The Rigveda: Metrically Restored Text

Metrically Restored Text

Karen Thomson and Jonathan Slocum

Index

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104

---

N.B. An earlier version of this text was published in electronic form as:

RIG VEDA, A METRICALLY RESTORED TEXT, edited by Barend A. van Nooten and Gary B. Holland, Harvard Oriental Series, vol. 50.

That electronic text, itself derived from a much earlier UT Linguistics Research Center electronic text, bore the legend:

Copyright with the authors and Harvard Oriental Series. The electronic text may be used for research but not for commercial purposes.

Our use here is for research. The electronic text has been much revised (see our Introduction) and converted to Unicode/HTML in this online edition; re: the significance of color and smaller type size in particular, see the Popular Rigveda. Copyright to all revisions and HTML tagging is assigned to the University of Texas, though responsibility for content lies with the authors. This HTML edition may be used for research but not for commercial purposes.

---

1

7.001.01a     agníṃ náro dī^́dhitibhir aráṇyor
7.001.01b     hástacyutī janayanta praśastám
7.001.01c     dūredŕ̥śaṃ gr̥hápatim atharyúm

7.001.02a     tám agním áste vásavo ní r̥ṇvan
7.001.02b     supraticákṣam ávase kútaś cit
7.001.02c     dakṣā^́yiyo yó dáma ā^́sa nítyaḥ

7.001.03a     práiddho agne dīdihi puró no
7.001.03b     ájasrayā suūrmíyā yaviṣṭha
7.001.03c     tuvā^́ṃ śáśvanta úpa yanti vā^́jāḥ

7.001.04a     prá té agnáyo agníbhyo váraṃ níḥ
7.001.04b     suvī^́rāsaḥ śośucanta dyumántaḥ
7.001.04c     yátrā náraḥ samā^́sate sujātā^́ḥ

7.001.05a     dā^́ no agne dhiyā^́ rayíṃ suvī^́raṃ
7.001.05b     suapatyáṃ sahasiya praśastám
7.001.05c     ná yáṃ yā^́vā tárati yātumā^́vān

7.001.06a     úpa yám éti yuvatíḥ sudákṣaṃ
7.001.06b     doṣā^́ vástor havíṣmatī ghr̥tā^́cī
7.001.06c     úpa svaínam arámatir vasūyúḥ

7.001.07a     víśvā agne ápa daha árātīr
7.001.07b     yébhis tápobhir ádaho járūtham
7.001.07c     prá nisvaráṃ cātayasva ámīvām

7.001.08a     ā^́ yás te agna idhaté ánīkaṃ
7.001.08b     vásiṣṭha śúkra dī^́divaḥ pávāka
7.001.08c     utó na ebhí staváthair ihá syāḥ

7.001.09a     ví yé te agne bhejiré ánīkam
7.001.09b     mártā náraḥ pítriyāsaḥ purutrā^́
7.001.09c     utó na ebhíḥ sumánā ihá syāḥ

7.001.10a     imé náro vr̥trahátyeṣu śū^́rā
7.001.10b     víśvā ádevīr abhí santu māyā^́ḥ
7.001.10c     yé me dhíyam panáyanta praśastā^́m

7.001.11a     mā^́ śū^́ne agne ní ṣadāma nr̥̄ṇā^́m⁺
7.001.11b     mā^́śéṣaso avī^́ratā pári tvā
7.001.11c     prajā^́vatīṣu dúriyāsu durya

7.001.12a     yám aśvī^́ nítyam upayā^́ti yajñám
7.001.12b     prajā^́vantaṃ suapatyáṃ kṣáyaṃ naḥ
7.001.12c     svájanmanā śéṣasā vāvr̥dhānám

7.001.13a     pāhí no agne rakṣáso ájuṣṭāt
7.001.13b     pāhí dhūrtér áraruṣo aghāyóḥ
7.001.13c     tuvā^́ yujā^́ pr̥tanāyū^́m̐r abhí ṣyām

7.001.14a     séd agnír agnī^́m̐r áti astu anyā^́n
7.001.14b     yátra vājī^́ tánayo vīḷúpāṇiḥ
7.001.14c     sahásrapāthā akṣárā saméti

7.001.15a     séd agnír yó vanuṣyató nipā^́ti
7.001.15b     sameddhā^́ram · áṃhasa uruṣyā^́t
7.001.15c     sujātā^́saḥ pári caranti vīrā^́ḥ

7.001.16a     ayáṃ só agnír ā^́hutaḥ purutrā^́
7.001.16b     yám ī^́śānaḥ sám íd indhé havíṣmān
7.001.16c     pári yám éti adhvaréṣu hótā

7.001.17a     tuvé agna āhávanāni bhū^́ri
7.001.17b     īśānā^́sa ā^́ juhuyāma nítyā
7.001.17c     ubhā^́ kr̥ṇvánto vahatū^́ miyédhe

7.001.18a     imó agne vītátamāni havyā^́
7.001.18b     ájasro vakṣi devátātim ácha
7.001.18c     práti na īṃ surabhī^́ṇi viyantu

7.001.19a     mā^́ no agne avī^́rate párā dā
7.001.19b     durvā^́sasé 'mataye mā^́ no asyaí
7.001.19c     mā^́ naḥ kṣudhé mā^́ rakṣása r̥tāvo
7.001.19d     mā^́ no dáme mā^́ vána ā^́ juhūrthāḥ

7.001.20a     nū^́ me bráhmāṇi agna úc chaśādhi
7.001.20b     tuváṃ deva maghávadbhyaḥ suṣūdaḥ
7.001.20c     rātaú siyāma ubháyāsa ā^́ te
7.001.20d     yūyám pāta suastíbhiḥ sádā naḥ

7.001.21a     tuvám agne suhávo raṇvásaṃdr̥k
7.001.21b     sudītī^́ sūno sahaso didīhi
7.001.21c     mā^́ tvé sácā tánaye nítya ā^́ dhaṅ
7.001.21d     mā^́ vīró asmán náriyo ví dāsīt

7.001.22a     mā^́ no agne durbhr̥táye sácaiṣú
7.001.22b     deváiddheṣu agníṣu prá vocaḥ
7.001.22c     mā^́ te asmā^́n durmatáyo bhr̥mā^́c cid
7.001.22d     devásya sūno sahaso naśanta

7.001.23a     sá márto agne suanīka revā^́n
7.001.23b     ámartiye yá ājuhóti havyám
7.001.23c     sá devátā vasuvániṃ dadhāti
7.001.23d     yáṃ sūrír arthī^́ pr̥chámāna éti

7.001.24a     mahó no agne suvitásya vidvā^́n
7.001.24b     rayíṃ sūríbhya ā^́ vahā br̥hántam
7.001.24c     yéna vayáṃ sahasāvan mádema
7.001.24d     ávikṣitāsa ā^́yuṣā suvī^́rāḥ

7.001.25a     nū^́ me bráhmāṇi agna úc chaśādhi
7.001.25b     tuváṃ deva maghávadbhyaḥ suṣūdaḥ
7.001.25c     rātaú siyāma ubháyāsa ā^́ te
7.001.25d     yūyám pāta suastíbhiḥ sádā naḥ

2

7.002.01a     juṣásva naḥ samídham agne adyá
7.002.01b     śócā br̥hád yajatáṃ dhūmám r̥ṇván
7.002.01c     úpa spr̥śa diviyáṃ sā^́nu stū^́paiḥ
7.002.01d     sáṃ raśmíbhis tatanaḥ sū^́riasya

7.002.02a     nárāśáṃsasya mahimā^́nam eṣām
7.002.02b     úpa stoṣāma yajatásya yajñaíḥ
7.002.02c     yé sukrátavaḥ śúcayo dhiyaṃdhā^́ḥ
7.002.02d     svádanti devā^́ ubháyāni havyā^́

7.002.03a     īḷéniyaṃ vo ásuraṃ sudákṣam
7.002.03b     antár dūtáṃ ródasī satyavā^́cam
7.002.03c     manuṣvád agním mánunā sámiddhaṃ
7.002.03d     sám adhvarā^́ya sádam ín mahema

7.002.04a     saparyávo bháramāṇā abhijñú
7.002.04b     prá vr̥ñjate námasā barhír agnaú
7.002.04c     ājúhvānā ghr̥tápr̥ṣṭham pŕ̥ṣadvad
7.002.04d     ádhvaryavo havíṣā marjayadhvam

7.002.05a     suādhíyo ví dúro devayánto
7.002.05b     áśiśrayū rathayúr devátātā
7.002.05c     pūrvī^́ śíśuṃ ná mātárā rihāṇé
7.002.05d     sám agrúvo ná sámaneṣu añjan

7.002.06a     utá yóṣaṇe diviyé mahī^́ na
7.002.06b     uṣā^́sānáktā sudúgheva dhenúḥ
7.002.06c     barhiṣádā puruhūté maghónī
7.002.06d     ā^́ yajñíye suvitā^́ya śrayetām

7.002.07a     víprā yajñéṣu mā^́nuṣeṣu kārū^́
7.002.07b     mánye vāṃ jātávedasā yájadhyai
7.002.07c     ūrdhváṃ no adhvaráṃ kr̥taṃ háveṣu
7.002.07d     tā^́ devéṣu vanatho vā^́riyāṇi

7.002.08a     ā^́ bhā^́ratī bhā^́ratībhiḥ sajóṣā
7.002.08b     íḷā devaír manuṣíyebhir agníḥ
7.002.08c     sárasvatī sārasvatébhir arvā^́k
7.002.08d     tisró devī^́r barhír édáṃ sadantu

7.002.09a     tán nas turī^́pam ádha poṣayitnú
7.002.09b     déva tvaṣṭar ví rarāṇáḥ siyasva
7.002.09c     yáto vīráḥ karmaṇíyaḥ sudákṣo
7.002.09d     yuktágrāvā jā^́yate devákāmaḥ

7.002.10a     vánaspaté áva sr̥jópa devā^́n
7.002.10b     agnír havíḥ śamitā^́ sūdayāti
7.002.10c     séd u hótā satyátaro yajāti
7.002.10d     yáthā devā^́nāṃ jánimāni véda

7.002.11a     ā^́ yāhi agne samidhānó arvā^́ṅ
7.002.11b     índreṇa devaíḥ saráthaṃ turébhiḥ
7.002.11c     barhír na āstām áditiḥ suputrā^́
7.002.11d     svā^́hā devā^́ amŕ̥tā mādayantām

3

7.003.01a     agníṃ vo devám agníbhiḥ sajóṣā
7.003.01b     yájiṣṭhaṃ dūtám adhvaré kr̥ṇudhvam
7.003.01c     yó mártiyeṣu nídhruvir r̥tā^́vā
7.003.01d     tápurmūrdhā ghr̥tã^́nnaḥ pavākáḥ⁺

7.003.02a     próthad áśvo ná yávase aviṣyán
7.003.02b     yadā^́ maháḥ saṃváraṇād ví ásthāt
7.003.02c     ā^́d asya vā^́to ánu vāti śocír
7.003.02d     ádha sma te vrájanaṃ kr̥ṣṇám asti

