.104.09a     arvā^́ṅ éhi sómakāmaṃ tuvāhur
1.104.09b     ayáṃ sutás tásya pibā mádāya
1.104.09c     uruvyácā jaṭhára ā^́ vr̥ṣasva
1.104.09d     pitéva naḥ śr̥ṇuhi hūyámānaḥ

105

1.105.01a     candrámā apsú antár ā^́
1.105.01b     suparṇó dhāvate diví
1.105.01c     ná vo hiraṇyanemayaḥ
1.105.01d     padáṃ vindanti vidyuto
1.105.01e     vittám me asyá rodasī

1.105.02a     ártham íd vā^́ u arthína
1.105.02b     ā^́ jāyā^́ yuvate pátim
1.105.02c     tuñjā^́te vŕ̥ṣṇiyam páyaḥ
1.105.02d     paridā^́ya rásaṃ duhe
1.105.02e     vittám me asyá rodasī

1.105.03a     mó ṣú devā adáḥ súvar
1.105.03b     áva pādi divás pári
1.105.03c     mā^́ somiyásya śambhúvaḥ
1.105.03d     śū^́ne bhūma kádā caná
1.105.03e     vittám me asyá rodasī

1.105.04a     yajñám pr̥chāmi avamáṃ
1.105.04b     sá tád dūtó ví vocati
1.105.04c     kúva rtám pūrviyáṃ gatáṃ
1.105.04d     kás tád bibharti nū^́tano
1.105.04e     vittám me asyá rodasī

1.105.05a     amī^́ yé devā sthána
1.105.05b     triṣú ā^́ rocané diváḥ
1.105.05c     kád va r̥táṃ kád ánr̥taṃ
1.105.05d     kúva pratnā^́ va ā^́hutir
1.105.05e     vittám me asyá rodasī

1.105.06a     kád va r̥tásya dharṇasí
1.105.06b     kád váruṇasya cákṣaṇam
1.105.06c     kád aryamṇó mahás pathā^́
1.105.06d     áti krāmema dūḍhíyo
1.105.06e     vittám me asyá rodasī

1.105.07a     aháṃ só asmi yáḥ purā^́
1.105.07b     suté vádāmi kā^́ni cit
1.105.07c     tám mā viyanti ādhíyo
1.105.07d     vŕ̥ko ná tr̥ṣṇájam mr̥gáṃ
1.105.07e     vittám me asyá rodasī

1.105.08a     sám mā tapanti abhítaḥ
1.105.08b     sapátnīr iva párśavaḥ
1.105.08c     mū^́ṣo ná śiśnā^́ ví adanti mādhíya
1.105.08d     stotā^́raṃ te śatakrato
1.105.08e     vittám me asyá rodasī

1.105.09a     amī^́ yé saptá raśmáyas
1.105.09b     tátrā me nā^́bhir ā^́tatā
1.105.09c     tritás tád veda āptiyáḥ
1.105.09d     sá jāmitvā^́ya rebhati
1.105.09e     vittám me asyá rodasī

1.105.10a     amī^́ yé páñca ukṣáṇo
1.105.10b     mádhye tasthúr mahó diváḥ
1.105.10c     devatrā^́ nú pravā^́ciyaṃ
1.105.10d     sadhrīcīnā^́ ní vāvr̥tur
1.105.10e     vittám me asyá rodasī

1.105.11a     suparṇā^́ etá āsate
1.105.11b     mádhya āródhane diváḥ
1.105.11c     té sedhanti pathó vŕ̥kaṃ
1.105.11d     tárantaṃ yahvátīr apó
1.105.11e     vittám me asyá rodasī

1.105.12a     návyaṃ tád ukthíyaṃ hitáṃ
1.105.12b     dévāsaḥ supravācanám
1.105.12c     r̥tám arṣanti síndhavaḥ
1.105.12d     satyáṃ tātāna sū^́riyo
1.105.12e     vittám me asyá rodasī

1.105.13a     ágne táva tyád ukthíyaṃ
1.105.13b     devéṣu asti ā^́piyam
1.105.13c     sá naḥ sattó manuṣvád ā^́
1.105.13d     devā^́n yakṣi vidúṣṭaro
1.105.13e     vittám me asyá rodasī

1.105.14a     sattó hótā manuṣvád ā^́
1.105.14b     devā^́m̐ áchā vidúṣṭaraḥ
1.105.14c     agnír havyā^́ suṣūdati
1.105.14d     devó devéṣu médhiro
1.105.14e     vittám me asyá rodasī

1.105.15a     bráhmā kr̥ṇoti váruṇo
1.105.15b     gātuvídaṃ tám īmahe
1.105.15c     ví ūrṇoti hr̥dā^́ matíṃ
1.105.15d     náviyo jāyatām r̥táṃ
1.105.15e     vittám me asyá rodasī

1.105.16a     asaú yáḥ pánthā ādityó
1.105.16b     diví pravā^́ciyaṃ kr̥táḥ
1.105.16c     ná sá devā atikráme
1.105.16d     tám martāso ná paśyatha
1.105.16e     vittám me asyá rodasī

1.105.17a     tritáḥ kū^́pe ávahito
1.105.17b     devā^́n havata ūtáye
1.105.17c     tác chuśrāva bŕ̥haspátiḥ
1.105.17d     kr̥ṇvánn aṃhūraṇā^́d urú
1.105.17e     vittám me asyá rodasī

1.105.18a     aruṇó mā sakŕ̥d vŕ̥kaḥ
1.105.18b     pathā^́ yántaṃ dadárśa hí
1.105.18c     új jihīte nicā^́yiyā
1.105.18d     táṣṭeva pr̥ṣṭiyāmayī^́
1.105.18e     vittám me asyá rodasī

1.105.19a     enā^́ṅgūṣéṇa vayám índravanto
1.105.19b     abhí ṣyāma vr̥jáne sárvavīrāḥ
1.105.19c     tán no mitró váruṇo māmahantām
1.105.19d     áditiḥ síndhuḥ pr̥thivī^́ utá dyaúḥ

106

1.106.01a     índram mitráṃ váruṇam agním ūtáye
1.106.01b     mā^́rutaṃ śárdho áditiṃ havāmahe
1.106.01c     ráthaṃ ná durgā^́d vasavaḥ sudānavo
1.106.01d     víśvasmān no áṃhaso níṣ pipartana

1.106.02a     tá ādityā ā^́ gatā sarvátātaye
1.106.02b     bhūtá devā vr̥tratū^́ryeṣu śambhúvaḥ
1.106.02c     ráthaṃ ná durgā^́d vasavaḥ sudānavo
1.106.02d     víśvasmān no áṃhaso níṣ pipartana

1.106.03a     ávantu naḥ pitáraḥ supravācanā^́
1.106.03b     utá devī^́ deváputre r̥tāvŕ̥dhā
1.106.03c     ráthaṃ ná durgā^́d vasavaḥ sudānavo
1.106.03d     víśvasmān no áṃhaso níṣ pipartana

1.106.04a     nárāśáṃsaṃ vājínaṃ vājáyann ihá
1.106.04b     kṣayádvīram pūṣáṇaṃ sumnaír īmahe
1.106.04c     ráthaṃ ná durgā^́d vasavaḥ sudānavo
1.106.04d     víśvasmān no áṃhaso níṣ pipartana

1.106.05a     bŕ̥haspate sádam ín naḥ sugáṃ kr̥dhi
1.106.05b     śáṃ yór yát te mánurhitaṃ tád īmahe
1.106.05c     ráthaṃ ná durgā^́d vasavaḥ sudānavo
1.106.05d     víśvasmān no áṃhaso níṣ pipartana

1.106.06a     índraṃ kútso vr̥traháṇaṃ śácīpátiṃ
1.106.06b     kāṭé níbāḷha ŕ̥ṣir ahvad ūtáye
1.106.06c     ráthaṃ ná durgā^́d vasavaḥ sudānavo
1.106.06d     víśvasmān no áṃhaso níṣ pipartana

1.106.07a     devaír no devī^́ áditir ní pātu
1.106.07b     devás trātā^́ trāyatām áprayuchan
1.106.07c     tán no mitró váruṇo māmahantām
1.106.07d     áditiḥ síndhuḥ pr̥thivī^́ utá dyaúḥ

107

1.107.01a     yajñó devā^́nām práti eti sumnám
1.107.01b     ā^́dityāso bhávatā mr̥̄ḷayántaḥ⁺
1.107.01c     ā^́ vo arvā^́cī sumatír vavr̥tyād
1.107.01d     aṃhóś cid yā^́ varivovíttarā^́sat

1.107.02a     úpa no devā^́ ávasā^́ gamantu
1.107.02b     áṅgirasāṃ sā^́mabhi stūyámānāḥ
1.107.02c     índra indriyaír marúto marúdbhir
1.107.02d     ādityaír no áditiḥ śárma yaṃsat

1.107.03a     tán na índras tád váruṇas tád agnís
1.107.03b     tád aryamā^́ tát savitā^́ cáno dhāt
1.107.03c     tán no mitró váruṇo māmahantām
1.107.03d     áditiḥ síndhuḥ pr̥thivī^́ utá dyaúḥ

108

1.108.01a     yá indrāgnī citrátamo rátho vām
1.108.01b     abhí víśvāni bhúvanāni cáṣṭe
1.108.01c     ténā^́ yātaṃ saráthaṃ tasthivā^́ṃsā
1.108.01d     áthā sómasya pibataṃ sutásya

1.108.02a     yā^́vad idám bhúvanaṃ víśvam ásti
1.108.02b     uruvyácā varimátā gabhīrám
1.108.02c     tā^́vām̐ ayám pā^́tave sómo astu
1.108.02d     áram indrāgnī mánase yuvábhyām

1.108.03a     cakrā^́the hí sadhríaṅ nā^́ma bhadráṃ
1.108.03b     sadhrīcīnā^́ vr̥trahaṇā utá sthaḥ
1.108.03c     tā^́v indrāgnī sadhríañcā niṣádyā
1.108.03d     vŕ̥ṣṇaḥ sómasya vr̥ṣaṇā^́ vr̥ṣethām

1.108.04a     sámiddheṣu agníṣu ānajānā^́
1.108.04b     yatásrucā barhír u tistirāṇā^́
1.108.04c     tīvraíḥ sómaiḥ páriṣiktebhir arvā^́g
1.108.04d     ā^́ indrāgnī saumanasā^́ya yātam

1.108.05a     yā^́nīndrāgnī cakráthur vīríyāṇi
1.108.05b     yā^́ni rūpā^́ṇi utá vŕ̥ṣṇiyāni
1.108.05c     yā^́ vām pratnā^́ni sakhiyā^́ śivā^́ni
1.108.05d     tébhiḥ sómasya pibataṃ sutásya

1.108.06a     yád ábravam prathamáṃ vāṃ vr̥ṇānó
1.108.06b     ayáṃ sómo ásurair no vihávyaḥ
1.108.06c     tā^́ṃ satyā^́ṃ śraddhā^́m abhí ā^́ hí yātám
1.108.06d     áthā sómasya pibataṃ sutásya

1.108.07a     yád indrāgnī mádathaḥ své duroṇé
1.108.07b     yád brahmáṇi rā^́jani vā yajatrā
1.108.07c     átaḥ pári vr̥ṣaṇāv ā^́ hí yātám
1.108.07d     áthā sómasya pibataṃ sutásya

1.108.08a     yád indrāgnī yáduṣu turváśeṣu
1.108.08b     yád druhyúṣu ánuṣu pūrúṣu stháḥ
1.108.08c     átaḥ pári vr̥ṣaṇāv ā^́ hí yātám
1.108.08d     áthā sómasya pibataṃ sutásya

1.108.09a     yád indrāgnī avamásyām pr̥thivyā^́m
1.108.09b     madhyamásyām paramásyām utá stháḥ
1.108.09c     átaḥ pári vr̥ṣaṇāv ā^́ hí yātám
1.108.09d     áthā sómasya pibataṃ sutásya

1.108.10a     yád indrāgnī paramásyām pr̥thivyā^́m
1.108.10b     madhyamásyām avamásyām utá stháḥ
1.108.10c     átaḥ pári vr̥ṣaṇāv ā^́ hí yātám
1.108.10d     áthā sómasya pibataṃ sutásya

1.108.11a     yád indrāgnī diví ṣṭhó yát pr̥thivyā^́ṃ
1.108.11b     yát párvateṣu óṣadhīṣu apsú
1.108.11c     átaḥ pári vr̥ṣaṇāv ā^́ hí yātám
1.108.11d     áthā sómasya pibataṃ sutásya

1.108.12a     yád indrāgnī úditā sū^́riyasya
1.108.12b     mádhye diváḥ svadháyā mādáyethe
1.108.12c     átaḥ pári vŕ̥ṣaṇāv ā^́ hí yātám
1.108.12d     áthā sómasya pibataṃ sutásya

1.108.13a     evéndrāgnī papivā^́ṃsā sutásya
1.108.13b     víśvāsmábhyaṃ sáṃ jayataṃ dhánāni
1.108.13c     tán no mitró váruṇo māmahantām
1.108.13d     áditiḥ síndhuḥ pr̥thivī^́ utá dyaúḥ

109

1.109.01a     ví hí ákhyam mánasā vásya ichánn
1.109.01b     índrāgnī jñāsá utá vā sajātā^́n
1.109.01c     nā^́nyā^́ yuvát prámatir asti máhyaṃ
1.109.01d     sá vāṃ dhíyaṃ vājayántīm atakṣam

1.109.02a     áśravaṃ hí bhūridā^́vattarā vāṃ
1.109.02b     víjāmātur utá vā ghā siyālā^́t
1.109.02c     áthā sómasya práyatī yuvábhyām
1.109.02d     índrāgnī stómaṃ janayāmi návyam

1.109.03a     mā^́ chedma raśmī^́m̐r íti nā^́dhamānāḥ
1.109.03b     pitr̥̄ṇā^́ṃ śaktī^́r anuyáchamānāḥ
1.109.03c     indrāgníbhyāṃ káṃ vŕ̥ṣaṇo madanti
1.109.03d     tā^́ hí ádrī dhiṣáṇāyā upásthe

1.109.04a     yuvā^́bhyāṃ devī^́ dhiṣáṇā mádāya
1.109.04b     índrāgnī sómam uśatī^́ sunoti
1.109.04c     tā^́v aśvinā bhadrahastā supāṇī
1.109.04d     ā^́ dhāvatam mádhunā pr̥ṅktám apsú

1.109.05a     yuvā^́m indrāgnī vásuno vibhāgé
1.109.05b     tavástamā śuśrava vr̥trahátye
1.109.05c     tā^́v āsádyā barhíṣi yajñé asmín
1.109.05d     prá carṣaṇī mādayethāṃ sutásya

1.109.06a     prá carṣaṇíbhyaḥ pr̥tanāháveṣu
1.109.06b     prá pr̥thivyā^́ riricāthe diváś ca
1.109.06c     prá síndhubhyaḥ prá giríbhyo mahitvā^́
1.109.06d     préndrāgnī víśvā bhúvanā^́ti anyā^́

1.109.07a     ā^́ bharataṃ śíkṣataṃ vajrabāhū
1.109.07b     asmā^́m̐ indrāgnī avataṃ śácībhiḥ
1.109.07c     imé nú té raśmáyaḥ sū^́riyasya
1.109.07d     yébhiḥ sapitvám pitáro na ā^́san

1.109.08a     púraṃdarā śíkṣataṃ vajrahastā
1.109.08b     asmā^́m̐ indrāgnī avatam bháreṣu
1.109.08c     tán no mitró váruṇo māmahantām
1.109.08d     áditiḥ síndhuḥ pr̥thivī^́ utá dyaúḥ

110

1.110.01a     tatám me ápas tád u tāyate púnaḥ
1.110.01b     svā^́diṣṭhā dhītír ucáthāya śasyate
1.110.01c     ayáṃ samudrá ihá viśvádeviyaḥ
1.110.01d     svā^́hākr̥tasya sám u tr̥pṇuta rbhavaḥ

1.110.02a     ābhogáyam prá yád ichánta aítana
1.110.02b     ápākāḥ prā^́ñco máma ké cid āpáyaḥ
1.110.02c     saúdhanvanāsaś caritásya bhūmánā
1.110.02d     ágachata savitúr dāśúṣo gr̥hám

1.110.03a     tát savitā^́ vo amr̥tatvám ā^́suvad
1.110.03b     ágohiyaṃ yác chraváyanta aítana
1.110.03c     tyáṃ cic camasám ásurasya bhákṣaṇam
1.110.03d     ékaṃ sántam akr̥ṇutā cáturvayam

1.110.04a     viṣṭvī^́ śámī taraṇitvéna vāgháto
1.110.04b     mártāsaḥ sánto amr̥tatvám ānaśuḥ
1.110.04c     saudhanvanā^́ r̥bhávaḥ sū^́racakṣasaḥ
1.110.04d     saṃvatsaré sám apr̥cyanta dhītíbhiḥ

1.110.05a     kṣétram iva ví mamus téjanenam̐
1.110.05b     ékam pā^́tram r̥bhávo jéhamānam
1.110.05c     úpastutā upamáṃ nā^́dhamānā
1.110.05d     ámartiyeṣu śráva ichámānāḥ

1.110.06a     ā^́ manīṣā^́m antárikṣasya nŕ̥bhyaḥ
1.110.06b     srucéva ghr̥táṃ juhavāma vidmánā
1.110.06c     taraṇitvā^́ yé pitúr asya saścirá
1.110.06d     r̥bhávo vā^́jam aruhan divó rájaḥ

1.110.07a     r̥bhúr na índraḥ śávasā návīyān
1.110.07b     r̥bhúr vā^́jebhir vásubhir vásur dadíḥ
1.110.07c     yuṣmā^́kaṃ devā ávasā^́hani priyé
1.110.07d     abhí tiṣṭhema pr̥tsutī^́r ásunvatām

1.110.08a     níś cármaṇa r̥bhavo gā^́m apiṃśata
1.110.08b     sáṃ vatsénāsr̥jatā mātáram púnaḥ
1.110.08c     saúdhanvanāsaḥ suapasyáyā naro
1.110.08d     jívrī yúvānā pitárākr̥ṇotana

1.110.09a     vā^́jebhir no vā^́jasātāv aviḍḍhi
1.110.09b     rbhumā^́m̐ indra citrám ā^́ darṣi rā^́dhaḥ
1.110.09c     tán no mitró váruṇo māmahantām
1.110.09d     áditiḥ síndhuḥ pr̥thivī^́ utá dyaúḥ

111

1.111.01a     tákṣan ráthaṃ suvŕ̥taṃ vidmanā^́pasas
1.111.01b     tákṣan hárī indravā^́hā vŕ̥ṣaṇvasū
1.111.01c     tákṣan pitŕ̥bhyām r̥bhávo yúvad váyas
1.111.01d     tákṣan vatsā^́ya mātáraṃ sacābhúvam

1.111.02a     ā^́ no yajñā^́ya takṣata rbhumád váyaḥ
1.111.02b     krátve dákṣāya suprajā^́vatīm íṣam
1.111.02c     yáthā kṣáyāma sárvavīrayā viśā^́
1.111.02d     tán naḥ śárdhāya dhāsathā sú indriyám

1.111.03a     ā^́ takṣata sātím asmábhyam r̥bhavaḥ
1.111.03b     sātíṃ ráthāya sātím árvate naraḥ
1.111.03c     sātíṃ no jaítrīṃ sám maheta viśváhā
1.111.03d     jāmím ájāmim pŕ̥tanāsu sakṣáṇim

1.111.04a     r̥bhukṣáṇam índram ā^́ huva ūtáya
1.111.04b     r̥bhū^́n vā^́jān marútaḥ sómapītaye
1.111.04c     ubhā^́ mitrā^́váruṇā nūnám aśvínā
1.111.04d     té no hinvantu sātáye dhiyé jiṣé

1.111.05a     r̥bhúr bhárāya sáṃ śiśātu sātíṃ
1.111.05b     samaryajíd vā^́jo asmā^́m̐ aviṣṭu
1.111.05c     tán no mitró váruṇo māmahantām
1.111.05d     áditiḥ síndhuḥ pr̥thivī^́ utá dyaúḥ

112

1.112.01a     ī^́ḷe dyā^́vāpr̥thivī^́ pūrvácittaye
1.112.01b     agníṃ gharmáṃ surúcaṃ yā^́man iṣṭáye
1.112.01c     yā^́bhir bháre kārám áṃśāya jínvathas
1.112.01d     tā^́bhir ū ṣú ūtíbhir aśvinā^́ gatam

1.112.02a     yuvór dānā^́ya subhárā asaścáto
1.112.02b     rátham ā^́ tasthur vacasáṃ ná mántave
1.112.02c     yā^́bhir dhíyo ávathaḥ kárman iṣṭáye
1.112.02d     tā^́bhir ū ṣú ūtíbhir aśvinā^́ gatam

1.112.03a     yuváṃ tā^́sāṃ diviyásya praśā^́sane
1.112.03b     viśā^́ṃ kṣayatho amŕ̥tasya majmánā
1.112.03c     yā^́bhir dhenúm asúvam pínvatho narā
1.112.03d     tā^́bhir ū ṣú ūtíbhir aśvinā^́ gatam

1.112.04a     yā^́bhiḥ párijmā tánayasya majmánā
1.112.04b     dvimātā^́ tūrṣú taráṇir vibhū^́ṣati
1.112.04c     yā^́bhis trimántur ábhavad vicakṣaṇás
1.112.04d     tā^́bhir ū ṣú ūtíbhir aśvinā^́ gatam

1.112.05a     yā^́bhī rebháṃ nívr̥taṃ sitám adbhiyá
1.112.05b     úd vándanam aírayataṃ súvar dr̥śé
1.112.05c     yā^́bhiḥ káṇvam prá síṣāsantam ā^́vataṃ
1.112.05d     tā^́bhir ū ṣú ūtíbhir aśvinā^́ gatam

1.112.06a     yā^́bhir ántakaṃ jásamānam ā^́raṇe
1.112.06b     bhujyúṃ yā^́bhir avyathíbhir jijinváthuḥ
1.112.06c     yā^́bhiḥ karkándhuṃ vayíyaṃ ca jínvathas
1.112.06d     tā^́bhir ū ṣú ūtíbhir aśvinā^́ gatam

1.112.07a     yā^́bhiḥ śucantíṃ dhanasā^́ṃ suṣaṃsádaṃ
1.112.07b     taptáṃ gharmám omiyā^́vantam átraye
1.112.07c     yā^́bhiḥ pŕ̥śnigum purukútsam ā^́vataṃ
1.112.07d     tā^́bhir ū ṣú ūtíbhir aśvinā^́ gatam

1.112.08a     yā^́bhiḥ śácībhir vr̥ṣaṇā parāvŕ̥jam
1.112.08b     prā^́ndháṃ śroṇáṃ cákṣasa étave kr̥tháḥ
1.112.08c     yā^́bhir vártikāṃ grasitā^́m ámuñcataṃ
1.112.08d     tā^́bhir ū ṣú ūtíbhir aśvinā^́ gatam

1.112.09a     yā^́bhiḥ síndhum mádhumantam ásaścataṃ
1.112.09b     vásiṣṭhaṃ yā^́bhir ajarāv ájinvatam
1.112.09c     yā^́bhiḥ kútsaṃ śrutáryaṃ náryam ā^́vataṃ
1.112.09d     tā^́bhir ū ṣú ūtíbhir aśvinā^́ gatam

1.112.10a     yā^́bhir viśpálāṃ dhanasā^́m atharvíyaṃ
1.112.10b     sahásramīḷha · ājā^́v ájinvatam
1.112.10c     yā^́bhir váśam aśviyám preṇím ā^́vataṃ
1.112.10d     tā^́bhir ū ṣú ūtíbhir aśvinā^́ gatam

1.112.11a     yā^́bhiḥ sudānū auśijā^́ya vaṇíje
1.112.11b     dīrgháśravase mádhu kóśo ákṣarat
1.112.11c     kakṣī^́vantaṃ stotā^́raṃ yā^́bhir ā^́vataṃ
1.112.11d     tā^́bhir ū ṣú ūtíbhir aśvinā^́ gatam

1.112.12a     yā^́bhī rasā^́ṃ kṣódasodnáḥ pipinváthur
1.112.12b     anaśváṃ yā^́bhī rátham ā^́vataṃ jiṣé
1.112.12c     yā^́bhis triśóka usríyā udā^́jata
1.112.12d     tā^́bhir ū ṣú ūtíbhir aśvinā^́ gatam

1.112.13a     yā^́bhiḥ sū^́ryam pariyātháḥ parāváti
1.112.13b     mandhātā^́raṃ kṣaítrapatyeṣu ā^́vatam
1.112.13c     yā^́bhir vípram prá bharádvājam ā^́vataṃ
1.112.13d     tā^́bhir ū ṣú ūtíbhir aśvinā^́ gatam

1.112.14a     yā^́bhir mahā^́m atithigváṃ kaśojúvaṃ
1.112.14b     dívodāsaṃ śambarahátya ā^́vatam
1.112.14c     yā^́bhiḥ pūrbhídye trasádasyum ā^́vataṃ
1.112.14d     tā^́bhir ū ṣú ūtíbhir aśvinā^́ gatam

1.112.15a     yā^́bhir vamráṃ vipipānám upastutáṃ
1.112.15b     kalíṃ yā^́bhir vittájāniṃ duvasyáthaḥ
1.112.15c     yā^́bhir víaśvam utá pŕ̥thim ā^́vataṃ
1.112.15d     tā^́bhir ū ṣú ūtíbhir aśvinā^́ gatam

1.112.16a     yā^́bhir narā śayáve yā^́bhir átraye
1.112.16b     yā^́bhiḥ purā^́ mánave gātúm īṣáthuḥ
1.112.16c     yā^́bhiḥ śā^́rīr ā^́jataṃ syū^́maraśmaye
1.112.16d     tā^́bhir ū ṣú ūtíbhir aśvinā^́ gatam

1.112.17a     yā^́bhiḥ páṭharvā jáṭharasya majmánā
1.112.17b     agnír nā^́dīdec citá iddhó ájman ā^́
1.112.17c     yā^́bhiḥ śáryātam ávatho mahādhané
1.112.17d     tā^́bhir ū ṣú ūtíbhir aśvinā^́ gatam

1.112.18a     yā^́bhir aṅgiro mánasā niraṇyátho
1.112.18b     ágraṃ gáchatho vivaré góarṇasaḥ
1.112.18c     yā^́bhir mánuṃ śū^́ram iṣā^́ samā^́vataṃ
1.112.18d     tā^́bhir ū ṣú ūtíbhir aśvinā^́ gatam

1.112.19a     yā^́bhiḥ pátnīr vimadā^́ya niūháthur
1.112.19b     ā^́ gha vā yā^́bhir aruṇī^́r áśikṣatam
1.112.19c     yā^́bhiḥ sudā^́sa ūháthuḥ sudevíyaṃ
1.112.19d     tā^́bhir ū ṣú ūtíbhir aśvinā^́ gatam

1.112.20a     yā^́bhiḥ śáṃtātī bhávatho dadāśúṣe
1.112.20b     bhujyúṃ yā^́bhir ávatho yā^́bhir ádhrigum
1.112.20c     omiyā^́vatīṃ subhárām r̥tastúbhaṃ
1.112.20d     tā^́bhir ū ṣú ūtíbhir aśvinā^́ gatam

1.112.21a     yā^́bhiḥ kr̥śā^́num ásane duvasyátho
1.112.21b     javé yā^́bhir yū^́no árvantam ā^́vatam
1.112.21c     mádhu priyám bharatho yát saráḍbhiyas
1.112.21d     tā^́bhir ū ṣú ūtíbhir aśvinā^́ gatam

1.112.22a     yā^́bhir náraṃ goṣuyúdhaṃ nr̥ṣā^́hiye
1.112.22b     kṣétrasya sātā^́ tánayasya jínvathaḥ
1.112.22c     yā^́bhī ráthām̐ ávatho yā^́bhir árvatas
1.112.22d     tā^́bhir ū ṣú ūtíbhir aśvinā^́ gatam

1.112.23a     yā^́bhiḥ kútsam ārjuneyáṃ śatakratū
1.112.23b     prá turvī^́tim prá ca dabhī^́tim ā^́vatam
1.112.23c     yā^́bhir dhvasántim puruṣántim ā^́vataṃ
1.112.23d     tā^́bhir ū ṣú ūtíbhir aśvinā^́ gatam

1.112.24a     ápnasvatīm aśvinā vā^́cam asmé
1.112.24b     kr̥táṃ no dasrā vŕ̥ṣaṇā manīṣā^́m
1.112.24c     adyūtiyé ávase ní hvaye vāṃ
1.112.24d     vr̥dhé ca no bhavataṃ vā^́jasātau

1.112.25a     dyúbhir aktúbhiḥ pári pātam asmā^́n
1.112.25b     áriṣṭebhir aśvinā saúbhagebhiḥ
1.112.25c     tán no mitró váruṇo māmahantām
1.112.25d     áditiḥ síndhuḥ pr̥thivī^́ utá dyaúḥ

113

1.113.01a     idáṃ śréṣṭhaṃ jyótiṣāṃ jyótir ā^́gāc
1.113.01b     citráḥ praketó ajaniṣṭa víbhvā
1.113.01c     yáthā prásūtā savitúḥ savā^́yam̐
1.113.01d     evā^́ rā^́trī uṣáse yónim āraik

1.113.02a     rúśadvatsā rúśatī śvetiyā^́gād
1.113.02b     ā^́raig u kr̥ṣṇā^́ sádanāni asyāḥ
1.113.02c     samānábandhū amŕ̥te anūcī^́
1.113.02d     dyā^́vā várṇaṃ carata āmināné

1.113.03a     samānó ádhvā svásaror anantás
1.113.03b     tám anyā^́nyā carato deváśiṣṭe
1.113.03c     ná methete ná tasthatuḥ suméke
1.113.03d     náktoṣā^́sā sámanasā vírūpe

1.113.04a     bhã^́svatī nayitrī^́+ sūnŕ̥tānām
1.113.04b     áceti citrā^́ ví dúro na āvaḥ
1.113.04c     prā^́rpyā jágad ví u no rāyó akhyad
1.113.04d     uṣā^́ ajīgar bhúvanāni víśvā

1.113.05a     jihmaśíye cáritave maghónī
1.113.05b     ābhogáya iṣṭáye rāyá u tvam
1.113.05c     dabhrám páśyadbhya urviyā^́ vicákṣa
1.113.05d     uṣā^́ ajīgar bhúvanāni víśvā

1.113.06a     kṣatrā^́ya tvaṃ śrávase tvam mahīyā^́
1.113.06b     iṣṭáye tvam ártham iva tvam ityaí
1.113.06c     vísadr̥śā jīvitā^́bhipracákṣa
1.113.06d     uṣā^́ ajīgar bhúvanāni víśvā

1.113.07a     eṣā^́ divó duhitā^́ práty adarśi
1.113.07b     viuchántī yuvatíḥ śukrávāsāḥ
1.113.07c     víśvasyéśānā pā^́rthivasya vásva
1.113.07d     úṣo adyéhá subhage ví ucha

1.113.08a     parāyatīnā^́m ánu eti pā^́tha
1.113.08b     āyatīnā^́m prathamā^́ śáśvatīnām
1.113.08c     viuchántī jīvám udīráyanti
1.113.08d     uṣā^́ mr̥táṃ káṃ caná bodháyantī

1.113.09a     úṣo yád agníṃ samídhe cakártha
1.113.09b     ví yád ā^́vaś cákṣasā sū^́riyasya
1.113.09c     yán mā^́nuṣān yakṣyámāṇām̐ ájīgas
1.113.09d     tád devéṣu cakr̥ṣe bhadrám ápnaḥ

1.113.10a     kíyāti ā^́ yát samáyā bhávāti
1.113.10b     yā^́ viūṣúr yā^́ś ca nūnáṃ viuchā^́n
1.113.10c     ánu pū^́rvāḥ kr̥pate vāvaśānā^́
1.113.10d     pradī^́dhyānā jóṣam anyā^́bhir eti

1.113.11a     īyúṣ ṭé yé pū^́rvatarām ápaśyan
1.113.11b     viuchántīm uṣásam mártiyāsaḥ
1.113.11c     asmā^́bhir ū nú praticákṣiyābhūd
1.113.11d     ó té yanti yé aparī^́ṣu páśyān

1.113.12a     yāvayáddveṣā r̥tapā^́ r̥tejā^́ḥ
1.113.12b     sumnāvárī sūnŕ̥tā īráyantī
1.113.12c     sumaṅgalī^́r bíbhratī devávītim
1.113.12d     ihā^́dyóṣaḥ śréṣṭhatamā ví ucha

1.113.13a     śáśvat puróṣā^́ ví uvāsa devī^́
1.113.13b     átho adyédáṃ ví āvo maghónī
1.113.13c     átho ví uchād úttarām̐ ánu dyū^́n
1.113.13d     ajárāmŕ̥tā carati svadhā^́bhiḥ

1.113.14a     ví añjíbhir divá ā^́tāsu adyaud
1.113.14b     ápa kr̥ṣṇā^́ṃ nirṇíjaṃ devī^́ āvaḥ
1.113.14c     prabodháyantī aruṇébhir áśvair
1.113.14d     ā^́ uṣā^́ yāti suyújā ráthena

1.113.15a     āváhantī póṣiyā vā^́riyāṇi
1.113.15b     citráṃ ketúṃ kr̥ṇute cékitānā
1.113.15c     īyúṣīṇām upamā^́ śáśvatīnāṃ
1.113.15d     vibhātīnā^́m prathamóṣā^́ ví aśvait

1.113.16a     úd īrdhuvaṃ jīvó ásur na ā^́gād
1.113.16b     ápa prā^́gāt táma ā^́ jyótir eti
1.113.16c     ā^́raik pánthāṃ yā^́tave sū^́riyāya
1.113.16d     áganma yátra pratiránta ā^́yuḥ

1.113.17a     syū^́manā vācá úd iyarti váhni
1.113.17b     stávāno rebhá uṣáso vibhātī^́ḥ
1.113.17c     adyā^́ tád ucha gr̥ṇaté maghoni
1.113.17d     asmé ā^́yur ní didīhi prajā^́vat

1.113.18a     yā^́ gómatīr uṣásaḥ sárvavīrā
1.113.18b     viuchánti dāśúṣe mártiyāya
1.113.18c     vāyór iva sūnŕ̥tānām udarké
1.113.18d     tā^́ aśvadā^́ aśnavat somasútvā

1.113.19a     mātā^́ devā^́nām áditer ánīkaṃ
1.113.19b     yajñásya ketúr br̥hatī^́ ví bhāhi
1.113.19c     praśastikŕ̥d bráhmaṇe no ví ucha
1.113.19d     ā^́ no jáne janaya viśvavāre

