The Rigveda: Metrically Restored Text

Metrically Restored Text

Karen Thomson and Jonathan Slocum

Index

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75

---

N.B. An earlier version of this text was published in electronic form as:

RIG VEDA, A METRICALLY RESTORED TEXT, edited by Barend A. van Nooten and Gary B. Holland, Harvard Oriental Series, vol. 50.

That electronic text, itself derived from a much earlier UT Linguistics Research Center electronic text, bore the legend:

Copyright with the authors and Harvard Oriental Series. The electronic text may be used for research but not for commercial purposes.

Our use here is for research. The electronic text has been much revised (see our Introduction) and converted to Unicode/HTML in this online edition; re: the significance of color and smaller type size in particular, see the Popular Rigveda. Copyright to all revisions and HTML tagging is assigned to the University of Texas, though responsibility for content lies with the authors. This HTML edition may be used for research but not for commercial purposes.

---

1

6.001.01a     tuváṃ hí agne prathamó manóta
6.001.01b     asyā^́ dhiyó ábhavo dasma hótā
6.001.01c     tváṃ sīṃ vr̥ṣann akr̥ṇor duṣṭárītu
6.001.01d     sáho víśvasmai sáhase sáhadhyai

6.001.02a     ádhā hótā ní asīdo yájīyān
6.001.02b     iḷás padá iṣáyann ī^́ḍiyaḥ sán
6.001.02c     táṃ tvā náraḥ prathamáṃ devayánto
6.001.02d     mahó rāyé citáyanto ánu gman

6.001.03a     vr̥téva yántam bahúbhir vasavyaìs
6.001.03b     tuvé rayíṃ jāgr̥vā^́ṃso ánu gman
6.001.03c     rúśantam agníṃ darśatám br̥hántaṃ
6.001.03d     vapā^́vantaṃ viśváhā dīdivā^́ṃsam

6.001.04a     padáṃ devásya námasā viántaḥ
6.001.04b     śravasyávaḥ śráva āpann ámr̥ktam
6.001.04c     nā^́māni cid dadhire yajñíyāni
6.001.04d     bhadrā^́yāṃ te raṇayanta sáṃdr̥ṣṭau

6.001.05a     tuvā^́ṃ vardhanti kṣitáyaḥ pr̥thivyā^́ṃ
6.001.05b     tuvā^́ṃ rā^́ya ubháyāso jánānām
6.001.05c     tuváṃ trātā^́ taraṇe cétiyo bhūḥ
6.001.05d     pitā^́ mātā^́ sádam ín mā^́nuṣāṇām

6.001.06a     saparyéṇyaḥ sá priyó vikṣú agnír
6.001.06b     hótā mandró ní ṣasādā yájīyān
6.001.06c     táṃ tvā vayáṃ dáma ā^́ dīdivā^́ṃsam
6.001.06d     úpa jñubā^́dho námasā sadema

6.001.07a     táṃ tvā vayáṃ sudhíyo návyam agne
6.001.07b     sumnāyáva īmahe devayántaḥ
6.001.07c     tuváṃ víśo anayo dī^́diyāno
6.001.07d     divó agne br̥hatā^́ rocanéna

6.001.08a     viśā^́ṃ kavíṃ viśpátiṃ śáśvatīnāṃ
6.001.08b     nitóśanaṃ vr̥ṣabháṃ carṣaṇīnā^́m
6.001.08c     prétīṣaṇim iṣáyantam pavākáṃ⁺
6.001.08d     rā^́jantam agníṃ yajatáṃ rayīṇā^́m

6.001.09a     só agna īje śaśamé ca márto
6.001.09b     yás ta ā^́naṭ samídhā havyádātim
6.001.09c     yá ā^́hutim pári védā námobhir
6.001.09d     víśvét sá vāmā^́ dadhate tuvótaḥ

6.001.10a     asmā^́ u te máhi mahé vidhema
6.001.10b     námobhir agne samídhotá havyaíḥ
6.001.10c     védī sūno sahaso gīrbhír ukthaír
6.001.10d     ā^́ te bhadrā^́yāṃ sumataú yatema

6.001.11a     ā^́ yás tatántha ródasī ví bhāsā^́
6.001.11b     śrávobhiś ca śravasíyas tárutraḥ
6.001.11c     br̥hádbhir vā^́jai sthávirebhir asmé
6.001.11d     revádbhir agne vitaráṃ ví bhāhi

6.001.12a     nr̥vád vaso sádam íd dhehi asmé
6.001.12b     bhū^́ri tokā^́ya tánayāya paśváḥ
6.001.12c     pūrvī^́r íṣo br̥hatī^́r āréaghā
6.001.12d     asmé bhadrā^́ sauśravasā^́ni santu

6.001.13a     purū^́ṇi agne purudhā^́ tuvāyā^́
6.001.13b     vásūni rājan vasútā te aśyām
6.001.13c     purū^́ṇi hí tvé puruvāra sánti
6.001.13d     ágne vásu vidhaté rā^́jani tvé

2

6.002.01a     tuváṃ hí kṣaítavad yáśo
6.002.01b     ágne mitró ná pátyase
6.002.01c     tuváṃ vicarṣaṇe śrávo
6.002.01d     váso puṣṭíṃ ná puṣyasi

6.002.02a     tuvā^́ṃ hí ṣmā carṣaṇáyo
6.002.02b     yajñébhir gīrbhír ī^́ḷate
6.002.02c     tvā^́ṃ vājī^́ yāti avr̥kó
6.002.02d     rajastū^́r viśvácarṣaṇiḥ

6.002.03a     sajóṣas tvā divó náro
6.002.03b     yajñásya ketúm indhate
6.002.03c     yád dha syá mā^́nuṣo jánaḥ
6.002.03d     sumnāyúr juhvé adhvaré

6.002.04a     ŕ̥dhad yás te sudā^́nave
6.002.04b     dhiyā^́ mártaḥ śaśámate
6.002.04c     ūtī^́ ṣá br̥ható divó
6.002.04d     dviṣó áṃho ná tarati

6.002.05a     samídhā yás ta ā^́hutiṃ
6.002.05b     níśitim mártiyo náśat
6.002.05c     vayā^́vantaṃ sá puṣyati
6.002.05d     kṣáyam agne śatā^́yuṣam

6.002.06a     tveṣás te dhūmá r̥ṇvati
6.002.06b     diví ṣáñ chukrá ā^́tataḥ
6.002.06c     sū^́ro ná hí dyutā^́ tuváṃ
6.002.06d     kr̥pā^́ pavāka⁺ rócase

6.002.07a     ádhā hí vikṣú ī^́ḍiyo
6.002.07b     ási priyó no átithiḥ
6.002.07c     raṇváḥ purī^́va jū^́riyaḥ
6.002.07d     sūnúr ná trayayā^́yiyaḥ

6.002.08a     krátvā hí dróṇe ajyáse
6.002.08b     ágne vājī^́ ná kŕ̥tviyaḥ
6.002.08c     párijmeva svadhā^́ gáyo
6.002.08d     átyo ná hvāriyáḥ śíśuḥ

6.002.09a     tuváṃ tiyā^́ cid ácyutā
6.002.09b     ágne paśúr ná yávase
6.002.09c     dhā^́mā ha yát te ajara
6.002.09d     vánā vr̥ścánti śíkvasaḥ

6.002.10a     véṣi hí adhvarīyatā^́m
6.002.10b     ágne hótā dáme viśā^́m
6.002.10c     samŕ̥dho viśpate kr̥ṇu
6.002.10d     juṣásva havyám aṅgiraḥ

6.002.11a     áchā no mitramaho deva devā^́n
6.002.11b     ágne vócaḥ sumatíṃ ródasīyoḥ
6.002.11c     vīhí suastíṃ sukṣitíṃ divó nr̥̄^́n
6.002.11d     dviṣó áṃhāṃsi duritā^́ tarema
6.002.11e     tā^́ tarema távā^́vasā tarema

3

6.003.01a     ágne sá kṣeṣad r̥tapā^́ r̥tejā^́
6.003.01b     urú jyótir naśate devayúṣ ṭe
6.003.01c     yáṃ tvám mitréṇa váruṇaḥ sajóṣā
6.003.01d     déva pā^́si tyájasā mártam áṃhaḥ

6.003.02a     ījé yajñébhiḥ śaśamé śámībhir
6.003.02b     r̥dhádvārāya agnáye dadāśa
6.003.02c     evā^́ caná táṃ yaśásām ájuṣṭir
6.003.02d     nā^́ṃho mártaṃ naśate ná prádr̥ptiḥ

6.003.03a     sū^́ro ná yásya dr̥śatír arepā^́
6.003.03b     bhīmā^́ yád éti śucatás ta ā^́ dhī^́ḥ
6.003.03c     héṣasvataḥ śurúdho nā^́yám aktóḥ
6.003.03d     kútrā cid raṇvó vasatír vanejā^́ḥ

6.003.04a     tigmáṃ cid éma máhi várpo asya
6.003.04b     bhásad áśvo ná yamasāná āsā^́
6.003.04c     vijéhamānaḥ paraśúr ná jihvā^́ṃ
6.003.04d     dravír ná drāvayati dā^́ru dhákṣat

6.003.05a     sá íd ásteva práti dhād asiṣyáñ
6.003.05b     chíśīta téjo áyaso ná dhā^́rām
6.003.05c     citrádhrajatir aratír yó aktór
6.003.05d     vér ná druṣádvā raghupátmajaṃhāḥ

6.003.06a     sá īṃ rebhó ná práti vasta usrā^́ḥ
6.003.06b     śocíṣā rārapīti mitrámahāḥ
6.003.06c     náktaṃ yá īm aruṣó yó dívā nr̥̄^́n
6.003.06d     ámartiyo aruṣó yó dívā nr̥̄^́n

6.003.07a     divó ná yásya vidható návīnod
6.003.07b     vŕ̥ṣā rukṣá · óṣadhīṣu nūnot
6.003.07c     ghŕ̥ṇā ná yó dhrájasā pátmanā yánn
6.003.07d     ā^́ ródasī vásunādáṃ supátnī

6.003.08a     dhā^́yobhir vā yó yújiyebhir arkaír
6.003.08b     vidyún ná davidyot suvébhiḥ śúṣmaiḥ
6.003.08c     śárdho vā yó marútãṃ tatákṣa
6.003.08d     r̥bhúr ná tveṣó rabhasānó adyaut

4

6.004.01a     yáthā hotar mánuṣo devátātā
6.004.01b     yajñébhiḥ sūno sahaso yájāsi
6.004.01c     evā^́ no adyá samanā^́ samānā^́n
6.004.01d     uśánn agna uśató yakṣi devā^́n

6.004.02a     sá no vibhā^́vā cakṣáṇir ná vástor
6.004.02b     agnír vandā^́ru védiyaś cáno dhāt
6.004.02c     viśvā^́yur yó amŕ̥to mártiyeṣu
6.004.02d     uṣarbhúd bhū^́d átithir jātávedāḥ

6.004.03a     dyā^́vo ná yásya panáyanti ábhvam
6.004.03b     bhā^́sāṃsi vaste sū^́riyo ná śukráḥ
6.004.03c     ví yá inóti ajáraḥ pavākó⁺
6.004.03d     áśnasya cic chiśnathat pūrviyā^́ṇi

6.004.04a     vadmā^́ hí sūno ási admasádvā
6.004.04b     cakré agnír janúṣā ájma ánnam
6.004.04c     sá tuváṃ na ūrjasana ū^́rjaṃ dhā
6.004.04d     rā^́jeva jer avr̥ké kṣeṣi antáḥ

6.004.05a     nítikti yó vāraṇám ánnam átti
6.004.05b     vāyúr ná rā^́ṣṭrī áti eti aktū^́n
6.004.05c     turyā^́ma yás ta ādíśām árātīr
6.004.05d     átyo ná hrútaḥ pátataḥ parihrút

6.004.06a     ā^́ sū^́riyo ná bhānumádbhir arkaír
6.004.06b     ágne tatántha ródasī ví bhāsā^́
6.004.06c     citró nayat pári támāṃsi aktáḥ
6.004.06d     śocíṣā pátmann auśijó ná dī^́yan

6.004.07a     tuvā^́ṃ hí mandrátamam arkaśokaír
6.004.07b     vavr̥máhe máhi naḥ śróṣi agne
6.004.07c     índraṃ ná tvā · śávasā devátā
6.004.07d     vāyúm pr̥ṇanti rā^́dhasā nŕ̥tamāḥ

6.004.08a     nū^́ no agne avr̥kébhiḥ suastí
6.004.08b     véṣi rāyáḥ pathíbhiḥ párṣi áṃhaḥ
6.004.08c     tā^́ sūríbhyo gr̥ṇaté rāsi sumnám
6.004.08d     mádema · śatáhimāḥ suvī^́rāḥ

5

6.005.01a     huvé vaḥ sūnúṃ sáhaso yúvānam
6.005.01b     ádroghavācam matíbhir yáviṣṭham
6.005.01c     yá ínvati dráviṇāni prácetā
6.005.01d     viśvávārāṇi puruvā^́ro adhrúk

6.005.02a     tuvé vásūni purvaṇīka hotar
6.005.02b     doṣā^́ vástor érire yajñíyāsaḥ
6.005.02c     kṣā^́meva víśvā bhúvanāni yásmin
6.005.02d     sáṃ saúbhagāni dadhiré pavāké⁺

6.005.03a     tuváṃ vikṣú pradívaḥ sīda āsú
6.005.03b     krátvā rathī^́r abhavo vā^́riyāṇām
6.005.03c     áta inoṣi vidhaté cikitvo
6.005.03d     ví ānuṣág jātavedo vásūni

6.005.04a     yó naḥ sánutyo abhidā^́sad agne
6.005.04b     yó ántaro mitramaho vanuṣyā^́t
6.005.04c     tám ajárebhir vŕ̥ṣabhis táva svaís
6.005.04d     tápā tapiṣṭha tápasā tápasvān

6.005.05a     yás te yajñéna samídhā yá ukthaír
6.005.05b     arkébhiḥ sūno sahaso dádāśat
6.005.05c     sá mártiyeṣu amr̥ta prácetā
6.005.05d     rāyā^́ dyumnéna śrávasā ví bhāti

6.005.06a     sá tát kr̥dhi iṣitás tū^́yam agne
6.005.06b     spŕ̥dho bādhasva sáhasā sáhasvān
6.005.06c     yác chasyáse dyúbhir aktó vácobhis
6.005.06d     táj juṣasva jaritúr ghóṣi mánma

6.005.07a     aśyā^́ma táṃ kā^́mam agne távotī^́
6.005.07b     aśyā^́ma rayíṃ rayivaḥ suvī^́ram
6.005.07c     aśyā^́ma vā^́jam abhí vājáyanto
6.005.07d     aśyā^́ma dyumnám ajarājáraṃ te

6

6.006.01a     prá návyasā sáhasaḥ sūnúm áchā
6.006.01b     yajñéna gātúm áva ichámānaḥ
6.006.01c     vr̥ścádvanaṃ kr̥ṣṇáyāmaṃ rúśantaṃ
6.006.01d     vītī^́ hótāraṃ diviyáṃ jigāti

6.006.02a     sá śvitānás tanyatū^́ rocanasthā^́
6.006.02b     ajárebhir nā^́nadadbhir yáviṣṭhaḥ
6.006.02c     yáḥ pavākáḥ⁺ purutámaḥ purū^́ṇi
6.006.02d     pr̥thū^́ni agnír anuyā^́ti bhárvan

6.006.03a     ví te víṣvag vā^́tajūtāso agne
6.006.03b     bhā^́māsaḥ śuce śúcayaś caranti
6.006.03c     tuvimrakṣā^́so diviyā^́ návagvā
6.006.03d     vánā vananti dhr̥ṣatā^́ rujántaḥ

6.006.04a     yé te śukrā^́saḥ śúcayaḥ śuciṣmaḥ
6.006.04b     kṣã^́ṃ vápanti víṣitāso áśvāḥ
6.006.04c     ádha bhramás ta urviyā^́ ví bhāti
6.006.04d     yātáyamāno ádhi sā^́nu pŕ̥śneḥ

6.006.05a     ádha jihvā^́ pāpatīti prá vŕ̥ṣṇo
6.006.05b     goṣuyúdho ná aśániḥ sr̥jānā^́
6.006.05c     śū^́rasyeva prásitiḥ kṣātír agnér
6.006.05d     durvártur bhīmó dayate vánāni

6.006.06a     ā^́ bhānúnā pā^́rthivāni jráyāṃsi
6.006.06b     mahás todásya dhr̥ṣatā^́ tatantha
6.006.06c     sá bādhasva ápa bhayā^́ sáhobhi
6.006.06d     spŕ̥dho vanuṣyán vanúṣo ní jūrva

6.006.07a     sá citra citráṃ citáyantam asmé
6.006.07b     cítrakṣatra citrátamaṃ vayodhā^́m
6.006.07c     candráṃ rayím puruvī^́ram br̥hántaṃ
6.006.07d     cándra candrā^́bhir gr̥ṇaté yuvasva

7

6.007.01a     mūrdhā^́naṃ divó aratím pr̥thivyā^́
6.007.01b     vaiśvānarám r̥tá ā^́ jātám agním
6.007.01c     kavíṃ samrā^́jam átithiṃ jánānām
6.007.01d     āsánn ā^́ pā^́traṃ janayanta devā^́ḥ

6.007.02a     nā^́bhiṃ yajñā^́nāṃ sádanaṃ rayīṇā^́m
6.007.02b     mahā^́m āhāvám abhí sáṃ navanta
6.007.02c     vaiśvānaráṃ rathíyam adhvarā^́ṇāṃ
6.007.02d     yajñásya ketúṃ janayanta devā^́ḥ

6.007.03a     tuvád vípro jāyate vājī^́ agne
6.007.03b     tuvád vīrā^́so abhimātiṣā^́haḥ
6.007.03c     vaíśvānara tuvám asmā^́su dhehi
6.007.03d     vásūni rājan spr̥hayā^́yiyāṇi

6.007.04a     tuvā^́ṃ víśve amr̥ta jā^́yamānaṃ
6.007.04b     śíśuṃ ná devā^́ abhí sáṃ navante
6.007.04c     táva krátubhir amr̥tatvám āyan
6.007.04d     vaíśvānara yát pitarór⁺ ádīdeḥ

6.007.05a     vaíśvānara táva tā^́ni vratā^́ni
6.007.05b     mahā^́ni agne nákir ā^́ dadharṣa
6.007.05c     yáj jā^́yamānaḥ pitarór⁺ upásthe
6.007.05d     ávindaḥ ketúṃ vayúneṣu áhnām

6.007.06a     vaiśvānarásya vímitāni cákṣasā
6.007.06b     sā^́nūni divó amŕ̥tasya ketúnā
6.007.06c     tásyéd u víśvā bhúvanā^́dhi mūrdháni
6.007.06d     vayā^́ iva ruruhuḥ saptá visrúhaḥ

6.007.07a     ví yó rájāṃsi ámimīta sukrátur
6.007.07b     vaiśvānaró ví divó rocanā^́ kavíḥ
6.007.07c     pári yó víśvā bhúvanāni paprathé
6.007.07d     ádabdho gopā^́ amŕ̥tasya rakṣitā^́

8

6.008.01a     pr̥kṣásya vŕ̥ṣṇo aruṣásya nū^́ sáhaḥ
6.008.01b     prá nú vocaṃ vidáthā jātávedasaḥ
6.008.01c     vaiśvānarā^́ya matír návyasī śúciḥ
6.008.01d     sóma iva pavate cā^́rur agnáye

6.008.02a     sá jā^́yamānaḥ paramé víomani
6.008.02b     vratā^́ni agnír vratapā^́ arakṣata
6.008.02c     ví antárikṣam amimīta sukrátur
6.008.02d     vaiśvānaró mahinā^́ nā^́kam aspr̥śat

6.008.03a     ví astabhnād ródasī mitró ádbhuto
6.008.03b     antarvā^́vad akr̥ṇoj jyótiṣā támaḥ
6.008.03c     ví cármaṇīva dhiṣáṇe avartayad
6.008.03d     vaiśvānaró víśvam adhatta vŕ̥ṣṇiyam

6.008.04a     apā^́m upásthe mahiṣā^́ agr̥bhṇata
6.008.04b     víśo rā^́jānam úpa tasthur r̥gmíyam
6.008.04c     ā^́ dūtó agním abharad vivásvato
6.008.04d     vaiśvānarám mātaríśvā parāvátaḥ

6.008.05a     yugé-yuge vidathíyaṃ gr̥ṇádbhiyo
6.008.05b     ágne rayíṃ yaśásaṃ dhehi návyasīm
6.008.05c     pavyéva rājann agháśaṃsam ajara
6.008.05d     nīcā^́ ní vr̥śca vanínaṃ ná téjasā

6.008.06a     asmā^́kam agne maghávatsu dhāraya
6.008.06b     ánāmi kṣatrám ajáraṃ suvī^́riyam
6.008.06c     vayáṃ jayema śatínaṃ sahasríṇaṃ
6.008.06d     vaíśvānara vā^́jam agne távotíbhiḥ

6.008.07a     ádabdhebhis táva gopā^́bhir iṣṭe
6.008.07b     asmā^́kam pāhi triṣadhastha sūrī^́n
6.008.07c     rákṣā ca no dadúṣāṃ śárdho agne
6.008.07d     vaíśvānara prá ca tārī stávānaḥ

9

6.009.01a     áhaś ca kr̥ṣṇám áhar árjunaṃ ca
6.009.01b     ví vartete rájasī vediyā^́bhiḥ
6.009.01c     vaiśvānaró jā^́yamāno ná rā^́jā
6.009.01d     ávātiraj jyótiṣāgnís támāṃsi

6.009.02a     nā^́háṃ tántuṃ ná ví jānāmi ótuṃ
6.009.02b     ná yáṃ váyanti samaré 'tamānāḥ
6.009.02c     kásya svit putrá ihá váktuvāni
6.009.02d     paró vadāti ávareṇa pitrā^́

6.009.03a     sá ít tántuṃ sá ví jānāti ótuṃ
6.009.03b     sá váktuvāni r̥tuthā^́ vadāti
6.009.03c     yá īṃ cíketad amŕ̥tasya gopā^́
6.009.03d     aváś cáran paró anyéna páśyan

6.009.04a     ayáṃ hótā prathamáḥ páśyatemám
6.009.04b     idáṃ jyótir amŕ̥tam mártiyeṣu
6.009.04c     ayáṃ sá jajñe dhruvá ā^́ níṣatto
6.009.04d     ámartiyas tanúvā várdhamānaḥ

6.009.05a     dhruváṃ jyótir níhitaṃ dr̥śáye kám
6.009.05b     máno jáviṣṭham patáyatsu antáḥ
6.009.05c     víśve devā^́ḥ sámanasaḥ sáketā
6.009.05d     ékaṃ krátum abhí ví yanti sādhú

6.009.06a     ví me kárṇā patayato ví cákṣur
6.009.06b     vī^́dáṃ jyótir hŕ̥daya ā^́hitaṃ yát
6.009.06c     ví me mánaś carati dūráādhīḥ
6.009.06d     kíṃ svid vakṣyā^́mi kím u nū^́ maniṣye

6.009.07a     víśve devā^́ anamasyan bhiyānā^́s
6.009.07b     tuvā^́m agne támasi tasthivā^́ṃsam
6.009.07c     vaiśvānaré avatu ūtáye no
6.009.07d     ámartiyo avatu ūtáye naḥ

10

6.010.01a     puró vo mandráṃ diviyáṃ suvr̥ktím
6.010.01b     prayatí yajñé agním adhvaré dadhidhvam
6.010.01c     purá ukthébhiḥ sá hí no vibhā^́vā
6.010.01d     suadhvarā^́ karati jātávedāḥ

6.010.02a     tám u dyumaḥ puruaṇīka hotar
6.010.02b     ágne agníbhir mánuṣa idhānáḥ
6.010.02c     stómaṃ yám asmai mamáteva śūṣáṃ
6.010.02d     ghr̥táṃ ná śúci matáyaḥ pavante

6.010.03a     pīpā^́ya sá śrávasā mártiyeṣu
6.010.03b     yó agnáye dadā^́śa vípra ukthaíḥ
6.010.03c     citrā^́bhis tám ūtíbhiś citráśocir
6.010.03d     vrajásya sātā^́ gómato dadhāti

6.010.04a     ā^́ yáḥ papraú · jā^́yamāna urvī^́
6.010.04b     dūredŕ̥śā bhãsā^́ kr̥ṣṇáadhvā
6.010.04c     ádha bahú cit táma ū^́rmiyāyās
6.010.04d     tiráḥ śocíṣā dadr̥śe pavākáḥ⁺

6.010.05a     nū^́ naś citrám puruvā^́jābhir ūtī^́
6.010.05b     ágne rayím maghávadbhyaś ca dhehi
6.010.05c     yé rā^́dhasā śrávasā cā^́ti anyā^́n
6.010.05d     suvī^́ryebhiś ca abhí sánti jánān

6.010.06a     imáṃ yajñáṃ cáno dhā agna uśán
6.010.06b     yáṃ ta āsānó juhuté havíṣmān
6.010.06c     bharádvājeṣu dadhiṣe suvr̥ktím
6.010.06d     ávīr vā^́jasya gádhiyasya sātaú

6.010.07a     ví dvéṣāṃsi inuhí vardháyéḷām
6.010.07b     mádema · śatáhimāḥ suvī^́rāḥ

11

6.011.01a     yájasva hotar iṣitó yájīyān
6.011.01b     ágne bā^́dho marútāṃ ná práyukti
6.011.01c     ā^́ no mitrā^́váruṇā nā^́satiyā
6.011.01d     dyā^́vā hotrā^́ya pr̥thivī^́ vavr̥tyāḥ

6.011.02a     tuváṃ hótā mandrátamo no adhrúg
6.011.02b     antár devó vidáthā mártiyeṣu
6.011.02c     pavākáyā⁺ juhúvā váhnir āsā^́
6.011.02d     ágne yájasva tanúvaṃ táva svā^́m

6.011.03a     dhániyā cid dhí tvé dhiṣáṇā váṣṭi
6.011.03b     prá devā^́ñ jánma gr̥ṇaté yájadhyai
6.011.03c     vépiṣṭho áṅgirasāṃ yád dha vípro
6.011.03d     mádhu chandó bhánati rebhá iṣṭaú

6.011.04a     ádidyutat sú ápāko vibhā^́vā
6.011.04b     ágne yájasva ródasī urūcī^́
6.011.04c     āyúṃ ná yáṃ námasā rātáhavyā
6.011.04d     añjánti suprayásam páñca jánāḥ

6.011.05a     vr̥ñjé ha yán námasā barhír agnā^́v
6.011.05b     áyāmi srúg ghr̥távatī suvr̥ktíḥ
6.011.05c     ámyakṣi sádma sádane pr̥thivyā^́
6.011.05d     áśrāyi yajñáḥ sū^́riye ná cákṣuḥ