7.003.03a     úd yásya te návajātasya vŕ̥ṣṇo
7.003.03b     ágne cáranti ajárā idhānā^́ḥ
7.003.03c     áchā diyā^́m aruṣó dhūmá eti
7.003.03d     sáṃ dūtó agna ī^́yase hí devā^́n

7.003.04a     ví yásya te pr̥thivyā^́m pā^́jo áśret
7.003.04b     tr̥ṣú yád ánnā samávr̥kta jámbhaiḥ
7.003.04c     séneva sr̥ṣṭā^́ prásitiṣ ṭa eti
7.003.04d     yávaṃ ná dasma juhúvā vivekṣi

7.003.05a     tám íd doṣā^́ tám uṣási yáviṣṭham
7.003.05b     agním átyaṃ ná marjayanta náraḥ
7.003.05c     niśíśānā átithim asya yónau
7.003.05d     dīdā^́ya śocír ā^́hutasya vŕ̥ṣṇaḥ

7.003.06a     susaṃdŕ̥k te suanīka prátīkaṃ
7.003.06b     ví yád rukmó ná rócasa upāké
7.003.06c     divó ná te tanyatúr eti śúṣmaś
7.003.06d     citró ná sū^́raḥ práti cakṣi bhānúm

7.003.07a     yáthā vaḥ svā^́hā agnáye dā^́śema
7.003.07b     párī^́ḷābhir ghr̥távadbhiś ca havyaíḥ
7.003.07c     tébhir no agne ámitair máhobhiḥ
7.003.07d     śatám pūrbhír ā^́yasībhir ní pāhi

7.003.08a     yā^́ vā te sánti dāśúṣe ádhr̥ṣṭā
7.003.08b     gíro vā yā^́bhir nr̥vátīr uruṣyā^́ḥ
7.003.08c     tā^́bhir naḥ sūno sahaso ní pāhi
7.003.08d     sumát sūrī^́ñ jaritr̥̄^́ñ jātavedaḥ

7.003.09a     nír yát pūtéva svádhitiḥ śúcir gā^́t
7.003.09b     sváyā kr̥pā^́ tanúvā rócamānaḥ
7.003.09c     ā^́ yó mātrór uśéniyo jániṣṭa
7.003.09d     devayájyāya sukrátuḥ pavākáḥ⁺

7.003.10a     etā^́ no agne saúbhagā didīhi
7.003.10b     ápi krátuṃ sucétasaṃ vatema
7.003.10c     víśvā stotŕ̥bhyo gr̥ṇaté ca santu
7.003.10d     yūyám pāta suastíbhiḥ sádā naḥ

4

7.004.01a     prá vaḥ śukrā^́ya bhānáve bharadhvaṃ
7.004.01b     havyám matíṃ ca agnáye súpūtam
7.004.01c     yó daíviyāni mā^́nuṣā janū^́ṃṣi
7.004.01d     antár víśvāni vidmánā jígāti

7.004.02a     sá gŕ̥tso agnís táruṇaś cid astu
7.004.02b     yáto yáviṣṭho ájaniṣṭa mātúḥ
7.004.02c     sáṃ yó vánā yuváte śúcidan
7.004.02d     bhū^́ri cid ánnā sám íd atti sadyáḥ

7.004.03a     asyá devásya saṃsádi ánīke
7.004.03b     yám mártiāsaḥ śiyetáṃ jagr̥bhré
7.004.03c     ní yó gŕ̥bham paúruṣeyīm uvóca
7.004.03d     durókam agnír āyáve śuśoca

7.004.04a     ayáṃ kavír ákaviṣu prácetā
7.004.04b     márteṣu agnír amŕ̥to ní dhāyi
7.004.04c     sá mā^́ no átra juhuraḥ sahasvaḥ
7.004.04d     sádā tuvé sumánasaḥ siyāma

7.004.05a     ā^́ yó yóniṃ devákr̥taṃ sasā^́da
7.004.05b     krátvā hí agnír amŕ̥tām̐ átārīt
7.004.05c     tám óṣadhīś ca vanínaś ca gárbham
7.004.05d     bhū^́miś ca viśvádhāyasam bibharti

7.004.06a     ī^́śe hí agnír amŕ̥tasya bhū^́rer
7.004.06b     ī^́śe rāyáḥ suvī^́riyasya dā^́toḥ
7.004.06c     mā^́ tvā vayáṃ sahasāvann avī^́rā
7.004.06d     mā^́ ápsavaḥ pári ṣadāma mā^́duvaḥ

7.004.07a     pariṣádyaṃ hí áraṇasya rékṇo
7.004.07b     nítyasya rāyáḥ pátayaḥ siyāma
7.004.07c     ná śéṣo agne anyájātam asti
7.004.07d     ácetānasya mā^́ pathó ví dukṣaḥ

7.004.08a     nahí grábhāya áraṇaḥ suśévo
7.004.08b     anyódaryo mánasā mántavā^́ u
7.004.08c     ádhā cid ókaḥ púnar ít sá eti
7.004.08d     ā^́ no vājī^́ abhīṣā^́ḷ etu návyaḥ

7.004.09a     tuvám agne vanuṣyató ní pāhi
7.004.09b     tuvám u naḥ sahasāvann avadyā^́t
7.004.09c     sáṃ tvā dhvasmanvád abhí etu pā^́thaḥ
7.004.09d     sáṃ rayí spr̥hayā^́yiyaḥ sahasrī^́

7.004.10a     etā^́ no agne saúbhagā didīhi
7.004.10b     ápi krátuṃ sucétasaṃ vatema
7.004.10c     víśvā stotŕ̥bhyo gr̥ṇaté ca santu
7.004.10d     yūyám pāta suastíbhiḥ sádā naḥ

5

7.005.01a     prá agnáye · taváse bharadhvaṃ
7.005.01b     gíraṃ divó aratáye pr̥thivyā^́ḥ
7.005.01c     yó víśveṣām amŕ̥tānām upásthe
7.005.01d     vaiśvānaró vāvr̥dhé jāgr̥vádbhiḥ

7.005.02a     pr̥ṣṭó diví dhā^́yi agníḥ pr̥thivyā^́ṃ
7.005.02b     netā^́ síndhūnāṃ vr̥ṣabhá stíyānām
7.005.02c     sá mā^́nuṣīr abhí víśo ví bhāti
7.005.02d     vaiśvānaró vāvr̥dhānó váreṇa

7.005.03a     tuvád bhiyā^́ víśa āyann ásiknīr
7.005.03b     asamanā^́ jáhatīr bhójanāni
7.005.03c     vaíśvānara pūráve śóśucānaḥ
7.005.03d     púro yád agne daráyann ádīdeḥ

7.005.04a     táva tridhā^́tu pr̥thivī^́ utá dyaúr
7.005.04b     vaíśvānara vratám agne sacanta
7.005.04c     tuvám bhāsā^́ ródasī ā^́ tatantha
7.005.04d     ájasreṇa śocíṣā śóśucānaḥ

7.005.05a     tuvā^́m agne haríto vāvaśānā^́
7.005.05b     gíraḥ sacante dhúnayo ghr̥tā^́cīḥ
7.005.05c     pátiṃ kr̥ṣṭīnā^́ṃ rathíyaṃ rayīṇā^́ṃ
7.005.05d     vaiśvānarám uṣásāṃ ketúm áhnām

7.005.06a     tuvé asuryàṃ vásavo ní r̥ṇvan
7.005.06b     krátuṃ hí te mitramaho juṣánta
7.005.06c     tuváṃ dásyūm̐r ókaso agna āja
7.005.06d     urú jyótir janáyann ā^́riyāya

7.005.07a     sá jā^́yamānaḥ paramé víoman
7.005.07b     vāyúr ná pā^́thaḥ pári pāsi sadyáḥ
7.005.07c     tuvám bhúvanā janáyann abhí krann
7.005.07d     ápatyāya jātavedo daśasyán

7.005.08a     tā^́m agne asmé íṣam érayasva
7.005.08b     vaíśvānara dyumátīṃ jātavedaḥ
7.005.08c     yáyā rā^́dhaḥ pínvasi viśvavāra
7.005.08d     pr̥thú śrávo dāśúṣe mártiyāya

7.005.09a     táṃ no agne maghávadbhyaḥ purukṣúṃ
7.005.09b     rayíṃ ní vā^́jaṃ śrútiyaṃ yuvasva
7.005.09c     vaíśvānara máhi naḥ śárma yacha
7.005.09d     rudrébhir agne vásubhiḥ sajóṣāḥ

6

7.006.01a     prá samrā^́jo ásurasya práśastim
7.006.01b     puṃsáḥ kr̥ṣṭīnā^́m anumā^́diyasya
7.006.01c     índrasyeva prá tavásas kr̥tā^́ni
7.006.01d     vánde dārúṃ vándamāno vivakmi

7.006.02a     kavíṃ ketúṃ · dhāsím bhānúm ádrer
7.006.02b     hinvánti śáṃ rājiyáṃ ródasīyoḥ
7.006.02c     puraṃdarásya gīrbhír ā^́ vivāse
7.006.02d     agnér vratā^́ni pūrviyā^́ mahā^́ni

7.006.03a     ní akratū^́n grathíno mr̥dhrávācaḥ
7.006.03b     paṇī^́m̐r aśraddhā^́m̐ avr̥dhā^́m̐ ayajñā^́n
7.006.03c     prá-pra tā^́n dásyūm̐r agnír vivāya
7.006.03d     pū^́rvaś cakāra áparām̐ áyajyūn

7.006.04a     yó apācī^́ne támasi mádantīḥ
7.006.04b     prā^́cīś cakā^́ra nŕ̥tamaḥ śácībhiḥ
7.006.04c     tám ī^́śānaṃ vásvo agníṃ gr̥ṇīṣe
7.006.04d     ánānataṃ damáyantam pr̥tanyū^́n

7.006.05a     yó dehíyo ánamayad vadhasnaír
7.006.05b     yó aryápatnīr uṣásaś cakā^́ra
7.006.05c     sá nirúdhyā náhuṣo yahvó agnír
7.006.05d     víśaś cakre balihŕ̥taḥ sáhobhiḥ

7.006.06a     yásya śármann úpa víśve jánāsa
7.006.06b     évais tasthúḥ sumatím bhíkṣamāṇāḥ
7.006.06c     vaiśvānaró váram ā^́ ródasīyor
7.006.06d     ā^́gníḥ sasāda pitarór⁺ upástham

7.006.07a     ā^́ devó dade budhníyā vásūni
7.006.07b     vaiśvānará úditā sū^́riyasya
7.006.07c     ā^́ samudrā^́d ávarād ā^́ párasmād
7.006.07d     ā^́ agnír dade divá ā^́ pr̥thivyā^́ḥ