1.113.20a     yác citrám ápna uṣáso váhanti
1.113.20b     ījānā^́ya śaśamānā^́ya bhadrám
1.113.20c     tán no mitró váruṇo māmahantām
1.113.20d     áditiḥ síndhuḥ pr̥thivī^́ utá dyaúḥ

114

1.114.01a     imā^́ rudrā^́ya taváse kapardíne
1.114.01b     kṣayádvīrāya prá bharāmahe matī^́ḥ
1.114.01c     yáthā śám ásad dvipáde cátuṣpade
1.114.01d     víśvam puṣṭáṃ grā^́me asmínn anāturám

1.114.02a     mr̥̄ḷā^́+ no rudra utá no máyas kr̥dhi
1.114.02b     kṣayádvīrāya námasā vidhema te
1.114.02c     yác cháṃ ca yóś ca mánur āyejé pitā^́
1.114.02d     tád aśyāma táva rudra práṇītiṣu

1.114.03a     aśyā^́ma te sumatíṃ devayajyáyā
1.114.03b     kṣayádvīrasya táva rudra mīḍhuvaḥ
1.114.03c     sumnāyánn íd víśo asmā^́kam ā^́ cara
1.114.03d     áriṣṭavīrā juhavāma te havíḥ

1.114.04a     tveṣáṃ vayáṃ rudaráṃ⁺ yajñasā^́dhaṃ
1.114.04b     vaṅkúṃ kavím ávase ní hvayāmahe
1.114.04c     āré asmád daíviyaṃ héḷo asyatu
1.114.04d     sumatím íd vayám asyā^́ vr̥ṇīmahe

1.114.05a     divó varāhám aruṣáṃ kapardínaṃ
1.114.05b     tveṣáṃ rūpáṃ námasā ní hvayāmahe
1.114.05c     háste bíbhrad bheṣajā^́ vā^́riyāṇi
1.114.05d     śárma várma chardír asmábhya° yaṃsat

1.114.06a     idám pitré marútām ucyate vácaḥ
1.114.06b     svādóḥ svā^́dīyo rudarā^́ya⁺ várdhanam
1.114.06c     rā^́svā ca no amr̥ta martabhójanaṃ
1.114.06d     tmáne tokā^́ya tánayāya mr̥̄ḷa⁺

1.114.07a     mā^́ no mahā^́ntam utá mā^́ no arbhakám
1.114.07b     mā^́ na úkṣantam utá mā^́ na ukṣitám
1.114.07c     mā^́ no vadhīḥ pitáram mótá mātáram
1.114.07d     mā^́ naḥ priyā^́s tanúvo rudra rīriṣaḥ

1.114.08a     mā^́ nas toké tánaye mā^́ na āyaú
1.114.08b     mā^́ no góṣu mā^́ no áśveṣu rīriṣaḥ
1.114.08c     vīrā^́n mā^́ no rudara⁺ bhāmitó vadhīr
1.114.08d     havíṣmantaḥ sádam ít tvā havāmahe

1.114.09a     úpa te stómān paśupā^́ ivā^́karaṃ
1.114.09b     rā^́svā pitar marutāṃ sumnám asmé
1.114.09c     bhadrā^́ hí te sumatír mr̥̄ḷayáttamā⁺
1.114.09d     áthā vayám áva ít te vr̥ṇīmahe

1.114.10a     āré te goghnám utá pūruṣaghnáṃ
1.114.10b     kṣáyadvīra sumnám asmé te astu
1.114.10c     mr̥̄ḷā^́+ ca no ádhi ca brūhi deva
1.114.10d     ádhā ca naḥ śárma yacha dvibárhāḥ

1.114.11a     ávocāma námo asmā avasyávaḥ
1.114.11b     śr̥ṇótu no hávaṃ rudró marútvān
1.114.11c     tán no mitró váruṇo māmahantām
1.114.11d     áditiḥ síndhuḥ pr̥thivī^́ utá dyaúḥ

115

1.115.01a     citráṃ devā^́nām úd agād ánīkaṃ
1.115.01b     cákṣur mitrásya váruṇasya agnéḥ
1.115.01c     ā^́prā dyā^́vāpr̥thivī^́ antárikṣaṃ
1.115.01d     sū^́rya ātmā^́ jágatas tasthúṣaś ca

1.115.02a     sū^́ryo devī^́m uṣásaṃ rócamānām
1.115.02b     máryo ná yóṣām abhí eti paścā^́t
1.115.02c     yátrā náro devayánto yugā^́ni
1.115.02d     vitanvaté práti bhadrā^́ya bhadrám

1.115.03a     bhadrā^́ áśvā harítaḥ sū^́riyasya
1.115.03b     citrā^́ étagvā anumā^́diyāsaḥ
1.115.03c     namasyánto divá ā^́ pr̥ṣṭhám asthuḥ
1.115.03d     pári dyā^́vāpr̥thivī^́ yanti sadyáḥ

1.115.04a     tát sū^́ryasya devatváṃ tán mahitvám
1.115.04b     madhyā^́ kártor vítataṃ sáṃ jabhāra
1.115.04c     yadéd áyukta harítaḥ sadhásthād
1.115.04d     ā^́d rā^́trī vā^́sas tanute simásmai

1.115.05a     tán mitrásya váruṇasyābhicákṣe
1.115.05b     sū^́ryo rūpáṃ kr̥ṇute dyór upásthe
1.115.05c     anantám anyád rúśad asya pā^́jaḥ
1.115.05d     kr̥ṣṇám anyád dharítaḥ sám bharanti

1.115.06a     adyā^́ devā úditā sū^́riyasya
1.115.06b     nír áṃhasaḥ pipr̥tā^́ nír avadyā^́t
1.115.06c     tán no mitró váruṇo māmahantām
1.115.06d     áditiḥ síndhuḥ pr̥thivī^́ utá dyaúḥ

116

1.116.01a     nā^́satyābhyām barhír iva prá vr̥ñje
1.116.01b     stómām̐ iyarmi abhríyeva vā^́taḥ
1.116.01c     yā^́v árbhagāya vimadā^́ya jāyā^́ṃ
1.116.01d     senājúvā niūhátū ráthena

1.116.02a     vīḷupátmabhir āśuhémabhir vā
1.116.02b     devā^́nāṃ vā jūtíbhiḥ śā^́śadānā
1.116.02c     tád rā^́sabho nāsatiyā sahásram
1.116.02d     ājā^́ yamásya pradháne jigāya

1.116.03a     túgro ha bhujyúm aśvinodameghé
1.116.03b     rayíṃ ná káś cin mamr̥vā^́m̐ ávāhāḥ
1.116.03c     tám ūhathur naubhír ātmanvátībhir
1.116.03d     antarikṣaprúdbhir ápodakābhiḥ

1.116.04a     tisráḥ kṣápas trír áhātivrájadbhir
1.116.04b     nā^́satyā bhujyúm ūhathuḥ pataṃgaíḥ
1.116.04c     samudrásya dhánvan ārdrásya pāré
1.116.04d     tribhī^́ ráthaiḥ śatápadbhiḥ ṣáḷaśvaiḥ

1.116.05a     anārambhaṇé tád avīrayethām
1.116.05b     anāsthāné agrabhaṇé samudré
1.116.05c     yád aśvinā ūháthur bhujyúm ástaṃ
1.116.05d     śatā^́ritrāṃ nā^́vam ātasthivā^́ṃsam

1.116.06a     yám aśvinā dadáthuḥ śvetám áśvam
1.116.06b     aghā^́śuvāya śáśvad ít suastí
1.116.06c     tád vāṃ dātrám máhi kīrténiyam bhūt
1.116.06d     paidvó vājī^́ sádam íd dhávyo aryáḥ

1.116.07a     yuváṃ narā stuvaté pajriyā^́ya
1.116.07b     kakṣī^́vate aradatam púraṃdhim
1.116.07c     kārotarā^́c chaphā^́d áśvasya vŕ̥ṣṇaḥ
1.116.07d     śatáṃ kumbhā^́m̐ asiñcataṃ súrāyāḥ

1.116.08a     himénāgníṃ ghraṃsám avārayethām
1.116.08b     pitumátīm ū^́rjam asmā adhattam
1.116.08c     r̥bī^́se átrim aśvinā^́vanītam
1.116.08d     ún ninyathuḥ sárvagaṇaṃ suastí

1.116.09a     párāvatáṃ nāsatiyānudethām
1.116.09b     uccā^́budhnaṃ cakrathur jihmábāram
1.116.09c     kṣárann ā^́po ná pāyánāya rāyé
1.116.09d     sahásrāya tŕ̥ṣyate gótamasya

1.116.10a     jujurúṣo nāsatiyotá vavrím
1.116.10b     prā^́muñcataṃ drāpím iva cyávānāt
1.116.10c     prā^́tirataṃ jahitásyā^́yu° dasrā
1.116.10d     ā^́d ít pátim akr̥ṇutaṃ kanī^́nām

1.116.11a     tád vāṃ narā śáṃsiyaṃ rā^́dhiyaṃ ca
1.116.11b     abhiṣṭimán nāsatiyā várūtham
1.116.11c     yád vidvā^́ṃsā nidhím ivā^́pagūḷham
1.116.11d     úd darśatā^́d ūpáthur vándanāya

1.116.12a     tád vāṃ narā sanáye dáṃsa ugrám
1.116.12b     āvíṣ kr̥ṇomi tanyatúr ná vr̥ṣṭím
1.116.12c     dadhyáṅ ha yán mádhu ātharvaṇó vām
1.116.12d     áśvasya śīrṣṇā^́ prá yád īm uvā^́ca

1.116.13a     ájohavīn nāsatiyā karā^́ vām
1.116.13b     mahé yā^́man purubhujā púraṃdhiḥ
1.116.13c     śrutáṃ tác chā^́sur iva vadhrimatyā^́
1.116.13d     híraṇyahastam aśvināv adattam

1.116.14a     āsnó vŕ̥kasya vártikām abhī^́ke
1.116.14b     yuváṃ narā nāsatiyāmumuktam
1.116.14c     utó kavím purubhujā yuváṃ ha
1.116.14d     kŕ̥pamāṇam akr̥ṇutaṃ vicákṣe

1.116.15a     carítraṃ hí vér ivā^́chedi parṇám
1.116.15b     ājā^́ khelásya páritakmiyāyām
1.116.15c     sadyó jáṅghām ā^́yasīṃ viśpálāyai
1.116.15d     dháne hité sártave práty adhattam

1.116.16a     śatám meṣā^́n vr̥kíye cakṣadānám
1.116.16b     r̥jrā^́śuvaṃ tám pitā^́ndháṃ cakāra
1.116.16c     tásmā akṣī^́ nāsatiyā vicákṣa
1.116.16d     ā^́dhattaṃ dasrā bhiṣajāv anarván

1.116.17a     ā^́ vāṃ ráthaṃ duhitā^́ sū^́riyasya
1.116.17b     kā^́rṣmevātiṣṭhad árvatā jáyantī
1.116.17c     víśve devā^́ ánv amanyanta hr̥dbhíḥ
1.116.17d     sám u śriyā^́ nāsatiyā sacethe

1.116.18a     yád áyātaṃ dívodāsāya vartír
1.116.18b     bharádvājāya aśvinā háyantā
1.116.18c     revád uvāha sacanó rátho vāṃ
1.116.18d     vr̥ṣabháś ca śiṃśumā^́raś ca yuktā^́

1.116.19a     rayíṃ sukṣatráṃ suapatyám ā^́yuḥ
1.116.19b     suvī^́riyaṃ nāsatiyā váhantā
1.116.19c     ā^́ jahnā^́vīṃ sámanasópa vā^́jais
1.116.19d     trír áhno bhāgáṃ dádhatīm ayātam

1.116.20a     páriviṣṭaṃ jāhuṣáṃ viśvátaḥ sīṃ
1.116.20b     sugébhir náktam ūhathū rájobhiḥ
1.116.20c     vibhindúnā nāsatiyā ráthena
1.116.20d     ví párvatām̐ ajarayū^́ ayātam

1.116.21a     ékasyā vástor āvataṃ ráṇāya
1.116.21b     váśam aśvinā sanáye sahásrā
1.116.21c     nír ahataṃ duchúnā índravantā
1.116.21d     pr̥thuśrávaso vr̥ṣaṇāv árātīḥ

1.116.22a     śarásya cid ārcatkásyāvatā^́d ā^́
1.116.22b     nīcā^́d uccā^́ cakrathuḥ pā^́tave vā^́ḥ
1.116.22c     śayáve cin nāsatiyā śácībhir
1.116.22d     jásuraye staríyam pipyathur gā^́m

1.116.23a     avasyaté stuvaté kr̥ṣṇiyā^́ya
1.116.23b     r̥jūyaté nāsatiyā śácībhiḥ
1.116.23c     paśúṃ ná naṣṭám iva dárśanāya
1.116.23d     viṣṇāpúvaṃ dadathur víśvakāya

1.116.24a     dáśa rā^́trīr áśivenā náva dyū^́n
1.116.24b     ávanaddhaṃ śnathitám apsú antáḥ
1.116.24c     víprutaṃ rebhám udáni právr̥ktam
1.116.24d     ún ninyathuḥ sómam iva sruvéṇa

1.116.25a     prá vāṃ dáṃsāṃsi aśvināv avocam
1.116.25b     asyá pátiḥ syāṃ sugávaḥ suvī^́raḥ
1.116.25c     utá páśyann aśnuván dīrghám ā^́yur
1.116.25d     ástam ivéj jarimā^́ṇaṃ jagamyām

117

1.117.01a     mádhvaḥ sómasya aśvinā mádāya
1.117.01b     pratnó hótā · ā^́ vivāsate vām
1.117.01c     barhíṣmatī · rātír víśritā gī^́r
1.117.01d     iṣā^́ yātaṃ nāsatiyópa vā^́jaiḥ

1.117.02a     yó vām aśvinā mánaso jávīyān
1.117.02b     ráthaḥ suáśvo víśa ājígāti
1.117.02c     yéna gáchathaḥ sukŕ̥to duroṇáṃ
1.117.02d     téna narā vartír asmábhya° yātam

1.117.03a     ŕ̥ṣiṃ narāv áṃhasaḥ pā^́ñcajanyam
1.117.03b     r̥bī^́sād átrim muñcatho gaṇéna
1.117.03c     minántā dásyor áśivasya māyā^́
1.117.03d     anupūrváṃ vr̥ṣaṇā codáyantā

1.117.04a     áśvaṃ ná gūḷhám aśvinā durévair
1.117.04b     ŕ̥ṣiṃ narā vr̥ṣaṇā rebhám apsú
1.117.04c     sáṃ táṃ riṇītho víprutaṃ dáṃsobhir
1.117.04d     ná vāṃ jūryanti pūrviyā^́ kr̥tā^́ni

1.117.05a     suṣupvā^́ṃsaṃ ná nírr̥ter upásthe
1.117.05b     sū^́ryaṃ ná dasrā támasi kṣiyántam
1.117.05c     śubhé rukmáṃ ná darśatáṃ níkhātam
1.117.05d     úd ūpathur aśvinā vándanāya

1.117.06a     tád vāṃ narā śáṃsiyam pajriyéṇa
1.117.06b     kakṣī^́vatā nāsatiyā párijman
1.117.06c     śaphā^́d áśvasya vājíno jánāya
1.117.06d     śatáṃ kumbhā^́m̐ asiñcatam mádhūnām

1.117.07a     yuváṃ narā stuvaté kr̥ṣṇiyā^́ya
1.117.07b     viṣṇāpúvaṃ dadathur víśvakāya
1.117.07c     ghóṣāyai cit pitr̥ṣáde duroṇé
1.117.07d     pátiṃ jū^́ryantyā aśvināv adattam

1.117.08a     yuváṃ śyā^́vāya rúśatīm adattam
1.117.08b     maháḥ kṣoṇásya aśvinā káṇvāya
1.117.08c     pravā^́ciyaṃ tád vr̥ṣaṇā kr̥táṃ vāṃ
1.117.08d     yán nārṣadā^́ya śrávo adhyádhattam

1.117.09a     purū^́ várpāṃsi aśvinā dádhānā
1.117.09b     ní pedáva ūhathur āśúm áśvam
1.117.09c     sahasrasā^́ṃ vājínam ápratītam
1.117.09d     ahihánaṃ śravasíyaṃ tárutram

1.117.10a     etā^́ni vāṃ śravasíyā sudānū
1.117.10b     bráhmāṅgūṣáṃ sádanaṃ ródasīyoḥ
1.117.10c     yád vām pajrā^́so aśvinā hávante
1.117.10d     yātám iṣā^́ ca vidúṣe ca vā^́jam

1.117.11a     sūnór mā^́nena aśvinā gr̥ṇānā^́
1.117.11b     vā^́jaṃ víprāya bhuraṇā rádantā
1.117.11c     agástiye bráhmaṇā vāvr̥dhānā^́
1.117.11d     sáṃ viśpálāṃ nāsatiyāriṇītam

1.117.12a     kúha yā^́ntā suṣṭutíṃ kāviyásya
1.117.12b     dívo napātā vr̥ṣaṇā śayutrā^́
1.117.12c     híraṇyasyeva kaláśaṃ níkhātam
1.117.12d     úd ūpathur daśamé aśvinā^́han

1.117.13a     yuváṃ cyávānam aśvinā járantam
1.117.13b     púnar yúvānaṃ cakrathuḥ śácībhiḥ
1.117.13c     yuvó ráthaṃ duhitā^́ sū^́riyasya
1.117.13d     sahá śriyā^́ nāsatiyāvr̥ṇīta

1.117.14a     yuváṃ túgrāya pūrviyébhir évaiḥ
1.117.14b     punarmanyā^́v abhavataṃ yuvānā
1.117.14c     yuvám bhujyúm árṇaso níḥ samudrā^́d
1.117.14d     víbhir ūhathur r̥jarébhir áśvaiḥ

1.117.15a     ájohavīd aśvinā taugriyó vām
1.117.15b     próḷhaḥ samudrám avyathír jaganvā^́n
1.117.15c     níṣ ṭám ūhathuḥ suyújā ráthena
1.117.15d     mánojavasā vr̥ṣaṇā suastí

1.117.16a     ájohavīd aśvinā vártikā vām
1.117.16b     āsnó yát sīm ámuñcataṃ vŕ̥kasya
1.117.16c     ví jayúṣā yayathuḥ sā^́nu ádrer
1.117.16d     jātáṃ viṣvā^́co ahataṃ viṣéṇa

1.117.17a     śatám meṣā^́n vr̥kíye māmahānáṃ
1.117.17b     támaḥ práṇītam áśivena pitrā^́
1.117.17c     ā^́kṣī^́ r̥jrā^́śve aśvināv adhattaṃ
1.117.17d     jyótir andhā^́ya cakrathur vicákṣe

1.117.18a     śunám andhā^́ya bháram ahvayat sā^́
1.117.18b     vr̥kī^́r aśvinā vr̥ṣaṇā náréti
1.117.18c     jāráḥ kanī^́na iva cakṣadāná
1.117.18d     r̥jrā^́śuvaḥ śatám ékaṃ ca meṣā^́n

1.117.19a     mahī^́ vām ūtír aśvinā mayobhū^́r
1.117.19b     utá srāmáṃ dhiṣṇiyā sáṃ riṇīthaḥ
1.117.19c     áthā yuvā^́m íd ahvayat púraṃdhir
1.117.19d     ā^́gachataṃ sīṃ vr̥ṣaṇāv ávobhiḥ

1.117.20a     ádhenuṃ dasrā staríyaṃ víṣaktām
1.117.20b     ápinvataṃ śayáve aśvinā gā^́m
1.117.20c     yuváṃ śácībhir vimadā^́ya jāyā^́ṃ
1.117.20d     ní ūhathuḥ purumitrásya yóṣām

1.117.21a     yávaṃ vŕ̥keṇa aśvinā vápantā
1.117.21b     íṣaṃ duhántā mánuṣāya dasrā
1.117.21c     abhí dásyum bákureṇā dhámantā
1.117.21d     urú jyótiś cakrathur ā^́riyāya

1.117.22a     ātharvaṇā^́ya aśvinā dadhīce
1.117.22b     áśviyaṃ śíraḥ práti airayatam
1.117.22c     sá vām mádhu · prá vocad r̥tāyán
1.117.22d     tvāṣṭráṃ yád dasrāv apikakṣíyaṃ vām

1.117.23a     sádā kavī sumatím ā^́ cake vāṃ
1.117.23b     víśvā dhíyo aśvinā prā^́vatam me
1.117.23c     asmé rayíṃ nāsatiyā br̥hántam
1.117.23d     apatyasā^́caṃ śrútiyaṃ rarāthām

1.117.24a     híraṇyahastam aśvinā rárāṇā
1.117.24b     putráṃ narā vadhrimatyā^́ adattam
1.117.24c     trídhā ha śyā^́vam aśvinā víkastam
1.117.24d     új jīvása airayataṃ sudānū

1.117.25a     etā^́ni vām aśvinā vīríyāṇi
1.117.25b     prá pūrviyā^́ṇi āyávo avocan
1.117.25c     bráhma kr̥ṇvánto vr̥ṣaṇā yuvábhyāṃ
1.117.25d     suvī^́rāso vidátham ā^́ vadema

118

1.118.01a     ā^́ vāṃ rátho aśvinā śyenápatvā
1.118.01b     sumr̥̄ḷīkáḥ⁺ suávām̐ yātu arvā^́ṅ
1.118.01c     yó mártiyasya mánaso jávīyān
1.118.01d     trivandhuró vr̥ṣaṇā vā^́taraṃhāḥ

1.118.02a     trivandhuréṇa trivŕ̥tā ráthena
1.118.02b     tricakréṇa suvŕ̥tā^́ yātam arvā^́k
1.118.02c     pínvataṃ gā^́ jínvatam árvato no
1.118.02d     vardháyatam aśvinā vīrám asmé

1.118.03a     pravádyāmanā suvŕ̥tā ráthena
1.118.03b     dásrāv imáṃ śr̥ṇutaṃ ślókam ádreḥ
1.118.03c     kím aṅgá vām práty ávartiṃ gámiṣṭhā
1.118.03d     āhúr víprāso aśvinā purājā^́ḥ

1.118.04a     ā^́ vāṃ śyenā^́so aśvinā vahantu
1.118.04b     ráthe yuktā^́sa āśávaḥ pataṃgā^́ḥ
1.118.04c     yé aptúro diviyā^́so ná gŕ̥dhrā
1.118.04d     abhí práyo nāsatiyā váhanti

1.118.05a     ā^́ vāṃ ráthaṃ yuvatís tiṣṭhad átra
1.118.05b     juṣṭvī^́ narā duhitā^́ sū^́riyasya
1.118.05c     pári vām áśvā vápuṣaḥ pataṃgā^́
1.118.05d     váyo vahantu aruṣā^́ abhī^́ke

1.118.06a     úd vándanam airataṃ daṃsánābhir
1.118.06b     úd rebháṃ dasrā vr̥ṣaṇā śácībhiḥ
1.118.06c     níṣ ṭaugriyám pārayathaḥ samudrā^́t
1.118.06d     púnaś cyávānaṃ cakrathur yúvānam

1.118.07a     yuvám átrayé 'vanītāya taptám
1.118.07b     ū^́rjam omā^́nam aśvināv adhattam
1.118.07c     yuváṃ káṇvāyā^́piriptāya cákṣuḥ
1.118.07d     práty adhattaṃ suṣṭutíṃ jujuṣāṇā^́

1.118.08a     yuváṃ dhenúṃ śayáve nādhitā^́ya
1.118.08b     ápinvatam aśvinā pūrviyā^́ya
1.118.08c     ámuñcataṃ vártikām áṃhaso níḥ
1.118.08d     práti jáṅghāṃ viśpálāyā adhattam

1.118.09a     yuváṃ śvetám pedáva índrajūtam
1.118.09b     ahihánam aśvinādattam áśvam
1.118.09c     johū^́tram aryó abhíbhūtim ugráṃ
1.118.09d     sahasrasā^́ṃ vŕ̥ṣaṇaṃ vīḍúaṅgam

1.118.10a     tā^́ vāṃ narā sú ávase sujātā^́
1.118.10b     hávāmahe aśvinā nā^́dhamānāḥ
1.118.10c     ā^́ na úpa vásumatā ráthena
1.118.10d     gíro juṣāṇā^́ suvitā^́ya yātam

1.118.11a     ā^́ śyenásya jávasā nū^́tanena
1.118.11b     asmé yātaṃ nāsatiyā sajóṣāḥ
1.118.11c     háve hí vām aśvinā rātáhavyaḥ
1.118.11d     śaśvattamā^́yā uṣáso víuṣṭau

119

1.119.01a     ā^́ vāṃ rátham purumāyám manojúvaṃ
1.119.01b     jīrā^́śuvaṃ yajñíyaṃ jīváse huve
1.119.01c     sahásraketuṃ vanínaṃ śatádvasuṃ
1.119.01d     śruṣṭīvā^́naṃ varivodhā^́m abhí práyaḥ

1.119.02a     ūrdhvā^́ dhītíḥ práti asya práyāmani
1.119.02b     ádhāyi śásman sám ayanta ā^́ díśaḥ
1.119.02c     svádāmi gharmám práti yanti ūtáya
1.119.02d     ā^́ vām ūrjā^́nī rátham aśvināruhat

1.119.03a     sáṃ yán mitháḥ paspr̥dhānā^́so ágmata
1.119.03b     śubhé makhā^́ ámitā jāyávo ráṇe
1.119.03c     yuvór áha pravaṇé cekite rátho
1.119.03d     yád aśvinā váhathaḥ sūrím ā^́ váram

1.119.04a     yuvám bhujyúm bhurámāṇaṃ víbhir gatáṃ
1.119.04b     sváyuktibhir niváhantā pitŕ̥bhya ā^́
1.119.04c     yāsiṣṭáṃ vartír vr̥ṣaṇā vijeníyaṃ
1.119.04d     dívodāsāya máhi ceti vām ávaḥ

1.119.05a     yuvór aśvinā vápuṣe yuvāyújaṃ
1.119.05b     ráthaṃ vā^́ṇī yematur asya śárdhiyam
1.119.05c     ā^́ vām patitváṃ sakhiyā^́ya jagmúṣī
1.119.05d     yóṣāvr̥ṇīta jéniyā yuvā^́m pátī

1.119.06a     yuváṃ rebhám páriṣūter uruṣyatho
1.119.06b     hiména gharmám páritaptam átraye
1.119.06c     yuváṃ śayór avasám pipyathur gávi
1.119.06d     prá dīrghéṇa vándanas tāri ā^́yuṣā

1.119.07a     yuváṃ vándanaṃ nírr̥taṃ jaraṇyáyā
1.119.07b     ráthaṃ ná dasrā karaṇā^́ sám invathaḥ
1.119.07c     kṣétrād ā^́ vípraṃ janatho vipanyáyā
1.119.07d     prá vām átra vidhaté daṃsánā bhuvat

1.119.08a     ágachataṃ kŕ̥pamāṇam parāváti
1.119.08b     pitúḥ suvásya tyájasā níbādhitam
1.119.08c     súvarvatīr itá ūtī^́r yuvór áha
1.119.08d     citrā^́ abhī^́ke abhavann abhíṣṭayaḥ

1.119.09a     utá syā^́ vām mádhuman mákṣikārapan
1.119.09b     máde sómasya auśijó huvanyati
1.119.09c     yuváṃ dadhīcó mána ā^́ vivāsatho
1.119.09d     áthā śíraḥ práti vām áśviyaṃ vadat

1.119.10a     yuvám pedáve puruvā^́ram aśvinā
1.119.10b     spr̥dhā^́ṃ śvetáṃ tarutā^́raṃ duvasyathaḥ
1.119.10c     śáryair abhídyum pŕ̥tanāsu duṣṭáraṃ
1.119.10d     carkŕ̥tyam índram iva carṣaṇīsáham

120

1.120.01a     kā^́ rādhad dhótrāśvinā vāṃ
1.120.01b     kó vāṃ jóṣa ubháyoḥ
1.120.01c     kathā^́ vidhāty ápracetāḥ

1.120.02a     vidvā^́ṃsāv íd dúraḥ pr̥ched
1.120.02b     ávidvān itthā^́ áparo acetā^́ḥ
1.120.02c     nū^́ cin nú márte ákrau

1.120.03a     tā^́ vidvā^́ṃsā havāmahe vāṃ
1.120.03b     tā^́ no vidvā^́ṃsā mánma vocetam adyá
1.120.03c     prā^́rcad dáyamāno yuvā^́kuḥ

1.120.04a     ví pr̥chāmi pākíyā ná devā^́n
1.120.04b     váṣaṭkr̥tasya adbhutásya dasrā
1.120.04c     pātáṃ ca sáhyaso yuváṃ ca rábhyaso naḥ

1.120.05a     prá yā^́ ghóṣe bhŕ̥gavāṇe ná śóbhe
1.120.05b     yáyā vācā^́ yájati pajriyó vām
1.120.05c     praíṣayúr ná vidvā^́n

1.120.06a     śrutáṃ gāyatráṃ tákavānasya
1.120.06b     aháṃ cid dhí rirébhāśvinā vām
1.120.06c     ā^́ akṣī^́ śubhas patī dán

1.120.07a     yuváṃ hí ā^́stam mahó rán
1.120.07b     yuváṃ vā yán nirátataṃsatam
1.120.07c     tā^́ no vasū sugopā^́ siyātam
1.120.07d     pātáṃ no vŕ̥kād aghāyóḥ

1.120.08a     mā^́ kásmai dhātam abhy àmitríṇe no
1.120.08b     mā^́kútrā no gr̥hébhyo dhenávo guḥ
1.120.08c     stanābhújo áśiśvīḥ

1.120.09a     duhīyán mitrádhitaye yuvā^́ku
1.120.09b     rāyé ca no mimītáṃ vā^́javatyai
1.120.09c     iṣé ca no mimītaṃ dhenumátyai

1.120.10a     aśvínor asanaṃ rátham
1.120.10b     anaśváṃ vājínīvatoḥ
1.120.10c     ténāhám bhū^́ri cākana

1.120.11a     ayáṃ samaha mā tanu
1.120.11b     ūhyā^́te jánām̐ ánu
1.120.11c     somapéyaṃ sukhó ráthaḥ

1.120.12a     ádha svápnasya nír vide
1.120.12b     ábhuñjataś ca revátaḥ
1.120.12c     ubhā^́ tā^́ básri naśyataḥ

121

1.121.01a     kád itthā^́ nr̥̄^́m̐ḥ pā^́taraṃ⁺ devayatā^́ṃ
1.121.01b     śrávad gíro áṅgirasāṃ turaṇyán
1.121.01c     prá yád ā^́naḍ víśa ā^́ harmiyásya
1.121.01d     urú kraṃsate adhvaré yájatraḥ

1.121.02a     stámbhīd dha dyā^́ṃ sá dharúṇam pruṣāyad
1.121.02b     r̥bhúr vā^́jāya dráviṇaṃ náro góḥ
1.121.02c     ánu svajā^́m mahiṣáś cakṣata vrā^́m
1.121.02d     ménām áśvasya pári mātáraṃ góḥ

1.121.03a     nákṣad dhávam aruṇī^́ḥ pūrviyáṃ rā^́ṭ
1.121.03b     turó viśā^́m áṅgirasām ánu dyū^́n
1.121.03c     tákṣad vájraṃ níyutaṃ tastámbhad dyā^́ṃ
1.121.03d     cátuṣpade náriyāya dvipā^́de

1.121.04a     asyá máde svaríyaṃ dā r̥tā^́ya
1.121.04b     ápīvr̥tam usríyāṇām ánīkam
1.121.04c     yád dha prasárge trikakúṃ nivártad
1.121.04d     ápa drúho mā^́nuṣasya dúro vaḥ

1.121.05a     túbhyam páyo yát pitárāv ánītāṃ
1.121.05b     rā^́dhaḥ surétas turáṇe bhuraṇyū^́
1.121.05c     śúci yát te · rékṇa ā^́yajanta
1.121.05d     sabardúghāyāḥ páya usríyāyāḥ

1.121.06a     ádha prá jajñe taráṇir mamattu
1.121.06b     prá roci asyā^́ uṣáso ná sū^́raḥ
1.121.06c     índur yébhir · ā^́ṣṭa svéduhavyaiḥ
1.121.06d     sruvéṇa siñcáñ jaráṇābhí dhā^́ma

1.121.07a     suidhmā^́ yád vanádhitir apasyā^́t
1.121.07b     sū^́ro adhvaré pári ródhanā góḥ
1.121.07c     yád dha prabhā^́si kŕ̥tviyām̐ ánu dyū^́n
1.121.07d     ánarviśe paśuíṣe turā^́ya

1.121.08a     aṣṭā^́ mahó divá ā^́do hárīhá°
1.121.08b     dyumnāsā^́ham abhí yodhāná útsam
1.121.08c     háriṃ yát te mandínaṃ dukṣán vr̥dhé
1.121.08d     górabhasam ádribhir vãtā^́pyam

1.121.09a     tuvám āyasám práti vartayo gór
1.121.09b     divó áśmānam úpanītam ŕ̥bhvā
1.121.09c     kútsāya yátra puruhūta vanváñ
1.121.09d     chúṣṇam anantaíḥ pariyā^́si vadhaíḥ

1.121.10a     purā^́ yát sū^́ras támaso ápītes
1.121.10b     tám adrivaḥ phaligáṃ hetím asya
1.121.10c     śúṣṇasya cit párihitaṃ yád ójo
1.121.10d     divás pári súgrathitaṃ tád ā^́daḥ

1.121.11a     ánu tvā mahī^́ pā^́jasī acakré
1.121.11b     dyā^́vākṣā^́mā madatām indra kárman
1.121.11c     tuváṃ vr̥trám āśáyānaṃ sirā^́su
1.121.11d     mahó vájreṇa siṣvapo varā^́hum

1.121.12a     tuvám indra náriyo yā^́m̐ ávo nr̥̄^́n
1.121.12b     tíṣṭhā vā^́tasya suyújo váhiṣṭhān
1.121.12c     yáṃ te kāvyá uśánā mandínaṃ dā^́d
1.121.12d     vr̥traháṇam pā^́ryaṃ tatakṣa vájram

1.121.13a     tuváṃ sū^́ro haríto rāmayo nr̥̄^́n
1.121.13b     bhárac cakrám étaśo nā^́yám indra
1.121.13c     prā^́sya pāráṃ navatíṃ nāvíyānām
1.121.13d     ápi kartám avartayo áyajyūn