6.011.06a     daśasyā^́ naḥ puruaṇīka hotar
6.011.06b     devébhir agne agníbhir idhānáḥ
6.011.06c     rāyáḥ sūno sahaso vāvasānā^́
6.011.06d     áti srasema vr̥jánaṃ ná áṃhaḥ

12

6.012.01a     mádhye hótā duroṇé barhíṣo rā^́ḷ
6.012.01b     agnís todásya ródasī yájadhyai
6.012.01c     ayáṃ sá sūnúḥ sáhasa r̥tā^́vā
6.012.01d     dūrā^́t sū^́ryo ná śocíṣā tatāna

6.012.02a     ā^́ yásmin tvé sú ápāke yajatra
6.012.02b     yákṣad rājan sarvátāteva nú dyaúḥ
6.012.02c     triṣadhásthas tatarúṣo ná jáṃho
6.012.02d     havyā^́ maghā^́ni mā^́nuṣā yájadhyai

6.012.03a     téjiṣṭhā yásya aratír vanerā^́ṭ
6.012.03b     todó ádhvan ná vr̥dhasānó adyaut
6.012.03c     adroghó ná dravitā^́ cetati tmánn
6.012.03d     ámartiyo avartrá óṣadhīṣu

6.012.04a     sá asmā^́kebhir etárī ná śūṣaír
6.012.04b     agní ṣṭave dáma ā^́ jātávedāḥ
6.012.04c     drúanno vanván krátuvā ná árvā
6.012.04d     usráḥ pitéva jārayā^́yi yajñaíḥ

6.012.05a     ádha sma asya panayanti bhā^́so
6.012.05b     vŕ̥thā yát tákṣad anuyā^́ti pr̥thvī^́m
6.012.05c     sadyó yáḥ syandró víṣito dhávīyān
6.012.05d     r̥ṇó ná tāyúr áti dhánuvā rāṭ

6.012.06a     sá tváṃ no arvan nídāyā
6.012.06b     víśvebhir agne agníbhir idhānáḥ
6.012.06c     véṣi rāyó · ví yāsi duchúnā
6.012.06d     mádema · śatáhimāḥ suvī^́rāḥ

13

6.013.01a     tuvád víśvā subhaga saúbhagāni
6.013.01b     ágne ví yanti vaníno ná vayā^́ḥ
6.013.01c     śruṣṭī^́ rayír · vā^́jo vr̥tratū^́rye
6.013.01d     divó vr̥ṣṭír ī^́ḍiyo rītír apā^́m

6.013.02a     tuvám bhágo na ā^́ hí rátnam iṣé
6.013.02b     párijmeva kṣayasi dasmávarcāḥ
6.013.02c     ágne mitró ná br̥hatá r̥tásya
6.013.02d     ási kṣattā^́ vāmásya deva bhū^́reḥ

6.013.03a     sá sátpatiḥ śávasā hanti vr̥trám
6.013.03b     ágne vípro ví paṇér bharti vā^́jam
6.013.03c     yáṃ tvám praceta r̥tajāta rāyā^́
6.013.03d     sajóṣā náptrā apã^́ṃ hinóṣi

6.013.04a     yás te sūno sahaso gīrbhír ukthaír
6.013.04b     yajñaír márto níśitiṃ vediyā^́naṭ
6.013.04c     víśvaṃ sá deva práti vā^́ram agne
6.013.04d     dhatté dhāníyam pátyate vasavyaìḥ

6.013.05a     tā^́ nŕ̥bhya ā^́ sauśravasā^́ suvī^́rā
6.013.05b     ágne sūno sahasaḥ puṣyáse dhāḥ
6.013.05c     kr̥ṇóṣi yác chávasā bhū^́ri paśvó
6.013.05d     váyo vŕ̥kāya aráye jásuraye

6.013.06a     vadmā^́ sūno sahaso no víhāyā
6.013.06b     ágne tokáṃ tánayaṃ vājí no dāḥ
6.013.06c     víśvābhir gīrbhír abhí pūrtím aśyām
6.013.06d     mádema · śatáhimāḥ suvī^́rāḥ

14

6.014.01a     agnā^́ yó mártiyo dúvo
6.014.01b     dhíyaṃ jujóṣa dhītíbhiḥ
6.014.01c     bhásan nú ṣá prá pūrviyá
6.014.01d     íṣaṃ vurīta ávase

6.014.02a     agnír íd dhí prácetā
6.014.02b     agnír vedhástama ŕ̥ṣiḥ
6.014.02c     agníṃ hótāram īḷate
6.014.02d     yajñéṣu mánuṣo víśaḥ

6.014.03a     nā^́nā hí agne ávase
6.014.03b     spárdhante rā^́yo ariyáḥ
6.014.03c     tū^́rvanto dásyum āyávo
6.014.03d     vrataíḥ sī^́kṣanto avratám

6.014.04a     agnír apsā^́m r̥tīṣáhaṃ
6.014.04b     vīráṃ dadāti sátpatim
6.014.04c     yásya trásanti śávasaḥ
6.014.04d     saṃcákṣi śátravo bhiyā^́

6.014.05a     agnír hí vidmánā nidó
6.014.05b     devó mártam uruṣyáti
6.014.05c     sahā^́vā yásya ávr̥to
6.014.05d     rayír vā^́jeṣu ávr̥taḥ

6.014.06a     áchā no mitramaho deva devā^́n
6.014.06b     ágne vócaḥ sumatíṃ ródasīyoḥ
6.014.06c     vīhí suastíṃ sukṣitíṃ divó nr̥̄^́n
6.014.06d     dviṣó áṃhāṃsi duritā^́ tarema
6.014.06e     tā^́ tarema távā^́vasā tarema

15

6.015.01a     imám ū ṣú vo átithim uṣarbúdhaṃ
6.015.01b     víśvāsāṃ viśā^́m pátim r̥ñjase girā^́
6.015.01c     vétī^́d divó janúṣā kác cid ā^́ śúcir
6.015.01d     jiyók cid atti gárbho yád ácyutam

6.015.02a     mitráṃ ná yáṃ súdhitam bhŕ̥gavo dadhúr
6.015.02b     vánaspátāv ī^́ḍiyam ūrdhváśociṣam
6.015.02c     sá tváṃ súprīto vītáhavye adbhuta
6.015.02d     práśastibhir mahayase divé-dive

6.015.03a     sá tváṃ dákṣasya avr̥kó vr̥dhó bhũr
6.015.03b     aryáḥ párasya ántarasya táruṣaḥ
6.015.03c     rāyáḥ sūno sahaso mártiyeṣu ā^́
6.015.03d     chardír yacha vītáhavyāya saprátho
6.015.03e     bharádvājāya sapráthaḥ

6.015.04a     diyutānáṃ vo átithiṃ súvarṇaram
6.015.04b     agníṃ hótāram mánuṣaḥ suadhvarám
6.015.04c     vípraṃ ná dyukṣávacasaṃ suvr̥ktíbhir
6.015.04d     havyavā^́ham aratíṃ devám r̥ñjase

6.015.05a     pavākáyā⁺ yáś citáyantiyā kr̥pā^́
6.015.05b     kṣā^́man rurucá uṣáso ná bhānúnā
6.015.05c     tū^́rvan ná yā^́mann étaśasya nū^́ ráṇa
6.015.05d     ā^́ yó ghr̥ṇé ná tatr̥ṣāṇó ajáraḥ

6.015.06a     agním-agniṃ vaḥ samídhā duvasyata
6.015.06b     priyám-priyaṃ vo átithiṃ gr̥ṇīṣáṇi
6.015.06c     úpa vo gīrbhír amŕ̥taṃ vivāsata
6.015.06d     devó devéṣu vánate hí vā^́riyaṃ
6.015.06e     devó devéṣu vánate hí no dúvaḥ

6.015.07a     sámiddham agníṃ samídhā girā^́ gr̥ṇe
6.015.07b     śúcim pavākám⁺ puró adhvaré dhruvám
6.015.07c     vípraṃ hótāram puruvā^́ram adrúhaṃ
6.015.07d     kavíṃ sumnaír īmahe jātávedasam

6.015.08a     tvā^́ṃ dūtám agne amŕ̥taṃ yugé-yuge
6.015.08b     havyavā^́haṃ dadhire pāyúm ī^́ḍiyam
6.015.08c     devā^́saś ca mártiāsaś° ca jā^́gr̥viṃ
6.015.08d     vibhúṃ viśpátiṃ námasā ní ṣedire

6.015.09a     vibhū^́ṣann agna ubháyām̐ ánu vratā^́
6.015.09b     dūtó devā^́nāṃ rájasī sám īyase
6.015.09c     yát te dhītíṃ sumatím āvr̥ṇīmáhe
6.015.09d     ádha smā nas trivárūthaḥ śivó bhava

6.015.10a     táṃ suprátīkaṃ sudŕ̥śaṃ suáñcam
6.015.10b     ávidvāṃso vidúṣṭaraṃ sapema
6.015.10c     sá yakṣad víśvā vayúnāni vidvā^́n
6.015.10d     prá havyám agnír amŕ̥teṣu vocat

6.015.11a     tám agne pāsi utá tám piparṣi
6.015.11b     yás ta ā^́naṭ kaváye śūra dhītím
6.015.11c     yajñásya vā níśitiṃ vóditiṃ vā
6.015.11d     tám ít pr̥ṇakṣi śávasotá rāyā^́

6.015.12a     tuvám agne vanuṣyató ní pāhi
6.015.12b     tuvám u naḥ sahasāvann avadyā^́t
6.015.12c     sáṃ tvā dhvasmanvád abhí etu pā^́thaḥ
6.015.12d     sáṃ rayí spr̥hayā^́yiyaḥ sahasrī^́

6.015.13a     agnír hótā gr̥hápatiḥ sá rā^́jā
6.015.13b     víśvā veda jánimā jātávedāḥ
6.015.13c     devā^́nãm utá yó mártiyānāṃ
6.015.13d     yájiṣṭhaḥ sá prá yajatām r̥tā^́vā

6.015.14a     ágne yád adyá viśó adhvarasya hotaḥ
6.015.14b     pávākaśoce véṣ ṭuváṃ hí yájvā
6.015.14c     r̥tā^́ yajāsi mahinā^́ ví yád bhū^́r
6.015.14d     havyā^́ vaha yaviṣṭha yā^́ te adyá

6.015.15a     abhí práyāṃsi súdhitāni hí khyó
6.015.15b     ní tvā dadhīta ródasī yájadhyai
6.015.15c     ávā no · maghavan vā^́jasātāv
6.015.15d     ágne víśvāni duritā^́ tarema
6.015.15e     tā^́ tarema távā^́vasā tarema

6.015.16a     ágne víśvebhiḥ suanīka devaír
6.015.16b     ū^́rṇāvantam prathamáḥ sīda yónim
6.015.16c     kulāyínaṃ ghr̥távantaṃ savitré
6.015.16d     yajñáṃ naya yájamānāya sādhú

6.015.17a     imám u tyám atharvavád
6.015.17b     agním manthanti vedhásaḥ
6.015.17c     yám aṅkūyántam ā^́nayann
6.015.17d     ámūraṃ śyāvíyābhiyaḥ

6.015.18a     jániṣvā devávītaye
6.015.18b     sarvátātā suastáye
6.015.18c     ā^́ devā^́n vakṣi amŕ̥tām̐ r̥tāvŕ̥dho
6.015.18d     yajñáṃ devéṣu pispr̥śaḥ

6.015.19a     vayám u tvā gr̥hapate janānām
6.015.19b     ágne ákarma samídhā br̥hántam
6.015.19c     asthūrí no gā^́rhapatyāni santu
6.015.19d     tigména nas téjasā sáṃ śiśādhi

16

6.016.01a     tuvám agne yajñā^́nãṃ
6.016.01b     hótā víśveṣãṃ hitáḥ
6.016.01c     devébhir mā^́nuṣe jáne

6.016.02a     sá no mandrā^́bhir adhvaré
6.016.02b     jihuvā^́bhir yajā maháḥ
6.016.02c     ā^́ devā^́n vakṣi yákṣi ca

6.016.03a     vétthā hí vedho ádhvanaḥ
6.016.03b     patháś ca deva áñjasā
6.016.03c     ágne yajñéṣu sukrato

6.016.04a     tuvā^́m īḷe ádha dvitā^́
6.016.04b     bharató vājíbhiḥ śunám
6.016.04c     ījé yajñéṣu yajñíyam

6.016.05a     tvám imā^́ vā^́riyā purú
6.016.05b     dívodāsāya sunvaté
6.016.05c     bharádvājāya dāśúṣe

6.016.06a     tuváṃ dūtó ámartiya
6.016.06b     ā^́ vahā daíviyaṃ jánam
6.016.06c     śr̥ṇván víprasya suṣṭutím

6.016.07a     tuvā^́m agne suādhíyo
6.016.07b     mártāso devávītaye
6.016.07c     yajñéṣu devám īḷate

6.016.08a     táva prá yakṣi saṃdŕ̥śam
6.016.08b     utá krátuṃ sudā^́navaḥ
6.016.08c     víśve juṣanta kāmínaḥ

6.016.09a     tuváṃ hótā mánurhito
6.016.09b     váhnir āsā^́ vidúṣṭaraḥ
6.016.09c     ágne yákṣi divó víśaḥ

6.016.10a     ágna ā^́ yāhi vītáye
6.016.10b     gr̥ṇānó havyádātaye
6.016.10c     ní hótā satsi barhíṣi

6.016.11a     táṃ tvā samídbhir aṅgiro
6.016.11b     ghr̥téna vardhayāmasi
6.016.11c     br̥hác chocā yaviṣṭhiya

6.016.12a     sá naḥ pr̥thú śravā^́yiyam
6.016.12b     áchā deva vivāsasi
6.016.12c     br̥hád agne suvī^́riyam

6.016.13a     tvā^́m agne púṣkarād ádhi
6.016.13b     átharvā nír amanthata
6.016.13c     mūrdhnó víśvasya vāghátaḥ

6.016.14a     tám u tvā dadhiáṅṅ ŕ̥ṣiḥ
6.016.14b     putrá īdhe átharvaṇaḥ
6.016.14c     vr̥traháṇam puraṃdarám

6.016.15a     tám u tvā pāthiyó vŕ̥ṣā
6.016.15b     sám īdhe dasyuhántamam
6.016.15c     dhanaṃjayáṃ ráṇe-raṇe

6.016.16a     éhi ū ṣú brávāṇi te
6.016.16b     ágna itthétarā gíraḥ
6.016.16c     ebhír vardhāsa índubhiḥ

6.016.17a     yátra kúva ca te máno
6.016.17b     dákṣaṃ dadhasa úttaram
6.016.17c     tátrā sádaḥ kr̥ṇavase

6.016.18a     nahí te pūrtám akṣipád
6.016.18b     bhúvan nemānãṃ vaso
6.016.18c     áthā dúvo vanavase

6.016.19a     ā^́gnír agāmi bhā^́rato
6.016.19b     vr̥trahā^́ purucétanaḥ
6.016.19c     dívodāsasya sátpatiḥ

6.016.20a     sá hí víśvā^́ti pā^́rthivā
6.016.20b     rayíṃ dā^́śan mahitvanā^́
6.016.20c     vanvánn ávāto ástr̥taḥ

6.016.21a     sá pratnaván návīyasā
6.016.21b     ágne dyumnéna saṃyátā
6.016.21c     br̥hát tatantha bhānúnā

6.016.22a     prá vaḥ sakhāyo agnáye
6.016.22b     stómaṃ yajñáṃ ca dhr̥ṣṇuyā^́
6.016.22c     árca gā^́ya ca vedháse

6.016.23a     sá hí yó mā^́nuṣā yugā^́
6.016.23b     sī^́dad dhótā kavíkratuḥ
6.016.23c     dūtáś ca havyavā^́hanaḥ

6.016.24a     tā^́ rā^́jānā śúcivratā
6.016.24b     ādityā^́n mā^́rutaṃ gaṇám
6.016.24c     váso yákṣīhá ródasī

6.016.25a     vásvī te agne sáṃdr̥ṣṭir
6.016.25b     iṣayaté mártiyāya
6.016.25c     ū^́rjo napād amŕ̥tasya

6.016.26a     krátvā dā^́ astu śráyiṣṭho⁺
6.016.26b     adyá tvā vanván surékṇāḥ
6.016.26c     márta ānāśa suvr̥ktím

6.016.27a     té te agne tuvā^́ūtā
6.016.27b     iṣáyanto víśvam ā^́yuḥ
6.016.27c     táranto aryó árātīr
6.016.27d     vanvánto aryó árātīḥ

6.016.28a     agnís tigména śocíṣā
6.016.28b     yā^́sad víśvaṃ ní atríṇam
6.016.28c     agnír no vanate rayím

6.016.29a     suvī^́raṃ rayím ā^́ bhara
6.016.29b     jā^́tavedo vícarṣaṇe
6.016.29c     jahí rákṣāṃsi sukrato

6.016.30a     tuváṃ naḥ pāhi áṃhaso
6.016.30b     jā^́tavedo aghāyatáḥ
6.016.30c     rákṣā ṇo brahmaṇas kave

6.016.31a     yó no agne duréva ā^́
6.016.31b     márto vadhā^́ya dā^́śati
6.016.31c     tásmān naḥ pāhi áṃhasaḥ

6.016.32a     tuváṃ táṃ deva jihváyā
6.016.32b     pári bādhasva duṣkŕ̥tam
6.016.32c     márto yó no jíghāṃsati

6.016.33a     bharádvājāya sapráthaḥ
6.016.33b     śárma yacha sahantiya
6.016.33c     ágne váreṇiyaṃ vásu

6.016.34a     agnír vr̥trā^́ṇi jaṅghanad
6.016.34b     draviṇasyúr vipanyáyā
6.016.34c     sámiddhaḥ śukrá ā^́hutaḥ

6.016.35a     gárbhe mātúḥ pitúṣ pitā^́
6.016.35b     vididyutānó akṣáre
6.016.35c     sī^́dann r̥tásya yónim ā^́

6.016.36a     bráhma prajā^́vad ā^́ bhara
6.016.36b     jā^́tavedo vícarṣaṇe
6.016.36c     ágne yád dīdáyad diví

6.016.37a     úpa tvā raṇvásaṃdr̥śam
6.016.37b     práyasvantaḥ sahaskr̥ta
6.016.37c     ágne sasr̥jmáhe gíraḥ

6.016.38a     úpa chāyā^́m iva ghŕ̥ṇer
6.016.38b     áganma śárma te vayám
6.016.38c     ágne híraṇyasaṃdr̥śaḥ

6.016.39a     yá ugrá iva śaryahā^́
6.016.39b     tigmáśr̥ṅgo ná váṃsagaḥ
6.016.39c     ágne púro rurójitha

6.016.40a     ā^́ yáṃ háste ná khādínaṃ
6.016.40b     śíśuṃ jātáṃ ná bíbhrati
6.016.40c     viśā^́m agníṃ suadhvarám

6.016.41a     prá deváṃ devávītaye
6.016.41b     bháratā vasuvíttamam
6.016.41c     ā^́ své yónau ní ṣīdatu

6.016.42a     ā^́ jātáṃ jātávedasi
6.016.42b     priyáṃ śiśīta átithim
6.016.42c     siyoná ā^́ gr̥hápatim

6.016.43a     ágne yukṣvā^́ hí yé táva
6.016.43b     áśvāso deva sādhávaḥ
6.016.43c     áraṃ váhanti manyáve

6.016.44a     áchā no yāhi ā^́ vaha
6.016.44b     abhí práyāṃsi vītáye
6.016.44c     ā^́ devā^́n sómapītaye

6.016.45a     úd agne bhārata dyumád
6.016.45b     ájasreṇa dávidyutat
6.016.45c     śócā ví bhāhi ajara

6.016.46a     vītī^́ yó devám márto duvasyéd
6.016.46b     agním īḷīta adhvaré havíṣmān
6.016.46c     hótāraṃ satyayájaṃ ródasīyor
6.016.46d     uttānáhasto námasā^́ vivāset

6.016.47a     ā^́ te agna r̥cā^́ havír
6.016.47b     hr̥dā^́ taṣṭám bharāmasi
6.016.47c     té te bhavantu ukṣáṇa
6.016.47d     r̥ṣabhā^́so vaśā^́ utá

6.016.48a     agníṃ devā^́so agriyám
6.016.48b     indháte vr̥trahántamam
6.016.48c     yénā vásūni ā^́bhr̥tā
6.016.48d     tr̥ḷhā^́ rákṣāṃsi vājínā

17

6.017.01a     píbā sómam abhí yám ugra tárda
6.017.01b     ūrváṃ gávyam máhi gr̥ṇāná indra
6.017.01c     ví yó dhr̥ṣṇo vádhiṣo vajrahasta
6.017.01d     víśvā vr̥trám amitríyā śávobhiḥ

6.017.02a     sá īm pāhi yá r̥jīṣī^́ tárutro
6.017.02b     yáḥ śípravān vr̥ṣabhó yó matīnā^́m
6.017.02c     yó gotrabhíd vajrabhŕ̥d yó hariṣṭhā^́ḥ
6.017.02d     sá indra citrā^́m̐ abhí tr̥ndhi vā^́jān

6.017.03a     evā^́ pāhi pratnáthā mándatu tvā
6.017.03b     śrudhí bráhma vāvr̥dhásvotá gīrbhíḥ
6.017.03c     āvíḥ sū^́ryaṃ kr̥ṇuhí pīpihī^́ṣo
6.017.03d     jahí śátrūm̐r abhí gā^́ indra tr̥ndhi

6.017.04a     té tvā mádā br̥hád indra svadhāva
6.017.04b     imé pītā^́ ukṣayanta dyumántam
6.017.04c     mahā^́m ánūnaṃ tavásaṃ víbhūtim
6.017.04d     matsarā^́so jarhr̥ṣanta prasā^́ham

6.017.05a     yébhiḥ sū^́ryam uṣásam mandasānó
6.017.05b     ávāsayo ápa dr̥̄ḷhā^́ni⁺ dárdrat
6.017.05c     mahā^́m ádrim pári gā^́ indra sántaṃ
6.017.05d     nutthā^́ ácyutaṃ sádasas pári svā^́t

6.017.06a     táva krátvā táva tád daṃsánābhir
6.017.06b     āmā^́su pakváṃ śáciyā ní dīdhaḥ
6.017.06c     aúrṇor dúra usríyābhyo ví dr̥̄ḷhā^́+
6.017.06d     úd ūrvā^́d gā^́ asr̥jo áṅgirasvān

6.017.07a     paprā^́tha kṣā^́m máhi dáṃso ví urvī^́m
6.017.07b     úpa dyā^́m r̥ṣvó br̥hád indra stabhāyaḥ
6.017.07c     ádhārayo ródasī deváputre
6.017.07d     pratné mātárā yahvī^́ r̥tásya

6.017.08a     ádha tvā víśve purá indra devā^́
6.017.08b     ékaṃ tavásaṃ dadhire bhárāya
6.017.08c     ádevo yád abhí aúhiṣṭa devā^́n
6.017.08d     súvarṣātā vr̥ṇata índram átra

6.017.09a     ádha dyaúś cit te ápa sā^́ nú vájrād
6.017.09b     dvitā^́namad bhiyásā svásya manyóḥ
6.017.09c     áhiṃ yád índro abhí óhasānaṃ
6.017.09d     ní cid viśvā^́yuḥ śayáthe jaghā^́na

6.017.10a     ádha tváṣṭā te mahá ugra vájraṃ
6.017.10b     sahásrabhr̥ṣṭiṃ vavr̥tac chatā^́śrim
6.017.10c     níkāmam arámaṇasaṃ yéna
6.017.10d     návantam áhiṃ sám piṇag r̥jīṣin

6.017.11a     várdhān yáṃ víśve marútaḥ sajóṣāḥ
6.017.11b     pácac chatám mahiṣā^́m̐ indra túbhyam
6.017.11c     pūṣā^́ víṣṇus trī^́ṇi sárāṃsi dhāvan
6.017.11d     vr̥traháṇam madirám aṃśúm asmai

6.017.12a     ā^́ kṣódo máhi vr̥táṃ nadī^́nām
6.017.12b     páriṣṭhitam asr̥ja ūrmím apā^́m
6.017.12c     tā^́sām ánu praváta indra pánthām
6.017.12d     prā^́rdayo nī^́cīr apásaḥ samudrám

6.017.13a     evā^́ tā^́ víśvā cakr̥vā^́ṃsam índram
6.017.13b     mahā^́m ugrám ajuriyáṃ sahodā^́m
6.017.13c     suvī^́raṃ tvā suāyudháṃ suvájram
6.017.13d     ā^́ bráhma návyam ávase vavr̥tyāt

6.017.14a     sá no vā^́jāya śrávasa iṣé ca
6.017.14b     rāyé dhehi dyumáta indra víprān
6.017.14c     bharádvāje nr̥váta indra sūrī^́n
6.017.14d     diví ca smaidhi pā^́riye na indra

6.017.15a     ayā^́ vā^́jaṃ deváhitaṃ sanema
6.017.15b     mádema · śatáhimāḥ suvī^́rāḥ

18

6.018.01a     tám u ṣṭuhi yó abhíbhūtiojā
6.018.01b     vanvánn ávātaḥ puruhūtá índraḥ
6.018.01c     áṣāḷham ugráṃ sáhamānam ābhír
6.018.01d     gīrbhír vardha vr̥ṣabháṃ carṣaṇīnā^́m

6.018.02a     sá yudhmáḥ sátvā khajakŕ̥t samádvā
6.018.02b     tuvimrakṣó nadanumā^́m̐ r̥jīṣī^́
6.018.02c     br̥hádreṇuś cyávano mā^́nuṣīṇām
6.018.02d     ékaḥ kr̥ṣṭīnā^́m abhavat sahā^́vā

6.018.03a     tuváṃ ha nú tyád adamāyo dásyūm̐r
6.018.03b     ékaḥ kr̥ṣṭī^́r avanor ā^́riyāya
6.018.03c     ásti svin nú vīríyaṃ tát ta indra
6.018.03d     ná svid asti tád r̥tuthā^́ ví vocaḥ

6.018.04a     sád íd dhí te tuvijātásya mánye
6.018.04b     sáhaḥ sahiṣṭha turatás turásya
6.018.04c     ugrám ugrásya tavásas távīyo
6.018.04d     áradhrasya radhratúro babhūva

6.018.05a     tán naḥ pratnáṃ sakhiyám astu yuṣmé
6.018.05b     itthā^́ vádadbhir valám áṅgirobhiḥ
6.018.05c     hánn acyutacyud dasma iṣáyantam
6.018.05d     r̥ṇóḥ púro ví dúro asya víśvāḥ

