The Rigveda: Metrically Restored Text

Metrically Restored Text

Karen Thomson and Jonathan Slocum

Index

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87

---

N.B. An earlier version of this text was published in electronic form as:

RIG VEDA, A METRICALLY RESTORED TEXT, edited by Barend A. van Nooten and Gary B. Holland, Harvard Oriental Series, vol. 50.

That electronic text, itself derived from a much earlier UT Linguistics Research Center electronic text, bore the legend:

Copyright with the authors and Harvard Oriental Series. The electronic text may be used for research but not for commercial purposes.

Our use here is for research. The electronic text has been much revised (see our Introduction) and converted to Unicode/HTML in this online edition; re: the significance of color and smaller type size in particular, see the Popular Rigveda. Copyright to all revisions and HTML tagging is assigned to the University of Texas, though responsibility for content lies with the authors. This HTML edition may be used for research but not for commercial purposes.

---

1

5.001.01a     ábodhi agníḥ samídhā jánānām
5.001.01b     práti dhenúm ivāyatī^́m uṣā^́sam
5.001.01c     yahvā^́ iva prá vayā^́m ujjíhānāḥ
5.001.01d     prá bhānávaḥ sisrate nā^́kam ácha

5.001.02a     ábodhi hótā yajáthāya devā^́n
5.001.02b     ūrdhvó agníḥ sumánāḥ prātár asthāt
5.001.02c     sámiddhasya rúśad adarśi pā^́jo
5.001.02d     mahā^́n devás támaso nír amoci

5.001.03a     yád īṃ gaṇásya raśanā^́m ájīgaḥ
5.001.03b     śúcir aṅkte śúcibhir góbhir agníḥ
5.001.03c     ā^́d dákṣinā yujyate vājayánti
5.001.03d     uttānā^́m ūrdhvó adhayaj juhū^́bhiḥ

5.001.04a     agním áchā devayatā^́m mánāṃsi
5.001.04b     cákṣūṃṣīva sū^́riye sáṃ caranti
5.001.04c     yád īṃ súvāte uṣásā vírūpe
5.001.04d     śvetó vājī^́ jāyate ágre áhnām

5.001.05a     jániṣṭa hí jéniyo ágre áhnāṃ
5.001.05b     hitó hitéṣu aruṣó váneṣu
5.001.05c     dáme-dame saptá rátnā dádhāno
5.001.05d     agnír hótā ní ṣasādā yájīyān

5.001.06a     agnír hótā ní asīdad yájīyān
5.001.06b     upásthe mātúḥ surabhā^́ uloké†
5.001.06c     yúvā kavíḥ puruniṣṭhá r̥tā^́vā
5.001.06d     dhartā^́ kr̥ṣṭīnā^́m utá mádhya iddháḥ

5.001.07a     prá ṇú tyáṃ vípram adhvaréṣu sādhúm
5.001.07b     agníṃ hótāram īḷate námobhiḥ
5.001.07c     ā^́ yás tatā^́na ródasī r̥téna
5.001.07d     nítyam mr̥janti vājínaṃ ghr̥téna

5.001.08a     mārjālíyo mr̥jyate své dámūnāḥ
5.001.08b     kavipraśastó átithiḥ śivó naḥ
5.001.08c     sahásraśr̥ṅgo vr̥ṣabhás tádojā
5.001.08d     víśvām̐ agne sáhasā prā^́si anyā^́n

5.001.09a     prá sadyó agne áti eṣi anyā^́n
5.001.09b     āvír yásmai cā^́rutamo babhū^́tha
5.001.09c     īḷéniyo vapuṣíyo vibhā^́vā
5.001.09d     priyó viśā^́m átithir mā^́nuṣīṇām

5.001.10a     túbhyam bharanti kṣitáyo yaviṣṭha
5.001.10b     balím agne ántita ótá dūrā^́t
5.001.10c     ā^́ bhándiṣṭhasya sumatíṃ cikiddhi
5.001.10d     br̥hát te agne máhi śárma bhadrám

5.001.11a     ā^́dyá rátham bhānumo bhānumántam
5.001.11b     ágne tíṣṭha yajatébhiḥ sámantam
5.001.11c     vidvā^́n pathīnā^́m urú antárikṣam
5.001.11d     éhá devā^́n havirádyāya vakṣi

5.001.12a     ávocāma kaváye médhiyāya
5.001.12b     váco vandā^́ru vr̥ṣabhā^́ya vŕ̥ṣṇe
5.001.12c     gáviṣṭhiro námasā stómam agnaú
5.001.12d     divī^́va rukmám uruvyáñcam aśret

2

5.002.01a     kumārám mātā^́ yuvatíḥ sámubdhaṃ
5.002.01b     gúhā bibharti ná dadāti pitré
5.002.01c     ánīkam asya ná mináj jánāsaḥ
5.002.01d     puráḥ paśyanti níhitam arataú

5.002.02a     kám etáṃ tuváṃ yuvate kumārám
5.002.02b     péṣī bibharṣi máhiṣī jajāna
5.002.02c     pūrvī^́r hí gárbhaḥ śarádo vavárdha
5.002.02d     ápaśyaṃ jātáṃ yád ásūta mātā^́

5.002.03a     híraṇyadantaṃ śúcivarṇam ārā^́t
5.002.03b     kṣétrād apaśyam ā^́yudhā mímānam
5.002.03c     dadānó asmā amŕ̥taṃ vipŕ̥kvat
5.002.03d     kím mā^́m anindrā^́ḥ kr̥ṇavann anukthā^́ḥ

5.002.04a     kṣétrād apaśyaṃ sanutáś cárantaṃ
5.002.04b     sumád yūtháṃ ná purú śóbhamānam
5.002.04c     ná tā^́ agr̥bhrann ájaniṣṭa hí ṣáḥ
5.002.04d     páliknīr íd yuvatáyo bhavanti

5.002.05a     ké me maryakáṃ ví yavanta góbhir
5.002.05b     ná yéṣāṃ gopā^́ áraṇaś cid ā^́sa
5.002.05c     yá īṃ jagr̥bhúr áva té sr̥jantu
5.002.05d     ā^́jāti paśvá úpa naś cikitvā^́n

5.002.06a     vasā^́ṃ rā^́jānaṃ vasatíṃ jánānām
5.002.06b     árātayo ní dadhur mártiyeṣu
5.002.06c     bráhmāṇi átrer áva táṃ sr̥jantu
5.002.06d     ninditā^́ro níndiyāso bhavantu

5.002.07a     śúnaś cic chépaṃ níditaṃ sahásrād
5.002.07b     yū^́pād amuñco áśamiṣṭa hí ṣáḥ
5.002.07c     evā^́smád agne ví mumugdhi pā^́śān
5.002.07d     hótaś cikitva ihá tū^́ niṣádya

5.002.08a     hr̥ṇīyámāno ápa hí mád aíyeḥ
5.002.08b     prá me devā^́nāṃ vratapā^́ uvāca
5.002.08c     índro vidvā^́m̐ ánu hí tvā cacákṣa
5.002.08d     ténāhám agne ánuśiṣṭa ā^́gām

5.002.09a     ví jyótiṣā br̥hatā^́ bhāti agnír
5.002.09b     āvír víśvāni kr̥ṇute mahitvā^́
5.002.09c     prā^́devīr māyā^́ḥ sahate durévāḥ
5.002.09d     śíśīte śŕ̥ṅge rákṣase viníkṣe

5.002.10a     utá svānā^́so diví ṣantu agnés
5.002.10b     tigmā^́yudhā rákṣase hántavā^́ u
5.002.10c     máde cid asya prá rujanti bhā^́mā
5.002.10d     ná varante paribā^́dho ádevīḥ

5.002.11a     etáṃ te stómaṃ tuvijāta vípro
5.002.11b     ráthaṃ ná dhī^́raḥ suápā atakṣam
5.002.11c     yádī^́d agne práti tváṃ deva háryāḥ
5.002.11d     súvarvatīr apá enā jayema

5.002.12a     tuvigrī^́vo vr̥ṣabhó vāvr̥dhānó
5.002.12b     aśatrú aryáḥ sám ajāti védaḥ
5.002.12c     ítīmám agním amŕ̥tā avocan
5.002.12d     barhíṣmate mánave śárma yaṃsad
5.002.12e     dhavíṣmate mánave śárma yaṃsat

3

5.003.01a     tuvám agne váruṇo jā^́yase yát
5.003.01b     tuvám mitró bhavasi yát sámiddhaḥ
5.003.01c     tuvé víśve sahasas putra devā^́s
5.003.01d     tuvám índro dāśúṣe mártiyāya

5.003.02a     tvám aryamā^́ bhavasi yát kanī^́nāṃ
5.003.02b     nā^́ma svadhāvan gúhiyam bibharṣi
5.003.02c     añjánti mitráṃ súdhitaṃ ná góbhir
5.003.02d     yád dámpatī sámanasā kr̥ṇóṣi

5.003.03a     táva śriyé marúto marjayanta
5.003.03b     rúdra yát te jánima cā^́ru citrám
5.003.03c     padáṃ yád víṣṇor upamáṃ nidhā^́yi
5.003.03d     téna pāsi gúhiyaṃ nā^́ma gónām

5.003.04a     táva śriyā^́ sudŕ̥śo deva devā^́ḥ
5.003.04b     purū^́ dádhānā amŕ̥taṃ sapanta
5.003.04c     hótāram agním mánuṣo ní ṣedur
5.003.04d     daśasyánta uśíjaḥ śáṃsam āyóḥ

5.003.05a     ná tvád dhótā pū^́rvo agne yájīyān
5.003.05b     ná kā^́viyaiḥ paró asti svadhāvaḥ
5.003.05c     viśáś ca yásyā átithir bhávāsi
5.003.05d     sá yajñéna vanavad deva mártān

5.003.06a     vayám agne vanuyāma tuvótā
5.003.06b     vasūyávo havíṣā búdhyamānāḥ
5.003.06c     vayáṃ samaryé vidátheṣu áhnāṃ
5.003.06d     vayáṃ rāyā^́ sahasas putra mártān

5.003.07a     yó na ā^́go abhí éno bhárāti
5.003.07b     ádhī^́d aghám agháśaṃse dadhāta
5.003.07c     jahī^́ cikitvo abhíśastim etā^́m
5.003.07d     ágne yó no marcáyati dvayéna

5.003.08a     tuvā^́m asyā^́ viúṣi deva pū^́rve
5.003.08b     dūtáṃ kr̥ṇvānā^́ ayajanta havyaíḥ
5.003.08c     saṃsthé yád agna ī^́yase rayīṇā^́ṃ
5.003.08d     devó mártair vásubhir idhyámānaḥ

5.003.09a     áva spr̥dhi pitáraṃ yódhi vidvā^́n
5.003.09b     putró yás te sahasaḥ sūna ūhé
5.003.09c     kadā^́ cikitvo abhí cakṣase no
5.003.09d     ágne kadā^́m̐ r̥tacíd yātayāse

5.003.10a     bhū^́ri nā^́ma vándamāno dadhāti
5.003.10b     pitā^́ vaso yádi táj joṣáyāse
5.003.10c     kuvíd devásya sáhasā cakānáḥ
5.003.10d     sumnám agnír vanate vāvr̥dhānáḥ

5.003.11a     tuvám aṅgá jaritā^́raṃ yaviṣṭha
5.003.11b     víśvāni agne duritā^́ti parṣi
5.003.11c     stenā^́ adr̥śran ripávo jánāso
5.003.11d     ájñātaketā vr̥jinā^́ abhūvan

5.003.12a     imé yā^́māsas tuvadríg abhūvan
5.003.12b     vásave vā tád íd ā^́go avāci
5.003.12c     nā^́hāyám agnír abhíśastaye no
5.003.12d     ná rī^́ṣate vāvr̥dhānáḥ párā dāt

4

5.004.01a     tuvā^́m agne vásupatiṃ vásūnām
5.004.01b     abhí prá mande adhvaréṣu rājan
5.004.01c     tváyā vā^́jaṃ vājayánto jayema
5.004.01d     abhí ṣyāma pr̥tsutī^́r mártiyānām

5.004.02a     havyavā^́ḷ agnír ajáraḥ pitā^́ no
5.004.02b     vibhúr vibhā^́vā sudŕ̥śīko asmé
5.004.02c     sugārhapatyā^́ḥ sám íṣo didīhi
5.004.02d     asmadríak sám mimīhi śrávāṃsi

5.004.03a     viśā^́ṃ kavíṃ viśpátim mā^́nuṣīṇāṃ
5.004.03b     śúcim pavākáṃ⁺ ghr̥tápr̥ṣṭham agním
5.004.03c     ní hótāraṃ viśvavídaṃ dadhidhve
5.004.03d     sá devéṣu vanate vā^́riyāṇi

5.004.04a     juṣásva agna íḷayā sajóṣā
5.004.04b     yátamāno raśmíbhiḥ sū^́riyasya
5.004.04c     juṣásva naḥ samídhaṃ jātaveda
5.004.04d     ā^́ ca devā^́n havirádyāya vakṣi

5.004.05a     júṣṭo dámūnā átithir duroṇá
5.004.05b     imáṃ no yajñám úpa yāhi vidvā^́n
5.004.05c     víśvā agne abhiyújo vihátyā
5.004.05d     śatrūyatā^́m ā^́ bharā bhójanāni

5.004.06a     vadhéna dásyum prá hí cātáyasva
5.004.06b     váyaḥ kr̥ṇvānás tanúve suvā^́yai
5.004.06c     píparṣi yát sahasas putra devā^́n
5.004.06d     só 'gne° pāhi nr̥tama vā^́je asmā^́n

5.004.07a     vayáṃ te agna ukthaír vidhema
5.004.07b     vayáṃ havyaíḥ pavāka⁺ bhadraśoce
5.004.07c     asmé rayíṃ viśvávāraṃ sám inva
5.004.07d     asmé víśvāni dráviṇāni dhehi

5.004.08a     asmā^́kam agne adhvaráṃ juṣasva
5.004.08b     sáhasaḥ sūno triṣadhastha havyám
5.004.08c     vayáṃ devéṣu sukŕ̥taḥ siyāma
5.004.08d     śármaṇā nas trivárūthena pāhi

5.004.09a     víśvāni no durgáhā jātavedaḥ
5.004.09b     síndhuṃ ná nāvā^́ duritā^́ti parṣi
5.004.09c     ágne atriván námasā gr̥ṇānó
5.004.09d     asmā^́kam bodhi avitā^́ tanū^́nām

5.004.10a     yás tvā hr̥dā^́ kīríṇā mányamāno
5.004.10b     ámartiyam mártiyo jóhavīmi
5.004.10c     jā^́tavedo yáśo asmā^́su dhehi
5.004.10d     prajā^́bhir agne amr̥tatvám aśyām

5.004.11a     yásmai tuváṃ sukŕ̥te jātaveda
5.004.11b     ulokám† agne kr̥ṇávaḥ siyonám
5.004.11c     aśvínaṃ sá putŕ̥ṇaṃ vīrávantaṃ
5.004.11d     gómantaṃ rayíṃ naśate suastí

5

5.005.01a     súsamiddhāya śocíṣe
5.005.01b     ghr̥táṃ tīvráṃ juhotana
5.005.01c     agnáye jātávedase

5.005.02a     nárāśáṃsaḥ suṣūdati
5.005.02b     imáṃ yajñám ádābhiyaḥ
5.005.02c     kavír hí mádhuhastiyaḥ

5.005.03a     īḷitó agna ā^́ vaha
5.005.03b     índraṃ citrám ihá priyám
5.005.03c     sukhaí ráthebhir ūtáye

5.005.04a     ū^́rṇamradā ví prathasva
5.005.04b     abhí arkā^́ anūṣata
5.005.04c     bhávā naḥ śubhra sātáye

5.005.05a     dévīr dvāro ví śrayadhvaṃ
5.005.05b     suprāyaṇā^́ na ūtáye
5.005.05c     prá-pra yajñám pr̥ṇītana

5.005.06a     suprátīke vayovŕ̥dhā
5.005.06b     yahvī^́ r̥tásya mātárā
5.005.06c     doṣā^́m uṣā^́sam īmahe

5.005.07a     vā^́tasya pátman īḷitā^́
5.005.07b     daívyā hótārā mánuṣaḥ
5.005.07c     imáṃ no yajñám ā^́ gatam

5.005.08a     íḷā sárasvatī mahī^́
5.005.08b     tisró devī^́r mayobhúvaḥ
5.005.08c     barhíḥ sīdantu asrídhaḥ

5.005.09a     śivás tvaṣṭar ihā^́ gahi
5.005.09b     vibhúḥ póṣa utá tmánā
5.005.09c     yajñé-yajñe na úd ava

5.005.10a     yátra véttha vanaspate
5.005.10b     devā^́nāṃ gúhyā nā^́māni
5.005.10c     tátra havyā^́ni gāmaya

5.005.11a     svā^́hāgnáye váruṇāya
5.005.11b     svā^́héndrāya marúdbhiyaḥ
5.005.11c     svā^́hā devébhiyo havíḥ

6

5.006.01a     agníṃ tám manye yó vásur
5.006.01b     ástaṃ yáṃ yánti dhenávaḥ
5.006.01c     ástam árvanta āśávo
5.006.01d     ástaṃ nítyāso vājína
5.006.01e     íṣaṃ stotŕ̥bhya ā^́ bhara

5.006.02a     só agnír yó vásur gr̥ṇé
5.006.02b     sáṃ yám āyánti dhenávaḥ
5.006.02c     sám árvanto raghudrúvaḥ
5.006.02d     sáṃ sujātā^́saḥ sūráya
5.006.02e     íṣaṃ stotŕ̥bhya ā^́ bhara

5.006.03a     agnír hí vājínaṃ viśé
5.006.03b     dádāti viśvácarṣaṇiḥ
5.006.03c     agnī^́ rāyé suābhúvaṃ
5.006.03d     sá prītó yāti vā^́riyam
5.006.03e     íṣaṃ stotŕ̥bhya ā^́ bhara

5.006.04a     ā^́ te agna idhīmahi
5.006.04b     dyumántaṃ deva ajáram
5.006.04c     yád dha syā^́ te pánīyasī
5.006.04d     samíd dīdáyati dyávi
5.006.04e     íṣaṃ stotŕ̥bhya ā^́ bhara

5.006.05a     ā^́ te agna r̥cā^́ havíḥ
5.006.05b     śúkrasya śociṣas pate
5.006.05c     súścandra dásma víśpate
5.006.05d     hávyavāṭ túbhyaṃ hūyata
5.006.05e     íṣaṃ stotŕ̥bhya ā^́ bhara

5.006.06a     pró tyé agnáyo agníṣu
5.006.06b     víśvam puṣyanti vā^́riyam
5.006.06c     té hinvire tá invire
5.006.06d     tá iṣaṇyanti ānuṣág
5.006.06e     íṣaṃ stotŕ̥bhya ā^́ bhara

5.006.07a     táva tyé agne arcáyo
5.006.07b     máhi vrādhanta vājínaḥ
5.006.07c     yé pátvabhiḥ śaphā^́nãṃ
5.006.07d     vrajā^́ bhuránta gónãm
5.006.07e     íṣaṃ stotŕ̥bhya ā^́ bhara

5.006.08a     návā no agna ā^́ bhara
5.006.08b     stotŕ̥bhyaḥ sukṣitī^́r íṣaḥ
5.006.08c     té siyāma yá ānr̥cús
5.006.08d     tvā^́dūtāso dáme-dama
5.006.08e     íṣaṃ stotŕ̥bhya ā^́ bhara

5.006.09a     ubhé suścandra sarpíṣo
5.006.09b     dárvī śrīṇīṣa āsáni
5.006.09c     utó na út pupūriyā
5.006.09d     ukthéṣu śavasas pata
5.006.09e     íṣaṃ stotŕ̥bhya ā^́ bhara

5.006.10a     evā^́m̐ agním ajuryamur
5.006.10b     gīrbhír yajñébhir ānuṣák
5.006.10c     dádhad asmé suvī^́riyam
5.006.10d     utá tyád āśuáśviyam
5.006.10e     íṣaṃ stotŕ̥bhya ā^́ bhara

7

5.007.01a     sákhāyaḥ sáṃ vaḥ samyáñcam
5.007.01b     íṣaṃ stómaṃ ca agnáye
5.007.01c     várṣiṣṭhāya kṣitīnã^́m
5.007.01d     ūrjó náptre sáhasvate

5.007.02a     kútrā cid yásya sámr̥tau
5.007.02b     raṇvā^́ náro nr̥ṣádane
5.007.02c     árhantaś cid yám indhaté
5.007.02d     saṃjanáyanti jantávaḥ

5.007.03a     sáṃ yád iṣó vánāmahe
5.007.03b     sáṃ havyā^́ mā^́nuṣāṇãm
5.007.03c     utá dyumnásya śávasa
5.007.03d     r̥tásya raśmím ā^́ dade

5.007.04a     sá smā kr̥ṇoti ketúm ā^́
5.007.04b     náktaṃ cid dūrá ā^́ saté
5.007.04c     pavākó⁺ yád vánaspátīn
5.007.04d     prá smā minā^́ti ajáraḥ

5.007.05a     áva sma yásya véṣaṇe
5.007.05b     svédam pathíṣu júhvati
5.007.05c     abhī^́m áha svájeniyam
5.007.05d     bhū^́mā pr̥ṣṭhéva ruruhuḥ

5.007.06a     yám mártiyaḥ puruspŕ̥haṃ
5.007.06b     vidád víśvasya dhā^́yase
5.007.06c     prá svā^́danam pitūnã^́m
5.007.06d     ástatātiṃ cid āyáve

5.007.07a     sá hí ṣmā dhánva ā^́kṣitaṃ
5.007.07b     dā^́tā ná dā^́ti ā^́ paśúḥ
5.007.07c     híriśmaśruḥ śúcidann
5.007.07d     r̥bhúr ánibhr̥ṣṭataviṣiḥ

5.007.08a     śúciḥ ṣma yásmā atrivát
5.007.08b     prá svádhitīva rī^́yate
5.007.08c     suṣū^́r asūta mātā^́
5.007.08d     krāṇā^́ yád ānaśé bhágam

5.007.09a     ā^́ yás te sarpirāsute
5.007.09b     ágne śám ásti dhā^́yase
5.007.09c     aíṣu dyumnám utá śráva
5.007.09d     ā^́ cittám mártiyeṣu dhāḥ

5.007.10a     íti cin manyúm adhríjas
5.007.10b     tvā^́dātam ā^́ paśúṃ dade
5.007.10c     ã^́d agne ápr̥ṇato
5.007.10d     átriḥ sāsahiyād dásyūn
5.007.10e     iṣáḥ sāsahiyān nr̥̄^́n

8

5.008.01a     tuvā^́m agna r̥tāyávaḥ sám īdhire
5.008.01b     pratnám pratnā^́sa ūtáye sahaskr̥ta
5.008.01c     puruścandráṃ yajatáṃ viśvádhāyasaṃ
5.008.01d     dámūnasaṃ gr̥hápatiṃ váreṇiyam

5.008.02a     tuvā^́m agne átithim pūrviyáṃ víśaḥ
5.008.02b     śocíṣkeśaṃ gr̥hápatiṃ ní ṣedire
5.008.02c     br̥hátketum pururū^́paṃ dhanaspŕ̥taṃ
5.008.02d     suśármāṇaṃ suávasaṃ jaradvíṣam

5.008.03a     tuvā^́m agne mā^́nuṣīr īḷate víśo
5.008.03b     hotrāvídaṃ víviciṃ ratnadhā^́tamam
5.008.03c     gúhā sántaṃ subhaga viśvádarśataṃ
5.008.03d     tuviṣvaṇásaṃ suyájaṃ ghr̥taśríyam

5.008.04a     tuvā^́m agne dharṇasíṃ viśvádhā vayáṃ
5.008.04b     gīrbhír gr̥ṇánto námasópa sedima
5.008.04c     sá no juṣasva samidhānó aṅgiro
5.008.04d     devó mártasya yaśásā sudītíbhiḥ

5.008.05a     tuvám agne pururū^́po viśé-viśe
5.008.05b     váyo dadhāsi pratnáthā puruṣṭuta
5.008.05c     purū^́ṇi ánnā sáhasā ví rājasi
5.008.05d     tvíṣiḥ sā^́ te titviṣāṇásya nā^́dhŕ̥ṣe

5.008.06a     tuvā^́m agne samidhānáṃ yaviṣṭhiya
5.008.06b     devā^́ dūtáṃ cakrire havyavā^́hanam
5.008.06c     urujráyasaṃ ghr̥táyonim ā^́hutaṃ
5.008.06d     tveṣáṃ cákṣur dadhire codayánmati

5.008.07a     tuvā^́m agne pradíva ā^́hutaṃ ghr̥taíḥ
5.008.07b     sumnāyávaḥ suṣamídhā sám īdhire
5.008.07c     sá vāvr̥dhāná óṣadhībhir ukṣitó
5.008.07d     abhí jráyāṃsi pā^́rthivā ví tiṣṭhase

9

5.009.01a     tuvā^́m agne havíṣmanto
5.009.01b     devám mártāsa īḷate
5.009.01c     mánye tvā jātávedasaṃ
5.009.01d     sá havyā^́ vakṣi ānuṣák