1.121.14a     tuváṃ no asyā^́ indra durháṇāyāḥ
1.121.14b     pāhí vajrivo duritā^́d abhī^́ke
1.121.14c     prá no vā^́jān rathíyo áśvabudhyān
1.121.14d     iṣé yandhi śrávase sūnŕ̥tāyai

1.121.15a     mā^́ sā^́ te asmát sumatír ví dasad
1.121.15b     vā^́japramahaḥ sám íṣo varanta
1.121.15c     ā^́ no bhaja maghavan góṣu aryó
1.121.15d     máṃhiṣṭhās te sadhamā^́daḥ siyāma

122

1.122.01a     prá vaḥ pã^́ntaṃ raghumanyavó 'ndho
1.122.01b     yajñáṃ rudrā^́ya mīḷhúṣe bharadhvam
1.122.01c     divó astoṣi ásurasya vīraír
1.122.01d     iṣudhyéva marúto ródasīyoḥ

1.122.02a     pátnīva pūrváhūtiṃ vāvr̥dhádhyā
1.122.02b     uṣā^́sānáktā purudhā^́ vídāne
1.122.02c     starī^́r ná átkaṃ víutaṃ vásānā
1.122.02d     sū^́ryasya śriyā^́ sudŕ̥śī híraṇyaiḥ

1.122.03a     mamáttu naḥ · párijmā vasarhā^́
1.122.03b     mamáttu vā^́to apã^́ṃ vŕ̥ṣaṇvān
1.122.03c     śiśītám indrāparvatā yuváṃ nas
1.122.03d     tán no víśve varivasyantu devā^́ḥ

1.122.04a     utá tyā^́ me yaśásā śvetanā^́yai
1.122.04b     viyántā pā^́ntā auśijó huvádhyai
1.122.04c     prá vo nápātam apã^́ṃ kr̥ṇudhvam
1.122.04d     prá mātárā · rāspinásya āyóḥ

1.122.05a     ā^́ vo ruvaṇyúm auśijó huvádhyai
1.122.05b     ghóṣeva śáṃsam árjunasya náṃśe
1.122.05c     prá vaḥ pūṣṇé dāvána ā^́m̐
1.122.05d     áchā voceya vasútātim agnéḥ

1.122.06a     śrutám me mitrāvaruṇā hávemā^́
1.122.06b     utá śrutaṃ sádane viśvátaḥ sīm
1.122.06c     śrótu naḥ · śróturātiḥ suśrótuḥ
1.122.06d     sukṣétrā síndhur adbhíḥ

1.122.07a     stuṣé sā^́ vāṃ varuṇa mitra rātír
1.122.07b     gávāṃ śatā^́ pr̥kṣáyāmeṣu pajré
1.122.07c     śrutárathe priyárathe dádhānāḥ
1.122.07d     sadyáḥ puṣṭíṃ nirundhānā^́so agman

1.122.08a     asyá stuṣe máhimaghasya rā^́dhaḥ
1.122.08b     sácā sanema náhuṣaḥ suvī^́rāḥ
1.122.08c     jáno yáḥ pajrébhiyo vājínīvān
1.122.08d     áśvāvato rathíno máhya° sūríḥ

1.122.09a     jáno yó mitrāvaruṇāv abhidhrúg
1.122.09b     apó ná vāṃ sunóti akṣṇayādhrúk
1.122.09c     svayáṃ sá yákṣmaṃ hŕ̥daye ní dhatta
1.122.09d     ā^́pa yád īṃ hótarābhir r̥tā^́vā

1.122.10a     sá vrā^́dhato náhuṣo dáṃsujūtaḥ
1.122.10b     śárdhastaro narã^́ṃ gūrtáśravāḥ
1.122.10c     vísr̥ṣṭarātir yāti bāḷhasŕ̥tvā
1.122.10d     víśvāsu pr̥tsú sádam íc chũ^́raḥ

1.122.11a     ádha gmántā náhuṣo hávaṃ sūréḥ
1.122.11b     śrótā rājāno amŕ̥tasya mandrāḥ
1.122.11c     nabhojúvo yán niravásya rā^́dhaḥ
1.122.11d     práśastaye mahinā^́ ráthavate

1.122.12a     etáṃ śárdhaṃ · dhāma yásya sūrér
1.122.12b     íty avocan dáśatayasya náṃśe
1.122.12c     dyumnā^́ni yéṣu vasútātī rārán
1.122.12d     víśve sanvantu prabhr̥théṣu vā^́jam

1.122.13a     mándāmahe dáśatayasya dhāsér
1.122.13b     dvír yát páñca bíbhrato yánti ánnā
1.122.13c     kím iṣṭā^́śuva iṣṭáraśmir etá
1.122.13d     īśānā^́sas táruṣa r̥ñjate nr̥̄^́n

1.122.14a     híraṇyakarṇam maṇigrīvam árṇas
1.122.14b     tán no víśve varivasyantu devā^́ḥ
1.122.14c     aryó gíraḥ sadyá ā^́ jagmúṣīr ā^́
1.122.14d     usrā^́ś cākantu ubháyeṣu asmé

1.122.15a     catvā^́ro mā maśarśā^́rasya śíśvas
1.122.15b     tráyo rā^́jña ā^́yavasasya jiṣṇóḥ
1.122.15c     rátho vām mitrāvaruṇā dīrghā^́psāḥ
1.122.15d     syū^́magabhastiḥ sãro ná adyaut

123

1.123.01a     pr̥thū^́ rátho dákṣiṇāyā ayoji
1.123.01b     aínaṃ devā^́so amŕ̥tāso asthuḥ
1.123.01c     kr̥ṣṇā^́d úd asthād aríyā víhāyāś
1.123.01d     cíkitsantī mā^́nuṣāya kṣáyāya

1.123.02a     pū^́rvā víśvasmād bhúvanād abodhi
1.123.02b     jáyantī vā^́jam br̥hatī^́ sánutrī
1.123.02c     uccā^́ ví akhyad yuvatíḥ punarbhū^́r
1.123.02d     óṣā^́ agan prathamā^́ pūrváhūtau

1.123.03a     yád adyá bhāgáṃ vibhájāsi nŕ̥bhya
1.123.03b     úṣo devi martiyatrā^́ sujāte
1.123.03c     devó no átra savitā^́ dámūnā
1.123.03d     ánāgaso vocati sū^́riyāya

1.123.04a     gr̥háṃ-gr̥ham ahanā^́ yāti áchā
1.123.04b     divé-dive ádhi nā^́mā dádhānā
1.123.04c     síṣāsantī dyotanā^́ śáśvad ā^́gād
1.123.04d     ágram-agram íd bhajate vásūnām

1.123.05a     bhágasya svásā váruṇasya jāmír
1.123.05b     úṣaḥ sūnr̥te prathamā^́ jarasva
1.123.05c     paścā^́ sá daghyā yó aghásya dhātā^́
1.123.05d     jáyema táṃ dákṣiṇayā ráthena

1.123.06a     úd īratāṃ sūnŕ̥tā út púraṃdhīr
1.123.06b     úd agnáyaḥ śuśucānā^́so asthuḥ
1.123.06c     spārhā^́ vásūni támasā^́pagūḷhā
1.123.06d     āvíṣ kr̥ṇvanti uṣáso vibhātī^́ḥ

1.123.07a     ápānyád éti abhí anyád eti
1.123.07b     víṣurūpe áhanī sáṃ carete
1.123.07c     parikṣítos támo anyā^́ gúhākar
1.123.07d     ádyaud uṣā^́ḥ śóśucatā ráthena

1.123.08a     sadŕ̥śīr adyá sadŕ̥śīr íd u śvó
1.123.08b     dīrgháṃ sacante váruṇasya dhā^́ma
1.123.08c     anavadyā^́s triṃśátaṃ yójanāni
1.123.08d     ékaikā krátum pári yanti sadyáḥ

1.123.09a     jānatī^́ áhnaḥ prathamásya nā^́ma
1.123.09b     śukrā^́ kr̥ṣṇā^́d ajaniṣṭa śvitīcī^́
1.123.09c     r̥tásya yóṣā ná mināti dhā^́ma
1.123.09d     áhar-ahar niṣkr̥tám ācárantī

1.123.10a     kaníyeva tanúvā śā^́śadānām̐
1.123.10b     éṣi devi devám íyakṣamāṇam
1.123.10c     saṃsmáyamānā yuvatíḥ purástād
1.123.10d     āvír vákṣāṃsi kr̥ṇuṣe vibhātī^́

1.123.11a     susaṃkāśā^́ mātŕ̥mr̥ṣṭeva yóṣā
1.123.11b     āvís tanúvaṃ kr̥ṇuṣe dr̥śé kám
1.123.11c     bhadrā^́ tvám uṣo vitaráṃ ví ucha
1.123.11d     ná tát te anyā^́ uṣáso naśanta

1.123.12a     áśvāvatīr gómatīr viśvávārā
1.123.12b     yátamānā raśmíbhiḥ sū^́riyasya
1.123.12c     párā ca yánti púnar ā^́ ca yanti
1.123.12d     bhadrā^́ nā^́ma váhamānā uṣā^́saḥ

1.123.13a     r̥tásya raśmím anuyáchamānā
1.123.13b     bhadrám-bhadraṃ krátum asmā^́su dhehi
1.123.13c     úṣo no adyá suhávā ví ucha
1.123.13d     asmā^́su rā^́yo maghávatsu ca syuḥ

124

1.124.01a     uṣā^́ uchántī samidhāné agnā^́
1.124.01b     udyán sū^́rya urviyā^́ jyótir aśret
1.124.01c     devó no átra savitā^́ nú ártham
1.124.01d     prā^́sāvīd dvipát prá cátuṣpad ityaí

1.124.02a     áminatī daíviyāni vratā^́ni
1.124.02b     praminatī^́ manuṣíyā yugā^́ni
1.124.02c     īyúṣīṇām upamā^́ śáśvatīnām
1.124.02d     āyatīnā^́m prathamóṣā^́ ví adyaut

1.124.03a     eṣā^́ divó duhitā^́ práty adarśi
1.124.03b     jyótir vásānā samanā^́ purástāt
1.124.03c     r̥tásya pánthām ánu eti sādhú
1.124.03d     prajānatī^́va ná díśo mināti

1.124.04a     úpo adarśi śundhyúvo ná vákṣo
1.124.04b     nodhā^́ ivāvír akr̥ta priyā^́ṇi
1.124.04c     admasán ná sasató bodháyantī
1.124.04d     śaśvattamā^́gāt púnar eyúṣīṇām

1.124.05a     pū^́rve árdhe rájaso aptiyásya
1.124.05b     gávāṃ jánitrī akr̥ta prá ketúm
1.124.05c     ví u prathate vitaráṃ várīya
1.124.05d     óbhā^́ pr̥ṇántī pitarór⁺ upásthā

1.124.06a     evéd eṣā^́ purutámā dr̥śé káṃ
1.124.06b     nā^́jāmiṃ ná pári vr̥ṇakti jāmím
1.124.06c     arepásā tanúvā śā^́śadānā
1.124.06d     nā^́rbhād ī^́ṣate ná mahó vibhātī^́

1.124.07a     abhrātéva puṃsá eti pratīcī^́
1.124.07b     gartārúg iva sanáye dhánānām
1.124.07c     jāyéva pátya uśatī^́ suvā^́sā
1.124.07d     uṣā^́ hasréva ní riṇīte ápsaḥ

1.124.08a     svásā svásre jyā^́yasyai yónim āraig
1.124.08b     ápaiti asyāḥ praticákṣiyeva
1.124.08c     viuchántī raśmíbhiḥ sū^́riyasya
1.124.08d     añjí aṅkte samanagā^́ iva vrā^́ḥ

1.124.09a     āsā^́m pū^́rvāsām áhasu svásr̥̄ṇām
1.124.09b     áparā pū^́rvām abhí eti paścā^́t
1.124.09c     tā^́ḥ pratnaván návyasīr nūnám asmé
1.124.09d     revád uchantu sudínā uṣā^́saḥ

1.124.10a     prá bodhayoṣaḥ pr̥ṇató maghoni
1.124.10b     ábudhyamānāḥ paṇáyaḥ sasantu
1.124.10c     revád ucha maghávadbhyo maghoni
1.124.10d     revát stotré sūnr̥te jāráyantī

1.124.11a     áveyám aśvaid yuvatíḥ purástād
1.124.11b     yuṅkté gávām aruṇā^́nām ánīkam
1.124.11c     ví nūnám uchād ásati prá ketúr
1.124.11d     gr̥háṃ-gr̥ham úpa tiṣṭhāte agníḥ

1.124.12a     út te váyaś cid vasatér apaptan
1.124.12b     náraś ca yé pitubhā^́jo víuṣṭau
1.124.12c     amā^́ saté vahasi bhū^́ri vāmám
1.124.12d     úṣo devi dāśúṣe mártiyāya

1.124.13a     ástoḍhuvaṃ stomiyā bráhmaṇā me
1.124.13b     ávīvr̥dhadhvam uśatī^́r uṣāsaḥ
1.124.13c     yuṣmā^́kaṃ devīr ávasā sanema
1.124.13d     sahasríṇaṃ ca śatínaṃ ca vā^́jam

125

1.125.01a     prātā^́ rátnam prātarítvā dadhāti
1.125.01b     táṃ cikitvā^́n pratigŕ̥hyā ní dhatte
1.125.01c     téna prajā^́ṃ vardháyamāna ā^́yū
1.125.01d     rāyás póṣeṇa sacate suvī^́raḥ

1.125.02a     sugúr asat suhiraṇyáḥ suáśvo
1.125.02b     br̥hád asmai váya índro dadhāti
1.125.02c     yás tvāyántaṃ vásunā prātaritvo
1.125.02d     mukṣī^́jayeva pádim utsinā^́ti

1.125.03a     ā^́yam adyá sukŕ̥tam prātár ichánn
1.125.03b     iṣṭéḥ putráṃ vásumatā ráthena
1.125.03c     aṃśóḥ sutám pāyaya matsarásya
1.125.03d     kṣayádvīraṃ vardhaya sūnŕ̥tābhiḥ

1.125.04a     úpa kṣaranti síndhavo mayobhúva
1.125.04b     ījānáṃ ca yakṣyámāṇaṃ ca dhenávaḥ
1.125.04c     pr̥ṇántaṃ ca pápuriṃ ca śravasyávo
1.125.04d     ghr̥tásya dhā^́rā úpa yanti viśvátaḥ

1.125.05a     nā^́kasya pr̥ṣṭhé ádhi tiṣṭhati śritó
1.125.05b     yáḥ pr̥ṇā^́ti sá ha devéṣu gachati
1.125.05c     tásmā ā^́po ghr̥tám arṣanti síndhavas
1.125.05d     tásmā iyáṃ dákṣiṇā pinvate sádā

1.125.06a     dákṣiṇāvatām íd imā^́ni citrā^́
1.125.06b     dákṣiṇāvatāṃ diví sū^́riyāsaḥ
1.125.06c     dákṣiṇāvanto amŕ̥tam bhajante
1.125.06d     dákṣiṇāvantaḥ prá tiranta ā^́yuḥ

1.125.07a     mā^́ pr̥ṇánto dúritam éna ā^́ran
1.125.07b     mā^́ jāriṣuḥ sūráyaḥ suvratā^́saḥ
1.125.07c     anyás téṣām paridhír astu káś cid
1.125.07d     ápr̥ṇantam abhí sáṃ yantu śókāḥ

126

1.126.01a     ámandān stómān prá bhare manīṣā^́
1.126.01b     síndhāv ádhi kṣiyató bhāviyásya
1.126.01c     yó me sahásram ámimīta savā^́n
1.126.01d     atū^́rto rā^́jā śráva ichámānaḥ

1.126.02a     śatáṃ rā^́jño nā^́dhamānasya niṣkā^́ñ
1.126.02b     chatám áśvān práyatān sadyá ā^́dam
1.126.02c     śatáṃ kakṣī^́vām̐ ásurasya gónāṃ
1.126.02d     diví śrávo ajáram ā^́ tatāna

1.126.03a     úpa mā śyāvā^́ḥ svanáyena dattā^́
1.126.03b     vadhū^́manto dáśa ráthāso asthuḥ
1.126.03c     ṣaṣṭíḥ sahásram ánu gávyam ā^́gāt
1.126.03d     sánat kakṣī^́vām̐ abhipitvé áhnām

1.126.04a     catvāriṃśád dáśarathasya śóṇāḥ
1.126.04b     sahásrasyā^́gre śráyaṇiṃ⁺ nayanti
1.126.04c     madacyútaḥ kr̥śanā^́vato átyān
1.126.04d     kakṣī^́vanta úd amr̥kṣanta pajrā^́ḥ

1.126.05a     pū^́rvām ánu práyatim ā^́ dade vas
1.126.05b     trī^́n yuktā^́m̐ aṣṭā^́v arídhāyaso gā^́ḥ
1.126.05c     subándhavo yé viśíyā iva vrā^́
1.126.05d     ánasvantaḥ śráva aíṣanta pajrā^́ḥ

1.126.06a     ā^́gadhitā párigadhitā
1.126.06b     yā^́ kaśīkéva jáṅgahe
1.126.06c     dádāti máhya° yā^́durī
1.126.06d     yā^́śūnām bhojíyā śatā^́

1.126.07a     úpopa me párā mr̥śa
1.126.07b     mā^́ me dabhrā^́ṇi manyathāḥ
1.126.07c     sárvāhám asmi romaśā^́
1.126.07d     gandhā^́rīṇām ivāvikā^́

127

1.127.01a     agníṃ hótāram manye dā^́suvantaṃ
1.127.01b     vásuṃ sūnúṃ sáhaso jātávedasaṃ
1.127.01c     vípraṃ ná jātávedasam
1.127.01d     yá ūrdhváyā suadhvaró
1.127.01e     devó devā^́ciyā kr̥pā^́
1.127.01f     ghr̥tásya víbhrāṣṭim ánu vaṣṭi śocíṣā
1.127.01g     ājúhvānasya sarpíṣaḥ

1.127.02a     yájiṣṭhaṃ tvā yájamānā huvema
1.127.02b     jyáyiṣṭham⁺ áṅgirasāṃ vipra mánmabhir
1.127.02c     víprebhiḥ śukra mánmabhiḥ
1.127.02d     párijmānam iva dyã^́ṃ
1.127.02e     hótāraṃ carṣaṇīnã^́m
1.127.02f     śocíṣkeśaṃ vŕ̥ṣaṇaṃ yám imā^́ víśaḥ
1.127.02g     prā^́vantu jūtáye víśaḥ

1.127.03a     sá hí purū^́ cid ójasā virúkmatā
1.127.03b     dī^́diyāno · bhávati druhaṃtaráḥ
1.127.03c     paraśúr ná druhaṃtaráḥ
1.127.03d     vīḷú cid yásya sámr̥tau
1.127.03e     śrúvad váneva yát sthirám
1.127.03f     niḥṣáhamāṇo yamate ná ayate
1.127.03g     dhanvāsáhā ná ayate

1.127.04a     dr̥̄ḷhā^́+ cid asmā ánu dur yáthā vidé
1.127.04b     téjiṣṭhābhir aráṇibhir dāṣṭi ávase
1.127.04c     agnáye dāṣṭi ávase
1.127.04d     prá yáḥ purū^́ṇi gā^́hate
1.127.04e     tákṣad váneva śocíṣā
1.127.04f     sthirā^́ cid ánnā ní riṇāti ójasā
1.127.04g     ní sthirā^́ṇi cid ójasā

1.127.05a     tám asya pr̥kṣám úparāsu dhīmahi
1.127.05b     náktaṃ yáḥ sudárśataro dívātarād
1.127.05c     áprāyuṣe dívātarāt
1.127.05d     ā^́d asyā^́yur grábhaṇavad
1.127.05e     vīḷú śárma ná sūnáve
1.127.05f     bhaktám ábhaktam ávo vyánto ajárā
1.127.05g     agnáyo vyánto ajárāḥ

1.127.06a     sá hí śárdho ná mā^́rutaṃ tuviṣváṇir
1.127.06b     ápnasvatīṣu urvárāsu iṣṭánir
1.127.06c     ā^́ ártanāsu iṣṭániḥ
1.127.06d     ā^́dad dhavyā^́ni ādadír
1.127.06e     yajñásya ketúr arháṇā
1.127.06f     ádha sma asya hárṣato hŕ̥ṣīvato
1.127.06g     víśve juṣanta pánthãṃ
1.127.06h     náraḥ śubhé ná pánthãm

1.127.07a     dvitā^́ yád īṃ · kīstā^́so abhídyavo
1.127.07b     namasyánta upavócanta bhŕ̥gavo
1.127.07c     mathnánto dāśā^́ bhŕ̥gavaḥ
1.127.07d     agnír īśe vásūnãṃ
1.127.07e     śúcir yó dharṇír eṣãm
1.127.07f     priyā^́m̐ apidhī^́m̐r vaniṣīṣṭa médhira
1.127.07g     ā^́ vaniṣīṣṭa médhiraḥ

1.127.08a     víśvāsāṃ tvā viśā^́m pátiṃ havāmahe
1.127.08b     sárvāsãṃ samānáṃ dámpatim bhujé
1.127.08c     satyágirvāhasam bhujé
1.127.08d     átithim mā^́nuṣāṇãm
1.127.08e     pitúr ná yásya āsayā^́
1.127.08f     amī^́ ca víśve amŕ̥tāsa ā^́ váyo
1.127.08g     havyā^́ devéṣu ā^́ váyaḥ

1.127.09a     tuvám agne · sáhasā sáhantamaḥ
1.127.09b     śuṣmíntamo jāyase devátātaye
1.127.09c     rayír ná devátātaye
1.127.09d     śuṣmíntamo hí te mádo
1.127.09e     dyumníntama utá krátuḥ
1.127.09f     ádha smā te pári caranti ajara
1.127.09g     śruṣṭīvā^́no ná ajara

1.127.10a     prá vo mahé · sáhasā sáhasvata
1.127.10b     uṣarbúdhe · paśuṣé ná agnáye
1.127.10c     stómo babhūtu agnáye
1.127.10d     práti yád īṃ havíṣmān
1.127.10e     víśvāsu kṣā^́su jóguve
1.127.10f     ágre rebhó ná jarata r̥ṣūṇã^́ṃ
1.127.10g     jū^́rṇir hóta r̥ṣūṇã^́m

1.127.11a     sá no nédiṣṭhaṃ dádr̥śāna ā^́ bhara
1.127.11b     ágne devébhiḥ sácanāḥ sucetúnā
1.127.11c     mahó rāyáḥ sucetúnā
1.127.11d     máhi śaviṣṭha nas kr̥dhi
1.127.11e     saṃcákṣe bhujé asyaí
1.127.11f     máhi stotŕ̥bhyo maghavan suvī^́riyam
1.127.11g     máthīr ugró ná śávasā

128

1.128.01a     ayáṃ jāyata mánuṣo dhárīmaṇi
1.128.01b     hótā yájiṣṭha uśíjām ánu vratám
1.128.01c     agníḥ suvám ánu vratám
1.128.01d     viśváśruṣṭiḥ sakhīyaté
1.128.01e     rayír iva śravasyaté
1.128.01f     ádabdho hótā ní ṣadad
1.128.01g     iḷás padé párivīta iḷás padé

1.128.02a     táṃ yajñasā^́dham ápi vātayāmasi
1.128.02b     r̥tásya pathā^́ námasā havíṣmatā
1.128.02c     devátātā havíṣmatā
1.128.02d     sá na ūrjā^́m upā^́bhr̥ti
1.128.02e     ayā^́ kr̥pā^́ ná jūryati
1.128.02f     yám mātaríśvā mánave parāváto
1.128.02g     devám bhã^́ḥ parāvátaḥ

1.128.03a     évena sadyáḥ pári eti pā^́rthivam
1.128.03b     muhurgī^́ réto vr̥ṣabháḥ kánikradad
1.128.03c     dádhad rétaḥ kánikradat
1.128.03d     śatáṃ cákṣāṇo akṣábhir
1.128.03e     devó váneṣu turváṇiḥ
1.128.03f     sádo dádhāna úpareṣu sā^́nuṣu
1.128.03g     agníḥ páreṣu sā^́nuṣu

1.128.04a     sá sukrátuḥ puróhito dáme-dame
1.128.04b     agnír yajñásya adhvarásya cetati
1.128.04c     krátvā yajñásya cetati
1.128.04d     krátvā vedhā^́ iṣūyaté
1.128.04e     víśvā jātā^́ni paspaśe
1.128.04f     yáto ghr̥taśrī^́r átithir ájāyata
1.128.04g     váhnir vedhā^́ ájāyata

1.128.05a     krátvā yád asya táviṣīṣu pr̥ñcáte
1.128.05b     agnér áveṇa marútāṃ ná bhojíye
1.128.05c     aśirā^́ya ná bhojíyā
1.128.05d     sá hí ṣmā dā^́nam ínvati
1.128.05e     vásūnãṃ ca majmánā
1.128.05f     sá nas trāsate duritā^́d abhihrútaḥ
1.128.05g     śáṃsād aghā^́d abhihrútaḥ

1.128.06a     víśvo víhāyā aratír vásur dadhe
1.128.06b     háste dákṣiṇe taráṇir ná śiśrathac
1.128.06c     chravasyáyā ná śiśrathat
1.128.06d     víśvasmā íd iṣudhyaté
1.128.06e     devatrā^́ havyám óhiṣe
1.128.06f     víśvasmā ít sukŕ̥te vā^́ram r̥ṇvati
1.128.06g     agnír dvā^́rā ví r̥ṇvati

1.128.07a     sá mā^́nuṣe vr̥jáne śáṃtamo hitó
1.128.07b     agnír yajñéṣu jéniyo ná viśpátiḥ
1.128.07c     priyó yajñéṣu viśpátiḥ
1.128.07d     sá havyā^́ mā^́nuṣāṇãm
1.128.07e     iḷā^́ kr̥tā^́ni patyate
1.128.07f     sá nas trāsate váruṇasya dhūrtér
1.128.07g     mahó devásya dhūrtéḥ

1.128.08a     agníṃ hótāram īḷate vásudhitim
1.128.08b     priyáṃ cétiṣṭham aratíṃ ní erire
1.128.08c     havyavā^́haṃ ní erire
1.128.08d     viśvā^́yuṃ viśvávedasaṃ
1.128.08e     hótāraṃ yajatáṃ kavím
1.128.08f     devā^́so raṇvám ávase vasūyávo
1.128.08g     gīrbhī^́ raṇváṃ vasūyávaḥ

129

1.129.01a     yáṃ tváṃ rátham indara⁺ medhásātaye
1.129.01b     apākā^́ sántam iṣira praṇáyasi
1.129.01c     prá anavadya náyasi
1.129.01d     sadyáś cit tám abhíṣṭaye
1.129.01e     káro váśaś ca vājínam
1.129.01f     sá asmā^́kam anavadya tūtujāna vedhásām
1.129.01g     imā^́ṃ vā^́caṃ ná vedhásām

1.129.02a     sá śrudhi yáḥ smā pŕ̥tanāsu kā^́su cid
1.129.02b     dakṣā^́yya indra bhárahūtaye nŕ̥bhir
1.129.02c     ási prátūrtaye nŕ̥bhiḥ
1.129.02d     yáḥ śū^́raiḥ súvaḥ sánitā
1.129.02e     yó víprair vā^́jaṃ tárutā
1.129.02f     tám īśānā^́sa iradhanta vājínam
1.129.02g     pr̥kṣám átyaṃ ná vājínam

1.129.03a     dasmó hí ṣmā vŕ̥ṣaṇam pínvasi tvácaṃ
1.129.03b     káṃ cid yāvīr aráruṃ śūra mártiyam
1.129.03c     parivr̥ṇákṣi mártiyam
1.129.03d     índrotá túbhya° tád divé
1.129.03e     tád rudrā^́ya sváyaśase
1.129.03f     mitrā^́ya vocaṃ váruṇāya sapráthaḥ
1.129.03g     sumr̥̄ḷīkā^́ya⁺ sapráthaḥ

1.129.04a     asmā^́kaṃ va indram uśmasi iṣṭáye
1.129.04b     sákhāyaṃ viśváāyum prāsáhaṃ yújaṃ
1.129.04c     vā^́jeṣu prāsáhaṃ yújam
1.129.04d     asmā^́kam bráhma ūtáye
1.129.04e     ávā pr̥tsúṣu kā^́su cit
1.129.04f     nahí tvā śátru stárate str̥ṇóṣi yáṃ
1.129.04g     víśvaṃ śátruṃ str̥ṇóṣi yám

1.129.05a     ní ṣū^́ namā átimatiṃ káyasya cit
1.129.05b     téjiṣṭhābhir aráṇibhir ná ūtíbhir
1.129.05c     ugrā^́bhir ugra ūtíbhiḥ
1.129.05d     nẽ^́ṣi ṇo yáthā purā^́
1.129.05e     anenā^́ḥ śūra mányase
1.129.05f     víśvāni pūrór ápa parṣi váhnir
1.129.05g     āsā^́ váhnir no ácha

1.129.06a     prá tád voceyam bháviyāya índave
1.129.06b     hávyo ná yá iṣávān mánma réjati
1.129.06c     rakṣohā^́ mánma réjati
1.129.06d     svayáṃ só asmád ā^́ nidó
1.129.06e     vadhaír ajeta durmatím
1.129.06f     áva sraved agháśaṃso avatarám
1.129.06g     áva kṣudrám iva sravet

1.129.07a     vanéma tád dhótarayā citántiyā
1.129.07b     vanéma rayíṃ rayivaḥ suvī^́riyaṃ
1.129.07c     raṇváṃ sántaṃ suvī^́riyam
1.129.07d     durmánmānaṃ sumántubhir
1.129.07e     ā^́ īm iṣā^́ pr̥cīmahi
1.129.07f     ā^́ satyā^́bhir índaraṃ⁺ dyumnáhūtibhir
1.129.07g     yájatraṃ dyumnáhūtibhiḥ

1.129.08a     prá-prā vo asmé sváyaśobhir ūtī^́
1.129.08b     parivargá índaro⁺ durmatīnã^́ṃ
1.129.08c     dárīman durmatīnã^́m
1.129.08d     svayáṃ sā^́ riṣayádhyai
1.129.08e     yā^́ na upeṣé atraíḥ
1.129.08f     hatém asan ná vakṣati
1.129.08g     kṣiptā^́ jūrṇír ná vakṣati

1.129.09a     tuváṃ na indra rãyā^́ párīṇasā
1.129.09b     yāhí pathā^́m̐ anehásā
1.129.09c     puró yāhi arakṣásā
1.129.09d     sácasva naḥ parāká ā^́
1.129.09e     sácasva astamīká ā^́
1.129.09f     pāhí no · dūrā^́d ārā^́d abhíṣṭibhiḥ
1.129.09g     sádā pāhi abhíṣṭibhiḥ

1.129.10a     tuváṃ na indra rãyā^́ tárūṣasā
1.129.10b     ugráṃ cit tvā mahimā^́ sakṣad ávase
1.129.10c     mahé mitráṃ ná ávase
1.129.10d     ójiṣṭha trā^́tar ávitā
1.129.10e     ráthaṃ káṃ cid amartiya
1.129.10f     anyám asmád ririṣeḥ káṃ cid adrivo
1.129.10g     rírikṣantaṃ cid adrivaḥ

1.129.11a     pāhí no · indara⁺ suṣṭuta sridhó
1.129.11b     avayātā^́ sádam íd durmatīnã^́ṃ
1.129.11c     deváḥ sán durmatīnã^́m
1.129.11d     hantā^́ pāpásya rakṣásas
1.129.11e     trātā^́ víprasya mā^́vataḥ
1.129.11f     ádhā hí tvā janitā^́ jī^́janad vaso
1.129.11g     rakṣoháṇaṃ tvā jī^́janad vaso

130

1.130.01a     ā^́ indra yāhi úpa naḥ parāváto
1.130.01b     nā^́yám áchā vidáthānīva sátpatir
1.130.01c     ástaṃ rā^́jeva sátpatiḥ
1.130.01d     hávāmahe tuvā vayám
1.130.01e     práyasvantaḥ suté sácā
1.130.01f     putrā^́so ná pitáraṃ vā^́jasātaye
1.130.01g     máṃhiṣṭhaṃ vā^́jasātaye

1.130.02a     píbā sómam indra suvānám ádribhiḥ
1.130.02b     kóśena siktám avatáṃ ná váṃsagas
1.130.02c     tātr̥ṣāṇó ná váṃsagaḥ
1.130.02d     mádāya haryatā^́ya te
1.130.02e     tuvíṣṭamāya dhā^́yase
1.130.02f     ā^́ tvā yachantu haríto ná sū^́riyam
1.130.02g     áhā víśveva sū^́riyam

1.130.03a     ávindad divó níhitaṃ gúhā nidhíṃ
1.130.03b     vẽ^́r ná gárbham párivītam áśmani
1.130.03c     ananté antár áśmani
1.130.03d     vrajáṃ vajrī^́ gávām iva
1.130.03e     síṣāsann áṅgirastamaḥ
1.130.03f     ápāvr̥ṇod íṣa índraḥ párīvr̥tā
1.130.03g     dvā^́ra íṣaḥ párīvr̥tāḥ

1.130.04a     dādr̥hāṇó vájram índro gábhastiyoḥ
1.130.04b     kṣádmeva tigmám ásanāya sáṃ śiyad
1.130.04c     ahihátyāya sáṃ śiyat
1.130.04d     saṃviviyāná ójasā
1.130.04e     śávobhir indra majmánā
1.130.04f     táṣṭeva vr̥kṣáṃ vaníno ní vr̥ścasi
1.130.04g     paraśvéva ní vr̥ścasi

1.130.05a     tuváṃ vŕ̥thā nadíya indra sártave
1.130.05b     áchā samudrám asr̥jo ráthām̐ iva
1.130.05c     vājayató ráthām̐ iva
1.130.05d     itá ūtī^́r ayuñjata
1.130.05e     samānám ártham ákṣitam
1.130.05f     dhenū^́r iva mánave viśvádohaso
1.130.05g     jánāya viśvádohasaḥ

1.130.06a     imā^́ṃ te vā^́caṃ vasūyánta āyávo
1.130.06b     ráthaṃ ná dhī^́raḥ suápā atakṣiṣuḥ
1.130.06c     sumnā^́ya tvā^́m atakṣiṣuḥ
1.130.06d     śumbhánto jéniyaṃ yathā
1.130.06e     vā^́jeṣu vipra vājínam
1.130.06f     átyam iva śávase sātáye dhánā
1.130.06g     víśvā dhánāni sātáye