6.018.06a     sá hí dhībhír háviyo ásti ugrá
6.018.06b     īśānakŕ̥n mahatí vr̥tratū^́rye
6.018.06c     sá tokásātā tánaye sá vajrī^́
6.018.06d     vitantasā^́yyo abhavat samátsu

6.018.07a     sá majmánā jánima mā^́nuṣāṇām
6.018.07b     ámartiyena nā^́mnā^́ti prá sarsre
6.018.07c     sá dyumnéna sá śávasotá rāyā^́
6.018.07d     sá vīríyeṇa nŕ̥tamaḥ sámokāḥ

6.018.08a     sá yó ná muhé ná míthū jáno bhū^́t
6.018.08b     sumántunāmā cúmuriṃ dhúniṃ ca
6.018.08c     vr̥ṇák pípruṃ śámbaraṃ śúṣṇam índraḥ
6.018.08d     purā^́ṃ cyautnā^́ya śayáthāya nū^́ cit

6.018.09a     udā^́vatā tvákṣasā pányasā ca
6.018.09b     vr̥trahátyāya rátham indra tiṣṭha
6.018.09c     dhiṣvá vájraṃ hásta ā^́ dakṣiṇatrā^́
6.018.09d     abhí prá manda purudatra māyā^́ḥ

6.018.10a     agnír ná śúṣkaṃ vánam indra hetī^́
6.018.10b     rákṣo ní dhakṣi aśánir ná bhīmā^́
6.018.10c     gambhīráya r̥ṣváyā yó rurója
6.018.10d     ádhvānayad duritā^́ dambháyac ca

6.018.11a     ā^́ sahásram pathíbhir indra rāyā^́
6.018.11b     túvidyumna tuvivā^́jebhir arvā^́k
6.018.11c     yāhí sūno sahaso yásya nū^́ cid
6.018.11d     ádeva ī^́śe puruhūta yótoḥ

6.018.12a     prá tuvidyumnásya sthávirasya ghŕ̥ṣver
6.018.12b     divó rarapśe mahimā^́ pr̥thivyā^́ḥ
6.018.12c     nā^́sya śátrur ná pratimā^́nam asti
6.018.12d     ná pratiṣṭhíḥ purumāyásya sáhyoḥ

6.018.13a     prá tát te adyā^́ káraṇaṃ kr̥tám bhūt
6.018.13b     kútsaṃ yád āyúm atithigvám asmai
6.018.13c     purū^́ sahásrā ní śiśā abhí kṣā^́m
6.018.13d     út tū^́rvayāṇaṃ dhr̥ṣatā^́ ninetha

6.018.14a     ánu tvā^́highne ádha deva devā^́
6.018.14b     mádan víśve kavítamaṃ kavīnā^́m
6.018.14c     káro yátra várivo bādhitā^́ya
6.018.14d     divé jánāya tanúve gr̥ṇānáḥ

6.018.15a     ánu dyā^́vāpr̥thivī^́ tát ta ójo
6.018.15b     ámartiyā jihata indra devā^́ḥ
6.018.15c     kr̥ṣvā^́ kr̥tno ákr̥taṃ yát te ásti
6.018.15d     uktháṃ návīyo janayasva yajñaíḥ

19

6.019.01a     mahā^́m̐ índro nr̥vád ā^́ carṣaṇiprā^́
6.019.01b     utá dvibárhā amináḥ sáhobhiḥ
6.019.01c     asmadríag vāvr̥dhe vīríyāya
6.019.01d     urúḥ pr̥thúḥ súkr̥taḥ kartŕ̥bhir bhūt

6.019.02a     índram evá dhiṣáṇā sātáye dhād
6.019.02b     br̥hántam r̥ṣvám ajáraṃ yúvānam
6.019.02c     áṣāḷhena śávasā śūśuvā^́ṃsaṃ
6.019.02d     sadyáś cid yó · vāvr̥dhé ásāmi

6.019.03a     pr̥thū^́ karásnā bahulā^́ gábhastī
6.019.03b     asmadríak sám mimīhi śrávāṃsi
6.019.03c     yūthéva paśváḥ paśupā^́ dámūnā
6.019.03d     asmā^́m̐ indrābhí ā^́ vavr̥tsuvājaú

6.019.04a     táṃ va índraṃ catínam asya śākaír
6.019.04b     ihá nūnáṃ vājayánto huvema
6.019.04c     yáthā cit pū^́rve jaritā^́ra āsúr
6.019.04d     ánediyā anavadyā^́ áriṣṭāḥ

6.019.05a     dhr̥távrato dhanadā^́ḥ sómavr̥ddhaḥ
6.019.05b     sá hí vāmásya vásunaḥ purukṣúḥ
6.019.05c     sáṃ jagmire pathíyā rā^́yo asmin
6.019.05d     samudré ná síndhavo yā^́damānāḥ

6.019.06a     śáviṣṭhaṃ na ā^́ bhara śūra śáva
6.019.06b     ójiṣṭham ójo abhibhūta ugrám
6.019.06c     víśvā dyumnā^́ vŕ̥ṣṇiyā mā^́nuṣāṇām
6.019.06d     asmábhyaṃ dā harivo mādayádhyai

6.019.07a     yás te mádaḥ pr̥tanāṣā^́ḷ ámr̥dhra
6.019.07b     índra táṃ na ā^́ bhara śūśuvā^́ṃsam
6.019.07c     yéna tokásya tánayasya sātaú
6.019.07d     maṃsīmáhi jigīvā^́ṃsas tuvótāḥ

6.019.08a     ā^́ no bhara vŕ̥ṣaṇaṃ śúṣmam indra
6.019.08b     dhanaspŕ̥taṃ śūśuvā^́ṃsaṃ sudákṣam
6.019.08c     yéna váṃsāma pŕ̥tanāsu śátrūn
6.019.08d     távotíbhir utá jāmī^́m̐r ájāmīn

6.019.09a     ā^́ te śúṣmo vr̥ṣabhá etu paścā^́d
6.019.09b     ā^́ uttarā^́d adharā^́d ā^́ purástāt
6.019.09c     ā^́ viśváto abhí sám etu arvā^́ṅ
6.019.09d     índra dyumnáṃ súvarvad dhehi asmé

6.019.10a     nr̥vát ta indra nŕ̥tamābhir ūtī^́
6.019.10b     vaṃsīmáhi · vāmáṃ śrómatebhiḥ
6.019.10c     ī^́kṣe hí vásva ubháyasya rājan
6.019.10d     dhã^́ rátnam máhi sthūrám br̥hántam

6.019.11a     marútvantaṃ vr̥ṣabháṃ vāvr̥dhānám
6.019.11b     ákavāriṃ diviyáṃ śāsám índram
6.019.11c     viśvāsā^́ham ávase nū^́tanāya
6.019.11d     ugráṃ sahodā^́m ihá táṃ huvema

6.019.12a     jánaṃ vajrin máhi cin mányamānam
6.019.12b     ebhyó nŕ̥bhyo randhayā yéṣu ásmi
6.019.12c     ádhā hí tvā pr̥thivyā^́ṃ śū^́rasātau
6.019.12d     hávāmahe tánaye góṣu apsú

6.019.13a     vayáṃ ta ebhíḥ puruhūta sakhyaíḥ
6.019.13b     śátroḥ-śatror úttara ít siyāma
6.019.13c     ghnánto vr̥trā^́ṇi ubháyāni śūra
6.019.13d     rāyā^́ madema br̥hatā^́ tuvótāḥ

20

6.020.01a     dyaúr ná yá indra abhí bhū^́ma aryás
6.020.01b     tasthaú rayíḥ śávasā pr̥tsú jánān
6.020.01c     táṃ naḥ sahásrabharam urvarāsā^́ṃ
6.020.01d     daddhí sūno sahaso vr̥tratúram

6.020.02a     divó ná túbhyam ánu indra satrā^́
6.020.02b     asuríyaṃ devébhir dhāyi víśvam
6.020.02c     áhiṃ yád vr̥trám apó vavrivā^́ṃsaṃ
6.020.02d     hánn r̥jīṣin · víṣṇunā sacānáḥ

6.020.03a     tū^́rvann ójīyān tavásas távīyān
6.020.03b     kr̥tábrahmā índaro⁺ vr̥ddhámahāḥ
6.020.03c     rā^́jābhavan mádhunaḥ somiyásya
6.020.03d     víśvāsāṃ yát purã^́ṃ dartnúm ā^́vat

6.020.04a     śataír apadran paṇáya indrā^́tra
6.020.04b     dáśoṇaye kaváye arkásātau
6.020.04c     vadhaíḥ śúṣṇasya aśúṣasya māyā^́ḥ
6.020.04d     pitvó ná arirecīt kíṃ caná prá

6.020.05a     mahó druhó ápa viśvā^́yu dhāyi
6.020.05b     vájrasya yát pátane pā^́di śúṣṇaḥ
6.020.05c     urú ṣá saráthaṃ sā^́rathaye kar
6.020.05d     índraḥ kútsāya sū^́riyasya sātaú

6.020.06a     prá śyenó ná madirám aṃśúm asmai
6.020.06b     śíro dāsásya námucer mathāyán
6.020.06c     prá āvan námīṃ sāpiyáṃ sasántam
6.020.06d     pr̥ṇág rāyā^́ sám iṣā^́ sáṃ suastí

6.020.07a     ví pípror áhimāyasya dr̥̄ḷhā^́ḥ⁺
6.020.07b     púro vajriñ chávasā ná dardaḥ
6.020.07c     súdāman tád rékṇo apramr̥ṣyám
6.020.07d     r̥jíśvane dātráṃ dāśúṣe dāḥ

6.020.08a     sá vetasúṃ dáśamāyaṃ dáśoṇiṃ
6.020.08b     tū^́tujim índraḥ suabhiṣṭísumnaḥ
6.020.08c     ā^́ túgraṃ śáśvad íbhaṃ dyótanāya
6.020.08d     mātúr ná sīm úpa sr̥jā iyádhyai

6.020.09a     sá īṃ spŕ̥dho vanate ápratīto
6.020.09b     bíbhrad vájraṃ vr̥traháṇaṃ gábhastau
6.020.09c     tíṣṭhad dhárī ádhi ásteva gárte
6.020.09d     vacoyújā vahata índram r̥ṣvám

6.020.10a     sanéma te ávasā návya indra
6.020.10b     prá pūráva stavanta enā^́ yajñaíḥ
6.020.10c     saptá yát púraḥ śárma śā^́radīr dárd
6.020.10d     dhán dã^́sīḥ purukútsāya śíkṣan

6.020.11a     tuváṃ vr̥dhá indara⁺ pūrviyó bhūr
6.020.11b     varivasyánn uśáne kāviyā^́ya
6.020.11c     párā návavāstuvam anudéyam
6.020.11d     mahé pitré dadātha sváṃ nápātam

6.020.12a     tuváṃ dhúnir indara⁺ dhúnimatīr
6.020.12b     r̥ṇór apáḥ · sīrā^́ ná srávantīḥ
6.020.12c     prá yát samudrám áti śūra párṣi
6.020.12d     pāráyā turváśaṃ yáduṃ suastí

6.020.13a     táva ha tyád indara⁺ víśvam ājaú
6.020.13b     sastó dhúnīcúmurī yā^́ ha síṣvap
6.020.13c     dīdáyad ít túbhya° sómebhiḥ sunván
6.020.13d     dabhī^́tir idhmábhr̥tiḥ pakthí arkaíḥ

21

6.021.01a     imā^́ u tvā purutámasya kārór
6.021.01b     háviyaṃ vīra háviyā havante
6.021.01c     dhíyo ratheṣṭhā^́m ajáraṃ návīyo
6.021.01d     rayír víbhūtir īyate vacasyā^́

6.021.02a     tám u stuṣa índaraṃ⁺ yó vídāno
6.021.02b     gírvāhasaṃ · gīrbhír yajñávr̥ddham
6.021.02c     yásya dívam áti mahnā^́ pr̥thivyā^́ḥ
6.021.02d     purumāyásya riricé mahitvám

6.021.03a     sá ít támo avayunáṃ tatanvát
6.021.03b     sū^́riyeṇa vayúnavac cakāra
6.021.03c     kadā^́ te mártā amŕ̥tasya dhā^́ma
6.021.03d     íyakṣanto ná minanti svadhāvaḥ

6.021.04a     yás tā^́ cakā^́ra sá kúha svid índraḥ
6.021.04b     kám ā^́ jánaṃ carati kā^́su vikṣú
6.021.04c     kás te yajñó mánase śáṃ várāya
6.021.04d     kó arká indra katamáḥ sá hótā

6.021.05a     idā^́ hí te véviṣataḥ purājā^́ḥ
6.021.05b     pratnā^́sa āsúḥ purukr̥t sákhāyaḥ
6.021.05c     yé madhyamā^́sa utá nū^́tanāsa
6.021.05d     utā^́vamásya puruhūta bodhi

6.021.06a     tám pr̥chánto ávarāsaḥ párāṇi
6.021.06b     pratnā^́ ta indra śrútiyā^́nu yemuḥ
6.021.06c     árcāmasi · vīra brahmavāho
6.021.06d     yā^́d evá vidmá tā^́t tvā mahā^́ntam

6.021.07a     abhí tvā pā^́jo rakṣáso ví tasthe
6.021.07b     máhi jajñānám abhí tát sú tiṣṭha
6.021.07c     táva pratnéna yújiyena sákhyā
6.021.07d     vájreṇa dhr̥ṣṇo ápa tā^́ nudasva

6.021.08a     sá tú śrudhi indara⁺ nū^́tanasya
6.021.08b     brahmaṇyató · vīra kārudhāyaḥ
6.021.08c     tuváṃ hí āpíḥ pradívi pitr̥̄ṇā^́ṃ
6.021.08d     śáśvad babhū^́tha suháva aíṣṭau

6.021.09a     prá ūtáye váruṇam mitrám índram
6.021.09b     marútaḥ kr̥ṣva ávase no adyá
6.021.09c     prá pūṣáṇaṃ víṣṇum agním púraṃdhiṃ
6.021.09d     savitā^́ram óṣadhīḥ párvatāṃś ca

6.021.10a     imá u tvā puruśāka prayajyo
6.021.10b     jaritā^́ro abhí arcanti arkaíḥ
6.021.10c     śrudhī^́ hávam ā^́ huvató huvānó
6.021.10d     ná tvā^́vām̐ anyó amr̥ta tvád asti

6.021.11a     nū^́ ma ā^́ vā^́cam úpa yāhi vidvā^́n
6.021.11b     víśvebhiḥ sūno sahaso yájatraiḥ
6.021.11c     yé agnijihvā^́ r̥tasā^́pa āsúr
6.021.11d     yé mánuṃ cakrúr úparaṃ dásāya

6.021.12a     sá no bodhi puraetā^́ sugéṣu
6.021.12b     utá durgéṣu pathikŕ̥d vídānaḥ
6.021.12c     yé áśramāsa urávo váhiṣṭhās
6.021.12d     tébhir na indra abhí vakṣi vā^́jam

22

6.022.01a     yá éka íd dháviyaś carṣaṇīnā^́m
6.022.01b     índraṃ táṃ gīrbhír abhí arca ābhíḥ
6.022.01c     yáḥ pátyate vr̥ṣabhó vŕ̥ṣṇiyāvān
6.022.01d     satyáḥ sátvā purumāyáḥ sáhasvān

6.022.02a     tám u naḥ pū^́rve pitáro návagvāḥ
6.022.02b     saptá víprāso abhí vājáyantaḥ
6.022.02c     nakṣaddābháṃ táturim parvateṣṭhā^́m
6.022.02d     ádroghavācam matíbhiḥ śáviṣṭham

6.022.03a     tám īmaha índaram⁺ asya rāyáḥ
6.022.03b     puruvī^́rasya nr̥vátaḥ purukṣóḥ
6.022.03c     yó áskr̥dhoyur ajáraḥ súvarvān
6.022.03d     tám ā^́ bhara harivo mādayádhyai

6.022.04a     tán no ví voco yádi te purā^́ cij
6.022.04b     jaritā^́ra ānaśúḥ sumnám indra
6.022.04c     kás te bhāgáḥ kíṃ váyo dudhra khidvaḥ
6.022.04d     púruhūta purūvaso 'suraghnáḥ

6.022.05a     tám pr̥chántī vájrahastaṃ ratheṣṭhā^́m
6.022.05b     índraṃ vépī vákvarī yásya nū^́ gī^́ḥ
6.022.05c     tuvigrābháṃ tuvikūrmíṃ rabhodā^́m
6.022.05d     gātúm iṣe nákṣate túmram ácha

6.022.06a     ayā^́ ha tyám māyáyā vāvr̥dhānám
6.022.06b     manojúvā svatavaḥ párvatena
6.022.06c     ácyutā cid · vīḷitā^́ suojo
6.022.06d     rujó ví dr̥̄ḷhā^́+ dhr̥ṣatā^́ virapśin

6.022.07a     táṃ vo dhiyā^́ návyasiyā śáviṣṭham
6.022.07b     pratnám pratnavát paritaṃsayádhyai
6.022.07c     sá no vakṣad animānáḥ suváhmā
6.022.07d     índro víśvāni áti durgáhāṇi

6.022.08a     ā^́ jánāya drúhvaṇe pā^́rthivāni
6.022.08b     diviyā^́ni dīpayo antárikṣā
6.022.08c     tápā vr̥ṣan viśvátaḥ śocíṣā tā^́n
6.022.08d     brahmadvíṣe śocaya kṣā^́m apáś ca

6.022.09a     bhúvo jánasya diviyásya rā^́jā
6.022.09b     pā^́rthivasya jágatas tveṣasaṃdr̥k
6.022.09c     dhiṣvá vájraṃ dákṣiṇa indra háste
6.022.09d     víśvā ajurya dayase ví māyā^́ḥ

6.022.10a     ā^́ saṃyátam indara⁺ ṇaḥ suastíṃ
6.022.10b     śatrutū^́ryāya br̥hatī^́m ámr̥dhrām
6.022.10c     yáyā dā^́sāni ā^́riyāṇi vr̥trā^́
6.022.10d     káro vajrin sutúkā nā^́huṣāṇi

6.022.11a     sá no niyúdbhiḥ puruhūta vedho
6.022.11b     viśvávārābhir ā^́ gahi prayajyo
6.022.11c     ná yā^́ ádevo várate ná devá
6.022.11d     ā^́bhir yāhi tū^́yam ā^́ madriadrík

23

6.023.01a     sutá ít tváṃ nímiśla indra sóme
6.023.01b     stóme bráhmaṇi śasyámāna ukthé
6.023.01c     yád vā yuktā^́bhyām maghavan háribhyām
6.023.01d     bíbhrad vájram bāhuvór indra yā^́si

6.023.02a     yád vā diví pā^́riye súṣvim indra
6.023.02b     vr̥trahátye ávasi śū^́rasātau
6.023.02c     yád vā dákṣasya bibhyúṣo ábibhyad
6.023.02d     árandhayaḥ śárdhata indra dásyūn

6.023.03a     pā^́tā sutám índaro⁺ astu sómam
6.023.03b     praṇenī^́r ugró jaritā^́ram ūtī^́
6.023.03c     kártā vīrā^́ya súṣvaye ulokáṃ†
6.023.03d     dā^́tā vásu stuvaté kīráye cit

6.023.04a     gántā íyānti sávanā háribhyām
6.023.04b     babhrír vájram papíḥ sómaṃ dadír gā^́ḥ
6.023.04c     kártā vīráṃ náriyaṃ sárvavīraṃ
6.023.04d     śrótā hávaṃ gr̥ṇatá stómavāhāḥ

6.023.05a     ásmai vayáṃ yád vāvā^́na tád viviṣma
6.023.05b     índrāya yó naḥ pradívo ápas káḥ
6.023.05c     suté sóme stumási śáṃsad ukthā^́
6.023.05d     índrāya bráhma várdhanaṃ yáthā^́sat

6.023.06a     bráhmāṇi hí cakr̥ṣé várdhanāni
6.023.06b     tā^́vat ta indra matíbhir viviṣmaḥ
6.023.06c     suté sóme sutapāḥ śáṃtamāni
6.023.06d     rā^́ṇḍyā kriyāsma vákṣaṇāni yajñaíḥ

6.023.07a     sá no bodhi puroḷā^́śaṃ rárāṇaḥ
6.023.07b     píbā tú sómaṃ gór̥jīkam indra
6.023.07c     édám barhír yájamānasya sīda
6.023.07d     urúṃ kr̥dhi tuvāyatá ulokám†

6.023.08a     sá mandasvā hí ánu jóṣam ugra
6.023.08b     prá tvā yajñā^́sa imé aśnuvantu
6.023.08c     prémé hávāsaḥ puruhūtám asmé
6.023.08d     ā^́ tveyáṃ dhī^́r ávasa indra yamyāḥ

6.023.09a     táṃ vaḥ sakhāyaḥ sáṃ yáthā sutéṣu
6.023.09b     sómebhir īm pr̥ṇatā bhojám índram
6.023.09c     kuvít tásmā ásati no bhárāya
6.023.09d     ná súṣvim índro ávase mr̥dhāti

6.023.10a     evéd índraḥ suté astāvi sóme
6.023.10b     bharádvājeṣu kṣáyad ín maghónaḥ
6.023.10c     ásad yáthā jaritrá utá sūrír
6.023.10d     índro rāyó viśvávārasya dātā^́

24

6.024.01a     vŕ̥ṣā máda índare⁺ ślóka ukthā^́
6.024.01b     sácā sómeṣu sutapā^́ r̥jīṣī^́
6.024.01c     arcatríyo maghávā nŕ̥bhya ukthaír
6.024.01d     dyukṣó rā^́jā girã^́m ákṣitotiḥ

6.024.02a     táturir vīró náriyo vícetāḥ
6.024.02b     śrótā hávaṃ gr̥ṇatá urvíūtiḥ
6.024.02c     vásuḥ śáṃso narã^́ṃ kārúdhāyā
6.024.02d     vājī^́ stutó vidáthe dāti vā^́jam

6.024.03a     ákṣo ná · cakríyoḥ śūra br̥hán
6.024.03b     prá te mahnā^́ ririce ródasīyoḥ
6.024.03c     vr̥kṣásya nú te puruhūta vayā^́
6.024.03d     ví ūtáyo ruruhur indra pūrvī^́ḥ

6.024.04a     śácīvatas te puruśāka śā^́kā
6.024.04b     gávām iva srutáyaḥ saṃcáraṇīḥ
6.024.04c     vatsā^́nãṃ ná tantáyas ta indra
6.024.04d     dā^́manvanto adāmā^́naḥ sudāman

6.024.05a     anyád adyá kárvaram anyád u śvó
6.024.05b     ásac ca sán múhur ācakrír índraḥ
6.024.05c     mitró no átra váruṇaś ca pūṣā^́
6.024.05d     aryó váśasya parietā^́ asti

6.024.06a     ví tvád ā^́po ná párvatasya pr̥ṣṭhā^́d
6.024.06b     ukthébhir indra anayanta yajñaíḥ
6.024.06c     táṃ tvābhíḥ suṣṭutíbhir vājáyanta
6.024.06d     ājíṃ ná jagmur girvāho áśvāḥ

6.024.07a     ná yáṃ járanti śarádo ná mā^́sā
6.024.07b     ná dyā^́va índram avakarśáyanti
6.024.07c     vr̥ddhásya cid vardhatām asya tanū^́
6.024.07d     stómebhir · ukthaíś ca śasyámānā

6.024.08a     ná vīḷáve námate ná sthirā^́ya
6.024.08b     ná śárdhate dásyujūtāya stavā^́n
6.024.08c     ájrā índrasya giráyaś cid r̥ṣvā^́
6.024.08d     gambhīré cid bhavati gādhám asmai

6.024.09a     gambhīréṇa na urúṇā amatrin
6.024.09b     prá íṣó yandhi sutapāvan vā^́jān
6.024.09c     sthā^́ ū ṣú ūrdhvá ūtī^́ áriṣaṇyann
6.024.09d     aktór víuṣṭau páritakmiyāyām

6.024.10a     sácasva nāyám ávase abhī^́ka
6.024.10b     itó vā tám indara⁺ pāhi riṣáḥ
6.024.10c     amā^́ cainam áraṇye pāhi riṣó
6.024.10d     mádema · śatáhimāḥ suvī^́rāḥ

25

6.025.01a     yā^́ ta ūtír avamā^́ yā^́ paramā^́
6.025.01b     yā^́ madhyamā^́ indara⁺ śuṣmin ásti
6.025.01c     tā^́bhir ū ṣú vr̥trahátye avīr na
6.025.01d     ebhíś ca vā^́jair mahā^́n na ugra

6.025.02a     ā^́bhi spŕ̥dho mithatī^́r áriṣaṇyann
6.025.02b     amítrasya vyathayā manyúm indra
6.025.02c     ā^́bhir víśvā abhiyújo víṣūcīr
6.025.02d     ā^́ryāya víśo áva tārīr dā^́sīḥ

6.025.03a     índra jāmáya utá yé 'jāmayo
6.025.03b     arvācīnā^́so vanúṣo yuyujré
6.025.03c     tuvám eṣãṃ vithurā^́ śávāṃsi
6.025.03d     jahí vŕ̥ṣṇyāni kr̥ṇuhī^́ párācaḥ

6.025.04a     śū^́ro vā śū^́raṃ vanate śárīrais
6.025.04b     tanūrúcā táruṣi yát kr̥ṇvaíte
6.025.04c     toké vā góṣu tánaye yád apsú
6.025.04d     ví krándasī urvárāsu brávaite

6.025.05a     nahí tvā śū^́ro ná turó ná dhr̥ṣṇúr
6.025.05b     ná tvā yodhó mányamāno yuyódha
6.025.05c     índra nákiṣ ṭvā práti asti eṣāṃ
6.025.05d     víśvā jātā^́ni abhí asi tā^́ni

6.025.06a     sá patyata ubháyor nr̥mṇám ayór
6.025.06b     yádī vedhásaḥ samithé hávante
6.025.06c     vr̥tré vā mahó nr̥váti kṣáye vā
6.025.06d     vyácasvantā yádi vitantasaíte

6.025.07a     ádha smā te carṣaṇáyo yád éjān
6.025.07b     índra trātā^́ utá bhavā varūtā^́
6.025.07c     asmā^́kāso yé nŕ̥tamāso aryá
6.025.07d     índra sūráyo dadhiré puró naḥ

6.025.08a     ánu te dāyi mahá indriyā^́ya
6.025.08b     satrā^́ te víśvam ánu vr̥trahátye
6.025.08c     ánu kṣatrám ánu sáho yajatrā^́
6.025.08d     índra devébhir ánu te nr̥ṣáhye

6.025.09a     evā^́ na spŕ̥dhaḥ sám ajā samátsu
6.025.09b     índra rārandhí mithatī^́r ádevīḥ
6.025.09c     vidyā^́ma vástor ávasā gr̥ṇánto
6.025.09d     bharádvājā utá ta indra nūnám