5.009.02a     agnír hótā dā^́suvataḥ
5.009.02b     kṣáyasya vr̥ktábarhiṣaḥ
5.009.02c     sáṃ yajñā^́saś cáranti yáṃ
5.009.02d     sáṃ vā^́jāsaḥ śravasyávaḥ

5.009.03a     utá sma yáṃ śíśuṃ yathā
5.009.03b     návaṃ jániṣṭa aráṇī
5.009.03c     dhartā^́ram mā^́nuṣīṇãṃ
5.009.03d     viśā^́m agníṃ suadhvarám

5.009.04a     utá sma durgr̥bhīyase
5.009.04b     putró ná hvāriyā^́ṇãm
5.009.04c     purū^́ yó dágdhā^́si vánā
5.009.04d     ágne paśúr ná yávase

5.009.05a     ádha sma yásya arcáyaḥ
5.009.05b     samyák saṃyánti dhūmínaḥ
5.009.05c     yád īm áha tritó diví
5.009.05d     úpa dhmā^́teva dhámati
5.009.05e     śíśīte dhmātárī yathā

5.009.06a     távāhám agna ūtíbhir
5.009.06b     mitrásya ca práśastibhiḥ
5.009.06c     dveṣoyúto ná duritā^́
5.009.06d     turyā^́ma mártiyānãm

5.009.07a     táṃ no agne abhī^́ náro
5.009.07b     rayíṃ sahasva ā^́ bhara
5.009.07c     sá kṣepayat sá poṣayad
5.009.07d     bhúvad vā^́jasya sātáya
5.009.07e     utaídhi pr̥tsú no vr̥dhé

10

5.010.01a     ágna ójiṣṭham ā^́ bhara
5.010.01b     dyumnám asmábhyam adhrigo
5.010.01c     prá no rāyā^́ párīṇasā
5.010.01d     rátsi vā^́jāya pánthãm

5.010.02a     tuváṃ no agne adbhuta
5.010.02b     krátvā dákṣasya maṃhánā
5.010.02c     tuvé asuryàm ā^́ruhat
5.010.02d     krāṇā^́ mitró ná yajñíyaḥ

5.010.03a     tuváṃ no agna eṣãṃ
5.010.03b     gáyam puṣṭíṃ ca vardhaya
5.010.03c     yé stómebhiḥ prá sūráyo
5.010.03d     náro maghā^́ni ānaśúḥ

5.010.04a     yé agne candra te gíraḥ
5.010.04b     śumbhánti áśvarādhasaḥ
5.010.04c     śúṣmebhiḥ śuṣmíṇo náro
5.010.04d     diváś cid yéṣãm br̥hát
5.010.04e     sukīrtír bódhati tmánā

5.010.05a     táva tyé agne arcáyo
5.010.05b     bhrā^́janto yanti dhr̥ṣṇuyā^́
5.010.05c     párijmāno ná vidyútaḥ
5.010.05d     svānó rátho ná vājayúḥ

5.010.06a     nũ^́ no agna ūtáye
5.010.06b     sabā^́dhasaś ca rātáye
5.010.06c     asmā^́kāsaś ca sūráyo
5.010.06d     víśvā ā^́śās tarīṣáṇi

5.010.07a     tuváṃ no agne aṅgiraḥ
5.010.07b     stutá stávāna ā^́ bhara
5.010.07c     hótar vibhvāsáhaṃ rayíṃ
5.010.07d     stotŕ̥bhya stávase ca na
5.010.07e     utaídhi pr̥tsú no vr̥dhé

11

5.011.01a     jánasya gopā^́ ajaniṣṭa jā^́gr̥vir
5.011.01b     agníḥ sudákṣaḥ suvitā^́ya návyase
5.011.01c     ghr̥tápratīko br̥hatā^́ divispŕ̥śā
5.011.01d     dyumád ví bhāti bharatébhiyaḥ śúciḥ

5.011.02a     yajñásya ketúm prathamám puróhitam
5.011.02b     agníṃ náras triṣadhasthé sám īdhire
5.011.02c     índreṇa devaíḥ saráthaṃ sá barhíṣi
5.011.02d     sī^́dan ní hótā yajáthāya sukrátuḥ

5.011.03a     ásammr̥ṣṭo jāyase mātaróḥ śúcir
5.011.03b     mandráḥ kavír úd atiṣṭho vivásvataḥ
5.011.03c     ghr̥téna tvāvardhayann agna āhuta
5.011.03d     dhūmás te ketúr abhavad diví śritáḥ

5.011.04a     agnír no yajñám úpa vetu sādhuyā^́
5.011.04b     agníṃ náro ví bharante gr̥hé-gr̥he
5.011.04c     agnír dūtó abhavad dhavyavā^́hano
5.011.04d     agníṃ vr̥ṇānā^́ vr̥ṇate kavíkratum

5.011.05a     túbhyedám agne mádhumattamaṃ vácas
5.011.05b     túbhyam manīṣā^́ iyám astu śáṃ hr̥dé
5.011.05c     tuvā^́ṃ gíraḥ síndhum ivāvánīr mahī^́r
5.011.05d     ā^́ pr̥ṇanti śávasā vardháyanti ca

5.011.06a     tuvā^́m agne áṅgiraso gúhā hitám
5.011.06b     ánv avindañ chiśriyāṇáṃ váne-vane
5.011.06c     sá jāyase mathyámānaḥ sáho mahát
5.011.06d     tuvā^́m āhuḥ sáhasas putrám aṅgiraḥ

12

5.012.01a     prá agnáye br̥haté yajñíyāya
5.012.01b     r̥tásya vŕ̥ṣṇe ásurāya mánma
5.012.01c     ghr̥táṃ ná yajñá āsíye súpūtaṃ
5.012.01d     gíram bhare vr̥ṣabhā^́ya pratīcī^́m

5.012.02a     r̥táṃ cikitva r̥tám íc cikiddhi
5.012.02b     r̥tásya dhā^́rā ánu tr̥ndhi pūrvī^́ḥ
5.012.02c     nā^́háṃ yātúṃ sáhasā ná dvayéna
5.012.02d     r̥táṃ sapāmi aruṣásya vŕ̥ṣṇaḥ

5.012.03a     káyā no agna r̥táyann r̥téna
5.012.03b     bhúvo návedā ucáthasya návyaḥ
5.012.03c     védā me devá r̥tupā^́ r̥tūnā^́ṃ
5.012.03d     nā^́hám pátiṃ sanitúr asyá rāyáḥ

5.012.04a     ké te agne ripáve bándhanāsaḥ
5.012.04b     ké pāyávaḥ saniṣanta dyumántaḥ
5.012.04c     ké dhāsím agne ánr̥tasya pānti
5.012.04d     ká ā^́sato vácasaḥ santi gopā^́ḥ

5.012.05a     sákhāyas te víṣuṇā agna eté
5.012.05b     śivā^́saḥ sánto áśivā abhūvan
5.012.05c     ádhūrṣata svayám eté vácobhir
5.012.05d     r̥jūyaté vr̥jinā^́ni bruvántaḥ

5.012.06a     yás te agne námasā yajñám ī^́ṭṭa
5.012.06b     r̥táṃ sá pāti† aruṣásya vŕ̥ṣṇaḥ
5.012.06c     tásya kṣáyaḥ pr̥thúr ā^́ sādhúr etu
5.012.06d     prasársrāṇasya náhuṣasya śéṣaḥ

13

5.013.01a     árcantas tvā havāmahe
5.013.01b     árcantaḥ sám idhīmahi
5.013.01c     ágne árcanta ūtáye

5.013.02a     agné stómam manāmahe
5.013.02b     sidhrám adyá divispŕ̥śaḥ
5.013.02c     devásya draviṇasyávaḥ

5.013.03a     agnír juṣata no gíro
5.013.03b     hótā yó mā^́nuṣeṣu ā^́
5.013.03c     sá yakṣad daíviyaṃ jánam

5.013.04a     tvám agne sapráthā asi
5.013.04b     júṣṭo hótā váreṇiyaḥ
5.013.04c     tváyā yajñáṃ ví tanvate

5.013.05a     tvā^́m agne vājasā^́tamaṃ
5.013.05b     víprā vardhanti súṣṭutam
5.013.05c     sá no rāsva suvī^́riyam

5.013.06a     ágne nemír arā^́m̐ iva
5.013.06b     devā^́ṃs tvám paribhū^́r asi
5.013.06c     ā^́ rā^́dhaś citrám r̥ñjase

14

5.014.01a     agníṃ stómena bodhaya
5.014.01b     samidhānó ámartiyam
5.014.01c     havyā^́ devéṣu no dadhat

5.014.02a     tám adhvaréṣu īḷate
5.014.02b     devám mártā ámartiyam
5.014.02c     yájiṣṭham mā^́nuṣe jáne

5.014.03a     táṃ hí śáśvanta ī^́ḷate
5.014.03b     srucā^́ deváṃ ghr̥taścútā
5.014.03c     agníṃ havyā^́ya vóḷhave

5.014.04a     agnír jātó arocata
5.014.04b     ghnán dásyūñ jyótiṣā támaḥ
5.014.04c     ávindad gā^́ apáḥ súvaḥ

5.014.05a     agním īḷéniyaṃ kavíṃ
5.014.05b     ghr̥tápr̥ṣṭhaṃ saparyata
5.014.05c     vétu me śr̥ṇávad dhávam

5.014.06a     agníṃ ghr̥téna vāvr̥dhuḥ
5.014.06b     stómebhir viśvácarṣaṇim
5.014.06c     suādhī^́bhir vacasyúbhiḥ

15

5.015.01a     prá vedháse kaváye védiyāya
5.015.01b     gíram bhare yaśáse pūrviyā^́ya
5.015.01c     ghr̥táprasatto ásuraḥ suśévo
5.015.01d     rāyó dhartā^́ dharúṇo vásvo agníḥ

5.015.02a     r̥téna rtáṃ dharúṇaṃ dhārayanta
5.015.02b     yajñásya śāké paramé víoman
5.015.02c     divó dhárman dharúṇe sedúṣo nr̥̄^́ñ
5.015.02d     jātaír ájātām̐ abhí yé nanakṣúḥ

5.015.03a     aṃhoyúvas tanúvas tanvate ví
5.015.03b     váyo mahád duṣṭáram pūrviyā^́ya
5.015.03c     sá saṃváto návajātas tuturyāt
5.015.03d     siṃháṃ ná kruddhám abhítaḥ pári ṣṭhuḥ

5.015.04a     mātéva yád bhárase paprathānó
5.015.04b     jánaṃ-janaṃ dhā^́yase cákṣase ca
5.015.04c     váyo-vayo jarase yád dádhānaḥ
5.015.04d     pári tmánā víṣurūpo jigāsi

5.015.05a     vā^́jo nú te śávasas pātu ántam
5.015.05b     urúṃ dóghaṃ dharúṇaṃ deva rāyáḥ
5.015.05c     padáṃ ná tāyúr gúhā dádhāno
5.015.05d     mahó rāyé citáyann átrim aspaḥ

16

5.016.01a     br̥hád váyo hí bhānáve
5.016.01b     árcā devā^́ya agnáye
5.016.01c     yám mitráṃ ná práśastibhir
5.016.01d     mártāso dadhiré puráḥ

5.016.02a     sá hí dyúbhir jánānãṃ
5.016.02b     hótā dákṣasya bāhuvóḥ
5.016.02c     ví havyám agnír ānuṣág
5.016.02d     bhágo ná vā^́ram r̥ṇvati

5.016.03a     asyá stóme maghõ^́naḥ
5.016.03b     sakhiyé vr̥ddháśociṣaḥ
5.016.03c     víśvā yásmin tuviṣváṇi
5.016.03d     sám aryé śúṣmam ādadhúḥ

5.016.04a     ádhā hí agna eṣãṃ
5.016.04b     suvī^́riyasya maṃhánā
5.016.04c     tám íd yahváṃ ná ródasī
5.016.04d     pári śrávo babhūvatuḥ

5.016.05a     nũ^́ na éhi vā^́riyam
5.016.05b     ágne gr̥ṇāná ā^́ bhara
5.016.05c     yé vayáṃ yé ca sūráyaḥ
5.016.05d     suastí dhā^́mahe sácā
5.016.05e     utaídhi pr̥tsú no vr̥dhé

17

5.017.01a     ā^́ yajñaír deva mártiya
5.017.01b     itthā^́ távyāṃsam ūtáye
5.017.01c     agníṃ kr̥té suadhvaré
5.017.01d     pūrúr īḷīta ávase

5.017.02a     ásya hí sváyaśastara
5.017.02b     āsā^́ vidharman mányase
5.017.02c     táṃ nā^́kaṃ citráśociṣam
5.017.02d     mandrám paró manīṣáyā

5.017.03a     asyá vā^́sā^́ u arcíṣā
5.017.03b     yá ā^́yukta tujā^́ girā^́
5.017.03c     divó ná yásya rétasā
5.017.03d     br̥hác chócanti arcáyaḥ

5.017.04a     asyá krátvā vícetaso
5.017.04b     dasmásya vásu rátha ā^́
5.017.04c     ádhā víśvāsu háviyo
5.017.04d     agnír vikṣú prá śasyate

5.017.05a     nũ^́ na íd dhí vā^́riyam
5.017.05b     āsā^́ sacanta sūráyaḥ
5.017.05c     ū^́rjo napād abhíṣṭaye
5.017.05d     pāhí śagdhí suastáya
5.017.05e     utaídhi pr̥tsú no vr̥dhé

18

5.018.01a     prātár agníḥ purupriyó
5.018.01b     viśá staveta átithiḥ
5.018.01c     víśvāni yó ámartiyo
5.018.01d     havyā^́ márteṣu ráṇyati

5.018.02a     dvitā^́ya mr̥ktávāhase
5.018.02b     svásya dákṣasya maṃhánā
5.018.02c     índuṃ sá dhatta ānuṣák
5.018.02d     stotā^́ cit te amartiya

5.018.03a     táṃ vo dīrghā^́yuśociṣaṃ
5.018.03b     girā^́ huve maghónãm
5.018.03c     áriṣṭo yéṣãṃ rátho
5.018.03d     ví aśvadāvan ī^́yate

5.018.04a     citrā^́ vā yéṣu dī^́dhitir
5.018.04b     āsánn ukthā^́ pã^́nti yé
5.018.04c     stīrṇám barhíḥ súvarṇare
5.018.04d     śrávāṃsi dadhire pári

5.018.05a     yé me pañcāśátaṃ dadúr
5.018.05b     áśvānãṃ sadhástuti
5.018.05c     dyumád agne máhi śrávo
5.018.05d     br̥hát kr̥dhi maghónãṃ
5.018.05e     nr̥vád amr̥ta nr̥̄ṇã^́m⁺

19

5.019.01a     abhy àvasthā^́ḥ prá jāyante
5.019.01b     prá vavrér vavríś ciketa
5.019.01c     upásthe mātúr ví caṣṭe

5.019.02a     juhuré ví citáyanto
5.019.02b     ánimiṣaṃ nr̥mṇám pānti
5.019.02c     ā^́ dr̥̄ḷhā^́m⁺ púraṃ viviśuḥ

5.019.03a     ā^́ śvaitreyásya jantávo
5.019.03b     dyumád vardhanta kr̥ṣṭáyaḥ
5.019.03c     niṣkágrīvo br̥háduktha
5.019.03d     enā^́ mádhvā ná vājayúḥ

5.019.04a     priyáṃ dugdháṃ ná kā^́miyam
5.019.04b     ájāmi jāmiyóḥ sácā
5.019.04c     gharmó ná vā^́jajaṭharo
5.019.04d     ádabdhaḥ śáśvato dábhaḥ

5.019.05a     krī^́ḷan no raśma ā^́ bhuvaḥ
5.019.05b     sám bhásmanā vāyúnā vévidānaḥ
5.019.05c     tā^́ asya san dhr̥ṣájo ná tigmā^́ḥ
5.019.05d     súsaṃśitā vakṣíyo vakṣaṇesthā^́ḥ

20

5.020.01a     yám agne vājasātama
5.020.01b     tuváṃ cin mányase rayím
5.020.01c     táṃ no gīrbhíḥ śravā^́yiyaṃ
5.020.01d     devatrā^́ panayā yújam

5.020.02a     yé agne néráyanti te
5.020.02b     vr̥ddhā^́ ugrásya śávasaḥ
5.020.02c     ápa dvéṣo ápa hváro
5.020.02d     anyávratasya saścire

5.020.03a     hótāraṃ tvā vr̥ṇīmahe
5.020.03b     ágne dákṣasya sā^́dhanam
5.020.03c     yajñéṣu pūrviyáṃ girā^́
5.020.03d     práyasvanto havāmahe

5.020.04a     itthā^́ yáthā ta ūtáye
5.020.04b     sáhasāvan divé-dive
5.020.04c     rāyá r̥tā^́ya sukrato
5.020.04d     góbhiḥ ṣyāma sadhamā^́do
5.020.04e     vīraíḥ syāma sadhamā^́daḥ

21

5.021.01a     manuṣvát tvā ní dhīmahi
5.021.01b     manuṣvát sám idhīmahi
5.021.01c     ágne manuṣvád aṅgiro
5.021.01d     devā^́n devayaté yaja

5.021.02a     tuváṃ hí mā^́nuṣe jáne
5.021.02b     ágne súprīta idhyáse
5.021.02c     srúcas tvā yanti ānuṣák
5.021.02d     sújāta sárpirāsute

5.021.03a     tuvā^́ṃ víśve sajóṣaso
5.021.03b     devā^́so dūtám akrata
5.021.03c     saparyántas tuvā kave
5.021.03d     yajñéṣu devám īḷate

5.021.04a     deváṃ vo devayajyáyā
5.021.04b     agním īḷīta mártiyaḥ
5.021.04c     sámiddhaḥ śukra dīdihi
5.021.04d     r̥tásya yónim ā^́sadaḥ
5.021.04e     sasásya yónim ā^́sadaḥ

22

5.022.01a     prá viśvasāman atrivád
5.022.01b     árcā pavākáśociṣe⁺
5.022.01c     yó adhvaréṣu ī^́ḍiyo
5.022.01d     hótā mandrátamo viśí

5.022.02a     ní agníṃ jātávedasaṃ
5.022.02b     dádhātā devám r̥tvíjam
5.022.02c     prá yajñá etu ānuṣág
5.022.02d     adyā^́ devávyacastamaḥ

5.022.03a     cikitvínmanasaṃ tuvā
5.022.03b     devám mártāsa ūtáye
5.022.03c     váreṇyasya te ávasa
5.022.03d     iyānā^́so amanmahi

5.022.04a     ágne cikiddhí asyá na
5.022.04b     idáṃ vácaḥ sahasiya
5.022.04c     táṃ tvā suśipra dampate
5.022.04d     stómair vardhanti átrayo
5.022.04e     gīrbhíḥ śumbhanti átrayaḥ

23

5.023.01a     ágne sáhantam ā^́ bhara
5.023.01b     dyumnásya prāsáhā rayím
5.023.01c     víśvā yáś carṣaṇī^́r abhí
5.023.01d     āsā^́ vā^́jeṣu sāsáhat

5.023.02a     tám agne pr̥tanāṣáhaṃ
5.023.02b     rayíṃ sahasva ā^́ bhara
5.023.02c     tuváṃ hí satyó ádbhuto
5.023.02d     dātā^́ vā^́jasya gómataḥ

5.023.03a     víśve hí tvā sajóṣaso
5.023.03b     jánāso vr̥ktábarhiṣaḥ
5.023.03c     hótāraṃ sádmasu priyáṃ
5.023.03d     viyánti vā^́riyā purú

5.023.04a     sá hí ṣmā viśvácarṣaṇir
5.023.04b     abhímāti sáho dadhé
5.023.04c     ágna eṣú kṣáyeṣu ā^́
5.023.04d     reván naḥ śukra dīdihi
5.023.04e     dyumát pavāka⁺ dīdihi

24

5.024.01a     ágne tuváṃ no ántama
5.024.01b     utá trātā^́ śivó bhavā varūthyàḥ
5.024.02a     vásur agnír vásuśravā
5.024.02b     áchā nakṣi dyumáttamaṃ rayíṃ dāḥ
5.024.03a     sá no bodhi śrudhī^́ hávam
5.024.03b     uruṣyā^́ ṇo aghāyatáḥ samasmāt
5.024.04a     táṃ tvā śociṣṭha dīdivaḥ
5.024.04b     sumnā^́ya nūnám īmahe sákhibhyaḥ

25

5.025.01a     áchā vo agním ávase
5.025.01b     deváṃ gāsi sá no vásuḥ
5.025.01c     rā^́sat putrá r̥ṣūṇã^́m
5.025.01d     r̥tā^́vā parṣati dviṣáḥ

5.025.02a     sá hí satyó yám pū^́rve cid
5.025.02b     devā^́saś cid yám īdhiré
5.025.02c     hótāram mandrájihvam ít
5.025.02d     sudītíbhir vibhā^́vasum

5.025.03a     sá no dhītī^́ váriṣṭhayā
5.025.03b     śráyiṣṭhayā⁺ ca sumatī^́°
5.025.03c     ágne rāyó didīhi naḥ
5.025.03d     suvr̥ktíbhir vareṇiya

5.025.04a     agnír devéṣu rājati
5.025.04b     agnír márteṣu āviśán
5.025.04c     agnír no havyavā^́hano
5.025.04d     agníṃ dhībhíḥ saparyata

5.025.05a     agnís tuvíśravastamaṃ
5.025.05b     tuvíbrahmāṇam uttamám
5.025.05c     atū^́rtaṃ śrāvayátpatim
5.025.05d     putráṃ dadāti dāśúṣe

5.025.06a     agnír dadāti sátpatiṃ
5.025.06b     sāsā^́ha yó yudhā^́ nŕ̥bhiḥ
5.025.06c     agnír átyaṃ raghuṣyádaṃ
5.025.06d     jétāram áparājitam

5.025.07a     yád vā^́hiṣṭhaṃ tád agnáye
5.025.07b     br̥hád arca vibhāvaso
5.025.07c     máhiṣīva tuvád rayís
5.025.07d     tuvád vā^́jā úd īrate

5.025.08a     táva dyumánto arcáyo
5.025.08b     grā^́veva ucyate br̥hát
5.025.08c     utó te tanyatúr yathā
5.025.08d     svānó arta tmánā diváḥ

5.025.09a     evā^́m̐ agníṃ vasūyávaḥ
5.025.09b     sahasānáṃ vavandima
5.025.09c     sá no víśvā áti dvíṣaḥ
5.025.09d     párṣan nāvéva sukrátuḥ

26

5.026.01a     ágne pavāka⁺ rocíṣā
5.026.01b     mandráyā deva jihváyā
5.026.01c     ā^́ devā^́n vakṣi yákṣi ca

5.026.02a     táṃ tvā ghr̥tasnav īmahe
5.026.02b     cítrabhāno suvardŕ̥śam
5.026.02c     devā^́m̐ ā^́ vītáye vaha

5.026.03a     vītíhotraṃ tuvā kave
5.026.03b     dyumántaṃ sám idhīmahi
5.026.03c     ágne br̥hántam adhvaré

5.026.04a     ágne víśvebhir ā^́ gahi
5.026.04b     devébhir havyádātaye
5.026.04c     hótāraṃ tvā vr̥ṇīmahe

5.026.05a     yájamānāya sunvatá
5.026.05b     ā^́gne suvī^́riyaṃ vaha
5.026.05c     devaír ā^́ satsi barhíṣi

5.026.06a     samidhānáḥ sahasrajid
5.026.06b     ágne dhármāṇi puṣyasi
5.026.06c     devā^́nāṃ dūtá ukthíyaḥ

5.026.07a     ní agníṃ jātávedasaṃ
5.026.07b     hotravā^́haṃ yáviṣṭhiyam
5.026.07c     dádhātā devám r̥tvíjam

5.026.08a     prá yajñá etu ānuṣág
5.026.08b     adyā^́ devávyacastamaḥ
5.026.08c     str̥ṇītá barhír āsáde

5.026.09a     édám marúto aśvínā
5.026.09b     mitráḥ sīdantu váruṇaḥ
5.026.09c     devā^́saḥ sárvayā viśā^́

27

5.027.01a     ánasvantā sátpatir māmahe me
5.027.01b     gā^́vā cétiṣṭho ásuro maghónaḥ
5.027.01c     traivr̥ṣṇó agne daśábhiḥ sahásrair
5.027.01d     vaíśvānara tríaruṇaś ciketa

5.027.02a     yó me śatā^́ ca viṃśatíṃ ca gónāṃ
5.027.02b     hárī ca yuktā^́ sudhúrā dádāti
5.027.02c     vaíśvānara súṣṭuto vāvr̥dhāno
5.027.02d     ágne yácha tríaruṇāya śárma

5.027.03a     evā^́ te agne sumatíṃ cakānó
5.027.03b     náviṣṭhāya navamáṃ trasádasyuḥ
5.027.03c     yó me gíras tuvijātásya pūrvī^́r
5.027.03d     yukténābhí tríaruṇo gr̥ṇā^́ti

5.027.04a     yó ma íti pravócati
5.027.04b     áśvamedhāya sūráye
5.027.04c     dádad r̥cā^́ saníṃ yaté
5.027.04d     dádan medhā^́m r̥tāyaté