1.130.07a     bhinát púro navatím indra pūráve
1.130.07b     dívodāsāya máhi dāśúṣe nr̥to
1.130.07c     vájreṇa dāśúṣe nr̥to
1.130.07d     atithigvā^́ya śámbaraṃ
1.130.07e     girér ugró ávābharat
1.130.07f     mahó dhánāni dáyamāna ójasā
1.130.07g     víśvā dhánāni ójasā

1.130.08a     índraḥ samátsu yájamānam ā^́riyam
1.130.08b     prā^́vad víśveṣu śatámūtir ājíṣu
1.130.08c     súvarmīḷheṣu ājíṣu
1.130.08d     mánave śā^́sad avratā^́n
1.130.08e     tvácaṃ kr̥ṣṇā^́m arandhayat
1.130.08f     dákṣan ná víśvaṃ tatr̥ṣāṇám oṣati
1.130.08g     ní arśasānám oṣati

1.130.09a     sū^́raś cakrám prá vr̥haj jātá ójasā
1.130.09b     prapitvé vā^́cam aruṇó muṣāyati
1.130.09c     īśāná ā^́ muṣāyati
1.130.09d     uśánā yát parāváto
1.130.09e     ájagann ūtáye kave
1.130.09f     sumnā^́ni víśvā mánuṣeva turváṇir
1.130.09g     áhā víśveva turváṇiḥ

1.130.10a     sá no návyebhir vr̥ṣakarman ukthaíḥ
1.130.10b     púrāṃ dartaḥ pāyúbhiḥ pāhi śagmaíḥ
1.130.10c     divodāsébhir indra stávāno
1.130.10d     vāvr̥dhīthā^́ · áhobhir iva dyaúḥ

131

1.131.01a     índrāya hí dyaúr ásuro ánamnata
1.131.01b     índrāya mahī^́ pr̥thivī^́ várīmabhir
1.131.01c     dyumnásātā várīmabhiḥ
1.131.01d     índraṃ víśve sajóṣaso
1.131.01e     devā^́so dadhire puráḥ
1.131.01f     índrāya víśvā sávanāni mā^́nuṣā
1.131.01g     rātā^́ni santu mā^́nuṣā

1.131.02a     víśveṣu hí tvā sávaneṣu tuñjáte
1.131.02b     samānám ékaṃ vŕ̥ṣamaṇyavaḥ pŕ̥thak
1.131.02c     súvaḥ saniṣyávaḥ pŕ̥thak
1.131.02d     táṃ tvā nā^́vaṃ ná parṣáṇiṃ
1.131.02e     śūṣásya dhurí dhīmahi
1.131.02f     índraṃ ná yajñaíś citáyanta āyáva
1.131.02g     stómebhir índram āyávaḥ

1.131.03a     ví tvā tatasre mithunā^́ avasyávo
1.131.03b     vrajásya sātā^́ gáviyasya niḥsŕ̥jaḥ
1.131.03c     sákṣanta indra niḥsŕ̥jaḥ
1.131.03d     yád gavyántā duvā^́ jánā
1.131.03e     súvar yántā samū^́hasi
1.131.03f     āvíṣ kárikrad vŕ̥ṣaṇaṃ sacābhúvaṃ
1.131.03g     vájram indra sacābhúvam

1.131.04a     vidúṣ ṭe asyá vīríyasya pūrávaḥ
1.131.04b     púro yád indra śā^́radīr avā^́tiraḥ
1.131.04c     sāsahānó avā^́tiraḥ
1.131.04d     śā^́sas tám indra mártiyam
1.131.04e     áyajyuṃ śavasas pate
1.131.04f     mahī^́m amuṣṇāḥ pr̥thivī^́m imā^́ apó
1.131.04g     mandasāná imā^́ apáḥ

1.131.05a     ā^́d ít te asyá vīríyasya carkiran
1.131.05b     mádeṣu vr̥ṣann uśíjo yád ā^́vitha
1.131.05c     sakhīyató yád ā^́vitha
1.131.05d     cakártha kārám ebhiyaḥ
1.131.05e     pŕ̥tanāsu právantave
1.131.05f     té anyā^́m-anyāṃ nadíyaṃ saniṣṇata
1.131.05g     śravasyántaḥ saniṣṇata

1.131.06a     utó no asyā^́ uṣáso juṣéta hí
1.131.06b     arkásya bodhi havíṣo hávīmabhiḥ
1.131.06c     súvarṣātā hávīmabhiḥ
1.131.06d     yád indra hántave mŕ̥dho
1.131.06e     vŕ̥ṣā vajriñ cíketasi
1.131.06f     ā^́ me asyá · vedháso návīyaso
1.131.06g     mánma śrudhi návīyasaḥ

1.131.07a     tuváṃ tám indra vāvr̥dhānó asmayúr
1.131.07b     amitrayántaṃ tuvijāta mártiyaṃ
1.131.07c     vájreṇa śūra mártiyam
1.131.07d     jahí yó no aghāyáti
1.131.07e     śr̥ṇuṣvá suśrávastamaḥ
1.131.07f     riṣṭáṃ ná yā^́mann ápa bhūtu durmatír
1.131.07g     víśvā^́pa bhūtu durmatíḥ

132

1.132.01a     tváyā vayám maghavan pū^́rviye dhána
1.132.01b     índratvotāḥ sāsahyāma pr̥tanyató
1.132.01c     vanuyā^́ma vanuṣyatáḥ
1.132.01d     nédiṣṭhe asmín áhani
1.132.01e     ádhi vocā nú sunvaté
1.132.01f     asmín yajñé ví cayemā bháre kr̥táṃ
1.132.01g     vājayánto bháre kr̥tám

1.132.02a     suvarjeṣé bhára āprásya vákmani
1.132.02b     uṣarbúdhaḥ suvásmin áñjasi
1.132.02c     krāṇásya svásmin áñjasi
1.132.02d     áhann índro yáthā vidé
1.132.02e     śīrṣṇā^́-śīrṣṇopavā^́ciyaḥ
1.132.02f     asmatrā^́ te sadhríak santu rātáyo
1.132.02g     bhadrā^́ bhadrásya rātáyaḥ

1.132.03a     tát tú práyaḥ pratnáthā te śuśukvanáṃ
1.132.03b     yásmin yajñé vā^́ram ákr̥ṇvata kṣáyam
1.132.03c     r̥tásya vā^́r asi kṣáyam
1.132.03d     ví tád vocer ádha dvitā^́
1.132.03e     antáḥ paśyanti raśmíbhiḥ
1.132.03f     sá ghā vide ánu índro gavéṣaṇo
1.132.03g     bandhukṣídbhyo gavéṣaṇaḥ

1.132.04a     nū^́ itthā^́ te pūrváthā ca pravā^́ciyaṃ
1.132.04b     yád áṅgirobhyo ávr̥ṇor ápa vrajám
1.132.04c     índra śíkṣann ápa vrajám
1.132.04d     aíbhyaḥ samāniyā^́ diśā^́
1.132.04e     asmábhyaṃ jeṣi yótsi ca
1.132.04f     sunvádbhiyo randhayā káṃ cid avratáṃ
1.132.04g     hr̥ṇāyántaṃ cid avratám

1.132.05a     sáṃ yáj jánān krátubhiḥ śū^́ra īkṣáyad
1.132.05b     dháne hité taruṣanta śravasyávaḥ
1.132.05c     prá yakṣanta śravasyávaḥ
1.132.05d     tásmā ā^́yuḥ prajā^́vad íd
1.132.05e     bā^́dhe arcanti ójasā
1.132.05f     índra okíyaṃ didhiṣanta dhītáyo
1.132.05g     devā^́m̐ áchā ná dhītáyaḥ

1.132.06a     yuváṃ tám indrāparvatā puroyúdhā
1.132.06b     yó naḥ pr̥tanyā^́d ápa táṃ-tam íd dhataṃ
1.132.06c     vájreṇa táṃ-tam íd dhatam
1.132.06d     dūré cattā^́ya chantsad
1.132.06e     gáhanaṃ yád ínakṣat
1.132.06f     asmā^́kaṃ śátrūn pári śūra viśváto
1.132.06g     darmā^́ darṣīṣṭa viśvátaḥ

133

1.133.01a     ubhé punāmi ródasī r̥téna
1.133.01b     drúho dahāmi sám mahī^́r anindrā^́ḥ
1.133.01c     abhivlágya yátra hatā^́ amítrā
1.133.01d     vailasthānám pári tr̥ḷhā^́ áśeran

1.133.02a     abhivlágyā cid adrivaḥ
1.133.02b     śīrṣā^́ yātumátīnãm
1.133.02c     chindhí vaṭūríṇā padā^́
1.133.02d     mahā^́vaṭūriṇā padā^́

1.133.03a     ávāsām maghavañ jahi
1.133.03b     śárdho yātumátīnãm
1.133.03c     vailasthānaké armaké
1.133.03d     mahā^́vailasthe armaké

1.133.04a     yā^́sāṃ tisráḥ pañcāśáto
1.133.04b     abhivlaṅgaír apā^́vapaḥ
1.133.04c     tát sú te manāyati
1.133.04d     takát sú te manāyati

1.133.05a     piśáṅgabhr̥ṣṭim ambhr̥ṇám
1.133.05b     piśā^́cim indra sám mr̥ṇa
1.133.05c     sárvaṃ rákṣo ní barhaya

1.133.06a     avár mahá indra dādr̥hí śrudhī^́ naḥ
1.133.06b     śuśóca hí dyaúḥ kṣā^́ ná bhīṣā^́m̐ adrivo
1.133.06c     ghr̥ṇā^́n ná bhīṣā^́m̐ adrivaḥ
1.133.06d     śuṣmíntamo hí śuṣmíbhir
1.133.06e     vadhaír ugrébhir ī^́yase
1.133.06f     ápūruṣaghno apratīta śūra sátvabhis
1.133.06g     trisaptaíḥ śūra sátvabhiḥ

1.133.07a     vanóti hí sunván kṣáyam párīṇasaḥ
1.133.07b     sunvānó hí ṣmā yájati áva dvíṣo
1.133.07c     devā^́nãm áva dvíṣaḥ
1.133.07d     sunvāná ít siṣāsati
1.133.07e     sahásrā vājī^́ ávr̥taḥ
1.133.07f     sunvānā^́ya índro dadāti ābhúvaṃ
1.133.07g     rayíṃ dadāti ābhúvam

134

1.134.01a     ā^́ tvā júvo rārahāṇā^́ abhí práyo
1.134.01b     vā^́yo váhantu ihá pūrvápītaye
1.134.01c     sómasya pūrvápītaye
1.134.01d     ūrdhvā^́ te ánu sūnŕ̥tā
1.134.01e     mánas tiṣṭhatu jānatī^́
1.134.01f     niyútvatā ráthenā^́ yāhi dāváne
1.134.01g     vā^́yo makhásya dāváne

1.134.02a     mándantu tvā mandíno vāyav índavo
1.134.02b     asmát krāṇā^́saḥ súkr̥tā abhídyavo
1.134.02c     góbhiḥ krāṇā^́ abhídyavaḥ
1.134.02d     yád dha krāṇā^́ irádhiyai
1.134.02e     dákṣaṃ sácanta ūtáyaḥ
1.134.02f     sadhrīcīnā^́ niyúto dāváne dhíya
1.134.02g     úpa bruvata īṃ dhíyaḥ

1.134.03a     vāyúr yuṅkte róhitā vāyúr aruṇā^́
1.134.03b     vāyū^́ ráthe ajirā^́ dhurí vóḷhave
1.134.03c     váhiṣṭhā dhurí vóḷhave
1.134.03d     prá bodhayā púraṃdhiṃ
1.134.03e     jārá ā^́ sasatī^́m iva
1.134.03f     prá cakṣaya ródasī vāsayoṣásaḥ
1.134.03g     śrávase vāsayoṣásaḥ

1.134.04a     túbhyam uṣā^́saḥ śúcayaḥ parāváti
1.134.04b     bhadrā^́ vástrā tanvate dáṃsu raśmíṣu
1.134.04c     citrā^́ návyeṣu raśmíṣu
1.134.04d     túbhyaṃ dhenúḥ sabardúghā
1.134.04e     víśvā vásūni dohate
1.134.04f     ájanayo marúto vakṣáṇābhiyo
1.134.04g     divá ā^́ vakṣáṇābhiyaḥ

1.134.05a     túbhyaṃ śukrā^́saḥ śúcayas turaṇyávo
1.134.05b     mádeṣu ugrā^́ iṣaṇanta bhurváṇi
1.134.05c     apā^́m iṣanta bhurváṇi
1.134.05d     tuvā^́ṃ tsārī^́ dásamāno
1.134.05e     bhágam īṭṭe takvavī^́ye
1.134.05f     tváṃ víśvasmād bhúvanāt pāsi dhármaṇā
1.134.05g     asuryā^̀t pāsi dhármaṇā

1.134.06a     tuváṃ no vāyav eṣãm ápūrviyaḥ
1.134.06b     sómānãm prathamáḥ pītím arhasi
1.134.06c     sutā^́nām pītím arhasi
1.134.06d     utó vihútmatīnãṃ
1.134.06e     viśā^́ṃ vavarjúṣīṇãm
1.134.06f     víśvā ít te dhenávo duhra āśíraṃ
1.134.06g     ghr̥táṃ duhrata āśíram

135

1.135.01a     stīrṇám barhír úpa no yāhi vītáye
1.135.01b     sahásreṇa · niyútā niyutvate
1.135.01c     śatínībhir niyutvate
1.135.01d     túbhyaṃ hí pūrvápītaye
1.135.01e     devā^́ devā^́ya yemiré
1.135.01f     prá te sutā^́so mádhumanto asthiran
1.135.01g     mádāya krátve asthiran

1.135.02a     túbhyāyáṃ sómaḥ páripūto ádribhi
1.135.02b     spārhā^́ vásānaḥ pári kóśam arṣati
1.135.02c     śukrā^́ vásāno arṣati
1.135.02d     távāyám bhāgá āyúṣu
1.135.02e     sómo devéṣu hūyate
1.135.02f     váha vāyo niyúto yāhi asmayúr
1.135.02g     juṣāṇó yāhi asmayúḥ

1.135.03a     ā^́ no niyúdbhiḥ śatínībhir adhvaráṃ
1.135.03b     sahasríṇībhir úpa yāhi vītáye
1.135.03c     vā^́yo havyā^́ni vītáye
1.135.03d     távāyám bhāgá r̥tvíyaḥ
1.135.03e     sáraśmiḥ sū^́riye sácā
1.135.03f     adhvaryúbhir bháramāṇā ayaṃsata
1.135.03g     vā^́yo śukrā^́ ayaṃsata

1.135.04a     ā^́ vāṃ rátho niyútvān vakṣad ávase
1.135.04b     abhí práyāṃsi súdhitāni vītáye
1.135.04c     vā^́yo havyā^́ni vītáye
1.135.04d     píbatam mádhvo ándhasaḥ
1.135.04e     pūrvapéyaṃ hí vāṃ hitám
1.135.04f     vā^́yav ā^́ candréṇa rā^́dhasā ā^́ gatam
1.135.04g     índraś ca rā^́dhasā^́ gatam

1.135.05a     ā^́ vāṃ dhíyo vavr̥tyur adhvarā^́m̐ úpa
1.135.05b     imám índum · marmr̥janta vājínam
1.135.05c     āśúm átyaṃ ná vājínam
1.135.05d     téṣām pibatam asmayū^́
1.135.05e     ā^́ no gantam ihótiyā^́
1.135.05f     índravāyū sutā^́nām ádribhir yuvám
1.135.05g     mádāya vājadā yuvám

1.135.06a     imé vāṃ sómā apsú ā^́ sutā^́ ihá
1.135.06b     adhvaryúbhir bháramāṇā ayaṃsata
1.135.06c     vā^́yo śukrā^́ ayaṃsata
1.135.06d     eté vām abhy àsr̥kṣata
1.135.06e     tiráḥ pavítram āśávaḥ
1.135.06f     yuvāyávo áti rómāṇi avyáyā
1.135.06g     sómāso áti avyáyā

1.135.07a     áti vāyo sasató yāhi śáśvato
1.135.07b     yátra grā^́vā vádati tátra gachataṃ
1.135.07c     gr̥hám índraś ca gachatam
1.135.07d     ví sūnŕ̥tā dádr̥śe rī^́yate ghr̥tám
1.135.07e     ā^́ pūrṇáyā niyútā yātho adhvarám
1.135.07f     índraś ca yātho adhvarám

1.135.08a     átrā^́ha tád vahethe mádhva ā^́hutiṃ
1.135.08b     yám aśvatthám upatíṣṭhanta jāyávo
1.135.08c     asmé té santu jāyávaḥ
1.135.08d     sākáṃ gā^́vaḥ súvate pácyate yávo
1.135.08e     ná te vāya úpa dasyanti dhenávo
1.135.08f     nā^́pa dasyanti dhenávaḥ

1.135.09a     imé yé te sú vāyo bāhúojaso
1.135.09b     antár nadī^́ te patáyanti ukṣáṇo
1.135.09c     máhi vrā^́dhanta ukṣáṇaḥ
1.135.09d     dhánvañ cid yé anāśávo
1.135.09e     jīrā^́ś cid ágiraukasaḥ
1.135.09f     sū^́ryasyeva raśmáyo durniyántavo
1.135.09g     hástayor durniyántavaḥ

136

1.136.01a     prá sú jyéṣṭhaṃ nicirā^́bhyām br̥hán námo
1.136.01b     havyám matím bharatā mr̥̄ḷayádbhiyāṃ⁺
1.136.01c     svā^́diṣṭham mr̥̄ḷayádbhiyām⁺
1.136.01d     tā^́ samrā^́jā ghr̥tā^́sutī
1.136.01e     yajñé-yajña úpastutā
1.136.01f     áthainoḥ kṣatráṃ ná kútaś canā^́dhŕ̥ṣe
1.136.01g     devatváṃ nū^́ cid ādhŕ̥ṣe

1.136.02a     ádarśi gātúr uráve várīyasī
1.136.02b     pánthā r̥tásya sám ayaṃsta raśmíbhiś
1.136.02c     cákṣur bhágasya raśmíbhiḥ
1.136.02d     dyukṣám mitrásya sā^́danam
1.136.02e     aryamṇó váruṇasya ca
1.136.02f     áthā dadhāte br̥hád ukthíyaṃ váya
1.136.02g     upastútyam br̥hád váyaḥ

1.136.03a     jyótiṣmatīm áditiṃ dhārayátkṣitiṃ
1.136.03b     súvarvatīm ā^́ sacete divé-dive
1.136.03c     jāgr̥vā^́ṃsā divé-dive
1.136.03d     jyótiṣmat kṣatrám āśate°
1.136.03e     ādityā^́ dā^́nunas pátī
1.136.03f     mitrás táyor váruṇo yātayájjano
1.136.03g     aryamā^́ yātayájjanaḥ

1.136.04a     ayám mitrā^́ya váruṇāya śáṃtamaḥ
1.136.04b     sómo bhūtu avapā^́neṣu ā^́bhago
1.136.04c     devó devéṣu ā^́bhagaḥ
1.136.04d     táṃ devā^́so juṣerata
1.136.04e     víśve adyá sajóṣasaḥ
1.136.04f     táthā rājānā karatho yád ī^́maha
1.136.04g     ŕ̥tāvānā yád ī^́mahe

1.136.05a     yó mitrā^́ya váruṇāyā^́vidhaj jáno
1.136.05b     anarvā^́ṇaṃ tám pári pāto áṃhaso
1.136.05c     dāśvā^́ṃsam mártam áṃhasaḥ
1.136.05d     tám aryamā^́bhí rakṣati
1.136.05e     r̥jūyántam ánu vratám
1.136.05f     ukthaír yá enoḥ paribhū^́ṣati vratáṃ
1.136.05g     stómair ābhū^́ṣati vratám

1.136.06a     námo divé br̥haté ródasībhiyām
1.136.06b     mitrā^́ya vocaṃ váruṇāya mīḷhúṣe
1.136.06c     sumr̥̄ḷīkā^́ya⁺ mīḷhúṣe
1.136.06d     índram agním úpa stuhi
1.136.06e     dyukṣám aryamáṇam bhágam
1.136.06f     jiyóg jī^́vantaḥ prajáyā sacemahi
1.136.06g     sómasyotī^́ sacemahi

1.136.07a     ūtī^́ devā^́nāṃ vayám índravanto
1.136.07b     maṃsīmáhi sváyaśaso marúdbhiḥ
1.136.07c     agnír mitró váruṇaḥ śárma yaṃsan
1.136.07d     tád aśyāma maghávāno vayáṃ ca

137

1.137.01a     suṣumā^́ yātam ádribhir
1.137.01b     góśrītā matsarā^́ imé
1.137.01c     sómāso matsarā^́ imé
1.137.01d     ā^́ rājānā divispr̥śā
1.137.01e     asmatrā^́ gantam úpa naḥ
1.137.01f     imé vām mitrāvaruṇā gávāśiraḥ
1.137.01g     sómāḥ śukrā^́ gávāśiraḥ

1.137.02a     imá ā^́ yātam índavaḥ
1.137.02b     sómāso dádhiāśiraḥ
1.137.02c     sutā^́so dádhiāśiraḥ
1.137.02d     utá vām uṣáso budhí
1.137.02e     sākáṃ sū^́ryasya raśmíbhiḥ
1.137.02f     sutó mitrā^́ya váruṇāya pītáye
1.137.02g     cā^́rur r̥tā^́ya pītáye

1.137.03a     tā^́ṃ vāṃ dhenúṃ ná vāsarī^́m
1.137.03b     aṃśúṃ duhanti ádribhiḥ
1.137.03c     sómaṃ duhanti ádribhiḥ
1.137.03d     asmatrā^́ gantam úpa no
1.137.03e     arvā^́ñcā sómapītaye
1.137.03f     ayáṃ vām mitrāvaruṇā nŕ̥bhiḥ sutáḥ
1.137.03g     sóma ā^́ pītáye sutáḥ

138

1.138.01a     prá-pra pūṣṇás tuvijātásya śasyate
1.138.01b     mahitvám asya taváso ná tandate
1.138.01c     stotrám asya ná tandate
1.138.01d     árcāmi sumnayánn ahám
1.138.01e     ántiūtim mayobhúvam
1.138.01f     víśvasya yó mána āyuyuvé makhó
1.138.01g     devá āyuyuvé makháḥ

1.138.02a     prá hí tvā pūṣann ajiráṃ ná yā^́mani
1.138.02b     stómebhiḥ kr̥ṇvá r̥ṇávo yáthā mŕ̥dha
1.138.02c     úṣṭro ná pīparo mŕ̥dhaḥ
1.138.02d     huvé yát tvā mayobhúvaṃ
1.138.02e     deváṃ sakhyā^́ya mártiyaḥ
1.138.02f     asmā^́kam · āṅgūṣā^́n dyumnínas kr̥dhi
1.138.02g     vā^́jeṣu dyumnínas kr̥dhi

1.138.03a     yásya te pūṣan sakhiyé vipanyávaḥ
1.138.03b     krátvā cit sánto ávasā bubhujrirá
1.138.03c     íti krátvā bubhujriré
1.138.03d     tā^́m ánu tvā návīyasīṃ
1.138.03e     niyútaṃ rāyá īmahe
1.138.03f     áheḷamāna uruśaṃsa sárī bhava
1.138.03g     vā^́je-vāje sárī bhava

1.138.04a     asyā^́ ū ṣú ṇa úpa sātáye bhuvo
1.138.04b     áheḷamāno rarivā^́m̐ ajāśuva
1.138.04c     śravasyatā^́m ajāśuva
1.138.04d     ó ṣú tvā vavr̥tīmahi
1.138.04e     stómebhir dasma sādhúbhiḥ
1.138.04f     nahí tvā pūṣann atimánya āghr̥ṇe
1.138.04g     ná te sakhyám apahnuvé

139

1.139.01a     ástu śraúṣaṭ puró agníṃ dhiyā^́ dadha
1.139.01b     ā^́ nú tác chárdho diviyáṃ vr̥ṇīmaha
1.139.01c     indravāyū^́ vr̥ṇīmahe
1.139.01d     yád dha krāṇā^́ vivásvati
1.139.01e     nā^́bhā saṃdā^́yi návyasī
1.139.01f     ádha prá sū^́ na úpa yantu dhītáyo
1.139.01g     devā^́m̐ áchā ná dhītáyaḥ

1.139.02a     yád dha tyán mitrāvaruṇāv r̥tā^́d ádhi
1.139.02b     ādadā^́the ánr̥taṃ svéna manyúnā
1.139.02c     dákṣasya svéna manyúnā
1.139.02d     yuvór itthā^́dhi sádmasu
1.139.02e     ápaśyāma hiraṇyáyam
1.139.02f     dhībhíś caná mánasā svébhir akṣábhiḥ
1.139.02g     sómasya svébhir akṣábhiḥ

1.139.03a     yuvā^́ṃ stómebhir devayánto aśvinā
1.139.03b     āśrāváyanta iva ślókam āyávo
1.139.03c     yuvā^́ṃ havyā^́bhí āyávaḥ
1.139.03d     yuvór víśvā ádhi śríyaḥ
1.139.03e     pŕ̥kṣaś ca viśvavedasā
1.139.03f     pruṣāyánte vām paváyo hiraṇyáye
1.139.03g     ráthe dasrā hiraṇyáye

1.139.04a     áceti dasrā ví u nā^́kam r̥ṇvatho
1.139.04b     yuñjáte vāṃ rathayújo díviṣṭiṣu
1.139.04c     adhvasmā^́no díviṣṭiṣu
1.139.04d     ádhi vāṃ sthā^́ma vandhúre
1.139.04e     ráthe dasrā hiraṇyáye
1.139.04f     pathéva yántāv anuśā^́satā rájo
1.139.04g     áñjasā śā^́satā rájaḥ

1.139.05a     śácībhir naḥ śacīvasū
1.139.05b     dívā náktaṃ daśasyatam
1.139.05c     mā^́ vāṃ rātír úpa dasat kádā caná
1.139.05d     asmád rātíḥ kádā caná

1.139.06a     vŕ̥ṣann indra vr̥ṣapā^́ṇāsa índava
1.139.06b     imé sutā^́ ádriṣutāsa udbhídas
1.139.06c     túbhyaṃ sutā^́sa udbhídaḥ
1.139.06d     té tvā mandantu dāváne
1.139.06e     mahé citrā^́ya rā^́dhase
1.139.06f     gīrbhír girvāha stávamāna ā^́ gahi
1.139.06g     sumr̥̄ḷīkó⁺ na ā^́ gahi

1.139.07a     ó ṣū^́ ṇo agne śr̥ṇuhi tvám īḷitó
1.139.07b     devébhiyo bravasi yajñíyebhiyo
1.139.07c     rā^́jabhyo yajñíyebhiyaḥ
1.139.07d     yád dha tyā^́m áṅgirobhiyo
1.139.07e     dhenúṃ devā ádattana
1.139.07f     ví tā^́ṃ duhre aryamā^́ kartárī sácām̐
1.139.07g     eṣá tā^́ṃ veda me sácā

1.139.08a     mó ṣú vo asmád abhí tā^́ni paúṃsiyā
1.139.08b     sánā bhūvan dyumnā^́ni mótá jāriṣur
1.139.08c     asmát purótá jāriṣuḥ
1.139.08d     yád vaś citráṃ yugé-yuge
1.139.08e     návyaṃ ghóṣād ámartiyam
1.139.08f     asmā^́su tán maruto yác ca duṣṭáraṃ
1.139.08g     didhr̥tā^́ yác ca duṣṭáram

1.139.09a     dadhyáṅ ha me janúṣam pū^́rvo áṅgirāḥ
1.139.09b     priyámedhaḥ káṇvo átrir mánur vidus
1.139.09c     té me pū^́rve mánur viduḥ
1.139.09d     téṣāṃ devéṣu ā^́yatir
1.139.09e     asmā^́kaṃ téṣu nā^́bhayaḥ
1.139.09f     téṣām padéna máhi ā^́ name girā^́
1.139.09g     indrāgnī^́ ā^́ name girā^́

1.139.10a     hótā yakṣad vaníno vanta vā^́riyam
1.139.10b     bŕ̥haspátir yajati vená ukṣábhiḥ
1.139.10c     puruvā^́rebhir ukṣábhiḥ
1.139.10d     jagr̥bhmā^́ dūráādiśaṃ
1.139.10e     ślókam ádrer ádha tmánā
1.139.10f     ádhārayad araríndāni sukrátuḥ
1.139.10g     purū^́ sádmāni sukrátuḥ

1.139.11a     yé devāso diví ékādaśa sthá
1.139.11b     pr̥thiviyā^́m ádhi ékādaśa sthá
1.139.11c     apsukṣíto mahinaíkādaśa sthá
1.139.11d     té devāso yajñám imáṃ juṣadhvam

140

1.140.01a     vediṣáde priyádhāmāya sudyúte
1.140.01b     dhāsím iva prá bharā yónim agnáye
1.140.01c     vástreṇeva vāsayā mánmanā śúciṃ
1.140.01d     jyotī^́rathaṃ śukrávarṇaṃ tamohánam

1.140.02a     abhí dvijánmā trivŕ̥d ánnam r̥jyate
1.140.02b     saṃvatsaré vāvr̥dhe jagdhám ī púnaḥ
1.140.02c     anyásyāsā^́ jihváyā jéniyo vŕ̥ṣā
1.140.02d     ní anyéna vaníno mr̥ṣṭa vāraṇáḥ

1.140.03a     kr̥ṣṇaprútau vevijé asya sakṣítā
1.140.03b     ubhā^́ tarete abhí mātárā śíśum
1.140.03c     prācā^́jihvaṃ dhvasáyantaṃ tr̥ṣucyútam
1.140.03d     ā^́ sā^́ciyaṃ kúpayaṃ várdhanam pitúḥ

1.140.04a     mumukṣúvo mánave mānavasyaté
1.140.04b     raghudrúvaḥ kr̥ṣṇásītāsa ū júvaḥ
1.140.04c     asamanā^́ ajirā^́so raghuṣyádo
1.140.04d     vā^́tajūtā úpa yujyanta āśávaḥ

1.140.05a     ā^́d asya té dhvasáyanto vŕ̥therate
1.140.05b     kr̥ṣṇám ábhvam máhi várpaḥ kárikrataḥ
1.140.05c     yát sīm mahī^́m avánim prā^́bhí mármr̥śad
1.140.05d     abhiśvasán stanáyann éti nā^́nadat

1.140.06a     bhū^́ṣan ná yó ádhi babhrū^́ṣu námnate
1.140.06b     vŕ̥ṣeva pátnīr abhí eti róruvat
1.140.06c     ojāyámānas tanúvaś ca śumbhate
1.140.06d     bhīmó ná śŕ̥ṅgā davidhāva durgŕ̥bhiḥ

1.140.07a     sá saṃstíro viṣṭíraḥ sáṃ gr̥bhāyati
1.140.07b     jānánn evá jānatī^́r nítya ā^́ śaye
1.140.07c     púnar vardhante ápi yanti devíyam
1.140.07d     anyád várpaḥ pitaróḥ⁺ kr̥ṇvate sácā

1.140.08a     tám agrúvaḥ keśínīḥ sáṃ hí rebhirá
1.140.08b     ūrdhvā^́s tasthur mamrúṣīḥ prā^́yáve púnaḥ
1.140.08c     tā^́sāṃ jarā^́m pramuñcán eti nā^́nadad
1.140.08d     ásum páraṃ janáyañ jīvám ástr̥tam

1.140.09a     adhīvāsám pári mātū^́ rihánn áha
1.140.09b     tuvigrébhiḥ sátvabhir yāti ví jráyaḥ
1.140.09c     váyo dádhat padváte rérihat sádā
1.140.09d     ánu śyénī sacate vartanī^́r áha

1.140.10a     asmā^́kam agne maghávatsu dīdihi
1.140.10b     ádha śvásīvān vr̥ṣabhó dámūnāḥ
1.140.10c     avā^́siā śíśumatīr adīder
1.140.10d     vármeva yutsú parijárbhurāṇaḥ

1.140.11a     idám agne súdhitaṃ dúrdhitād ádhi
1.140.11b     priyā^́d u cin mánmanaḥ préyo astu te
1.140.11c     yát te śukráṃ tanúvo rócate śúci
1.140.11d     ténāsmábhyaṃ vanase rátnam ā^́ tuvám

1.140.12a     ráthāya nā^́vam utá no gr̥hā^́ya
1.140.12b     nítyāritrām padvátīṃ rāsi agne
1.140.12c     asmā^́kaṃ vīrā^́m̐ utá no maghóno
1.140.12d     jánāṃś ca yā^́ pāráyāc chárma yā^́ ca

1.140.13a     abhī^́ no agna ukthám íj juguryā
1.140.13b     dyā^́vākṣā^́mā síndhavaś ca svágūrtāḥ
1.140.13c     gávyaṃ yáviyaṃ yánto dīrghā^́ áhā
1.140.13d     íṣaṃ váram aruṇíyo varanta

141

1.141.01a     báḷ itthā^́ tád vápuṣe dhāyi darśatáṃ
1.141.01b     devásya bhárgaḥ sáhaso yáto jáni
1.141.01c     yád īm úpa hvárate sā^́dhate matír
1.141.01d     r̥tásya dhénā anayanta sasrútaḥ

1.141.02a     pr̥kṣó vápuḥ pitumā^́n nítya ā^́ śaye
1.141.02b     dvitī^́yam ā^́ saptáśivāsu mātŕ̥ṣu
1.141.02c     tr̥tī^́yam asya vr̥ṣabhásya doháse
1.141.02d     dáśapramatiṃ janayanta yóṣaṇaḥ

1.141.03a     nír yád īm budhnā^́n mahiṣásya várpasa
1.141.03b     īśānā^́saḥ śávasā kránta sūráyaḥ
1.141.03c     yád īm ánu pradívo mádhva ādhavé
1.141.03d     gúhā sántam mātaríśvā mathāyáti

1.141.04a     prá yát pitúḥ paramā^́n nīyáte pári
1.141.04b     ā^́ pr̥kṣúdho vīrúdho dáṃsu rohati
1.141.04c     ubhā^́ yád asya janúṣaṃ yád ínvata
1.141.04d     ā^́d íd yáviṣṭho abhavad ghr̥ṇā^́ śúciḥ

1.141.05a     ā^́d ín mātr̥̄^́r ā^́viśad yā^́su ā^́ śúcir
1.141.05b     áhiṃsyamāna urviyā^́ ví vāvr̥dhe
1.141.05c     ánu yát pū^́rvā áruhat sanājúvo
1.141.05d     ní návyasīṣu ávarāsu dhāvate