26

6.026.01a     śrudhī^́ na indra hváyāmasi tvā
6.026.01b     mahó vā^́jasya sātaú vāvr̥ṣāṇā^́ḥ
6.026.01c     sáṃ yád víśo áyanta śū^́rasātā
6.026.01d     ugráṃ no ávaḥ pā^́riye áhan dāḥ

6.026.02a     tuvā^́ṃ vājī^́ havate vājineyó
6.026.02b     mahó vā^́jasya gádhiyasya sātaú
6.026.02c     tvā^́ṃ vr̥tréṣv indra sátpatiṃ tárutraṃ
6.026.02d     tuvā^́ṃ caṣṭe muṣṭihā^́ góṣu yúdhyan

6.026.03a     tuváṃ kavíṃ codayo arkásātau
6.026.03b     tuváṃ kútsāya śúṣṇaṃ dāśúṣe vark
6.026.03c     tuváṃ śíro amarmáṇaḥ párāhann
6.026.03d     atithigvā^́ya śáṃsiyaṃ kariṣyán

6.026.04a     tuváṃ rátham prá bharo yodhám r̥ṣvám
6.026.04b     ā^́vo yúdhyantaṃ vr̥ṣabháṃ dáśadyum
6.026.04c     tuváṃ túgraṃ vetasáve sácāhan
6.026.04d     tuváṃ tújiṃ gr̥ṇántam indra tūtoḥ

6.026.05a     tuváṃ tád ukthám indra barháṇā kaḥ
6.026.05b     prá yác chatā^́ sahásrā śūra dárṣi
6.026.05c     áva girér dã^́saṃ śámbaraṃ han
6.026.05d     prā^́vo dívodāsaṃ citrā^́bhir ūtī^́

6.026.06a     tuváṃ śraddhā^́bhir mandasānáḥ sómair
6.026.06b     dabhī^́taye cúmurim indra siṣvap
6.026.06c     tuváṃ rajím píṭhīnase daśasyán
6.026.06d     ṣaṣṭíṃ sahásrā śáciyā sácāhan

6.026.07a     aháṃ caná tát sūríbhir ānaśyāṃ
6.026.07b     táva jyā^́ya indara⁺ sumnám ójaḥ
6.026.07c     tváyā yát stávante sadhavīra vīrā^́s
6.026.07d     trivárūthena náhuṣā śaviṣṭha

6.026.08a     vayáṃ te asyā^́m indra dyumnáhūtau
6.026.08b     sákhāyaḥ syāma mahina práyiṣṭhāḥ⁺
6.026.08c     prā^́tardaniḥ kṣatraśrī^́r astu śréṣṭho
6.026.08d     ghané vr̥trā^́ṇāṃ sanáye dhánānām

27

6.027.01a     kím asya máde kím u asya pītā^́v
6.027.01b     índraḥ kím asya sakhiyé cakāra
6.027.01c     ráṇā vā yé niṣádi kíṃ té asya
6.027.01d     purā^́ vividre kím u nū^́tanāsaḥ

6.027.02a     sád asya máde sád u asya pītā^́v
6.027.02b     índraḥ sád asya sakhiyé cakāra
6.027.02c     ráṇā vā yé niṣádi sát té asya
6.027.02d     purā^́ vividre sád u nū^́tanāsaḥ

6.027.03a     nahí nú te mahimánaḥ samasya
6.027.03b     ná maghavan maghavattvásya vidmá
6.027.03c     ná rā^́dhaso-rādhaso nū^́tanasya
6.027.03d     índra nákir dadr̥śa indriyáṃ te

6.027.04a     etát tiyát ta indriyám aceti
6.027.04b     yénā^́vadhīr varáśikhasya śéṣaḥ
6.027.04c     vájrasya yát te níhatasya śúṣmāt
6.027.04d     svanā^́c cid indra paramó dadā^́ra

6.027.05a     vádhīd índro varáśikhasya śéṣo
6.027.05b     'bhyāvartíne cāyamānā^́ya śíkṣan
6.027.05c     vr̥cī^́vato yád dhariyūpī^́yāyāṃ
6.027.05d     hán pū^́rve árdhe bhiyásā^́paro dárt

6.027.06a     triṃśácchataṃ varmíṇa indra sākáṃ
6.027.06b     yavyā^́vatyām puruhūta śravasyā^́
6.027.06c     vr̥cī^́vantaḥ śárave pátyamānāḥ
6.027.06d     pā^́trā bhindānā^́ niarthā^́ni āyan

6.027.07a     yásya gā^́vāv aruṣā^́ sūyavasyū^́
6.027.07b     antár ū ṣú cárato rérihāṇā
6.027.07c     sá sŕ̥ñjayāya turváśam párādād
6.027.07d     vr̥cī^́vato daivavātā^́ya śíkṣan

6.027.08a     dvayā^́m̐ agne rathíno viṃśatíṃ gā^́
6.027.08b     vadhū^́mato maghávā máhya° samrā^́ṭ
6.027.08c     abhyāvartī^́ cāyamānó dadāti
6.027.08d     dūṇā^́śeyáṃ dákṣiṇā pārthavā^́nām

28

6.028.01a     ā^́ gā^́vo agmann utá bhadrám akran
6.028.01b     sī^́dantu goṣṭhé raṇáyantu asmé
6.028.01c     prajā^́vatīḥ pururū^́pā ihá syur
6.028.01d     índrāya pūrvī^́r uṣáso dúhānāḥ

6.028.02a     índro yájvane pr̥ṇaté ca śikṣati
6.028.02b     úpéd dadāti ná suvám muṣāyati
6.028.02c     bhū^́yo-bhūyo rayím íd asya vardháyann
6.028.02d     ábhinne khilyé ní dadhāti devayúm

6.028.03a     ná tā^́ naśanti ná dabhāti táskaro
6.028.03b     nā^́sām āmitró vyáthir ā^́ dadharṣati
6.028.03c     devā^́ṃś ca yā^́bhir yájate dádāti ca
6.028.03d     jyóg ít tā^́bhiḥ sacate gópatiḥ sahá

6.028.04a     ná tā^́ árvā reṇúkakāṭo aśnute
6.028.04b     ná saṃskr̥tatrám úpa yanti tā^́ abhí
6.028.04c     urugāyám ábhayaṃ tásya tā^́ ánu
6.028.04d     gā^́vo mártasya ví caranti yájvanaḥ

6.028.05a     gā^́vo bhágo gā^́va índro me achān
6.028.05b     gā^́vaḥ sómasya prathamásya bhakṣáḥ
6.028.05c     imā^́ yā^́ gā^́vaḥ sá janāsa índra
6.028.05d     ichā^́mī^́d dhr̥dā^́ mánasā cid índram

6.028.06a     yūyáṃ gāvo medayathā kr̥śáṃ cid
6.028.06b     aśrīráṃ cit kr̥ṇuthā suprátīkam
6.028.06c     bhadráṃ gr̥háṃ kr̥ṇutha bhadravāco
6.028.06d     br̥hád vo váya ucyate sabhā^́su

6.028.07a     prajā^́vatīḥ sūyávasaṃ riśántīḥ
6.028.07b     śuddhā^́ apáḥ suprapāṇé píbantīḥ
6.028.07c     mā^́ va stená īśata mā^́gháśaṃsaḥ
6.028.07d     pári vo hetī^́ rudarásya⁺ vr̥jyāḥ

6.028.08a     úpedám upapárcanam
6.028.08b     āsú góṣū^́pa pr̥cyatām
6.028.08c     úpa rṣabhásya rétasi
6.028.08d     úpendra táva vīríye

29

6.029.01a     índraṃ vo náraḥ sakhiyā^́ya sepur
6.029.01b     mahó yántaḥ sumatáye cakānā^́ḥ
6.029.01c     mahó hí dātā^́ vájrahasto ásti
6.029.01d     mahā^́m u raṇvám ávase yajadhvam

6.029.02a     ā^́ yásmin háste náriyā mimikṣúr
6.029.02b     ā^́ ráthe · hiraṇyáye ratheṣṭhā^́ḥ
6.029.02c     ā^́ raśmáyo gábhastiyo sthūráyor
6.029.02d     ā^́dhvann áśvāso vŕ̥ṣaṇo yujānā^́ḥ

6.029.03a     śriyé te pā^́dā dúva ā^́ mimikṣur
6.029.03b     dhr̥ṣṇúr vajrī^́ śávasā dákṣiṇāvān
6.029.03c     vásāno átkaṃ surabhíṃ dr̥śé káṃ
6.029.03d     súvar ṇá nr̥tav iṣiró babhūtha

6.029.04a     sá sóma ā^́miślatamaḥ sutó bhūd
6.029.04b     yásmin paktíḥ pacyáte sánti dhānā^́ḥ
6.029.04c     índraṃ nára stuvánto brahmakārā^́
6.029.04d     ukthā^́ śáṃsanto devávātatamāḥ

6.029.05a     ná te ántaḥ śávaso dhāyi asyá
6.029.05b     ví tú bābadhe ródasī mahitvā^́
6.029.05c     ā^́ tā^́ sūríḥ pr̥ṇati tū^́tujāno
6.029.05d     yūthévāpsú samī^́jamāna ūtī^́

6.029.06a     evéd índraḥ suháva r̥ṣvó astu
6.029.06b     ūtī^́ ánūtī hiriśipráḥ sátvā
6.029.06c     evā^́ hí jātó ásamātiojāḥ
6.029.06d     purū^́ ca vr̥trā^́ hanati ní dásyūn

30

6.030.01a     bhū^́ya íd · vāvr̥dhe vīríyāyam̐
6.030.01b     éko ajuryó dayate vásūni
6.030.01c     prá ririce divá índraḥ pr̥thivyā^́
6.030.01d     ardhám íd asya práti ródasī ubhé

6.030.02a     ádhā manye br̥hád asuryàm asya
6.030.02b     yā^́ni dādhā^́ra nákir ā^́ mināti
6.030.02c     divé-dive sū^́riyo darśató bhūd
6.030.02d     ví sádmāni urviyā^́ sukrátur dhāt

6.030.03a     adyā^́ cin nū^́ cit tád ápo nadī^́nāṃ
6.030.03b     yád ābhiyo árado gātúm indra
6.030.03c     ní párvatā admasádo ná sedus
6.030.03d     tváyā dr̥̄ḷhā^́ni⁺ sukrato rájāṃsi

6.030.04a     satyám ít tán ná tvā^́vām̐ anyó asti
6.030.04b     índra devó ná mártiyo jiyā^́yān
6.030.04c     áhann áhim pariśáyānam árṇo
6.030.04d     ávāsr̥jo apó áchā samudrám

6.030.05a     tuvám apó · ví dúro víṣūcīr
6.030.05b     índra dr̥̄ḷhám⁺ arujaḥ párvatasya
6.030.05c     rā^́jābhavo jágataś carṣaṇīnā^́ṃ
6.030.05d     sākáṃ sū^́ryaṃ janáyan dyā^́m uṣā^́sam

31

6.031.01a     ábhūr éko rayipate rayīṇā^́m
6.031.01b     ā^́ hástayor adhithā indra kr̥ṣṭī^́ḥ
6.031.01c     ví toké apsú tánaye ca sū^́re
6.031.01d     ávocanta carṣaṇáyo vívācaḥ

6.031.02a     tuvád bhiyéndra pā^́rthivāni víśvā
6.031.02b     ácyutā cic cyāvayante rájāṃsi
6.031.02c     dyā^́vākṣā^́mā párvatāso vánāni
6.031.02d     víśvaṃ dr̥̄ḷhám⁺ bhayate ájman ā^́ te

6.031.03a     tuváṃ kútsena abhí śúṣṇam indra
6.031.03b     aśúṣaṃ yudhya kúyavaṃ gáviṣṭau
6.031.03c     dáśa prapitvé ádha sū^́riyasya
6.031.03d     muṣāyáś cakrám ávive rápāṃsi†

6.031.04a     tuváṃ śatā^́ni áva śámbarasya
6.031.04b     púro jaghantha apratī^́ni dásyoḥ
6.031.04c     áśikṣo yátra śáciyā śacīvo
6.031.04d     dívodāsāya sunvaté sutakre
6.031.04e     bharádvājāya gr̥ṇaté vásūni

6.031.05a     sá satyasatvan mahaté ráṇāya
6.031.05b     rátham ā^́ tiṣṭha tuvinr̥mṇa bhīmám
6.031.05c     yāhí prapathinn ávasópa madrík
6.031.05d     prá ca śruta śrāvaya carṣaṇíbhyaḥ

32

6.032.01a     ápūrviyā purutámāni asmai
6.032.01b     mahé vīrā^́ya taváse turā^́ya
6.032.01c     virapśíne vajríṇe śáṃtamāni
6.032.01d     vácāṃsi āsā^́ sthávirāya takṣam

6.032.02a     sá mātárā sū^́riyeṇā kavīnā^́m
6.032.02b     ávāsayad rujád ádriṃ gr̥ṇānáḥ
6.032.02c     suādhī^́bhir ŕ̥kvabhir vāvaśāná
6.032.02d     úd usríyāṇām asr̥jan nidā^́nam

6.032.03a     sá váhnibhir ŕ̥kvabhir góṣu śáśvan
6.032.03b     mitájñubhiḥ purukŕ̥tvā jigāya
6.032.03c     púraḥ purohā^́ sákhibhiḥ sakhīyán
6.032.03d     dr̥̄ḷhā^́+ ruroja kavíbhiḥ kavíḥ sán

6.032.04a     sá nīvíyābhir jaritā^́ram áchā
6.032.04b     mahó vā^́jebhir mahádbhiś ca śúṣmaiḥ
6.032.04c     puruvī^́rābhir vr̥ṣabha kṣitīnā^́m
6.032.04d     ā^́ girvaṇaḥ suvitā^́ya prá yāhi

6.032.05a     sá sárgeṇa śávasā taktó átyair
6.032.05b     apá índro dakṣiṇatás turāṣā^́ṭ
6.032.05c     itthā^́ sr̥jānā^́ ánapāvr̥d árthaṃ
6.032.05d     divé-dive viviṣur apramr̥ṣyám

33

6.033.01a     yá ójiṣṭha indara⁺ táṃ sú no dā
6.033.01b     mádo vr̥ṣan suabhiṣṭír dã^́svān
6.033.01c     saúvaśviyaṃ yó vanávat suáśvo
6.033.01d     vr̥trā^́ samátsu sāsáhad amítrān

6.033.02a     tuvā^́ṃ hí indra ávase vívāco
6.033.02b     hávante carṣaṇáyaḥ śū^́rasātau
6.033.02c     tuváṃ víprebhir ví paṇī^́m̐r aśāyas
6.033.02d     tuvóta ít sánitā vā^́jam árvā

6.033.03a     tuváṃ tā^́m̐ indra ubháyām̐ amítrān
6.033.03b     dā^́sā vr̥trā^́ṇi ā^́riyā ca śūra
6.033.03c     vádhīr váneva súdhitebhir átkair
6.033.03d     ā^́ pr̥tsú darṣi nr̥̄ṇã^́ṃ⁺ nr̥tama

6.033.04a     sá tváṃ na indra ákavābhir ūtī^́
6.033.04b     sákhā viśvā^́yur avitā^́ vr̥dhé bhūḥ
6.033.04c     súvarṣātā · yád dhváyāmasi tvā
6.033.04d     yúdhyanto nemádhitā pr̥tsú śūra

6.033.05a     nūnáṃ na indra aparā^́ya ca syā
6.033.05b     bhávā mr̥̄ḷīká⁺ utá no abhíṣṭau
6.033.05c     itthā^́ gr̥ṇánto mahínasya śárman
6.033.05d     diví ṣyāma pā^́riye goṣátamāḥ

34

6.034.01a     sáṃ ca tvé jagmúr gíra indra pūrvī^́r
6.034.01b     ví ca tvád yanti vibhúvo manīṣā^́ḥ
6.034.01c     purā^́ nūnáṃ ca stutáye ŕ̥ṣīṇām
6.034.01d     paspr̥dhrá índre ádhi ukthaarkā^́

6.034.02a     puruhūtó yáḥ purugūrtá ŕ̥bhvām̐
6.034.02b     ékaḥ purupraśastó ásti yajñaíḥ
6.034.02c     rátho ná mahé śávase yujānó
6.034.02d     asmā^́bhir índro anumā^́diyo bhūt

6.034.03a     ná yáṃ híṃsanti dhītáyo ná vā^́ṇīr
6.034.03b     índraṃ nákṣantī^́d abhí vardháyantīḥ
6.034.03c     yádi stotā^́raḥ śatáṃ yát sahásraṃ
6.034.03d     gr̥ṇánti gírvaṇasaṃ śáṃ tád asmai

6.034.04a     ásmā etád diví arcéva māsā^́
6.034.04b     mimikṣá índre ní ayāmi sómaḥ
6.034.04c     jánaṃ ná dhánvann abhí sáṃ yád ā^́paḥ
6.034.04d     satrā^́ vāvr̥dhur hávanāni yajñaíḥ

6.034.05a     ásmā etán máhi āṅgūṣám asmā
6.034.05b     índrāya stotrám matíbhir avāci
6.034.05c     ásad yáthā mahatí vr̥tratū^́rya
6.034.05d     índro viśvā^́yur avitā^́ vr̥dháś ca

35

6.035.01a     kadā^́ bhuvan ráthakṣayāṇi bráhma
6.035.01b     kadā^́ stotré sahasrapoṣíyaṃ dāḥ
6.035.01c     kadā^́ stómaṃ vāsayo asya rāyā^́
6.035.01d     kadā^́ dhíyaḥ karasi vā^́jaratnāḥ

6.035.02a     kárhi svit tád indara⁺ yán nŕ̥bhir nr̥̄^́n
6.035.02b     vīraír vīrā^́n nīḷáyāse jáyājī^́n
6.035.02c     tridhā^́tu gā^́ ádhi jayāsi góṣu
6.035.02d     índra dyumnáṃ súvarvad dhehi asmé

6.035.03a     kárhi svit tád indara⁺ yáj jaritré
6.035.03b     viśvápsu bráhma kr̥ṇávaḥ śaviṣṭha
6.035.03c     kadā^́ dhíyo ná niyúto yuvāse
6.035.03d     kadā^́ gómaghā hávanāni gachāḥ

6.035.04a     sá gómaghā jaritré áśvaścandrā
6.035.04b     vā^́jaśravaso ádhi dhehi pŕ̥kṣaḥ
6.035.04c     pīpihī^́ṣaḥ sudúghām indra dhenúm
6.035.04d     bharádvājeṣu surúco rurucyāḥ

6.035.05a     tám ā^́ nūnáṃ vr̥jánam anyáthā cic
6.035.05b     chū^́ro yác chakra ví dúro gr̥ṇīṣé
6.035.05c     mā^́ nír araṃ śukradúghasya dhenór
6.035.05d     āṅgirasā^́n bráhmaṇā vipra jinva

36

6.036.01a     satrā^́ mádāsas táva viśvájanyāḥ
6.036.01b     satrā^́ rā^́yo ádha yé pā^́rthivāsaḥ
6.036.01c     satrā^́ vā^́jānām abhavo vibhaktā^́
6.036.01d     yád devéṣu dhāráyathā asuryàm

6.036.02a     ánu prá yeje jána ójo asya
6.036.02b     satrā^́ dadhire ánu vīríyāya
6.036.02c     syūmagŕ̥bhe dúdhaye árvate ca
6.036.02d     krátuṃ vr̥ñjanti ápi vr̥trahátye

6.036.03a     táṃ sadhrī^́cīr ūtáyo vŕ̥ṣṇiyāni
6.036.03b     paúṃsiyāni niyútaḥ saścur índram
6.036.03c     samudráṃ ná síndhava uktháśuṣmā
6.036.03d     uruvyácasaṃ gíra ā^́ viśanti

6.036.04a     sá rāyás khā^́m úpa sr̥jā gr̥ṇānáḥ
6.036.04b     puruścandrásya tuvám indra vásvaḥ
6.036.04c     pátir babhūtha ásamo jánānām
6.036.04d     éko víśvasya bhúvanasya rā^́jā

6.036.05a     sá tú śrudhi śrútiyā yó duvoyúr
6.036.05b     diyaúr ná bhū^́ma abhí rā^́yo aryáḥ
6.036.05c     áso yáthā naḥ śávasā cakānó
6.036.05d     yugé-yuge váyasā cékitānaḥ

37

6.037.01a     arvā^́g ráthaṃ viśvávāraṃ ta ugra
6.037.01b     índra yuktā^́so hárayo vahantu
6.037.01c     kīríś cid dhí tvā hávate súvarvān
6.037.01d     r̥dhīmáhi sadhamā^́das te adyá

6.037.02a     prá ū dróṇe hárayaḥ kárma agman
6.037.02b     punānā^́sa ŕ̥jiyanto abhūvan
6.037.02c     índro no asyá pūrviyáḥ papīyād
6.037.02d     dyukṣó mádasya somiyásya rā^́jā

6.037.03a     āsasrāṇā^́saḥ śavasānám ácha
6.037.03b     índraṃ sucakré rathíyāso áśvāḥ
6.037.03c     abhí śráva ŕ̥jiyanto vaheyur
6.037.03d     nū^́ cin nú vāyór amŕ̥taṃ ví dasyet

6.037.04a     váriṣṭho asya dákṣiṇām iyarti
6.037.04b     índro maghónāṃ tuvikūrmítamaḥ
6.037.04c     yáyā vajrivaḥ pariyā^́si áṃho
6.037.04d     maghā^́ ca dhr̥ṣṇo dáyase ví sūrī^́n

6.037.05a     índro vā^́jasya sthávirasya dātā^́
6.037.05b     índro gīrbhír vardhatāṃ vr̥ddhámahāḥ
6.037.05c     índro vr̥tráṃ hániṣṭho astu sátvā
6.037.05d     ā^́ tā^́ sūríḥ pr̥ṇati tū^́tujānaḥ

38

6.038.01a     ápād itá úd u naś citrátamo
6.038.01b     mahī^́m bharṣad dyumátīm índrahūtim
6.038.01c     pányasīṃ dhītíṃ daíviyasya yā^́mañ
6.038.01d     jánasya rātíṃ vanate sudā^́nuḥ

6.038.02a     dūrā^́c cid ā^́ vasato asya kárṇā
6.038.02b     ghóṣād índrasya tanyati bruvāṇáḥ
6.038.02c     éyám enaṃ deváhūtir vavr̥tyān
6.038.02d     madríag índram iyám r̥cyámānā

6.038.03a     táṃ vo dhiyā^́ paramáyā purājā^́m
6.038.03b     ajáram índram abhy ànūṣi arkaíḥ
6.038.03c     bráhmā ca gíro dadhiré sám asmin
6.038.03d     mahā^́ṃś ca stómo ádhi vardhad índre

6.038.04a     várdhād yáṃ yajñá utá sóma índraṃ
6.038.04b     várdhād bráhma gíra ukthā^́ ca mánma
6.038.04c     várdhā^́hainam uṣáso yā^́man aktór
6.038.04d     várdhān mā^́sāḥ śarádo dyā^́va índram

6.038.05a     evā^́ jajñānáṃ sáhase ásāmi
6.038.05b     vāvr̥dhānáṃ rā^́dhase ca śrutā^́ya
6.038.05c     mahā^́m ugrám ávase vipra nūnám
6.038.05d     ā^́ vivāsema vr̥tratū^́riyeṣu

39

6.039.01a     mandrásya kavér diviyásya váhner
6.039.01b     vípramanmano vacanásya mádhvaḥ
6.039.01c     ápā nas tásya sacanásya deva
6.039.01d     íṣo yuvasva gr̥ṇaté góagrāḥ

6.039.02a     ayám uśānáḥ pári ádrim usrā^́
6.039.02b     r̥tádhītibhir r̥tayúg yujānáḥ
6.039.02c     rujád árugṇaṃ ví valásya sā^́num
6.039.02d     paṇī^́m̐r vácobhir abhí yodhad índraḥ

6.039.03a     ayáṃ dyotayad adyúto ví aktū^́n
6.039.03b     doṣā^́ vástoḥ śaráda índur indra
6.039.03c     imáṃ ketúm adadhur nū^́ cid áhnāṃ
6.039.03d     śúcijanmana uṣásaś cakāra

6.039.04a     ayáṃ rocayad arúco rucānó
6.039.04b     ayáṃ vāsayad ví r̥téna pūrvī^́ḥ
6.039.04c     ayám īyata r̥tayúgbhir áśvaiḥ
6.039.04d     suvarvídā nā^́bhinā carṣaṇiprā^́ḥ

6.039.05a     nū^́ gr̥ṇānó gr̥ṇaté pratna rājann
6.039.05b     íṣaḥ pinva vasudéyāya pūrvī^́ḥ
6.039.05c     apá óṣadhīr aviṣā^́ vánāni
6.039.05d     gā^́ árvato nr̥̄^́n r̥cáse rirīhi

40

6.040.01a     índra píba túbhya° sutó mádāya
6.040.01b     áva sya hárī ví mucā sákhāyā
6.040.01c     utá prá gāya gaṇá ā^́ niṣádya
6.040.01d     áthā yajñā^́ya gr̥ṇaté váyo dhāḥ

6.040.02a     ásya piba yásya jajñāná indra
6.040.02b     mádāya krátve ápibo virapśin
6.040.02c     tám u te gā^́vo nára ā^́po ádrir
6.040.02d     índuṃ sám ahyan pītáye sám asmai

6.040.03a     sámiddhe agnaú sutá indra sóma
6.040.03b     ā^́ tvā vahantu hárayo váhiṣṭhāḥ
6.040.03c     tuvāyatā^́ mánasā johavīmi
6.040.03d     índrā^́ yāhi suvitā^́ya mahé naḥ

6.040.04a     ā^́ yāhi śáśvad uśatā^́ yayātha
6.040.04b     índra mahā^́ mánasā somapéyam
6.040.04c     úpa bráhmāṇi śr̥ṇava imā^́ no
6.040.04d     áthā te yajñás tanúve váyo dhāt

6.040.05a     yád indra diví pā^́riye yád ŕ̥dhag
6.040.05b     yád vā suvé sádane yátra vā^́si
6.040.05c     áto no yajñám ávase niyútvān
6.040.05d     sajóṣāḥ pāhi girvaṇo marúdbhiḥ

41

6.041.01a     áheḷamāna úpa yāhi yajñáṃ
6.041.01b     túbhyam pavanta índavaḥ sutā^́saḥ
6.041.01c     gā^́vo ná vajrin suvám óko ácha
6.041.01d     índrā^́ gahi prathamó yajñíyānām

6.041.02a     yā^́ te kākút súkr̥tā yā^́ váriṣṭhā
6.041.02b     yáyā śáśvat píbasi mádhva ūrmím
6.041.02c     táyā pāhi prá te adhvaryúr asthāt
6.041.02d     sáṃ te vájro vartatām indra gavyúḥ