7

7.007.01a     prá vo deváṃ cit sahasānám agním
7.007.01b     áśvaṃ ná vājínaṃ hiṣe námobhiḥ
7.007.01c     bhávā no dūtó adhvarásya vidvā^́n
7.007.01d     tmánā devéṣu vivide mitádruḥ

7.007.02a     ā^́ yāhi agne pathíyā ánu svā^́
7.007.02b     mandró devā^́nāṃ sakhiyáṃ juṣāṇáḥ
7.007.02c     ā^́ sā^́nu śúṣmair nadáyan pr̥thivyā^́
7.007.02d     jámbhebhir víśvam uśádhag vánāni

7.007.03a     prācī^́no yajñáḥ súdhitaṃ hí barhíḥ
7.007.03b     prīṇīté agnír īḷitó ná hótā
7.007.03c     ā^́ mātárā viśvávāre huvānó
7.007.03d     yáto yaviṣṭha jajñiṣé suśévaḥ

7.007.04a     sadyó adhvaré rathiráṃ jananta
7.007.04b     mā^́nuṣāso vícetaso yá eṣām
7.007.04c     viśā^́m adhāyi viśpátir duroṇé
7.007.04d     agnír mandró mádhuvacā r̥tā^́vā

7.007.05a     ásādi vr̥tó váhnir ājaganvā^́n
7.007.05b     agnír brahmā^́ nr̥ṣádane vidhartā^́
7.007.05c     diyaúś ca yám pr̥thivī^́ vāvr̥dhā^́te
7.007.05d     ā^́ yáṃ hótā yájati viśvávāram

7.007.06a     eté dyumnébhir víśvam ā^́tiranta
7.007.06b     mántraṃ yé vā^́raṃ náriyā átakṣan
7.007.06c     prá yé víśas tiránta śróṣamāṇā
7.007.06d     ā^́ yé me asyá dī^́dhayann r̥tásya

7.007.07a     nũ^́ tvā^́m agna īmahe vásiṣṭhā
7.007.07b     īśānáṃ sūno sahaso vásūnām
7.007.07c     íṣaṃ stotŕ̥bhyo maghávadbhya ānaḍ
7.007.07d     yūyám pāta suastíbhiḥ sádā naḥ

8

7.008.01a     indhé rā^́jā sám ariyó námobhir
7.008.01b     yásya prátīkam ā^́hutaṃ ghr̥téna
7.008.01c     náro havyébhir īḷate sabā^́dha
7.008.01d     ā^́ agnír ágra uṣásām aśoci

7.008.02a     ayám u ṣyá · súmahām̐ avedi
7.008.02b     hótā mandró mánuṣo yahvó agníḥ
7.008.02c     ví bhā^́ akaḥ sasr̥jānáḥ pr̥thivyā^́ṃ
7.008.02d     kr̥ṣṇápavir óṣadhībhir vavakṣe

7.008.03a     káyā no agne ví vasaḥ suvr̥ktíṃ
7.008.03b     kā^́m u svadhā^́m r̥ṇavaḥ śasyámānaḥ
7.008.03c     kadā^́ bhavema pátayaḥ sudatra
7.008.03d     rāyó vantā^́ro duṣṭárasya sādhóḥ

7.008.04a     prá-prāyám agnír bharatásya śr̥ṇve
7.008.04b     ví yát sū^́ryo ná rócate br̥hád bhā^́ḥ
7.008.04c     abhí yáḥ pūrúm pŕ̥tanāsu tasthaú
7.008.04d     dyutānó daívyo átithiḥ śuśoca

7.008.05a     ásann ít tvé āhávanāni bhū^́ri
7.008.05b     bhúvo víśvebhiḥ sumánā ánīkaiḥ
7.008.05c     stutáś cid agne śr̥ṇviṣe gr̥ṇānáḥ
7.008.05d     svayáṃ vardhasva tanúvaṃ sujāta

7.008.06a     idáṃ vácaḥ śatasā^́ḥ sáṃsahasram
7.008.06b     úd agnáye janiṣīṣṭa dvibárhāḥ
7.008.06c     śáṃ yát stotŕ̥bhya āpáye bhávāti
7.008.06d     dyumád amīvacā^́tanaṃ rakṣohā^́

7.008.07a     nū^́ tuvā^́m agna īmahe vásiṣṭhā
7.008.07b     īśānáṃ sūno sahaso vásūnām
7.008.07c     íṣaṃ stotŕ̥bhyo maghávadbhya ānaḍ
7.008.07d     yūyám pāta suastíbhiḥ sádā naḥ

9

7.009.01a     ábodhi jārá uṣásām upásthād
7.009.01b     dhótā mandráḥ kavítamaḥ pavākáḥ⁺
7.009.01c     dádhāti ketúm ubháyasya jantór
7.009.01d     havyā^́ devéṣu dráviṇaṃ sukŕ̥tsu

7.009.02a     sá sukrátur yó ví dúraḥ paṇīnā^́m
7.009.02b     punānó arkám purubhójasaṃ naḥ
7.009.02c     hótā mandaró° viśã^́ṃ dámūnās
7.009.02d     tirás támo dadr̥śe rāmiyā^́ṇām

7.009.03a     ámūraḥ kavír áditir vivásvān
7.009.03b     susaṃsán mitró átithiḥ śivó naḥ
7.009.03c     citrábhānur uṣásām bhāti ágre
7.009.03d     apā^́ṃ gárbhaḥ prasúva ā^́ viveśa

7.009.04a     īḷéniyo vo mánuṣo yugéṣu
7.009.04b     samanagā^́ aśucaj jātávedāḥ
7.009.04c     susaṃdŕ̥śā bhānúnā yó vibhā^́ti
7.009.04d     práti gā^́vaḥ samidhānám budhanta

7.009.05a     ágne yāhí dūtíyam mā^́ riṣaṇyo
7.009.05b     devā^́m̐ áchā brahmakŕ̥tā gaṇéna
7.009.05c     sárasvatīm marúto aśvínāpó
7.009.05d     yákṣi devā^́n ratnadhéyāya víśvān

7.009.06a     tuvā^́m agne samidhānó vásiṣṭho
7.009.06b     járūthaṃ han yákṣi rāyé púraṃdhim
7.009.06c     puruṇīthā^́ jātavedo jarasva
7.009.06d     yūyám pāta suastíbhiḥ sádā naḥ

10

7.010.01a     uṣó ná jāráḥ pr̥thú pā^́jo aśred
7.010.01b     dávidyutad dī^́diyac chóśucānaḥ
7.010.01c     vŕ̥ṣā háriḥ śúcir ā^́ bhāti bhāsā^́
7.010.01d     dhíyo hinvāná uśatī^́r ajīgaḥ

7.010.02a     súvar ṇá vástor uṣásām aroci
7.010.02b     yajñáṃ tanvānā^́ uśíjo ná mánma
7.010.02c     agnír jánmāni devá ā^́ ví vidvā^́n
7.010.02d     dravád dūtó devayā^́vā vániṣṭhaḥ

7.010.03a     áchā gíro matáyo devayántīr
7.010.03b     agníṃ yanti dráviṇam bhíkṣamāṇāḥ
7.010.03c     susaṃdŕ̥śaṃ suprátīkaṃ suáñcaṃ
7.010.03d     havyavā^́ham aratím mā^́nuṣāṇām

7.010.04a     índraṃ no agne vásubhiḥ sajóṣā
7.010.04b     rudráṃ rudrébhir ā^́ vahā br̥hántam
7.010.04c     ādityébhir áditiṃ viśvájanyām
7.010.04d     bŕ̥haspátim ŕ̥kvabhir viśvávāram

7.010.05a     mandráṃ hótāram uśíjo yáviṣṭham
7.010.05b     agníṃ víśa īḷate adhvaréṣu
7.010.05c     sá hí kṣápāvām̐ ábhavad rayīṇā^́m
7.010.05d     átandro dūtó yajáthāya devā^́n

11

7.011.01a     mahā^́m̐ asi adhvarásya praketó
7.011.01b     ná rté tuvád amŕ̥tā mādayante
7.011.01c     ā^́ víśvebhiḥ saráthaṃ yāhi devaír
7.011.01d     ní agne hótā prathamáḥ sadehá

7.011.02a     tvā^́m īḷate ajiráṃ dūtíyāya
7.011.02b     havíṣmantaḥ sádam ín mā^́nuṣāsaḥ
7.011.02c     yásya devaír ā^́sado barhír agne
7.011.02d     áhāni asmai sudínā bhavanti

7.011.03a     tríś cid aktóḥ prá cikitur vásūni
7.011.03b     tuvé antár dāśúṣe mártiyāya
7.011.03c     manuṣvád agna ihá yakṣi devā^́n
7.011.03d     bhávā no dūtó abhiśastipā^́vā

7.011.04a     agnír īśe br̥ható adhvarásya
7.011.04b     agnír víśvasya havíṣaḥ kr̥tásya
7.011.04c     krátuṃ hí asya vásavo juṣánta
7.011.04d     áthā devā^́ dadhire havyavā^́ham

7.011.05a     ā^́gne vaha havirádyāya devā^́n
7.011.05b     índrajyeṣṭhāsa ihá mādayantām
7.011.05c     imáṃ yajñáṃ diví devéṣu dhehi
7.011.05d     yūyám pāta suastíbhiḥ sádā naḥ

12

7.012.01a     áganma mahā^́ námasā yáviṣṭhaṃ
7.012.01b     yó dīdā^́ya sámiddhaḥ své duroṇé
7.012.01c     citrábhānuṃ ródasī antár urvī^́
7.012.01d     súāhutaṃ viśvátaḥ pratiáñcam

7.012.02a     sá mahnā^́ víśvā duritā^́ni sāhvā^́n
7.012.02b     agní ṣṭave dáma ā^́ jātávedāḥ
7.012.02c     sá no rakṣiṣad duritā^́d avadyā^́d
7.012.02d     asmā^́n gr̥ṇatá utá no maghónaḥ

7.012.03a     tuváṃ váruṇa utá mitró agne
7.012.03b     tuvā^́ṃ vardhanti matíbhir vásiṣṭhāḥ
7.012.03c     tuvé vásu suṣaṇanā^́ni santu
7.012.03d     yūyám pāta suastíbhiḥ sádā naḥ

13

7.013.01a     prá agnáye viśvaśúce dhiyaṃdhé
7.013.01b     asuraghné mánma dhītím bharadhvam
7.013.01c     bháre havír ná barhíṣi priṇānó⁺
7.013.01d     vaiśvānarā^́ya yátaye matīnā^́m

7.013.02a     tuvám agne śocíṣā śóśucāna
7.013.02b     ā^́ ródasī apr̥ṇā jā^́yamānaḥ
7.013.02c     tuváṃ devā^́m̐ abhíśaster amuñco
7.013.02d     vaíśvānara jātavedo mahitvā^́

7.013.03a     jātó yád agne bhúvanā ví ákhyaḥ
7.013.03b     paśū^́n ná gopā^́ íriyaḥ párijmā
7.013.03c     vaíśvānara bráhmaṇe vinda gātúṃ
7.013.03d     yūyám pāta suastíbhiḥ sádā naḥ