1.141.06a     ā^́d íd dhótāraṃ vr̥ṇate díviṣṭiṣu
1.141.06b     bhágam iva papr̥cānā^́sa r̥ñjate
1.141.06c     devā^́n yát krátvā majmánā puruṣṭutó
1.141.06d     mártaṃ śáṃsaṃ viśvádhā véti dhā^́yase

1.141.07a     ví yád ásthād yajató vā^́tacodito
1.141.07b     hvāró ná vákvā jaráṇā ánākr̥taḥ
1.141.07c     tásya pátman dakṣúṣaḥ kr̥ṣṇájaṃhasaḥ
1.141.07d     śúcijanmano rája ā^́ víadhvanaḥ

1.141.08a     rátho ná yātáḥ śíkvabhiḥ kr̥tó
1.141.08b     diyā^́m áṅgebhir aruṣébhir īyate
1.141.08c     ā^́d asya té kr̥ṣṇā^́so dakṣi sūráyaḥ
1.141.08d     śū^́rasyeva tveṣáthād īṣate váyaḥ

1.141.09a     tváyā hí agne váruṇo dhr̥távrato
1.141.09b     mitráḥ śāśadré aryamā^́ sudā^́navaḥ
1.141.09c     yát sīm ánu krátunā viśváthā vibhúr
1.141.09d     arā^́n ná nemíḥ paribhū^́r ájāyathāḥ

1.141.10a     tuvám agne śaśamānā^́ya sunvaté
1.141.10b     rátnaṃ yaviṣṭha devátātim invasi
1.141.10c     táṃ tvā nú návyaṃ sahaso yuvan vayám
1.141.10d     bhágaṃ ná kāré mahiratna dhīmahi

1.141.11a     asmé rayíṃ ná suárthaṃ dámūnasam
1.141.11b     bhágaṃ dákṣaṃ ná papr̥cāsi dharṇasím
1.141.11c     raśmī^́m̐r 'va° yó yámati jánmanī ubhé
1.141.11d     devā^́nāṃ śáṃsam r̥tá ā^́ ca sukrátuḥ

1.141.12a     utá naḥ sudiyótmā jīráaśvo
1.141.12b     hótā mandráḥ śr̥ṇavac candrárathaḥ
1.141.12c     sá no neṣan néṣatamair ámūro
1.141.12d     agnír vāmáṃ suvitáṃ vásyo ácha

1.141.13a     ástāvi agníḥ śímīvadbhir arkaíḥ
1.141.13b     sā^́mrājiyāya prataráṃ dádhānaḥ
1.141.13c     amī^́ ca yé maghávāno vayáṃ ca
1.141.13d     míhaṃ ná sū^́ro áti níṣ ṭatanyuḥ

142

1.142.01a     sámiddho agna ā^́ vaha
1.142.01b     devā^́m̐ adyá yatásruce
1.142.01c     tántuṃ tanuṣva pūrviyáṃ
1.142.01d     sutásomāya dāśúṣe

1.142.02a     ghr̥távantam úpa māsi
1.142.02b     mádhumantaṃ tanūnapāt
1.142.02c     yajñáṃ víprasya mā^́vataḥ
1.142.02d     śaśamānásya dāśúṣaḥ

1.142.03a     śúciḥ pavākó⁺ ádbhuto
1.142.03b     mádhvā yajñám mimikṣati
1.142.03c     nárāśáṃsaḥ trír ā^́ divó
1.142.03d     devó devéṣu yajñíyaḥ

1.142.04a     īḷitó agna ā^́ vaha
1.142.04b     índraṃ citrám ihá priyám
1.142.04c     iyáṃ hí tvā matír máma
1.142.04d     áchā sujihva vacyáte

1.142.05a     str̥ṇānā^́so yatásruco
1.142.05b     barhír yajñé suadhvaré
1.142.05c     vr̥ñjé devávyacastamam
1.142.05d     índrāya śárma sapráthaḥ

1.142.06a     ví śrayantām r̥tāvŕ̥dhaḥ
1.142.06b     prayaí devébhiyo mahī^́ḥ
1.142.06c     pavākā^́saḥ⁺ puruspŕ̥ho
1.142.06d     dvā^́ro devī^́r asaścátaḥ

1.142.07a     ā^́ bhándamāne úpāke
1.142.07b     náktoṣā^́sā supéśasā
1.142.07c     yahvī^́ r̥tásya mātárā
1.142.07d     sī^́datām barhír ā^́ sumát

1.142.08a     mandrájihvā jugurváṇī
1.142.08b     hótārā daíviyā kavī^́
1.142.08c     yajñáṃ no yakṣatām imáṃ
1.142.08d     sidhrám adyá divispŕ̥śam

1.142.09a     śúcir devéṣu árpitā
1.142.09b     hótrā marútsu bhā^́ratī
1.142.09c     íḷā sárasvatī mahī^́
1.142.09d     barhíḥ sīdantu yajñíyāḥ

1.142.10a     tán nas turī^́pam ádbhutam
1.142.10b     purú vā^́ram purú tmánā
1.142.10c     tváṣṭā póṣāya ví ṣyatu
1.142.10d     rāyé nā^́bhā no asmayúḥ

1.142.11a     avasr̥jánn úpa tmánā
1.142.11b     devā^́n yakṣi vanaspate
1.142.11c     agnír havyā^́ suṣūdati
1.142.11d     devó devéṣu médhiraḥ

1.142.12a     pūṣaṇváte marútvate
1.142.12b     viśvádevāya vāyáve
1.142.12c     svā^́hā gāyatrávepase
1.142.12d     havyám índrāya kartana

1.142.13a     svā^́hākr̥tāni ā^́ gahi
1.142.13b     úpa havyā^́ni vītáye
1.142.13c     índrā^́ gahi śrudhī^́ hávaṃ
1.142.13d     tuvā^́ṃ havante adhvaré

143

1.143.01a     prá távyasīṃ návyasīṃ dhītím agnáye
1.143.01b     vācó matíṃ sáhasaḥ sūnáve bhare
1.143.01c     apā^́ṃ nápād yó vásubhiḥ sahá priyó
1.143.01d     hótā pr̥thivyā^́ṃ ní ásīdad r̥tvíyaḥ

1.143.02a     sá jā^́yamānaḥ paramé víomani
1.143.02b     āvír agnír abhavan mātaríśvane
1.143.02c     asyá krátvā samidhānásya majmánā
1.143.02d     prá dyā^́vā śocíḥ pr̥thivī^́ arocayat

1.143.03a     asyá tveṣā^́ ajárā asyá bhānávaḥ
1.143.03b     susaṃdŕ̥śaḥ suprátīkasya sudyútaḥ
1.143.03c     bhā^́tvakṣaso áti aktúr ná síndhavo
1.143.03d     agné rejante ásasanto ajárāḥ

1.143.04a     yám eriré bhŕ̥gavo viśvávedasaṃ
1.143.04b     nā^́bhā pr̥thivyā^́ bhúvanasya majmánā
1.143.04c     agníṃ táṃ gīrbhír hinuhi svá ā^́ dáme
1.143.04d     yá éko vásvo váruṇo ná rā^́jati

1.143.05a     ná yó várāya marútām iva svanáḥ
1.143.05b     séneva sr̥ṣṭā^́ diviyā^́ yáthāśániḥ
1.143.05c     agnír jámbhais tigitaír atti bhárvati
1.143.05d     yodhó ná śátrūn sá vánā ní r̥ñjate

1.143.06a     kuvín no agnír ucáthasya vī^́r ásad
1.143.06b     vásuṣ kuvíd vásubhiḥ kā^́mam āvárat
1.143.06c     codáḥ kuvít tutujyā^́t sātáye dhíyaḥ
1.143.06d     śúcipratīkaṃ tám ayā^́ dhiyā^́ gr̥ṇe

1.143.07a     ghr̥tápratīkaṃ va r̥tásya dhūrṣádam
1.143.07b     agním mitráṃ ná samidhāná r̥ñjate
1.143.07c     índhāno akró vidátheṣu dī^́diyac
1.143.07d     chukrávarṇām úd u no yaṃsate dhíyam

1.143.08a     áprayuchann áprayuchadbhir agne
1.143.08b     śivébhir naḥ pāyúbhiḥ pāhi śagmaíḥ
1.143.08c     ádabdhebhir ádr̥pitebhir iṣṭe
1.143.08d     ánimiṣadbhiḥ pári pāhi no jā^́ḥ

144

1.144.01a     éti prá hótā vratám asya māyáyā
1.144.01b     ūrdhvā^́ṃ dádhānaḥ śúcipeśasaṃ dhíyam
1.144.01c     abhí srúcaḥ kramate dakṣiṇāvŕ̥to
1.144.01d     yā^́ asya dhā^́ma prathamáṃ ha níṃsate

1.144.02a     abhī^́m r̥tásya dohánā anūṣata
1.144.02b     yónau devásya sádane párīvr̥tāḥ
1.144.02c     apā^́m upásthe víbhr̥to yád ā^́vasad
1.144.02d     ádha svadhā^́ adhayad yā^́bhir ī^́yate

1.144.03a     yúyūṣataḥ sávayasā tád íd vápuḥ
1.144.03b     samānám árthaṃ vitáritratā mitháḥ
1.144.03c     ā^́d īm bhágo ná háviyaḥ sám asmád ā^́
1.144.03d     vóḷhur ná raśmī^́n sám ayaṃsta sā^́rathiḥ

1.144.04a     yám īṃ duvā^́ sávayasā saparyátaḥ
1.144.04b     samāné yónā mithunā^́ sámokasā
1.144.04c     dívā ná náktam palitó yúvājani
1.144.04d     purū^́ cárann ajáro mā^́nuṣā yugā^́

1.144.05a     tám īṃ hinvanti dhītáyo dáśa vríśo
1.144.05b     devám mártāsa ūtáye havāmahe
1.144.05c     dhánor ádhi praváta ā^́ sá r̥ṇvati
1.144.05d     abhivrájadbhir vayúnā návādhita

1.144.06a     tuváṃ hí agne diviyásya rā^́jasi
1.144.06b     tvám pā^́rthivasya paśupā^́ iva tmánā
1.144.06c     énī ta eté br̥hatī^́ abhiśríyā
1.144.06d     hiraṇyáyī vákvarī barhír āśate°

1.144.07a     ágne juṣásva práti harya tád váco
1.144.07b     mándra svádhāva ŕ̥tajāta súkrato
1.144.07c     yó viśvátaḥ pratiáṅṅ ási darśató
1.144.07d     raṇváḥ sáṃdr̥ṣṭau pitumā^́m̐ iva kṣáyaḥ

145

1.145.01a     tám pr̥chatā sá jagāmā sá veda
1.145.01b     sá cikitvā^́m̐ īyate sā^́ nú īyate
1.145.01c     tásmin santi praśíṣas tásmin iṣṭáyaḥ
1.145.01d     sá vā^́jasya śávasaḥ śuṣmíṇas pátiḥ

1.145.02a     tám ít pr̥chanti ná simó ví pr̥chati
1.145.02b     svéneva dhī^́ro mánasā yád ágrabhīt
1.145.02c     ná mr̥ṣyate prathamáṃ nā^́paraṃ váco
1.145.02d     asyá krátvā sacate ápradr̥pitaḥ

1.145.03a     tám íd gachanti juhúvas tám árvatīr
1.145.03b     víśvāni ékaḥ śr̥ṇavad vácāṃsi me
1.145.03c     purupraiṣás táturir yajñasā^́dhano
1.145.03d     áchidrotiḥ śíśur ā^́datta sáṃ rábhaḥ

1.145.04a     upasthā^́yaṃ carati yát samā^́rata
1.145.04b     sadyó jātás tatsāra yújiyebhiḥ
1.145.04c     abhí śvāntám mr̥śate nāndíye mudé
1.145.04d     yád īṃ gáchanti uśatī^́r apiṣṭhitám

1.145.05a     sá īm mr̥gó · ápiyo vanargúr
1.145.05b     úpa tvací upamásyāṃ ní dhāyi
1.145.05c     ví abravīd vayúnā mártiyebhyo
1.145.05d     agnír vidvā^́m̐ · r̥tacíd dhí satyáḥ

146

1.146.01a     trimūrdhā^́naṃ saptáraśmiṃ gr̥ṇīṣe
1.146.01b     ánūnam agním pitarór⁺ upásthe
1.146.01c     niṣattám asya cárato dhruvásya
1.146.01d     víśvā divó rocanā^́paprivā^́ṃsam

1.146.02a     ukṣā^́ mahā^́m̐ abhí vavakṣa ene
1.146.02b     ajáras tasthāv itáūtir r̥ṣváḥ
1.146.02c     urviyā^́ḥ padó ní dadhāti sā^́nau
1.146.02d     rihánti ū^́dho aruṣā^́so asya

1.146.03a     samānáṃ vatsám abhí saṃcárantī
1.146.03b     víṣvag dhenū^́ ví carataḥ suméke
1.146.03c     anapavr̥jyā^́m̐ ádhvano mímāne
1.146.03d     víśvān kétām̐ ádhi mahó dádhāne

1.146.04a     dhī^́rāsaḥ padáṃ kaváyo nayanti
1.146.04b     nā^́nā hr̥dā^́ rákṣamāṇā ajuryám
1.146.04c     síṣāsantaḥ páry apaśyanta síndhum
1.146.04d     āvír ebhyo abhavat sū^́riyo nr̥̄^́n

1.146.05a     didr̥kṣéṇyaḥ pári kā^́ṣṭhāsu jéniya
1.146.05b     īḷéniyo mahó árbhāya jīváse
1.146.05c     purutrā^́ yád ábhavat sū^́r áhaibhiyo
1.146.05d     gárbhebhiyo maghávā viśvádarśataḥ

147

1.147.01a     kathā^́ te agne śucáyanta āyór
1.147.01b     dadāśúr · vā^́jebhir āśuṣāṇā^́ḥ
1.147.01c     ubhé yát toké tánaye dádhānā
1.147.01d     r̥tásya sā^́man raṇáyanta devā^́ḥ

1.147.02a     bódhā me asyá vácaso yaviṣṭha
1.147.02b     máṃhiṣṭhasya prábhr̥tasya svadhāvaḥ
1.147.02c     pī^́yati tvo ánu tuvo gr̥ṇāti
1.147.02d     vandā^́rus te tanúvaṃ vande agne

1.147.03a     yé pāyávo māmateyáṃ te agne
1.147.03b     páśyanto andháṃ duritā^́d árakṣan
1.147.03c     rarákṣa tā^́n sukŕ̥to viśvávedā
1.147.03d     dípsanta íd ripávo nā^́ha debhuḥ

1.147.04a     yó no agne árarivām̐ aghāyúr
1.147.04b     arātīvā^́ marcáyati dvayéna
1.147.04c     mántro gurúḥ púnar astu só asmā
1.147.04d     ánu mr̥kṣīṣṭa tanúvaṃ duruktaíḥ

1.147.05a     utá vā yáḥ sahasiya pravidvā^́n
1.147.05b     márto mártam marcáyati dvayéna
1.147.05c     átaḥ pāhi stavamāna stuvántam
1.147.05d     ágne mā^́kir no duritā^́ya dhāyīḥ

148

1.148.01a     máthīd yád īṃ · viṣṭó mātaríśvā
1.148.01b     hótāraṃ viśvã^́psuṃ viśvádevyam
1.148.01c     ní yáṃ dadhúr manuṣíyāsu vikṣú
1.148.01d     súvar ṇá citráṃ vápuṣe vibhā^́vam

1.148.02a     dadānám ín ná dadabhanta mánma
1.148.02b     agnír várūtham máma tásya cākan
1.148.02c     juṣánta · víśvāni asya kárma
1.148.02d     úpastutim bháramāṇasya kāróḥ

1.148.03a     nítye cin nú yáṃ sádane jagr̥bhré
1.148.03b     práśastibhir dadhiré yajñíyāsaḥ
1.148.03c     prá sū^́ nayanta gr̥bháyanta iṣṭā^́v
1.148.03d     áśvāso ná rathíyo rārahāṇā^́ḥ

1.148.04a     purū^́ṇi dasmó ní riṇāti jámbhair
1.148.04b     ã^́d rocate vána ā^́ vibhā^́vā
1.148.04c     ā^́d asya vā^́to ánu vāti śocír
1.148.04d     ástur ná śáryām asanā^́m ánu dyū^́n

1.148.05a     ná yáṃ ripávo ná riṣaṇyávo
1.148.05b     gárbhe sántaṃ reṣaṇā^́ reṣáyanti
1.148.05c     andhā^́ apaśyā^́ ná dabhann abhikhyā^́
1.148.05d     nítyāsa īm prayitā^́ro⁺ arakṣan

149

1.149.01a     maháḥ sá rāyá éṣate pátir dánn
1.149.01b     iná inásya vásunaḥ padá ā^́
1.149.01c     úpa dhrájantam ádrayo vidhánn ít

1.149.02a     sá yó vŕ̥ṣā narā^́ṃ ná ródasīyoḥ
1.149.02b     śrávobhir ásti jīvápītasargaḥ
1.149.02c     prá yáḥ sasrāṇáḥ śiśrītá yónau

1.149.03a     ā^́ yáḥ púraṃ · nā^́rmiṇīm ádīded
1.149.03b     átyaḥ kavír nabhaníyo ná árvā
1.149.03c     sãro ná rurukvā^́ñ chatáātmā

1.149.04a     abhí dvijánmā trī^́ rocanā^́ni
1.149.04b     víśvā rájāṃsi śuśucānó asthāt
1.149.04c     hótā yájiṣṭho apā^́ṃ sadhásthe

1.149.05a     ayáṃ sá hótā yó dvijánmā
1.149.05b     víśvā dadhé vā^́riyāṇi śravasyā^́
1.149.05c     márto yó asmai sutúko dadā^́śa

150

1.150.01a     purú tvā dāśuvā^́n voce
1.150.01b     arír agne táva svid ā^́
1.150.01c     todásyeva śaraṇá ā^́ mahásya

1.150.02a     ví aninásya dhanínaḥ
1.150.02b     prahoṣé cid áraruṣaḥ
1.150.02c     kadā^́ caná prajígato ádevayoḥ

1.150.03a     sá candró vipra mártiyo
1.150.03b     mahó vrā^́dhantamo diví
1.150.03c     prá-prét te agne vanúṣaḥ siyāma

151

1.151.01a     mitráṃ ná yáṃ śímiyā góṣu gavyávaḥ
1.151.01b     suādhíyo vidáthe apsú jī^́janan
1.151.01c     árejetāṃ ródasī pā^́jasā girā^́
1.151.01d     práti priyáṃ yajatáṃ janúṣām ávaḥ

1.151.02a     yád dha tyád vām purumīḷhásya somínaḥ
1.151.02b     prá mitrā^́so ná dadhiré suābhúvaḥ
1.151.02c     ádha krátuṃ vidataṃ gātúm árcata
1.151.02d     utá śrutaṃ vr̥ṣaṇā pastíyāvataḥ

1.151.03a     ā^́ vām bhūṣan kṣitáyo jánma ródasoḥ°
1.151.03b     pravā^́ciyaṃ vr̥ṣaṇā dákṣase mahé
1.151.03c     yád īm r̥tā^́ya bháratho yád árvate
1.151.03d     prá hótrayā śímiyā vītho adhvarám

1.151.04a     prá sā^́ kṣitír asura yā^́ máhi priyá
1.151.04b     ŕ̥tāvānāv r̥tám ā^́ ghoṣatho br̥hát
1.151.04c     yuváṃ divó br̥ható dákṣam ābhúvaṃ
1.151.04d     gã^́ṃ ná dhurí úpa yuñjathe° apáḥ

1.151.05a     mahī^́ átra mahinā^́ vā^́ram r̥ṇvatho
1.151.05b     areṇávas túja ā^́ sádman dhenávaḥ
1.151.05c     sváranti tā^́ uparátāti sū^́riyam
1.151.05d     ā^́ nimrúca uṣásas takvavī^́r iva

1.151.06a     ā^́ vām r̥tā^́ya keśínīr anūṣata
1.151.06b     mítra yátra váruṇa gātúm árcathaḥ
1.151.06c     áva tmánā sr̥játam pínvataṃ dhíyo
1.151.06d     yuváṃ víprasya mánmanām irajyathaḥ

1.151.07a     yó vāṃ yajñaíḥ śaśamānó ha dā^́śati
1.151.07b     kavír hótā yájati manmasā^́dhanaḥ
1.151.07c     úpā^́ha táṃ gáchatho vīthó adhvarám
1.151.07d     áchā gíraḥ sumatíṃ gantam asmayū^́

1.151.08a     yuvā^́ṃ yajñaíḥ prathamā^́ góbhir añjata
1.151.08b     ŕ̥tāvānā mánaso ná práyuktiṣu
1.151.08c     bháranti vām mánmanā saṃyátā gíro
1.151.08d     ádr̥pyatā mánasā revád āśathe°

1.151.09a     revád váyo dadhathe° revád āśathe°
1.151.09b     nárā māyā^́bhir itáūti mā^́hinam
1.151.09c     ná vāṃ dyā^́vo áhabhir nótá síndhavo
1.151.09d     ná devatvám paṇáyo nā^́naśur maghám

152

1.152.01a     yuváṃ vástrāṇi pīvasā^́ vasāthe
1.152.01b     yuvór áchidrā mántavo ha sárgāḥ
1.152.01c     ávātiratam ánr̥tāni víśva
1.152.01d     r̥téna mitrāvaruṇā sacethe

1.152.02a     etác caná tvo ví ciketad eṣāṃ
1.152.02b     satyó mántraḥ kaviśastá ŕ̥ghāvān
1.152.02c     triráśriṃ hanti cáturaśrir ugró
1.152.02d     devanído ha prathamā^́ ajūryan

1.152.03a     apā^́d eti prathamā^́ padvátīnāṃ
1.152.03b     kás tád vām mitrāvaruṇā^́ ciketa
1.152.03c     gárbho bhārám bharati ā^́ cid asya
1.152.03d     r̥tám píparti ánr̥taṃ ní tārīt

1.152.04a     prayántam ít pári jāráṃ kanī^́nām
1.152.04b     páśyāmasi nópanipádyamānam
1.152.04c     ánavapr̥gṇā vítatā vásānam
1.152.04d     priyám mitrásya váruṇasya dhā^́ma

1.152.05a     anaśvó jātó anabhīśúr árvā
1.152.05b     kánikradat patayad ūrdhvásānuḥ
1.152.05c     acíttam bráhma jujuṣur yúvānaḥ
1.152.05d     prá mitré dhā^́ma váruṇe gr̥ṇántaḥ

1.152.06a     ā^́ dhenávo māmateyám ávantīr
1.152.06b     brahmapríyam pīpayan sásmin ū^́dhan
1.152.06c     pitvó bhikṣeta vayúnāni vidvā^́n
1.152.06d     āsā^́vívāsann áditim uruṣyet

1.152.07a     ā^́ vām mitrāvaruṇā havyájuṣṭiṃ
1.152.07b     námasā devāv ávasā vavr̥tyām
1.152.07c     asmā^́kam bráhma pŕ̥tanāsu sahyā
1.152.07d     asmā^́kaṃ vr̥ṣṭír diviyā^́ supārā^́

153

1.153.01a     yájāmahe vām maháḥ sajóṣā
1.153.01b     havyébhir mitrāvaruṇā námobhiḥ
1.153.01c     ghr̥taír ghr̥tasnū ádha yád vām asmé
1.153.01d     adhvaryávo ná dhītíbhir bháranti

1.153.02a     prástutir vāṃ · dhā^́ma ná práyuktir
1.153.02b     áyāmi mitrāvaruṇā suvr̥ktíḥ
1.153.02c     anákti yád vāṃ vidátheṣu hótā
1.153.02d     sumnáṃ vāṃ sūrír vr̥ṣaṇāv íyakṣan

1.153.03a     pīpā^́ya dhenúr áditir r̥tā^́ya
1.153.03b     jánāya mitrāvaruṇā havirdé
1.153.03c     hinóti yád vāṃ vidáthe saparyán
1.153.03d     sá rātáhavyo mā^́nuṣo ná hótā

1.153.04a     utá vāṃ vikṣú mádiyāsu ándho
1.153.04b     gā^́va ā^́paś ca pīpayanta devī^́ḥ
1.153.04c     utó no asyá pūrviyáḥ pátir dán
1.153.04d     vītám pātám páyasa usríyāyāḥ

154

1.154.01a     víṣṇor nú kaṃ vīríyāṇi prá vocaṃ
1.154.01b     yáḥ pā^́rthivāni vimamé rájāṃsi
1.154.01c     yó áskabhāyad úttaraṃ sadhásthaṃ
1.154.01d     vicakramāṇás trẽdhórugāyáḥ

1.154.02a     prá tád víṣṇu stavate vīríyeṇa
1.154.02b     mr̥gó ná bhīmáḥ kucaró giriṣṭhā^́ḥ
1.154.02c     yásyorúṣu triṣú vikrámaṇeṣu
1.154.02d     adhikṣiyánti bhúvanāni víśvā

1.154.03a     prá víṣṇave · śūṣám etu mánma
1.154.03b     girikṣíta urugāyā^́ya vŕ̥ṣṇe
1.154.03c     yá idáṃ dīrghám práyataṃ sadhástham
1.154.03d     éko vimamé tribhír ít padébhiḥ

1.154.04a     yásya trī^́ pūrṇā^́ mádhunā padā^́ni
1.154.04b     ákṣīyamāṇā svadháyā mádanti
1.154.04c     yá u tridhā^́tu pr̥thivī^́m utá dyā^́m
1.154.04d     éko dādhā^́ra bhúvanāni víśvā

1.154.05a     tád asya priyám abhí pā^́tho aśyāṃ
1.154.05b     náro yátra devayávo mádanti
1.154.05c     urukramásya sá hí bándhur itthā^́
1.154.05d     víṣṇoḥ padé paramé mádhva útsaḥ

1.154.06a     tā^́ vāṃ vā^́stūni uśmasi gámadhyai
1.154.06b     yátra gā^́vo bhū^́riśr̥ṅgā ayā^́saḥ
1.154.06c     átrā^́ha tád urugāyásya vŕ̥ṣṇaḥ
1.154.06d     paramám padám áva bhāti bhū^́ri

155

1.155.01a     prá vaḥ pã^́ntam ándhaso dhiyāyaté
1.155.01b     mahé śū^́rāya víṣṇave ca arcata
1.155.01c     yā^́ sā^́nuni párvatānām ádābhiyā
1.155.01d     mahás tasthátur árvateva sādhúnā

1.155.02a     tveṣám itthā^́ samáraṇaṃ śímīvator
1.155.02b     índrāviṣṇū sutapā^́ vām uruṣyati
1.155.02c     yā^́ mártiyāya pratidhīyámānam ít
1.155.02d     kr̥śā^́nor ástur asanā^́m uruṣyáthaḥ

1.155.03a     tā^́ īṃ vardhanti máhi asya paúṃsiyaṃ
1.155.03b     ní mātárā nayati rétase bhujé
1.155.03c     dádhāti putró ávaram páram pitúr
1.155.03d     nā^́ma tr̥tī^́yam ádhi rocané diváḥ

1.155.04a     tát-tad íd asya paúṃsiyaṃ gr̥ṇīmasi
1.155.04b     inásya trātúr avr̥kásya mīḷhúṣaḥ
1.155.04c     yáḥ pā^́rthivāni tribhír íd vígāmabhir
1.155.04d     urú krámiṣṭa urugāyā^́ya jīváse

1.155.05a     duvé íd asya krámaṇe suvardŕ̥śo
1.155.05b     abhikhyā^́ya · mártiyo bhuraṇyati
1.155.05c     tr̥tī^́yam asya nákir ā^́ dadharṣati
1.155.05d     váyaś caná patáyantaḥ patatríṇaḥ

1.155.06a     catúrbhiḥ sākáṃ navatíṃ ca nā^́mabhiś
1.155.06b     cakráṃ ná vr̥ttáṃ viátīm̐r avīvipat
1.155.06c     br̥háccharīro vimímāna ŕ̥kvabhir
1.155.06d     yúvā^́kumāraḥ práti eti āhavám

156

1.156.01a     bhávā mitró ná śéviyo ghr̥tā^́sutir
1.156.01b     víbhūtadyumna evayā^́ u sapráthāḥ
1.156.01c     ádhā te viṣṇo vidúṣā cid árdhiya
1.156.01d     stómo yajñáś ca rā^́dhiyo havíṣmatā

1.156.02a     yáḥ pūrviyā^́ya vedháse návīyase
1.156.02b     sumájjānaye víṣṇave dádāśati
1.156.02c     yó jātám asya maható máhi brávat
1.156.02d     séd u śrávobhir yújiyaṃ cid abhy àsat

1.156.03a     tám u stotāraḥ pūrviyáṃ yáthā vidá
1.156.03b     r̥tásya gárbhaṃ janúṣā pipartana
1.156.03c     ā^́sya jānánto nā^́ma cid vivaktana
1.156.03d     mahás te viṣṇo sumatím bhajāmahe

1.156.04a     tám asya rā^́jā váruṇas tám aśvínā
1.156.04b     krátuṃ sacanta mā^́rutasya vedhásaḥ
1.156.04c     dādhā^́ra dákṣam uttamám aharvídaṃ
1.156.04d     vrajáṃ ca víṣṇuḥ sákhivām̐ aporṇuté

1.156.05a     ā^́ yó vivā^́ya sacáthāya daíviya
1.156.05b     índrāya víṣṇuḥ sukŕ̥te sukŕ̥ttaraḥ
1.156.05c     vedhā^́ ajinvat triṣadhasthá ā^́riyam
1.156.05d     r̥tásya bhāgé yájamānam ā^́bhajat

157

1.157.01a     ábodhi agnír jmá úd eti sū^́riyo
1.157.01b     ví uṣā^́ś candrā^́ mahí āvo arcíṣā
1.157.01c     ā^́yukṣātām aśvínā yā^́tave rátham
1.157.01d     prā^́sāvīd deváḥ savitā^́ jágat pŕ̥thak

1.157.02a     yád yuñjā^́the vŕ̥ṣaṇam aśvinā ráthaṃ
1.157.02b     ghr̥téna no mádhunā kṣatrám ukṣatam
1.157.02c     asmā^́kam bráhma pŕ̥tanāsu jinvataṃ
1.157.02d     vayáṃ dhánā śū^́rasātā bhajemahi

1.157.03a     arvā^́ṅ tricakró madhuvā^́hano rátho
1.157.03b     jīrā^́śuvo aśvínor yātu súṣṭutaḥ
1.157.03c     trivandhuró maghávā viśvásaubhagaḥ
1.157.03d     śáṃ na ā^́ vakṣad dvipáde cátuṣpade

1.157.04a     ā^́ na ū^́rjaṃ vahatam aśvinā yuvám
1.157.04b     mádhumatyā naḥ káśayā mimikṣatam
1.157.04c     prā^́yus tā^́riṣṭaṃ nī^́ rápāṃsi mr̥kṣataṃ
1.157.04d     sédhataṃ dvéṣo bhávataṃ sacābhúvā

1.157.05a     yuváṃ ha gárbhaṃ jágatīṣu dhattho
1.157.05b     yuváṃ víśveṣu bhúvaneṣu antáḥ
1.157.05c     yuvám agníṃ ca vr̥ṣaṇāv apáś ca
1.157.05d     vánaspátīm̐r aśvināv aírayethām

1.157.06a     yuváṃ ha stho bhiṣájā bheṣajébhir
1.157.06b     átho ha stho rathíyā rā^́thiyebhiḥ
1.157.06c     átho ha kṣatrám ádhi dhattha ugrā
1.157.06d     yó vāṃ havíṣmān mánasā dadā^́śa

158

1.158.01a     vásū rudrā^́ purumántū vr̥dhántā
1.158.01b     daśasyátaṃ no vr̥ṣaṇāv abhíṣṭau
1.158.01c     dásrā ha yád rékṇa aucathiyó vām
1.158.01d     prá yát sasrā^́the ákavābhir ūtī^́

1.158.02a     kó vāṃ dāśat sumatáye cid asyaí
1.158.02b     vásū yád dhéthe námasā padé góḥ
1.158.02c     jigr̥tám asmé revátīḥ púraṃdhīḥ
1.158.02d     kāmapréṇeva mánasā cárantā

1.158.03a     yuktó ha yád vāṃ taugriyā^́ya perúr
1.158.03b     ví mádhye · árṇaso dhā^́yi pajráḥ
1.158.03c     úpa vām ávaḥ śaraṇáṃ gameyaṃ
1.158.03d     śū^́ro ná ájma patáyadbhir évaiḥ

1.158.04a     úpastutir aucathiyám uruṣyen
1.158.04b     mā^́ mā^́m imé patatríṇī ví dugdhām
1.158.04c     mā^́ mā^́m édho dáśatayaś citó dhāk
1.158.04d     prá yád vām baddhás tmáni khā^́dati kṣā^́m

1.158.05a     ná mā garan nadíyo mātŕ̥tamā
1.158.05b     dāsā^́ yád īṃ súsamubdham avā^́dhuḥ
1.158.05c     śíro yád asya traitanó vitákṣat
1.158.05d     svayáṃ dāsá úro áṃsāv ápi gdha

1.158.06a     dīrghátamā māmateyó
1.158.06b     jujurvā^́n daśamé yugé
1.158.06c     apā^́m árthaṃ yatī^́nãm
1.158.06d     brahmā^́ bhavati sā^́rathiḥ

159

1.159.01a     prá dyā^́vā yajñaíḥ pr̥thivī^́ r̥tāvŕ̥dhā
1.159.01b     mahī^́ stuṣe vidátheṣu prácetasā
1.159.01c     devébhir yé deváputre sudáṃsasā
1.159.01d     itthā^́ dhiyā^́ vā^́riyāṇi prabhū^́ṣataḥ

1.159.02a     utá manye · pitúr adrúho máno
1.159.02b     mātúr máhi svátavas tád dhávīmabhiḥ
1.159.02c     surétasā pitárā bhū^́ma cakratur
1.159.02d     urú prajā^́yā amŕ̥taṃ várīmabhiḥ

1.159.03a     té sūnávaḥ suápasaḥ sudáṃsaso
1.159.03b     mahī^́ jajñur mātárā pūrvácittaye
1.159.03c     sthātúś ca satyáṃ jágataś ca dhármaṇi
1.159.03d     putrásya pāthaḥ padám ádvayāvinaḥ

1.159.04a     té māyíno mamire suprácetaso
1.159.04b     jāmī^́ sáyonī mithunā^́ sámokasā
1.159.04c     návyaṃ-navyaṃ tántum ā^́ tanvate diví
1.159.04d     samudré antáḥ kaváyaḥ sudītáyaḥ