6.041.03a     eṣá drapsó vr̥ṣabhó viśvárūpa
6.041.03b     índrāya vŕ̥ṣṇe sám akāri sómaḥ
6.041.03c     etám piba hariva sthātar ugra
6.041.03d     yásyéśiṣe pradívi yás te ánnam

6.041.04a     sutáḥ sómo ásutād indra vásyān
6.041.04b     ayáṃ śréyāñ cikitúṣe ráṇāya
6.041.04c     etáṃ titirva úpa yāhi yajñáṃ
6.041.04d     téna víśvās táviṣīr ā^́ pr̥ṇasva

6.041.05a     hváyāmasi tvā índra yāhi arvā^́ṅ
6.041.05b     áraṃ te sómas tanúve bhavāti
6.041.05c     śátakrato mādáyasvā sutéṣu
6.041.05d     prā^́smā^́m̐ ava pŕ̥tanāsu prá vikṣú

42

6.042.01a     práti asmai pípīṣate
6.042.01b     víśvāni vidúṣe bhara
6.042.01c     araṃgamā^́ya jágmaye
6.042.01d     ápaścāddaghvane náre

6.042.02a     ém enam pratiétana
6.042.02b     sómebhiḥ somapā^́tamam
6.042.02c     ámatrebhir r̥jīṣíṇam
6.042.02d     índraṃ sutébhir índubhiḥ

6.042.03a     yádī sutébhir índubhiḥ
6.042.03b     sómebhiḥ pratibhū^́ṣatha
6.042.03c     védā víśvasya médhiro
6.042.03d     dhr̥ṣát táṃ-tam íd éṣate

6.042.04a     asmā^́-asmā íd ándhaso
6.042.04b     ádhvaryo prá bharā sutám
6.042.04c     kuvít samasya jéniyasya śárdhato
6.042.04d     abhíśaster avaspárat

43

6.043.01a     yásya tyác chámbaram máde
6.043.01b     dívodāsāya randháyaḥ
6.043.01c     ayáṃ sá sóma indra te sutáḥ píba

6.043.02a     yásya tīvrasútam mádam
6.043.02b     mádhyam ántaṃ ca rákṣase
6.043.02c     ayáṃ sá sóma indra te sutáḥ píba

6.043.03a     yásya gā^́ antár áśmano
6.043.03b     máde dr̥̄ḷhā^́+ avā^́sr̥jaḥ
6.043.03c     ayáṃ sá sóma indra te sutáḥ píba

6.043.04a     yásya mandānó ándhaso
6.043.04b     mā^́ghonaṃ dadhiṣé śávaḥ
6.043.04c     ayáṃ sá sóma indra te sutáḥ píba

44

6.044.01a     yó rayivo rayíṃtamo
6.044.01b     yó dyumnaír dyumnávattamaḥ
6.044.01c     sómaḥ sutáḥ sá indra te
6.044.01d     ásti svadhāpate mádaḥ

6.044.02a     yáḥ śagmás tuviśagma te
6.044.02b     rāyó dāmā^́ matīnã^́m
6.044.02c     sómaḥ sutáḥ sá indra te
6.044.02d     ásti svadhāpate mádaḥ

6.044.03a     yéna vr̥ddhó ná śávasā
6.044.03b     turó ná svā^́bhir ūtíbhiḥ
6.044.03c     sómaḥ sutáḥ sá indra te
6.044.03d     ásti svadhāpate mádaḥ

6.044.04a     tiyám u vo áprahaṇaṃ
6.044.04b     gr̥ṇīṣé śávasas pátim
6.044.04c     índraṃ viśvāsā^́haṃ náram
6.044.04d     máṃhiṣṭhaṃ viśvácarṣaṇim

6.044.05a     yáṃ vardháyanti íd gíraḥ
6.044.05b     pátiṃ turásya rā^́dhasaḥ
6.044.05c     tám ín nú asya ródasī
6.044.05d     devī^́ śúṣmaṃ saparyataḥ

6.044.06a     tád va ukthásya barháṇā
6.044.06b     índrāyopastr̥ṇīṣáṇi
6.044.06c     vípo ná yásya ūtáyo
6.044.06d     ví yád róhanti sakṣítaḥ

6.044.07a     ávidad dákṣam mitró návīyān
6.044.07b     papānó devébhyo vásyo acait
6.044.07c     sasavā^́n staulā^́bhir dhautárībhir
6.044.07d     uruṣyā^́ pāyúr abhavat sákhibhyaḥ

6.044.08a     r̥tásya pathí vedhā^́ apāyi
6.044.08b     śriyé mánāṃsi devā^́so akran
6.044.08c     dádhāno nā^́ma mahó vácobhir
6.044.08d     vápur dr̥śáye venyó ví āvaḥ

6.044.09a     dyumáttamaṃ · dákṣaṃ dhehi asmé
6.044.09b     sédhā jánānām pūrvī^́r árātīḥ
6.044.09c     várṣīyo váyaḥ kr̥ṇuhi śácībhir
6.044.09d     dhánasya sātā^́v asmā^́m̐ aviḍḍhi

6.044.10a     índra túbhyam ín maghavann abhūma
6.044.10b     vayáṃ dātré harivo mā^́ ví venaḥ
6.044.10c     nákir āpír dadr̥śe martiyatrā^́
6.044.10d     kím aṅgá radhracódanaṃ tuvāhuḥ

6.044.11a     mā^́ jásvane vr̥ṣabha no rarīthā
6.044.11b     mā^́ te revátaḥ sakhiyé riṣāma
6.044.11c     pūrvī^́ṣ ṭa indra niṣṣídho jáneṣu
6.044.11d     jahí ásuṣvīn prá vr̥hā^́pr̥ṇataḥ

6.044.12a     úd abhrā^́ṇīva stanáyann iyarti
6.044.12b     índro rā^́dhāṃsi áśviyāni gávyā
6.044.12c     tuvám asi pradívaḥ kārúdhāyā
6.044.12d     mā^́ tvādāmā^́na ā^́ dabhan maghónaḥ

6.044.13a     ádhvaryo vīra prá mahé sutā^́nām
6.044.13b     índrāya bhara sá hí asya rā^́jā
6.044.13c     yáḥ pūrviyā^́bhir utá nū^́tanābhir
6.044.13d     gīrbhír vāvr̥dhé gr̥ṇatā^́m ŕ̥ṣīṇām

6.044.14a     asyá máde purú várpāṃsi vidvā^́n
6.044.14b     índro vr̥trā^́ṇi apratī^́ jaghāna
6.044.14c     tám u prá hoṣi mádhumantam asmai
6.044.14d     sómaṃ vīrā^́ya śipríṇe píbadhyai

6.044.15a     pā^́tā sutám índaro⁺ astu sómaṃ
6.044.15b     hántā vr̥tráṃ vájreṇa mandasānáḥ
6.044.15c     gántā yajñám parāvátaś cid áchā
6.044.15d     vásur dhīnā^́m avitā^́ kārúdhāyāḥ

6.044.16a     idáṃ tiyát pā^́taram⁺ indrapā^́nam
6.044.16b     índrasya priyám amŕ̥tam apāyi
6.044.16c     mátsad yáthā saumanasā^́ya deváṃ
6.044.16d     ví asmád dvéṣo yuyávad ví áṃhaḥ

6.044.17a     enā^́ mandānó jahí śūra śátrūñ
6.044.17b     jāmím ájāmim maghavann amítrān
6.044.17c     abhiṣeṇā^́m̐ abhí ādédiśānān
6.044.17d     párāca indra prá mr̥ṇā jahī^́ ca

6.044.18a     āsú ṣmā ṇo maghavann indra pr̥tsu
6.044.18b     àsmábhyam máhi várivaḥ sugáṃ kaḥ
6.044.18c     apā^́ṃ tokásya tánayasya jeṣá
6.044.18d     índra sūrī^́n kr̥ṇuhí smā no ardhám

6.044.19a     ā^́ tvā hárayo vŕ̥ṣaṇo yujānā^́
6.044.19b     vŕ̥ṣarathāso vŕ̥ṣaraśmayó 'tyāḥ
6.044.19c     asmatrā^́ñco vŕ̥ṣaṇo vajravā^́ho
6.044.19d     vŕ̥ṣṇe mádāya suyújo vahantu

6.044.20a     ā^́ te vr̥ṣan vŕ̥ṣaṇo dróṇam asthur
6.044.20b     ghr̥taprúṣo ná ūrmáyo mádantaḥ
6.044.20c     índra prá túbhyaṃ vŕ̥ṣabhiḥ sutā^́nāṃ
6.044.20d     vŕ̥ṣṇe bharanti vr̥ṣabhā^́ya sómam

6.044.21a     vŕ̥ṣāsi divó vr̥ṣabháḥ pr̥thivyā^́
6.044.21b     vŕ̥ṣā síndhūnāṃ vr̥ṣabhá stíyānām
6.044.21c     vŕ̥ṣṇe ta índur vr̥ṣabha pīpāya
6.044.21d     svādū^́ ráso madhupéyo várāya

6.044.22a     ayáṃ deváḥ sáhasā jā^́yamāna
6.044.22b     índreṇa yujā^́ paṇím astabhāyat
6.044.22c     ayáṃ suvásya pitúr ā^́yudhāni
6.044.22d     índur amuṣṇād áśivasya māyā^́ḥ

6.044.23a     ayám akr̥ṇod uṣásaḥ supátnīr
6.044.23b     ayáṃ sū^́rye adadhāj jyótir antáḥ
6.044.23c     ayáṃ tridhā^́tu diví rocanéṣu
6.044.23d     tritéṣu vindad amŕ̥taṃ nígūḷham

6.044.24a     ayáṃ dyā^́vāpr̥thivī^́ ví ṣkabhāyad
6.044.24b     ayáṃ rátham ayunak saptáraśmim
6.044.24c     ayáṃ góṣu śáciyā pakvám antáḥ
6.044.24d     sómo dādhāra dáśayantram útsam

45

6.045.01a     yá ā^́nayat parāvátaḥ
6.045.01b     súnītī turváśaṃ yádum
6.045.01c     índraḥ sá no yúvā sákhā

6.045.02a     avipré cid váyo dádhad
6.045.02b     anāśúnā cid árvatā
6.045.02c     índro jétā hitáṃ dhánam

6.045.03a     mahī^́r asya práṇītayaḥ
6.045.03b     pūrvī^́r utá práśastayaḥ
6.045.03c     nā^́sya kṣīyanta ūtáyaḥ

6.045.04a     sákhāyo bráhmavāhase
6.045.04b     árcata prá ca gāyata
6.045.04c     sá hí naḥ prámatir mahī^́

6.045.05a     tuvám ékasya vr̥trahann
6.045.05b     avitā^́ duváyor asi
6.045.05c     utédŕ̥śe yáthā vayám

6.045.06a     náyasī^́d u áti dvíṣaḥ
6.045.06b     kr̥ṇóṣi ukthaśaṃsínaḥ
6.045.06c     nŕ̥bhiḥ suvī^́ra ucyase

6.045.07a     brahmā^́ṇam bráhmavāhasaṃ
6.045.07b     gīrbhíḥ sákhāyam r̥gmíyam
6.045.07c     gã^́ṃ ná doháse huve

6.045.08a     yásya víśvāni hástayor
6.045.08b     ūcúr vásūni ní dvitā^́
6.045.08c     vīrásya pr̥tanāṣáhaḥ

6.045.09a     ví dr̥̄ḷhā^́ni⁺ cid adrivo
6.045.09b     jánānãṃ śacīpate
6.045.09c     vr̥há māyā^́ anānata

6.045.10a     tám u tvā satya somapā
6.045.10b     índra vājānã^́m pate
6.045.10c     áhūmahi śravasyávaḥ

6.045.11a     tám u tvā yáḥ purā^́sitha
6.045.11b     yó vā nūnáṃ hité dháne
6.045.11c     háviyaḥ sá śrudhī hávam

6.045.12a     dhībhír árvadbhir árvato
6.045.12b     vā^́jām̐ indra śravā^́yiyān
6.045.12c     tváyā jeṣma hitáṃ dhánam

6.045.13a     ábhūr u vīra girvaṇo
6.045.13b     mahā^́m̐ indra dháne hité
6.045.13c     bháre vitantasā^́yiyaḥ

6.045.14a     yā^́ ta ūtír amitrahan
6.045.14b     makṣū^́javastamā^́sati
6.045.14c     táyā no hinuhī rátham

6.045.15a     sá ráthena rathī^́tamo
6.045.15b     asmā^́kenābhiyúgvanā
6.045.15c     jéṣi jiṣṇo hitáṃ dhánam

6.045.16a     yá éka ít tám u ṣṭuhi
6.045.16b     kr̥ṣṭīnã^́ṃ vícarṣaṇiḥ
6.045.16c     pátir jajñé vŕ̥ṣakratuḥ

6.045.17a     yó gr̥ṇatā^́m íd ā^́sitha
6.045.17b     āpír ūtī^́ śiváḥ sákhā
6.045.17c     sá tváṃ na indra mr̥̄ḷaya⁺

6.045.18a     dhiṣvá vájraṃ gábhastiyo
6.045.18b     rakṣohátyāya vajrivaḥ
6.045.18c     sāsahīṣṭhā^́ abhí spŕ̥dhaḥ

6.045.19a     pratnáṃ rayīṇã^́ṃ yújaṃ
6.045.19b     sákhāyaṃ kīricódanam
6.045.19c     bráhmavāhastamaṃ huve

6.045.20a     sá hí víśvāni pā^́rthivām̐
6.045.20b     éko vásūni pátyate
6.045.20c     gírvaṇastamo ádhriguḥ

6.045.21a     sá no niyúdbhir ā^́ pr̥ṇa
6.045.21b     kā^́maṃ vā^́jebhir aśvíbhiḥ
6.045.21c     gómadbhir gopate dhr̥ṣát

6.045.22a     tád vo gāya suté sácā
6.045.22b     puruhūtā^́ya sátvane
6.045.22c     śáṃ yád gáve ná śākíne

6.045.23a     ná ghā vásur ní yamate
6.045.23b     dānáṃ vā^́jasya gómataḥ
6.045.23c     yát sīm úpa śrávad gíraḥ

6.045.24a     kuvítsasya prá hí vrajáṃ
6.045.24b     gómantaṃ dasyuhā^́ gámat
6.045.24c     śácībhir ápa no varat

6.045.25a     imā^́ u tvā śatakrato
6.045.25b     abhí prá ṇonuvur gíraḥ
6.045.25c     índra vatsáṃ ná mātáraḥ

6.045.26a     dūṇā^́śaṃ sakhiyáṃ táva
6.045.26b     gaúr asi vīra gavyaté
6.045.26c     áśvo aśvāyaté bhava

6.045.27a     sá mandasvā hí ándhaso
6.045.27b     rā^́dhase tanúvā mahé
6.045.27c     ná stotā^́raṃ nidé karaḥ

6.045.28a     imā^́ u tvā suté-sute
6.045.28b     nákṣante girvaṇo gíraḥ
6.045.28c     vatsáṃ gā^́vo ná dhenávaḥ

6.045.29a     purūtámam purūṇā^́ṃ
6.045.29b     stotr̥̄ṇā^́ṃ vívāci
6.045.29c     vā^́jebhir vājayatā^́m

6.045.30a     asmā^́kam indra bhūtu te
6.045.30b     stómo vā^́hiṣṭho ántamaḥ
6.045.30c     asmā^́n rāyé mahé hinu

6.045.31a     ádhi br̥búḥ paṇīnã^́ṃ
6.045.31b     várṣiṣṭhe mūrdhán asthãt
6.045.31c     urúḥ kákṣo ná gāṅgiyáḥ

6.045.32a     yásya vāyór iva dravád
6.045.32b     bhadrā^́ rātíḥ sahasríṇī
6.045.32c     sadyó dānā^́ya máṃhate

6.045.33a     tát sú no víśve aryá ā^́
6.045.33b     sádā gr̥ṇanti kārávaḥ
6.045.33c     br̥búṃ sahasradā^́tamaṃ
6.045.33d     sūríṃ sahasrasā^́tamam

46

6.046.01a     tuvā^́m íd dhí hávāmahe
6.046.01b     sātā^́ vā^́jasya kārávaḥ
6.046.01c     tuvā^́ṃ vr̥tréṣu indra sátpatiṃ náras
6.046.01d     tuvā^́ṃ kā^́ṣṭhāsu árvataḥ

6.046.02a     sá tváṃ naś citra vajrahasta dhr̥ṣṇuyā^́
6.046.02b     mahá stavānó adrivaḥ
6.046.02c     gã^́m áśvaṃ rathíyam indra sáṃ kira
6.046.02d     satrā^́ vā^́jaṃ ná jigyúṣe

6.046.03a     yáḥ satrāhā^́ vícarṣaṇir
6.046.03b     índraṃ táṃ hūmahe vayám
6.046.03c     sáhasramuṣka túvinr̥mṇa sátpate
6.046.03d     bhávā samátsu no vr̥dhé

6.046.04a     bā^́dhase jánān vr̥ṣabhéva manyúnā
6.046.04b     ghŕ̥ṣau mīḷhá r̥cīṣama
6.046.04c     asmā^́kam bodhi avitā^́ mahādhané
6.046.04d     tanū^́ṣu apsú sū^́riye

6.046.05a     índra jyéṣṭhaṃ na ā^́ bharam̐
6.046.05b     ójiṣṭham pápuri śrávaḥ
6.046.05c     yénemé citra vajrahasta ródasī
6.046.05d     ā^́ ubhé suśipra prã^́ḥ

6.046.06a     tuvā^́m ugrám ávase carṣaṇīsáhaṃ
6.046.06b     rā^́jan devéṣu hūmahe
6.046.06c     víśvā sú no vithurā^́ pibdanā^́ vaso
6.046.06d     amítrān suṣáhān kr̥dhi

6.046.07a     yád indra nā^́huṣīṣu ā^́m̐
6.046.07b     ójo nr̥mṇáṃ ca kr̥ṣṭíṣu
6.046.07c     yád vā páñca kṣitīnā^́ṃ dyumnám ā^́ bhara
6.046.07d     satrā^́ víśvāni paúṃsiyā

6.046.08a     yád vā tr̥kṣaú maghavan druhyā^́v ā^́ jáne
6.046.08b     yát pūraú kác ca vŕ̥ṣṇiyam
6.046.08c     asmábhyaṃ tád rirīhi sáṃ nr̥ṣā^́hiye
6.046.08d     amítrān pr̥tsú turváṇe

6.046.09a     índra tridhā^́tu śaraṇáṃ
6.046.09b     trivárūthaṃ suastimát
6.046.09c     chardír yacha maghávadbhyaś ca máhya° ca
6.046.09d     yāváyā didyúm ebhiyaḥ

6.046.10a     yé gavyatā^́ mánasā śátrum ādabhúr
6.046.10b     abhipraghnánti dhr̥ṣṇuyā^́
6.046.10c     ádha smā no maghavann indra girvaṇas
6.046.10d     tanūpā^́ ántamo bhava

6.046.11a     ádha smā no vr̥dhé bhava
6.046.11b     índra nāyám avā yudhí
6.046.11c     yád antárikṣe patáyanti parṇíno
6.046.11d     didyávas tigmámūrdhānaḥ

6.046.12a     yátra śū^́rāsas tanúvo vitanvaté
6.046.12b     priyā^́ śárma pitr̥̄ṇã^́m
6.046.12c     ádha smā yacha tanvè táne ca chardír
6.046.12d     acíttaṃ yāváya dvéṣaḥ

6.046.13a     yád indra sárge árvataś
6.046.13b     codáyāse mahādhané
6.046.13c     asamané ádhvani vr̥jiné pathí
6.046.13d     śyenā^́m̐ iva śravasyatáḥ

6.046.14a     síndhūm̐r iva pravaṇá āśuyā^́ yató
6.046.14b     yádi klóśam ánu ṣváṇi
6.046.14c     ā^́ yé váyo ná várvr̥tati ā^́miṣi
6.046.14d     gr̥bhītā^́ bāhuvór gávi

47

6.047.01a     svādúṣ kílāyám mádhumām̐ utā^́yáṃ
6.047.01b     tīvráḥ kílāyáṃ rásavām̐ utā^́yám
6.047.01c     utó nú asyá papivā^́ṃsam índraṃ
6.047.01d     ná káś caná sahata āhavéṣu

6.047.02a     ayáṃ svādúr ihá mádiṣṭha āsa
6.047.02b     yásya índro vr̥trahátye mamā^́da
6.047.02c     purū^́ṇi yáś cyautanā^́ śámbarasya
6.047.02d     ví navatíṃ náva ca dehíyo hán

6.047.03a     ayám me pītá úd iyarti vā^́cam
6.047.03b     ayám manīṣā^́m uśatī^́m ajīgaḥ
6.047.03c     ayáṃ ṣáḷ urvī^́r amimīta dhī^́ro
6.047.03d     ná yā^́bhiyo bhúvanaṃ kác canā^́ré

6.047.04a     ayáṃ sá yó varimā^́ṇam pr̥thivyā^́
6.047.04b     varṣmā^́ṇaṃ divó ákr̥ṇod ayáṃ sáḥ
6.047.04c     ayám pīyū^́ṣaṃ tisŕ̥ṣu pravátsu
6.047.04d     sómo dādhāra urú antárikṣam

6.047.05a     ayáṃ vidac citradŕ̥śīkam árṇaḥ
6.047.05b     śukrásadmanām uṣásām ánīke
6.047.05c     ayám mahā^́n mahatā^́ skámbhanenód
6.047.05d     diyā^́m astabhnād vr̥ṣabhó marútvān

6.047.06a     dhr̥ṣát piba kaláśe sómam indra
6.047.06b     vr̥trahā^́ śūra samaré vásūnām
6.047.06c     mā^́dhyaṃdine sávana ā^́ vr̥ṣasva
6.047.06d     rayisthā^́no rayím asmā^́su dhehi

6.047.07a     índra prá ṇaḥ puraetéva paśya
6.047.07b     prá no naya prataráṃ vásyo ácha
6.047.07c     bhávā supāró atipārayó no
6.047.07d     bhávā súnītir utá vāmánītiḥ

6.047.08a     urúṃ no lokám ánu neṣi vidvā^́n
6.047.08b     súvarvaj jyótir ábhayaṃ suastí
6.047.08c     r̥ṣvā^́ ta indra sthávirasya bāhū^́
6.047.08d     úpa stheyāma śaraṇā^́ br̥hántā

6.047.09a     váriṣṭhe na indara⁺ vandhúre dhā
6.047.09b     váhiṣṭhayoḥ śatāvan áśvayor ā^́
6.047.09c     íṣam ā^́ vakṣi iṣã^́ṃ várṣiṣṭhām
6.047.09d     mā^́ nas tārīn maghavan rā^́yo aryáḥ

6.047.10a     índra mr̥̄ḷá⁺ máhya° jīvā^́tum icha
6.047.10b     codáya dhíyam áyaso ná dhā^́rām
6.047.10c     yát kíṃ cāháṃ tvāyúr idáṃ vádāmi
6.047.10d     táj juṣasva kr̥dhí mā devávantam

6.047.11a     trātā^́ram índram avitā^́ram índraṃ
6.047.11b     háve-have suhávaṃ śū^́ram índram
6.047.11c     hváyāmi śakrám puruhūtám índraṃ
6.047.11d     suastí no maghávā dhātu índraḥ

6.047.12a     índraḥ sutrā^́mā suávām̐ ávobhiḥ
6.047.12b     sumr̥̄ḷīkó⁺ bhavatu viśvávedāḥ
6.047.12c     bā^́dhatāṃ dvéṣo ábhayaṃ kr̥ṇotu
6.047.12d     suvī^́riyasya pátayaḥ siyāma

6.047.13a     tásya vayáṃ sumataú yajñíyasya
6.047.13b     ápi bhadré saumanasé siyāma
6.047.13c     sá sutrā^́mā suávām̐ índro asmé
6.047.13d     ārā^́c cid dvéṣaḥ sanutár yuyotu

6.047.14a     áva tvé indra praváto ná ūrmír
6.047.14b     gíro bráhmāṇi niyúto dhavante
6.047.14c     urū^́ ná rā^́dhaḥ sávanā purū^́ṇi
6.047.14d     apó gā^́ vajrin yuvase sám índūn

6.047.15a     ká īṃ stavat káḥ pr̥ṇāt kó yajāte
6.047.15b     yád ugrám ín maghávā viśváhā^́vet
6.047.15c     pā^́dāv iva prahárann anyám-anyaṃ
6.047.15d     kr̥ṇóti pū^́rvam áparaṃ śácībhiḥ

6.047.16a     śr̥ṇvé vīrá ugrám-ugraṃ damāyánn
6.047.16b     anyám-anyam atinenīyámānaḥ
6.047.16c     edhamānadvíḷ ubháyasya rā^́jā
6.047.16d     coṣkūyáte víśa índro manuṣyā^̀n

6.047.17a     párā pū^́rveṣāṃ sakhiyā^́ vr̥ṇakti
6.047.17b     vitárturāṇo áparebhir eti
6.047.17c     ánānubhūtīr avadhūnuvānáḥ
6.047.17d     pūrvī^́r índraḥ śarádas tartarīti

6.047.18a     rūpáṃ-rūpam prátirūpo babhūva
6.047.18b     tád asya rūpám praticákṣaṇāya
6.047.18c     índro māyā^́bhiḥ pururū^́pa īyate
6.047.18d     yuktā^́ hí asya hárayaḥ śatā^́ dáśa

6.047.19a     yujānó harítā ráthe
6.047.19b     bhū^́ri tváṣṭehá rājati
6.047.19c     kó viśvā^́hā dviṣatáḥ pákṣa āsata
6.047.19d     utā^́sīneṣu sūríṣu

6.047.20a     agavyūtí kṣétram ā^́ganma devā
6.047.20b     urvī^́ satī^́ bhū^́mir aṃhūraṇā^́bhūt
6.047.20c     bŕ̥haspate prá cikitsā gáviṣṭāv
6.047.20d     itthā^́ saté jaritrá indra pánthām

6.047.21a     divé-dive sadŕ̥śīr anyám árdhaṃ
6.047.21b     kr̥ṣṇā^́ asedhad ápa sádmano jā^́ḥ
6.047.21c     áhan dāsā^́ vr̥ṣabhó vasnayánta
6.047.21d     udávraje varcínaṃ śámbaraṃ ca

6.047.22a     prastoká ín nú rā^́dhasas ta indra
6.047.22b     dáśa kóśayīr dáśa vājíno 'dāt
6.047.22c     dívodāsād atithigvásya rā^́dhaḥ
6.047.22d     śāmbaráṃ vásu práti agrabhīṣma

6.047.23a     dáśa áśvān dáśa kóśān
6.047.23b     dáśa vástrā^́dhibhojanā
6.047.23c     dáśo hiraṇyapiṇḍā^́n
6.047.23d     dívodāsād asāniṣam