14

7.014.01a     samídhā jātávedase
7.014.01b     devā^́ya deváhūtibhiḥ
7.014.01c     havírbhiḥ śukráśociṣe namasvíno
7.014.01d     vayáṃ dāśema agnáye

7.014.02a     vayáṃ te agne samídhā vidhema
7.014.02b     vayáṃ dāśema suṣṭutī^́ yajatra
7.014.02c     vayáṃ ghr̥téna adhvarasya hotar
7.014.02d     vayáṃ deva havíṣā bhadraśoce

7.014.03a     ā^́ no devébhir úpa deváhūtim
7.014.03b     ágne yāhí váṣaṭkr̥tiṃ juṣāṇáḥ
7.014.03c     túbhyaṃ devā^́ya dā^́śataḥ siyāma
7.014.03d     yūyám pāta suastíbhiḥ sádā naḥ

15

7.015.01a     upasádyāya mīḷhúṣa
7.015.01b     āsíye juhutā havíḥ
7.015.01c     yó no nédiṣṭham ā^́piyam

7.015.02a     yáḥ páñca carṣaṇī^́r abhí
7.015.02b     niṣasā^́da dáme-dame
7.015.02c     kavír gr̥hápatir yúvā

7.015.03a     sá no védo amā^́tiyam
7.015.03b     agnī^́ rakṣatu viśvátaḥ
7.015.03c     utā^́smā^́n pātu áṃhasaḥ

7.015.04a     návaṃ nú stómam agnáye
7.015.04b     diváḥ śyenā^́ya jījanam
7.015.04c     vásvaḥ kuvíd vanā^́ti naḥ

7.015.05a     spārhā^́ yásya śríyo dr̥śé
7.015.05b     rayír vīrávato yathā
7.015.05c     ágre yajñásya śócataḥ

7.015.06a     sémā^́ṃ vetu váṣaṭkr̥tim
7.015.06b     agnír juṣata no gíraḥ
7.015.06c     yájiṣṭho havyavā^́hanaḥ

7.015.07a     ní tvā nakṣiya viśpate
7.015.07b     dyumántaṃ deva dhīmahi
7.015.07c     suvī^́ram agna āhuta

7.015.08a     kṣápa usráś ca dīdihi
7.015.08b     suagnáyas tváyā vayám
7.015.08c     suvī^́ras tuvám asmayúḥ

7.015.09a     úpa tvā sātáye náro
7.015.09b     víprāso yanti dhītíbhiḥ
7.015.09c     úpā^́kṣarā sahasríṇī

7.015.10a     agnī^́ rákṣāṃsi sedhati
7.015.10b     śukráśocir ámartiyaḥ
7.015.10c     śúciḥ pavāká⁺ ī^́ḍiyaḥ

7.015.11a     sá no rā^́dhāṃsi ā^́ bhara
7.015.11b     ī^́śānaḥ sahaso yaho
7.015.11c     bhágaś ca dātu vā^́riyam

7.015.12a     tvám agne vīrávad yáśo
7.015.12b     deváś ca savitā^́ bhágaḥ
7.015.12c     dítiś ca dāti vā^́riyam

7.015.13a     ágne rákṣā ṇo áṃhasaḥ
7.015.13b     práti ṣma deva rī^́ṣataḥ
7.015.13c     tápiṣṭhair ajáro daha

7.015.14a     ádhā mahī^́ na ā^́yasī
7.015.14b     ánādhr̥ṣṭo nŕ̥pītaye
7.015.14c     pũ^́r bhavā śatábhujiḥ

7.015.15a     tuváṃ naḥ pāhi áṃhaso
7.015.15b     dóṣāvastar aghāyatáḥ
7.015.15c     dívā náktam adābhiya

16

7.016.01a     enā^́ vo agníṃ námasā
7.016.01b     ūrjó nápātam ā^́ huve
7.016.01c     priyáṃ cétiṣṭham aratíṃ suadhvaráṃ
7.016.01d     víśvasya dūtám amŕ̥tam

7.016.02a     sá yojate aruṣā^́ viśvábhojasā
7.016.02b     sá dudravat súāhutaḥ
7.016.02c     subráhmā yajñáḥ suśámī vásūnãṃ
7.016.02d     deváṃ rā^́dho jánānãm

7.016.03a     úd asya śocír asthãd
7.016.03b     ājúhvānasya mīḷhúṣaḥ
7.016.03c     úd dhūmā^́so aruṣā^́so divispŕ̥śaḥ
7.016.03d     sám agním indhate náraḥ

7.016.04a     táṃ tuvā dūtáṃ kr̥ṇmahe yaśástamaṃ
7.016.04b     devā^́m̐ ā^́ vītáye vaha
7.016.04c     víśvā sūno sahaso martabhójanā
7.016.04d     rā^́sva tád yát tuvémahe

7.016.05a     tuvám agne gr̥hápatis
7.016.05b     tuváṃ hótā no adhvaré
7.016.05c     tuvám pótā viśvavāra prácetā
7.016.05d     yákṣi véṣi ca vā^́riyam

7.016.06a     kr̥dhí rátnaṃ yájamānāya sukrato
7.016.06b     tuváṃ hí ratnadhā^́ ási
7.016.06c     ā^́ na r̥té śiśīhi víśvam r̥tvíjaṃ
7.016.06d     suśáṃso yáś ca dákṣate

7.016.07a     tuvé agne suāhuta
7.016.07b     priyā^́saḥ santu sūráyaḥ
7.016.07c     yantā^́ro yé maghávāno jánānãm
7.016.07d     ūrvā^́n dáyanta gónãm

7.016.08a     yéṣām íḷā ghr̥táhastā duroṇá ā^́m̐
7.016.08b     ápi prātā^́ niṣī^́dati
7.016.08c     tā^́ṃs trāyasva sahasiya druhó nidó
7.016.08d     yáchā naḥ śárma dīrghaśrút

7.016.09a     sá mandráyā ca jihváyā
7.016.09b     váhnir āsā^́ vidúṣṭaraḥ
7.016.09c     ágne rayím maghávadbhyo na ā^́ vaha
7.016.09d     havyádātiṃ ca sūdaya

7.016.10a     yé rā^́dhāṃsi dádati áśviyā maghā^́
7.016.10b     kā^́mena śrávaso maháḥ
7.016.10c     tā^́m̐ áṃhasaḥ pipr̥hi partŕ̥bhiṣ ṭuváṃ
7.016.10d     śatám pūrbhír yaviṣṭhiya

7.016.11a     devó vo draviṇodã^́ḥ
7.016.11b     pūrṇā^́ṃ vivaṣṭi āsícam
7.016.11c     úd vā siñcádhvam úpa vā pr̥ṇadhvam
7.016.11d     ā^́d íd vo devá ohate

7.016.12a     táṃ hótāram adhvarásya prácetasaṃ
7.016.12b     váhniṃ devā^́ akr̥ṇvata
7.016.12c     dádhāti rátnaṃ vidhaté suvī^́riyam
7.016.12d     agnír jánāya dāśúṣe

17

7.017.01a     ágne bháva suṣamídhā sámiddha
7.017.01b     utá barhír urviyā^́ ví str̥ṇītām

7.017.02a     utá dvā^́ra uśatī^́r ví śrayantām
7.017.02b     utá devā^́m̐ uśatá ā^́ vahehá

7.017.03a     ágne vīhí havíṣā yákṣi devā^́n
7.017.03b     suadhvarā^́ kr̥ṇuhi jātavedaḥ

7.017.04a     suadhvarā^́ karati jātávedā
7.017.04b     yákṣad devā^́m̐ amŕ̥tān pipráyac ca

7.017.05a     váṃsva víśvā vā^́riyāṇi pracetaḥ
7.017.05b     satyā^́ bhavantu āśíṣo no adyá

7.017.06a     tuvā^́m u té dadhire havyavā^́haṃ
7.017.06b     devā^́so agna ūrjá ā^́ nápātam

7.017.07a     té te devā^́ya dā^́śataḥ siyāma
7.017.07b     mahó no rátnā ví dadha iyānáḥ

18

7.018.01a     tuvé ha yát pitáraś cin na indra
7.018.01b     víśvā vāmā^́ jaritā^́ro ásanvan
7.018.01c     tuvé gā^́vaḥ sudúghās tvé hí áśvās
7.018.01d     tuváṃ vásu devayaté vániṣṭhaḥ

7.018.02a     rā^́jeva hí jánibhiḥ kṣéṣi evá
7.018.02b     áva dyúbhir abhí vidúṣ kavíḥ sán
7.018.02c     piśā^́ gíro maghavan góbhir áśvais
7.018.02d     tuvāyatáḥ śiśīhi rāyé asmā^́n

7.018.03a     imā^́ u tvā paspr̥dhānā^́so átra
7.018.03b     mandrā^́ gíro devayántīr úpa sthuḥ
7.018.03c     arvā^́cī te pathíyā rāyá etu
7.018.03d     siyā^́ma te sumatā^́v indra śárman

7.018.04a     dhenúṃ ná tvā sūyávase dúdukṣann
7.018.04b     úpa bráhmāṇi sasr̥je vásiṣṭhaḥ
7.018.04c     tuvā^́m ín me gópatiṃ víśva āha
7.018.04d     ā^́ na índraḥ sumatíṃ gantu ácha

7.018.05a     árṇāṃsi cit paprathānā^́ sudā^́sa
7.018.05b     índro gādhā^́ni akr̥ṇot supārā^́
7.018.05c     śárdhantaṃ śimyúm ucáthasya návyaḥ
7.018.05d     śā^́paṃ síndhūnām akr̥ṇod áśastīḥ

7.018.06a     puroḷā^́ ít turváśo yákṣur āsīd
7.018.06b     rāyé mátsyāso níśitā ápīva
7.018.06c     śruṣṭíṃ cakrur bhŕ̥gavo druhyávaś ca
7.018.06d     sákhā sákhāyam atarad víṣūcoḥ

7.018.07a     ā^́ pakthā^́so bhalānáso bhananta
7.018.07b     ā^́lināso viṣāṇínaḥ śivā^́saḥ
7.018.07c     ā^́ yó 'nayat sadhamā^́ ā^́riyasya
7.018.07d     gavyā^́ tŕ̥tsubhyo ajagan yudhā^́ nr̥̄^́n

7.018.08a     durādhíyo áditiṃ sreváyanto
7.018.08b     acetáso ví jagr̥bhre páruṣṇīm
7.018.08c     mahnā^́vivyak pr̥thivī^́m pátyamānaḥ
7.018.08d     paśúṣ kavír aśayac cā^́yamānaḥ

7.018.09a     īyúr árthaṃ ná niarthám páruṣṇīm
7.018.09b     āśúś canéd abhipitváṃ jagāma
7.018.09c     sudā^́sa índraḥ sutúkām̐ amítrān
7.018.09d     árandhayan mā^́nuṣe vádhrivācaḥ