5.027.05a     yásya mā paruṣā^́ḥ śatám
5.027.05b     uddharṣáyanti ukṣáṇaḥ
5.027.05c     áśvamedhasya dā^́nāḥ
5.027.05d     sómā iva tríāśiraḥ

5.027.06a     índrāgnī śatadā^́vani
5.027.06b     áśvamedhe suvī^́riyam
5.027.06c     kṣatráṃ dhārayatam br̥hád
5.027.06d     diví sū^́ryam ivājáram

28

5.028.01a     sámiddho agnír diví śocír aśret
5.028.01b     pratyáṅṅ uṣásam urviyā^́ ví bhāti
5.028.01c     éti prā^́cī viśvávārā námobhir
5.028.01d     devā^́m̐ ī^́ḷānā havíṣā ghr̥tā^́cī

5.028.02a     samidhyámāno amŕ̥tasya rājasi
5.028.02b     havíṣ kr̥ṇvántaṃ sacase suastáye
5.028.02c     víśvaṃ sá dhatte dráviṇaṃ yám ínvasi
5.028.02d     ātithyám agne ní ca dhatta ít puráḥ

5.028.03a     ágne śárdha mahaté saúbhagāya
5.028.03b     táva dyumnā^́ni uttamā^́ni santu
5.028.03c     sáṃ jāspatyáṃ suyámam ā^́ kr̥ṇuṣva
5.028.03d     śatrūyatā^́m abhí tiṣṭhā máhāṃsi

5.028.04a     sámiddhasya prámahaso
5.028.04b     ágne vánde táva śríyam
5.028.04c     vr̥ṣabhó dyumnávām̐ asi
5.028.04d     sám adhvaréṣu idhyase

5.028.05a     sámiddho agna āhuta
5.028.05b     devā^́n yakṣi suadhvara
5.028.05c     tuváṃ hí havyavā^́ḷ ási

5.028.06a     ā^́ juhotā duvasyáta
5.028.06b     agním prayatí adhvaré
5.028.06c     vr̥ṇīdhváṃ havyavā^́hanam

29

5.029.01a     trí aryamā^́ mánuṣo devátātā
5.029.01b     trī^́ rocanā^́ diviyā^́ dhārayanta
5.029.01c     árcanti tvā marútaḥ pūtádakṣās
5.029.01d     tuvám eṣām ŕ̥ṣir indrāsi dhī^́raḥ

5.029.02a     ánu yád īm marúto mandasānám
5.029.02b     ā^́rcann índram papivā^́ṃsaṃ sutásya
5.029.02c     ā^́datta vájram abhí yád áhiṃ hánn
5.029.02d     apó yahvī^́r asr̥jat sártavā^́ u

5.029.03a     utá brahmāṇo maruto me asyá
5.029.03b     índraḥ sómasya súṣutasya peyāḥ
5.029.03c     tád dhí havyám mánuṣe gā^́ ávindad
5.029.03d     áhann áhim papivā^́m̐ índro asya

5.029.04a     ā^́d ródasī vitaráṃ ví ṣkabhāyat
5.029.04b     saṃvivyānáś cid bhiyáse mr̥gáṃ kaḥ
5.029.04c     jígartim índro apajárgurāṇaḥ
5.029.04d     práti śvasántam áva dānaváṃ han

5.029.05a     ádha krátvā maghavan túbhya° devā^́
5.029.05b     ánu víśve adaduḥ somapéyam
5.029.05c     yát sū^́riyasya harítaḥ pátantīḥ
5.029.05d     puráḥ satī^́r úparā étaśe káḥ

5.029.06a     náva yád asya navatíṃ ca bhogā^́n
5.029.06b     sākáṃ vájreṇa maghávā vivr̥ścát
5.029.06c     árcanti índram marútaḥ sadhásthe
5.029.06d     traíṣṭubhena vácasā bādhata dyā^́m

5.029.07a     sákhā sákhye apacat tū^́yam agnír
5.029.07b     asyá krátvā mahiṣā^́ trī^́ śatā^́ni
5.029.07c     trī^́ sākám índro mánuṣaḥ sárāṃsi
5.029.07d     sutám pibad vr̥trahátyāya sómam

5.029.08a     trī^́ yác chatā^́ mahiṣā^́ṇām ágho mā^́s
5.029.08b     trī^́ sárāṃsi maghávā somiyā^́pāḥ
5.029.08c     kāráṃ ná víśve ahuvanta devā^́
5.029.08d     bháram índrāya yád áhiṃ jaghā^́na

5.029.09a     uśánā yát sahasíyair áyātaṃ
5.029.09b     gr̥hám indra jūjuvānébhir áśvaiḥ
5.029.09c     vanvānó átra saráthaṃ yayātha
5.029.09d     kútsena devaír ávanor ha śúṣṇam

5.029.10a     prā^́nyác cakrám avr̥haḥ sū^́riyasya
5.029.10b     kútsāyānyád várivo yā^́tave 'kaḥ
5.029.10c     anā^́so dásyūm̐r amr̥ṇo vadhéna
5.029.10d     ní duryoṇá āvr̥ṇaṅ mr̥dhrávācaḥ

5.029.11a     stómāsas tvā gaúrivīter avardhann
5.029.11b     árandhayo vaidathinā^́ya píprum
5.029.11c     ā^́ tvā^́m r̥jíśvā sakhiyā^́ya cakre
5.029.11d     pácan paktī^́r ápibaḥ sómam asya

5.029.12a     návagvāsaḥ sutásomāsa índraṃ
5.029.12b     dáśagvāso abhí arcanti arkaíḥ
5.029.12c     gávyaṃ cid ūrvám apidhā^́navantaṃ
5.029.12d     táṃ cin náraḥ śaśamānā^́ ápa vran

5.029.13a     kathó nú te pári carāṇi vidvā^́n
5.029.13b     vīríyā · maghavan yā^́ cakártha
5.029.13c     yā^́ co nú návyā kr̥ṇávaḥ śaviṣṭha
5.029.13d     préd u tā^́ te vidátheṣu bravāma

5.029.14a     etā^́ víśvā cakr̥vā^́m̐ indra bhū^́ri
5.029.14b     áparīto janúṣā vīríyeṇa
5.029.14c     yā^́ cin nú vajrin kr̥ṇávo dadhr̥ṣvā^́n
5.029.14d     ná te vartā^́ táviṣyā asti tásyāḥ

5.029.15a     índra bráhma kriyámāṇā juṣasva
5.029.15b     yā^́ te śaviṣṭha náviyā ákarma
5.029.15c     vástreva bhadrā^́ súkr̥tā vasūyū^́
5.029.15d     ráthaṃ ná dhī^́raḥ suápā atakṣam

30

5.030.01a     kúva syá vīráḥ kó apaśyad índraṃ
5.030.01b     sukháratham ī^́yamānaṃ háribhyām
5.030.01c     yó rāyā^́ vajrī^́ sutásomam ichán
5.030.01d     tád óko gántā puruhūtá ūtī^́

5.030.02a     ávācacakṣam padám asya sasvár
5.030.02b     ugráṃ nidhātúr ánu āyam ichán
5.030.02c     ápr̥cham anyā^́m̐ utá té ma āhur
5.030.02d     índraṃ náro bubudhānā^́ aśema

5.030.03a     prá nú vayáṃ suté yā^́ te kr̥tā^́ni
5.030.03b     índra brávāma yā^́ni no jújoṣaḥ
5.030.03c     védad ávidvāñ chr̥ṇávac ca vidvā^́n
5.030.03d     váhate 'yám maghávā sárvasenaḥ

5.030.04a     sthirám mánaś cakr̥ṣe jātá indra
5.030.04b     véṣī^́d éko yudháye bhū^́yasaś cit
5.030.04c     áśmānaṃ cic chávasā didyuto ví
5.030.04d     vidó gávām ūruvám usríyāṇām

5.030.05a     paró yát tvám paramá ājániṣṭhāḥ
5.030.05b     parāváti śrútiyaṃ nā^́ma bíbhrat
5.030.05c     átaś cid índrād abhayanta devā^́
5.030.05d     víśvā apó ajayad dāsápatnīḥ

5.030.06a     túbhiyéd eté marútaḥ suśévā
5.030.06b     árcanti arkáṃ sunuvánti ándhaḥ
5.030.06c     áhim ohānám apá āśáyānam
5.030.06d     prá māyā^́bhir māyínaṃ sakṣad índraḥ

5.030.07a     ví ṣū^́ mŕ̥dho janúṣā dā^́nam ínvann
5.030.07b     áhan gávā maghavan saṃcakānáḥ
5.030.07c     átrā dāsásya námuceḥ śíro yád
5.030.07d     ávartayo mánave gātúm ichán

5.030.08a     yújaṃ hí mā^́m ákr̥thā ā^́d íd indra
5.030.08b     śíro dāsásya námucer mathāyán
5.030.08c     áśmānaṃ cit svaríyaṃ vártamānam
5.030.08d     prá cakríyeva ródasī marúdbhyaḥ

5.030.09a     stríyo hí dāsá ā^́yudhāni cakré
5.030.09b     kím mā karann abalā^́ asya sénāḥ
5.030.09c     antár hí ákhyad ubhé asya dhéne
5.030.09d     áthópa praíd yudháye dásyum índraḥ

5.030.10a     sám átra gā^́vo abhíto 'navanta
5.030.10b     ihéha vatsaír víyutā yád ā^́san
5.030.10c     sáṃ tā^́ índro asr̥jad asya śākaír
5.030.10d     yád īṃ sómāsaḥ súṣutā ámandan

5.030.11a     yád īṃ sómā babhrúdhūtā ámandann
5.030.11b     ároravīd vr̥ṣabháḥ sā^́daneṣu
5.030.11c     puraṃdaráḥ papivā^́m̐ índro asya
5.030.11d     púnar gávām adadād usríyāṇām

5.030.12a     bhadrám idáṃ ruśámā agne akran
5.030.12b     gávāṃ catvā^́ri dádataḥ sahásrā
5.030.12c     r̥ṇaṃcayásya práyatā maghā^́ni
5.030.12d     práty agrabhīṣma nŕ̥tamasya nr̥̄ṇā^́m⁺

5.030.13a     supéśasam mā^́va sr̥janti ástaṃ
5.030.13b     gávāṃ sahásrai ruśámāso agne
5.030.13c     tīvrā^́ índram amamanduḥ sutā^́so
5.030.13d     aktór víuṣṭau páritakmiyāyāḥ

5.030.14a     aúchat sā^́ rā^́trī páritakmiyā yā^́m̐
5.030.14b     r̥ṇaṃcayé rā^́jani ruśámānām
5.030.14c     átyo ná vājī^́ raghúr ajyámāno
5.030.14d     babhrúś catvā^́ri asanat sahásrā

5.030.15a     cátuḥsahasraṃ gáviyasya paśváḥ
5.030.15b     práty agrabhīṣma ruśámeṣu agne
5.030.15c     gharmáś cit taptáḥ pravŕ̥je yá ā^́sīd
5.030.15d     ayasmáyas tám u ā^́dāma víprāḥ

31

5.031.01a     índro ráthāya pravátaṃ kr̥ṇoti
5.031.01b     yám adhyásthān maghávā vājayántam
5.031.01c     yūthéva paśvó ví unoti gopā^́
5.031.01d     áriṣṭo yāti prathamáḥ síṣāsan

5.031.02a     ā^́ prá drava harivo mā^́ ví venaḥ
5.031.02b     píśaṅgarāte abhí naḥ sacasva
5.031.02c     nahí tvád indra vásyo anyád ásti
5.031.02d     amenā^́ṃś cij jánivataś cakartha

5.031.03a     úd yát sáhaḥ sáhasa ā^́janiṣṭa
5.031.03b     dédiṣṭa índra indriyā^́ṇi víśvā
5.031.03c     prā^́codayat sudúghā vavré antár
5.031.03d     ví jyótiṣā saṃvavr̥tvát támo 'vaḥ

5.031.04a     ánavas te rátham áśvāya takṣan
5.031.04b     tváṣṭā vájram puruhūta dyumántam
5.031.04c     brahmā^́ṇa índram maháyanto arkaír
5.031.04d     ávardhayann áhaye hántavā^́ u

5.031.05a     vŕ̥ṣṇe yát te vŕ̥ṣaṇo arkám árcān
5.031.05b     índra grā^́vāṇo áditiḥ sajóṣāḥ
5.031.05c     anaśvā^́so yé paváyo arathā^́
5.031.05d     índreṣitā abhy ávartanta dásyūn

5.031.06a     prá te pū^́rvāṇi káraṇāni vocam
5.031.06b     prá nū^́tanā maghavan yā^́ cakártha
5.031.06c     śáktīvo yád vibhárā ródasī ubhé
5.031.06d     jáyann apó mánave dā^́nucitrāḥ

5.031.07a     tád ín nú te káraṇaṃ dasma vipra
5.031.07b     áhiṃ yád ghnánn ójo átrā^́mimīthāḥ
5.031.07c     śúṣṇasya cit pári māyā^́ agr̥bhṇāḥ
5.031.07d     prapitváṃ yánn ápa dásyūm̐r asedhaḥ

5.031.08a     tuvám apó yádave turváśāya
5.031.08b     áramayaḥ sudúghāḥ pārá indra
5.031.08c     ugrám ayātam ávaho ha kútsaṃ
5.031.08d     sáṃ ha yád vām uśánā^́ranta devā^́ḥ

5.031.09a     índrākutsā váhamānā ráthena
5.031.09b     ā^́ vām átyā ápi kárṇe vahantu
5.031.09c     níḥ ṣīm adbhyó dhámatho níḥ ṣadhásthān
5.031.09d     maghóno hr̥dó varathas támāṃsi

5.031.10a     vā^́tasya yuktā^́n suyújaś cid áśvān
5.031.10b     kavíś cid eṣó ajagann avasyúḥ
5.031.10c     víśve te átra marútaḥ sákhāya
5.031.10d     índra bráhmāṇi táviṣīm avardhan

5.031.11a     sū^́raś cid rátham páritakmiyāyām
5.031.11b     pū^́rvaṃ karad úparaṃ jūjuvā^́ṃsam
5.031.11c     bhárac cakrám étaśaḥ sáṃ riṇāti
5.031.11d     puró dádhat saniṣyati krátuṃ naḥ

5.031.12a     ā^́yáṃ janā abhicákṣe jagāma
5.031.12b     índraḥ sákhāyaṃ sutásomam ichán
5.031.12c     vádan grā^́vā áva védim bhriyāte
5.031.12d     yásya jīrám adhvaryávaś cáranti

5.031.13a     yé cākánanta cākánanta nū^́ té
5.031.13b     mártā amr̥ta mó té áṃha ā^́ran
5.031.13c     vāvandhí yájyūm̐r utá téṣu dhehi
5.031.13d     ójo jáneṣu yéṣu te siyā^́ma

32

5.032.01a     ádardar útsam ásr̥jo ví khā^́ni
5.032.01b     tvám arṇavā^́n badbadhānā^́m̐ aramṇāḥ
5.032.01c     mahā^́ntam indra párvataṃ ví yád váḥ
5.032.01d     sŕ̥jó ví dhā^́rā áva dānaváṃ han

5.032.02a     tuvám útsām̐ r̥túbhir badbadhānā^́m̐
5.032.02b     áraṃha ū^́dhaḥ párvatasya vajrin
5.032.02c     áhiṃ cid ugra práyutaṃ śáyānaṃ
5.032.02d     jaghanvā^́m̐ indra táviṣīm adhatthāḥ

5.032.03a     tiyásya cin maható nír mr̥gásya
5.032.03b     vádhar jaghāna táviṣībhir índraḥ
5.032.03c     yá éka íd apratír mányamāna
5.032.03d     ā^́d asmād anyó ajaniṣṭa távyān

5.032.04a     tiyáṃ cid eṣāṃ svadháyā mádantam
5.032.04b     mihó nápātaṃ suvŕ̥dhaṃ tamogā^́m
5.032.04c     vŕ̥ṣaprabharmā dānavásya bhā^́maṃ
5.032.04d     vájreṇa vajrī^́ ní jaghāna śúṣṇam

5.032.05a     tiyáṃ cid asya krátubhir níṣattam
5.032.05b     amarmáṇo vidád íd asya márma
5.032.05c     yád īṃ sukṣatra prábhr̥tā mádasya
5.032.05d     yúyutsantaṃ támasi harmiyé dhā^́ḥ

5.032.06a     tiyáṃ cid itthā^́ katpayáṃ śáyānam
5.032.06b     asūriyé támasi vāvr̥dhānám
5.032.06c     táṃ cin mandānó vr̥ṣabháḥ sutásya
5.032.06d     uccaír índro apagū^́ryā jaghāna

5.032.07a     úd yád índro mahaté dānavā^́ya
5.032.07b     vádhar yámiṣṭa sáho ápratītam
5.032.07c     yád īṃ vájrasya prábhr̥tau dadā^́bha
5.032.07d     víśvasya jantór adhamáṃ cakāra

5.032.08a     tiyáṃ cid árṇam madhupáṃ śáyānam
5.032.08b     asinváṃ vavrám máhi ā^́dad ugráḥ
5.032.08c     apā^́dam atrám mahatā^́ vadhéna
5.032.08d     ní duryoṇá āvr̥ṇaṅ mr̥dhrávācam

5.032.09a     kó asya śúṣmaṃ táviṣīṃ varāta
5.032.09b     éko dhánā bharate ápratītaḥ
5.032.09c     imé cid asya jráyaso nú devī^́
5.032.09d     índrasyaújaso bhiyásā jihāte

5.032.10a     ní asmai devī^́ svádhitir jihīta
5.032.10b     índrāya gātúr uśatī^́va yeme
5.032.10c     sáṃ yád ójo yuváte víśvam ābhir
5.032.10d     ánu svadhā^́vne kṣitáyo namanta

5.032.11a     ékaṃ nú tvā sátpatim pā^́ñcajanyaṃ
5.032.11b     jātáṃ śr̥ṇomi yaśásaṃ jáneṣu
5.032.11c     tám me jagr̥bhra āśáso náviṣṭhaṃ
5.032.11d     doṣā^́ vástor hávamānāsa índram

5.032.12a     evā^́ hí tvā^́m r̥tuthā^́ yātáyantam
5.032.12b     maghā^́ víprebhyo dádataṃ śr̥ṇómi
5.032.12c     kíṃ te brahmā^́ṇo gr̥hate sákhāyo
5.032.12d     yé tuvāyā^́ nidadhúḥ kā^́mam indra

33

5.033.01a     máhi mahé taváse dīdhiye nr̥̄^́n
5.033.01b     índrāya itthā^́ taváse átavyān
5.033.01c     yó asmai · sumatíṃ vā^́jasātau
5.033.01d     stutó jáne samaríyaś cikéta

5.033.02a     sá tváṃ na indra dhiyasānó arkaír
5.033.02b     hárīṇãṃ · vr̥ṣan yóktram aśreḥ
5.033.02c     yā^́ itthā^́ · maghavann ánu jóṣaṃ
5.033.02d     vákṣo abhí prā^́riyáḥ sakṣi jánān

5.033.03a     ná té ta indra abhí asmád r̥ṣva
5.033.03b     áyuktāso abrahmátā yád ásan
5.033.03c     tíṣṭhā rátham ádhi táṃ vajrahastā^́
5.033.03d     raśmíṃ deva · yamase suáśvaḥ

5.033.04a     purū^́ yát ta indara⁺ sánti ukthā^́
5.033.04b     gáve cakártha urvárāsu yúdhyan
5.033.04c     tatakṣé sū^́ryāya cid ókasi své
5.033.04d     vŕ̥ṣā samátsu dãsásya nā^́ma cit

5.033.05a     vayáṃ té ta indara⁺ yé ca náraḥ
5.033.05b     śárdho jajñānā^́ yãtā^́ś ca ráthāḥ
5.033.05c     ā^́smā^́ñ jagamyād ahiśuṣma sátvā
5.033.05d     bhágo ná hávyaḥ prabhr̥théṣu cā^́ruḥ

5.033.06a     papr̥kṣéṇyam indara⁺ tvé hí ójo
5.033.06b     nr̥mṇā^́ni ca nr̥támāno ámartaḥ
5.033.06c     sá na énīṃ vasavāno rayíṃ dāḥ
5.033.06d     prā^́ryá stuṣe tuvimaghásya dā^́nam

5.033.07a     evā^́ na indara⁺ ūtíbhir ava
5.033.07b     pāhí gr̥ṇatáḥ śūra kārū^́n
5.033.07c     utá tvácaṃ dádato vā^́jasātau
5.033.07d     piprīhí mádhvaḥ súṣutasya cā^́roḥ

5.033.08a     utá tyé mā paurukutsyásya sūrés
5.033.08b     trasádasyor hiraṇíno rárāṇāḥ
5.033.08c     váhantu mā dáśa śyétāso asya
5.033.08d     gairikṣitásya krátubhir nú saśce

5.033.09a     utá tyé mā mārutā^́śvasya śóṇāḥ
5.033.09b     krátvāmaghāso vidáthasya rātaú
5.033.09c     sahásrā me cyávatāno dádāna
5.033.09d     ānūkám aryó vápuṣe ná ārcat

5.033.10a     utá tiyé mā dhvaníyasya júṣṭā
5.033.10b     lakṣmaṇíyasya surúco yátānāḥ
5.033.10c     mahnā^́ rāyáḥ saṃváraṇasya ŕ̥ṣer
5.033.10d     vrajáṃ ná gā^́vaḥ práyatā ápi gman

34

5.034.01a     ájātaśatrum ajárā súvarvatī
5.034.01b     ánu svadhā^́ ámitā dasmám īyate
5.034.01c     sunótana pácata bráhmavāhase
5.034.01d     puruṣṭutā^́ya prataráṃ dadhātana

5.034.02a     ā^́ yáḥ sómena jaṭháram ápiprata
5.034.02b     ámandata maghávā mádhvo ándhasaḥ
5.034.02c     yád īm mr̥gā^́ya hántave mahā^́vadhaḥ
5.034.02d     sahásrabhr̥ṣṭim uśánā vadháṃ yámat

5.034.03a     yó asmai ghraṃsá utá vā yá ū^́dhani
5.034.03b     sómaṃ sunóti bhávati dyumā^́m̐ áha
5.034.03c     ápāpa śakrás tatanúṣṭim ūhati
5.034.03d     tanū^́śubhram maghávā yáḥ kavāsakháḥ

5.034.04a     yásyā^́vadhīt pitáraṃ yásya mātáraṃ
5.034.04b     yásya śakró bhrā^́taraṃ nā^́ta īṣate
5.034.04c     vétī^́d ū asya práyatā yataṃkaró
5.034.04d     ná kílbiṣād īṣate vásva ākaráḥ

5.034.05a     ná pañcábhir daśábhir vaṣṭi ārábhaṃ
5.034.05b     nā^́sunvatā sacate púṣyatā caná
5.034.05c     jinā^́ti véd amuyā^́ hánti vā dhúnir
5.034.05d     ā^́ devayúm bhajati gómati vrajé

5.034.06a     vitvákṣaṇaḥ sámr̥tau cakramāsajó
5.034.06b     ásunvato víṣuṇaḥ sunvató vr̥dháḥ
5.034.06c     índro víśvasya damitā^́ vibhī^́ṣaṇo
5.034.06d     yathāvaśáṃ nayati dā^́sam ā^́riyaḥ

5.034.07a     sám īm paṇér ajati bhójanam muṣé
5.034.07b     ví dāśúṣe bhajati sūnáraṃ vásu
5.034.07c     durgé caná dhriyate víśva ā^́ purú
5.034.07d     jáno yó asya táviṣīm ácukrudhat

5.034.08a     sáṃ yáj jánau sudhánau viśváśardhasāv
5.034.08b     áved índro maghávā góṣu śubhríṣu
5.034.08c     yújaṃ hí anyám ákr̥ta pravepanī^́
5.034.08d     úd īṃ gávyaṃ sr̥jate sátvabhir dhúniḥ

5.034.09a     sahasrasā^́m ā^́gniveśiṃ gr̥ṇīṣe
5.034.09b     śátrim agna upamā^́ṃ ketúm aryáḥ
5.034.09c     tásmā ā^́paḥ saṃyátaḥ pīpayanta
5.034.09d     tásmin kṣatrám ámavat tveṣám astu

35

5.035.01a     yás te sā^́dhiṣṭho ávasa
5.035.01b     índra krátuṣ ṭám ā^́ bhara
5.035.01c     asmábhyaṃ carṣaṇīsáhaṃ
5.035.01d     sásniṃ vā^́jeṣu duṣṭáram

5.035.02a     yád indra te cátasro
5.035.02b     yác chūra sánti tisráḥ
5.035.02c     yád vā páñca kṣitīnã^́m
5.035.02d     ávas tát sú na ā^́ bhara

5.035.03a     ā^́ te ávo váreṇiyaṃ
5.035.03b     vŕ̥ṣantamasya hūmahe
5.035.03c     vŕ̥ṣajūtir hí jajñiṣá
5.035.03d     ābhū^́bhir indra turváṇiḥ

5.035.04a     vŕ̥ṣā hí ási rā^́dhase
5.035.04b     jajñiṣé vŕ̥ṣṇi te śávaḥ
5.035.04c     svákṣatraṃ te dhr̥ṣán mánaḥ
5.035.04d     satrāhám indra paúṃsiyam