6.047.24a     dáśa ráthān práṣṭimataḥ
6.047.24b     śatáṃ gã^́ átharvabhyaḥ
6.047.24c     aśvatháḥ pāyáve adāt

6.047.25a     máhi rā^́dho viśvájanyaṃ dádhānān
6.047.25b     bharádvājān sārñjayó abhy àyaṣṭa

6.047.26a     vánaspate vīḍúaṅgo hí bhūyā^́
6.047.26b     asmátsakhā pratáraṇaḥ suvī^́raḥ
6.047.26c     góbhiḥ sáṃnaddho asi vīḷáyasva
6.047.26d     āsthātā^́ te jayatu jétuvāni

6.047.27a     divás pr̥thivyā^́ḥ pári ója údbhr̥taṃ
6.047.27b     vánaspátibhyaḥ pári ā^́bhr̥taṃ sáhaḥ
6.047.27c     apā^́m ojmā^́nam pári góbhir ā^́vr̥tam
6.047.27d     índrasya vájraṃ havíṣā ráthaṃ yaja

6.047.28a     índrasya vájro marútām ánīkam
6.047.28b     mitrásya gárbho váruṇasya nā^́bhiḥ
6.047.28c     sá imā^́ṃ no havyádātiṃ juṣāṇó
6.047.28d     déva ratha práti havyā^́ gr̥bhāya

6.047.29a     úpa śvāsaya pr̥thivī^́m utá dyā^́m
6.047.29b     purutrā^́ te manutāṃ víṣṭhitaṃ jágat
6.047.29c     sá dundubhe sajū^́r índreṇa devaír
6.047.29d     dūrā^́d dávīyo ápa sedha śátrūn

6.047.30a     ā^́ krandaya bálam ójo na ā^́ dhā
6.047.30b     ní ṣṭanihi duritā^́ bā^́dhamānaḥ
6.047.30c     ápa protha dundubhe duchúnā itá
6.047.30d     índrasya muṣṭír asi vīḷáyasva

6.047.31a     ā^́mū^́r aja pratiā^́vartayemā^́ḥ
6.047.31b     ketumád · dundubhír vāvadīti
6.047.31c     sám áśvaparṇāś cáranti no náro
6.047.31d     asmā^́kam indra rathíno jayantu

48

6.048.01a     yajñā^́-yajñā vo agnáye
6.048.01b     girā^́-girā ca dákṣase
6.048.01c     prá-pra vayám amŕ̥taṃ jātávedasam
6.048.01d     priyám mitráṃ ná śaṃsiṣam

6.048.02a     ūrjó nápātaṃ sá hinā^́yám asmayúr
6.048.02b     dā^́śema havyádātaye
6.048.02c     bhúvad vā^́jeṣu
6.048.02d     bhúvad vr̥dhá utá trātā^́ tanū^́nãm

6.048.03a     vŕ̥ṣā hí agne ajáro
6.048.03b     mahā^́n vibhā^́si arcíṣā
6.048.03c     ájasreṇa śocíṣā śóśucac chuce
6.048.03d     sudītíbhiḥ sú dīdihi

6.048.04a     mahó devā^́n yájasi yákṣi ānuṣák
6.048.04b     táva krátvotá daṃsánā
6.048.04c     arvā^́caḥ sīṃ kr̥ṇuhi agne ávase
6.048.04d     rā^́sva vā^́jotá vaṃsuva

6.048.05a     yám ā^́po ádrayo vánā
6.048.05b     gárbham r̥tásya píprati
6.048.05c     sáhasā yó mathitó jā^́yate nŕ̥bhiḥ
6.048.05d     pr̥thivyā^́ ádhi sā^́navi

6.048.06a     ā^́ yáḥ papraú bhānúnā ródasī ubhé
6.048.06b     dhūména dhāvate diví
6.048.06c     tirás támo dadr̥śa ū^́rmiyāsu ā^́
6.048.06d     śyāvā^́su aruṣó vŕ̥ṣā
6.048.06e     ā^́ śyāvā^́ aruṣó vŕ̥ṣā

6.048.07a     br̥hádbhir agne arcíbhiḥ
6.048.07b     śukréṇa deva śocíṣā
6.048.07c     bharádvāje samidhānó yaviṣṭhiya
6.048.07d     reván naḥ śukra dīdihi
6.048.07e     dyumát pavāka⁺ dīdihi

6.048.08a     víśvāsãṃ gr̥hápatir viśā^́m asi
6.048.08b     tvám agne mā^́nuṣīṇãm
6.048.08c     śatám pūrbhír yaviṣṭha pāhi áṃhasaḥ
6.048.08d     sameddhā^́raṃ śatáṃ hímā
6.048.08e     stotŕ̥bhyo yé ca dádati

6.048.09a     tuváṃ naś citrá ūtiyā^́
6.048.09b     váso rā^́dhāṃsi codaya
6.048.09c     asyá rāyás tuvám agne rathī^́r asi
6.048.09d     vidā^́ gādháṃ tucé tú naḥ

6.048.10a     párṣi tokáṃ tánayam partŕ̥bhiṣ ṭuvám
6.048.10b     ádabdhair áprayutvabhiḥ
6.048.10c     ágne héḷāṃsi daíviyā yuyodhi no
6.048.10d     ádevāni hvárāṃsi ca

6.048.11a     ā^́ sakhāyaḥ sabardúghāṃ
6.048.11b     dhenúm ajadhvam úpa návyasā vácaḥ
6.048.11c     sr̥jádhvam ánapasphurām

6.048.12a     yā^́ śárdhāya mā^́rutāya svábhānave
6.048.12b     śrávo ámr̥tyu dhúkṣata
6.048.12c     yā^́ mr̥̄ḷīké⁺ marútãṃ turā^́ṇãṃ
6.048.12d     yā^́ sumnaír evayā^́varī

6.048.13a     bharádvājāya áva dhukṣata dvitā^́
6.048.13b     dhenúṃ ca viśvádohasam
6.048.13c     íṣaṃ ca viśvábhojasam

6.048.14a     táṃ va índraṃ ná sukrátuṃ
6.048.14b     váruṇam iva māyínam
6.048.14c     aryamáṇaṃ ná mandráṃ sr̥prábhojasaṃ
6.048.14d     víṣṇuṃ ná stuṣa ādíśe

6.048.15a     tveṣáṃ śárdho ná mā^́rutaṃ tuviṣváṇi
6.048.15b     anarvā^́ṇam pūṣáṇaṃ sáṃ yáthā śatā^́
6.048.15c     sáṃ sahásrā kā^́riṣac carṣaṇíbhya ā^́m̐
6.048.15d     āvír gūḷhā^́ vásū karat
6.048.15e     suvédā no vásū karat

6.048.16a     ā^́ mā pūṣann úpa drava
6.048.16b     śáṃsiṣaṃ nú te apikarṇá āghr̥ṇe
6.048.16c     aghā^́ aryó árātayaḥ

6.048.17a     mā^́ kākambī^́ram úd vr̥ho vánaspátim
6.048.17b     áśastīr ví hí nī^́naśaḥ
6.048.17c     mā^́ utá sū^́ro áha evā^́ caná
6.048.17d     grīvā^́ ādádhate vẽ^́ḥ

6.048.18a     dŕ̥ter 'va° te avr̥kám astu sakhyám
6.048.18b     áchidrasya dadhanvátaḥ
6.048.18c     súpūrṇasya dadhanvátaḥ

6.048.19a     paró hí mártiyair ási
6.048.19b     samó devaír utá śriyā^́
6.048.19c     abhí khyaḥ pūṣan pŕ̥tanāsu nas tuvám
6.048.19d     ávā nūnáṃ yáthā purā^́

6.048.20a     vāmī^́ vāmásya dhūtayaḥ
6.048.20b     práṇītir astu sūnŕ̥tā
6.048.20c     devásya vā maruto mártiyasya vā
6.048.20d     ījānásya prayajyavaḥ

6.048.21a     sadyáś cid yásya carkr̥tíḥ
6.048.21b     pári dyã^́ṃ devó ná éti sū^́riyaḥ
6.048.21c     tveṣáṃ śávo dadhire nā^́ma yajñíyam
6.048.21d     marúto vr̥traháṃ śávo
6.048.21e     jyáyiṣṭhaṃ⁺ vr̥traháṃ śávaḥ

6.048.22a     sakŕ̥d dha dyaúr ajāyata
6.048.22b     sakŕ̥d bhū^́mir ajāyata
6.048.22c     pŕ̥śnyā dugdháṃ sakŕ̥t páyas
6.048.22d     tád anyó nā^́nu jāyate

49

6.049.01a     stuṣé jánaṃ suvratáṃ návyasībhir
6.049.01b     gīrbhír mitrā^́váruṇā sumnayántā
6.049.01c     tá ā^́ gamantu tá ihá śruvantu
6.049.01d     sukṣatrā^́so váruṇo mitró agníḥ

6.049.02a     viśó-viśa ī^́ḍiyam adhvaréṣu
6.049.02b     ádr̥ptakratum aratíṃ yuvatyóḥ
6.049.02c     diváḥ śíśuṃ sáhasaḥ sūnúm agníṃ
6.049.02d     yajñásya ketúm aruṣáṃ yájadhyai

6.049.03a     aruṣásya duhitárā vírūpe
6.049.03b     stŕ̥bhir anyā^́ pipiśé sū^́ro anyā^́
6.049.03c     mithastúrā vicárantī pavāké⁺
6.049.03d     mánma śrutáṃ nakṣata r̥cyámāne

6.049.04a     prá vāyúm áchā br̥hatī^́ manīṣā^́
6.049.04b     br̥hádrayiṃ viśvávāraṃ rathaprā^́m
6.049.04c     dyutádyāmā niyútaḥ pátyamānaḥ
6.049.04d     kavíḥ kavím iyakṣasi prayajyo

6.049.05a     sá me vápuś chadayad aśvínor yó
6.049.05b     rátho virúkmān mánasā yujānáḥ
6.049.05c     yéna narā nāsatiyeṣayádhyai
6.049.05d     vartír yāthás tánayāya tmáne ca

6.049.06a     párjanyavātā vr̥ṣabhā pr̥thivyā^́ḥ
6.049.06b     púrīṣāṇi jinvatam ápiyāni
6.049.06c     sátyaśrutaḥ kavayo yásya gīrbhír
6.049.06d     jágata sthātar jágad ā^́ kr̥ṇudhvam

6.049.07a     pā^́vīravī kaníyā citráāyuḥ
6.049.07b     sárasvatī vīrápatnī dhíyaṃ dhāt
6.049.07c     gnā^́bhir áchidraṃ śaraṇáṃ sajóṣā
6.049.07d     durādhárṣaṃ gr̥ṇaté śárma yaṃsat

6.049.08a     pathás-pathaḥ páripatiṃ vacasyā^́
6.049.08b     kā^́mena kr̥tó abhí ānaḷ arkám
6.049.08c     sá no rāsac churúdhaś candráagrā
6.049.08d     dhíyaṃ-dhiyaṃ sīṣadhāti prá pūṣā^́

6.049.09a     prathamabhā^́jaṃ yaśásaṃ vayodhā^́ṃ
6.049.09b     supāṇíṃ deváṃ sugábhastim ŕ̥bhvam
6.049.09c     hótā yakṣad yajatám pastíyānām
6.049.09d     agnís tváṣṭāraṃ suhávaṃ vibhā^́vā

6.049.10a     bhúvanasya pitáraṃ gīrbhír ābhī^́
6.049.10b     rudráṃ dívā vardháyā rudrám aktaú
6.049.10c     br̥hántam r̥ṣvám ajáraṃ suṣumnám
6.049.10d     ŕ̥dhag ghuvema kavíneṣitā^́saḥ

6.049.11a     ā^́ yuvānaḥ kavayo yajñiyāso
6.049.11b     máruto gantá gr̥ṇató varasyā^́m
6.049.11c     acitráṃ cid dhí jínvathā vr̥dhánta
6.049.11d     itthā^́ nákṣanto naro aṅgirasvát

6.049.12a     prá vīrā^́ya prá taváse turā^́ya
6.049.12b     ájā yūthéva paśurákṣir ástam
6.049.12c     sá pispr̥śati tanúvi śrutásya
6.049.12d     stŕ̥bhir ná nā^́kaṃ vacanásya vípaḥ

6.049.13a     yó rájāṃsi vimamé pā^́rthivāni
6.049.13b     tríś cid víṣṇur mánave bādhitā^́ya
6.049.13c     tásya te śármann upadadyámāne
6.049.13d     rāyā^́ madema tanúvā tánā ca

6.049.14a     tán no áhir budhníyo adbhír arkaís
6.049.14b     tát párvatas tát savitā^́ cáno dhāt
6.049.14c     tád óṣadhībhir abhí rātiṣā^́co
6.049.14d     bhágaḥ púraṃdhir jinvatu prá rāyé

6.049.15a     nú no rayíṃ rathíyaṃ carṣaṇiprā^́m
6.049.15b     puruvī^́ram mahá r̥tásya gopā^́m
6.049.15c     kṣáyaṃ dāta ajáraṃ yéna jánān
6.049.15d     spŕ̥dho ádevīr abhí ca krámāma†
6.049.15e     víśa ā^́devīr abhí aśnávāma

50

6.050.01a     huvé vo devī^́m áditiṃ námobhir
6.050.01b     mr̥̄ḷīkā^́ya⁺ váruṇam mitrám agním
6.050.01c     abhikṣadā^́m aryamáṇaṃ suśévaṃ
6.050.01d     trātr̥̄^́n devā^́n savitā^́ram bhágaṃ ca

6.050.02a     sujyótiṣaḥ sūriya dákṣapitr̥̄n
6.050.02b     anāgāstvé sumaho vīhi devā^́n
6.050.02c     dvijánmāno yá r̥tasā^́paḥ satyā^́ḥ
6.050.02d     súvarvanto yajatā^́ agnijihvā^́ḥ

6.050.03a     utá dyāvāpr̥thivī kṣatrám urú
6.050.03b     br̥hád rodasī śaraṇáṃ suṣumne
6.050.03c     mahás karatho várivo yáthā no
6.050.03d     asmé kṣáyāya dhiṣaṇe aneháḥ

6.050.04a     ā^́ no rudrásya sūnávo namantām
6.050.04b     adyā^́ hūtā^́so vásavo ádhr̥ṣṭāḥ
6.050.04c     yád īm árbhe mahatí vā hitā^́so
6.050.04d     bādhé marúto áhuvāma devā^́n

6.050.05a     mimyákṣa yéṣu rodasī^́ nú devī^́
6.050.05b     síṣakti pūṣā^́ abhiardhayájvā
6.050.05c     śrutvā^́ hávam maruto yád dha yāthá
6.050.05d     bhū^́mā rejante ádhvani právikte

6.050.06a     abhí tyáṃ vīráṃ gírvaṇasam arca
6.050.06b     índram bráhmaṇā jaritar návena
6.050.06c     śrávad íd dhávam úpa ca stávāno
6.050.06d     rā^́sad vā^́jām̐ úpa mahó gr̥ṇānáḥ

6.050.07a     omā^́nam āpo mānuṣīr ámr̥ktaṃ
6.050.07b     dhā^́ta tokā^́ya tánayāya śáṃ yóḥ
6.050.07c     yūyáṃ hí ṣṭhā^́ bhiṣájo mātŕ̥tamā
6.050.07d     víśvasya sthātúr jágato jánitrīḥ

6.050.08a     ā^́ no deváḥ savitā^́ trā^́yamāṇo
6.050.08b     híraṇyapāṇir yajató jagamyāt
6.050.08c     yó dátravām̐ uṣáso ná prátīkaṃ
6.050.08d     viūrṇuté dāśúṣe vā^́riyāṇi

6.050.09a     utá tváṃ sūno sahaso no adyá
6.050.09b     ā^́ devā^́m̐ asmín adhvaré vavr̥tyāḥ
6.050.09c     siyā^́m aháṃ te sádam íd rātaú
6.050.09d     táva syām agne ávasā suvī^́raḥ

6.050.10a     utá tyā^́ me hávam ā^́ jagmiyātaṃ
6.050.10b     nā^́satyā dhībhír yuvám aṅgá viprā
6.050.10c     átriṃ ná mahás támaso 'mumuktaṃ
6.050.10d     tū^́rvataṃ narā duritā^́d abhī^́ke

6.050.11a     té no rāyó dyumáto vā^́javato
6.050.11b     dātā^́ro bhūta nr̥vátaḥ purukṣóḥ
6.050.11c     daśasyánto diviyā^́ḥ pā^́rthivāso
6.050.11d     gójātā ápyā mr̥̄ḷátā⁺ ca devāḥ

6.050.12a     té no rudráḥ sárasvatī sajóṣā
6.050.12b     mīḷhúṣmanto víṣṇur mr̥̄ḷantu⁺ vāyúḥ
6.050.12c     r̥bhukṣā^́ vā^́jo daíviyo vidhātā^́
6.050.12d     parjányāvā^́tā pipyatām íṣaṃ naḥ

6.050.13a     utá syá deváḥ savitā^́ bhágo no
6.050.13b     apā^́ṃ nápād avatu dā^́nu pápriḥ
6.050.13c     tváṣṭā devébhir jánibhiḥ sajóṣā
6.050.13d     diyaúr devébhiḥ pr̥thivī^́ samudraíḥ

6.050.14a     utá no áhir budhníyaḥ śr̥ṇotu
6.050.14b     ajá ékapāt pr̥thivī^́ samudráḥ
6.050.14c     víśve devā^́ r̥tāvŕ̥dho huvānā^́
6.050.14d     stutā^́ mántrāḥ kaviśastā^́ avantu

6.050.15a     evā^́ nápāto máma tásya dhībhír
6.050.15b     bharádvājā abhí arcanti arkaíḥ
6.050.15c     gnã^́ hutā^́so vásavo ádhr̥ṣṭā
6.050.15d     víśve stutā^́so bhũtā yajatrāḥ

51

6.051.01a     úd u tyác cákṣur máhi mitráyor ā^́m̐
6.051.01b     éti priyáṃ váruṇayor ádabdham
6.051.01c     r̥tásya śúci darśatám ánīkaṃ
6.051.01d     rukmó ná divá úditā ví adyaut

6.051.02a     véda yás trī^́ṇi vidáthāni eṣāṃ
6.051.02b     devā^́nāṃ jánma sanutár ā^́ ca vípraḥ
6.051.02c     r̥jú márteṣu vr̥jinā^́ ca páśyann
6.051.02d     abhí caṣṭe · sū^́ro aryá évān

6.051.03a     stuṣá u vo mahá r̥tásya gopā^́n
6.051.03b     áditim mitráṃ váruṇaṃ sujātā^́n
6.051.03c     aryamáṇam bhágam ádabdhadhītīn
6.051.03d     áchā voce sadhaníyaḥ pavākā^́n⁺

6.051.04a     riśā^́dasaḥ · sátpatīm̐r ádabdhān
6.051.04b     mahó rā^́jñaḥ suvasanásya dātr̥̄^́n
6.051.04c     yū^́naḥ sukṣatrā^́n kṣáyato divó nr̥̄^́n
6.051.04d     ādityā^́n yāmi áditiṃ duvoyú

6.051.05a     díyauṣ pítaḥ pŕ̥thivi mā^́tar ádhrug
6.051.05b     ágne bhrātar vasavo mr̥̄ḷátā⁺ naḥ
6.051.05c     víśva ādityā adite sajóṣā
6.051.05d     asmábhyaṃ śárma bahuláṃ ví yanta

6.051.06a     mā^́ no vŕ̥kāya vr̥kíye samasmā
6.051.06b     aghāyaté rīradhatā yajatrāḥ
6.051.06c     yūyáṃ hí ṣṭhā^́ rathíyo nas tanū^́nāṃ
6.051.06d     yūyáṃ dákṣasya vácaso babhūvá

6.051.07a     mā^́ va éno anyákr̥tam bhujema
6.051.07b     mā^́ tát karma vasavo yác cáyadhve
6.051.07c     víśvasya hí kṣáyatha viśvadevāḥ
6.051.07d     svayáṃ ripús tanúvaṃ rīriṣīṣṭa

6.051.08a     náma íd ugráṃ náma ā^́ vivāse
6.051.08b     námo dādhāra pr̥thivī^́m utá dyā^́m
6.051.08c     námo devébhyo náma īśa eṣāṃ
6.051.08d     kr̥táṃ cid éno námasā^́ vivāse

6.051.09a     r̥tásya vo rathíyaḥ pūtádakṣān
6.051.09b     r̥tásya pastiyasádo ádabdhān
6.051.09c     tā^́m̐ ā^́ námobhir urucákṣaso nr̥̄^́n
6.051.09d     víśvān va ā^́ name mahó yajatrāḥ

6.051.10a     té hí śráyiṣṭhavarcasas⁺ tá u nas
6.051.10b     tiró víśvāni duritā^́ náyanti
6.051.10c     sukṣatrā^́so váruṇo mitró agnír
6.051.10d     r̥tádhītayo vakmarā^́jasatyāḥ

6.051.11a     té na índraḥ pr̥thivī^́ kṣā^́ma vardhan
6.051.11b     pūṣā^́ bhágo áditiḥ páñca jánāḥ
6.051.11c     suśármāṇaḥ suávasaḥ sunīthā^́
6.051.11d     bhávantu naḥ sutrātrā^́saḥ sugopā^́ḥ

6.051.12a     nū^́ sadmā^́naṃ diviyáṃ náṃśi devā
6.051.12b     bhā^́radvājaḥ sumatíṃ yāti hótā
6.051.12c     āsānébhir yájamāno miyédhair
6.051.12d     devā^́nāṃ jánma vasūyúr vavanda

6.051.13a     ápa tyáṃ vr̥jináṃ ripúṃ
6.051.13b     stenám agne durādhíyam
6.051.13c     daviṣṭhám asya satpate kr̥dhī^́ sugám

6.051.14a     grā^́vāṇaḥ soma no hí kaṃ
6.051.14b     sakhitvanā^́ya vāvaśúḥ
6.051.14c     jahī^́ ní atríṇam paṇíṃ vŕ̥ko hí ṣáḥ

6.051.15a     yūyáṃ hí ṣṭhā^́ sudānava
6.051.15b     índrajyeṣṭhā abhídyavaḥ
6.051.15c     kártā no ádhvann ā^́ sugáṃ gopā^́ amā^́

6.051.16a     ápi pánthām aganmahi
6.051.16b     suastigā^́m anehásam
6.051.16c     yéna víśvāḥ pári dvíṣo
6.051.16d     vr̥ṇákti vindáte vásu

52

6.052.01a     ná tád divā^́ ná pr̥thivyā^́nu manye
6.052.01b     ná yajñéna nótá śámībhir ābhíḥ
6.052.01c     ubjántu táṃ subhúvaḥ párvatāso
6.052.01d     ní hīyatām atiyājásya yaṣṭā^́

6.052.02a     áti vā yó maruto mányate no
6.052.02b     bráhma vā yáḥ kriyámāṇaṃ nínitsāt
6.052.02c     tápūṃṣi tásmai vr̥jinā^́ni santu
6.052.02d     brahmadvíṣam abhí táṃ śocatu dyaúḥ

6.052.03a     kím aṅgá tvā bráhmaṇaḥ soma gopā^́ṃ
6.052.03b     kím aṅgá tvāhur abhiśastipā^́ṃ naḥ
6.052.03c     kím aṅgá naḥ paśyasi nidyámānān
6.052.03d     brahmadvíṣe tápuṣiṃ hetím asya

6.052.04a     ávantu mā^́m uṣáso jā^́yamānā
6.052.04b     ávantu mā síndhavaḥ pínvamānāḥ
6.052.04c     ávantu mā párvatāso dhruvā^́so
6.052.04d     ávantu mā pitáro deváhūtau

6.052.05a     viśvadā^́nīṃ sumánasaḥ siyāma
6.052.05b     páśyema nú sū^́riyam uccárantam
6.052.05c     táthā karad vásupatir vásūnāṃ
6.052.05d     devā^́m̐ óhāno ávasā^́gamiṣṭhaḥ

6.052.06a     índro nédiṣṭham ávasā^́gamiṣṭhaḥ
6.052.06b     sárasvatī síndhubhiḥ pínvamānā
6.052.06c     parjányo na óṣadhībhir mayobhúr
6.052.06d     agníḥ suśáṃsaḥ suhávaḥ pitéva

6.052.07a     víśve devāsa ā^́ gata
6.052.07b     śr̥ṇutā^́ ma imáṃ hávam
6.052.07c     édám barhír ní ṣīdata

6.052.08a     yó vo devā ghr̥tásnunā
6.052.08b     havyéna pratibhū^́ṣati
6.052.08c     táṃ víśva úpa gachatha

6.052.09a     úpa naḥ sūnávo gíraḥ
6.052.09b     śr̥ṇvántu amŕ̥tasya yé
6.052.09c     sumr̥̄ḷīkā^́+ bhavantu naḥ

6.052.10a     víśve devā^́ r̥tāvŕ̥dha
6.052.10b     r̥túbhir havanaśrútaḥ
6.052.10c     juṣántāṃ yújiyam páyaḥ

6.052.11a     stotrám índro marúdgaṇas
6.052.11b     tváṣṭr̥mān mitró aryamā^́
6.052.11c     imā^́ havyā^́ juṣanta naḥ

6.052.12a     imáṃ no agne adhvaráṃ
6.052.12b     hótar vayunaśó yaja
6.052.12c     cikitvā^́n daíviyaṃ jánam

6.052.13a     víśve devāḥ śr̥ṇutémáṃ hávam me
6.052.13b     yé antárikṣe yá úpa dyávi ṣṭhá
6.052.13c     yé agnijihvā^́ utá vā yájatrā
6.052.13d     āsádyāsmín barhíṣi mādayadhvam

6.052.14a     víśve devā^́ máma śr̥ṇvantu yajñíyā
6.052.14b     ubhé ródasī apā^́ṃ nápāc ca mánma
6.052.14c     mā^́ vo vácāṃsi paricákṣyāṇi vocaṃ
6.052.14d     sumnéṣu íd vo ántamā madema

6.052.15a     yé ké ca jmā^́ mahíno áhimāyā
6.052.15b     divó jajñiré apã^́ṃ sadhásthe
6.052.15c     té asmábhyam iṣáye víśvam ā^́yuḥ
6.052.15d     kṣápa usrā^́ varivasyantu devā^́ḥ

6.052.16a     ágnīparjanyāv ávataṃ dhíyam me
6.052.16b     asmín háve suhavā suṣṭutíṃ naḥ
6.052.16c     íḷām anyó janáyad gárbham anyáḥ
6.052.16d     prajā^́vatīr íṣa ā^́ dhattam asmé

6.052.17a     stīrṇé barhíṣi samidhāné agnaú
6.052.17b     sūkténa mahā^́ námasā^́ vivāse
6.052.17c     asmín no adyá vidáthe yajatrā
6.052.17d     víśve devā havíṣi mādayadhvam