7.018.10a     īyúr gā^́vo ná yávasād ágopā
7.018.10b     yathākr̥tám abhí mitráṃ citā^́saḥ
7.018.10c     pŕ̥śnigāvaḥ pŕ̥śninipreṣitāsaḥ
7.018.10d     śruṣṭíṃ cakrur niyúto rántayaś ca

7.018.11a     ékaṃ ca yó viṃśatíṃ ca śravasyā^́
7.018.11b     vaikarṇáyor jánān rā^́jā ní ástaḥ
7.018.11c     dasmó ná sádman ní śiśāti barhíḥ
7.018.11d     śū^́raḥ sárgam akr̥ṇod índra eṣām

7.018.12a     ádha śrutáṃ kaváṣaṃ vr̥ddhám apsú
7.018.12b     ánu druhyúṃ ní vr̥ṇag vájrabāhuḥ
7.018.12c     vr̥ṇānā^́ átra sakhiyā^́ya sakhyáṃ
7.018.12d     tuvāyánto yé ámadann ánu tvā

7.018.13a     ví sadyó víśvā dr̥ṃhitā^́ni eṣām
7.018.13b     índraḥ púraḥ sáhasā saptá dardaḥ
7.018.13c     ví ā^́navasya tŕ̥tsave gáyam bhāg
7.018.13d     jéṣma pūrúṃ vidáthe mr̥dhrávācam

7.018.14a     ní gavyávo ánavo druhyávaś ca
7.018.14b     ṣaṣṭíḥ śatā^́ suṣupuḥ ṣáṭ sahásrā
7.018.14c     ṣaṣṭír vīrā^́so ádhi ṣáḍ duvoyú
7.018.14d     víśvéd índrasya vīríyā kr̥tā^́ni

7.018.15a     índreṇaité tŕ̥tsavo véviṣāṇā
7.018.15b     ā^́po ná sr̥ṣṭā^́ adhavanta nī^́cīḥ
7.018.15c     durmitrā^́saḥ prakalavín mímānā
7.018.15d     jahúr víśvāni bhójanā sudā^́se

7.018.16a     ardháṃ vīrásya śr̥tapā^́m anindrám
7.018.16b     párā śárdhantaṃ nunude abhí kṣā^́m
7.018.16c     índro manyúm manyumíyo mimāya
7.018.16d     bhejé pathó vartaním pátyamānaḥ

7.018.17a     ādhréṇa cit tád u ékaṃ cakāra
7.018.17b     siṃhíyaṃ cit pétuvenā jaghāna
7.018.17c     áva sraktī^́r veśíyāvr̥ścad índraḥ
7.018.17d     prā^́yachad víśvā bhójanā sudā^́se

7.018.18a     śáśvanto hí śátravo rāradhúṣ ṭe
7.018.18b     bhedásya cic chárdhato vinda rándhim
7.018.18c     mártām̐ éna stuvató yáḥ kr̥ṇóti
7.018.18d     tigmáṃ tásmin ní jahi vájram indra

7.018.19a     ā^́vad índraṃ yamúnā tŕ̥tsavaś ca
7.018.19b     prā^́tra bhedáṃ sarvátātā muṣāyat
7.018.19c     ajā^́saś ca śígravo yákṣavaś ca
7.018.19d     balíṃ śīrṣā^́ṇi jabhrur áśviyāni

7.018.20a     ná ta indra sumatáyo ná rā^́yaḥ
7.018.20b     saṃcákṣe pū^́rvā uṣáso ná nū^́tnāḥ
7.018.20c     dévakaṃ cin mānyamānáṃ jaghantha
7.018.20d     áva tmánā br̥hatáḥ śámbaram bhet

7.018.21a     prá yé gr̥hā^́d ámamadus tuvāyā^́
7.018.21b     parāśaráḥ śatáyātur vásiṣṭhaḥ
7.018.21c     ná te bhojásya sakhiyám mr̥ṣanta
7.018.21d     ádhā sūríbhyaḥ sudínā ví uchān

7.018.22a     duvé náptur devávataḥ śaté gór
7.018.22b     duvā^́ ráthā vadhū^́mantā sudā^́saḥ
7.018.22c     árhann agne paijavanásya dā^́naṃ
7.018.22d     hóteva sádma pári emi rébhan

7.018.23a     catvā^́ro mā paijavanásya dā^́nāḥ
7.018.23b     smáddiṣṭayaḥ kr̥śaníno nireké
7.018.23c     r̥jrā^́so mā pr̥thiviṣṭhā^́ḥ sudā^́sas
7.018.23d     tokáṃ tokā^́ya śrávase vahanti

7.018.24a     yásya śrávo ródasī antár urvī^́
7.018.24b     śīrṣṇé-śīrṣṇe vibabhā^́jā vibhaktā^́
7.018.24c     saptéd índraṃ ná sraváto gr̥ṇanti
7.018.24d     ní yudhyāmadhím aśiśād abhī^́ke

7.018.25a     imáṃ naro marutaḥ saścatā^́nu
7.018.25b     dívodāsaṃ ná pitáraṃ sudā^́saḥ
7.018.25c     aviṣṭánā paijavanásya kétaṃ
7.018.25d     dūṇā^́śaṃ kṣatrám ajáraṃ duvoyú

19

7.019.01a     yás tigmáśr̥ṅgo vr̥ṣabhó ná bhīmá
7.019.01b     ékaḥ kr̥ṣṭī^́ś cyāváyati prá víśvāḥ
7.019.01c     yáḥ śáśvato ádāśuṣo gáyasya
7.019.01d     prayantā^́si súṣvitarāya védaḥ

7.019.02a     tuváṃ ha tiyád indra kútsam āvaḥ
7.019.02b     śúśrūṣamāṇas tanúvā samaryé
7.019.02c     dā^́saṃ yác chúṣṇaṃ kúyavaṃ ní asmā
7.019.02d     árandhaya ārjuneyā^́ya śíkṣan

7.019.03a     tuváṃ dhr̥ṣṇo dhr̥ṣatā^́ vītáhavyam
7.019.03b     prā^́vo víśvābhir ūtíbhiḥ sudā^́sam
7.019.03c     prá paúrukutsiṃ trasádasyum āvaḥ
7.019.03d     kṣétrasātā vr̥trahátyeṣu pūrúm

7.019.04a     tuváṃ nŕ̥bhir nr̥maṇo devávītau
7.019.04b     bhū^́rīṇi vr̥trā^́ hariaśva haṃsi
7.019.04c     tuváṃ ní dásyuṃ cúmuriṃ dhúniṃ ca
7.019.04d     ásvāpayo dabhī^́taye suhántu

7.019.05a     táva cyautnā^́ni vajrahasta tā^́ni
7.019.05b     náva yát púro navatíṃ ca sadyáḥ
7.019.05c     nivéśane śatatamā^́viveṣīr
7.019.05d     áhañ ca vr̥tráṃ námucim utā^́han

7.019.06a     sánā tā^́ ta indara⁺ bhójanāni
7.019.06b     rātáhavyāya dāśúṣe sudā^́se
7.019.06c     vŕ̥ṣṇe te hárī vŕ̥ṣaṇā yunajmi
7.019.06d     vyántu bráhmāṇi puruśāka vā^́jam

7.019.07a     mā^́ te asyā^́ṃ sahasāvan páriṣṭāv
7.019.07b     aghā^́ya bhūma harivaḥ parādaí
7.019.07c     trā^́yasva no avr̥kébhir várūthais
7.019.07d     táva priyā^́saḥ sūríṣu siyāma

7.019.08a     priyā^́sa ít te maghavann abhíṣṭau
7.019.08b     náro madema śaraṇé sákhāyaḥ
7.019.08c     ní turváśaṃ ní yā^́duvaṃ śiśīhi
7.019.08d     atithigvā^́ya śáṃsiyaṃ kariṣyán

7.019.09a     sadyáś cin nú té maghavann abhíṣṭau
7.019.09b     náraḥ śaṃsanti ukthaśā^́sa ukthā^́
7.019.09c     yé te hávebhir ví paṇī^́m̐r ádāśann
7.019.09d     asmā^́n vr̥ṇīṣva yújiyāya tásmai

7.019.10a     eté stómā narā^́ṃ nr̥tama túbhyam
7.019.10b     asmadríañco dádato maghā^́ni
7.019.10c     téṣām indra vr̥trahátye śivó bhūḥ
7.019.10d     sákhā ca śū^́ro avitā^́ ca nr̥̄ṇā^́m⁺

7.019.11a     nū^́ indra śūra stávamāna ūtī^́
7.019.11b     bráhmajūtas tanúvā vāvr̥dhasva
7.019.11c     úpa no vā^́jān mimīhi úpa stī^́n
7.019.11d     yūyám pāta suastíbhiḥ sádā naḥ

20

7.020.01a     ugró jajñe vīríyāya svadhā^́vāñ
7.020.01b     cákrir ápo náriyo yát kariṣyán
7.020.01c     jágmir yúvā nr̥ṣádanam ávobhis
7.020.01d     trātā^́ na índra énaso maháś cit

7.020.02a     hántā vr̥trám índaraḥ⁺ śū^́śuvānaḥ
7.020.02b     prā^́vīn nú vīró jaritā^́ram ūtī^́
7.020.02c     kártā sudā^́se áha vā^́ ulokáṃ†
7.020.02d     dā^́tā vásu múhur ā^́ dāśúṣe bhūt

7.020.03a     yudhmó anarvā^́ khajakŕ̥t samádvā
7.020.03b     śū^́raḥ satrāṣā^́ḍ janúṣem áṣāḷhaḥ
7.020.03c     ví āsa índraḥ pŕ̥tanāḥ suójā
7.020.03d     ádhā víśvaṃ śatrūyántaṃ jaghāna

7.020.04a     ubhé cid indra ródasī mahitvā^́
7.020.04b     ā^́ paprātha táviṣībhis tuviṣmaḥ
7.020.04c     ní vájram índro hárivān mímikṣan
7.020.04d     sám ándhasā mádeṣu vā^́ uvoca

7.020.05a     vŕ̥ṣā jajāna vŕ̥ṣaṇaṃ ráṇāya
7.020.05b     tám u cin nā^́rī náriyaṃ sasūva
7.020.05c     prá yáḥ senānī^́r ádha nŕ̥bhyo ásti
7.020.05d     ináḥ sátvā gavéṣaṇaḥ sá dhr̥ṣṇúḥ

7.020.06a     nū^́ cit sá bhreṣate jáno ná reṣan
7.020.06b     máno yó asya ghorám āvívāsāt
7.020.06c     yajñaír yá índre dádhate dúvāṃsi
7.020.06d     kṣáyat sá rāyá r̥tapā^́ r̥tejā^́ḥ

7.020.07a     yád indra pū^́rvo áparāya śíkṣann
7.020.07b     áyaj jyā^́yān kánīyaso dayiṣṇám⁺
7.020.07c     amŕ̥ta ít pári āsīta dūrám
7.020.07d     ā^́ citra cítriyam bharā rayíṃ naḥ