1.159.05a     tád rā^́dho adyá savitúr váreṇiyaṃ
1.159.05b     vayáṃ devásya prasavé manāmahe
1.159.05c     asmábhyaṃ dyāvāpr̥thivī sucetúnā
1.159.05d     rayíṃ dhattaṃ vásumantaṃ śatagvínam

160

1.160.01a     té hí dyā^́vāpr̥thivī^́ viśváśambhuva
1.160.01b     r̥tā^́varī rájaso dhārayátkavī
1.160.01c     sujánmanī dhiṣáṇe antár īyate
1.160.01d     devó devī^́ dhármaṇā sū^́riyaḥ śúciḥ

1.160.02a     uruvyácasā mahínī asaścátā
1.160.02b     pitā^́ mātā^́ ca bhúvanāni rakṣataḥ
1.160.02c     sudhŕ̥ṣṭame vapuṣíye ná ródasī
1.160.02d     pitā^́ yát sīm abhí rūpaír ávāsayat

1.160.03a     sá váhniḥ putráḥ pitaróḥ⁺ pavítravān
1.160.03b     punā^́ti dhī^́ro bhúvanāni māyáyā
1.160.03c     dhenúṃ ca pŕ̥śniṃ vr̥ṣabháṃ surétasaṃ
1.160.03d     viśvā^́hā śukrám páyo asya dukṣata

1.160.04a     ayáṃ devā^́nām apásām apástamo
1.160.04b     yó jajā^́na ródasī viśváśambhuvā
1.160.04c     ví yó mamé rájasī sukratūyáyā
1.160.04d     ajárebhi skámbhanebhiḥ sám ānr̥ce

1.160.05a     té no gr̥ṇāné mahinī máhi śrávaḥ
1.160.05b     kṣatráṃ dyāvāpr̥thivī dhāsatho br̥hát
1.160.05c     yénābhí kr̥ṣṭī^́s tatánāma viśváhā
1.160.05d     panā^́yiyam ójo asmé sám invatam

161

1.161.01a     kím u śréṣṭhaḥ kíṃ yáviṣṭho na ā^́jagan
1.161.01b     kím īyate dūtíyaṃ kád yád ūcimá
1.161.01c     ná nindima camasáṃ yó mahākuló
1.161.01d     ágne bhrātar drúṇa íd bhūtím ūdima

1.161.02a     ékaṃ camasáṃ catúraḥ kr̥ṇotana
1.161.02b     tád vo devā^́ abruvan tád va ā^́gamam
1.161.02c     saúdhanvanā yádi evā^́ kariṣyátha
1.161.02d     sākáṃ devaír yajñíyāso bhaviṣyatha

1.161.03a     agníṃ dūtám práti yád ábravītana
1.161.03b     áśvaḥ kártvo rátha utéhá kártuvaḥ
1.161.03c     dhenúḥ kártvā yuvaśā^́ kártuvā duvā^́
1.161.03d     tā^́ni bhrātar ánu vaḥ kr̥tvī^́ émasi

1.161.04a     cakr̥vā^́ṃsa r̥bhavas tád apr̥chata
1.161.04b     kuvéd abhūd yáḥ syá dūtó na ā^́jagan
1.161.04c     yadā^́vā^́khyac camasā^́ñ catúraḥ kr̥tā^́n
1.161.04d     ā^́d ít tváṣṭā gnā^́su antár ní ānaje

1.161.05a     hánāmainām̐ íti tváṣṭā yád ábravīc
1.161.05b     camasáṃ yé devapā^́nam ánindiṣuḥ
1.161.05c     anyā^́ nā^́māni kr̥ṇvate suté sácām̐
1.161.05d     anyaír enān kaníyā nā^́mabhi sparat

1.161.06a     índro hárī yuyujé aśvínā rátham
1.161.06b     bŕ̥haspátir viśvárūpām úpājata
1.161.06c     r̥bhúr víbhvā vā^́jo devā^́m̐ agachata
1.161.06d     suápaso yajñíyam bhāgám aitana

1.161.07a     níś cármaṇo gā^́m ariṇīta dhītíbhir
1.161.07b     yā^́ járantā yuvaśā^́ tā^́kr̥ṇotana
1.161.07c     saúdhanvanā áśvād áśvam atakṣata
1.161.07d     yuktvā^́ rátham úpa devā^́m̐ ayātana

1.161.08a     idám udakám pibatéty abravītana
1.161.08b     idáṃ vā ghā pibatā muñjanéjanam
1.161.08c     saúdhanvanā yádi tán néva háryatha
1.161.08d     tr̥tī^́ye ghā sávane mādayādhuvai

1.161.09a     ā^́po bhū^́yiṣṭhā íti éko abravīd
1.161.09b     agnír bhū^́yiṣṭha íti anyó abravīt
1.161.09c     vadharyántīm bahúbhyaḥ praíko abravīd
1.161.09d     r̥tā^́ vádantaś camasā^́m̐ apiṃśata

1.161.10a     śroṇā^́m éka udakáṃ gā^́m ávājati
1.161.10b     māṃsám ékaḥ piṃśati sūnáyā^́bhr̥tam
1.161.10c     ā^́ nimrúcaḥ śákr̥d éko ápābharat
1.161.10d     kíṃ svit putrébhyaḥ pitárā úpāvatuḥ

1.161.11a     udvátsu asmā akr̥ṇotanā tŕ̥ṇaṃ
1.161.11b     nivátsu apáḥ suapasyáyā naraḥ
1.161.11c     ágohiyasya yád ásastanā gr̥hé
1.161.11d     tád adyédám r̥bhavo nā^́nu gachatha

1.161.12a     sammī^́lya yád bhúvanā paryásarpata
1.161.12b     kúva svit tātyā^́ pitárā va āsatuḥ
1.161.12c     áśapata yáḥ karásnaṃ va ādadé
1.161.12d     yáḥ prā^́bravīt pró tásmā abravītana

1.161.13a     suṣupvā^́ṃsa r̥bhavas tád apr̥chata
1.161.13b     ágohiya ká idáṃ no abūbudhat
1.161.13c     śvā^́nam bastó bodhayitā^́ram abravīt
1.161.13d     saṃvatsará idám adyā^́ ví akhyata

1.161.14a     divā^́ yānti marúto bhū^́miyāgnír
1.161.14b     ayáṃ vā^́to antárikṣeṇa yāti
1.161.14c     adbhír yāti · váruṇaḥ samudraír
1.161.14d     yuṣmā^́m̐ ichántaḥ śavaso napātaḥ

162

1.162.01a     mā^́ no mitró váruṇo aryamā^́yúr
1.162.01b     índra r̥bhukṣā^́ marútaḥ pári khyan
1.162.01c     yád vājíno devájātasya sápteḥ
1.162.01d     pravakṣyā^́mo vidáthe vīríyāṇi

1.162.02a     yán nirṇíjā rékṇasā prā^́vr̥tasya
1.162.02b     rātíṃ gr̥bhītā^́m mukható náyanti
1.162.02c     súprāṅ ajó mémiyad viśvárūpa
1.162.02d     indrāpūṣṇóḥ priyám ápy eti pā^́thaḥ

1.162.03a     eṣá chā^́gaḥ puró áśvena vājínā
1.162.03b     pūṣṇó bhāgó nīyate viśvádeviyaḥ
1.162.03c     abhipríyaṃ yát puroḷā^́śam árvatā
1.162.03d     tváṣṭéd enaṃ sauśravasā^́ya jinvati

1.162.04a     yád dhaviṣyàm r̥tuśó devayā^́naṃ
1.162.04b     trír mā^́nuṣāḥ pári áśvaṃ náyanti
1.162.04c     átrā pūṣṇáḥ prathamó bhāgá eti
1.162.04d     yajñáṃ devébhyaḥ prativedáyann ajáḥ

1.162.05a     hótādhvaryúr ā^́vayā agnimindhó
1.162.05b     grāvagrābhá utá śáṃstā súvipraḥ
1.162.05c     téna yajñéna súaraṃkr̥tena
1.162.05d     súiṣṭena vakṣáṇā ā^́ pr̥ṇadhvam

1.162.06a     yūpavraskā^́ utá yé yūpavāhā^́ś
1.162.06b     caṣā^́laṃ yé aśvayūpā^́ya tákṣati
1.162.06c     yé cā^́rvate pácanaṃ sambharánti
1.162.06d     utó téṣām abhígūrtir na invatu

1.162.07a     úpa prā^́gāt smán° me adhāyi mánma
1.162.07b     devā^́nām ā^́śā úpa vītápr̥ṣṭhaḥ
1.162.07c     ánv enaṃ víprā ŕ̥ṣayo madanti
1.162.07d     devā^́nām puṣṭé cakr̥mā subándhum

1.162.08a     yád vājíno dā^́ma saṃdā^́nam árvato
1.162.08b     yā^́ śīrṣaṇyā^̀ raśanā^́ rájjur asya
1.162.08c     yád vā ghāsya prábhr̥tam āsíye tŕ̥ṇaṃ
1.162.08d     sárvā tā^́ te ápi devéṣu astu

1.162.09a     yád áśvasya kravíṣo mákṣikā^́śa
1.162.09b     yád vā svárau svádhitau riptám ásti
1.162.09c     yád dhástayoḥ śamitúr yán nakhéṣu
1.162.09d     sárvā tā^́ te ápi devéṣu astu

1.162.10a     yád ū^́vadhyam udárasyāpavā^́ti
1.162.10b     yá āmásya kravíṣo gandhó ásti
1.162.10c     sukr̥tā^́ tác chamitā^́raḥ kr̥ṇvantu
1.162.10d     utá médhaṃ śr̥tapā^́kam pacantu

1.162.11a     yát te gā^́trād agnínā pacyámānād
1.162.11b     abhí śū^́laṃ níhatasyāvadhā^́vati
1.162.11c     mā^́ tád bhū^́myām ā^́ śriṣan mā^́ tŕ̥ṇeṣu
1.162.11d     devébhyas tád uśádbhyo rātám astu

1.162.12a     yé vājínam paripáśyanti pakváṃ
1.162.12b     yá īm āhúḥ surabhír nír haréti
1.162.12c     yé cā^́rvato māṃsabhikṣā^́m upā^́sata
1.162.12d     utó téṣām abhígūrtir na invatu

1.162.13a     yán nī^́kṣaṇam māṃspácanyā ukhā^́yā
1.162.13b     yā^́ pā^́trāṇi yūṣṇá āsécanāni
1.162.13c     ūṣmaṇíyā apidhā^́nā carūṇā^́m
1.162.13d     aṅkā^́ḥ sūnā^́ḥ pári bhūṣanti áśvam

1.162.14a     nikrámaṇaṃ niṣádanaṃ vivártanaṃ
1.162.14b     yác ca páḍbīśam árvataḥ
1.162.14c     yác ca papaú yác ca ghāsíṃ jaghā^́sa
1.162.14d     sárvā tā^́ te ápi devéṣu astu

1.162.15a     mā^́ tuvāgnír dhvanayīd dhūmágandhir
1.162.15b     mókhā^́ bhrā^́janti abhí vikta jághriḥ
1.162.15c     iṣṭáṃ vītám abhígūrtaṃ váṣaṭkr̥taṃ
1.162.15d     táṃ devā^́saḥ práti gr̥bhṇanti áśvam

1.162.16a     yád áśvāya vā^́sa upastr̥ṇánti
1.162.16b     adhīvāsáṃ yā^́ híraṇyāni asmai
1.162.16c     saṃdā^́nam árvantam páḍbīśam
1.162.16d     priyā^́ devéṣu ā^́ yāmayanti

1.162.17a     yát te sādé máhasā śū^́kr̥tasya
1.162.17b     pā^́rṣṇiyā vā káśayā vā tutóda
1.162.17c     srucéva tā^́ havíṣo adhvaréṣu
1.162.17d     sárvā tā^́ te bráhmaṇā sūdayāmi

1.162.18a     cátustriṃśad vājíno devábandhor
1.162.18b     váṅkrīr áśvasya svádhitiḥ sám eti
1.162.18c     áchidrā gā^́trā vayúnā kr̥ṇota
1.162.18d     páruṣ-parur anughúṣyā ví śasta

1.162.19a     ékas tváṣṭur áśuvasyā viśastā^́
1.162.19b     duvā^́ yantā^́rā bhavatas tátha rtúḥ
1.162.19c     yā^́ te gā^́trāṇām r̥tuthā^́ kr̥ṇómi
1.162.19d     tā^́-tā píṇḍānām prá juhomi agnaú

1.162.20a     mā^́ tvā tapat priyá ātmā^́piyántam
1.162.20b     mā^́ svádhitis tanvà ā^́ tiṣṭhipat te
1.162.20c     mā^́ te gr̥dhnúr aviśastā^́tihā^́ya
1.162.20d     chidrā^́ gā^́trāṇi asínā míthū kaḥ

1.162.21a     ná vā^́ u etán mriyase ná riṣyasi
1.162.21b     devā^́m̐ íd eṣi pathíbhiḥ sugébhiḥ
1.162.21c     hárī te yúñjā pŕ̥ṣatī abhūtām
1.162.21d     úpāsthād vājī^́ dhurí rā^́sabhasya

1.162.22a     sugáviyaṃ no vājī^́ suáśviyam
1.162.22b     puṃsáḥ putrā^́m̐ utá viśvāpúṣaṃ rayím
1.162.22c     anāgāstváṃ no áditiḥ kr̥ṇotu
1.162.22d     kṣatráṃ no áśvo vanatāṃ havíṣmān

163

1.163.01a     yád ákrandaḥ prathamáṃ jā^́yamāna
1.163.01b     udyán samudrā^́d utá vā púrīṣāt
1.163.01c     śyenásya pakṣā^́ hariṇásya bāhū^́
1.163.01d     upastútyam máhi jātáṃ te arvan

1.163.02a     yaména dattáṃ tritá enam āyunag
1.163.02b     índra eṇam prathamó ádhy atiṣṭhat
1.163.02c     gandharvó asya raśanā^́m agr̥bhṇāt
1.163.02d     sū^́rād áśvaṃ vasavo nír ataṣṭa

1.163.03a     ási yamó ási ādityó arvann
1.163.03b     ási tritó gúhiyena vraténa
1.163.03c     ási sómena samáyā vípr̥kta
1.163.03d     āhús te trī^́ṇi diví bándhanāni

1.163.04a     trī^́ṇi ta āhur diví bándhanāni
1.163.04b     trī^́ṇi apsú trī^́ṇi antáḥ samudré
1.163.04c     utéva me váruṇaś chantsi arvan
1.163.04d     yátrā ta āhúḥ paramáṃ janítram

1.163.05a     imā^́ te vājinn avamā^́rjanāni
1.163.05b     imā^́ śaphā^́nāṃ sanitúr nidhā^́nā
1.163.05c     átrā te bhadrā^́ raśanā^́ apaśyam
1.163.05d     r̥tásya yā^́ abhirákṣanti gopā^́ḥ

1.163.06a     ātmā^́naṃ te mánasārā^́d ajānām
1.163.06b     avó divā^́ patáyantam pataṃgám
1.163.06c     śíro apaśyam pathíbhiḥ sugébhir
1.163.06d     areṇúbhir jéhamānam patatrí

1.163.07a     átrā te rūpám uttamám apaśyaṃ
1.163.07b     jígīṣamāṇam iṣá ā^́ padé góḥ
1.163.07c     yadā^́ te márto ánu bhógam ā^́naḷ
1.163.07d     ā^́d íd grásiṣṭha óṣadhīr ajīgaḥ

1.163.08a     ánu tvā rátho ánu máryo arvann
1.163.08b     ánu gā^́vo ánu bhágaḥ kanī^́nām
1.163.08c     ánu vrā^́tāsas táva sakhyám īyur
1.163.08d     ánu devā^́ mamire vīríyaṃ te

1.163.09a     híraṇyaśr̥ṅgo áyo asya pā^́dā
1.163.09b     mánojavā ávara índra āsīt
1.163.09c     devā^́ íd asya havirádyam āyan
1.163.09d     yó árvantam prathamó adhyátiṣṭhat

1.163.10a     īrmā^́ntāsaḥ sílikamadhyamāsaḥ
1.163.10b     sáṃ śū^́raṇāso diviyā^́so átyāḥ
1.163.10c     haṃsā^́ iva śrayaṇiśó yatante
1.163.10d     yád ā^́kṣiṣur diviyám ájmam áśvāḥ

1.163.11a     táva śárīram patayiṣṇú arvan
1.163.11b     táva cittáṃ vā^́ta iva dhrájīmān
1.163.11c     táva śŕ̥ṅgāṇi víṣṭhitā purutrā^́
1.163.11d     áraṇyeṣu járbhurāṇā caranti

1.163.12a     úpa prā^́gāc chásanaṃ vājī^́ árvā
1.163.12b     devadrī^́cā mánasā dī^́dhiyānaḥ
1.163.12c     ajáḥ puró nīyate nā^́bhir asya
1.163.12d     ánu paścā^́t kaváyo yanti rebhā^́ḥ

1.163.13a     úpa prā^́gāt paramáṃ yát sadhástham
1.163.13b     árvām̐ áchā pitáram mātáraṃ ca
1.163.13c     adyā^́ devā^́ñ júṣṭatamo hí gamyā^́
1.163.13d     áthā^́ śāste dāśúṣe vā^́riyāṇi

164

1.164.01a     asyá vāmásya palitásya hótus
1.164.01b     tásya bhrā^́tā madhyamó asti áśnaḥ
1.164.01c     tr̥tī^́yo bhrā^́tā ghr̥tápr̥ṣṭho asya
1.164.01d     átrāpaśyaṃ viśpátiṃ saptáputram

1.164.02a     saptá yuñjanti rátham ékacakram
1.164.02b     éko áśvo vahati saptánāmā
1.164.02c     trinā^́bhi cakrám ajáram anarváṃ
1.164.02d     yátremā^́ víśvā bhúvanā^́dhi tasthúḥ

1.164.03a     imáṃ rátham ádhi yé saptá tasthúḥ
1.164.03b     saptácakraṃ saptá vahanti áśvāḥ
1.164.03c     saptá svásāro abhí sáṃ navante
1.164.03d     yátra gávāṃ níhitā saptá nā^́ma

1.164.04a     kó dadarśa prathamáṃ jā^́yamānam
1.164.04b     asthanvántaṃ yád anasthā^́ bíbharti
1.164.04c     bhū^́myā ásur ásr̥g ātmā^́ kúva svit
1.164.04d     kó vidvā^́ṃsam úpa gāt práṣṭum etát

1.164.05a     pā^́kaḥ pr̥chāmi mánasā^́vijānan
1.164.05b     devā^́nām enā^́ níhitā padā^́ni
1.164.05c     vatsé baṣkáye ádhi saptá tántūn
1.164.05d     ví tatnire kaváya ótavā^́ u

1.164.06a     ácikitvāñ cikitúṣaś cid átra
1.164.06b     kavī^́n pr̥chāmi vidmáne ná vidvā^́n
1.164.06c     ví yás tastámbha ṣáḷ imā^́ rájāṃsi
1.164.06d     ajásya rūpé kím ápi svid ékam

1.164.07a     ihá bravītu yá īm aṅgá véda
1.164.07b     asyá vāmásya níhitam padáṃ véḥ
1.164.07c     śīrṣṇáḥ kṣīráṃ duhrate gā^́vo asya
1.164.07d     vavríṃ vásānā udakám padā^́puḥ

1.164.08a     mātā^́ pitáram r̥tá ā^́ babhāja
1.164.08b     dhīti ágre mánasā sáṃ hí jagmé
1.164.08c     sā^́ bībhatsúr gárbharasā níviddhā
1.164.08d     námasvanta íd upavākám īyuḥ

1.164.09a     yuktā^́ mātā^́sīd dhurí dákṣiṇāyā
1.164.09b     átiṣṭhad gárbho vr̥janī^́ṣu antáḥ
1.164.09c     ámīmed vatsó ánu gā^́m apaśyad
1.164.09d     viśvarūpíyaṃ triṣú yójaneṣu

1.164.10a     tisró mātr̥̄^́s trī^́n pitr̥̄^́n bíbhrad éka
1.164.10b     ūrdhvás tasthau ném áva glāpayanti
1.164.10c     mantráyante divó amúṣya pr̥ṣṭhé
1.164.10d     viśvavídaṃ vā^́cam áviśvaminvām

1.164.11a     duvā^́daśāraṃ nahí táj járāya
1.164.11b     várvarti cakrám pári dyā^́m r̥tásya
1.164.11c     ā^́ putrā^́ agne mithunā^́so átra
1.164.11d     saptá śatā^́ni viṃśatíś ca tasthuḥ

1.164.12a     páñcapādam pitáraṃ dvā^́daśākr̥tiṃ
1.164.12b     divá āhuḥ páre árdhe purīṣíṇam
1.164.12c     áthemé anyá úpare vicakṣaṇáṃ
1.164.12d     saptácakre ṣáḷara āhur árpitam

1.164.13a     páñcāre cakré parivártamāne
1.164.13b     tásminn ā^́ tasthur bhúvanāni víśvā
1.164.13c     tásya nā^́kṣas tapyate bhū^́ribhāraḥ
1.164.13d     sanā^́d evá ná śīryate sánābhiḥ

1.164.14a     sánemi cakrám ajáraṃ ví vāvr̥ta
1.164.14b     uttānā^́yāṃ dáśa yuktā^́ vahanti
1.164.14c     sū^́ryasya cákṣū rájasaiti ā^́vr̥taṃ
1.164.14d     tásminn ā^́rpitā bhúvanāni víśvā

1.164.15a     sākaṃjā^́nāṃ saptátham āhur ekajáṃ
1.164.15b     ṣáḷ íd yamā^́ ŕ̥ṣayo devajā^́ íti
1.164.15c     téṣām iṣṭā^́ni víhitāni dhāmaśá
1.164.15d     sthātré rejante víkr̥tāni rūpaśáḥ

1.164.16a     stríyaḥ satī^́s tā^́m̐ u me puṃsá āhuḥ
1.164.16b     páśyad akṣaṇvā^́n ná ví cetad andháḥ
1.164.16c     kavír yáḥ putráḥ sá īm ā^́ ciketa
1.164.16d     yás tā^́ vijānā^́t sá pitúṣ pitā^́sat

1.164.17a     aváḥ páreṇa pará enā^́vareṇa
1.164.17b     padā^́ vatsám bíbhratī gaúr úd asthāt
1.164.17c     sā^́ kadrī^́cī káṃ svid árdham párāgāt
1.164.17d     kúva svit sūte nahí yūthé antáḥ

1.164.18a     aváḥ páreṇa pitáraṃ yó asya
1.164.18b     anuvéda pará enā^́vareṇa
1.164.18c     kavīyámānaḥ ká ihá prá vocad
1.164.18d     devám mánaḥ kúto ádhi prájātam

1.164.19a     yé arvā^́ñcas tā^́m̐ u párāca āhur
1.164.19b     yé párāñcas tā^́m̐ u arvā^́ca āhuḥ
1.164.19c     índraś ca yā^́ cakráthuḥ soma tā^́ni
1.164.19d     dhurā^́ ná yuktā^́ rájaso vahanti

1.164.20a     duvā^́ suparṇā^́ sayújā sákhāyā
1.164.20b     samānáṃ vr̥kṣám pári ṣasvajāte
1.164.20c     táyor anyáḥ píppalaṃ svādú átti
1.164.20d     ánaśnann anyó abhí cākaśīti

1.164.21a     yátrā suparṇā^́ amŕ̥tasya bhāgám
1.164.21b     ánimeṣaṃ vidáthābhisváranti
1.164.21c     inó víśvasya bhúvanasya gopā^́ḥ
1.164.21d     sá mā dhī^́raḥ pā^́kam átrā^́ viveśa

1.164.22a     yásmin vr̥kṣé madhuádaḥ suparṇā^́
1.164.22b     niviśánte súvate cā^́dhi víśve
1.164.22c     tásyéd āhuḥ píppalaṃ svādú ágre
1.164.22d     tán nón naśad yáḥ pitáraṃ ná véda

1.164.23a     yád gāyatré ádhi gāyatrám ā^́hitaṃ
1.164.23b     traíṣṭubhād vā traíṣṭubhaṃ nirátakṣata
1.164.23c     yád vā jágaj jágati ā^́hitam padáṃ
1.164.23d     yá ít tád vidús té amr̥tatvám ānaśuḥ

1.164.24a     gāyatréṇa práti mimīte arkám
1.164.24b     arkéṇa sā^́ma traíṣṭubhena vākám
1.164.24c     vākéna vākáṃ dvipádā cátuṣpadā
1.164.24d     akṣáreṇa mimate saptá vā^́ṇīḥ

1.164.25a     jágatā síndhuṃ diví astabhāyad
1.164.25b     rathaṃtaré sū^́riyam páry apaśyat
1.164.25c     gāyatrásya samídhas tisrá āhus
1.164.25d     táto mahnā^́ prá ririce mahitvā^́

1.164.26a     úpa hvaye sudúghāṃ dhenúm etā^́ṃ
1.164.26b     suhásto godhúg utá dohad enām
1.164.26c     śréṣṭhaṃ saváṃ savitā^́ sāviṣan no
1.164.26d     abhī^́ddho gharmás tád u ṣú prá vocam

1.164.27a     hiṅkr̥ṇvatī^́ vasupátnī vásūnāṃ
1.164.27b     vatsám ichántī mánasābhi ā^́gāt
1.164.27c     duhā^́m aśvíbhyām páyo aghniyéyáṃ
1.164.27d     sā^́ vardhatām mahaté saúbhagāya

1.164.28a     gaúr amīmed ánu vatsám miṣántam
1.164.28b     mūrdhā^́naṃ híṅṅ akr̥ṇon mā^́tavā^́ u
1.164.28c     sŕ̥kvāṇaṃ gharmám abhí vāvaśānā^́
1.164.28d     mímāti māyúm páyate páyobhiḥ

1.164.29a     ayáṃ sá śiṅkte yéna gaúr abhī^́vr̥tā
1.164.29b     mímāti māyúṃ dhvasánāv ádhi śritā^́
1.164.29c     sā^́ cittíbhir ní hí cakā^́ra mártiyaṃ
1.164.29d     vidyúd bhávantī práti vavrím auhata

1.164.30a     anác chaye · turágātu jīvám
1.164.30b     éjad dhruvám mádhya ā^́ pastíyānām
1.164.30c     jīvó mr̥tásya carati svadhā^́bhir
1.164.30d     ámartiyo mártiyenā sáyoniḥ

1.164.31a     ápaśyaṃ gopā^́m ánipadyamānam
1.164.31b     ā^́ ca párā ca pathíbhiś cárantam
1.164.31c     sá sadhrī^́cīḥ sá víṣūcīr vásāna
1.164.31d     ā^́ varīvarti bhúvaneṣu antáḥ

1.164.32a     yá īṃ cakā^́ra ná só asyá veda
1.164.32b     yá īṃ dadárśa hírug ín nú tásmāt
1.164.32c     sá mātúr yónā párivīto antár
1.164.32d     bahuprajā^́ nírr̥tim ā^́ viveśa

1.164.33a     dyaúr me pitā^́ janitā^́ nā^́bhir átra
1.164.33b     bándhur me mātā^́ pr̥thivī^́ mahī^́yám
1.164.33c     uttānáyoś camúvor yónir antár
1.164.33d     átrā pitā^́ duhitúr gárbham ā^́dhāt

1.164.34a     pr̥chā^́mi tvā páram ántam pr̥thivyā^́ḥ
1.164.34b     pr̥chā^́mi yátra bhúvanasya nā^́bhiḥ
1.164.34c     pr̥chā^́mi tvā vŕ̥ṣṇo áśvasya rétaḥ
1.164.34d     pr̥chā^́mi vācáḥ paramáṃ víoma

1.164.35a     iyáṃ védiḥ páro ántaḥ pr̥thivyā^́
1.164.35b     ayáṃ yajñó · bhúvanasya nā^́bhiḥ
1.164.35c     ayáṃ sómo vŕ̥ṣṇo áśvasya réto
1.164.35d     brahmā^́yáṃ vācáḥ paramáṃ víoma

1.164.36a     saptā^́rdhagarbhā^́ bhúvanasya réto
1.164.36b     víṣṇos tiṣṭhanti pradíśā vídharmaṇi
1.164.36c     té dhītíbhir mánasā té vipaścítaḥ
1.164.36d     paribhúvaḥ pári bhavanti viśvátaḥ

1.164.37a     ná ví jānāmi yád ivedám ásmi
1.164.37b     niṇyáḥ sáṃnaddho mánasā carāmi
1.164.37c     yadā^́ mā^́gan prathamajā^́ r̥tásya
1.164.37d     ā^́d íd vācó aśnuve bhāgám asyā^́ḥ

1.164.38a     ápāṅ prā^́ṅ eti svadháyā gr̥bhītó
1.164.38b     ámartiyo mártiyenā sáyoniḥ
1.164.38c     tā^́ śáśvantā viṣūcī^́nā viyántā
1.164.38d     ní anyáṃ cikyúr ná ní cikyur anyám

1.164.39a     r̥có akṣáre paramé víoman
1.164.39b     yásmin devā^́ ádhi víśve niṣedúḥ
1.164.39c     yás tán ná véda kím r̥cā^́ kariṣyati
1.164.39d     yá ít tád vidús tá imé sám āsate

1.164.40a     sūyavasā^́d bhágavatī hí bhūyā^́
1.164.40b     átho vayám bhágavantaḥ siyāma
1.164.40c     addhí tŕ̥ṇam aghniye viśvadā^́nīm
1.164.40d     píba śuddhám udakám ācárantī

1.164.41a     gaurī^́r mimāya salilā^́ni tákṣatī
1.164.41b     ékapadī dvipádī sā^́ cátuṣpadī
1.164.41c     aṣṭā^́padī návapadī babhūvúṣī
1.164.41d     sahásrākṣarā paramé víoman

1.164.42a     tásyāḥ samudrā^́ ádhi ví kṣaranti
1.164.42b     téna jīvanti pradíśaś cátasraḥ
1.164.42c     tátaḥ kṣarati akṣáraṃ
1.164.42d     tád víśvam úpa jīvati

1.164.43a     śakamáyaṃ dhūmám ārā^́d apaśyaṃ
1.164.43b     viṣūvátā pará enā^́vareṇa
1.164.43c     ukṣā^́ṇam pŕ̥śnim apacanta vīrā^́s
1.164.43d     tā^́ni dhármāṇi prathamā^́ni āsan

1.164.44a     tráyaḥ keśína r̥tuthā^́ ví cakṣate
1.164.44b     saṃvatsaré vapata éka eṣām
1.164.44c     víśvam éko abhí caṣṭe śácībhir
1.164.44d     dhrā^́jir ékasya dadr̥śe ná rūpám

1.164.45a     catvā^́ri vā^́k párimitā padā^́ni
1.164.45b     tā^́ni vidur brāhmaṇā^́ yé manīṣíṇaḥ
1.164.45c     gúhā trī^́ṇi níhitā néṅgayanti
1.164.45d     turī^́yaṃ vācó manuṣyā^̀ vadanti

1.164.46a     índram mitráṃ váruṇam agním āhur
1.164.46b     átho divyáḥ sá suparṇó garútmān
1.164.46c     ékaṃ sád víprā bahudhā^́ vadanti
1.164.46d     agníṃ yamám mātaríśvānam āhuḥ

1.164.47a     kr̥ṣṇáṃ niyā^́naṃ hárayaḥ suparṇā^́
1.164.47b     apó vásānā dívam út patanti
1.164.47c     tá ā^́vavr̥tran sádanād r̥tásya
1.164.47d     ā^́d íd ghr̥téna pr̥thivī^́ ví udyate

1.164.48a     duvā^́daśa pradháyaś cakrám ékaṃ
1.164.48b     trī^́ṇi nábhyāni ká u tác ciketa
1.164.48c     tásmin sākáṃ · triśatā^́ ná śaṅkávo
1.164.48d     arpitā^́ḥ ṣaṣṭír ná calācalā^́saḥ

1.164.49a     yás te stánaḥ śaśayó yó mayobhū^́r
1.164.49b     yéna víśvā púṣyasi vā^́riyāṇi
1.164.49c     yó ratnadhā^́ vasuvíd yáḥ sudátraḥ
1.164.49d     sárasvati tám ihá dhā^́tave kaḥ

1.164.50a     yajñéna yajñám ayajanta devā^́s
1.164.50b     tā^́ni dhármāṇi prathamā^́ni āsan
1.164.50c     té ha nā^́kam mahimā^́naḥ sacanta
1.164.50d     yátra pū^́rve sādhiyā^́ḥ sánti devā^́ḥ

1.164.51a     samānám etád udakám
1.164.51b     úc caíti áva cā^́habhiḥ
1.164.51c     bhū^́mim parjányā jínvanti
1.164.51d     dívaṃ jinvanti agnáyaḥ

1.164.52a     divyáṃ suparṇáṃ vāyasám br̥hántam
1.164.52b     apā^́ṃ gárbhaṃ darśatám óṣadhīnām
1.164.52c     abhīpató vr̥ṣṭíbhis tarpáyantaṃ
1.164.52d     sárasvantam ávase johavīmi

165

1.165.01a     káyā śubhā^́ sávayasaḥ sánīḷāḥ
1.165.01b     samāniyā^́ marútaḥ sám mimikṣuḥ
1.165.01c     káyā matī^́ kúta étāsa eté
1.165.01d     árcanti śúṣmaṃ vŕ̥ṣaṇo vasūyā^́

1.165.02a     kásya bráhmāṇi jujuṣur yúvānaḥ
1.165.02b     kó adhvaré marúta ā^́ vavarta
1.165.02c     śyenā^́m̐ iva dhrájato antárikṣe
1.165.02d     kéna mahā^́ mánasā rīramāma

1.165.03a     kútas tuvám indara⁺ mā^́hinaḥ sánn
1.165.03b     éko yāsi satpate kíṃ ta itthā^́
1.165.03c     sám pr̥chase samarāṇáḥ śubhānaír
1.165.03d     vocés tán no harivo yát te asmé

1.165.04a     bráhmāṇi me matáyaḥ śáṃ sutā^́saḥ
1.165.04b     śúṣma iyarti prábhr̥to me ádriḥ
1.165.04c     ā^́ śāsate práti haryanti ukthā^́
1.165.04d     imā^́ hárī vahatas tā^́ no ácha

1.165.05a     áto vayám antamébhir yujānā^́ḥ
1.165.05b     svákṣatrebhis tanúvaḥ śúmbhamānāḥ
1.165.05c     máhobhir étām̐ úpa yujmahe nú
1.165.05d     índra svadhā^́m ánu hí no babhū^́tha