5.035.05a     tuváṃ tám indra mártiyam
5.035.05b     amitrayántam adrivaḥ
5.035.05c     sarvarathā^́ śatakrato
5.035.05d     ní yāhi śavasas pate

5.035.06a     tuvā^́m íd vr̥trahantama
5.035.06b     jánāso vr̥ktábarhiṣaḥ
5.035.06c     ugrám pūrvī^́ṣu pūrviyáṃ
5.035.06d     hávante vā^́jasātaye

5.035.07a     asmā^́kam indra duṣṭáram
5.035.07b     puroyā^́vānam ājíṣu
5.035.07c     sayā^́vānaṃ dháne-dhane
5.035.07d     vājayántam avā rátham

5.035.08a     asmā^́kam indra éhi no
5.035.08b     rátham avā púraṃdhiyā
5.035.08c     vayáṃ śaviṣṭha vā^́riyaṃ
5.035.08d     diví śrávo dadhīmahi
5.035.08e     diví stómam manāmahe

36

5.036.01a     sá ā^́ gamad índaro⁺ yó vásūnāṃ
5.036.01b     cíketad dā^́tuṃ dā^́mano rayīṇā^́m
5.036.01c     dhanvacaró ná váṃsagas tr̥ṣāṇáś
5.036.01d     cakamānáḥ pibatu dugdhám aṃśúm

5.036.02a     ā^́ te hánū harivaḥ śūra śípre
5.036.02b     rúhat sómo ná párvatasya pr̥ṣṭhé
5.036.02c     ánu tvā rājan árvato ná hinván
5.036.02d     gīrbhír madema puruhūta víśve

5.036.03a     cakráṃ ná vr̥ttám puruhūta vepate
5.036.03b     máno bhiyā^́ me ámater íd adrivaḥ
5.036.03c     ráthād ádhi tvā jaritā^́ sadāvr̥dha
5.036.03d     kuvín nú stoṣan maghavan purūvásuḥ

5.036.04a     eṣá grā^́veva jaritā^́ ta indra
5.036.04b     íyarti vā^́cam br̥hád āśuṣāṇáḥ
5.036.04c     prá savyéna maghavan yáṃsi rāyáḥ
5.036.04d     prá dakṣiṇíd dharivo mā^́ ví venaḥ

5.036.05a     vŕ̥ṣā tuvā vŕ̥ṣaṇaṃ vardhatu dyaúr
5.036.05b     vŕ̥ṣā vŕ̥ṣabhyāṃ vahase háribhyām
5.036.05c     sá no vŕ̥ṣā vŕ̥ṣarathaḥ suśipra
5.036.05d     vŕ̥ṣakrato vŕ̥ṣā vajrin bháre dhāḥ

5.036.06a     yó róhitau vājínau vājínīvān
5.036.06b     tribhíḥ śataíḥ sácamānāv ádiṣṭa
5.036.06c     yū^́ne sám asmai kṣitáyo namantāṃ
5.036.06d     śrutárathāya maruto duvoyā^́

37

5.037.01a     sám bhānúnā yatate sū^́riyasya
5.037.01b     ājúhvāno ghr̥tápr̥ṣṭhaḥ suáñcāḥ
5.037.01c     tásmā ámr̥dhrā uṣáso ví uchān
5.037.01d     yá índrāya sunávāméti ā^́ha

5.037.02a     sámiddhāgnir vanavat stīrṇábarhir
5.037.02b     yuktágrāvā sutásomo jarāte
5.037.02c     grā^́vāṇo yásya iṣiráṃ vádanti
5.037.02d     áyad adhvaryúr havíṣā^́va síndhum

5.037.03a     vadhū^́r iyám pátim ichántī eti
5.037.03b     yá īṃ váhāte máhiṣīm iṣirā^́m
5.037.03c     ā^́sya śravasyād rátha ā^́ ca ghoṣāt
5.037.03d     purū^́ sahásrā pári vartayāte

5.037.04a     ná sá rā^́jā vyathate yásmin índras
5.037.04b     tīvráṃ sómam píbati gósakhāyam
5.037.04c     ā^́ satvanaír ájati hánti vr̥tráṃ
5.037.04d     kṣéti kṣitī^́ḥ subhágo nā^́ma púṣyan

5.037.05a     púṣyāt kṣéme abhí yóge bhavāti
5.037.05b     ubhé vŕ̥tau saṃyatī^́ sáṃ jayāti
5.037.05c     priyáḥ sū^́rye priyó agnā^́ bhavāti
5.037.05d     yá índrāya sutásomo dádāśat

38

5.038.01a     uróṣ ṭa indra rā^́dhaso
5.038.01b     vibhvī^́ rātíḥ śatakrato
5.038.01c     ádhā no viśvacarṣaṇe
5.038.01d     dyumnā^́ sukṣatra maṃhaya

5.038.02a     yád īm indra śravā^́yiyam
5.038.02b     íṣaṃ śaviṣṭha dadhiṣé
5.038.02c     paprathé dīrghaśrúttamaṃ
5.038.02d     híraṇyavarṇa duṣṭáram

5.038.03a     śúṣmāso yé te adrivo
5.038.03b     mehánā ketasā^́paḥ
5.038.03c     ubhā^́ devā^́v abhíṣṭaye
5.038.03d     diváś ca gmáś ca rājathaḥ

5.038.04a     utó no asyá kásya cid
5.038.04b     dákṣasya táva vr̥trahan
5.038.04c     asmábhyaṃ nr̥mṇám ā^́ bhara
5.038.04d     asmábhyaṃ nr̥maṇasyase

5.038.05a     nū^́ ta ābhír abhíṣṭibhis
5.038.05b     táva śármañ chatakrato
5.038.05c     índra syā^́ma sugopã^́ḥ
5.038.05d     śū^́ra syā^́ma sugopã^́ḥ

39

5.039.01a     yád indra citra mehánā
5.039.01b     ásti tvā^́dātam adrivaḥ
5.039.01c     rā^́dhas tán no vidadvasa
5.039.01d     ubhayāhasti ā^́ bhara

5.039.02a     yán mányase váreṇiyam
5.039.02b     índra dyukṣáṃ tád ā^́ bhara
5.039.02c     vidyā^́ma tásya te vayám
5.039.02d     ákūpārasya dāváne

5.039.03a     yát te ditsú prarā^́dhiyam
5.039.03b     máno ásti śrutám br̥hát
5.039.03c     téna dr̥̄ḷhā^́+ cid adriva
5.039.03d     ā^́ vā^́jaṃ darṣi sātáye

5.039.04a     máṃhiṣṭhaṃ vo maghónãṃ
5.039.04b     rā^́jānaṃ carṣaṇīnã^́m
5.039.04c     índram úpa práśastaye
5.039.04d     pūrvī^́bhir jujuṣe gíraḥ

5.039.05a     ásmā ít kā^́viyaṃ váca
5.039.05b     ukthám índrāya śáṃsiyam
5.039.05c     tásmā u bráhmavāhase
5.039.05d     gíro vardhanti átrayo
5.039.05e     gíraḥ śumbhanti átrayaḥ

40

5.040.01a     ā^́ yāhi ádribhiḥ sutáṃ
5.040.01b     sómaṃ somapate piba
5.040.01c     vŕ̥ṣann indra vŕ̥ṣabhir vr̥trahantama

5.040.02a     vŕ̥ṣā grā^́vā vŕ̥ṣā mádo
5.040.02b     vŕ̥ṣā sómo ayáṃ sutáḥ
5.040.02c     vŕ̥ṣann indra vŕ̥ṣabhir vr̥trahantama

5.040.03a     vŕ̥ṣā tvā vŕ̥ṣaṇaṃ huve
5.040.03b     vájriñ citrā^́bhir ūtíbhiḥ
5.040.03c     vŕ̥ṣann indra vŕ̥ṣabhir vr̥trahantama

5.040.04a     r̥jīṣī^́ vajrī^́ vr̥ṣabhás turāṣā^́ṭ
5.040.04b     chuṣmī^́ rā^́jā vr̥trahā^́ somapā^́vā
5.040.04c     yuktvā^́ háribhyām úpa yāsad arvā^́ṅ
5.040.04d     mā^́dhyaṃdine sávane matsad índraḥ

5.040.05a     yát tvā sūrya súvarbhānus
5.040.05b     támasā^́vidhyad āsuráḥ
5.040.05c     ákṣetravid yáthā mugdhó
5.040.05d     bhúvanāni adīdhayuḥ

5.040.06a     súvarbhānor ádha yád indra māyā^́
5.040.06b     avó divó vártamānā avā^́han
5.040.06c     gūḷháṃ sū^́ryaṃ támasā^́pavratena
5.040.06d     turī^́yeṇa bráhmaṇāvindad átriḥ

5.040.07a     mā^́ mā^́m imáṃ · táva sántam atra
5.040.07b     irasyā^́ drugdhó bhiyásā ní gārīt
5.040.07c     tuvám mitró · asi satyárādhās
5.040.07d     taú mehā^́vataṃ váruṇaś ca rā^́jā

5.040.08a     grā^́vṇo brahmā^́ yuyujānáḥ saparyán
5.040.08b     kīríṇā devā^́n námasopaśíkṣan
5.040.08c     átriḥ sū^́ryasya diví cákṣur ā^́dhāt
5.040.08d     súvarbhānor ápa māyā^́ aghukṣat

5.040.09a     yáṃ vaí sū^́ryaṃ súvarbhānus
5.040.09b     támasā^́vidhyad āsuráḥ
5.040.09c     átrayas tám ánv avindan
5.040.09d     nahí anyé áśaknuvan

41

5.041.01a     kó nú vām mitrāvaruṇāv r̥tāyán
5.041.01b     divó vā maháḥ pā^́rthivasya vā dé
5.041.01c     r̥tásya vā sádasi trā^́sīthāṃ no
5.041.01d     yajñāyaté vā paśuṣó ná vā^́jān

5.041.02a     té no mitró váruṇo aryamā^́yúr
5.041.02b     índra r̥bhukṣā^́ marúto juṣanta
5.041.02c     námobhir vā yé dádhate suvr̥ktíṃ
5.041.02d     stómaṃ rudrā^́ya mīḷhúṣe sajóṣāḥ

5.041.03a     ā^́ vāṃ yáyiṣṭhā⁺ aśvinā huvádhyai
5.041.03b     vā^́tasya pátman ráthiyasya puṣṭaú
5.041.03c     utá vā divó ásurāya mánma
5.041.03d     prá ándhāṃsīva yájyave bharadhvam

5.041.04a     prá sakṣáṇo diviyáḥ káṇvahotā
5.041.04b     tritó diváḥ sajóṣā vā^́to agníḥ
5.041.04c     pūṣā^́ bhágaḥ prabhr̥thé viśvábhojā
5.041.04d     ājíṃ ná jagmur āśúaśvatamāḥ

5.041.05a     prá vo rayíṃ yuktáaśvam bharadhvaṃ
5.041.05b     rāyá éṣe ávase dadhīta dhī^́ḥ
5.041.05c     suśéva évair auśijásya hótā
5.041.05d     yé va évā · marutas turā^́ṇām

5.041.06a     prá vo vāyúṃ rathayújaṃ kr̥ṇudhvam
5.041.06b     prá deváṃ vípram panitā^́ram arkaíḥ
5.041.06c     iṣudhyáva r̥tasā^́paḥ púraṃdhīr
5.041.06d     vásvīr no átra pátnīr ā^́ dhiyé dhuḥ

5.041.07a     úpa va éṣe vándiyebhiḥ śūṣaíḥ
5.041.07b     prá yahvī^́ diváś citáyadbhir arkaíḥ
5.041.07c     uṣā^́sānáktā vidúṣīva víśvam
5.041.07d     ā^́ hā vahato mártiyāya yajñám

5.041.08a     abhí vo arce poṣiyā^́vato nr̥̄^́n
5.041.08b     vā^́stoṣ pátiṃ · tváṣṭāraṃ rárāṇaḥ
5.041.08c     dhányā sajóṣā dhiṣáṇā námobhir
5.041.08d     vánaspátīm̐r óṣadhī rāyá éṣe

5.041.09a     tujé nas táne párvatāḥ santu
5.041.09b     sváetavo yé vásavo ná vīrā^́ḥ
5.041.09c     panitá āptyó yajatáḥ sádā no
5.041.09d     várdhān naḥ śáṃsaṃ náriyo abhíṣṭau

5.041.10a     vŕ̥ṣṇo astoṣi bhūmiyásya gárbhaṃ
5.041.10b     tritó nápātam apã^́ṃ suvr̥ktí
5.041.10c     gr̥ṇīté agnír etárī ná śūṣaíḥ
5.041.10d     śocíṣkeśo · ní riṇāti vánā

5.041.11a     kathā^́ mahé rudríyāya bravāma
5.041.11b     kád rãyé cikitúṣe bhágāya
5.041.11c     ā^́pa óṣadhīr utá no avantu
5.041.11d     diyaúr vánā giráyo vr̥kṣákeśāḥ

5.041.12a     śr̥ṇótu na ūrjā^́m pátir gíraḥ sá
5.041.12b     nábhas tárīyām̐ iṣiráḥ párijmā
5.041.12c     śr̥ṇvántu ā^́paḥ púro ná śubhrā^́ḥ
5.041.12d     pári srúco babr̥hāṇásya ádreḥ

5.041.13a     vidā^́ cin nú mahānto yé va évā
5.041.13b     brávāma dasmā vā^́riyaṃ dádhānāḥ
5.041.13c     váyaś caná subhúva ā^́va yanti
5.041.13d     kṣubhā^́ mártam ánuyataṃ vadhasnaíḥ

5.041.14a     ā^́ daíviyāni pā^́rthivāni jánma
5.041.14b     apáś ca áchā súmakhāya vocam
5.041.14c     várdhantāṃ dyā^́vo gíraś candráagrā
5.041.14d     udā^́ vardhantām abhíṣātā árṇāḥ

5.041.15a     padé-pade me jarimā^́ ní dhāyi
5.041.15b     várūtrī vā śakrā^́ yā^́ pāyúbhiś ca
5.041.15c     síṣaktu mātā^́ mahī^́ rasā^́ naḥ
5.041.15d     smát sūríbhir r̥juhásta rjuvániḥ

5.041.16a     kathā^́ dāśema námasā sudā^́nūn
5.041.16b     evayā^́ · marúto áchaüktau
5.041.16c     práśravaso marúto áchaüktau
5.041.16d     mā^́ no áhir · budhníyo riṣé dhād
5.041.16e     asmā^́kam bhūd · upamātivániḥ

5.041.17a     íti cin nú prajā^́yai paśumátyai
5.041.17b     dévāso · vánate mártiyo va
5.041.17c     ā^́ devāso vanate mártiyo vaḥ
5.041.17d     átrā śivā^́ṃ tanúvo dhāsím asyā^́
5.041.17e     jarā^́ṃ cin me nírr̥tir jagrasīta

5.041.18a     tā^́ṃ vo devāḥ sumatím ūrjáyantīm
5.041.18b     íṣam aśyāma vasavaḥ śásā góḥ
5.041.18c     sā^́ naḥ sudā^́nur mr̥̄ḷáyantī⁺ devī^́
5.041.18d     práti drávantī suvitā^́ya gamyāḥ

5.041.19a     abhí na íḷā yūthásya mātā^́
5.041.19b     smán nadī^́bhir urváśī vā gr̥ṇātu
5.041.19c     urváśī vā br̥haddivā^́ gr̥ṇānā^́
5.041.19d     abhiūrṇvānā^́ prabhr̥thásya āyóḥ

5.041.20a     síṣaktu na ūrjavíyasya puṣṭéḥ

42

5.042.01a     prá śáṃtamā váruṇaṃ dī^́dhitī gī^́r
5.042.01b     mitrám bhágam áditiṃ nūnám aśyāḥ
5.042.01c     pŕ̥ṣadyoniḥ páñcahotā śr̥ṇotu
5.042.01d     átūrtapanthā ásuro mayobhúḥ

5.042.02a     práti me stómam áditir jagr̥bhyāt
5.042.02b     sūnúṃ ná mātā^́ hŕ̥diyaṃ suśévam
5.042.02c     bráhma priyáṃ deváhitaṃ yád ásti
5.042.02d     ahám mitré váruṇe yán mayobhú

5.042.03a     úd īraya kavítamaṃ kavīnā^́m
5.042.03b     unáttainam abhí mádhvā ghr̥téna
5.042.03c     sá no vásūni práyatā hitā^́ni
5.042.03d     candrā^́ṇi deváḥ savitā^́ suvāti

5.042.04a     sám indra ṇo mánasā neṣi góbhiḥ
5.042.04b     sáṃ sūríbhir harivaḥ sáṃ suastí
5.042.04c     sám bráhmaṇā deváhitaṃ yád ásti
5.042.04d     sáṃ devā^́nāṃ sumatī^́° yajñíyānām

5.042.05a     devó bhágaḥ savitā^́ rāyó áṃśa
5.042.05b     índro vr̥trásya saṃjíto dhánānām
5.042.05c     r̥bhukṣā^́ vā^́ja utá vā púraṃdhir
5.042.05d     ávantu no amŕ̥tāsas turā^́saḥ

5.042.06a     marútvato ápratītasya jiṣṇór
5.042.06b     ájūryataḥ prá bravāmā kr̥tā^́ni
5.042.06c     ná te pū^́rve maghavan nā^́parāso
5.042.06d     ná vīríyaṃ nū^́tanaḥ káś canā^́pa

5.042.07a     úpa stuhi prathamáṃ ratnadhéyam
5.042.07b     bŕ̥haspátiṃ sanitā^́raṃ dhánānām
5.042.07c     yáḥ śáṃsate stuvaté śámbhaviṣṭhaḥ
5.042.07d     purūvásur āgámaj jóhuvānam

5.042.08a     távotíbhiḥ sácamānā áriṣṭā
5.042.08b     bŕ̥haspate maghávānaḥ suvī^́rāḥ
5.042.08c     yé aśvadā^́ utá vā sánti godā^́
5.042.08d     yé vastradā^́ḥ subhágās téṣu rā^́yaḥ

5.042.09a     visarmā^́ṇaṃ kr̥ṇuhi vittám eṣāṃ
5.042.09b     yé bhuñjáte ápr̥ṇanto na ukthaíḥ
5.042.09c     ápavratān prasavé vāvr̥dhānā^́n
5.042.09d     brahmadvíṣaḥ sū^́riyād yāvayasva

5.042.10a     yá óhate rakṣáso devávītāv
5.042.10b     acakrébhis tám maruto ní yāta
5.042.10c     yó vaḥ śámīṃ śaśamānásya níndāt
5.042.10d     tuchyā^́n kā^́mān karate siṣvidānáḥ

5.042.11a     tám u ṣṭuhi yáḥ suiṣúḥ sudhánvā
5.042.11b     yó víśvasya kṣáyati bheṣajásya
5.042.11c     yákṣvā mahé saumanasā^́ya rudráṃ
5.042.11d     námobhir devám ásuraṃ duvasya

5.042.12a     dámūnaso apáso yé suhástā
5.042.12b     vŕ̥ṣṇaḥ pátnīr nadíyo vibhvataṣṭā^́ḥ
5.042.12c     sárasvatī br̥haddivótá rākā^́
5.042.12d     daśasyántīr varivasyantu śubhrā^́ḥ

5.042.13a     prá sū^́ mahé suśaraṇā^́ya medhā^́ṃ
5.042.13b     gíram bhare návyasīṃ jā^́yamānām
5.042.13c     yá āhanā^́ duhitúr vakṣáṇāsu
5.042.13d     rūpā^́ minānó ákr̥ṇod idáṃ naḥ

5.042.14a     prá suṣṭutí stanáyantaṃ ruvántam
5.042.14b     iḷás pátiṃ jaritar nūnám aśyāḥ
5.042.14c     yó abdimā^́m̐ udanimā^́m̐ íyarti
5.042.14d     prá vidyútā ródasī ukṣámāṇaḥ

5.042.15a     eṣá stómo mā^́rutaṃ śárdho áchā
5.042.15b     rudrásya sūnū^́m̐r yuvanyū^́m̐r úd aśyāḥ
5.042.15c     kā^́mo rāyé havate mā suastí
5.042.15d     úpa stuhi pŕ̥ṣadaśvām̐ ayā^́saḥ

5.042.16a     praíṣá stómaḥ pr̥thivī^́m antárikṣaṃ
5.042.16b     vánaspátīm̐r óṣadhī rāyé aśyāḥ
5.042.16c     devó-devaḥ suhávo bhūtu máhyam
5.042.16d     mā^́ no mātā^́ pr̥thivī^́ durmataú dhāt

5.042.17a     uraú devā anibādhé siyāma

5.042.18a     sám aśvínor ávasā nū^́tanena
5.042.18b     mayobhúvā supráṇītī gamema
5.042.18c     ā^́ no rayíṃ vahatam ótá vīrā^́n
5.042.18d     ā^́ víśvāni amr̥tā saúbhagāni

43

5.043.01a     ā^́ dhenávaḥ páyasā tū^́rṇiarthā
5.043.01b     ámardhantīr úpa no yantu mádhvā
5.043.01c     mahó rāyé br̥hatī^́ḥ saptá vípro
5.043.01d     mayobhúvo jaritā^́ johavīti

5.043.02a     ā^́ suṣṭutī^́ námasā vartayádhyai
5.043.02b     dyā^́vā vā^́jāya pr̥thivī^́ ámr̥dhre
5.043.02c     pitā^́ mātā^́ mádhuvacāḥ suhástā
5.043.02d     bháre-bhare no yaśásāv aviṣṭām

5.043.03a     ádhvaryavaś cakr̥vā^́ṃso mádhūni
5.043.03b     prá vāyáve bharata cā^́ru śukrám
5.043.03c     hóteva naḥ prathamáḥ pāhi asyá
5.043.03d     déva mádhvo rarimā^́ te mádāya

5.043.04a     dáśa kṣípo yuñjate bāhū^́ ádriṃ
5.043.04b     sómasya yā^́ śamitā^́rā suhástā
5.043.04c     mádhvo rásaṃ sugábhastir giriṣṭhā^́ṃ
5.043.04d     cániścadad duduhe śukrám aṃśúḥ

5.043.05a     ásāvi te jujuṣāṇā^́ya sómaḥ
5.043.05b     krátve dákṣāya br̥haté mádāya
5.043.05c     hárī ráthe sudhúrā yóge arvā^́g
5.043.05d     índra priyā^́ kr̥ṇuhi hūyámānaḥ

5.043.06a     ā^́ no mahī^́m arámatiṃ sajóṣā
5.043.06b     gnã^́ṃ devī^́ṃ námasā rātáhavyām
5.043.06c     mádhor mádāya br̥hatī^́m r̥tajñā^́m
5.043.06d     ā^́gne vaha pathíbhir devayā^́naiḥ

5.043.07a     añjánti yám pratháyanto ná víprā
5.043.07b     vapā^́vantaṃ ná agnínā tápantaḥ
5.043.07c     pitúr ná putrá upási práyiṣṭha⁺
5.043.07d     ā^́ gharmó agním r̥táyann asādi

5.043.08a     áchā mahī^́ br̥hatī^́ śáṃtamā gī^́r
5.043.08b     dūtó ná gantu aśvínā huvádhyai
5.043.08c     mayobhúvā saráthā^́ yātam arvā^́g
5.043.08d     gantáṃ nidhíṃ dhúram āṇír ná nā^́bhim

5.043.09a     prá távyaso námaüktiṃ turásya
5.043.09b     ahám pūṣṇá utá vāyór adikṣi
5.043.09c     yā^́ rā^́dhasā coditā^́rā matīnā^́ṃ
5.043.09d     yā^́ vā^́jasya draviṇodā^́ utá tmán

5.043.10a     ā^́ nā^́mabhir marúto vakṣi víśvān
5.043.10b     ā^́ rūpébhir jātavedo huvānáḥ
5.043.10c     yajñáṃ gíro jaritúḥ suṣṭutíṃ ca
5.043.10d     víśve ganta maruto víśva ūtī^́

5.043.11a     ā^́ no divó br̥hatáḥ párvatād ā^́
5.043.11b     sárasvatī yajatā^́ gantu yajñám
5.043.11c     hávaṃ devī^́ jujuṣāṇā^́ ghr̥tā^́cī
5.043.11d     śagmā^́ṃ no vā^́cam uśatī^́ śr̥ṇotu

5.043.12a     ā^́ vedhásaṃ nī^́lapŕ̥ṣṭham br̥hántam
5.043.12b     bŕ̥haspátiṃ sádane sādayadhvam
5.043.12c     sādádyoniṃ dáma ā^́ dīdivā^́ṃsaṃ
5.043.12d     híraṇyavarṇam aruṣáṃ sapema

5.043.13a     ā^́ dharṇasír br̥háddivo rárāṇo
5.043.13b     víśvebhir gantu ómabhir huvānáḥ
5.043.13c     gnã^́ vásāna óṣadhīr ámr̥dhras
5.043.13d     tridhā^́tuśr̥ṅgo vr̥ṣabhó vayodhā^́ḥ

5.043.14a     mātúṣ padé paramé śukrá āyór
5.043.14b     vipanyávo · rāspirā^́so agman
5.043.14c     suśéviyaṃ námasā rātáhavyāḥ
5.043.14d     śíśum mr̥janti āyávo ná vāsé