7.020.08a     yás ta indra priyó jáno dádāśad
7.020.08b     ásan nireké adrivaḥ sákhā te
7.020.08c     vayáṃ te asyā^́ṃ sumataú cániṣṭhāḥ
7.020.08d     syā^́ma várūthe ághnato nŕ̥pītau

7.020.09a     eṣá stómo acikradad vŕ̥ṣā ta
7.020.09b     utá stāmúr maghavann akrapiṣṭa
7.020.09c     rāyás kā^́mo jaritā^́raṃ ta ā^́gan
7.020.09d     tvám aṅgá śakra vásva ā^́ śako naḥ

7.020.10a     sá na indra tváyatāyā iṣé dhās
7.020.10b     tmánā ca yé maghávāno junánti
7.020.10c     vásvī ṣú te jaritré astu śaktír
7.020.10d     yūyám pāta suastíbhiḥ sádā naḥ

21

7.021.01a     ásāvi deváṃ gór̥jīkam ándho
7.021.01b     ní asminn índro janúṣem uvoca
7.021.01c     bódhāmasi tvā hariaśva yajñaír
7.021.01d     bódhā na stómam ándhaso mádeṣu

7.021.02a     prá yanti yajñáṃ vipáyanti barhíḥ
7.021.02b     somamā^́do vidáthe dudhrávācaḥ
7.021.02c     ní u bhriyante yaśáso gr̥bhā^́d ā^́
7.021.02d     dūráüpabdo vŕ̥ṣaṇo nr̥ṣā^́caḥ

7.021.03a     tuvám indra srávitavā^́ apás kaḥ
7.021.03b     páriṣṭhitā áhinā śūra pūrvī^́ḥ
7.021.03c     tuvád vāvakre rathíyo ná dhénā
7.021.03d     réjante víśvā kr̥trímāṇi bhīṣā^́

7.021.04a     bhīmó viveṣa ā^́yudhebhir eṣām
7.021.04b     ápāṃsi víśvā náriyāṇi vidvā^́n
7.021.04c     índraḥ púro járhr̥ṣāṇo ví dūdhod
7.021.04d     ví vájrahasto mahinā^́ jaghāna

7.021.05a     ná yātáva indara⁺ jūjuvur no
7.021.05b     ná vándanā śaviṣṭha vediyā^́bhiḥ
7.021.05c     sá śardhad aryó víṣuṇasya jantór
7.021.05d     mā^́ śiśnádevā ápi gur r̥táṃ naḥ

7.021.06a     abhí krátvā indara⁺ bhūr ádha jmán
7.021.06b     ná te vivyaṅ mahimā^́naṃ rájāṃsi
7.021.06c     svénā hí vr̥tráṃ śávasā jaghántha
7.021.06d     ná śátrur ántaṃ vividad yudhā^́ te

7.021.07a     devā^́ś cit te asuríyāya pū^́rve
7.021.07b     ánu kṣatrā^́ya mamire sáhāṃsi
7.021.07c     índro maghā^́ni dayate viṣáhya
7.021.07d     índraṃ vā^́jasya johuvanta sātaú

7.021.08a     kīríś cid dhí tvā^́m ávase juhā^́va
7.021.08b     ī^́śānam indra saúbhagasya bhū^́reḥ
7.021.08c     ávo babhūtha śatamūte asmé
7.021.08d     abhikṣattús tuvā^́vato varūtā^́

7.021.09a     sákhāyas ta indra viśváha syāma
7.021.09b     namovr̥dhā^́so mahinā^́ tarutra
7.021.09c     vanvántu smā te ávasā samīké
7.021.09d     abhī^́tim aryó vanúṣāṃ śávāṃsi

7.021.10a     sá na indra tváyatāyā iṣé dhās
7.021.10b     tmánā ca yé maghávāno junánti
7.021.10c     vásvī ṣú te jaritré astu śaktír
7.021.10d     yūyám pāta suastíbhiḥ sádā naḥ

22

7.022.01a     píbā sómam indara⁺ mándatu tvā
7.022.01b     yáṃ te suṣā^́va hariaśva ádriḥ
7.022.01c     sotúr bāhúbhyāṃ súyato ná árvā

7.022.02a     yás te mádo yújiyaś cā^́rur ásti
7.022.02b     yéna vr̥trā^́ṇi hariaśva háṃsi
7.022.02c     sá tvā^́m indra prabhūvaso mamattu

7.022.03a     bódhā sú me maghavan vā^́cam émā^́ṃ
7.022.03b     yā^́ṃ te vásiṣṭho árcati práśastim
7.022.03c     imā^́ bráhma sadhamā^́de juṣasva

7.022.04a     śrudhī^́ hávaṃ vipipānásya ádrer
7.022.04b     bódhā víprasya árcato manīṣā^́m
7.022.04c     kr̥ṣvā^́ dúvāṃsi ántamā sácemā^́

7.022.05a     ná te gíro ápi mr̥ṣye turásya
7.022.05b     ná suṣṭutím asuríyasya vidvā^́n
7.022.05c     sádā te nā^́ma svayaśo vivakmi

7.022.06a     bhū^́ri hí te sávanā mā^́nuṣeṣu
7.022.06b     bhū^́ri manīṣī^́ havate tuvā^́m ít
7.022.06c     mā^́ aré asmán maghavañ jiyók kaḥ

7.022.07a     túbhyéd imā^́ sávanā śūra víśvā
7.022.07b     túbhyam bráhmāṇi várdhanā kr̥ṇomi
7.022.07c     tuváṃ nŕ̥bhir háviyo viśvádhāsi

7.022.08a     nū^́ cin nú te mányamānasya dasma
7.022.08b     úd aśnuvanti mahimā^́nam ugra
7.022.08c     ná vīríyam indara⁺ te ná rā^́dhaḥ

7.022.09a     yé ca pū^́rva ŕ̥ṣayo yé ca nū^́tnā
7.022.09b     índra bráhmāṇi janáyanta víprāḥ
7.022.09c     asmé te santu sakhiyā^́ śivā^́ni
7.022.09d     yūyám pāta suastíbhiḥ sádā naḥ

23

7.023.01a     úd u bráhmāṇi airata śravasyā^́
7.023.01b     índraṃ samaryé mahayā vasiṣṭha
7.023.01c     ā^́ yó víśvāni śávasā tatā^́na
7.023.01d     upaśrotā^́ ma ī^́vato vácāṃsi

7.023.02a     áyāmi ghóṣa indra devájāmir
7.023.02b     irajyánta yác churúdho vívāci
7.023.02c     nahí svám ā^́yuś cikité jáneṣu
7.023.02d     tā^́nī^́d áṃhāṃsi áti parṣi asmā^́n

7.023.03a     yujé ráthaṃ gavéṣaṇaṃ háribhyām
7.023.03b     úpa bráhmāṇi jujuṣāṇám asthuḥ
7.023.03c     ví bādhiṣṭa syá ródasī mahitvā^́
7.023.03d     índro vr̥trā^́ṇi apratī^́ jaghanvā^́n

7.023.04a     ā^́paś cit pipyu staríyo ná gā^́vo
7.023.04b     nákṣann r̥táṃ jaritā^́ras ta indra
7.023.04c     yāhí vāyúr ná niyúto no áchā
7.023.04d     tuváṃ hí dhībhír dáyase ví vā^́jān

7.023.05a     té tvā mádā indara⁺ mādayantu
7.023.05b     śuṣmíṇaṃ tuvirā^́dhasaṃ jaritré
7.023.05c     éko devatrā^́ dáyase hí mártān
7.023.05d     asmíñ chūra sávane mādayasva

7.023.06a     evéd índraṃ vŕ̥ṣaṇaṃ vájrabāhuṃ
7.023.06b     vásiṣṭhāso abhí arcanti arkaíḥ
7.023.06c     sá na stutó vīrávad dhātu gómad
7.023.06d     yūyám pāta suastíbhiḥ sádā naḥ

24

7.024.01a     yóniṣ ṭa indra sádane akāri
7.024.01b     tám ā^́ nŕ̥bhiḥ puruhūta prá yāhi
7.024.01c     áso yáthā no avitā^́ vr̥dhé ca
7.024.01d     dádo vásūni mamádaś ca sómaiḥ

7.024.02a     gr̥bhītáṃ te mána indra dvibárhāḥ
7.024.02b     sutáḥ sómaḥ páriṣiktā mádhūni
7.024.02c     vísr̥ṣṭadhenā bharate suvr̥ktír
7.024.02d     iyám índraṃ jóhuvatī manīṣā^́

7.024.03a     ā^́ no divá ā^́ pr̥thivyā^́ r̥jīṣinn
7.024.03b     idám barhíḥ somapéyāya yāhi
7.024.03c     váhantu tvā hárayo madríañcam
7.024.03d     āṅgūṣám áchā tavásam mádāya

7.024.04a     ā^́ no víśvābhir ūtíbhiḥ sajóṣā
7.024.04b     bráhma juṣāṇó hariaśva yāhi
7.024.04c     várīvr̥jat sthávirebhiḥ suśipra
7.024.04d     asmé dádhad vŕ̥ṣaṇaṃ śúṣmam indra

7.024.05a     eṣá stómo mahá ugrā^́ya vā^́he
7.024.05b     dhurī^́vā^́tyo ná vājáyann adhāyi
7.024.05c     índra tvāyám arká īṭṭe vásūnāṃ
7.024.05d     divī^́va dyā^́m ádhi naḥ śrómataṃ dhāḥ

7.024.06a     evā^́ na indra vā^́riyasya pūrdhi
7.024.06b     prá te mahī^́ṃ sumatíṃ vevidāma
7.024.06c     íṣam pinva maghávadbhyaḥ suvī^́rāṃ
7.024.06d     yūyám pāta suastíbhiḥ sádā naḥ

25

7.025.01a     ā^́ te mahá indara⁺ ūtī^́ ugra
7.025.01b     sámanyavo yát samáranta sénāḥ
7.025.01c     pátāti didyún náriyasya bāhvór
7.025.01d     mā^́ te máno viṣvadríag ví cārīt

7.025.02a     ní durgá indra śnathihi amítrān
7.025.02b     abhí yé no mártiāso° amánti
7.025.02c     āré táṃ śáṃsaṃ kr̥ṇuhi ninitsór
7.025.02d     ā^́ no bhara sambháraṇaṃ vásūnām

7.025.03a     śatáṃ te śiprin ūtáyaḥ sudā^́se
7.025.03b     sahásraṃ śáṃsā utá rātír astu
7.025.03c     jahí vádhar vanúṣo mártiyasya
7.025.03d     asmé dyumnám ádhi rátnaṃ ca dhehi

7.025.04a     tuvā^́vato hí indra krátve ásmi
7.025.04b     tuvā^́vato avitúḥ śūra rātaú
7.025.04c     víśvéd áhāni taviṣīva ugram̐
7.025.04d     ókaḥ kr̥ṇuṣva harivo ná mardhīḥ