53

6.053.01a     vayám u tvā pathas pate
6.053.01b     ráthaṃ ná vā^́jasātaye
6.053.01c     dhiyé pūṣann ayujmahi

6.053.02a     abhí no náriyaṃ vásu
6.053.02b     vīrám práyatadakṣiṇam
6.053.02c     vāmáṃ gr̥hápatiṃ naya

6.053.03a     áditsantaṃ cid āghr̥ṇe
6.053.03b     pū^́ṣan dā^́nāya codaya
6.053.03c     paṇéś cid ví mradā mánaḥ

6.053.04a     ví pathó vā^́jasātaye
6.053.04b     cinuhí ví mŕ̥dho jahi
6.053.04c     sā^́dhantām ugra no dhíyaḥ

6.053.05a     pári tr̥ndhi paṇīnã^́m
6.053.05b     ā^́rayā hŕ̥dayā kave
6.053.05c     áthem asmábhya° randhaya

6.053.06a     ví pūṣann ā^́rayā tuda
6.053.06b     paṇér icha hr̥dí priyám
6.053.06c     áthem asmábhya° randhaya

6.053.07a     ā^́ rikha kikirā^́ kr̥ṇu
6.053.07b     paṇīnā^́ṃ hŕ̥dayā kave
6.053.07c     áthem asmábhyaṃ randhaya

6.053.08a     yā^́m pūṣan brahmacódanīm
6.053.08b     ā^́rām bíbharṣi āghr̥ṇe
6.053.08c     táyā samasya hŕ̥dayam
6.053.08d     ā^́ rikha kikirā^́ kr̥ṇu

6.053.09a     yā^́ te áṣṭrā góopaśā
6.053.09b     ā^́ghr̥ṇe paśusā^́dhanī
6.053.09c     tásyās te sumnám īmahe

6.053.10a     utá no goṣáṇiṃ dhíyam
6.053.10b     aśvasā^́ṃ vājasā^́m utá
6.053.10c     nr̥vát kr̥ṇuhi vītáye

54

6.054.01a     sám pūṣan vidúṣā naya
6.054.01b     yó áñjasānuśā^́sati
6.054.01c     yá evédám íti brávat

6.054.02a     sám u pūṣṇā^́ gamemahi
6.054.02b     yó gr̥hā^́m̐ abhiśā^́sati
6.054.02c     imá evéti ca brávat

6.054.03a     pūṣṇáś cakráṃ ná riṣyati
6.054.03b     ná kóśo áva padyate
6.054.03c     nó asya vyathate pavíḥ

6.054.04a     yó asmai havíṣā^́vidhan
6.054.04b     ná tám pūṣā^́pi mr̥ṣyate
6.054.04c     prathamó vindate vásu

6.054.05a     pūṣā^́ gā^́ ánu etu naḥ
6.054.05b     pūṣā^́ rakṣatu árvataḥ
6.054.05c     pūṣā^́ vā^́jaṃ sanotu naḥ

6.054.06a     pū^́ṣann ánu prá gā^́ ihi
6.054.06b     yájamānasya sunvatáḥ
6.054.06c     asmā^́kaṃ stuvatā^́m utá

6.054.07a     mā^́kir neśan mā^́kīṃ riṣan
6.054.07b     mā^́kīṃ sáṃ śāri kévaṭe
6.054.07c     áthā^́riṣṭābhir ā^́ gahi

6.054.08a     śr̥ṇvántam pūṣáṇaṃ vayám
6.054.08b     íryam ánaṣṭavedasam
6.054.08c     ī^́śānaṃ rāyá īmahe

6.054.09a     pū^́ṣan táva vraté vayáṃ
6.054.09b     ná riṣyema kádā caná
6.054.09c     stotā^́ras ta ihá smasi

6.054.10a     pári pūṣā^́ parástãd
6.054.10b     dhástaṃ dadhātu dákṣiṇam
6.054.10c     púnar no naṣṭám ā^́jatu

55

6.055.01a     éhi vā^́ṃ vimuco napād
6.055.01b     ā^́ghr̥ṇe sáṃ sacāvahai
6.055.01c     rathī^́r r̥tásya no bhava

6.055.02a     rathī^́tamaṃ kapardínam
6.055.02b     ī^́śānaṃ rā^́dhaso maháḥ
6.055.02c     rāyáḥ sákhāyam īmahe

6.055.03a     rāyó dhā^́rāsi āghr̥ṇe
6.055.03b     váso rāśír ajāśuva
6.055.03c     dhī^́vato-dhīvataḥ sákhā

6.055.04a     pūṣáṇaṃ nú ajā^́śuvam
6.055.04b     úpa stoṣāma vājínam
6.055.04c     svásur yó jārá ucyáte

6.055.05a     mātúr didhiṣúm abravaṃ
6.055.05b     svásur jāráḥ śr̥ṇotu naḥ
6.055.05c     bhrā^́téndrasya sákhā máma

6.055.06a     ā^́jā^́saḥ pūṣáṇaṃ ráthe
6.055.06b     niśr̥mbhā^́s té janaśríyam
6.055.06c     deváṃ vahantu bíbhrataḥ

56

6.056.01a     yá enam ādídeśati
6.056.01b     karambhā^́d íti pūṣáṇam
6.056.01c     ná téna devá ādíśe

6.056.02a     utá ghā sá rathī^́tamaḥ
6.056.02b     sákhiyā sátpatir yujā^́
6.056.02c     índro vr̥trā^́ṇi jighnate

6.056.03a     utā^́dáḥ paruṣé gávi
6.056.03b     sū^́raś cakráṃ hiraṇyáyam
6.056.03c     ní airayad rathī^́tamaḥ

6.056.04a     yád adyá tvā puruṣṭuta
6.056.04b     brávāma dasra mantumaḥ
6.056.04c     tát sú no mánma sādhaya

6.056.05a     imáṃ ca no gavéṣaṇaṃ
6.056.05b     sātáye sīṣadho gaṇám
6.056.05c     ārā^́t pūṣann asi śrutáḥ

6.056.06a     ā^́ te suastím īmaha
6.056.06b     āréaghām úpāvasum
6.056.06c     adyā^́ ca sarvátātaye
6.056.06d     śuváś ca sarvátātaye

57

6.057.01a     índrā nú pūṣáṇā vayáṃ
6.057.01b     sakhiyā^́ya suastáye
6.057.01c     huvéma vā^́jasātaye

6.057.02a     sómam anyá úpāsadat
6.057.02b     pā^́tave camúvoḥ sutám
6.057.02c     karambhám anyá ichati

6.057.03a     ajā^́ anyásya váhnayo
6.057.03b     hárī anyásya sámbhr̥tā
6.057.03c     tā^́bhyāṃ vr̥trā^́ṇi jighnate

6.057.04a     yád índro ánayad ríto
6.057.04b     mahī^́r apó vŕ̥ṣantamaḥ
6.057.04c     tátra pūṣā^́bhavat sácā

6.057.05a     tā^́m pūṣṇáḥ sumatíṃ vayáṃ
6.057.05b     vr̥kṣásya prá vayā^́m iva
6.057.05c     índrasya cā^́ rabhāmahe

6.057.06a     út pūṣáṇaṃ yuvāmahe
6.057.06b     abhī^́śūm̐r iva sā^́rathiḥ
6.057.06c     mahyā^́ índraṃ suastáye

58

6.058.01a     śukráṃ te anyád yajatáṃ te anyád
6.058.01b     víṣurūpe áhanī dyaúr ivāsi
6.058.01c     víśvā hí māyā^́ ávasi svadhāvo
6.058.01d     bhadrā^́ te pūṣann ihá rātír astu

6.058.02a     ajā^́śuvaḥ paśupā^́ vā^́japastiyo
6.058.02b     dhiyaṃjinvó bhúvane víśve árpitaḥ
6.058.02c     áṣṭrām pūṣā^́ śithirā^́m udvárīvr̥jat
6.058.02d     saṃcákṣāṇo bhúvanā devá īyate

6.058.03a     yā^́s te pūṣan nā^́vo antáḥ samudré
6.058.03b     hiraṇyáyīr antárikṣe cáranti
6.058.03c     tā^́bhir yāsi dūtiyā^́ṃ sū^́riyasya
6.058.03d     kā^́mena kr̥ta śráva ichámānaḥ

6.058.04a     pūṣā^́ subándhur divá ā^́ pr̥thivyā^́
6.058.04b     iḷás pátir maghávā dasmávarcāḥ
6.058.04c     yáṃ devā^́so ádaduḥ sūriyā^́yai
6.058.04d     kā^́mena kr̥táṃ tavásaṃ suáñcam

59

6.059.01a     prá nú vocā sutéṣu vāṃ
6.059.01b     vīríyā yā^́ni cakráthuḥ
6.059.01c     hatā^́so vām pitáro deváśatrava
6.059.01d     índrāgnī jī^́vatho yuvám

6.059.02a     báḷ itthā^́ mahimā^́ vãm
6.059.02b     índraagnī pániṣṭha ā^́
6.059.02c     samānó vāṃ janitā^́ bhrā^́tarā yuváṃ
6.059.02d     yamā^́v ihéhamātarā

6.059.03a     okivā^́ṃsā suté sácām̐
6.059.03b     áśvā sáptī ivā^́dane
6.059.03c     índrā nú agnī^́ ávasehá vajríṇā
6.059.03d     vayáṃ devā^́ havāmahe

6.059.04a     yá indrāgnī sutéṣu vāṃ
6.059.04b     stávat téṣu r̥tāvr̥dhā
6.059.04c     joṣavākáṃ vádataḥ pajrahoṣiṇā
6.059.04d     ná devā bhasáthaś caná

6.059.05a     índraagnī kó asyá vāṃ
6.059.05b     dévau mártaś ciketati
6.059.05c     víṣūco áśvān yuyujāná īyata
6.059.05d     ékaḥ samāná ā^́ ráthe

6.059.06a     índraagnī apā^́d iyám
6.059.06b     pū^́rvā^́gāt padvátībhiyaḥ
6.059.06c     hitvī^́ śíro jihváyā vā^́vadac cárat
6.059.06d     triṃśát padā^́ ní akramīt

6.059.07a     índrāgnī ā^́ hí tanvaté
6.059.07b     náro dhánvāni bāhuvóḥ
6.059.07c     mā^́ no asmín mahādhané
6.059.07d     párā varktaṃ gáviṣṭiṣu

6.059.08a     índraagnī tápanti mā
6.059.08b     aghā^́ aryó árātayaḥ
6.059.08c     ápa dvéṣāṃsi ā^́ kr̥taṃ
6.059.08d     yuyutáṃ sū^́riyād ádhi

6.059.09a     índraagnī yuvór ápi
6.059.09b     vásu divyā^́ni pā^́rthivā
6.059.09c     ā^́ na ihá prá yachataṃ
6.059.09d     rayíṃ viśvā^́yupoṣasam

6.059.10a     índrāgnī ukthavāhasā
6.059.10b     stómebhir havanaśrutā
6.059.10c     víśvābhir gīrbhír ā^́ gatam
6.059.10d     asyá sómasya pītáye

60

6.060.01a     śnáthad vr̥trám utá sanoti vā^́jam
6.060.01b     índrā yó agnī^́ sáhurī saparyā^́t
6.060.01c     irajyántā vasavíyasya bhū^́reḥ
6.060.01d     sáhastamā sáhasā vājayántā

6.060.02a     tā^́ yodhiṣṭam abhí gā^́ indra nūnám
6.060.02b     apáḥ súvar uṣáso agna ūḷhā^́ḥ
6.060.02c     díśaḥ súvar uṣása indra citrā^́
6.060.02d     apó gā^́ agne yuvase niyútvān

6.060.03a     ā^́ vr̥trahaṇā vr̥trahábhiḥ śúṣmair
6.060.03b     índra yātáṃ námobhir agne arvā^́k
6.060.03c     yuváṃ rā^́dhobhir ákavebhir indra
6.060.03d     ágne asmé bhavatam uttamébhiḥ

6.060.04a     tā^́ huve yáyor idám
6.060.04b     papné víśvam purā^́ kr̥tám
6.060.04c     indraagnī^́ ná mardhataḥ

6.060.05a     ugrā^́ vighanínā mŕ̥dha
6.060.05b     indraagnī^́ havāmahe
6.060.05c     tā^́ no mr̥̄ḷāta⁺ īdŕ̥śe

6.060.06a     ható vr̥trā^́ṇi ā^́riyā
6.060.06b     ható dā^́sāni sátpatī
6.060.06c     ható víśvā ápa dvíṣaḥ

6.060.07a     índraagnī yuvā^́m imé
6.060.07b     abhí stómā anūṣata
6.060.07c     píbataṃ śambhuvā sutám

6.060.08a     yā^́ vāṃ sánti puruspŕ̥ho
6.060.08b     niyúto dāśúṣe narā
6.060.08c     índrāgnī tā^́bhir ā^́ gatam

6.060.09a     tā^́bhir ā^́ gachataṃ narā
6.060.09b     úpedáṃ sávanaṃ sutám
6.060.09c     índrāgnī sómapītaye

6.060.10a     tám īḷiṣva yó arcíṣā
6.060.10b     vánā víśvā pariṣvájat
6.060.10c     kr̥ṣṇā^́ kr̥ṇóti jihváyā

6.060.11a     yá iddhá āvívāsati
6.060.11b     sumnám índrasya mártiyaḥ
6.060.11c     dyumnā^́ya sutárā apáḥ

6.060.12a     tā^́ no vā^́javatīr íṣa
6.060.12b     āśū^́n pipr̥tam árvataḥ
6.060.12c     índram agníṃ ca vóḷhave

6.060.13a     ubhā^́ vām indraagnī āhuvádhyā
6.060.13b     ubhā^́ rā^́dhasaḥ sahá mādayádhyai
6.060.13c     ubhā^́ dātā^́rāv iṣã^́ṃ rayīṇā^́m
6.060.13d     ubhā^́ vā^́jasya sātáye huve vām

6.060.14a     ā^́ no gávyebhir áśviyair
6.060.14b     vasavyaìr úpa gachatam
6.060.14c     sákhāyau devaú sakhiyā^́ya śambhúvā
6.060.14d     indrāgnī^́ tā^́ havāmahe

6.060.15a     índrāgnī śr̥ṇutáṃ hávaṃ
6.060.15b     yájamānasya sunvatáḥ
6.060.15c     vītáṃ havyā^́ni ā^́ gatam
6.060.15d     píbataṃ somiyám mádhu

61

6.061.01a     iyám adadād rabhasám r̥ṇacyútaṃ
6.061.01b     dívodāsaṃ vadhriaśvā^́ya dāśúṣe
6.061.01c     yā^́ śáśvantam ācakhā^́dāvasám paṇíṃ
6.061.01d     tā^́ te dātrā^́ṇi taviṣā^́ sarasvati

6.061.02a     iyáṃ śúṣmebhir bisakhā^́ ivārujat
6.061.02b     sā^́nu girīṇā^́ṃ taviṣébhir ūrmíbhiḥ
6.061.02c     pārāvataghnī^́m ávase suvr̥ktíbhiḥ
6.061.02d     sárasvatīm ā^́ vivāsema dhītíbhiḥ

6.061.03a     sárasvati devanído ní barhaya
6.061.03b     prajā^́ṃ víśvasya bŕ̥sayasya māyínaḥ
6.061.03c     utá kṣitíbhyo avánīr avindo
6.061.03d     viṣám ebhyo asravo vājinīvati

6.061.04a     prá ṇo devī^́ sárasvatī
6.061.04b     vā^́jebhir vājínīvatī
6.061.04c     dhīnā^́m avitrí avatu

6.061.05a     yás tvā devi sarasvati
6.061.05b     upabrūté dháne hité
6.061.05c     índraṃ ná vr̥tratū^́riye

6.061.06a     tuváṃ devi sarasvati
6.061.06b     ávā vā^́jeṣu vājini
6.061.06c     rádā pūṣéva naḥ saním

6.061.07a     utá syā^́ naḥ sárasvatī
6.061.07b     ghorā^́ híraṇyavartaniḥ
6.061.07c     vr̥traghnī^́ vaṣṭi suṣṭutím

6.061.08a     yásyā anantó áhrutas
6.061.08b     tveṣáś cariṣṇúr arṇaváḥ
6.061.08c     ámaś cárati róruvat

6.061.09a     sā^́ no víśvā áti dvíṣaḥ
6.061.09b     svásr̥̄r anyā^́ r̥tā^́varī
6.061.09c     átann áheva sū^́riyaḥ

6.061.10a     utá naḥ priyā^́ priyā^́su
6.061.10b     saptásvasā sújuṣṭā
6.061.10c     sárasvatī stómiyā bhūt

6.061.11a     āpaprúṣī pā^́rthivāni
6.061.11b     urú rájo antárikṣam
6.061.11c     sárasvatī nidás pātu

6.061.12a     triṣadhásthā saptádhātuḥ
6.061.12b     páñca jātā^́ vardháyantī
6.061.12c     vā^́je-vāje háviyā bhūt

6.061.13a     prá yā^́ mahimnā^́ mahínāsu cékite
6.061.13b     dyumnébhir anyā^́ apásām apástamā
6.061.13c     rátha iva br̥hatī^́ vibhváne kr̥tā^́
6.061.13d     upastútyā cikitúṣā sárasvatī

6.061.14a     sárasvati abhí no neṣi vásyo
6.061.14b     mā^́pa spharīḥ páyasā mā^́ na ā^́ dhak
6.061.14c     juṣásva naḥ sakhiyā^́ veśíyā ca
6.061.14d     mā^́ tvát kṣétrāṇi áraṇāni ganma

62

6.062.01a     stuṣé nárā divó asyá prasántā
6.062.01b     aśvínā huve járamāṇo arkaíḥ
6.062.01c     yā^́ sadyá usrā^́ viúṣi jmó ántān
6.062.01d     yúyūṣataḥ pári urū^́ várāṃsi

6.062.02a     tā^́ yajñám ā^́ śúcibhiś cakramāṇā^́
6.062.02b     ráthasya bhānúṃ rurucū rájobhiḥ
6.062.02c     purū^́ várāṃsi ámitā mímānā
6.062.02d     apó dhánvāni áti yātho ájrān

6.062.03a     tā^́ ha tyád vartír yád áradhram ugrā
6.062.03b     itthā^́ dhíya ūhathuḥ śáśvad áśvaiḥ
6.062.03c     mánojavebhir iṣiraíḥ śayádhyai
6.062.03d     pári vyáthir dāśúṣo mártiyasya

6.062.04a     tā^́ návyaso járamāṇasya mánma
6.062.04b     úpa bhūṣato yuyujānásaptī
6.062.04c     śúbham pŕ̥kṣam íṣam ū^́rjaṃ váhantā
6.062.04d     hótā yakṣat pratnó adhrúg yúvānā

6.062.05a     tā^́ valgū^́ dasrā^́ puruśā^́katamā
6.062.05b     pratnā^́ návyasā vácasā^́ vivāse
6.062.05c     yā^́ śáṃsate stuvaté śámbhaviṣṭhā
6.062.05d     babhūvátur gr̥ṇaté citrárātī

6.062.06a     tā^́ bhujyúṃ víbhir adbhiyáḥ samudrā^́t
6.062.06b     túgrasya sūnúm ūhathū rájobhiḥ
6.062.06c     areṇúbhir yójanebhir bhujántā
6.062.06d     patatríbhir árṇaso nír upásthāt

6.062.07a     ví jayúṣā rathiyā yātam ádriṃ
6.062.07b     śrutáṃ hávaṃ vr̥ṣaṇā vadhrimatyā^́ḥ
6.062.07c     daśasyántā śayáve pipyathur gā^́m
6.062.07d     íti cyavānā sumatím bhuraṇyū

6.062.08a     yád rodasī pradívo ásti bhū^́mā
6.062.08b     héḷo devā^́nām utá martiyatrā^́
6.062.08c     tád ādityā vasavo rudriyāso
6.062.08d     rakṣoyúje tápur agháṃ dadhāta

6.062.09a     yá īṃ rā^́jānāv r̥tuthā^́ vidádhad
6.062.09b     rájaso mitró váruṇaś cíketat
6.062.09c     gambhīrā^́ya rákṣase hetím asya
6.062.09d     dróghāya cid vácasa ā^́navāya

6.062.10a     ántaraiś cakraís tánayāya vartír
6.062.10b     dyumátā^́ yātaṃ nr̥vátā ráthena
6.062.10c     sánutyena tyájasā mártiyasya
6.062.10d     vanuṣyatā^́m ápi śīrṣā^́ vavr̥ktam

6.062.11a     ā^́ paramā^́bhir utá madhyamā^́bhir
6.062.11b     niyúdbhir yātam avamā^́bhir arvā^́k
6.062.11c     dr̥̄ḷhásya⁺ cid gómato ví vrajásya
6.062.11d     dúro vartaṃ gr̥ṇaté citrarātī

63

6.063.01a     kúva tyā^́ valgū^́ puruhūtā^́ adyá
6.063.01b     dūtó ná stómo avidan námasvān
6.063.01c     ā^́ yó arvā^́ṅ nā^́satiyā vavárta
6.063.01d     práyiṣṭhā⁺ hí ásatho asya mánman

6.063.02a     áram me gantaṃ hávanāya asmaí
6.063.02b     gr̥ṇānā^́ yáthā píbātho ándhaḥ
6.063.02c     pári ha tyád · vartír yātho riṣó
6.063.02d     ná yát páro ná ántaras tuturyā^́t

6.063.03a     ákāri vām · ándhaso várīmann
6.063.03b     ástāri barhíḥ suprāyaṇátamam
6.063.03c     uttānáhasto yuvayúr vavanda
6.063.03d     ā^́ vāṃ nákṣanto ádraya ãñjan

6.063.04a     ūrdhvó vām agnír adhvaréṣu asthāt
6.063.04b     prá rātír eti jūrṇínī ghr̥tā^́cī
6.063.04c     prá hótā · gūrtámanā urāṇó
6.063.04d     áyukta yó nā^́satiyā hávīman

6.063.05a     ádhi śriyé duhitā^́ sū^́riyasya
6.063.05b     ráthaṃ tasthau purubhujā śatótim
6.063.05c     prá māyā^́bhir māyinā bhūtam átra
6.063.05d     nárā nr̥tū jániman yajñíyānām

6.063.06a     yuváṃ śrībhír · darśatā^́bhir ābhíḥ
6.063.06b     śubhé puṣṭím ūhathuḥ sūriyā^́yāḥ
6.063.06c     prá vāṃ váyo vápuṣe ánu paptan
6.063.06d     nákṣad vā^́ṇī súṣṭutā dhiṣṇiyā vām

6.063.07a     ā^́ vāṃ váyo · áśvāso váhiṣṭhā
6.063.07b     abhí práyo nāsatiyā vahantu
6.063.07c     prá vāṃ rátho mánojavā asarji
6.063.07d     iṣáḥ pr̥kṣá iṣídho ánu pūrvī^́ḥ

6.063.08a     purú hí vām purubhujā dayiṣṇáṃ⁺
6.063.08b     dhenúṃ na íṣam pinvatam ásakrām
6.063.08c     stútaś ca vām mādhuvī suṣṭutíś ca
6.063.08d     rásāś ca yé vām ánu rātím ágman

6.063.09a     utá ma r̥jré púrayasya raghvī^́
6.063.09b     sumīḷhé śatám peruké ca pakvā^́
6.063.09c     śāṇḍó dãd dhiraṇínaḥ smáddiṣṭīn
6.063.09d     dáśa vaśā^́so abhiṣā^́ca r̥ṣvā^́n

6.063.10a     sáṃ vāṃ śatā^́ nāsatiyā sahásrā
6.063.10b     áśvānãm purupánthā giré dāt
6.063.10c     bharádvājāya vīra nū^́ giré dād
6.063.10d     dhatā^́ rákṣāṃsi purudaṃsasā syuḥ

6.063.11     ā^́ vāṃ sumné váriman sūríbhiḥ ṣyām

64

6.064.01a     úd u śriyá uṣáso rócamānā
6.064.01b     ásthur apā^́ṃ ná ūrmáyo rúśantaḥ
6.064.01c     kr̥ṇóti víśvā supáthā sugā^́ni
6.064.01d     ábhūd u vásvī dákṣiṇā maghónī

6.064.02a     bhadrā^́ dadr̥kṣa urviyā^́ ví bhāsi
6.064.02b     út te śocír bhānávo dyā^́m apaptan
6.064.02c     āvír vákṣaḥ kr̥ṇuṣe śumbhámānā
6.064.02d     úṣo devi rócamānā máhobhiḥ

6.064.03a     váhanti sīm aruṇā^́so rúśanto
6.064.03b     gā^́vaḥ subhágām urviyā^́ prathānā^́m
6.064.03c     ápejate śū^́ro ásteva śátrūn
6.064.03d     bā^́dhate támo ajiró ná vóḷhā

6.064.04a     sugótá te supáthā párvateṣu
6.064.04b     avāté apás tarasi svabhāno
6.064.04c     sā^́ na ā^́ vaha pr̥thuyāman r̥ṣve
6.064.04d     rayíṃ divo duhitar iṣayádhyai

6.064.05a     sā^́ ā^́ vaha yā^́ ukṣábhir ávātā
6.064.05b     úṣo váraṃ váhasi jóṣam ánu
6.064.05c     tuváṃ divo duhitar yā^́ ha devī^́
6.064.05d     pūrváhūtau maṃhánā darśatā^́ bhūḥ

6.064.06a     út te váyaś cid vasatér apaptan
6.064.06b     náraś ca yé pitubhā^́jo víuṣṭau
6.064.06c     amā^́ saté vahasi bhū^́ri vāmám
6.064.06d     úṣo devi dāśúṣe mártiyāya

65

6.065.01a     eṣā^́ siyā^́ no duhitā^́ divojā^́ḥ
6.065.01b     kṣitī^́r uchántī mā^́nuṣīr ajīgaḥ
6.065.01c     yā^́ bhānúnā rúśatā rāmiyā^́su
6.065.01d     ájñāyi tirás támasaś cid aktū^́n

6.065.02a     ví tád yayur aruṇayúgbhir áśvaiś
6.065.02b     citrám bhānti uṣásaś candrárathāḥ
6.065.02c     ágraṃ yajñásya br̥ható náyantīr
6.065.02d     ví tā^́ bādhante táma ū^́rmiyāyāḥ

6.065.03a     śrávo vā^́jam íṣam ū^́rjaṃ váhantīr
6.065.03b     ní dāśúṣa uṣaso mártiyāya
6.065.03c     maghõ^́nīr vīrávat pátyamānā
6.065.03d     ávo dhāta vidhaté rátnam adyá

6.065.04a     idā^́ hí vo vidhaté rátnam ásti
6.065.04b     idā^́ vīrā^́ya dāśúṣe uṣāsaḥ
6.065.04c     idā^́ víprāya járate yád ukthā^́
6.065.04d     ní ṣma mā^́vate vahathā purā^́ cit