5.043.15a     br̥hád váyo br̥haté túbhyam agne
5.043.15b     dhiyājúro mithunā^́saḥ sacanta
5.043.15c     devó-devaḥ suhávo bhūtu máhyam
5.043.15d     mā^́ no mātā^́ pr̥thivī^́ durmataú dhāt

5.043.16a     uraú devā anibādhé siyāma

5.043.17a     sám aśvínor ávasā nū^́tanena
5.043.17b     mayobhúvā supráṇītī gamema
5.043.17c     ā^́ no rayíṃ vahatam ótá vīrā^́n
5.043.17d     ā^́ víśvāni amr̥tā saúbhagāni

44

5.044.01a     tám pratnáthā pūrváthā viśváthemáthā
5.044.01b     jyeṣṭhátātim barhiṣádaṃ suvarvídam
5.044.01c     pratīcīnáṃ vr̥jánaṃ dohase girā^́
5.044.01d     āśúṃ jáyantam ánu yā^́su várdhase

5.044.02a     śriyé sudŕ̥śīr úparasya yā^́ḥ súvar
5.044.02b     virócamānaḥ kakúbhām acodáte
5.044.02c     sugopā^́ asi ná dábhāya sukrato
5.044.02d     paró māyā^́bhir r̥tá āsa nā^́ma te

5.044.03a     átyaṃ havíḥ sacate sác ca dhā^́tu ca
5.044.03b     áriṣṭagātuḥ sá hótā sahobháriḥ
5.044.03c     prasársrāṇo ánu barhír vŕ̥ṣā śíśur
5.044.03d     mádhye yúvā ajáro visrúhā hitáḥ

5.044.04a     prá va eté suyújo yā^́man iṣṭáye
5.044.04b     nī^́cīr amúṣmai yamíya r̥tāvŕ̥dhaḥ
5.044.04c     suyántubhiḥ sarvaśāsaír abhī^́śubhiḥ
5.044.04d     krívir nā^́māni pravaṇé muṣāyati

5.044.05a     saṃjárbhurāṇas tárubhiḥ sutegŕ̥bhaṃ
5.044.05b     vayākínaṃ cittágarbhāsu susváruḥ
5.044.05c     dhāravākéṣu r̥jugātha śobhase
5.044.05d     várdhasva pátnīr abhí jīvó adhvaré

5.044.06a     yādŕ̥g evá dádr̥śe tādŕ̥g ucyate
5.044.06b     sáṃ chāyáyā dadhire sidhráyāpsu ā^́
5.044.06c     mahī^́m asmábhyam uruṣā^́m urú jráyo
5.044.06d     br̥hát suvī^́ram ánapacyutaṃ sáhaḥ

5.044.07a     véti ágrur jánivān vā^́ áti spŕ̥dhaḥ
5.044.07b     samaryatā^́ mánasā sū^́riyaḥ kavíḥ
5.044.07c     ghraṃsáṃ rákṣantam pári viśváto gáyam
5.044.07d     asmā^́kaṃ śárma vanavat suā^́vasuḥ

5.044.08a     jyā^́yāṃsam asyá yatúnasya ketúna
5.044.08b     r̥ṣisvaráṃ carati yā^́su nā^́ma te
5.044.08c     yādŕ̥śmin dhā^́yi tám apasyáyā vidad
5.044.08d     yá u svayáṃ váhate só áraṃ karat

5.044.09a     samudrám āsām áva tasthe agrimā^́
5.044.09b     ná riṣyati sávanaṃ yásmin ā^́yatā
5.044.09c     átrā ná hā^́rdi kravaṇásya rejate
5.044.09d     yátrā matír vidyáte pūtabándhanī

5.044.10a     sá hí kṣatrásya manasásya cíttibhir
5.044.10b     evāvadásya yajatásya sádhreḥ
5.044.10c     avatsārásya spr̥ṇavāma ráṇvabhiḥ
5.044.10d     śáviṣṭhaṃ vā^́jaṃ vidúṣā cid árdhiyam

5.044.11a     śyená āsām áditiḥ kakṣíyo mádo
5.044.11b     viśvávārasya yajatásya māyínaḥ
5.044.11c     sám anyám-anyam arthayanti étave
5.044.11d     vidúr viṣā^́ṇam paripā^́nam ánti té

5.044.12a     sadāpr̥ṇó yajató ví dvíṣo vadhīd
5.044.12b     bāhuvr̥ktáḥ śrutavít táryo vaḥ sácā
5.044.12c     ubhā^́ sá várā práti eti bhā^́ti ca
5.044.12d     yád īṃ gaṇám bhájate suprayā^́vabhiḥ

5.044.13a     sutambharó yájamānasya sátpatir
5.044.13b     víśvāsām ū^́dhaḥ sá dhiyā^́m udáñcanaḥ
5.044.13c     bhárad dhenū^́ rásavac chiśriye páyo
5.044.13d     anubruvāṇó ádhi eti ná svapán

5.044.14a     yó jāgā^́ra tám ŕ̥caḥ kāmayante
5.044.14b     yó jāgā^́ra tám u sā^́māni yanti
5.044.14c     yó jāgā^́ra tám ayáṃ sóma āha
5.044.14d     távāhám asmi sakhiyé níokāḥ

5.044.15a     agnír jāgāra tám ŕ̥caḥ kāmayante
5.044.15b     agnír jāgāra tám u sā^́māni yanti
5.044.15c     agnír jāgāra tám ayáṃ sóma āha
5.044.15d     távāhám asmi sakhiyé níokāḥ

45

5.045.01a     vidā^́ divó viṣiyánn ádrim ukthaír
5.045.01b     āyatiyā^́ uṣáso arcíno guḥ
5.045.01c     ápāvr̥ta vrajínīr út súvar gād
5.045.01d     ví dúro · mā^́nuṣīr devá āvaḥ

5.045.02a     ví sū^́riyo amátiṃ ná śríyaṃ sād
5.045.02b     ā^́ ūrvā^́d gávām mātā^́ jānatī^́ gāt
5.045.02c     dhánvarṇaso nadíyaḥ khā^́doarṇāḥ
5.045.02d     sthū^́ṇā iva súmitā dr̥ṃhata dyaúḥ

5.045.03a     asmā^́ ukthā^́ya párvatasya gárbho
5.045.03b     mahī^́nãṃ janúṣe pūrviyā^́ya
5.045.03c     ví párvato jíhīta sā^́dhata dyaúr
5.045.03d     āvívāsanto dasayanta bhū^́ma

5.045.04a     sūktébhir vo vácobhir devájuṣṭair
5.045.04b     índrā nú agnī^́ ávase huvádhyai
5.045.04c     ukthébhir hí ṣmā kaváyaḥ suyajñā^́
5.045.04d     āvívāsanto marúto yájanti

5.045.05a     éto nú adyá sudhíyo bhávāma
5.045.05b     prá duchúnā minavāmā várīyaḥ
5.045.05c     āré dvéṣāṃsi sanutár dadhāma
5.045.05d     áyāma prā^́ñco yájamānam ácha

5.045.06a     étā dhíyaṃ kr̥ṇávāmā sakhāyo
5.045.06b     ápa yā^́ mātā^́m̐ r̥ṇutá vrajáṃ góḥ
5.045.06c     yáyā mánur viśiśipráṃ jigā^́ya
5.045.06d     yáyā vaṇíg vaṅkúr ā^́pā púrīṣam

5.045.07a     ánūnod átra hástayato ádrir
5.045.07b     ā^́rcan yéna dáśa māsó návagvāḥ
5.045.07c     r̥táṃ yatī^́ sarámā gā^́ avindad
5.045.07d     víśvāni satyā^́ áṅgirāś cakāra

5.045.08a     víśve asyā^́ viúṣi mā^́hināyāḥ
5.045.08b     sáṃ yád góbhir áṅgiraso návanta
5.045.08c     útsa āsãm paramé sadhástha
5.045.08d     r̥tásya pathā^́ sarámā vidad gā^́ḥ

5.045.09a     ā^́ sū^́riyo yãtu saptáaśvaḥ
5.045.09b     kṣétraṃ yád asyorviyā^́ dīrghayāthé
5.045.09c     raghúḥ śyenáḥ patayad ándho áchā
5.045.09d     yúvā kavír dīdayad góṣu gáchan

5.045.10a     ā^́ sū^́riyo aruhac chukrám árṇo
5.045.10b     áyukta yád dharíto vītápr̥ṣṭhāḥ
5.045.10c     udnā^́ ná nā^́vam anayanta dhī^́rā
5.045.10d     āśr̥ṇvatī^́r ā^́po arvā^́g atiṣṭhan

5.045.11a     dhíyaṃ vo apsú dadhiṣe suvarṣā^́ṃ
5.045.11b     yáyā^́taran dáśa māsó návagvāḥ
5.045.11c     ayā^́ dhiyā^́ siyāma devágopā
5.045.11d     ayā^́ dhiyā^́ tuturyāmā^́ti áṃhaḥ

46

5.046.01a     háyo ná vidvā^́m̐ ayuji svayáṃ dhurí
5.046.01b     tā^́ṃ vahāmi pratáraṇīm avasyúvam
5.046.01c     nā^́syā vaśmi vimúcaṃ nā^́vŕ̥tam púnar
5.046.01d     vidvā^́n patháḥ puraetá rjú neṣati

5.046.02a     ágna índra váruṇa mítra dévāḥ
5.046.02b     śárdhaḥ prá yanta mā^́rutotá viṣṇo
5.046.02c     ubhā^́ nā^́satyā rudaró⁺ ádha gnā^́ḥ
5.046.02d     pūṣā^́ bhágaḥ sárasvatī juṣanta

5.046.03a     indrāgnī^́ mitrā^́váruṇā^́ditiṃ súvaḥ
5.046.03b     pr̥thivī^́ṃ dyā^́m marútaḥ párvatām̐ apáḥ
5.046.03c     huvé víṣṇum pūṣáṇam bráhmaṇas pátim
5.046.03d     bhágaṃ nú śáṃsaṃ savitā^́ram ūtáye

5.046.04a     utá no víṣṇur utá vā^́to asrídho
5.046.04b     draviṇodā^́ utá sómo máyas karat
5.046.04c     uta rbháva utá rāyé no aśvínā
5.046.04d     utá tváṣṭā utá víbhvā^́nu maṃsate

5.046.05a     utá tyán no mā^́rutaṃ śárdha ā^́ gamad
5.046.05b     divikṣayáṃ yajatám barhír āsáde
5.046.05c     bŕ̥haspátiḥ śárma pūṣótá no yamad
5.046.05d     varūthíyaṃ váruṇo mitró aryamā^́

5.046.06a     utá tyé naḥ párvatāsaḥ suśastáyaḥ
5.046.06b     sudītáyo nadíyas trā^́maṇe bhuvan
5.046.06c     bhágo vibhaktā^́ śávasā^́vasā^́ gamad
5.046.06d     uruvyácā áditiḥ śrotu me hávam

5.046.07a     devā^́nām pátnīr uśatī^́r avantu naḥ
5.046.07b     prā^́vantu nas tujáye vā^́jasātaye
5.046.07c     yā^́ḥ pā^́rthivāso yā^́ apā^́m ápi vraté
5.046.07d     tā^́ no devīḥ suhavāḥ śárma yachata

5.046.08a     utá gnã^́ viyantu devápatnīr
5.046.08b     indrāṇī^́ · agnā^́yī aśvínī rā^́ṭ
5.046.08c     ā^́ ródasī varuṇānī^́ śr̥ṇotu
5.046.08d     viántu devī^́r yá r̥túr jánīnām

47

5.047.01a     prayuñjatī^́ divá eti bruvāṇā^́
5.047.01b     mahī^́ mātā^́ duhitúr bodháyantī
5.047.01c     āvívāsantī yuvatír manīṣā^́
5.047.01d     pitŕ̥bhya ā^́ sádane jóhuvānā

5.047.02a     ajirā^́sas tádapa ī^́yamānā
5.047.02b     ātasthivā^́ṃso amŕ̥tasya nā^́bhim
5.047.02c     anantā^́sa urávo viśvátaḥ sīm
5.047.02d     pári dyā^́vāpr̥thivī^́ yanti pánthāḥ

5.047.03a     ukṣā^́ samudró aruṣáḥ suparṇáḥ
5.047.03b     pū^́rvasya yónim pitúr ā^́ viveśa
5.047.03c     mádhye divó níhitaḥ pŕ̥śnir áśmā
5.047.03d     ví cakrame rájasas pāti ántau

5.047.04a     catvā^́ra īm bibhrati kṣemayánto
5.047.04b     dáśa gárbhaṃ caráse dhāpayante
5.047.04c     tridhā^́tavaḥ paramā^́ asya gā^́vo
5.047.04d     diváś caranti pári sadyó ántān

5.047.05a     idáṃ vápur nivácanaṃ janāsaś
5.047.05b     cáranti yán nadíyas tasthúr ā^́paḥ
5.047.05c     duvé yád īm bibhr̥tó mātúr anyé
5.047.05d     ihéha jāté yamíyā sábandhū

5.047.06a     ví tanvate dhíyo asmā ápāṃsi
5.047.06b     vástrā putrā^́ya mātáro vayanti
5.047.06c     upaprakṣé vŕ̥ṣaṇo módamānā
5.047.06d     divás pathā^́ vadhúvo yanti ácha

5.047.07a     tád astu mitrāvaruṇā tád agne
5.047.07b     śáṃ yór asmábhyam idám astu śastám
5.047.07c     aśīmáhi gādhám utá pratiṣṭhā^́ṃ
5.047.07d     námo divé br̥haté sā^́danāya

48

5.048.01a     kád u priyā^́ya dhā^́mane manāmahe
5.048.01b     svákṣatrāya sváyaśase mahé vayám
5.048.01c     āmeniyásya rájaso yád abhrá ā^́m̐
5.048.01d     apó vr̥ṇānā^́ vitanóti māyínī

5.048.02a     tā^́ atnata vayúnaṃ vīrávakṣaṇaṃ
5.048.02b     samāniyā^́ vr̥táyā víśvam ā^́ rájaḥ
5.048.02c     ápo ápācīr áparā ápejate
5.048.02d     prá pū^́rvābhis tirate devayúr jánaḥ

5.048.03a     ā^́ grā^́vabhir ahaníyebhir aktúbhir
5.048.03b     váriṣṭhaṃ vájram ā^́ jigharti māyíni
5.048.03c     śatáṃ vā yásya pracáran suvé dáme
5.048.03d     saṃvartáyanto ví ca vartayann áhā

5.048.04a     tā^́m asya rītím paraśór iva práti
5.048.04b     ánīkam akhyam bhujé asya várpasaḥ
5.048.04c     sácā yádi pitumántam iva kṣáyaṃ
5.048.04d     rátnaṃ dádhāti bhárahūtaye viśé

5.048.05a     sá jihváyā cáturanīka r̥ñjate
5.048.05b     cā^́ru vásāno váruṇo yátann arím
5.048.05c     ná tásya vidma puruṣatvátā vayáṃ
5.048.05d     yáto bhágaḥ savitā^́ dā^́ti vā^́riyam

49

5.049.01a     deváṃ vo adyá savitā^́ram éṣe
5.049.01b     bhágaṃ ca rátnaṃ vibhájantam āyóḥ
5.049.01c     ā^́ vāṃ narā purubhujā vavr̥tyāṃ
5.049.01d     divé-dive cid aśvinā sakhīyán

5.049.02a     práti prayā^́ṇam ásurasya vidvā^́n
5.049.02b     sūktaír deváṃ savitā^́raṃ duvasya
5.049.02c     úpa bruvīta námasā vijānáñ
5.049.02d     jyéṣṭhaṃ ca rátnaṃ vibhájantam āyóḥ

5.049.03a     adatrayā^́ dayate vā^́riyāṇi
5.049.03b     pūṣā^́ bhágo áditir vásta usráḥ
5.049.03c     índro víṣṇur váruṇo mitró agnír
5.049.03d     áhāni bhadrā^́ janayanta dasmā^́ḥ

5.049.04a     tán no anarvā^́ savitā^́ várūthaṃ
5.049.04b     tát síndhava iṣáyanto ánu gman
5.049.04c     úpa yád vóce adhvarásya hótā
5.049.04d     rāyáḥ syāma pátayo vā^́jaratnāḥ

5.049.05a     prá yé vásubhya ī^́vad ā^́ námo dúr
5.049.05b     yé mitré váruṇe suuktávācaḥ
5.049.05c     ávaitu ábhvaṃ kr̥ṇutā^́ várīyo
5.049.05d     diváspr̥thivyór ávasā madema

50

5.050.01a     víśvo devásya nayitúr⁺
5.050.01b     márto vurīta sakhiyám
5.050.01c     víśvo rāyá iṣudhyati
5.050.01d     dyumnáṃ vr̥ṇīta puṣyáse

5.050.02a     té te deva nayitar⁺
5.050.02b     yé ca imā^́m̐ anuśáse
5.050.02c     té rāyā^́ té hí āpŕ̥ce
5.050.02d     sácemahi sacathíyaiḥ

5.050.03a     áto na ā^́ nr̥̄^́n átithīn
5.050.03b     átaḥ pátnīr daśasyata
5.050.03c     āré víśvam patheṣṭhã^́ṃ
5.050.03d     dviṣó yuyotu yū^́yuviḥ

5.050.04a     yátra váhnir abhíhito
5.050.04b     dudrávad dróṇiyaḥ paśúḥ
5.050.04c     nr̥máṇā vīrápastiyo
5.050.04d     árṇā dhī^́reva sánitā

5.050.05a     eṣá te deva nayitā⁺
5.050.05b     ráthaspátiḥ śáṃ rayíḥ
5.050.05c     śáṃ rāyé śáṃ suastáya
5.050.05d     iṣastúto manāmahe
5.050.05e     devastúto manāmahe

51

5.051.01a     ágne sutásya pītáye
5.051.01b     víśvair ū^́mebhir ā^́ gahi
5.051.01c     devébhir havyádātaye

5.051.02a     ŕ̥tadhītaya ā^́ gata
5.051.02b     sátyadharmāṇo adhvarám
5.051.02c     agnéḥ pibata jihváyā

5.051.03a     víprebhir vipra santiya
5.051.03b     prātaryā^́vabhir ā^́ gahi
5.051.03c     devébhiḥ sómapītaye

5.051.04a     ayáṃ sómaś camū^́ sutó
5.051.04b     ámatre pári ṣicyate
5.051.04c     priyá índrāya vāyáve

5.051.05a     vā^́yav ā^́ yāhi vītáye
5.051.05b     juṣāṇó havyádātaye
5.051.05c     píbā sutásya ándhaso abhí práyaḥ

5.051.06a     índraś ca vāyav eṣãṃ
5.051.06b     sutā^́nām pītím arhathaḥ
5.051.06c     tā^́ñ juṣethām arepásāv abhí práyaḥ

5.051.07a     sutā^́ índrāya vāyáve
5.051.07b     sómāso dádhiāśiraḥ
5.051.07c     nimnáṃ ná yanti síndhavo abhí práyaḥ

5.051.08a     sajū^́r víśvebhir devébhir
5.051.08b     aśvíbhyām uṣásā sajū^́ḥ
5.051.08c     ā^́ yāhi agne atrivát suté raṇa

5.051.09a     sajū^́r mitrā^́váruṇābhyāṃ
5.051.09b     sajū^́ḥ sómena víṣṇunā
5.051.09c     ā^́ yāhi agne atrivát suté raṇa

5.051.10a     sajū^́r ādityaír vásubhiḥ
5.051.10b     sajū^́r índreṇa vāyúnā
5.051.10c     ā^́ yāhi agne atrivát suté raṇa

5.051.11a     suastí no mimītām aśvínā bhágaḥ
5.051.11b     suastí devī^́ áditir anarváṇaḥ
5.051.11c     suastí pūṣā^́ ásuro dadhātu naḥ
5.051.11d     suastí dyā^́vāpr̥thivī^́ sucetúnā

5.051.12a     suastáye vāyúm úpa bravāmahai
5.051.12b     sómaṃ suastí bhúvanasya yás pátiḥ
5.051.12c     bŕ̥haspátiṃ sárvagaṇaṃ suastáye
5.051.12d     suastáya ādityā^́so bhavantu naḥ

5.051.13a     víśve devā^́ no adyā^́ suastáye
5.051.13b     vaiśvānaró vásur agníḥ suastáye
5.051.13c     devā^́ avantu r̥bhávaḥ suastáye
5.051.13d     suastí no rudaráḥ⁺ pātu áṃhasaḥ

5.051.14a     suastí mitrāvaruṇā
5.051.14b     suastí pathye revati
5.051.14c     svastí na índraś cāgníś ca
5.051.14d     svastí no adite kr̥dhi

5.051.15a     svastí pánthām ánu carema
5.051.15b     sūryācandramásāv iva
5.051.15c     púnar dádatā ághnatā
5.051.15d     jānatā^́ sáṃ gamemahi

52

5.052.01a     prá śyāvaaśva dhr̥ṣṇuyā^́
5.052.01b     árcā marúdbhir ŕ̥kvabhiḥ
5.052.01c     yé adroghám anuṣvadháṃ
5.052.01d     śrávo mádanti yajñíyāḥ

5.052.02a     té hí sthirásya śávasaḥ
5.052.02b     sákhāyaḥ sánti dhr̥ṣṇuyā^́
5.052.02c     té yā^́mann ā^́ dhr̥ṣadvínas
5.052.02d     tmánā pãnti śáśvataḥ

5.052.03a     té syandrā^́so ná ukṣáṇo
5.052.03b     áti ṣkandanti śárvarīḥ
5.052.03c     marútām ádhā máho
5.052.03d     diví kṣamā^́ ca manmahe

5.052.04a     marútsu vo dadhīmahi
5.052.04b     stómaṃ yajñáṃ ca dhr̥ṣṇuyā^́
5.052.04c     víśve yé mā^́nuṣā yugā^́
5.052.04d     pã^́nti mártiyaṃ riṣáḥ

5.052.05a     árhanto yé sudā^́navo
5.052.05b     náro ásāmiśavasaḥ
5.052.05c     prá yajñáṃ yajñíyebhiyo
5.052.05d     divó arcā marúdbhiyaḥ

5.052.06a     ā^́ rukmaír ā^́ yudhā^́ nára
5.052.06b     r̥ṣvā^́ r̥ṣṭī^́r asr̥kṣata
5.052.06c     ánv enām̐ áha vidyúto
5.052.06d     marúto jájhjhatīr iva
5.052.06e     bhānúr arta tmánā diváḥ

5.052.07a     yé vāvr̥dhánta pā^́rthivā
5.052.07b     yá urā^́v antárikṣa ā^́
5.052.07c     vr̥jáne vā nadī^́nãṃ
5.052.07d     sadhásthe vā mahó diváḥ

5.052.08a     śárdho mā^́rutam úc chaṃsa
5.052.08b     satyáśavasam ŕ̥bhvasam
5.052.08c     utá sma té śubhé náraḥ
5.052.08d     prá syandrā^́ yujata tmánā

5.052.09a     utá sma té páruṣṇiyām
5.052.09b     ū^́rṇā vasata śundhyávaḥ
5.052.09c     utá pavyā^́ ráthānãm
5.052.09d     ádrim bhindanti ójasā

5.052.10a     ā^́pathayo vípathayo
5.052.10b     ántaspathā ánupathāḥ
5.052.10c     etébhir máhya° nā^́mabhir
5.052.10d     yajñáṃ viṣṭārá ohate

5.052.11a     ádhā náro ní ohate
5.052.11b     ádhā niyúta ohate
5.052.11c     ádhā pā^́rāvatā íti
5.052.11d     citrā^́ rūpā^́ṇi dárśiyā

5.052.12a     chandastúbhaḥ kubhanyáva
5.052.12b     útsam ā^́ kīríṇo nr̥tuḥ
5.052.12c     té me ké cin ná tāyáva
5.052.12d     ū^́mā āsan dr̥śí tviṣé

5.052.13a     yá r̥ṣvā^́ r̥ṣṭívidyutaḥ
5.052.13b     kaváyaḥ sánti vedhásaḥ
5.052.13c     tám r̥ṣe mā^́rutaṃ gaṇáṃ
5.052.13d     namasyā^́ ramáyā girā^́

5.052.14a     ácha rṣe mā^́rutaṃ gaṇáṃ
5.052.14b     dānā^́ mitráṃ ná yoṣáṇā
5.052.14c     divó vā dhr̥ṣṇava ójasā
5.052.14d     stutā^́ dhībhír iṣaṇyata

5.052.15a     nū^́ manvāná eṣãṃ
5.052.15b     devā^́m̐ áchā ná vakṣáṇā
5.052.15c     dānā^́ saceta sūríbhir
5.052.15d     yā^́maśrutebhir añjíbhiḥ

5.052.16a     prá yé me bandhueṣé
5.052.16b     gã^́ṃ vócanta sūráyaḥ
5.052.16c     pŕ̥śniṃ vocanta mātáram
5.052.16d     ádhā pitáram iṣmíṇaṃ
5.052.16e     rudráṃ vocanta śíkvasaḥ

5.052.17a     saptá me saptá śākína
5.052.17b     ékam-ekā śatā^́ daduḥ
5.052.17c     yamúnāyām ádhi śrutám
5.052.17d     úd rā^́dho gáviyam mr̥je
5.052.17e     ní rā^́dho áśviyam mr̥je