7.025.05a     kútsā eté háriaśvāya śūṣám
7.025.05b     índre sáho devájūtam iyānā^́ḥ
7.025.05c     satrā^́ kr̥dhi suhánā śūra vr̥trā^́
7.025.05d     vayáṃ tárutrāḥ sanuyāma vā^́jam

7.025.06a     evā^́ na indra vā^́riyasya pūrdhi
7.025.06b     prá te mahī^́ṃ sumatíṃ vevidāma
7.025.06c     íṣam pinva maghávadbhyaḥ suvī^́rāṃ
7.025.06d     yūyám pāta suastíbhiḥ sádā naḥ

26

7.026.01a     ná sóma índram ásuto mamāda
7.026.01b     nā^́brahmāṇo maghávānaṃ sutā^́saḥ
7.026.01c     tásmā uktháṃ janaye yáj jújoṣan
7.026.01d     nr̥ván návīyaḥ śr̥ṇávad yáthā naḥ

7.026.02a     ukthá-ukthe sóma índram mamāda
7.026.02b     nīthé-nīthe maghávānaṃ sutā^́saḥ
7.026.02c     yád īṃ sabā^́dhaḥ pitáraṃ ná putrā^́ḥ
7.026.02d     samānádakṣā ávase hávante

7.026.03a     cakā^́ra tā^́ kr̥ṇávan nūnám anyā^́
7.026.03b     yā^́ni bruvánti vedhásaḥ sutéṣu
7.026.03c     jánīr iva pátir ékaḥ samānó
7.026.03d     ní māmr̥je púra índraḥ sú sárvāḥ

7.026.04a     evā^́ tám āhur utá śr̥ṇva índra
7.026.04b     éko vibhaktā^́ taráṇir maghā^́nām
7.026.04c     mithastúra ūtáyo yásya pūrvī^́r
7.026.04d     asmé bhadrā^́ṇi saścata priyā^́ṇi

7.026.05a     evā^́ vásiṣṭha índram ūtáye nr̥̄^́n
7.026.05b     kr̥ṣṭīnā^́ṃ vr̥ṣabháṃ suté gr̥ṇāti
7.026.05c     sahasríṇa úpa no māhi vā^́jān
7.026.05d     yūyám pāta suastíbhiḥ sádā naḥ

27

7.027.01a     índraṃ náro nemádhitā havante
7.027.01b     yát pā^́riyā yunájate dhíyas tā^́ḥ
7.027.01c     śū^́ro nŕ̥ṣātā śávasaś cakāná
7.027.01d     ā^́ gómati vrajé bhajā tuváṃ naḥ

7.027.02a     yá indra śúṣmo maghavan te ásti
7.027.02b     śíkṣā sákhibhyaḥ puruhūta nŕ̥bhyaḥ
7.027.02c     tuváṃ hí dr̥̄ḷhā^́+ maghavan vícetā
7.027.02d     ápā vr̥dhi párivr̥taṃ ná rā^́dhaḥ

7.027.03a     índro rā^́jā jágataś carṣaṇīnā^́m
7.027.03b     ádhi kṣámi víṣurūpaṃ yád ásti
7.027.03c     táto dadāti dāśúṣe vásūni
7.027.03d     códad rā^́dha úpastutaś cid arvā^́k

7.027.04a     nū^́ cin na índro maghávā sáhūtī
7.027.04b     dānó vā^́jaṃ ní yamate na ūtī^́
7.027.04c     ánūnā yásya dákṣiṇā pīpā^́ya
7.027.04d     vāmáṃ nŕ̥bhyo abhívītā sákhibhyaḥ

7.027.05a     nū^́ indra rāyé várivas kr̥dhī na
7.027.05b     ā^́ te máno vavr̥tyāma maghā^́ya
7.027.05c     gómad áśvāvad ráthavad viyánto
7.027.05d     yūyám pāta suastíbhiḥ sádā naḥ

28

7.028.01a     bráhmā ṇa indra úpa yāhi vidvā^́n
7.028.01b     arvā^́ñcas te hárayaḥ santu yuktā^́ḥ
7.028.01c     víśve cid dhí tvā vihávanta mártā
7.028.01d     asmā^́kam íc chr̥ṇuhi viśvaminva

7.028.02a     hávaṃ ta indra mahimā^́ ví ānaḍ
7.028.02b     bráhma yát pā^́si śavasinn ŕ̥ṣīṇām
7.028.02c     ā^́ yád vájraṃ dadhiṣé hásta ugra
7.028.02d     ghoráḥ sán krátvā janiṣṭhā áṣāḷhaḥ

7.028.03a     táva práṇītī indra jóhuvānān
7.028.03b     sáṃ yán nr̥̃^́n ná ródasī ninétha
7.028.03c     mahé kṣatrā^́ya śávase hí jajñe
7.028.03d     átūtujiṃ cit tū^́tujir aśiśnat

7.028.04a     ebhír na indra áhabhir daśasya
7.028.04b     durmitrā^́so hí kṣitáyaḥ pávante
7.028.04c     práti yác cáṣṭe ánr̥tam anenā^́
7.028.04d     áva dvitā^́ váruṇo māyī^́ naḥ sāt

7.028.05a     vocéméd índram maghávānam enam
7.028.05b     mahó rāyó rā^́dhaso yád dádan naḥ
7.028.05c     yó árcato bráhmakr̥tim áviṣṭho
7.028.05d     yūyám pāta suastíbhiḥ sádā naḥ

29

7.029.01a     ayáṃ sóma indara⁺ túbhya° sunva
7.029.01b     ā^́ tú prá yāhi harivas tádokāḥ
7.029.01c     píbā tú asyá súṣutasya cā^́ror
7.029.01d     dádo maghā^́ni maghavann iyānáḥ

7.029.02a     bráhman vīra bráhmakr̥tiṃ juṣāṇó
7.029.02b     arvācīnó háribhir yāhi tū^́yam
7.029.02c     asmínn ū ṣú sávane mādayasva
7.029.02d     úpa bráhmāṇi śr̥ṇava imā^́ naḥ

7.029.03a     kā^́ te asti áraṃkr̥tiḥ suuktaíḥ
7.029.03b     kadā^́ nūnáṃ te maghavan dāśema
7.029.03c     víśvā matī^́r ā^́ tatane tuvāyā^́
7.029.03d     ádhā ma indra śr̥ṇavo hávemā^́

7.029.04a     utó ghā té puruṣíyā íd āsan
7.029.04b     yéṣām pū^́rveṣām áśr̥ṇor ŕ̥ṣīṇām
7.029.04c     ádhāháṃ tvā maghavañ johavīmi
7.029.04d     tváṃ na indrāsi prámatiḥ pitéva

7.029.05a     vocéméd índram maghávānam enam
7.029.05b     mahó rāyó rā^́dhaso yád dádan naḥ
7.029.05c     yó árcato bráhmakr̥tim áviṣṭho
7.029.05d     yūyám pāta suastíbhiḥ sádā naḥ

30

7.030.01a     ā^́ no deva śávasā yāhi śuṣmin
7.030.01b     bhávā vr̥dhá indara⁺ rāyó asyá
7.030.01c     mahé nr̥mṇā^́ya nr̥pate suvajra
7.030.01d     máhi kṣatrā^́ya paúṃsiyāya śūra

7.030.02a     hávanta u tvā háviyaṃ vívāci
7.030.02b     tanū^́ṣu śū^́rāḥ sū^́riyasya sātaú
7.030.02c     tuváṃ víśveṣu séniyo jáneṣu
7.030.02d     tuváṃ vr̥trā^́ṇi randhayā suhántu

7.030.03a     áhā yád indra sudínā viuchā^́n
7.030.03b     dádho yát ketúm upamáṃ samátsu
7.030.03c     ní agníḥ sīdad ásuro ná hótā
7.030.03d     huvānó átra subhágāya devā^́n

7.030.04a     vayáṃ té ta indara⁺ yé ca deva
7.030.04b     stávanta śūra dádato maghā^́ni
7.030.04c     yáchā sūríbhya upamáṃ várūthaṃ
7.030.04d     suābhúvo jaraṇā^́m aśnavanta

7.030.05a     vocéméd índram maghávānam enam
7.030.05b     mahó rāyó rā^́dhaso yád dádan naḥ
7.030.05c     yó árcato bráhmakr̥tim áviṣṭho
7.030.05d     yūyám pāta suastíbhiḥ sádā naḥ

31

7.031.01a     prá va índrāya mā^́danaṃ
7.031.01b     háriaśvāya gāyata
7.031.01c     sákhāyaḥ somapā^́vane

7.031.02a     śáṃséd uktháṃ sudā^́nava
7.031.02b     utá dyukṣáṃ yáthā náraḥ
7.031.02c     cakr̥mā^́ satyárādhase

7.031.03a     tuváṃ na indra vājayús
7.031.03b     tuváṃ gavyúḥ śatakrato
7.031.03c     tuváṃ hiraṇyayúr vaso

7.031.04a     vayám indra tuvāyávo
7.031.04b     abhí prá ṇonumo vr̥ṣan
7.031.04c     viddhī^́ tú asyá no vaso

7.031.05a     mā^́ no nidé ca váktave
7.031.05b     aryó randhīr árāvaṇe
7.031.05c     tuvé ápi krátur máma

7.031.06a     tuváṃ vármāsi sapráthaḥ
7.031.06b     puroyodháś ca vr̥trahan
7.031.06c     tváyā práti bruve yujā^́

7.031.07a     mahā^́m̐ utā^́si yásya te
7.031.07b     ánu svadhā^́varī sáhaḥ
7.031.07c     mamnā^́te indra ródasī

7.031.08a     táṃ tvā marútvatī pári
7.031.08b     bhúvad vā^́ṇī sayā^́varī
7.031.08c     nákṣamāṇā sahá dyúbhiḥ

7.031.09a     ūrdhvā^́sas tvā^́nu índavo
7.031.09b     bhúvan dasmám úpa dyávi
7.031.09c     sáṃ te namanta kr̥ṣṭáyaḥ

7.031.10a     prá vo mahé mahivŕ̥dhe bharadhvam
7.031.10b     prácetase prá sumatíṃ kr̥ṇudhvam
7.031.10c     víśaḥ pūrvī^́ḥ prá carā carṣaṇiprā^́ḥ

7.031.11a     uruvyácase mahíne suvr̥ktím
7.031.11b     índrāya bráhma janayanta víprāḥ
7.031.11c     tásya vratā^́ni ná minanti dhī^́rāḥ

7.031.12a     índraṃ vā^́ṇīr ánuttamanyum evá
7.031.12b     satrā^́ rā^́jānaṃ dadhire sáhadhyai
7.031.12c     háriaśvāya barhayā sám āpī^́n

32

7.032.01a     mó ṣú tvā vāghátaś caná
7.032.01b     āré asmán ní rīraman
7.032.01c     ārā^́ttāc cit sadhamā^́daṃ na ā^́ gahi
7.032.01d     ihá vā sánn úpa śrudhi