1.165.06a     kúva syā^́ vo marutaḥ svadhā^́ āsīd
1.165.06b     yán mā^́m ékaṃ samádhattāhihátye
1.165.06c     aháṃ hí ūgrás taviṣás túviṣmān
1.165.06d     víśvasya śátror ánamaṃ vadhasnaíḥ

1.165.07a     bhū^́ri cakartha yújiyebhir asmé
1.165.07b     samānébhir vr̥ṣabha paúṃsiyebhiḥ
1.165.07c     bhū^́rīṇi hí kr̥ṇávāmā śaviṣṭha
1.165.07d     índra krátvā maruto yád váśāma

1.165.08a     vádhīṃ vr̥trám maruta indriyéṇa
1.165.08b     svéna bhā^́mena taviṣó babhūvā^́n
1.165.08c     ahám etā^́ mánave viśváścandrāḥ
1.165.08d     sugā^́ apáś cakara vájrabāhuḥ

1.165.09a     ánuttam ā^́ te maghavan nákir nú
1.165.09b     ná tvā^́vām̐ asti devátā vídānaḥ
1.165.09c     ná jā^́yamāno náśate ná jātó
1.165.09d     yā^́ni kariṣyā^́ kr̥ṇuhí pravr̥ddha

1.165.10a     ékasya cin me vibhú astu ójo
1.165.10b     yā^́ nú dadhr̥ṣvā^́n kr̥ṇávai manīṣā^́
1.165.10c     aháṃ hí ūgró maruto vídāno
1.165.10d     yā^́ni cyávam índra íd īśa eṣām

1.165.11a     ámandan mā maruta stómo átra
1.165.11b     yán me naraḥ śrútiyam bráhma cakrá
1.165.11c     índrāya vŕ̥ṣṇe súmakhāya máhyaṃ
1.165.11d     sákhye sákhāyas tanúve tanū^́bhiḥ

1.165.12a     evéd eté práti mā rócamānā
1.165.12b     ánediyaḥ śráva éṣo dádhānāḥ
1.165.12c     saṃcákṣiyā marutaś candrávarṇā
1.165.12d     áchānta me chadáyāthā ca nūnám

1.165.13a     kó nú átra maruto māmahe vaḥ
1.165.13b     prá yātana sákhīm̐r áchā sakhāyaḥ
1.165.13c     mánmāni citrā apivātáyanta
1.165.13d     eṣā^́m bhūta návedā ma r̥tā^́nām

1.165.14a     ā^́ yád duvasyā^́d duváse ná kārúr
1.165.14b     asmā^́ñ cakré · māniyásya medhā^́
1.165.14c     ó ṣú vartta maruto vípram ácha
1.165.14d     imā^́ bráhmāṇi jaritā^́ vo arcat

1.165.15a     eṣá va stómo maruta iyáṃ gī^́r
1.165.15b     māndāriyásya māniyásya kāróḥ
1.165.15c     ā^́ iṣā^́ yāsīṣṭa tanúve vayā^́ṃ
1.165.15d     vidyā^́meṣáṃ vr̥jánaṃ jīrádānum

166

1.166.01a     tán nú vocāma rabhasā^́ya jánmane
1.166.01b     pū^́rvam mahitváṃ vr̥ṣabhásya ketáve
1.166.01c     aidhéva yā^́man marutas tuviṣvaṇo
1.166.01d     yudhéva śakrās taviṣā^́ṇi kartana

1.166.02a     nítyaṃ ná sūnúm mádhu bíbhrata úpa
1.166.02b     krī^́ḷanti krīḷā^́ vidátheṣu ghŕ̥ṣvayaḥ
1.166.02c     nákṣanti rudrā^́ ávasā namasvínaṃ
1.166.02d     ná mardhanti svátavaso haviṣkŕ̥tam

1.166.03a     yásmā ū^́māso amŕ̥tā árāsata
1.166.03b     rāyás póṣaṃ ca havíṣā dadāśúṣe
1.166.03c     ukṣánti asmai marúto hitā^́ iva
1.166.03d     purū^́ rájāṃsi páyasā mayobhúvaḥ

1.166.04a     ā^́ yé rájāṃsi táviṣībhir ávyata
1.166.04b     prá va évāsaḥ sváyatāso adhrajan
1.166.04c     bháyante víśvā bhúvanāni harmiyā^́
1.166.04d     citró vo yā^́maḥ práyatāsu r̥ṣṭíṣu

1.166.05a     yát tveṣáyāmā nadáyanta párvatān
1.166.05b     divó vā pr̥ṣṭháṃ náriyā ácucyavuḥ
1.166.05c     víśvo vo ájman bhayate vánaspátī
1.166.05d     rathīyántīva prá jihīta óṣadhiḥ

1.166.06a     yūyáṃ na ugrā marutaḥ sucetúnā
1.166.06b     áriṣṭagrāmāḥ sumatím pipartana
1.166.06c     yátrā vo didyúd rádati krívirdatī
1.166.06d     riṇā^́ti paśváḥ súdhiteva barháṇā

1.166.07a     prá skambhádeṣṇā anavabhrárādhaso
1.166.07b     alātr̥ṇā^́so vidátheṣu súṣṭutāḥ
1.166.07c     árcanti arkám madirásya pītáye
1.166.07d     vidúr vīrásya prathamā^́ni paúṃsiyā

1.166.08a     śatábhujibhis tám abhíhruter aghā^́t
1.166.08b     pūrbhī^́ rakṣatā maruto yám ā^́vata
1.166.08c     jánaṃ yám ugrās tavaso virapśinaḥ
1.166.08d     pāthánā śáṃsāt tánayasya puṣṭíṣu

1.166.09a     víśvāni bhadrā^́ maruto rátheṣu vo
1.166.09b     mithaspŕ̥dhyeva taviṣā^́ṇi ā^́hitā
1.166.09c     áṃseṣu ā^́ vaḥ prápatheṣu khādáyo
1.166.09d     ákṣo vaś cakrā^́ samáyā ví vāvr̥te

1.166.10a     bhū^́rīṇi bhadrā^́ náriyeṣu bāhúṣu
1.166.10b     vákṣassu rukmā^́ rabhasā^́so añjáyaḥ
1.166.10c     áṃseṣu étāḥ pavíṣu kṣurā^́ ádhi
1.166.10d     váyo ná pakṣā^́n ví ánu śríyo dhire

1.166.11a     mahā^́nto mahnā^́ vibhúvo víbhūtayo
1.166.11b     dūredŕ̥śo yé diviyā^́ iva stŕ̥bhiḥ
1.166.11c     mandrā^́ḥ sujihvā^́ḥ sváritāra āsábhiḥ
1.166.11d     sámmiślā índre marútaḥ pariṣṭúbhaḥ

1.166.12a     tád vaḥ sujātā maruto mahitvanáṃ
1.166.12b     dīrgháṃ vo dātrám áditer iva vratám
1.166.12c     índraś caná tyájasā ví hruṇāti táj
1.166.12d     jánāya yásmai sukŕ̥te árādhuvam

1.166.13a     tád vo jāmitvám marutaḥ páre yugé
1.166.13b     purū^́ yác cháṃsam amŕ̥tāsa ā^́vata
1.166.13c     ayā^́ dhiyā^́ mánave śruṣṭím ā^́viyā
1.166.13d     sākáṃ náro daṃsánair ā^́ cikitrire

1.166.14a     yéna dīrghám marutaḥ śūśávāma
1.166.14b     yuṣmā^́kena párīṇasā turāsaḥ
1.166.14c     ā^́ yát tatánan vr̥jáne jánāsa
1.166.14d     ebhír yajñébhis tád abhī^́ṣṭim aśyām

1.166.15a     eṣá va stómo maruta iyáṃ gī^́r
1.166.15b     māndāriyásya māniyásya kāróḥ
1.166.15c     ā^́ iṣā^́ yāsīṣṭa tanúve vayā^́ṃ
1.166.15d     vidyā^́meṣáṃ vr̥jánaṃ jīrádānum

167

1.167.01a     sahásraṃ ta indara⁺ ūtáyo naḥ
1.167.01b     sahásram íṣo harivo gūrtátamāḥ
1.167.01c     sahásraṃ · rã^́yo mādayádhyai
1.167.01d     sahasríṇa úpa no yantu vā^́jāḥ

1.167.02a     ā^́ nó 'vobhir marúto yāntu áchā
1.167.02b     jyéṣṭhebhir vā br̥háddivaiḥ sumāyā^́ḥ
1.167.02c     ádha yád eṣāṃ niyútaḥ paramā^́ḥ
1.167.02d     samudrásya cid dhanáyanta pāré

1.167.03a     mimyákṣa yéṣu súdhitā ghr̥tā^́cī
1.167.03b     híraṇyanirṇig úparā ná r̥ṣṭíḥ
1.167.03c     gúhā cárantī mánuṣo ná yóṣā
1.167.03d     sabhā^́vatī vidathíyeva sáṃ vā^́k

1.167.04a     párā śubhrā^́ ayã^́so yavīyā^́
1.167.04b     sādhāraṇyéva marúto mimikṣuḥ
1.167.04c     ná rodasī^́ ápa nudanta ghorā^́
1.167.04d     juṣánta vŕ̥dhaṃ sakhiyā^́ya devā^́ḥ

1.167.05a     jóṣad yád īm asuríyā sacádhyai
1.167.05b     víṣitastukā rodasī^́ nr̥máṇāḥ
1.167.05c     ā^́ sūriyéva vidható ráthaṃ gāt
1.167.05d     tveṣápratīkā nábhaso ná ityā^́

1.167.06a     ā^́sthāpayanta yuvatíṃ yúvānaḥ
1.167.06b     śubhé nímiślāṃ vidátheṣu pajrā^́m
1.167.06c     arkó yád vo · maruto havíṣmān
1.167.06d     gā^́yad gātháṃ sutásomo duvasyán

1.167.07a     prá táṃ vivakmi vákmiyo yá eṣām
1.167.07b     marútām · mahimā^́ satyó ásti
1.167.07c     sácā yád īṃ vŕ̥ṣamaṇā ahaṃyú
1.167.07d     sthirā^́ cij jánīr váhate subhāgā^́ḥ

1.167.08a     pã^́nti mitrā^́váruṇāv avadyā^́c
1.167.08b     cáyata īm aryamó ápraśastān
1.167.08c     utá cyavante ácyutā dhruvā^́ṇi
1.167.08d     vāvr̥dhá īm maruto dā^́tivāraḥ

1.167.09a     nahī^́ nú vo maruto ánti asmé
1.167.09b     ārā^́ttāc cic chávaso ántam āpúḥ
1.167.09c     té dhr̥ṣṇúnā śávasā śūśuvā^́ṃso
1.167.09d     árṇo ná dvéṣo dhr̥ṣatā^́ pári ṣṭhuḥ

1.167.10a     vayám adyá índarasya⁺ práyiṣṭhā⁺
1.167.10b     vayáṃ śuvó vocemahi samaryé
1.167.10c     vayám purā^́ máhi ca no ánu dyū^́n
1.167.10d     tán na r̥bhukṣā^́ narā^́m ánu ṣyāt

1.167.11a     eṣá va stómo maruta iyáṃ gī^́r
1.167.11b     māndāriyásya māniyásya kāróḥ
1.167.11c     ā^́ iṣā^́ yāsīṣṭa tanúve vayā^́ṃ
1.167.11d     vidyā^́meṣáṃ vr̥jánaṃ jīrádānum

168

1.168.01a     yajñā^́-yajñā vaḥ samanā^́ tuturváṇir
1.168.01b     dhíyaṃ-dhiyaṃ vo devayā^́ u dadhidhve
1.168.01c     ā^́ vo arvā^́caḥ suvitā^́ya ródasyor
1.168.01d     mahé vavr̥tyām ávase suvr̥ktíbhiḥ

1.168.02a     vavrā^́so ná yé suajā^́ḥ svátavasa
1.168.02b     íṣaṃ súvar abhijā^́yanta dhū^́tayaḥ
1.168.02c     sahasríyāso apã^́ṃ ná ūrmáya
1.168.02d     āsā^́ gā^́vo vándiyāso ná ukṣáṇaḥ

1.168.03a     sómāso ná yé sutā^́s tr̥ptáaṃśavo
1.168.03b     hr̥tsú pītā^́so duváso ná ā^́sate
1.168.03c     aíṣām áṃseṣu rambhíṇīva rārabhe
1.168.03d     hásteṣu khādíś ca kr̥tíś ca sáṃ dadhe

1.168.04a     áva sváyuktā divá ā^́ vŕ̥thā yayur
1.168.04b     ámartiyāḥ káśayā codata tmánā
1.168.04c     areṇávas tuvijātā^́ acucyavur
1.168.04d     dr̥̄ḷhā^́ni⁺ cin marúto bhrā^́jadr̥ṣṭayaḥ

1.168.05a     kó vo antár maruta r̥ṣṭividyuto
1.168.05b     réjati tmánā hánuveva jihváyā
1.168.05c     dhanuacyúta iṣã^́ṃ ná yā^́mani
1.168.05d     purupraíṣā ahaníyo ná étaśaḥ

1.168.06a     kúva svid asyá rájaso mahás páraṃ
1.168.06b     kuvā^́varam maruto yásmin āyayá
1.168.06c     yác cyāváyatha vithuréva sáṃhitaṃ
1.168.06d     ví ádriṇā patatha tveṣám arṇavám

1.168.07a     sātír ná vo ámavatī súvarvatī
1.168.07b     tveṣā^́ vípākā marutaḥ pípiṣvatī
1.168.07c     bhadrā^́ vo rātíḥ pr̥ṇató ná dákṣiṇā
1.168.07d     pr̥thujráyī asuríyeva jáñjatī

1.168.08a     práti ṣṭobhanti síndhavaḥ pavíbhyo
1.168.08b     yád abhríyāṃ vā^́cam udīráyanti
1.168.08c     áva smayanta vidyútaḥ pr̥thivyā^́ṃ
1.168.08d     yádī ghr̥tám marútaḥ pruṣṇuvánti

1.168.09a     ásūta pŕ̥śnir mahaté ráṇāya
1.168.09b     tveṣám ayā^́sām marútām ánīkam
1.168.09c     té sapsarā^́so 'janayanta ábhvam
1.168.09d     ā^́d ít svadhā^́m iṣirā^́m páry apaśyan

1.168.10a     eṣá va stómo maruta iyáṃ gī^́r
1.168.10b     māndāriyásya māniyásya kāróḥ
1.168.10c     ā^́ iṣā^́ yāsīṣṭa tanúve vayā^́ṃ
1.168.10d     vidyā^́meṣáṃ vr̥jánaṃ jīrádānum

169

1.169.01a     maháś cit tvám indara⁺ yatá etā^́n
1.169.01b     maháś cid asi tyájaso varūtā^́
1.169.01c     sá no vedho marútãṃ cikitvā^́n
1.169.01d     sumnā^́ vanuṣva táva hí práyiṣṭhā⁺

1.169.02a     áyujran ta indara⁺ viśvákr̥ṣṭīr
1.169.02b     vidānā^́so niṣṣídho martiyatrā^́
1.169.02c     marútãm pr̥tsutír hā^́samānā
1.169.02d     súvarmīḷhasya pradhánasya sātaú

1.169.03a     ámyak sā^́ ta indara⁺ r̥ṣṭír asmé
1.169.03b     sánemi ábhvam marúto junanti
1.169.03c     agníś cid dhí ṣma atasé śuśukvā^́n
1.169.03d     ā^́po ná dvīpáṃ dádhati práyāṃsi

1.169.04a     tuváṃ tū^́ na indara⁺ táṃ rayíṃ dā
1.169.04b     ójiṣṭhayā dákṣiṇayeva rātím
1.169.04c     stútaś ca yā^́s te cakánanta vāyó
1.169.04d     stánaṃ ná mádhvaḥ pīpayanta vā^́jaiḥ

1.169.05a     tuvé rā^́ya indara⁺ tośátamāḥ
1.169.05b     praṇetā^́raḥ · kásya cid r̥tāyóḥ
1.169.05c     té ṣú ṇo · marúto mr̥̄ḷayantu⁺
1.169.05d     yé smā purā^́ gātūyántīva devā^́ḥ

1.169.06a     práti prá yāhīndra mīḷhúṣo nr̥̄^́n
1.169.06b     maháḥ pā^́rthive sádane yatasva
1.169.06c     ádha yád eṣām pr̥thubudhnā^́sa étās
1.169.06d     tīrthé ná aryáḥ paúṃsiyāni tasthúḥ

1.169.07a     práti ghorā^́ṇām étānām ayā^́sām
1.169.07b     marútāṃ śr̥ṇva āyatā^́m upabdíḥ
1.169.07c     yé mártiyam pr̥tanāyántam ū^́mair
1.169.07d     r̥ṇāvā^́naṃ ná patáyanta sárgaiḥ

1.169.08a     tvám mā^́nebhya indara⁺ viśvájanyā
1.169.08b     rádā marúdbhiḥ śurúdho góagrāḥ
1.169.08c     stávānebhi stavase deva devaír
1.169.08d     vidyā^́meṣáṃ vr̥jánaṃ jīrádānum

170

1.170.01a     ná nūnám ásti nó śuváḥ
1.170.01b     kás tád veda yád ádbhutam
1.170.01c     anyásya cittám abhí saṃcaréṇiyam
1.170.01d     utā^́dhītaṃ ví naśyati

1.170.02a     kíṃ na indra jighāṃsasi
1.170.02b     bhrā^́taro marútas táva
1.170.02c     tébhiḥ kalpasva sādhuyā^́
1.170.02d     mā^́ naḥ samáraṇe vadhīḥ

1.170.03a     kíṃ no bhrātar agastiya
1.170.03b     sákhā sánn áti manyase
1.170.03c     vidmā^́ hí te yáthā máno
1.170.03d     asmábhyam ín ná ditsasi

1.170.04a     áraṃ kr̥ṇvantu védiṃ
1.170.04b     sám agním indhatām puráḥ
1.170.04c     tátrāmŕ̥tasya cétanaṃ
1.170.04d     yajñáṃ te tanavāvahai

1.170.05a     tvám īśiṣe vasupate vásūnāṃ
1.170.05b     tvám mitrā^́ṇām mitrapate dháyiṣṭhaḥ⁺
1.170.05c     índra tuvám marúdbhiḥ sáṃ vadasva
1.170.05d     ádha prā^́śāna r̥tuthā^́ havī^́ṃṣi

171

1.171.01a     práti va enā^́ námasāhám emi
1.171.01b     sūkténa bhikṣe sumatíṃ turā^́ṇām
1.171.01c     rarāṇátā maruto vediyā^́bhir
1.171.01d     ní héḷo dhattá ví mucadhvam áśvān

1.171.02a     eṣá va stómo maruto námasvān
1.171.02b     hr̥dā^́ taṣṭó mánasā dhāyi devāḥ
1.171.02c     úpem ā^́ yāta mánasā juṣāṇā^́
1.171.02d     yūyáṃ hí ṣṭhā^́ námasa íd vr̥dhā^́saḥ

1.171.03a     stutā^́so no marúto mr̥̄ḷayantu⁺
1.171.03b     utá stutó maghávā śámbhaviṣṭhaḥ
1.171.03c     ūrdhvā^́ naḥ santu komiyā^́ vánāni
1.171.03d     áhāni víśvā maruto jigīṣā^́

1.171.04a     asmā^́d aháṃ taviṣā^́d ī^́ṣamāṇa
1.171.04b     índrād bhiyā^́ maruto réjamānaḥ
1.171.04c     yuṣmábhyaṃ havyā^́ níśitāni āsan
1.171.04d     tā^́ni āré cakr̥mā mr̥̄ḷátā⁺ naḥ

1.171.05a     yéna mā^́nāsaś citáyanta usrā^́
1.171.05b     víuṣṭiṣu śávasā śáśvatīnām
1.171.05c     sá no marúdbhir vr̥ṣabha śrávo dhā
1.171.05d     ugrá ugrébhi stháviraḥ sahodā^́ḥ

1.171.06a     tuvám pāhi indra sáhīyaso nr̥̄^́n
1.171.06b     bhávā marúdbhir ávayātaheḷāḥ
1.171.06c     supraketébhiḥ sāsahír dádhāno
1.171.06d     vidyā^́meṣáṃ vr̥jánaṃ jīrádānum

172

1.172.01a     citró vo astu yā^́maś
1.172.01b     citrá ūtī^́ sudānavaḥ
1.172.01c     máruto áhibhānavaḥ

1.172.02a     āré sā^́ vaḥ sudānavo
1.172.02b     máruta r̥ñjatī^́ śáruḥ
1.172.02c     āré áśmā yám ásyatha

1.172.03a     tr̥ṇaskandásya nú víśaḥ
1.172.03b     pári vr̥ṅkta sudānavaḥ
1.172.03c     ūrdhvā^́n naḥ karta jīváse

173

1.173.01a     gā^́yat sā^́ma nabhaníyaṃ yáthā vér
1.173.01b     árcāma tád vāvr̥dhānáṃ súvarvat
1.173.01c     gā^́vo dhenávo barhíṣi ádabdhā
1.173.01d     ā^́ yát sadmā^́naṃ diviyáṃ vívāsān

1.173.02a     árcad vŕ̥ṣā vŕ̥ṣabhiḥ svéduhavyair
1.173.02b     mr̥gó ná áśno áti yáj juguryā^́t
1.173.02c     prá mandayúr · manā^́ṃ gūrta hótā
1.173.02d     bhárate máryo mithunā^́ yájatraḥ

1.173.03a     nákṣad dhótā pári sádma mitā^́ yán
1.173.03b     bhárad gárbham ā^́ śarádaḥ pr̥thivyā^́ḥ
1.173.03c     krándad áśvo náyamāno ruvád gaúr
1.173.03d     antár dūtó ná ródasī carad vā^́k

1.173.04a     tā^́ karmā^́ṣatarā asmai
1.173.04b     prá cyautnā^́ni devayánto bharante
1.173.04c     jújoṣad · índaro⁺ dasmávarcā
1.173.04d     nā^́satiyeva súgmiyo ratheṣṭhā^́ḥ

1.173.05a     tám u ṣṭuhi índaraṃ⁺ yó ha sátvā
1.173.05b     yáḥ śū^́ro · maghávā yó ratheṣṭhā^́ḥ
1.173.05c     pratīcáś cid · yódhīyān vŕ̥ṣaṇvān
1.173.05d     vavavrúṣaś cit támaso vihantā^́

1.173.06a     prá yád itthā^́ mahinā^́ nŕ̥bhyo ásti
1.173.06b     áraṃ ródasī kakṣíye ná asmai
1.173.06c     sáṃ vivya índro vr̥jánaṃ ná bhū^́mā
1.173.06d     bhárti svadhā^́vām̐ opaśám iva dyā^́m

1.173.07a     samátsu tvā śūra satā^́m urāṇám
1.173.07b     prapathíntamam paritaṃsayádhyai
1.173.07c     sajóṣasa indaram⁺ máde kṣoṇī^́ḥ
1.173.07d     sūríṃ cid yé anumádanti vā^́jaiḥ

1.173.08a     evā^́ hí te śáṃ sávanā samudrá
1.173.08b     ā^́po yát ta āsú mádanti devī^́ḥ
1.173.08c     víśvā te ánu jóṣiyā bhũd gaúḥ
1.173.08d     sūrī^́ṃś cid yádi dhiṣā^́ véṣi jánān

1.173.09a     ásāma yáthā suṣakhā^́ya ena
1.173.09b     suabhiṣṭáyo narã^́ṃ ná śáṃsaiḥ
1.173.09c     ásad yáthā na índro vandaneṣṭhā^́s
1.173.09d     turó ná kárma náyamāna ukthā^́

1.173.10a     víṣpardhaso · narã^́ṃ ná śáṃsair
1.173.10b     asmā^́kāsad índaro⁺ vájrahastaḥ
1.173.10c     mitrāyúvo ná pū^́rpatiṃ súśiṣṭau
1.173.10d     madhyāyúva úpa śikṣanti yajñaíḥ

1.173.11a     yajñó hí ṣma índaraṃ⁺ káś cid r̥ndháñ
1.173.11b     juhurāṇáś cin mánasā pariyán
1.173.11c     tīrthé ná áchā tātr̥ṣāṇám óko
1.173.11d     dīrghó ná sidhrám ā^́ kr̥ṇoti ádhvā

1.173.12a     mó ṣū^́ ṇa indra átra pr̥tsú devaír
1.173.12b     ásti hí ṣmā te śuṣmin avayã^́ḥ
1.173.12c     maháś cid yásya mīḷhúṣo yavīyā^́
1.173.12d     havíṣmato marúto vándate gī^́ḥ

1.173.13a     eṣá stóma indara⁺ túbhyam asmé
1.173.13b     eténa gātúṃ harivo vido naḥ
1.173.13c     ā^́ no vavr̥tyāḥ suvitā^́ya deva
1.173.13d     vidyā^́meṣáṃ vr̥jánaṃ jīrádānum

174

1.174.01a     tuváṃ rā^́jā indara⁺ yé ca devā^́
1.174.01b     rákṣā nr̥̄^́n pāhí asura tvám asmā^́n
1.174.01c     tváṃ sátpatir maghávā nas tárutras
1.174.01d     tuváṃ satyó vásavānaḥ sahodā^́ḥ

1.174.02a     dáno víśa indara⁺ mr̥dhrávācaḥ
1.174.02b     saptá yát púraḥ śárma śā^́radīr dárt
1.174.02c     r̥ṇór apó · anavadya árṇā
1.174.02d     yū^́ne vr̥trám purukútsāya randhīḥ

1.174.03a     ájā vŕ̥ta indara⁺ śū^́rapatnīr
1.174.03b     diyā^́ṃ ca yébhiḥ puruhūta nūnám
1.174.03c     rákṣo agním aśúṣaṃ tū^́rvayāṇaṃ
1.174.03d     siṃhó ná dáme ápāṃsi vástoḥ

1.174.04a     śéṣan nú tá indara⁺ sásmi° yónau
1.174.04b     práśastaye pávīravasya mahnā^́
1.174.04c     sr̥jád árṇāṃsi áva yád yudhā^́ gā^́s
1.174.04d     tíṣṭhad dhárī dhr̥ṣatā^́ mr̥ṣṭa vā^́jān

1.174.05a     váha kútsam indara⁺ yásmi° cākán
1.174.05b     syūmanyū^́ r̥jrā^́ vã^́tasya áśvā
1.174.05c     prá sū^́raś cakráṃ vr̥hatād abhī^́ke
1.174.05d     abhí spŕ̥dho yāsiṣad vájrabāhuḥ

1.174.06a     jaghanvā^́m̐ · indara⁺ mitrẽ^́rūñ
1.174.06b     codápravr̥ddho harivo ádāśūn
1.174.06c     prá yé páśyann aryamáṇaṃ sácāyós
1.174.06d     tváyā śūrtā^́ váhamānā ápatyam

1.174.07a     rápat kavír indara⁺ arkásātau
1.174.07b     kṣã^́ṃ dāsā^́ya upabárhaṇīṃ kaḥ
1.174.07c     kárat tisró maghávā dā^́nucitrā
1.174.07d     ní duryoṇé kúyavācam mr̥dhí śret

1.174.08a     sánā tā^́ ta indara⁺ návyā ā^́guḥ
1.174.08b     sáho nábho áviraṇāya pūrvī^́ḥ
1.174.08c     bhinát púro · ná bhído ádevīr
1.174.08d     nanámo vádhar ádevasya pīyóḥ

1.174.09a     tuváṃ dhúnir indara⁺ dhúnimatīr
1.174.09b     r̥ṇór apáḥ · sīrā^́ ná srávantīḥ
1.174.09c     prá yát samudrám áti śūra párṣi
1.174.09d     pāráyā turváśaṃ yáduṃ suastí

1.174.10a     tvám asmā^́kam indara⁺ viśvádha syā
1.174.10b     avr̥kátamo narã^́ṃ nr̥pātā^́
1.174.10c     sá no víśvāsāṃ spr̥dhã^́ṃ sahodā^́
1.174.10d     vidyā^́meṣáṃ vr̥jánaṃ jīrádānum

175

1.175.01a     mátsi ápāyi te máhaḥ
1.175.01b     pā^́trasyeva harivo matsaró mádaḥ
1.175.01c     vŕ̥ṣā te vŕ̥ṣṇa índur
1.175.01d     vājī^́ sahasrasā^́tamaḥ

1.175.02a     ā^́ nas te gantu matsaró
1.175.02b     vŕ̥ṣā mádo váreṇiyaḥ
1.175.02c     sahā^́vām̐ indra sānasíḥ
1.175.02d     pr̥tanāṣā^́ḷ ámartiyaḥ

1.175.03a     tuváṃ hí śū^́raḥ sánitā
1.175.03b     codáyo mánuṣo rátham
1.175.03c     sahā^́vān dásyum avratám
1.175.03d     óṣaḥ pā^́traṃ ná śocíṣā

1.175.04a     muṣāyá sū^́riyaṃ kave
1.175.04b     cakrám ī^́śāna ójasā
1.175.04c     váha śúṣṇāya vadháṃ
1.175.04d     kútsaṃ vã^́tasya áśvaiḥ

1.175.05a     śuṣmíntamo hí te mádo
1.175.05b     dyumníntama utá krátuḥ
1.175.05c     vr̥traghnā^́ varivovídā
1.175.05d     maṃsīṣṭhā^́ aśvasā^́tamaḥ

1.175.06a     yáthā pū^́rvebhyo jaritŕ̥bhya indra
1.175.06b     máyo 'vā^́po° ná tŕ̥ṣyate babhū^́tha
1.175.06c     tā^́m ánu tvā nivídaṃ johavīmi
1.175.06d     vidyā^́meṣáṃ vr̥jánaṃ jīrádānum

176

1.176.01a     mátsi no vásyaïṣṭaya
1.176.01b     índram indo vŕ̥ṣā^́ viśa
1.176.01c     r̥ghāyámāṇa invasi
1.176.01d     śátrum ánti ná vindasi

1.176.02a     tásminn ā^́ veśayā gíro
1.176.02b     yá ékaś carṣaṇīnã^́m
1.176.02c     ánu svadhā^́ yám upyáte
1.176.02d     yávaṃ ná cárkr̥ṣad vŕ̥ṣā

1.176.03a     yásya víśvāni hástayoḥ
1.176.03b     páñca kṣitīnã^́ṃ vásu
1.176.03c     spāśáyasva yó asmadhrúg
1.176.03d     diviyévāśánir jahi

1.176.04a     ásunvantaṃ samaṃ jahi
1.176.04b     dūṇā^́śaṃ yó ná te máyaḥ
1.176.04c     asmábhyam asya védanaṃ
1.176.04d     daddhí sūríś cid ohate

1.176.05a     ā^́vo yásya dvibárhaso
1.176.05b     arkéṣu sānuṣág ásat
1.176.05c     ājā^́v índarasya⁺ indo
1.176.05d     prā^́vo vā^́jeṣu vājínam

1.176.06a     yáthā pū^́rvebhyo jaritŕ̥bhya indra
1.176.06b     máyo 'vā^́po° ná tŕ̥ṣyate babhū^́tha
1.176.06c     tā^́m ánu tvā nivídaṃ johavīmi
1.176.06d     vidyā^́meṣáṃ vr̥jánaṃ jīrádānum

177

1.177.01a     ā^́ carṣaṇiprā^́ vr̥ṣabhó jánānāṃ
1.177.01b     rā^́jā kr̥ṣṭīnā^́m puruhūtá índraḥ
1.177.01c     stutáḥ śravasyánn ávasópa madríg
1.177.01d     yuktvā^́ hárī vŕ̥ṣaṇā^́ yāhi arvā^́ṅ

1.177.02a     yé te vŕ̥ṣaṇo vr̥ṣabhā^́sa indra
1.177.02b     brahmayújo vŕ̥ṣarathāso átyāḥ
1.177.02c     tā^́m̐ ā^́ tiṣṭha tébhir ā^́ yāhi arvā^́ṅ
1.177.02d     hávāmahe tvā sutá indra sóme

1.177.03a     ā^́ tiṣṭha ráthaṃ vŕ̥ṣaṇaṃ vŕ̥ṣā te
1.177.03b     sutáḥ sómaḥ páriṣiktā mádhūni
1.177.03c     yuktvā^́ vŕ̥ṣabhyāṃ vr̥ṣabha kṣitīnā^́ṃ
1.177.03d     háribhyāṃ yāhi pravátópa madrík

1.177.04a     ayáṃ yajñó devayā^́ ayám miyédha
1.177.04b     imā^́ bráhmāṇi ayám indra sómaḥ
1.177.04c     stīrṇám barhír ā^́ tú śakra prá yāhi
1.177.04d     píbā niṣádya ví mucā hárīhá°

1.177.05a     ó súṣṭuta indara⁺ yāhi arvā^́ṅ
1.177.05b     úpa bráhmāṇi māniyásya kāróḥ
1.177.05c     vidyā^́ma vástor ávasā gr̥ṇánto
1.177.05d     vidyā^́meṣáṃ vr̥jánaṃ jīrádānum

178

1.178.01a     yád dha syā^́ ta indara⁺ śruṣṭír ásti
1.178.01b     yáyā babhū^́tha jaritŕ̥bhya ūtī^́
1.178.01c     mā^́ naḥ kā^́mam · maháyantam ā^́ dhag
1.178.01d     víśvā te aśyām pári ā^́pa āyóḥ

1.178.02a     ná ghā rā^́jā índara⁺ ā^́ dabhan no
1.178.02b     yā^́ nú svásārā kr̥ṇávanta yónau
1.178.02c     ā^́paś cid asmai sutúkā aveṣan
1.178.02d     gáman na índraḥ sakhiyā^́ váyaś ca

1.178.03a     jétā nŕ̥bhir indaraḥ⁺ pr̥tsú śū^́raḥ
1.178.03b     śrótā hávaṃ nā^́dhamānasya kāróḥ
1.178.03c     prábhartā ráthaṃ dāśúṣa upāká
1.178.03d     údyantā gíro yádi ca tmánā bhū^́t

1.178.04a     evā^́ nŕ̥bhir indaraḥ⁺ suśravasyā^́
1.178.04b     prakhādáḥ pr̥kṣó abhí mitríṇo bhūt
1.178.04c     samaryá iṣá stavate vívāci
1.178.04d     satrākaró yájamānasya śáṃsaḥ

1.178.05a     tváyā vayám maghavann indra śátrūn
1.178.05b     abhí ṣyāma maható mányamānān
1.178.05c     tuváṃ trātā^́ tuvám u no vr̥dhé bhūr
1.178.05d     vidyā^́meṣáṃ vr̥jánaṃ jīrádānum