53

5.053.01a     kó veda jā^́nam eṣãṃ
5.053.01b     kó vā purā^́ sumnéṣu āsa marútām
5.053.01c     yád yuyujré kilāsíyaḥ

5.053.02a     aítā^́n rátheṣu tasthúṣaḥ
5.053.02b     káḥ śuśrāva kathā^́ yayuḥ
5.053.02c     kásmai sasruḥ sudā^́se ánu āpáya
5.053.02d     íḷābhir vr̥ṣṭáyaḥ sahá

5.053.03a     té ma āhur yá āyayúr
5.053.03b     úpa dyúbhir víbhir máde
5.053.03c     náro máryā arepása
5.053.03d     imā^́n páśyann íti ṣṭuhi

5.053.04a     yé añjíṣu yé vā^́śīṣu svábhānavaḥ
5.053.04b     srakṣú rukméṣu khādíṣu
5.053.04c     śrāyā^́ rátheṣu dhánvasu

5.053.05a     yuṣmā^́kaṃ smā ráthām̐ ánu
5.053.05b     mudé dadhe maruto jīradānavaḥ
5.053.05c     vr̥ṣṭī^́ dyā^́vo yatī^́r iva

5.053.06a     ā^́ yáṃ náraḥ sudā^́navo dadāśúṣe
5.053.06b     diváḥ kóśam ácucyavuḥ
5.053.06c     ví parjányaṃ sr̥janti ródasī ánu
5.053.06d     dhánvanā yanti vr̥ṣṭáyaḥ

5.053.07a     tatr̥dānā^́ḥ síndhavaḥ kṣódasā rájaḥ
5.053.07b     prá sasrur dhenávo yathā
5.053.07c     syannā^́ áśvā ivā^́dhvano vimócane
5.053.07d     ví yád vártanta eníyaḥ

5.053.08a     ā^́ yāta maruto divá
5.053.08b     ā^́ntárikṣād amā^́d utá
5.053.08c     mā^́va sthāta parāvátaḥ

5.053.09a     mā^́ vo rasā^́ ánitabhā kúbhā krúmur
5.053.09b     mā^́ vaḥ síndhur ní rīramat
5.053.09c     mā^́ vaḥ pári ṣṭhāt saráyuḥ purīṣíṇī
5.053.09d     asmé ī^́t sumnám astu vaḥ

5.053.10a     táṃ vaḥ śárdhaṃ ráthānãṃ
5.053.10b     tveṣáṃ gaṇám mā^́rutaṃ návyasīnãm
5.053.10c     ánu prá yanti vr̥ṣṭáyaḥ

5.053.11a     śárdhaṃ-śardhaṃ va eṣãṃ
5.053.11b     vrā^́taṃ-vrātaṃ gaṇáṃ-gaṇaṃ suśastíbhiḥ
5.053.11c     ánu krāmema dhītíbhiḥ

5.053.12a     kásmā adyá sújātāya
5.053.12b     rātáhavyāya prá yayuḥ
5.053.12c     enā^́ yā^́mena marútaḥ

5.053.13a     yéna tokā^́ya tánayāya dhāníyam
5.053.13b     bī^́jaṃ váhadhve ákṣitam
5.053.13c     asmábhyaṃ tád dhattana yád va ī^́mahe
5.053.13d     rā^́dho viśvā^́yu saúbhagam

5.053.14a     átīyāma nidás tiráḥ suastíbhir
5.053.14b     hitvā^́ avadyám árātīḥ
5.053.14c     vr̥ṣṭuvī^́ śáṃ yór ā^́pa usrí bheṣajáṃ
5.053.14d     siyā^́ma marutaḥ sahá

5.053.15a     sudeváḥ samahāsati
5.053.15b     suvī^́ro naro marutaḥ sá mártiyaḥ
5.053.15c     yáṃ trā^́yadhve siyā^́ma té

5.053.16a     stuhí bhojā^́n stuvató asya yā^́mani
5.053.16b     ráṇan gā^́vo ná yávase
5.053.16c     yatáḥ pū^́rvām̐ iva sákhīm̐r ánu hvaya
5.053.16d     girā^́ gr̥ṇīhi kāmínaḥ

54

5.054.01a     prá śárdhāya mā^́rutāya svábhānava
5.054.01b     imā^́ṃ vā^́cam anajā parvatacyúte
5.054.01c     gharmastúbhe divá ā^́ pr̥ṣṭhayájvane
5.054.01d     dyumnáśravase máhi nr̥mṇám arcata

5.054.02a     prá vo marutas taviṣā^́ udanyávo
5.054.02b     vayovŕ̥dho aśvayújaḥ párijrayaḥ
5.054.02c     sáṃ vidyútā dádhati vā^́śati tritáḥ
5.054.02d     sváranti ā^́po avánā párijrayaḥ

5.054.03a     vidyúnmahaso náro áśmadidyavo
5.054.03b     vā^́tatviṣo marútaḥ parvatacyútaḥ
5.054.03c     abdayā^́ cin múhur ā^́ hrādunīvŕ̥taḥ
5.054.03d     stanáyadamā rabhasā^́ údojasaḥ

5.054.04a     ví aktū^́n rudrā ví áhāni śikvaso
5.054.04b     ví antárikṣaṃ ví rájāṃsi dhūtayaḥ
5.054.04c     ví yád ájrām̐ ájatha nā^́va īṃ yathā
5.054.04d     ví durgā^́ṇi maruto nā^́ha riṣyatha

5.054.05a     tád vīríyaṃ vo maruto mahitvanáṃ
5.054.05b     dīrgháṃ tatāna sū^́riyo ná yójanam
5.054.05c     étā ná yā^́me ágr̥bhītaśociṣo
5.054.05d     ánaśvadāṃ yán ní áyātanā girím

5.054.06a     ábhrāji śárdho maruto yád arṇasám
5.054.06b     móṣathā vr̥kṣáṃ kapanéva vedhasaḥ
5.054.06c     ádha smā no arámatiṃ sajoṣasaś
5.054.06d     cákṣur 'va° yántam ánu neṣathā sugám

5.054.07a     ná sá jīyate maruto ná hanyate
5.054.07b     ná sredhati ná vyathate ná riṣyati
5.054.07c     nā^́sya rā^́ya úpa dasyanti nótáya
5.054.07d     ŕ̥ṣiṃ vā yáṃ rā^́jānaṃ vā súṣūdatha

5.054.08a     niyútvanto grāmajíto yáthā náro
5.054.08b     aryamáṇo ná marútaḥ kabandhínaḥ
5.054.08c     pínvanti útsaṃ yád inā^́so ásvaran
5.054.08d     ví undanti pr̥thivī^́m mádhvo ándhasā

5.054.09a     pravátvatīyám pr̥thivī^́ marúdbhiyaḥ
5.054.09b     pravátvatī dyaúr bhavati prayádbhiyaḥ
5.054.09c     pravátvatīḥ pathíyā antárikṣiyāḥ
5.054.09d     pravátvantaḥ párvatā jīrádānavaḥ

5.054.10a     yán marutaḥ sabharasaḥ suvarṇaraḥ
5.054.10b     sū^́rya údite mádathā divo naraḥ
5.054.10c     ná vo áśvāḥ śrathayantā^́ha sísrataḥ
5.054.10d     sadyó asyá ádhvanaḥ pārám aśnutha

5.054.11a     áṃseṣu va r̥ṣṭáyaḥ patsú khādáyo
5.054.11b     vákṣassu rukmā^́ maruto ráthe śúbhaḥ
5.054.11c     agníbhrājaso vidyúto gábhastiyoḥ
5.054.11d     śíprāḥ śīrṣásu vítatā hiraṇyáyīḥ

5.054.12a     táṃ nā^́kam aryó ágr̥bhītaśociṣaṃ
5.054.12b     rúśat píppalam maruto ví dhūnutha
5.054.12c     sám acyanta vr̥jánā^́titviṣanta yát
5.054.12d     sváranti ghóṣaṃ vítatam r̥tāyávaḥ

5.054.13a     yuṣmā^́dattasya maruto vicetaso
5.054.13b     rāyáḥ siyāma rathíyo váyasvataḥ
5.054.13c     ná yó yúchati tiṣíyo yáthā divó
5.054.13d     asmé rāranta marutaḥ sahasríṇam

5.054.14a     yūyáṃ rayím maruta spārhávīraṃ
5.054.14b     yūyám ŕ̥ṣim avatha sā^́mavipram
5.054.14c     yūyám árvantam bharatā^́ya vā^́jaṃ
5.054.14d     yūyáṃ dhattha rā^́jānaṃ śruṣṭimántam

5.054.15a     tád vo yāmi dráviṇaṃ sadyaūtayo
5.054.15b     yénā súvar ṇá tatánāma nr̥̄^́m̐r abhí
5.054.15c     idáṃ sú me maruto haryatā váco
5.054.15d     yásya tárema tárasā śatáṃ hímāḥ

55

5.055.01a     práyajyavo marúto bhrā^́jadr̥ṣṭayo
5.055.01b     br̥hád váyo dadhire rukmávakṣasaḥ
5.055.01c     ī^́yante áśvaiḥ suyámebhir āśúbhiḥ
5.055.01d     śúbhaṃ yātā^́m ánu ráthā avr̥tsata

5.055.02a     svayáṃ dadhidhve táviṣīṃ yáthā vidá
5.055.02b     br̥hán mahānta urviyā^́ ví rājatha
5.055.02c     utā^́ntárikṣam mamire ví ójasā
5.055.02d     śúbhaṃ yātā^́m ánu ráthā avr̥tsata

5.055.03a     sākáṃ jātā^́ḥ subhúvaḥ sākám ukṣitā^́ḥ
5.055.03b     śriyé cid ā^́ prataráṃ vāvr̥dhur náraḥ
5.055.03c     virokíṇaḥ sū^́riyasyeva raśmáyaḥ
5.055.03d     śúbhaṃ yātā^́m ánu ráthā avr̥tsata

5.055.04a     ābhūṣéṇyaṃ vo maruto mahitvanáṃ
5.055.04b     didr̥kṣéṇyaṃ sū^́riyasyeva cákṣaṇam
5.055.04c     utó asmā^́m̐ amr̥tatvé dadhātana
5.055.04d     śúbhaṃ yātā^́m ánu ráthā avr̥tsata

5.055.05a     úd īrayathā marutaḥ samudrató
5.055.05b     yūyáṃ vr̥ṣṭíṃ varṣayathā purīṣiṇaḥ
5.055.05c     ná vo dasrā úpa dasyanti dhenávaḥ
5.055.05d     śúbhaṃ yātā^́m ánu ráthā avr̥tsata

5.055.06a     yád áśvān dhūrṣú pŕ̥ṣatīr áyugdhuvaṃ
5.055.06b     hiraṇyáyān práti átkām̐ ámugdhuvam
5.055.06c     víśvā ít spŕ̥dho maruto ví asyatha
5.055.06d     śúbhaṃ yātā^́m ánu ráthā avr̥tsata

5.055.07a     ná párvatā ná nadíyo varanta vo
5.055.07b     yátrā^́cidhvam maruto gáchathéd u tát
5.055.07c     utá dyā^́vāpr̥thivī^́ yāthanā pári
5.055.07d     śúbhaṃ yātā^́m ánu ráthā avr̥tsata

5.055.08a     yát pūrviyám maruto yác ca nū^́tanaṃ
5.055.08b     yád udyáte vasavo yác ca śasyáte
5.055.08c     víśvasya tásya bhavathā návedasaḥ
5.055.08d     śúbhaṃ yātā^́m ánu ráthā avr̥tsata

5.055.09a     mr̥̄ḷáta⁺ no maruto mā^́ vadhiṣṭana
5.055.09b     asmábhyaṃ śárma bahuláṃ ví yantana
5.055.09c     ádhi stotrásya sakhiyásya gātana
5.055.09d     śúbhaṃ yātā^́m ánu ráthā avr̥tsata

5.055.10a     yūyám asmā^́n nayata vásyo áchā
5.055.10b     nír aṃhatíbhyo maruto gr̥ṇānā^́ḥ
5.055.10c     juṣádhvaṃ no havyádātiṃ yajatrā
5.055.10d     vayáṃ siyāma pátayo rayīṇā^́m

56

5.056.01a     ágne śárdhantam ā^́ gaṇám
5.056.01b     piṣṭáṃ rukmébhir añjíbhiḥ
5.056.01c     víśo adyá marútãm áva hvaye
5.056.01d     diváś cid rocanā^́d ádhi

5.056.02a     yáthā cin mányase hr̥dā^́
5.056.02b     tád ín me jagmur āśásaḥ
5.056.02c     yé te nédiṣṭhaṃ hávanāni āgáman
5.056.02d     tā^́n vardha bhīmásaṃdr̥śaḥ

5.056.03a     mīḷhúṣmatīva pr̥thivī^́ párāhatā
5.056.03b     mádanti eti asmád ā^́
5.056.03c     ŕ̥kṣo ná vo marutaḥ śímīvām̐ ámo
5.056.03d     dudhró gaúr iva bhīmayúḥ

5.056.04a     ní yé riṇánti ójasā
5.056.04b     vŕ̥thā gā^́vo ná durdhúraḥ
5.056.04c     áśmānaṃ cit svaríyam párvataṃ girím
5.056.04d     prá cyāvayanti yā^́mabhiḥ

5.056.05a     út tiṣṭha nūnám eṣãṃ
5.056.05b     stómaiḥ sámukṣitānãm
5.056.05c     marútãm purutámam ápūrviyaṃ
5.056.05d     gávāṃ sárgam iva hvaye

5.056.06a     yuṅgdhváṃ hí áruṣī ráthe
5.056.06b     yuṅgdhváṃ rátheṣu rohítaḥ
5.056.06c     yuṅgdhváṃ hárī ajirā^́ dhurí vóḷhave
5.056.06d     váhiṣṭhā dhurí vóḷhave

5.056.07a     utá syá vājī^́ aruṣás tuviṣváṇir
5.056.07b     ihá sma dhāyi darśatáḥ
5.056.07c     mā^́ vo yā^́meṣu marutaś ciráṃ karat
5.056.07d     prá táṃ rátheṣu codata

5.056.08a     ráthaṃ nú mā^́rutaṃ vayáṃ
5.056.08b     śravasyúm ā^́ huvāmahe
5.056.08c     ā^́ yásmin tasthaú suráṇāni bíbhratī
5.056.08d     sácā marútsu rodasī^́

5.056.09a     táṃ vaḥ śárdhaṃ ratheśúbhaṃ
5.056.09b     tveṣám panasyúm ā^́ huve
5.056.09c     yásmin sújātā subhágā mahīyáte
5.056.09d     sácā marútsu mīḷhuṣī^́

57

5.057.01a     ā^́ rudrāsa índravantaḥ sajóṣaso
5.057.01b     híraṇyarathāḥ suvitā^́ya gantana
5.057.01c     iyáṃ vo asmát práti haryate matís
5.057.01d     tr̥ṣṇáje ná divá útsā udanyáve

5.057.02a     vā^́śīmanta r̥ṣṭimánto manīṣíṇaḥ
5.057.02b     sudhánvāna íṣumanto niṣaṅgíṇaḥ
5.057.02c     suáśvā stha suráthāḥ pr̥śnimātaraḥ
5.057.02d     suāyudhā^́ maruto yāthanā śúbham

5.057.03a     dhūnuthá dyā^́m párvatān dāśúṣe vásu
5.057.03b     ní vo vánā jihate yā^́mano bhiyā^́
5.057.03c     kopáyatha pr̥thivī^́m pr̥śnimātaraḥ
5.057.03d     śubhé yád ugrāḥ pŕ̥ṣatīr áyugdhuvam

5.057.04a     vā^́tatviṣo marúto varṣánirṇijo
5.057.04b     yamā^́ iva súsadr̥śaḥ supéśasaḥ
5.057.04c     piśáṅgāśvā aruṇā^́śvā arepásaḥ
5.057.04d     prátvakṣaso mahinā^́ dyaúr ivorávaḥ

5.057.05a     purudrapsā^́ añjimántaḥ sudā^́navas
5.057.05b     tveṣásaṃdr̥śo anavabhrárādhasaḥ
5.057.05c     sujātā^́so janúṣā rukmávakṣaso
5.057.05d     divó arkā^́ amŕ̥taṃ nā^́ma bhejire

5.057.06a     r̥ṣṭáyo vo maruto áṃsayor ádhi
5.057.06b     sáha ójo bāhuvór vo bálaṃ hitám
5.057.06c     nr̥mṇā^́ śīrṣásu ā^́yudhā rátheṣu vo
5.057.06d     víśvā vaḥ śrī^́r ádhi tanū^́ṣu pipiśe

5.057.07a     gómad áśvāvad ráthavat suvī^́raṃ
5.057.07b     candrávad rā^́dho maruto dadā naḥ
5.057.07c     práśastiṃ naḥ kr̥ṇuta rudriyāso
5.057.07d     bhakṣīyá vo ávaso daíviyasya

5.057.08a     hayé náro máruto mr̥̄ḷátā⁺ nas
5.057.08b     túvīmaghāso ámr̥tā ŕ̥tajñāḥ
5.057.08c     sátyaśrutaḥ · kávayo yúvāno
5.057.08d     bŕ̥hadgirayo br̥hád ukṣámāṇāḥ

58

5.058.01a     tám u nūnáṃ táviṣīmantam eṣāṃ
5.058.01b     stuṣé gaṇám mā^́rutaṃ návyasīnām
5.058.01c     yá āśúaśvā ámavad váhanta
5.058.01d     utéśire amŕ̥tasya svarā^́jaḥ

5.058.02a     tveṣáṃ gaṇáṃ tavásaṃ khā^́dihastaṃ
5.058.02b     dhúnivratam māyínaṃ dā^́tivāram
5.058.02c     mayobhúvo yé ámitā mahitvā^́
5.058.02d     vándasva vipra tuvirā^́dhaso nr̥̄^́n

5.058.03a     ā^́ vo yantu udavāhā^́so adyá
5.058.03b     vr̥ṣṭíṃ sé víśve marúto junánti
5.058.03c     ayáṃ yó agnír marutaḥ sámiddha
5.058.03d     etáṃ juṣadhvaṃ kavayo yuvānaḥ

5.058.04a     yūyáṃ rā^́jānam íriyaṃ jánāya
5.058.04b     vibhvataṣṭáṃ janayathā yajatrāḥ
5.058.04c     yuṣmád eti muṣṭihā^́ bāhújūto
5.058.04d     yuṣmád sádaśvo marutaḥ suvī^́raḥ

5.058.05a     arā^́ ivéd ácaramā áheva
5.058.05b     prá-pra jāyante ákavā máhobhiḥ
5.058.05c     pŕ̥śneḥ putrā^́ upamā^́so rábhiṣṭhāḥ
5.058.05d     sváyā matyā^́ marútaḥ sám mimikṣuḥ

5.058.06a     yát prā^́yāsiṣṭa pŕ̥ṣatībhir áśvair
5.058.06b     vīḷupavíbhir maruto ráthebhiḥ
5.058.06c     kṣódanta ā^́po riṇaté vánāni
5.058.06d     ávosríyo vr̥ṣabháḥ krandatu dyaúḥ

5.058.07a     práthiṣṭa yā^́man pr̥thivī^́ cid eṣām
5.058.07b     bhárteva gárbhaṃ suvám íc chávo dhuḥ
5.058.07c     vā^́tān hí áśvān dhurí āyuyujré
5.058.07d     varṣáṃ svédaṃ cakrire rudríyāsaḥ

5.058.08a     hayé náro máruto mr̥̄ḷátā⁺ nas
5.058.08b     túvīmaghāso ámr̥tā ŕ̥tajñāḥ
5.058.08c     sátyaśrutaḥ · kávayo yúvāno
5.058.08d     bŕ̥hadgirayo br̥hád ukṣámāṇāḥ

59

5.059.01a     prá va spáḷ akran suvitā^́ya dāváne
5.059.01b     árcā divé prá pr̥thivyā^́ r̥tám bhare
5.059.01c     ukṣánte áśvān táruṣanta ā^́ rájo
5.059.01d     ánu svám bhānúṃ śrathayante arṇavaíḥ

5.059.02a     ámād eṣām bhiyásā bhū^́mir ejati
5.059.02b     nā^́ür ná pūrṇā^́ kṣarati vyáthir yatī^́
5.059.02c     dūredŕ̥śo yé citáyanta émabhir
5.059.02d     antár mahé vidáthe yetire náraḥ

5.059.03a     gávām iva śriyáse śŕ̥ṅgam uttamáṃ
5.059.03b     sū^́ryo ná cákṣū rájaso visárjane
5.059.03c     átyā iva subhúvaś cā^́rava sthana
5.059.03d     máryā iva śriyáse cetathā naraḥ

5.059.04a     kó vo mahā^́nti mahatā^́m úd aśnavat
5.059.04b     kás kā^́viyā marutaḥ kó ha paúṃsiyā
5.059.04c     yūyáṃ ha bhū^́miṃ kiráṇaṃ ná rejatha
5.059.04d     prá yád bháradhve suvitā^́ya dāváne

5.059.05a     áśvā ivéd aruṣā^́saḥ sábandhavaḥ
5.059.05b     śū^́rā iva prayúdhaḥ prótá yuyudhuḥ
5.059.05c     máryā iva suvŕ̥dho vāvr̥dhur náraḥ
5.059.05d     sū^́ryasya cákṣuḥ prá minanti vr̥ṣṭíbhiḥ

5.059.06a     té ajyeṣṭhā^́ ákaniṣṭhāsa udbhído
5.059.06b     ámadhyamāso máhasā ví vāvr̥dhuḥ
5.059.06c     sujātā^́so janúṣā pŕ̥śnimātaro
5.059.06d     divó máryā ā^́ no áchā jigātana

5.059.07a     váyo ná yé śráyaṇīḥ⁺ paptúr ójasā
5.059.07b     ántān divó br̥hatáḥ sā^́nunas pári
5.059.07c     áśvāsa eṣām ubháye yáthā vidúḥ
5.059.07d     prá párvatasya nabhanū^́m̐r acucyavuḥ

5.059.08a     mímātu dyaúr áditir vītáye naḥ
5.059.08b     sáṃ dā^́nucitrā uṣáso yatantām
5.059.08c     ā^́cucyavur diviyáṃ kóśam etá
5.059.08d     ŕ̥ṣe rudrásya marúto gr̥ṇānā^́ḥ

60

5.060.01a     ī^́ḷe agníṃ suávasaṃ námobhir
5.060.01b     ihá prasattó ví cayat kr̥táṃ naḥ
5.060.01c     ráthair iva prá bhare vājayádbhiḥ
5.060.01d     pradakṣiṇín marútāṃ stómam r̥dhyām

5.060.02a     ā^́ yé tasthúḥ pŕ̥ṣatīṣu śrutā^́su
5.060.02b     sukhéṣu rudrā^́ marúto rátheṣu
5.060.02c     vánā cid ugrā jihate ní vo bhiyā^́
5.060.02d     pr̥thivī^́ cid rejate párvataś cit

5.060.03a     párvataś cin máhi vr̥ddhó bibhāya
5.060.03b     diváś cit sā^́nu rejata svané vaḥ
5.060.03c     yát krī^́ḷatha maruta r̥ṣṭimánta
5.060.03d     ā^́pa iva sadhríañco dhavadhve

5.060.04a     varā^́ ivéd raivatā^́so híraṇyair
5.060.04b     abhí svadhā^́bhis tanúvaḥ pipiśre
5.060.04c     śriyé śréyāṃsas taváso rátheṣu
5.060.04d     satrā^́ máhāṃsi cakrire tanū^́ṣu

5.060.05a     ajyeṣṭhā^́so ákaniṣṭhāsa eté
5.060.05b     sám bhrā^́taro vāvr̥dhuḥ saúbhagāya
5.060.05c     yúvā pitā^́ suápā rudrá eṣāṃ
5.060.05d     sudúghā pŕ̥śniḥ sudínā marúdbhyaḥ

5.060.06a     yád uttamé maruto madhyamé vā
5.060.06b     yád vāvamé subhagāso diví ṣṭhá
5.060.06c     áto no rudrā utá vā nú asya
5.060.06d     ágne vittā^́d dhavíṣo yád yájāma

5.060.07a     agníś ca yán maruto viśvavedaso
5.060.07b     divó váhadhva úttarād ádhi ṣṇúbhiḥ
5.060.07c     té mandasānā^́ dhúnayo riśādaso
5.060.07d     vāmáṃ dhatta yájamānāya sunvaté

5.060.08a     ágne marúdbhiḥ śubháyadbhir ŕ̥kvabhiḥ
5.060.08b     sómam piba mandasānó gaṇaśríbhiḥ
5.060.08c     pavākébhir⁺ viśvaminvébhir āyúbhir
5.060.08d     vaíśvānara pradívā ketúnā sajū^́ḥ

61

5.061.01a     ké ṣṭhā naraḥ śréṣṭhatamā
5.061.01b     yá éka-eka āyayá
5.061.01c     paramásyāḥ parāvátaḥ

5.061.02a     kvà vó 'śvāḥ kvà abhī^́śavaḥ
5.061.02b     katháṃ śeka kathā^́ yaya
5.061.02c     pr̥ṣṭhé sádo nasór yámaḥ