6.065.05a     idā^́ hí ta · uṣo adrisāno
6.065.05b     gotrā^́ gávām áṅgiraso gr̥ṇánti
6.065.05c     ví arkéṇa bibhidur bráhmaṇā ca
6.065.05d     satyā^́ nr̥̄ṇā^́m⁺ abhavad deváhūtiḥ

6.065.06a     uchā^́ divo duhitaḥ pratnaván no
6.065.06b     bharadvājavád vidhaté maghoni
6.065.06c     suvī^́raṃ rayíṃ gr̥ṇaté rirīhi
6.065.06d     urugāyám ádhi dhehi śrávo naḥ

66

6.066.01a     vápur nú tác cikitúṣe cid astu
6.066.01b     samānáṃ nā^́ma dhenú pátyamānam
6.066.01c     márteṣu anyád doháse pīpā^́ya
6.066.01d     sakŕ̥c chukráṃ duduhe pŕ̥śnir ū^́dhaḥ

6.066.02a     yé agnáyo ná śóśucann idhānā^́
6.066.02b     duvír yát trír marúto vāvr̥dhánta
6.066.02c     areṇávo hiraṇyáyāsa eṣāṃ
6.066.02d     sākáṃ nr̥mṇaíḥ paúṃsiyebhiś ca bhūvan

6.066.03a     rudrásya yé mīḷhúṣaḥ sánti putrā^́
6.066.03b     yā^́ṃś ca ū nú · dā^́dhr̥vir bháradhyai
6.066.03c     vidé hí mātā^́ mahó mahī^́ ṣā^́
6.066.03d     sā^́ ít pŕ̥śniḥ subhúve gárbham ā^́dhāt

6.066.04a     ná yá ī^́ṣante janúṣo áyā nú
6.066.04b     antáḥ sánto avadyā^́ni punānā^́ḥ
6.066.04c     nír yád duhré śúcayo ánu jóṣam
6.066.04d     ánu śriyā^́ tanúvam ukṣámāṇāḥ

6.066.05a     makṣū^́ ná yéṣu doháse cid ayā^́
6.066.05b     ā^́ nā^́ma dhr̥ṣṇú mā^́rutaṃ dádhānāḥ
6.066.05c     ná yé staunā^́ ayā^́so mahnā^́
6.066.05d     nū^́ cit sudā^́nur áva yāsad ugrā^́n

6.066.06a     tá íd ugrā^́ḥ śávasā dhr̥ṣṇúṣeṇā
6.066.06b     ubhé yujanta ródasī suméke
6.066.06c     ádha sma eṣu rodasī^́ sváśocir
6.066.06d     ā^́ ámavatsu tasthau ná rókaḥ

6.066.07a     anenó vo maruto yā^́mo astu
6.066.07b     anaśváś cid yám ájati árathīḥ
6.066.07c     anavasó anabhīśū^́ rajastū^́r
6.066.07d     ví ródasī pathíyā yāti sā^́dhan

6.066.08a     nā^́sya vartā^́ ná tarutā^́ nú asti
6.066.08b     máruto yám ávatha vā^́jasātau
6.066.08c     toké vā góṣu tánaye yám apsú
6.066.08d     sá vrajáṃ dártā pā^́riye ádha dyóḥ

6.066.09a     prá citrám arkáṃ gr̥ṇaté turā^́ya
6.066.09b     mā^́rutāya svátavase bharadhvam
6.066.09c     yé sáhāṃsi · sáhasā sáhante
6.066.09d     réjate agne pr̥thivī^́ makhébhyaḥ

6.066.10a     tvíṣīmanto adhvarásyeva didyút
6.066.10b     tr̥ṣucyávaso juhúvo ná agnéḥ
6.066.10c     arcátrayo · dhúnayo ná vīrā^́
6.066.10d     bhrā^́jajjanmāno marúto ádhr̥ṣṭāḥ

6.066.11a     táṃ vr̥dhántam mā^́rutam bhrā^́jadr̥ṣṭiṃ
6.066.11b     rudrásya sūnúṃ havásā^́ vivāse
6.066.11c     diváḥ śárdhāya śúcayo manīṣā^́
6.066.11d     giráyo ná ā^́pa ugrā^́ aspr̥dhran

67

6.067.01a     víśveṣāṃ vaḥ satã^́ṃ jyéṣṭhatamā
6.067.01b     gīrbhír mitrā^́váruṇā vāvr̥dhádhyai
6.067.01c     sáṃ yā^́ raśméva yamátur yámiṣṭhā
6.067.01d     duvā^́ jánām̐ ásamā bāhúbhiḥ svaíḥ

6.067.02a     iyám mád vām prá str̥ṇīte manīṣā^́
6.067.02b     úpa priyā^́ námasā barhír ácha
6.067.02c     yantáṃ no mitrāvaruṇāv ádhr̥ṣṭaṃ
6.067.02d     chardír yád vāṃ varūthíyaṃ sudānū

6.067.03a     ā^́ yātam mitrāvaruṇā suśastí
6.067.03b     úpa priyā^́ námasā hūyámānā
6.067.03c     sáṃ yā^́v apnasthó apáseva jánāñ
6.067.03d     chrudhīyatáś cid yatatho mahitvā^́

6.067.04a     áśvā ná yā^́ vājínā pūtábandhū
6.067.04b     r̥tā^́ yád gárbham áditir bháradhyai
6.067.04c     prá yā^́ máhi mahā^́ntā jā^́yamānā
6.067.04d     ghorā^́ mártāya ripáve ní dīdhaḥ

6.067.05a     víśve yád vām maṃhánā mándamānāḥ
6.067.05b     kṣatráṃ devā^́so ádadhuḥ sajóṣāḥ
6.067.05c     pári yád bhūthó ródasī cid urvī^́
6.067.05d     sánti spáśo ádabdhāso ámūrāḥ

6.067.06a     tā^́ hí kṣatráṃ dhāráyethe ánu dyū^́n
6.067.06b     dr̥ṃhéthe sā^́num upamā^́d iva dyóḥ
6.067.06c     dr̥̄ḷhó⁺ nákṣatra utá viśvádevo
6.067.06d     bhū^́mim ā^́ atān diyā^́ṃ dhāsínāyóḥ

6.067.07a     tā^́ vigráṃ dhaithe jaṭháram pr̥ṇádhyā
6.067.07b     ā^́ yát sádma sábhr̥tayaḥ pr̥ṇánti
6.067.07c     ná mr̥ṣyante yuvatáyo ávātā
6.067.07d     ví yát páyo viśvajinvā bhárante

6.067.08a     tā^́ jihváyā sádam édáṃ sumedhā^́
6.067.08b     ā^́ yád vāṃ satyó aratír r̥té bhū^́t
6.067.08c     tád vām mahitváṃ ghr̥taannāv astu
6.067.08d     yuváṃ dāśúṣe ví cayiṣṭam áṃhaḥ

6.067.09a     prá yád vām mitrāvaruṇā spũrdhán
6.067.09b     priyā^́ dhā^́ma yuvádhitā minánti
6.067.09c     ná yé devā^́sa óhasā ná mártā
6.067.09d     áyajñasāco ápiyo ná putrā^́ḥ

6.067.10a     ví yád vā^́caṃ · kīstā^́so bhárante
6.067.10b     śáṃsanti ké cin nivído manānā^́ḥ
6.067.10c     ā^́d vām bravāma satyā^́ni ukthā^́
6.067.10d     nákir devébhir yatatho mahitvā^́

6.067.11a     avór itthā^́ vāṃ chardíṣo abhíṣṭau
6.067.11b     yuvór mitrāvaruṇāv áskr̥dhoyu
6.067.11c     ánu yád gā^́va sphurā^́n r̥jipyáṃ
6.067.11d     dhr̥ṣṇúṃ yád ráṇe vŕ̥ṣaṇaṃ yunájan

68

6.068.01a     śruṣṭī^́ vāṃ yajñá údyataḥ sajóṣā
6.068.01b     manuṣvád vr̥ktábarhiṣo yájadhyai
6.068.01c     ā^́ yá índrāváruṇāv iṣé adyá
6.068.01d     mahé sumnā^́ya mahá āvavártat

6.068.02a     tā^́ hí śráyiṣṭhā⁺ devátātā tujā^́
6.068.02b     śū^́rāṇãṃ śáviṣṭhā tā^́ hí bhūtám
6.068.02c     maghónãm máṃhiṣṭhā tuviśúṣma
6.068.02d     r̥téna vr̥tratúrā sárvasenā

6.068.03a     tā^́ gr̥ṇīhi namasíyebhiḥ śūṣaíḥ
6.068.03b     sumnébhir índrāváruṇā cakānā^́
6.068.03c     vájreṇānyáḥ śávasā hánti vr̥tráṃ
6.068.03d     síṣakti anyó vr̥jáneṣu vípraḥ

6.068.04a     gnã^́ś ca yán náraś ca vāvr̥dhánta
6.068.04b     víśve devā^́so narã^́ṃ svágūrtāḥ
6.068.04c     prá ebhya indrāvaruṇā mahitvā^́
6.068.04d     diyaúś ca · pr̥thivi bhūtam urvī^́

6.068.05a     sá ít sudā^́nuḥ suávām̐ r̥tā^́vā
6.068.05b     índrā yó vāṃ varuṇa dā^́śati tmán
6.068.05c     iṣā^́ sá dviṣás tared dã^́svān
6.068.05d     váṃsad rayíṃ rayivátaś ca jánān

6.068.06a     yáṃ yuváṃ dāśúadhvarāya devā
6.068.06b     rayíṃ dhatthó vásumantam purukṣúm
6.068.06c     asmé sá indrāvaruṇāv ápi ṣyāt
6.068.06d     prá yó bhanákti vanúṣām áśastīḥ

6.068.07a     utá naḥ sutrātaró devágopāḥ
6.068.07b     sūríbhya indrāvaruṇā rayíḥ ṣyāt
6.068.07c     yéṣãṃ śúṣmaḥ pŕ̥tanāsu sāhvā^́n
6.068.07d     prá sadyó dyumnā^́ tiráte táturiḥ

6.068.08a     nũ^́ na indrāvaruṇā gr̥ṇānā^́
6.068.08b     pr̥ṅktáṃ rayíṃ sauśravasā^́ya devā
6.068.08c     itthā^́ gr̥ṇánto mahínasya śárdho
6.068.08d     apó ná nāvā^́ duritā^́ tarema

6.068.09a     prá samrā^́je br̥haté mánma nú priyám
6.068.09b     árca devā^́ya váruṇāya sapráthaḥ
6.068.09c     ayáṃ yá urvī^́ mahinā^́ máhivrataḥ
6.068.09d     krátvā vibhā^́ti ajáro ná śocíṣā

6.068.10a     índrāvaruṇā sutapāv imáṃ sutáṃ
6.068.10b     sómam pibatam mádiyaṃ dhr̥tavratā
6.068.10c     yuvó rátho adhvaráṃ devávītaye
6.068.10d     práti svásaram úpa yāti pītáye

6.068.11a     índrāvaruṇā mádhumattamasya
6.068.11b     vŕ̥ṣṇaḥ sómasya vr̥ṣaṇā^́ vr̥ṣethām
6.068.11c     idáṃ vām ándhaḥ páriṣiktam asmé
6.068.11d     āsádyāsmín barhíṣi mādayethām

69

6.069.01a     sáṃ vāṃ kármaṇā sám iṣā^́ hinomi
6.069.01b     índrāviṣṇū ápasas pāré asyá
6.069.01c     juṣéthāṃ yajñáṃ dráviṇaṃ ca dhattam
6.069.01d     áriṣṭair naḥ pathíbhiḥ pāráyantā

6.069.02a     yā^́ víśvāsāṃ janitā^́rā matīnā^́m
6.069.02b     índrāvíṣṇū kaláśā somadhā^́nā
6.069.02c     prá vāṃ gíraḥ śasyámānā avantu
6.069.02d     prá stómāso gīyámānāso arkaíḥ

6.069.03a     índrāviṣṇū madapatī madānām
6.069.03b     ā^́ sómaṃ yātaṃ dráviṇo dádhānā
6.069.03c     sáṃ vām añjantu aktúbhir matīnā^́ṃ
6.069.03d     sáṃ stómāsaḥ śasyámānāsa ukthaíḥ

6.069.04a     ā^́ vām áśvāso abhimātiṣā^́ha
6.069.04b     índrāviṣṇū sadhamā^́do vahantu
6.069.04c     juṣéthāṃ víśvā hávanā matīnā^́m
6.069.04d     úpa bráhmāṇi śr̥ṇutaṃ gíro me

6.069.05a     índrāviṣṇū tát panayā^́yiyaṃ vāṃ
6.069.05b     sómasya máda urú cakramāthe
6.069.05c     ákr̥ṇutam antárikṣaṃ várīyo
6.069.05d     áprathataṃ jīváse no rájāṃsi

6.069.06a     índrāviṣṇū havíṣā vāvr̥dhānā^́
6.069.06b     ágrādvānā námasā rātahavyā
6.069.06c     ghŕ̥tāsutī dráviṇaṃ dhattam asmé
6.069.06d     samudrá sthaḥ kaláśaḥ somadhā^́naḥ

6.069.07a     índrāviṣṇū píbatam mádhvo asyá
6.069.07b     sómasya dasrā jaṭháram pr̥ṇethām
6.069.07c     ā^́ vām ándhāṃsi madirā^́ṇi agmann
6.069.07d     úpa bráhmāṇi śr̥ṇutaṃ hávam me

6.069.08a     ubhā^́ jigyathur ná párā jayethe
6.069.08b     ná párā jigye kataráś canaínoḥ
6.069.08c     índraś ca viṣṇo yád ápaspr̥dhethāṃ
6.069.08d     tredhā^́ sahásraṃ ví tád airayethām

70

6.070.01a     ghr̥távatī bhúvanānām abhiśríyā
6.070.01b     urvī^́ pr̥thvī^́ madhudúghe supéśasā
6.070.01c     dyā^́vāpr̥thivī^́ váruṇasya dhármaṇā
6.070.01d     víṣkabhite ajáre bhū^́riretasā

6.070.02a     ásaścantī bhū^́ridhāre páyasvatī
6.070.02b     ghr̥táṃ duhāte sukŕ̥te śúcivrate
6.070.02c     rā^́jantī asyá bhúvanasya rodasī
6.070.02d     asmé rétaḥ siñcataṃ yán mánurhitam

6.070.03a     yó vām r̥jáve krámaṇāya rodasī
6.070.03b     márto dadā^́śa dhiṣaṇe sá sādhati
6.070.03c     prá prajā^́bhir jāyate dhármaṇas pári
6.070.03d     yuvóḥ siktā^́ víṣurūpāṇi sávratā

6.070.04a     ghr̥téna dyā^́vāpr̥thivī^́ abhī^́vr̥te
6.070.04b     ghr̥taśríyā ghr̥tapŕ̥cā ghr̥tāvŕ̥dhā
6.070.04c     urvī^́ pr̥thvī^́ hotr̥vū^́rye puróhite
6.070.04d     té íd víprā īḷate sumnám iṣṭáye

6.070.05a     mádhu no dyā^́vāpr̥thivī^́ mimikṣatām
6.070.05b     madhuścútā madhudúghe mádhuvrate
6.070.05c     dádhāne yajñáṃ dráviṇaṃ ca devátā
6.070.05d     máhi śrávo vā^́jam asmé suvī^́riyam

6.070.06a     ū^́rjaṃ no dyaúś ca pr̥thivī^́ ca pinvatām
6.070.06b     pitā^́ mātā^́ viśvavídā sudáṃsasā
6.070.06c     saṃrarāṇé ródasī viśváśambhuvā
6.070.06d     saníṃ vā^́jaṃ rayím asmé sám invatām

71

6.071.01a     úd u ṣyá deváḥ savitā^́ hiraṇyáyā
6.071.01b     bāhū^́ ayaṃsta sávanāya sukrátuḥ
6.071.01c     ghr̥téna pāṇí abhí pruṣṇute makhó
6.071.01d     yúvā sudákṣo rájaso vídharmaṇi

6.071.02a     devásya vayáṃ savitúḥ sávīmani
6.071.02b     śréṣṭhe siyāma vásunaś ca dāváne
6.071.02c     yó víśvasya dvipádo yáś cátuṣpado
6.071.02d     nivéśane prasavé cā^́si bhū^́manaḥ

6.071.03a     ádabdhebhiḥ savitaḥ pāyúbhiṣ ṭuváṃ
6.071.03b     śivébhir adyá pári pāhi no gáyam
6.071.03c     híraṇyajihvaḥ suvitā^́ya návyase
6.071.03d     rákṣā mā^́kir no agháśaṃsa īśata

6.071.04a     úd u ṣyá deváḥ savitā^́ dámūnā
6.071.04b     híraṇyapāṇiḥ pratidoṣám asthāt
6.071.04c     áyohanur yajató mandrájihva
6.071.04d     ā^́ dāśúṣe suvati bhū^́ri vāmám

6.071.05a     úd ū ayām̐ upavaktéva bāhū^́
6.071.05b     hiraṇyáyā savitā^́ suprátīkā
6.071.05c     divó róhāṃsi aruhat pr̥thivyā^́
6.071.05d     árīramat patáyat kác cid ábhvam

6.071.06a     vāmám adyá savitar vāmám u śvó
6.071.06b     divé-dive vāmám asmábhya° sāvīḥ
6.071.06c     vāmásya hí kṣáyasya deva bhū^́rer
6.071.06d     ayā^́ dhiyā^́ vāmabhā^́jaḥ siyāma

72

6.072.01a     índrāsomā máhi tád vām mahitváṃ
6.072.01b     yuvám mahā^́ni prathamā^́ni cakrathuḥ
6.072.01c     yuváṃ sū^́ryaṃ vividáthur yuváṃ súvar
6.072.01d     víśvā támāṃsi ahataṃ nidáś ca

6.072.02a     índrāsomā vāsáyatha uṣā^́sam
6.072.02b     út sū^́riyaṃ nayatho jyótiṣā sahá
6.072.02c     úpa dyã^́ṃ skambháthu skámbhanena
6.072.02d     áprathatam pr̥thivī^́m mātáraṃ ví

6.072.03a     índrāsomāv áhim apáḥ pariṣṭhā^́ṃ
6.072.03b     hathó vr̥trám ánu vāṃ dyaúr amanyata
6.072.03c     prá árṇāṃsi airayataṃ nadī^́nām
6.072.03d     ā^́ samudrā^́ṇi paprathuḥ purū^́ṇi

6.072.04a     índrāsomā pakvám āmā^́su antár
6.072.04b     ní gávām íd dadhathur vakṣáṇāsu
6.072.04c     jagr̥bháthur ánapinaddham āsu
6.072.04d     rúśac citrā^́su jágatīṣu antáḥ

6.072.05a     índrāsomā yuvám aṅgá tárutram
6.072.05b     apatyasā^́caṃ śrútiyaṃ rarāthe
6.072.05c     yuváṃ śúṣmaṃ náriyaṃ carṣaṇíbhyaḥ
6.072.05d     sáṃ vivyathuḥ pr̥tanāṣā^́ham ugrā

73

6.073.01a     yó adribhít prathamajā^́ r̥tā^́vā
6.073.01b     bŕ̥haspátir āṅgirasó havíṣmān
6.073.01c     dvibárhajmā prāgharmasát pitā^́ na
6.073.01d     ā^́ ródasī vr̥ṣabhó roravīti

6.073.02a     jánāya cid yá ī^́vata ulokám†
6.073.02b     bŕ̥haspátir deváhūtau cakā^́ra
6.073.02c     ghnán vr̥trā^́ṇi ví púro dardarīti
6.073.02d     jáyañ chátrūm̐r amítrān pr̥tsú sā^́han

6.073.03a     bŕ̥haspátiḥ sám ajayad vásūni
6.073.03b     mahó vrajā^́n gómato devá eṣáḥ
6.073.03c     apáḥ síṣāsan súvar ápratīto
6.073.03d     bŕ̥haspátir hánti amítram arkaíḥ

74

6.074.01a     sómārudrā dhāráyethām asuryàm
6.074.01b     prá vām iṣṭáyo áram aśnuvantu
6.074.01c     dáme-dame saptá rátnā dádhānā
6.074.01d     śáṃ no bhūtaṃ dvipáde śáṃ cátuṣpade

6.074.02a     sómārudrā ví vr̥hataṃ víṣūcīm
6.074.02b     ámīvā yā^́ no gáyam āvivéśa
6.074.02c     āré bādhethāṃ nírr̥tim parācaír
6.074.02d     asmé bhadrā^́ sauśravasā^́ni santu

6.074.03a     sómārudrā yuvám etā^́ni asmé
6.074.03b     víśvā tanū^́ṣu bheṣajā^́ni dhattam
6.074.03c     áva syatam muñcátaṃ yán no ásti
6.074.03d     tanū^́ṣu baddháṃ kr̥tám éno asmát

6.074.04a     tigmā^́yudhau tigmáhetī suśévau
6.074.04b     sómārudrāv ihá sú mr̥̄ḷataṃ⁺ naḥ
6.074.04c     prá no muñcataṃ váruṇasya pā^́śād
6.074.04d     gopāyátaṃ naḥ sumanasyámānā

75

6.075.01a     jīmū^́tasyeva bhavati prátīkaṃ
6.075.01b     yád varmī^́ yā^́ti samádām upásthe
6.075.01c     ánāviddhayā tanúvā jaya tváṃ
6.075.01d     sá tvā vármaṇo mahimā^́ pipartu

6.075.02a     dhánvanā gā^́ dhánvanājíṃ jayema
6.075.02b     dhánvanā tīvrā^́ḥ samádo jayema
6.075.02c     dhánuḥ śátror apakāmáṃ kr̥ṇoti
6.075.02d     dhánvanā sárvāḥ pradíśo jayema

6.075.03a     vakṣyántīvéd ā^́ ganīganti kárṇam
6.075.03b     priyáṃ sákhāyam pariṣasvajānā^́
6.075.03c     yóṣeva śiṅkte vítatā^́dhi dhánvañ
6.075.03d     jiyā^́ iyáṃ sámane pāráyantī

6.075.04a     té ācárantī sámaneva yóṣā
6.075.04b     mātéva putrám bibhr̥tām upásthe
6.075.04c     ápa śátrūn vidhyatāṃ saṃvidāné
6.075.04d     ā^́rtnī imé viṣphurántī amítrān

6.075.05a     bahvīnā^́m pitā^́ bahúr asya putráś
6.075.05b     ciścā^́ kr̥ṇoti sámanāvagátya
6.075.05c     iṣudhíḥ sáṅkāḥ pŕ̥tanāś ca sárvāḥ
6.075.05d     pr̥ṣṭhé nínaddho jayati prásūtaḥ

6.075.06a     ráthe tíṣṭhan nayati vājínaḥ puró
6.075.06b     yátra-yatra kāmáyate suṣārathíḥ
6.075.06c     abhī^́śūnām mahimā^́nam panāyata
6.075.06d     mánaḥ paścā^́d ánu yachanti raśmáyaḥ

6.075.07a     tīvrā^́n ghóṣān kr̥ṇvate vŕ̥ṣapāṇayo
6.075.07b     áśvā ráthebhiḥ sahá vājáyantaḥ
6.075.07c     avakrā^́mantaḥ prápadair amítrān
6.075.07d     kṣiṇánti śátrūm̐r ánapavyayantaḥ

6.075.08a     rathavā^́hanaṃ havír asya nā^́ma
6.075.08b     yátrā^́yudhaṃ níhitam asya várma
6.075.08c     tátrā rátham úpa śagmáṃ sadema
6.075.08d     viśvā^́hā vayáṃ sumanasyámānāḥ

6.075.09a     svāduṣaṃsádaḥ pitáro vayodhā^́ḥ
6.075.09b     kr̥chreśrítaḥ śáktīvanto gabhīrā^́ḥ
6.075.09c     citrásenā íṣubalā ámr̥dhrāḥ
6.075.09d     satóvīrā urávo vrātasāhā^́ḥ

6.075.10a     brā^́hmaṇāsaḥ pítaraḥ sómiyāsaḥ
6.075.10b     śivé no dyā^́vāpr̥thivī^́ anehásā
6.075.10c     pūṣā^́ naḥ pātu duritā^́d r̥tāvr̥dho
6.075.10d     rákṣā mā^́kir no agháśaṃsa īśata

6.075.11a     suparṇáṃ vaste mr̥gó asyā dánto
6.075.11b     góbhiḥ sáṃnaddhā patati prásūtā
6.075.11c     yátrā náraḥ sáṃ ca ví ca drávanti
6.075.11d     tátrāsmábhyam íṣavaḥ śárma yaṃsan

6.075.12a     ŕ̥jīte pári vr̥ṅdhi no
6.075.12b     áśmā bhavatu nas tanū^́ḥ
6.075.12c     sómo ádhi bravītu no
6.075.12d     áditiḥ śárma yachatu

6.075.13a     ā^́ jaṅghanti sā^́nu eṣāṃ
6.075.13b     jaghánām̐ úpa jighnate
6.075.13c     áśvājani prácetaso
6.075.13d     áśvān samátsu codaya

6.075.14a     áhir 'va° bhogaíḥ pári eti bāhúṃ
6.075.14b     jiyā^́yā hetím paribā^́dhamānaḥ
6.075.14c     hastaghnó víśvā vayúnāni vidvā^́n
6.075.14d     púmān púmāṃsam pári pātu viśvátaḥ

6.075.15a     ā^́lāktā yā^́ rúruśīrṣṇi
6.075.15b     átho yásyā áyo múkham
6.075.15c     idám parjányaretasa
6.075.15d     íṣvai devyaí br̥hán námaḥ

6.075.16a     ávasr̥ṣṭā párā pata
6.075.16b     śáravye bráhmasaṃśite
6.075.16c     gáchāmítrān prá padyasva
6.075.16d     mā^́mī^́ṣāṃ káṃ canóc chiṣaḥ

6.075.17a     yátra bāṇā^́ḥ sampátanti
6.075.17b     kumārā^́ viśikhā^́ iva
6.075.17c     tátrā no bráhmaṇas pátir
6.075.17d     áditiḥ śárma yachatu
6.075.17e     viśvā^́hā śárma yachatu

6.075.18a     mármāṇi te vármaṇā chādayāmi
6.075.18b     sómas tvā rā^́jāmŕ̥tenā^́nu vastām
6.075.18c     urór várīyo váruṇas te kr̥ṇotu
6.075.18d     jáyantaṃ tvā ánu devā^́ madantu

6.075.19a     yó naḥ suvó áraṇo
6.075.19b     yáś ca níṣṭyo jíghāṃsati
6.075.19c     devā^́s táṃ sárve dhūrvantu
6.075.19d     bráhma várma mámā^́ntaram