179

1.179.01a     pūrvī^́r aháṃ śarádaḥ śaśramāṇā^́
1.179.01b     doṣā^́ vástor uṣáso jaráyantīḥ
1.179.01c     minā^́ti śríyaṃ jarimā^́ tanū^́nām
1.179.01d     ápy ū nú pátnīr vŕ̥ṣaṇo jagamyuḥ

1.179.02a     yé cid dhí pū^́rva r̥tasā^́pa ā^́san
1.179.02b     sākáṃ devébhir ávadann r̥tā^́ni
1.179.02c     té cid ávāsur nahí ántam āpúḥ
1.179.02d     sám ū nú pátnīr vŕ̥ṣabhir jagamyuḥ

1.179.03a     ná mŕ̥ṣā śrāntáṃ yád ávanti devā^́
1.179.03b     víśvā ít spŕ̥dho abhí aśnavāva
1.179.03c     jáyāvéd átra śatánītham ājíṃ
1.179.03d     yát samyáñcā mithunā^́v abhy ájāva

1.179.04a     nadásya mā rudhatáḥ kā^́ma ā^́gann
1.179.04b     itá ā^́jāto amútaḥ kútaś cit
1.179.04c     lópāmudrā vŕ̥ṣaṇaṃ nī^́ riṇāti
1.179.04d     dhī^́ram ádhīrā dhayati śvasántam

1.179.05a     imáṃ nú sómam ántito
1.179.05b     hr̥tsú pītám úpa bruve
1.179.05c     yát sīm ā^́gaś cakr̥mā^́ tát sú mr̥̄ḷatu⁺
1.179.05d     pulukā^́mo hí mártiyaḥ

1.179.06a     agástiyaḥ khánamānaḥ khanítraiḥ
1.179.06b     prajā^́m ápatyam bálam ichámānaḥ
1.179.06c     ubhaú várṇāv ŕ̥ṣir ugráḥ pupoṣa
1.179.06d     satyā^́ devéṣu āśíṣo jagāma

180

1.180.01a     yuvó rájāṃsi suyámāso áśvā
1.180.01b     rátho yád vām pári árṇāṃsi dī^́yat
1.180.01c     hiraṇyáyā vām paváyaḥ pruṣāyan
1.180.01d     mádhvaḥ píbantā uṣásaḥ sacethe

1.180.02a     yuvám átyasya áva nakṣatho yád
1.180.02b     vípatmano náriyasya práyajyoḥ
1.180.02c     svásā yád vāṃ viśvagūrtī bhárāti
1.180.02d     vā^́jāya ī^́ṭṭe madhupāv iṣé ca

1.180.03a     yuvám páya usríyāyām adhattam
1.180.03b     pakvám āmā^́yām áva pū^́rviyaṃ góḥ
1.180.03c     antár yád · vaníno vām r̥tapsū
1.180.03d     hvāró ná śúcir yájate havíṣmān

1.180.04a     yuváṃ ha gharmám mádhumantam átraye
1.180.04b     apó ná kṣódo avr̥ṇītam eṣé
1.180.04c     tád vāṃ narāv aśvinā páśvaïṣṭī
1.180.04d     ráthyeva cakrā^́ práti yanti mádhvaḥ

1.180.05a     ā^́ vāṃ dānā^́ya vavr̥tīya dasrā
1.180.05b     gõ^́r óheṇa taugriyó ná jívriḥ
1.180.05c     apáḥ kṣoṇī^́ sacate mā^́hinā vāṃ
1.180.05d     jūrṇó vām ákṣur áṃhaso yajatrā

1.180.06a     ní yád yuvéthe niyútaḥ sudānū
1.180.06b     úpa svadhā^́bhiḥ sr̥jathaḥ púraṃdhim
1.180.06c     préṣad véṣad · vã^́to ná sūrír
1.180.06d     ā^́ mahé dade suvrató ná vā^́jam

1.180.07a     vayáṃ cid dhí vāṃ jaritā^́raḥ satyā^́
1.180.07b     vipanyā^́mahe ví paṇír hitā^́vān
1.180.07c     ádhā cid dhí ṣma aśvināv anindyā
1.180.07d     pāthó hí ṣmā vr̥ṣaṇāv ántidevam

1.180.08a     yuvā^́ṃ cid dhí ṣmā aśvināv ánu dyū^́n
1.180.08b     vírudrasya prasrávaṇasya sātaú
1.180.08c     agástiyo narā^́ṃ nŕ̥ṣu práśastaḥ
1.180.08d     kā^́rādhunīva citayat sahásraiḥ

1.180.09a     prá yád váhethe mahinā^́ ráthasya
1.180.09b     prá syandrā yātho mánuṣo ná hótā
1.180.09c     dhattáṃ sūríbhya utá vā suáśvyaṃ
1.180.09d     nā^́satiyā rayiṣā^́caḥ siyāma

1.180.10a     táṃ vāṃ ráthaṃ vayám adyā^́ huvema
1.180.10b     stómair aśvinā suvitā^́ya návyam
1.180.10c     áriṣṭanemim pári dyā^́m iyānáṃ
1.180.10d     vidyā^́meṣáṃ vr̥jánaṃ jīrádānum

181

1.181.01a     kád u práyiṣṭhāv⁺ iṣã^́ṃ rayīṇā^́m
1.181.01b     adhvaryántā yád unninīthó apā^́m
1.181.01c     ayáṃ vāṃ yajñó akr̥ta práśastiṃ
1.181.01d     vásudhitī ávitārā janānām

1.181.02a     ā^́ vām áśvāsaḥ śúcayaḥ payaspā^́
1.181.02b     vā^́taraṃhaso diviyā^́so átyāḥ
1.181.02c     manojúvo vŕ̥ṣaṇo vītápr̥ṣṭhā
1.181.02d     éhá svarā^́jo aśvínā vahantu

1.181.03a     ā^́ vāṃ rátho avánir ná pravátvān
1.181.03b     sr̥právandhuraḥ suvitā^́ya gamyāḥ
1.181.03c     vŕ̥ṣṇa sthātārā mánaso jávīyān
1.181.03d     ahampūrvó yajató dhiṣṇiyā yáḥ

1.181.04a     ihéha jātā^́ sám avāvaśītām
1.181.04b     arepásā tanúvā nā^́mabhiḥ svaíḥ
1.181.04c     jiṣṇúr vām anyáḥ súmakhasya sūrír
1.181.04d     divó anyáḥ subhágaḥ putrá ūhe

1.181.05a     prá vāṃ nicerúḥ kakuhó váśām̐ ánu
1.181.05b     piśáṅgarūpaḥ sádanāni gamyāḥ
1.181.05c     hárī anyásya pīpáyanta vā^́jair
1.181.05d     mathrā^́ rájāṃsi aśvinā ví ghóṣaiḥ

1.181.06a     prá vāṃ śarádvān vr̥ṣabhó ná niṣṣā^́ṭ
1.181.06b     pūrvī^́r íṣaś carati mádhva iṣṇán
1.181.06c     évair anyásya pīpáyanta vā^́jair
1.181.06d     véṣantīr ūrdhvā^́ nadíyo na ā^́guḥ

1.181.07a     ásarji vāṃ sthávirā vedhasā gī^́r
1.181.07b     bāḷhé aśvinā trẽdhā^́ kṣárantī
1.181.07c     úpastutāv avataṃ nā^́dhamānaṃ
1.181.07d     yā^́mann áyāmañ chr̥ṇutaṃ hávam me

1.181.08a     utá syā^́ vāṃ rúśato vápsaso gī^́s
1.181.08b     tribarhíṣi sádasi pinvate nr̥̄^́n
1.181.08c     vŕ̥ṣā vāṃ meghó vr̥ṣaṇā pipāya°
1.181.08d     gõ^́r ná séke mánuṣo daśasyán

1.181.09a     yuvā^́m pūṣéva aśvinā púraṃdhir
1.181.09b     agním uṣā^́ṃ ná jarate havíṣmān
1.181.09c     huvé yád vāṃ varivasyā^́ gr̥ṇānó
1.181.09d     vidyā^́meṣáṃ vr̥jánaṃ jīrádānum

182

1.182.01a     ábhūd idáṃ vayúnam ó ṣú bhūṣatā
1.182.01b     rátho vŕ̥ṣaṇvān mádatā manīṣiṇaḥ
1.182.01c     dhiyaṃjinvā^́ dhíṣṇiyā viśpálāvasū
1.182.01d     divó nápātā sukŕ̥te śúcivratā

1.182.02a     índratamā hí dhíṣṇiyā marúttamā
1.182.02b     dasrā^́ dáṃsiṣṭhā rathíyā rathī^́tamā
1.182.02c     pūrṇáṃ ráthaṃ vahethe mádhva ā^́citaṃ
1.182.02d     téna dāśvā^́ṃsam úpa yātho aśvinā

1.182.03a     kím átra dasrā kr̥ṇuthaḥ kím āsathe°
1.182.03b     jáno yáḥ káś cid áhavir mahīyáte
1.182.03c     áti kramiṣṭaṃ jurátam paṇér ásuṃ
1.182.03d     jyótir víprāya kr̥ṇutaṃ vacasyáve

1.182.04a     jambháyatam abhíto rā^́yataḥ śúno
1.182.04b     hatám mŕ̥dho vidáthus tā^́ni aśvinā
1.182.04c     vā^́caṃ-vācaṃ jaritū^́ ratnínīṃ kr̥tam
1.182.04d     ubhā^́ śáṃsaṃ nāsatiyāvatam máma

1.182.05a     yuvám etáṃ cakrathuḥ síndhuṣu plavám
1.182.05b     ātmanvántam pakṣíṇaṃ taugriyā^́ya kám
1.182.05c     yéna devatrā^́ mánasā nirūháthuḥ
1.182.05d     supaptanī^́ petathuḥ kṣódaso maháḥ

1.182.06a     ávaviddhaṃ taugriyám apsú antár
1.182.06b     anārambhaṇé támasi práviddham
1.182.06c     cátasro nā^́vo jáṭhalasya júṣṭā
1.182.06d     úd aśvíbhyām iṣitā^́ḥ pārayanti

1.182.07a     káḥ svid vr̥kṣó níṣṭhito mádhye árṇaso
1.182.07b     yáṃ taugriyó nādhitáḥ paryáṣasvajat
1.182.07c     parṇā^́ mr̥gásya patáror ivārábha
1.182.07d     úd aśvinā ūhathuḥ śrómatāya kám

1.182.08a     tád vāṃ narā nāsatiyāv ánu ṣyād
1.182.08b     yád vām mā^́nāsa ucátham ávocan
1.182.08c     asmā^́d adyá sádasaḥ somiyā^́d ā^́
1.182.08d     vidyā^́meṣáṃ vr̥jánaṃ jīrádānum

183

1.183.01a     táṃ yuñjāthām mánaso yó jávīyān
1.183.01b     trivandhuró vr̥ṣaṇā yás tricakráḥ
1.183.01c     yénopayātháḥ sukŕ̥to duroṇáṃ
1.183.01d     tridhā^́tunā patatho vír ná parṇaíḥ

1.183.02a     suvŕ̥d rátho vartate yánn abhí kṣā^́ṃ
1.183.02b     yát tíṣṭhathaḥ krátumantā^́nu pr̥kṣé
1.183.02c     vápur vapuṣyā^́ sacatām iyáṃ gī^́r
1.183.02d     divó duhitrā^́ uṣásā sacethe

1.183.03a     ā^́ tiṣṭhataṃ suvŕ̥taṃ yó rátho vām
1.183.03b     ánu vratā^́ni vártate havíṣmān
1.183.03c     yéna narā nāsatiyeṣayádhyai
1.183.03d     vartír yāthás tánayāya tmáne ca

1.183.04a     mā^́ vāṃ vŕ̥ko mā^́ vr̥kī^́r ā^́ dadharṣīn
1.183.04b     mā^́ pári varktam utá mā^́ti dhaktam
1.183.04c     ayáṃ vām bhāgó níhita iyáṃ gī^́r
1.183.04d     dásrāv imé vāṃ nidháyo mádhūnām

1.183.05a     yuvā^́ṃ gótamaḥ purumīḷhó átrir
1.183.05b     dásrā hávate ávase havíṣmān
1.183.05c     díśaṃ ná diṣṭā^́m r̥jūyéva yántā
1.183.05d     ā^́ me hávaṃ nāsatiyópa yātam

1.183.06a     átāriṣma támasas pārám asyá
1.183.06b     práti vāṃ stómo aśvināv adhāyi
1.183.06c     éhá yātam pathíbhir devayā^́nair
1.183.06d     vidyā^́meṣáṃ vr̥jánaṃ jīrádānum

184

1.184.01a     tā^́ vām adyá tā^́v aparáṃ huvema
1.184.01b     uchántiyām uṣási váhnir ukthaíḥ
1.184.01c     nā^́satiyā kúha cit sántāv aryó
1.184.01d     divó nápātā sudã^́starāya

1.184.02a     asmé ū ṣú vr̥ṣaṇā mādayethām
1.184.02b     út paṇī^́m̐r hatam ūrmiyā^́ mádantā
1.184.02c     śrutám me áchaüktibhir matīnā^́m
1.184.02d     éṣṭā narā nícetārā ca kárṇaiḥ

1.184.03a     śriyé pūṣann iṣukŕ̥teva devā^́
1.184.03b     nā^́satiyā vahatúṃ sūriyā^́yāḥ
1.184.03c     vacyánte vāṃ kakuhā^́ apsú jātā^́
1.184.03d     yugā^́ jūrṇéva váruṇasya bhū^́reḥ

1.184.04a     asmé sā^́ vām mādhuvī rātír astu
1.184.04b     stómaṃ hinotam māniyásya kāróḥ
1.184.04c     ánu yád vāṃ śravasíyā sudānū
1.184.04d     suvī^́ryāya carṣaṇáyo mádanti

1.184.05a     eṣá vāṃ stómo aśvināv akāri
1.184.05b     mā^́nebhir · maghavānā suvr̥ktí
1.184.05c     yātáṃ vartís tánayāya tmáne ca
1.184.05d     agástiye nāsatiyā mádantā

1.184.06a     átāriṣma támasas pārám asyá
1.184.06b     práti vāṃ stómo aśvināv adhāyi
1.184.06c     éhá yātam pathíbhir devayā^́nair
1.184.06d     vidyā^́meṣáṃ vr̥jánaṃ jīrádānum

185

1.185.01a     katarā^́ pū^́rvā katarā^́parāyóḥ
1.185.01b     kathā^́ jāté kavayaḥ kó ví veda
1.185.01c     víśvaṃ tmánā bibhr̥to yád dha nā^́ma
1.185.01d     ví vartete áhanī cakríyeva

1.185.02a     bhū^́riṃ duvé ácarantī cárantam
1.185.02b     padvántaṃ gárbham apádī dadhāte
1.185.02c     nítyaṃ ná sūnúm pitarór⁺ upásthe
1.185.02d     dyā^́vā rákṣatam pr̥thivī no ábhvāt

1.185.03a     anehó dātrám áditer anarváṃ
1.185.03b     huvé súvarvad avadháṃ námasvat
1.185.03c     tád rodasī janayataṃ jaritré
1.185.03d     dyā^́vā rákṣatam pr̥thivī no ábhvāt

1.185.04a     átapyamāne ávasā ávantī
1.185.04b     ánu ṣyāma ródasī deváputre
1.185.04c     ubhé devā^́nām ubháyebhir áhnāṃ
1.185.04d     dyā^́vā rákṣatam pr̥thivī no ábhvāt

1.185.05a     saṃgáchamāne yuvatī^́ sámante
1.185.05b     svásārā jāmī^́ pitarór⁺ upásthe
1.185.05c     abhijíghrantī bhúvanasya nā^́bhiṃ
1.185.05d     dyā^́vā rákṣatam pr̥thivī no ábhvāt

1.185.06a     urvī^́ sádmanī br̥hatī^́ r̥téna
1.185.06b     huvé devā^́nām ávasā jánitrī
1.185.06c     dadhā^́te yé amŕ̥taṃ suprátīke
1.185.06d     dyā^́vā rákṣatam pr̥thivī no ábhvāt

1.185.07a     urvī^́ pr̥thvī^́ bahulé dūréante
1.185.07b     úpa bruve námasā yajñé asmín
1.185.07c     dadhā^́te yé subháge suprátūrtī
1.185.07d     dyā^́vā rákṣatam pr̥thivī no ábhvāt

1.185.08a     devā^́n vā yác cakr̥mā^́ kác cid ā^́gaḥ
1.185.08b     sákhāyaṃ vā sádam íj jā^́spatiṃ vā
1.185.08c     iyáṃ dhī^́r bhūyā avayā^́nam eṣāṃ
1.185.08d     dyā^́vā rákṣatam pr̥thivī no ábhvāt

1.185.09a     ubhā^́ śáṃsā náriyā mā^́m aviṣṭām
1.185.09b     ubhé mā^́m ūtī^́ ávasā sacetām
1.185.09c     bhū^́ri cid aryáḥ sudã^́starāya
1.185.09d     iṣā^́ mádanta iṣayema devāḥ

1.185.10a     r̥táṃ divé tád avocam pr̥thivyā^́
1.185.10b     abhiśrāvā^́ya prathamáṃ sumedhā^́ḥ
1.185.10c     pātā^́m avadyā^́d duritā^́d abhī^́ke
1.185.10d     pitā^́ mātā^́ ca rakṣatām ávobhiḥ

1.185.11a     idáṃ dyāvāpr̥thivī satyám astu
1.185.11b     pítar mā^́tar yád ihópabruvé vām
1.185.11c     bhūtáṃ devā^́nām avamé ávobhir
1.185.11d     vidyā^́meṣáṃ vr̥jánaṃ jīrádānum

186

1.186.01a     ā^́ na íḷābhir vidáthe suśastí
1.186.01b     viśvā^́naraḥ savitā^́ devá etu
1.186.01c     ápi yáthā yuvāno mátsathā no
1.186.01d     víśvaṃ jágad abhipitvé manīṣā^́

1.186.02a     ā^́ no víśva ā^́skrā gamantu devā^́
1.186.02b     mitró aryamā^́ váruṇaḥ sajóṣāḥ
1.186.02c     bhúvan yáthā no víśve vr̥dhā^́saḥ
1.186.02d     káran suṣā^́hā vithuráṃ ná śávaḥ

1.186.03a     práyiṣṭhaṃ⁺ vo · átithiṃ gr̥ṇīṣe
1.186.03b     agníṃ śastíbhis turváṇiḥ sajóṣāḥ
1.186.03c     ásad yáthā no váruṇaḥ sukīrtír
1.186.03d     íṣaś ca parṣad arigūrtáḥ sūríḥ

1.186.04a     úpa va eṣe námasā jigīṣā^́
1.186.04b     uṣā^́sānáktā sudúgheva dhenúḥ
1.186.04c     samāné áhan vimímāno arkáṃ
1.186.04d     víṣurūpe páyasi sásmin ū^́dhan

1.186.05a     utá no áhir budhníyo máyas kaḥ
1.186.05b     śíśuṃ ná pipyúṣīva veti síndhuḥ
1.186.05c     yéna nápātam apã^́ṃ junā^́ma
1.186.05d     manojúvo vŕ̥ṣaṇo yáṃ váhanti

1.186.06a     utá na īṃ tváṣṭā ā^́ gantu áchā
1.186.06b     smát sūríbhir abhipitvé sajóṣāḥ
1.186.06c     ā^́ vr̥trahā^́ índaraś⁺ carṣaṇiprā^́s
1.186.06d     tuvíṣṭamo narā^́ṃ na ihá gamyāḥ

1.186.07a     utá na īm matáyo áśvayogāḥ
1.186.07b     śíśuṃ ná gā^́vas táruṇaṃ rihanti
1.186.07c     tám īṃ gíro · jánayo ná pátnīḥ
1.186.07d     surabhíṣṭamaṃ narã^́ṃ nasanta

1.186.08a     utá na īm marúto vr̥ddhásenāḥ
1.186.08b     smád ródasī sámanasaḥ sadantu
1.186.08c     pŕ̥ṣadaśvāso 'vánayo ná ráthā
1.186.08d     riśā^́daso mitrayújo ná devā^́ḥ

1.186.09a     prá nú yád eṣām mahinā^́ cikitré
1.186.09b     prá yuñjate prayújas té suvr̥ktí
1.186.09c     ádha yád eṣāṃ sudíne ná śárur
1.186.09d     víśvam ériṇam pruṣāyánta sénāḥ

1.186.10a     prá ūaśvínāv ávase kr̥ṇudhvam
1.186.10b     prá pūṣáṇaṃ svátavaso hí sánti
1.186.10c     adveṣó víṣṇur vã^́ta r̥bhukṣā^́
1.186.10d     áchā sumnā^́ya vavr̥tīya devā^́n

1.186.11a     iyáṃ sā^́ vo 'smé° dī^́dhitir yajatrā
1.186.11b     apiprā^́ṇī ca sádanī ca bhūyāḥ
1.186.11c     ní yā^́ devéṣu yátate vasūyúr
1.186.11d     vidyā^́meṣáṃ vr̥jánaṃ jīrádānum

187

1.187.01a     pitúṃ nú stoṣam
1.187.01b     mahó dharmā^́ṇaṃ táviṣīm
1.187.01c     yásya tritó ví ójasā
1.187.01d     vr̥tráṃ víparvam ardáyat

1.187.02a     svā^́do pito mádho pito
1.187.02b     vayáṃ tuvā vavr̥mahe
1.187.02c     asmā^́kam avitā^́ bhava

1.187.03a     úpa naḥ pitav ā^́ cara
1.187.03b     śiváḥ śivā^́bhir ūtíbhiḥ
1.187.03c     mayobhúr adviṣeṇiyáḥ
1.187.03d     sákhā suśévo ádvayāḥ

1.187.04a     táva tiyé pito rásā
1.187.04b     rájāṃsi ánu víṣṭhitāḥ
1.187.04c     diví vā^́tā iva śritā^́ḥ

1.187.05a     táva tyé pito dádatas
1.187.05b     táva svādiṣṭha té pito
1.187.05c     prá svādmā^́no rásānãṃ
1.187.05d     tuvigrī^́vā iverate

1.187.06a     tuvé pito mahā^́nãṃ
1.187.06b     devā^́nãm máno hitám
1.187.06c     ákāri cā^́ru ketúnā
1.187.06d     távā^́him ávasāvadhīt

1.187.07a     yád adó pito ájagan
1.187.07b     vivásva párvatānãm
1.187.07c     átrā cin no madho pito
1.187.07d     áram bhakṣā^́ya gamiyāḥ

1.187.08a     yád apā^́m óṣadhīnãm
1.187.08b     pariṃśám āriśā^́mahe
1.187.08c     vā^́tāpe pī^́va íd bhava

1.187.09a     yát te soma gávāśiro
1.187.09b     yávāśiro bhájāmahe
1.187.09c     vā^́tāpe pī^́va íd bhava

1.187.10a     karambhá oṣadhe bhava
1.187.10b     pī^́vo vr̥kká udārathíḥ
1.187.10c     vā^́tāpe pī^́va íd bhava

1.187.11a     táṃ tvā vayám pito
1.187.11b     vácobhir gā^́vo ná havyā^́ suṣūdima
1.187.11c     devébhyas tvā sadhamā^́dam
1.187.11d     asmábhyaṃ tvā sadhamā^́dam

188

1.188.01a     sámiddho adyá rājasi
1.188.01b     devó devaíḥ sahasrajit
1.188.01c     dūtó havyā^́ kavír vaha

1.188.02a     tánūnapād r̥táṃ yaté
1.188.02b     mádhvā yajñáḥ sám ajyate
1.188.02c     dádhat sahasríṇīr íṣaḥ

1.188.03a     ājúhvāno na ī^́ḍiyo
1.188.03b     devā^́m̐ ā^́ vakṣi yajñíyān
1.188.03c     ágne sahasrasā^́ asi

1.188.04a     prācī^́nam barhír ójasā
1.188.04b     sahásravīram astr̥ṇan
1.188.04c     yátrādityā virā^́jatha

1.188.05a     virā^́ṭ samrā^́ḍ vibhvī^́ḥ prabhvī^́r
1.188.05b     bahvī^́ś ca bhū^́yasīś ca yā^́ḥ
1.188.05c     dúro ghr̥tā^́ni akṣaran

1.188.06a     surukmé hí supéśasā
1.188.06b     ádhi śriyā^́ virā^́jataḥ
1.188.06c     uṣā^́sāv éhá sīdatām

1.188.07a     prathamā^́ hí suvā^́casā
1.188.07b     hótārā daíviyā kavī^́
1.188.07c     yajñáṃ no yakṣatām imám

1.188.08a     bhā^́ratī^́ḷe sárasvati
1.188.08b     yā^́ vaḥ sárvā upabruvé
1.188.08c     tā^́ naś codayata śriyé

1.188.09a     tváṣṭā rūpā^́ṇi hí prabhúḥ
1.188.09b     paśū^́n víśvān samānajé
1.188.09c     téṣāṃ na sphātím ā^́ yaja

1.188.10a     úpa tmányā vanaspate
1.188.10b     pā^́tho devébhiyaḥ sr̥ja
1.188.10c     agnír havyā^́ni siṣvadat

1.188.11a     purogā^́ agnír devā^́nāṃ
1.188.11b     gāyatréṇa sám ajyate
1.188.11c     svā^́hākr̥tīṣu rocate

189

1.189.01a     ágne náya supáthā rāyé asmā^́n
1.189.01b     víśvāni deva vayúnāni vidvā^́n
1.189.01c     yuyodhí asmáj juhurāṇám éno
1.189.01d     bhū^́yiṣṭhāṃ te námaüktiṃ vidhema

1.189.02a     ágne tuvám pārayā návyo asmā^́n
1.189.02b     suastíbhir áti durgā^́ṇi víśvā
1.189.02c     pū^́ś ca pr̥thvī^́ · bahulā^́ na urvī^́
1.189.02d     bhávā tokā^́ya tánayāya śáṃ yóḥ

1.189.03a     ágne tvám asmád yuyodhi ámīvā
1.189.03b     ánagnitrā abhí ámanta kr̥ṣṭī^́ḥ
1.189.03c     púnar asmábhyaṃ suvitā^́ya deva
1.189.03d     kṣā^́ṃ víśvebhir amŕ̥tebhir yajatra

1.189.04a     pāhí no agne pāyúbhir ájasrair
1.189.04b     utá priyé sádana ā^́ śuśukvā^́n
1.189.04c     mā^́ te bhayáṃ jaritā^́raṃ yaviṣṭha
1.189.04d     nūnáṃ vidan mā^́ aparáṃ sahasvaḥ

1.189.05a     mā^́ no agne áva sr̥jo aghā^́ya
1.189.05b     aviṣyáve ripáve duchúnāyai
1.189.05c     mā^́ datváte dáśate mā^́dáte no
1.189.05d     mā^́ rī^́ṣate sahasāvan párā dāḥ

1.189.06a     ví gha tuvā^́vām̐ r̥tajāta yaṃsad
1.189.06b     gr̥ṇānó agne tanúve várūtham
1.189.06c     víśvād ririkṣór utá vā ninitsór
1.189.06d     abhihrútām ási hí deva viṣpáṭ

1.189.07a     tuváṃ tā^́m̐ agna ubháyān ví vidvā^́n
1.189.07b     véṣi prapitvé mánuṣo yajatra
1.189.07c     abhipitvé mánave śā^́siyo bhūr
1.189.07d     marmr̥jénya · uśígbhir ná akráḥ

1.189.08a     ávocāma nivácanāni asmin
1.189.08b     mā^́nasya sūnúḥ sahasāné agnaú
1.189.08c     vayáṃ sahásram ŕ̥ṣibhiḥ sanema
1.189.08d     vidyā^́meṣáṃ vr̥jánaṃ jīrádānum

190

1.190.01a     anarvā^́ṇaṃ vr̥ṣabhám mandrájihvam
1.190.01b     bŕ̥haspátiṃ vardhayā návyam arkaíḥ
1.190.01c     gāthāníyaḥ surúco yásya devā^́
1.190.01d     āśr̥ṇvánti návamānasya mártāḥ

1.190.02a     tám r̥tvíyā úpa vā^́caḥ sacante
1.190.02b     sárgo ná yó devayatā^́m ásarji
1.190.02c     bŕ̥haspátiḥ sá hí áñjo várāṃsi
1.190.02d     víbhvā^́bhavat sám r̥té mātaríśvā

1.190.03a     úpastutiṃ námasa údyatiṃ ca
1.190.03b     ślókaṃ yaṃsat savitéva prá bāhū^́
1.190.03c     asyá krátvā ahaníyo yó ásti
1.190.03d     mr̥gó ná bhīmó 'rakṣásas° túviṣmān

1.190.04a     asyá ślóko divī^́yate pr̥thivyā^́m
1.190.04b     átyo ná yaṃsad yakṣabhŕ̥d vícetāḥ
1.190.04c     mr̥gā^́ṇāṃ ná hetáyo yánti cemā^́
1.190.04d     bŕ̥haspáter áhimāyām̐ abhí dyū^́n

1.190.05a     yé tvā deva usrikám mányamānāḥ
1.190.05b     pāpā^́ bhadrám upajī^́vanti pajrā^́ḥ
1.190.05c     ná dūḍhíye ánu dadāsi vāmám
1.190.05d     bŕ̥haspate cáyasa ít píyārum

1.190.06a     supraétuḥ sūyávaso ná pánthā
1.190.06b     durniyántuḥ páriprīto ná mitráḥ
1.190.06c     anarvā^́ṇo abhí yé cákṣate no
1.190.06d     ápīvr̥tā aporṇuvánto asthuḥ

1.190.07a     sáṃ yáṃ stúbho avánayo ná yánti
1.190.07b     samudráṃ ná sraváto ródhacakrāḥ
1.190.07c     sá vidvā^́m̐ · ubháyaṃ caṣṭe antár
1.190.07d     bŕ̥haspátis tára ā^́paś ca gŕ̥dhraḥ

1.190.08a     evā^́ mahás tuvijātás túviṣmān
1.190.08b     bŕ̥haspátir vr̥ṣabhó dhāyi deváḥ
1.190.08c     sá na stutó vīrávad dhātu gómad
1.190.08d     vidyā^́meṣáṃ vr̥jánaṃ jīrádānum

191

1.191.01a     káṅkato ná káṅkato
1.191.01b     átho satīnákaṅkataḥ
1.191.01c     duvā^́v íti plúṣī íti
1.191.01d     ní adŕ̥ṣṭā alipsata

1.191.02a     adŕ̥ṣṭān hanti āyatī^́
1.191.02b     átho hanti parāyatī^́
1.191.02c     átho avaghnatī^́ hanti
1.191.02d     átho pinaṣṭi piṃṣatī^́

1.191.03a     śarā^́saḥ kúśarāso
1.191.03b     darbhā^́saḥ sairiyā^́ utá
1.191.03c     mauñjā^́ adŕ̥ṣṭā vairiṇā^́ḥ
1.191.03d     sárve sākáṃ ny àlipsata

1.191.04a     ní gā^́vo goṣṭhé asadan
1.191.04b     ní mr̥gā^́so avikṣata
1.191.04c     ní ketávo jánānãṃ
1.191.04d     ní adŕ̥ṣṭā alipsata

1.191.05a     etá u tyé práty adr̥śran
1.191.05b     pradoṣáṃ táskarā iva
1.191.05c     ádr̥ṣṭā víśvadr̥ṣṭāḥ
1.191.05d     prátibuddhā abhūtana

1.191.06a     dyaúr vaḥ pitā^́ pr̥thivī^́ mātā^́
1.191.06b     sómo bhrā^́tā^́ditiḥ svásā
1.191.06c     ádr̥ṣṭā víśvadr̥ṣṭās
1.191.06d     tíṣṭhateláyatā sú kam

1.191.07a     yé áṃsiyā yé áṅgiyāḥ
1.191.07b     sūcī^́kā yé prakaṅkatā^́ḥ
1.191.07c     ádr̥ṣṭāḥ kíṃ canéhá vaḥ
1.191.07d     sárve sākáṃ ní jasyata

1.191.08a     út purástāt sū^́rya eti
1.191.08b     viśvádr̥ṣṭo adr̥ṣṭahā^́
1.191.08c     adŕ̥ṣṭān sárvāñ jambháyan
1.191.08d     sárvāś ca yātudhāníyaḥ

1.191.09a     úd apaptad asaú sū^́ryaḥ
1.191.09b     purú víśvāni jū^́ruvan
1.191.09c     ādityáḥ párvatebhiyo
1.191.09d     viśvádr̥ṣṭo adr̥ṣṭahā^́

1.191.10a     sū^́rye viṣám ā^́ sajāmi
1.191.10b     dŕ̥tiṃ súrāvato gr̥hé
1.191.10c     só cin nú ná marāti
1.191.10d     nó vayám marāma
1.191.10e     āré asya yójanaṃ hariṣṭhā^́
1.191.10f     mádhu tvā madhulā^́ cakāra

1.191.11a     iyattikā^́ śakuntikā^́
1.191.11b     sakā^́ jaghāsa te viṣám
1.191.11c     só cin nú ná marāti
1.191.11d     nó vayám marāma
1.191.11e     āré asya yójanaṃ hariṣṭhā^́
1.191.11f     mádhu tvā madhulā^́ cakāra

1.191.12a     tríḥ saptá viṣpuliṅgakā^́
1.191.12b     viṣásya púṣiyam akṣan
1.191.12c     tā^́ś cin nú ná maranti
1.191.12d     nó vayám marāma
1.191.12e     āré asya yójanaṃ hariṣṭhā^́
1.191.12f     mádhu tvā madhulā^́ cakāra

1.191.13a     navānā^́ṃ navatīnã^́ṃ
1.191.13b     viṣásya rópuṣīṇãm
1.191.13c     sárvāsām agrabhaṃ nā^́ma
1.191.13d     nó vayám marāma
1.191.13e     āré asya yójanaṃ hariṣṭhā^́
1.191.13f     mádhu tvā madhulā^́ cakāra

1.191.14a     tríḥ saptá mayūríyaḥ
1.191.14b     saptá svásāro agrúvaḥ
1.191.14c     tā^́s te viṣáṃ ví jabhrira
1.191.14d     udakáṃ kumbhínīr iva

1.191.15a     iyattakáḥ kuṣumbhakás
1.191.15b     takám bhinadmi áśmanā
1.191.15c     táto viṣám prá vāvr̥te
1.191.15d     párācīr ánu saṃvátaḥ

1.191.16a     kuṣumbhakás tád abravīd
1.191.16b     giréḥ pravartamānakáḥ
1.191.16c     vŕ̥ścikasyārasáṃ viṣám
1.191.16d     arasáṃ vr̥ścika te viṣám