5.061.03a     jagháne códa eṣãṃ
5.061.03b     ví sakthā^́ni náro yamuḥ
5.061.03c     putrakr̥thé ná jánayaḥ

5.061.04a     párā vīrāsa etana
5.061.04b     máryāso bhádrajānayaḥ
5.061.04c     agnitápo yáthā^́satha

5.061.05a     sánat sā^́ aśviyam paśúm
5.061.05b     utá gávyaṃ śatā^́vayam
5.061.05c     śyāvā^́śuvastutāya yā^́
5.061.05d     dór vīrā^́yopabárbr̥hat

5.061.06a     utá tvā strī^́ śáśīyasī
5.061.06b     puṃsó bhavati vásyasī
5.061.06c     ádevatrād arādhásaḥ

5.061.07a     ví yā^́ jānā^́ti jásuriṃ
5.061.07b     ví tŕ̥ṣyantaṃ ví kāmínam
5.061.07c     devatrā^́ kr̥ṇuté mánaḥ

5.061.08a     utá ghā némo ástutaḥ
5.061.08b     púmām̐ íti bruve paṇíḥ
5.061.08c     sá vaíradeya ít samáḥ

5.061.09a     utá me 'rapad yuvatír mamandúṣī
5.061.09b     práti śyāvā^́ya vartaním
5.061.09c     ví róhitā purumīḷhā^́ya yematur
5.061.09d     víprāya dīrgháyaśase

5.061.10a     yó me dhenūnã^́ṃ śatáṃ
5.061.10b     vaídadaśvir yáthā dádat
5.061.10c     tarantá iva maṃhánā

5.061.11a     yá īṃ váhanta āśúbhiḥ
5.061.11b     píbanto madirám mádhu
5.061.11c     átra śrávāṃsi dadhire

5.061.12a     yéṣāṃ śriyā^́dhi ródasī
5.061.12b     vibhrā^́jante rátheṣu ā^́
5.061.12c     diví rukmá ivopári

5.061.13a     yúvā sá mā^́ruto gaṇás
5.061.13b     tveṣáratho ánediyaḥ
5.061.13c     śubhaṃyā^́vā^́pratiṣkutaḥ

5.061.14a     kó veda nūnám eṣãṃ
5.061.14b     yátrā mádanti dhū^́tayaḥ
5.061.14c     r̥tájātā arepásaḥ

5.061.15a     yūyám mártaṃ vipanyavaḥ
5.061.15b     praṇetā^́ra itthā^́ dhiyā^́
5.061.15c     śrótāro yā^́mahūtiṣu

5.061.16a     té no vásūni kā^́miyā
5.061.16b     puruścandrā^́ riśādasaḥ
5.061.16c     ā^́ yajñiyāso vavr̥ttana

5.061.17a     etám me stómam ūrmiye
5.061.17b     dārbhiyā^́ya párā vaha
5.061.17c     gíro devi rathī^́r iva

5.061.18a     utá me vocatād íti
5.061.18b     sutásome ráthavītau
5.061.18c     ná kā^́mo ápa veti me

5.061.19a     eṣá kṣeti ráthavītir
5.061.19b     maghávā gómatīr ánu
5.061.19c     párvateṣu ápaśritaḥ

62

5.062.01a     r̥téna rtám ápihitaṃ dhruváṃ vāṃ
5.062.01b     sū^́ryasya yátra vimucánti áśvān
5.062.01c     dáśa śatā^́ sahá tasthus tád ékaṃ
5.062.01d     devā^́nāṃ śréṣṭhaṃ vápuṣām apaśyam

5.062.02a     tát sú vām mitrāvaruṇā mahitvám
5.062.02b     īrmā^́ tasthúṣīr áhabhir duduhre
5.062.02c     víśvāḥ pinvathaḥ svásarasya dhénā
5.062.02d     ánu vām ékaḥ pavír ā^́ vavarta

5.062.03a     ádhārayatam pr̥thivī^́m utá dyā^́m
5.062.03b     mítrarājānā varuṇā máhobhiḥ
5.062.03c     vardháyatam óṣadhīḥ pínvataṃ gā^́
5.062.03d     áva vr̥ṣṭíṃ sr̥jataṃ jīradānū

5.062.04a     ā^́ vām áśvāsaḥ suyújo vahantu
5.062.04b     yatáraśmaya úpa yantu arvā^́k
5.062.04c     ghr̥tásya nirṇíg ánu vartate vām
5.062.04d     úpa síndhavaḥ pradívi kṣaranti

5.062.05a     ánu śrutā^́m amátiṃ várdhad urvī^́m
5.062.05b     barhír iva yájuṣā rákṣamāṇā
5.062.05c     námasvantā dhr̥tadakṣā^́dhi gárte
5.062.05d     mítrā^́sāthe varuṇéḷāsu antáḥ

5.062.06a     ákravihastā sukŕ̥te paraspā^́
5.062.06b     yáṃ trā^́sāthe varuṇéḷāsu antáḥ
5.062.06c     rā^́jānā kṣatrám áhr̥ṇīyamānā
5.062.06d     sahásrasthūṇam bibhr̥thaḥ sahá dvaú

5.062.07a     híraṇyanirṇig áyo asya sthū^́ṇā
5.062.07b     ví bhrājate diví aśvā^́janīva
5.062.07c     bhadré kṣétre nímitā tílvile vā
5.062.07d     sanéma mádhvo ádhigartiyasya

5.062.08a     híraṇyarūpam uṣáso víuṣṭāv
5.062.08b     áyasthūṇam úditā sū^́riyasya
5.062.08c     ā^́ rohatho varuṇa mitra gártam
5.062.08d     átaś cakṣāthe áditiṃ dítiṃ ca

5.062.09a     yád báṃhiṣṭhaṃ nā^́tivídhe sudānū
5.062.09b     áchidraṃ śárma bhuvanasya gopā
5.062.09c     téna no mitrāvaruṇāv aviṣṭaṃ
5.062.09d     síṣāsanto jigīvā^́ṃsaḥ siyāma

63

5.063.01a     ŕ̥tasya gopāv ádhi tiṣṭhatho ráthaṃ
5.063.01b     sátyadharmāṇā paramé víomani
5.063.01c     yám átra mitrāvaruṇā^́vatho yuváṃ
5.063.01d     tásmai vr̥ṣṭír mádhumat pinvate diváḥ

5.063.02a     samrā^́jāv asyá bhúvanasya rājatho
5.063.02b     mítrāvaruṇā vidáthe suvardŕ̥śā
5.063.02c     vr̥ṣṭíṃ vāṃ rā^́dho amr̥tatvám īmahe
5.063.02d     dyā^́vāpr̥thivī^́ ví caranti tanyávaḥ

5.063.03a     samrā^́jā ugrā^́ vr̥ṣabhā^́ divás pátī
5.063.03b     pr̥thivyā^́ mitrā^́váruṇā vícarṣanī
5.063.03c     citrébhir abhraír úpa tiṣṭhatho rávaṃ
5.063.03d     dyā^́ṃ varṣayatho ásurasya māyáyā

5.063.04a     māyā^́ vām mitrāvaruṇā diví śritā^́
5.063.04b     sū^́ryo jyótiś carati citrám ā^́yudham
5.063.04c     tám abhréṇa vr̥ṣṭiyā^́ gūhatho diví
5.063.04d     párjanya drapsā^́ mádhumanta īrate

5.063.05a     ráthaṃ yuñjate marútaḥ śubhé sukháṃ
5.063.05b     śū^́ro ná mitrāvaruṇā gáviṣṭiṣu
5.063.05c     rájāṃsi citrā^́ ví caranti tanyávo
5.063.05d     diváḥ samrājā páyasā na ukṣatam

5.063.06a     vā^́caṃ sú mitrāvaruṇāv írāvatīm
5.063.06b     parjányaś citrā^́ṃ vadati tvíṣīmatīm
5.063.06c     abhrā^́ vasata marútaḥ sú māyáyā
5.063.06d     dyā^́ṃ varṣayatam aruṇā^́m arepásam

5.063.07a     dhármaṇā mitrāvaruṇā vipaścitā
5.063.07b     vratā^́ rakṣethe ásurasya māyáyā
5.063.07c     r̥téna víśvam bhúvanaṃ ví rājathaḥ
5.063.07d     sū^́ryam ā^́ dhattho diví cítriyaṃ rátham

64

5.064.01a     váruṇaṃ vo riśā^́dasam
5.064.01b     r̥cā^́ mitráṃ havāmahe
5.064.01c     pári vrajéva bāhuvór
5.064.01d     jaganvā^́ṃsā súvarṇaram

5.064.02a     tā^́ bāhávā sucetúnā
5.064.02b     prá yantam asmā árcate
5.064.02c     śévaṃ hí jāríyaṃ vãṃ
5.064.02d     víśvāsu kṣā^́su jóguve

5.064.03a     yán nūnám aśiyā^́ṃ gátim
5.064.03b     mitrásya yãyām pathā^́
5.064.03c     ásya priyásya śármaṇi
5.064.03d     áhiṃsānasya saścire

5.064.04a     yuvā^́bhyām mitrāvaruṇā
5.064.04b     upamáṃ dhẽyām r̥cā^́
5.064.04c     yád dha kṣáye maghónãṃ
5.064.04d     stotr̥̄ṇã^́ṃ ca spūrdháse

5.064.05a     ā^́ no mitra sudītíbhir
5.064.05b     váruṇaś ca sadhástha ā^́
5.064.05c     suvé kṣáye maghónãṃ
5.064.05d     sákhīnãṃ ca vr̥dháse

5.064.06a     yuváṃ no yéṣu varuṇa
5.064.06b     kṣatrám br̥hác ca bibhr̥tháḥ
5.064.06c     urú ṇo vā^́jasātaye
5.064.06d     kr̥táṃ rāyé suastáye

5.064.07a     uchántiyām me yajatā^́
5.064.07b     devákṣatre rúśadgavi
5.064.07c     sutáṃ sómaṃ ná hastíbhir
5.064.07d     ā^́ paḍbhír dhāvataṃ narā
5.064.07e     bíbhratāv arcanā^́nasam

65

5.065.01a     yáś cikéta sá sukrátur
5.065.01b     devatrā^́ sá bravītu naḥ
5.065.01c     váruṇo yásya darśató
5.065.01d     mitró vā vánate gíraḥ

5.065.02a     tā^́ hí śráyiṣṭhavarcasā⁺
5.065.02b     rā^́jānā dīrghaśrúttamā
5.065.02c     tā^́ sátpatī r̥tāvŕ̥dha
5.065.02d     r̥tā^́vānā jáne-jane

5.065.03a     tā^́ vām iyānó ávase
5.065.03b     pū^́rvā úpa bruve sácā
5.065.03c     suáśvāsaḥ sú cetúnā
5.065.03d     vā^́jām̐ abhí prá dāváne

5.065.04a     mitró aṃhóś cid ā^́d urú
5.065.04b     kṣáyāya gātúṃ vanate
5.065.04c     mitrásya hí pratū^́rvataḥ
5.065.04d     sumatír ásti vidhatáḥ

5.065.05a     vayám mitrásya ávasi
5.065.05b     siyā^́ma sapráthastame
5.065.05c     anehásas tuvótayaḥ
5.065.05d     satrā^́ váruṇaśeṣasaḥ

5.065.06a     yuvám mitrā imáṃ jánaṃ
5.065.06b     yátathaḥ sáṃ ca nayathaḥ
5.065.06c     mā^́ maghónaḥ pári khyatam
5.065.06d     mó asmā^́kam ŕ̥ṣīṇãṃ
5.065.06e     gopīthé na uruṣyatam

66

5.066.01a     ā^́ cikitāna sukrátū
5.066.01b     devaú marta riśā^́dasā
5.066.01c     váruṇāya rtápeśase
5.066.01d     dadhītá práyase mahé

5.066.02a     tā^́ hí kṣatrám ávihrutaṃ
5.066.02b     samyág asuryàm ā^́śate°
5.066.02c     ádha vratéva mā^́nuṣaṃ
5.066.02d     súvar ṇá dhāyi darśatám

5.066.03a     tā^́ vām éṣe ráthānãm
5.066.03b     urvī^́ṃ gávyūtim eṣãm
5.066.03c     rātáhavyasya suṣṭutíṃ
5.066.03d     dadhŕ̥k stómair manāmahe

5.066.04a     ádhā hí kā^́viyā yuváṃ
5.066.04b     dákṣasya pūrbhír adbhutā
5.066.04c     ní ketúnā jánānãṃ
5.066.04d     cikéthe pūtadakṣasā

5.066.05a     tád r̥tám pr̥thivi br̥hác
5.066.05b     chravaeṣá ŕ̥ṣīṇãm
5.066.05c     jrayasānā^́v áram pr̥thú
5.066.05d     áti kṣaranti yā^́mabhiḥ

5.066.06a     ā^́ yád vām īyacakṣasā
5.066.06b     mítra vayáṃ ca sūráyaḥ
5.066.06c     vyáciṣṭhe bahupā^́yiye
5.066.06d     yátemahi svarā^́jiye

67

5.067.01a     báḷ itthā^́ deva niṣkr̥tám
5.067.01b     ā^́dityā yajatám br̥hát
5.067.01c     váruṇa mítra áryaman
5.067.01d     várṣiṣṭhaṃ kṣatrám āśathe°

5.067.02a     ā^́ yád yóniṃ hiraṇyáyaṃ
5.067.02b     váruṇa mítra sádathaḥ
5.067.02c     dhartā^́rā carṣaṇīnã^́ṃ
5.067.02d     yantáṃ sumnáṃ riśādasā

5.067.03a     víśve hí viśvávedaso
5.067.03b     váruṇo mitró aryamā^́
5.067.03c     vratā^́ padéva saścire
5.067.03d     pã^́nti mártiyaṃ riṣáḥ

5.067.04a     té hí satyā^́ r̥taspŕ̥śa
5.067.04b     r̥tā^́vāno jáne-jane
5.067.04c     sunīthā^́saḥ sudā^́navo
5.067.04d     aṃhóś cid urucákrayaḥ

5.067.05a     kó nú vām mitra ástuto
5.067.05b     váruṇo vā tanū^́nãm
5.067.05c     tát sú vām éṣate matír
5.067.05d     átribhya éṣate matíḥ

68

5.068.01a     prá vo mitrā^́ya gāyata
5.068.01b     váruṇāya vipā^́ girā^́
5.068.01c     máhikṣatrāv r̥tám br̥hát

5.068.02a     samrā^́jā yā^́ ghr̥táyonī
5.068.02b     mitráś cobhā^́ váruṇaś ca
5.068.02c     devā^́ devéṣu praśastā^́

5.068.03a     tā^́ naḥ śaktam pā^́rthivasya
5.068.03b     mahó rāyó diviyásya
5.068.03c     máhi vāṃ kṣatráṃ devéṣu

5.068.04a     r̥tám r̥téna sápantā
5.068.04b     iṣiráṃ dákṣam āśāte
5.068.04c     adrúhā devaú vardhete

5.068.05a     vr̥ṣṭídyāvā rītíāpā
5.068.05b     iṣás pátī dā^́numatyāḥ
5.068.05c     br̥hántaṃ gártam āśāte

69

5.069.01a     trī^́ rocanā^́ varuṇa trī^́m̐r utá dyū^́n
5.069.01b     trī^́ṇi mitra dhārayatho rájāṃsi
5.069.01c     vāvr̥dhānā^́v amátiṃ kṣatríyasya
5.069.01d     ánu vratáṃ rákṣamāṇāv ajuryám

5.069.02a     írāvatīr varuṇa dhenávo vām
5.069.02b     mádhumad vāṃ síndhavo mitra duhre
5.069.02c     tráyas tasthur vr̥ṣabhā^́sas tisr̥̄ṇā^́ṃ
5.069.02d     dhiṣáṇānāṃ retodhā^́ ví dyumántaḥ

5.069.03a     prātár devī^́m áditiṃ johavīmi
5.069.03b     madhyáṃdina úditā sū^́riyasya
5.069.03c     rāyé mitrāvaruṇā sarvátātā
5.069.03d     ī^́ḷe tokā^́ya tánayāya śáṃ yóḥ

5.069.04a     yā^́ dhartā^́rā rájaso rocanásya
5.069.04b     utā^́dityā^́ diviyā^́ pā^́rthivasya
5.069.04c     ná vāṃ devā^́ amŕ̥tā ā^́ minanti
5.069.04d     vratā^́ni mitrāvaruṇā dhruvā^́ṇi

70

5.070.01a     purūrúṇā cid dhí ásti
5.070.01b     ávo nūnáṃ vāṃ varuṇa
5.070.01c     mítra váṃsi vāṃ sumatím

5.070.02a     tā^́ vāṃ samyág adruhvāṇā
5.070.02b     íṣam aśyāma dhā^́yase
5.070.02c     vayáṃ té rudrā siyāma

5.070.03a     pātáṃ no rudrā pāyúbhir
5.070.03b     utá trāyethāṃ sutrātrā^́
5.070.03c     turyā^́ma dásyūn tanū^́bhiḥ

5.070.04a     mā^́ kásya adbhutakratū
5.070.04b     yakṣám bhujemā tanū^́bhiḥ
5.070.04c     mā^́ śéṣasā mā^́ tánasā

71

5.071.01a     ā^́ no gantaṃ riśādasā
5.071.01b     váruṇa mítra barháṇā
5.071.01c     úpemáṃ cā^́rum adhvarám

5.071.02a     víśvasya hí pracetasā
5.071.02b     váruṇa mítra rā^́jathaḥ
5.071.02c     īśānā^́ pipyataṃ dhíyaḥ

5.071.03a     úpa naḥ sutám ā^́ gataṃ
5.071.03b     váruṇa mítra dāśúṣaḥ
5.071.03c     asyá sómasya pītáye

72

5.072.01a     ā^́ mitré váruṇe vayáṃ
5.072.01b     gīrbhír juhumo atrivát
5.072.01c     ní barhíṣi sadataṃ sómapītaye

5.072.02a     vraténa stho dhruvákṣemā
5.072.02b     dhármaṇā yātayájjanā
5.072.02c     ní barhíṣi sadataṃ sómapītaye

5.072.03a     mitráś ca no váruṇaś ca
5.072.03b     juṣétāṃ yajñám iṣṭáye
5.072.03c     ní barhíṣi sadatāṃ sómapītaye

73

5.073.01a     yád adyá stháḥ parāváti
5.073.01b     yád arvāváti aśvinā
5.073.01c     yád vā purū^́ purubhujā
5.073.01d     yád antárikṣa ā^́ gatam

5.073.02a     ihá tyā^́ purubhū^́tamā
5.073.02b     purū^́ dáṃsāṃsi bíbhratā
5.073.02c     varasyā^́ yāmi ádhrigū
5.073.02d     huvé tuvíṣṭamā bhujé

5.073.03a     īrmā^́nyád vápuṣe vápuś
5.073.03b     cakráṃ ráthasya yemathuḥ
5.073.03c     páry anyā^́ nā^́huṣā yugā^́
5.073.03d     mahnā^́ rájāṃsi dīyathaḥ

5.073.04a     tád ū ṣú vām enā^́ kr̥táṃ
5.073.04b     víśvā yád vām ánu ṣṭáve
5.073.04c     nā^́nā jātā^́v arepásā
5.073.04d     sám asmé bándhum éyathuḥ

5.073.05a     ā^́ yád vāṃ sūriyā^́ ráthaṃ
5.073.05b     tíṣṭhad raghuṣyádaṃ sádā
5.073.05c     pári vām aruṣā^́ váyo
5.073.05d     ghr̥ṇā^́ varanta ātápaḥ

5.073.06a     yuvór átriś ciketati
5.073.06b     nárā sumnéna cétasā
5.073.06c     gharmáṃ yád vām arepásaṃ
5.073.06d     nā^́satyāsnā^́ bhuraṇyáti

5.073.07a     ugró vāṃ kakuhó yayíḥ
5.073.07b     śr̥ṇvé yā^́meṣu saṃtaníḥ
5.073.07c     yád vāṃ dáṃsobhir aśvinā
5.073.07d     átrir narāvavártati

5.073.08a     mádhva ū ṣú madhūyuvā
5.073.08b     rúdrā síṣakti pipyúṣī
5.073.08c     yát samudrā^́ti párṣathaḥ
5.073.08d     pakvā^́ḥ pŕ̥kṣo bharanta vām

5.073.09a     satyám íd vā^́ u aśvinā
5.073.09b     yuvā^́m āhur mayobhúvā
5.073.09c     tā^́ yā^́man yāmahū^́tamā
5.073.09d     yā^́mann ā^́ mr̥̄ḷayáttamā⁺

5.073.10a     imā^́ bráhmāṇi várdhanā
5.073.10b     aśvíbhyāṃ santu śáṃtamā
5.073.10c     yā^́ tákṣāma ráthām̐ iva
5.073.10d     ávocāma br̥hán námaḥ

74

5.074.01a     kũ^́ṣṭho devāv aśvinā
5.074.01b     adyā^́ divó manāvasū
5.074.01c     tác chravatho vr̥ṣaṇvasū
5.074.01d     átrir vām ā^́ vivāsati

5.074.02a     kúha tyā^́ kúha nú śrutā^́
5.074.02b     diví devā^́ nā^́satiyā
5.074.02c     kásminn ā^́ yatatho jáne
5.074.02d     kó vāṃ nadī^́nãṃ sácā

5.074.03a     káṃ yāthaḥ káṃ ha gachathaḥ
5.074.03b     kám áchā yuñjathe° rátham
5.074.03c     kásya bráhmāṇi raṇyatho
5.074.03d     vayáṃ vām uśmasīṣṭáye

5.074.04a     pauráṃ cid dhí udaprútam
5.074.04b     paúra paurā^́ya jínvathaḥ
5.074.04c     yád īṃ gr̥bhītátātaye
5.074.04d     siṃhám iva druhás padé

5.074.05a     prá cyávānāj jujurúṣo
5.074.05b     vavrím átkaṃ ná muñcathaḥ
5.074.05c     yúvā yádī kr̥tháḥ púnar
5.074.05d     ā^́ kā^́mam r̥ṇve vadhúvaḥ

5.074.06a     ásti hí vām ihá stotā^́
5.074.06b     smási vāṃ saṃdŕ̥śi śriyé
5.074.06c     nũ^́ śrutám ma ā^́ gatam
5.074.06d     ávobhir vājinīvasū

5.074.07a     kó vām adyá purūṇã^́m
5.074.07b     ā^́ vavne mártiyānãm
5.074.07c     kó vípro vipravāhasā
5.074.07d     kó yajñaír vājinīvasū

5.074.08a     ā^́ vāṃ rátho ráthānãṃ
5.074.08b     yáyiṣṭho⁺ yātu aśvinā
5.074.08c     purū^́ cid asmayús tirá
5.074.08d     āṅgūṣó mártiyeṣu ā^́

5.074.09a     śám ū ṣú vām madhūyuvā
5.074.09b     asmā^́kam astu carkr̥tíḥ
5.074.09c     arvācīnā^́ vicetasā
5.074.09d     víbhiḥ śyenéva dīyatam

5.074.10a     áśvinā yád dha kárhi cic
5.074.10b     chuśrūyā^́tam imáṃ hávam
5.074.10c     vásvīr ū ṣú vãm bhújaḥ
5.074.10d     pr̥ñcánti sú vãm pŕ̥caḥ

75

5.075.01a     práti priyátamaṃ ráthaṃ
5.075.01b     vŕ̥ṣaṇaṃ vasuvā^́hanam
5.075.01c     stotā^́ vām aśvināv ŕ̥ṣiḥ
5.075.01d     stómena práti bhūṣati
5.075.01e     mā^́dhvī máma śrutaṃ hávam

5.075.02a     atiā^́yātam aśvinā
5.075.02b     tiró víśvā aháṃ sánā
5.075.02c     dásrā híraṇyavartanī
5.075.02d     súṣumnā síndhuvāhasā
5.075.02e     mā^́dhvī máma śrutaṃ hávam

5.075.03a     ā^́ no rátnāni bíbhratāv
5.075.03b     áśvinā gáchataṃ yuvám
5.075.03c     rúdrā híraṇyavartanī
5.075.03d     juṣāṇā^́ vājinīvasū
5.075.03e     mā^́dhvī máma śrutaṃ hávam

5.075.04a     suṣṭúbho vāṃ vr̥ṣaṇvasū
5.075.04b     ráthe vā^́ṇīcī ā^́hitā
5.075.04c     utá vāṃ kakuhó mr̥gáḥ
5.075.04d     pŕ̥kṣaḥ kr̥ṇoti vāpuṣó
5.075.04e     mā^́dhvī máma śrutaṃ hávam

5.075.05a     bodhínmanasā rathíyā
5.075.05b     iṣirā^́ havanaśrútā
5.075.05c     víbhiś cyávānam aśvinā
5.075.05d     ní yātho ádvayāvinam
5.075.05e     mā^́dhvī máma śrutaṃ hávam

5.075.06a     ā^́ vāṃ narā manoyújo
5.075.06b     áśvāsaḥ pruṣitápsavaḥ
5.075.06c     váyo vahantu pītáye
5.075.06d     sahá sumnébhir aśvinā
5.075.06e     mā^́dhvī máma śrutaṃ hávam

5.075.07a     áśvināv éhá gachataṃ
5.075.07b     nā^́satyā mā^́ ví venatam
5.075.07c     tiráś cid aryayā^́ pári
5.075.07d     vartír yātam adābhiyā
5.075.07e     mā^́dhvī máma śrutaṃ hávam

5.075.08a     asmín yajñé adābhiyā
5.075.08b     jaritā^́raṃ śubhas patī
5.075.08c     avasyúm aśvinā yuváṃ
5.075.08d     gr̥ṇántam úpa bhūṣatho
5.075.08e     mā^́dhvī máma śrutaṃ hávam

5.075.09a     ábhūd uṣā^́ rúśatpaśur
5.075.09b     ā^́gnír adhāyi r̥tvíyaḥ
5.075.09c     áyoji vāṃ vr̥ṣaṇvasū
5.075.09d     rátho dasrāv ámartiyo
5.075.09e     mā^́dhvī máma śrutaṃ hávam

76

5.076.01a     ā^́ bhāti agnír uṣásām ánīkam
5.076.01b     úd víprāṇāṃ devayā^́ vā^́co asthuḥ
5.076.01c     arvā^́ñcā nūnáṃ rathiyehá yātam
5.076.01d     pīpivā^́ṃsam aśvinā gharmám ácha

5.076.02a     ná saṃskr̥tám prá mimīto gámiṣṭhā
5.076.02b     ánti nūnám aśvínópastutehá
5.076.02c     dívābhipitve ávasā^́gamiṣṭhā
5.076.02d     práty ávartiṃ dāśúṣe śámbhaviṣṭhā

5.076.03a     utā^́ yātaṃ saṃgavé prātár áhno
5.076.03b     madhyáṃdina úditā sū^́riyasya
5.076.03c     dívā náktam ávasā śáṃtamena
5.076.03d     nédā^́nīm pītír aśvínā^́ tatāna

5.076.04a     idáṃ hí vām pradívi sthā^́nam óka
5.076.04b     imé gr̥hā^́ aśvinedáṃ duroṇám
5.076.04c     ā^́ no divó br̥hatáḥ párvatād ā^́
5.076.04d     adbhyó yātam íṣam ū^́rjaṃ váhantā

5.076.05a     sám aśvínor ávasā nū^́tanena
5.076.05b     mayobhúvā supráṇītī gamema
5.076.05c     ā^́ no rayíṃ vahatam ótá vīrā^́n
5.076.05d     ā^́ víśvāni amr̥tā saúbhagāni

77

5.077.01a     prātaryā^́vāṇā prathamā^́ yajadhvam
5.077.01b     purā^́ gŕ̥dhrād áraruṣaḥ pibātaḥ
5.077.01c     prātár hí yajñám aśvínā dadhā^́te
5.077.01d     prá śaṃsanti kaváyaḥ pūrvabhā^́jaḥ

5.077.02a     prātár yajadhvam aśvínā hinota
5.077.02b     ná sāyám asti devayā^́ ájuṣṭam
5.077.02c     utā^́nyó asmád yajate ví cā^́vaḥ
5.077.02d     pū^́rvaḥ-pūrvo yájamāno vánīyān

5.077.03a     híraṇyatvaṅ mádhuvarṇo ghr̥tásnuḥ
5.077.03b     pŕ̥kṣo váhann ā^́ rátho vartate vām
5.077.03c     mánojavā aśvinā vā^́taraṃhā
5.077.03d     yénātiyāthó duritā^́ni víśvā

5.077.04a     yó bhū^́yiṣṭhaṃ nā^́satyābhyāṃ vivéṣa
5.077.04b     cániṣṭham pitvó rárate vibhāgé
5.077.04c     sá tokám asya pīparac chámībhir
5.077.04d     ánūrdhvabhāsaḥ sádam ít tuturyāt

5.077.05a     sám aśvínor ávasā nū^́tanena
5.077.05b     mayobhúvā supráṇītī gamema
5.077.05c     ā^́ no rayíṃ vahatam ótá vīrā^́n
5.077.05d     ā^́ víśvāni amr̥tā saúbhagāni

78

5.078.01a     áśvināv éhá gachataṃ
5.078.01b     nā^́satyā mā^́ ví venatam
5.078.01c     haṃsā^́v iva patatam ā^́ sutā^́m̐ úpa

5.078.02a     áśvinā hariṇā^́v iva
5.078.02b     gaurā^́v ivā^́nu yávasam
5.078.02c     haṃsā^́v iva patatam ā^́ sutā^́m̐ úpa

5.078.03a     áśvinā vājinīvasū
5.078.03b     juṣéthāṃ yajñám iṣṭáye
5.078.03c     haṃsā^́v iva patatam ā^́ sutā^́m̐ úpa

5.078.04a     átrir yád vām avaróhann r̥bī^́sam
5.078.04b     ájohavīn nā^́dhamāneva yóṣā
5.078.04c     śyenásya cij jávasā nū^́tanena
5.078.04d     ágachatam aśvinā śáṃtamena

5.078.05a     ví jihīṣva vanaspate
5.078.05b     yóniḥ sū^́ṣyantiyā iva
5.078.05c     śrutám me aśvinā hávaṃ
5.078.05d     saptávadhriṃ ca muñcatam

5.078.06a     bhītā^́ya nā^́dhamānāya
5.078.06b     ŕ̥ṣaye saptávadhraye
5.078.06c     māyā^́bhir aśvinā yuváṃ
5.078.06d     vr̥kṣáṃ sáṃ ca ví cācathaḥ

5.078.07a     yáthā vā^́taḥ puṣkaríṇīṃ
5.078.07b     samiṅgáyati sarvátaḥ
5.078.07c     evā^́ te gárbha ejatu
5.078.07d     niraítu dáśamāsiyaḥ

5.078.08a     yáthā vā^́to yáthā vánaṃ
5.078.08b     yáthā samudrá éjati
5.078.08c     evā^́ tváṃ daśamāsiya
5.078.08d     sahā^́vehi jarā^́yuṇā

5.078.09a     dáśa mā^́sāñ chaśayānáḥ
5.078.09b     kumāró ádhi mātári
5.078.09c     niraítu jīvó ákṣato
5.078.09d     jīvó jī^́vantiyā ádhi

79

5.079.01a     mahé no adyá bodhaya
5.079.01b     úṣo rāyé divítmatī
5.079.01c     yáthā cin no ábodhayaḥ
5.079.01d     satyáśravasi vāyiyé
5.079.01e     sújāte áśvasūnr̥te

5.079.02a     yā^́ sunīthé śaucadrathé
5.079.02b     ví aúcho duhitar divaḥ
5.079.02c     sā^́ ví ucha sáhīyasi
5.079.02d     satyáśravasi vāyiyé
5.079.02e     sújāte áśvasūnr̥te

5.079.03a     sā^́ no adyā^́bharádvasur
5.079.03b     ví uchā duhitar divaḥ
5.079.03c     yó ví aúchaḥ sáhīyasi
5.079.03d     satyáśravasi vāyiyé
5.079.03e     sújāte áśvasūnr̥te

5.079.04a     abhí yé tvā vibhāvari
5.079.04b     stómair gr̥ṇánti váhnayaḥ
5.079.04c     maghaír maghoni suśríyo
5.079.04d     dā^́manvantaḥ surātáyaḥ
5.079.04e     sújāte áśvasūnr̥te

5.079.05a     yác cid dhí te gaṇā^́ imé
5.079.05b     chadáyanti magháttaye
5.079.05c     pári cid váṣṭayo dadhur
5.079.05d     dádato rā^́dho áhrayaṃ
5.079.05e     sújāte áśvasūnr̥te

5.079.06a     aíṣu dhā vīrávad yáśa
5.079.06b     úṣo maghoni sūríṣu
5.079.06c     yé no rā^́dhāṃsi áhrayā
5.079.06d     maghávāno árāsata
5.079.06e     sújāte áśvasūnr̥te

5.079.07a     tébhyo dyumnám br̥hád yáśa
5.079.07b     úṣo maghoni ā^́ vaha
5.079.07c     yé no rā^́dhāṃsi áśviyā
5.079.07d     gavyā^́ bhájanta sūráyaḥ
5.079.07e     sújāte áśvasūnr̥te

5.079.08a     utá no gómatīr íṣa
5.079.08b     ā^́ vahā duhitar divaḥ
5.079.08c     sākáṃ sū^́ryasya raśmíbhiḥ
5.079.08d     śukraíḥ śócadbhir arcíbhiḥ
5.079.08e     sújāte áśvasūnr̥te

5.079.09a     ví uchā duhitar divo
5.079.09b     mā^́ ciráṃ tanuthā ápaḥ
5.079.09c     nét tvā stenáṃ yáthā ripúṃ
5.079.09d     tápāti sū^́ro arcíṣā
5.079.09e     sújāte áśvasūnr̥te

5.079.10a     etā^́vad véd uṣas tuvám
5.079.10b     bhū^́yo vā dā^́tum arhasi
5.079.10c     yā^́ stotŕ̥bhyo vibhāvari
5.079.10d     uchántī ná pramī^́yase
5.079.10e     sújāte áśvasūnr̥te

80

5.080.01a     dyutádyāmānam br̥hatī^́m r̥téna
5.080.01b     r̥tā^́varīm aruṇápsuṃ vibhātī^́m
5.080.01c     devī^́m uṣásaṃ súvar āváhantīm
5.080.01d     práti víprāso matíbhir jarante

5.080.02a     eṣā^́ jánaṃ darśatā^́ bodháyantī
5.080.02b     sugā^́n patháḥ kr̥ṇvatī^́ yāti ágre
5.080.02c     br̥hadrathā^́ br̥hatī^́ viśvaminvā^́
5.080.02d     uṣā^́ jyótir yachati ágre áhnām

5.080.03a     eṣā^́ góbhir aruṇébhir yujānā^́
5.080.03b     ásredhantī rayím áprāyu cakre
5.080.03c     pathó rádantī suvitā^́ya devī^́
5.080.03d     puruṣṭutā^́ viśvávārā ví bhāti

5.080.04a     eṣā^́ víenī bhavati dvibárhā
5.080.04b     āviṣkr̥ṇvānā^́ tanúvam purástāt
5.080.04c     r̥tásya pánthām ánu eti sādhú
5.080.04d     prajānatī^́va ná díśo mināti

5.080.05a     eṣā^́ śubhrā^́ ná tanúvo vidānā^́
5.080.05b     ūrdhvéva snātī^́ dr̥śáye no asthāt
5.080.05c     ápa dvéṣo bā^́dhamānā támāṃsi
5.080.05d     uṣā^́ divó duhitā^́ jyótiṣā^́gāt

5.080.06a     eṣā^́ pratīcī^́ duhitā^́ divó nr̥̄^́n
5.080.06b     yóṣeva bhadrā^́ ní riṇīte ápsaḥ
5.080.06c     viūrṇvatī^́ dāśúṣe vā^́riyāṇi
5.080.06d     púnar jyótir yuvatíḥ pūrváthākaḥ

81

5.081.01a     yuñjáte mána utá yuñjate dhíyo
5.081.01b     víprā víprasya br̥ható vipaścítaḥ
5.081.01c     ví hótrā dadhe vayunāvíd éka ín
5.081.01d     mahī^́ devásya savitúḥ páriṣṭutiḥ

5.081.02a     víśvā rūpā^́ṇi práti muñcate kavíḥ
5.081.02b     prā^́sāvīd bhadráṃ dvipáde cátuṣpade
5.081.02c     ví nā^́kam akhyat savitā^́ váreṇiyo
5.081.02d     ánu prayā^́ṇam uṣáso ví rājati

5.081.03a     yásya prayā^́ṇam ánu anyá íd yayúr
5.081.03b     devā^́ devásya mahimā^́nam ójasā
5.081.03c     yáḥ pā^́rthivāni vimamé sá étaśo
5.081.03d     rájāṃsi deváḥ savitā^́ mahitvanā^́

5.081.04a     utá yāsi savitas trī^́ṇi rocanā^́
5.081.04b     utá sū^́ryasya raśmíbhiḥ sám ucyasi
5.081.04c     utá rā^́trīm ubhayátaḥ párīyasa
5.081.04d     utá mitró bhavasi deva dhármabhiḥ

5.081.05a     utéśiṣe prasavásya tvám éka íd
5.081.05b     utá pūṣā^́ bhavasi deva yā^́mabhiḥ
5.081.05c     utédáṃ víśvam bhúvanaṃ ví rājasi
5.081.05d     śyāvā^́śvas te savita stómam ānaśe

82

5.082.01a     tát savitúr vr̥ṇīmahe
5.082.01b     vayáṃ devásya bhójanam
5.082.01c     śráyiṣṭhaṃ⁺ sarvadhā^́tamaṃ
5.082.01d     túram bhágasya dhīmahi

5.082.02a     ásya hí sváyaśastaraṃ
5.082.02b     savitúḥ kác caná priyám
5.082.02c     ná minánti svarā^́jiyam

5.082.03a     sá hí rátnāni dāśúṣe
5.082.03b     suvā^́ti savitā^́ bhágaḥ
5.082.03c     tám bhāgáṃ citrám īmahe

5.082.04a     adyā^́ no deva savitaḥ
5.082.04b     prajā^́vat sāvīḥ saúbhagam
5.082.04c     párā duṣvápniyaṃ suva

5.082.05a     víśvāni deva savitar
5.082.05b     duritā^́ni párā suva
5.082.05c     yád bhadráṃ tán na ā^́ suva

5.082.06a     ánāgaso áditaye
5.082.06b     devásya savitúḥ savé
5.082.06c     víśvā vāmā^́ni dhīmahi

5.082.07a     ā^́ viśvádevaṃ sátpatiṃ
5.082.07b     sūktaír adyā^́ vr̥ṇīmahe
5.082.07c     satyásavaṃ savitā^́ram

5.082.08a     yá imé ubhé áhanī
5.082.08b     purá éti áprayuchan
5.082.08c     suādhī^́r deváḥ savitā^́

5.082.09a     yá imā^́ víśvā jātā^́ni
5.082.09b     āśrāváyati ślókena
5.082.09c     prá ca suvā^́ti savitā^́

83

5.083.01a     áchā vada tavásaṃ gīrbhír ābhíḥ
5.083.01b     stuhí parjányaṃ námasā^́ vivāsa
5.083.01c     kánikradad vr̥ṣabhó jīrádānū
5.083.01d     réto dadhāti óṣadhīṣu gárbham

5.083.02a     ví vr̥kṣā^́n hanti utá hanti rakṣáso
5.083.02b     víśvam bibhāya bhúvanam mahā^́vadhāt
5.083.02c     utā^́nāgā īṣate vŕ̥ṣṇiyāvato
5.083.02d     yát parjánya stanáyan hánti duṣkŕ̥taḥ

5.083.03a     rathī^́ iva káśayā^́śvām̐ abhikṣipánn
5.083.03b     āvír dūtā^́n kr̥ṇute varṣíyām̐ áha
5.083.03c     dūrā^́t siṃhásya stanáthā úd īrate
5.083.03d     yát parjányaḥ kr̥ṇuté varṣíyaṃ nábhaḥ

5.083.04a     prá vā^́tā vā^́nti patáyanti vidyúta
5.083.04b     úd óṣadhīr jíhate pínvate súvaḥ
5.083.04c     írā víśvasmai bhúvanāya jāyate
5.083.04d     yát parjányaḥ pr̥thivī^́ṃ rétasā^́vati

5.083.05a     yásya vraté pr̥thivī^́ nánnamīti
5.083.05b     yásya vraté śaphávaj járbhurīti
5.083.05c     yásya vratá óṣadhīr viśvárūpāḥ
5.083.05d     sá naḥ parjanya máhi śárma yacha

5.083.06a     divó no vr̥ṣṭím maruto rarīdhvam
5.083.06b     prá pinvata vŕ̥ṣṇo áśvasya dhā^́rāḥ
5.083.06c     arvā^́ṅ eténa stanayitnúnéhi
5.083.06d     apó niṣiñcánn ásuraḥ pitā^́ naḥ

5.083.07a     abhí kranda stanáya gárbham ā^́ dhā
5.083.07b     udanvátā pári dīyā ráthena
5.083.07c     dŕ̥tiṃ sú karṣa víṣitaṃ níañcaṃ
5.083.07d     samā^́ bhavantu udváto nipādā^́ḥ

5.083.08a     mahā^́ntaṃ kóśam úd acā ní ṣiñca
5.083.08b     syándantāṃ kulyā^́ víṣitāḥ purástāt
5.083.08c     ghr̥téna dyā^́vāpr̥thivī^́ ví undhi
5.083.08d     suprapāṇám bhavatu aghniyā^́bhyaḥ

5.083.09a     yát parjanya kánikradat
5.083.09b     stanáyan háṃsi duṣkŕ̥taḥ
5.083.09c     prátīdáṃ víśvam modate
5.083.09d     yát kíṃ ca pr̥thivyā^́m ádhi

5.083.10a     ávarṣīr varṣám úd u ṣū^́ gr̥bhāya
5.083.10b     ákar dhánvāni átietavā^́ u
5.083.10c     ájījana óṣadhīr bhójanāya kám
5.083.10d     utá prajā^́bhyo avido manīṣā^́m

84

5.084.01a     báḷ itthā^́ párvatānãṃ
5.084.01b     khidrám bibharṣi pr̥thivi
5.084.01c     prá yā^́ bhū^́mim pravatvati
5.084.01d     mahnā^́ jinóṣi mahini

5.084.02a     stómāsas tvā vicāriṇi
5.084.02b     práti ṣṭobhanti aktúbhiḥ
5.084.02c     prá yā^́ vā^́jaṃ ná héṣantam
5.084.02d     perúm ásyasi arjuni

5.084.03a     dr̥̄ḷhā^́+ cid yā^́ vánaspátīn
5.084.03b     kṣmayā^́ dárdharṣi ójasā
5.084.03c     yát te abhrásya vidyúto
5.084.03d     divó várṣanti vr̥ṣṭáyaḥ

85

5.085.01a     prá samrā^́je br̥hád arcā gabhīrám
5.085.01b     bráhma priyáṃ váruṇāya śrutā^́ya
5.085.01c     ví yó jaghā^́na śamitéva cárma
5.085.01d     upastíre pr̥thivī^́ṃ sū^́riyāya

5.085.02a     váneṣu ví antárikṣaṃ tatāna
5.085.02b     vā^́jam árvatsu páya usríyāsu
5.085.02c     hr̥tsú krátuṃ váruṇo apsú agníṃ
5.085.02d     diví sū^́ryam adadhāt sómam ádrau

5.085.03a     nīcī^́nabāraṃ váruṇaḥ kávandham
5.085.03b     prá sasarja ródasī antárikṣam
5.085.03c     téna víśvasya bhúvanasya rā^́jā
5.085.03d     yávaṃ ná vr̥ṣṭír ví unatti bhū^́ma

5.085.04a     unátti bhū^́mim pr̥thivī^́m utá dyā^́ṃ
5.085.04b     yadā^́ dugdháṃ váruṇo váṣṭi ā^́d ít
5.085.04c     sám abhréṇa vasata párvatāsas
5.085.04d     taviṣīyántaḥ śrathayanta vīrā^́ḥ

5.085.05a     imā^́m ū ṣú āsurásya śrutásya
5.085.05b     mahī^́m māyā^́ṃ váruṇasya prá vocam
5.085.05c     mā^́neneva tasthivā^́m̐ antárikṣe
5.085.05d     ví yó mamé pr̥thivī^́ṃ sū^́riyeṇa

5.085.06a     imā^́m ū nú kavítamasya māyā^́m
5.085.06b     mahī^́ṃ devásya nákir ā^́ dadharṣa
5.085.06c     ékaṃ yád udnā^́ ná pr̥ṇánti énīr
5.085.06d     āsiñcántīr avánayaḥ samudrám

5.085.07a     aryamíyaṃ varuṇa mitríyaṃ vā
5.085.07b     sákhāyaṃ vā sádam íd bhrā^́taraṃ vā
5.085.07c     veśáṃ vā nítyaṃ varuṇā^́raṇaṃ vā
5.085.07d     yát sīm ā^́gaś cakr̥mā^́ śiśráthas tát

5.085.08a     kitavā^́so yád riripúr ná dīví
5.085.08b     yád vā ghā satyám utá yán ná vidmá
5.085.08c     sárvā tā^́ ví ṣya śithiréva deva
5.085.08d     ádhā te syāma varuṇa priyā^́saḥ

86

5.086.01a     índraagnī yám ávatha
5.086.01b     ubhā^́ vā^́jeṣu mártiyam
5.086.01c     dr̥̄ḷhā^́+ cit sá prá bhedati
5.086.01d     dyumnā^́ vā^́ṇīr iva tritáḥ

5.086.02a     yā^́ pŕ̥tanāsu duṣṭárā
5.086.02b     yā^́ vā^́jeṣu śravā^́yiyā
5.086.02c     yā^́ páñca carṣaṇī^́r abhí
5.086.02d     indrāgnī^́ tā^́ havāmahe

5.086.03a     táyor íd ámavac chávas
5.086.03b     tigmā^́ didyún maghõ^́noḥ
5.086.03c     práti drúṇā gábhastiyor
5.086.03d     gávāṃ vr̥traghná éṣate

5.086.04a     tā^́ vām éṣe ráthānãm
5.086.04b     indraagnī^́ havāmahe
5.086.04c     pátī turásya rā^́dhaso
5.086.04d     vidvā^́ṃsā gírvaṇastamā

5.086.05a     tā^́ vr̥dhántāv ánu diyū^́n
5.086.05b     mártāya devā^́v adábhā
5.086.05c     árhantā cit puró dadhe
5.086.05d     áṃśeva devā^́v árvate

5.086.06a     evā^́ indraagníbhyām
5.086.06b     áhāvi haviyáṃ śūṣyaṃ
5.086.06c     ghr̥táṃ ná pūtám ádribhiḥ
5.086.06d     tā^́ sūríṣu śrávo br̥hád
5.086.06e     rayíṃ gr̥ṇátsu didhr̥tam
5.086.06f     íṣaṃ gr̥ṇátsu didhr̥tam

87

5.087.01a     prá vo mahé matáyo yantu víṣṇave
5.087.01b     marútvate girijā^́ evayā^́marut
5.087.01c     prá śárdhāya práyajyave sukhādáye
5.087.01d     taváse bhandádiṣṭaye
5.087.01e     dhúnivratāya śávase

5.087.02a     prá yé jātā^́ mahinā^́ yé ca nú svayám
5.087.02b     prá vidmánā bruváta evayā^́marut
5.087.02c     krátvā tád vo maruto nā^́dhŕ̥ṣe śávo
5.087.02d     dānā^́ mahnā^́ tád eṣãm
5.087.02e     ádhr̥ṣṭāso ná ádrayaḥ

5.087.03a     prá yé divó br̥hatáḥ śr̥ṇviré girā^́
5.087.03b     suśúkvānaḥ subhúva evayā^́marut
5.087.03c     ná yéṣãm írī sadhástha ī^́ṣṭa ā^́m̐
5.087.03d     agnáyo ná svávidyutaḥ
5.087.03e     prá syandrā^́so dhúnīnãm

5.087.04a     sá cakrame maható nír urukramáḥ
5.087.04b     samānásmāt sádasa evayā^́marut
5.087.04c     yadā^́yukta tmánā suvā^́d ádhi ṣṇúbhir
5.087.04d     víṣpardhaso vímahaso
5.087.04e     jígāti śévr̥dho nŕ̥bhiḥ

5.087.05a     svanó ná vo ámavān rejayad vŕ̥ṣā
5.087.05b     tveṣó yayís taviṣá evayā^́marut
5.087.05c     yénā sáhanta r̥ñjáta svárociṣa
5.087.05d     sthā^́raśmāno hiraṇyáyāḥ
5.087.05e     suāyudhā^́sa iṣmíṇaḥ

5.087.06a     apāró vo mahimā^́ vr̥ddhaśavasas
5.087.06b     tveṣáṃ śávo avatu evayā^́marut
5.087.06c     sthā^́tāro hí prásitau saṃdŕ̥śi sthána
5.087.06d     té na uruṣyatā nidáḥ
5.087.06e     śuśukvā^́ṃso ná agnáyaḥ

5.087.07a     té rudrā^́saḥ súmakhā agnáyo yathā
5.087.07b     tuvidyumnā^́ avantu evayā^́marut
5.087.07c     dīrghám pr̥thú paprathe sádma pā^́rthivaṃ
5.087.07d     yéṣām ájmeṣu ā^́ maháḥ
5.087.07e     śárdhāṃsi ádbhutainasām

5.087.08a     adveṣó no maruto gātúm étana
5.087.08b     śrótā hávaṃ jaritúr evayā^́marut
5.087.08c     víṣṇor maháḥ samanyavo yuyotana
5.087.08d     smád rathíyo ná daṃsánā
5.087.08e     ápa dvéṣāṃsi sanutáḥ

5.087.09a     gántā no yajñáṃ yajñiyāḥ suśámi
5.087.09b     śrótā hávam arakṣá evayā^́marut
5.087.09c     jyéṣṭhāso ná párvatāso víomani
5.087.09d     yūyáṃ tásya pracetasaḥ
5.087.09e     syā^́ta durdhártavo nidáḥ