7.032.02a     imé hí te brahmakŕ̥taḥ suté sácā
7.032.02b     mádhau ná mákṣa ā^́sate
7.032.02c     índre kā^́maṃ jaritā^́ro vasūyávo
7.032.02d     ráthe ná pā^́dam ā^́ dadhuḥ

7.032.03a     rāyáskāmo vájrahastaṃ sudákṣiṇam
7.032.03b     putró ná pitáraṃ huve

7.032.04a     imá índrāya sunvire
7.032.04b     sómāso dádhiāśiraḥ
7.032.04c     tā^́m̐ ā^́ mádāya vajrahasta pītáye
7.032.04d     háribhyāṃ yāhi óka ā^́

7.032.05a     śrávac chrútkarṇa īyate vásūnãṃ
7.032.05b     nū^́ cin no mardhiṣad gíraḥ
7.032.05c     sadyáś cid yáḥ sahásrāṇi śatā^́ dádan
7.032.05d     nákir dítsantam ā^́ minat

7.032.06a     sá vīró ápratiṣkuta
7.032.06b     índreṇa śūśuve nŕ̥bhiḥ
7.032.06c     yás te gabhīrā^́ sávanāni vr̥trahan
7.032.06d     sunóti ā^́ ca dhā^́vati

7.032.07a     bhávā várūtham maghavan maghónãṃ
7.032.07b     yát samájāsi śárdhataḥ
7.032.07c     ví tvā^́hatasya védanam bhajemahi
7.032.07d     ā^́ dūṇā^́śo bharā gáyam

7.032.08a     sunótā somapā^́vane
7.032.08b     sómam índrāya vajríṇe
7.032.08c     pácatā paktī^́r ávase kr̥ṇudhvám ít
7.032.08d     pr̥ṇánn ít pr̥ṇaté máyaḥ

7.032.09a     mā^́ sredhata somino dákṣatā mahé
7.032.09b     kr̥ṇudhváṃ rāyá ātúje
7.032.09c     taráṇir íj jayati kṣéti púṣyati
7.032.09d     ná devā^́saḥ kavatnáve

7.032.10a     nákiḥ sudã^́so rátham
7.032.10b     pári āsa ná rīramat
7.032.10c     índro yásya avitā^́ yásya marúto
7.032.10d     gámat sá gómati vrajé

7.032.11a     gámad vā^́jaṃ vājáyann indra mártiyo
7.032.11b     yásya tvám avitā^́ bhúvaḥ
7.032.11c     asmā^́kam bodhi avitā^́ ráthānãm
7.032.11d     asmā^́kaṃ śūra nr̥̄ṇã^́m⁺

7.032.12a     úd ín nú asya ricyate
7.032.12b     áṃśo dhánaṃ ná jigyúṣaḥ
7.032.12c     yá índro hárivān ná dabhanti táṃ rípo
7.032.12d     dákṣaṃ dadhāti somíni

7.032.13a     mántram ákharvaṃ súdhitaṃ supéśasaṃ
7.032.13b     dádhāta yajñíyeṣu ā^́
7.032.13c     pūrvī^́ś caná prásitayas taranti táṃ
7.032.13d     yá índre kármaṇā bhúvat

7.032.14a     kás tám indra tuvā^́vasum
7.032.14b     ā^́ mártiyo dadharṣati
7.032.14c     śraddhā^́ ít te maghavan pā^́riye diví
7.032.14d     vājī^́ vā^́jaṃ siṣāsati

7.032.15a     maghónaḥ sma vr̥trahátyeṣu codaya
7.032.15b     yé dádati priyā^́ vásu
7.032.15c     táva práṇītī hariaśva sūríbhir
7.032.15d     víśvā tarema duritā^́

7.032.16a     távéd indrāvamáṃ vásu
7.032.16b     tuvám puṣyasi madhyamám
7.032.16c     satrā^́ víśvasya paramásya rājasi
7.032.16d     nákiṣ ṭvā góṣu vr̥ṇvate

7.032.17a     tuváṃ víśvasya dhanadā^́ asi śrutó
7.032.17b     yá īm bhávanti ājáyaḥ
7.032.17c     távāyáṃ víśvaḥ puruhūta pā^́rthivo
7.032.17d     avasyúr nā^́ma bhikṣate

7.032.18a     yád indra yā^́vatas tuvám
7.032.18b     etā^́vad ahám ī^́śīya
7.032.18c     stotā^́ram íd didhiṣeya radāvaso
7.032.18d     ná pāpatvā^́ya rāsīya

7.032.19a     śíkṣeyam ín mahayaté divé-dive
7.032.19b     rāyá ā^́ kuhacidvíde
7.032.19c     nahí tvád anyán maghavan na ā^́piyaṃ
7.032.19d     vásyo ásti pitā^́ caná

7.032.20a     taráṇir ít siṣāsati
7.032.20b     vā^́jam púraṃdhiyā yujā^́
7.032.20c     ā^́ va índram puruhūtáṃ name girā^́
7.032.20d     nemíṃ táṣṭeva sudrúvam

7.032.21a     ná duṣṭutī^́ mártiyo vindate vásu
7.032.21b     ná srédhantaṃ rayír naśat
7.032.21c     suśáktir ín maghavan túbhyam mā^́vate
7.032.21d     deṣṇáṃ yát pā^́riye diví

7.032.22a     abhí tvā śūra nonumo
7.032.22b     ádugdhā iva dhenávaḥ
7.032.22c     ī^́śānam asyá jágataḥ suvardŕ̥śam
7.032.22d     ī^́śānam indra tasthúṣaḥ

7.032.23a     ná tvā^́vām̐ anyó diviyó ná pā^́rthivo
7.032.23b     ná jātó ná janiṣyate
7.032.23c     aśvāyánto maghavann indra vājíno
7.032.23d     gavyántas tvā havāmahe

7.032.24a     abhī^́ ṣatás tád ā^́ bhara
7.032.24b     índra jyā^́yaḥ kánīyasaḥ
7.032.24c     purūvásur hí maghavan sanā^́d ási
7.032.24d     bháre-bhare ca háviyaḥ

7.032.25a     párā ṇudasva maghavann amítrān
7.032.25b     suvédā no vásū kr̥dhi
7.032.25c     asmā^́kam bodhi avitā^́ mahādhané
7.032.25d     bhávā vr̥dháḥ sákhīnãm

7.032.26a     índra krátuṃ na ā^́ bhara
7.032.26b     pitā^́ putrébhiyo yáthā
7.032.26c     śíkṣā ṇo asmín puruhūta yā^́mani
7.032.26d     jīvā^́ jyótir aśīmahi

7.032.27a     mā^́ no ájñātā vr̥jánā durādhíyo
7.032.27b     mā^́śivāso áva kramuḥ
7.032.27c     tváyā vayám pravátaḥ śáśvatīr apó
7.032.27d     áti śūra tarāmasi

33

7.033.01a     śvityáñco mā dakṣiṇatáskapardā
7.033.01b     dhiyaṃjinvā^́so abhí hí pramandúḥ
7.033.01c     uttíṣṭhan voce pári barhíṣo nr̥̄^́n
7.033.01d     ná me dūrā^́d ávitave vásiṣṭhāḥ

7.033.02a     dūrā^́d índram anayann ā^́ suténa
7.033.02b     tiró vaiśantám áti pā^́ntam ugrám
7.033.02c     pā^́śadyumnasya vāyatásya sómāt
7.033.02d     sutā^́d índro avr̥ṇītā vásiṣṭhān

7.033.03a     evén nú kaṃ síndhum ebhis tatāra
7.033.03b     evén nú kam bhedám ebhir jaghāna
7.033.03c     evén nú kaṃ dāśarājñé sudā^́sam
7.033.03d     prā^́vad índro bráhmaṇā vo vasiṣṭhāḥ

7.033.04a     júṣṭī naro bráhmaṇā vaḥ pitr̥̄ṇā^́m
7.033.04b     ákṣam avyayaṃ ná kílā riṣātha
7.033.04c     yác chákvarīṣu br̥hatā^́ ráveṇa
7.033.04d     índre śúṣmam ádadhātā vasiṣṭhāḥ

7.033.05a     úd dyā^́m ivét tr̥ṣṇájo nāthitā^́so
7.033.05b     ádīdhayur dāśarājñé vr̥tā^́saḥ
7.033.05c     vásiṣṭhasya stuvatá índro aśrod
7.033.05d     urúṃ tŕ̥tsubhyo akr̥ṇod ulokám†

7.033.06a     daṇḍā^́ ivéd goájanāsa āsan
7.033.06b     párichinnā bharatā^́ arbhakā^́saḥ
7.033.06c     ábhavac ca puraetā^́ vásiṣṭha
7.033.06d     ā^́d ít tŕ̥tsūnāṃ víśo aprathanta

7.033.07a     tráyaḥ kr̥ṇvanti bhúvaneṣu rétas
7.033.07b     tisráḥ prajā^́ ā^́riyā jyótiragrāḥ
7.033.07c     tráyo gharmā^́sa uṣásaṃ sacante
7.033.07d     sárvām̐ ít tā^́m̐ ánu vidur vásiṣṭhāḥ

7.033.08a     sū^́ryasyeva vakṣátho jyótir eṣāṃ
7.033.08b     samudrásyeva mahimā^́ gabhīráḥ
7.033.08c     vā^́tasyeva prajavó nā^́niyéna
7.033.08d     stómo vasiṣṭhā ánuetave vaḥ

7.033.09a     tá ín niṇyáṃ hŕ̥dayasya praketaíḥ
7.033.09b     sahásravalśam abhí sáṃ caranti
7.033.09c     yaména tatám paridhíṃ váyanto
7.033.09d     apsarása úpa sedur vásiṣṭhāḥ

7.033.10a     vidyúto jyótiḥ pári saṃjíhānam
7.033.10b     mitrā^́váruṇā yád ápaśyatāṃ tvā
7.033.10c     tát te jánma utá ékaṃ vasiṣṭha
7.033.10d     agástyo yát tvā viśá ājabhā^́ra

7.033.11a     utā^́si maitrāvaruṇó vasiṣṭha
7.033.11b     urváśyā brahman mánasó 'dhi jātáḥ
7.033.11c     drapsáṃ skannám bráhmaṇā daíviyena
7.033.11d     víśve devā^́ḥ púṣkare tvādadanta

7.033.12a     sá praketá ubháyasya pravidvā^́n
7.033.12b     sahásradāna utá vā sádānaḥ
7.033.12c     yaména tatám paridhíṃ vayiṣyánn
7.033.12d     apsarásaḥ pári jajñe vásiṣṭhaḥ

7.033.13a     satré ha jātā^́v iṣitā^́ námobhiḥ
7.033.13b     kumbhé rétaḥ siṣicatuḥ samānám
7.033.13c     táto ha mā^́na úd iyāya mádhyāt
7.033.13d     táto jātám ŕ̥ṣim āhur vásiṣṭham

7.033.14a     ukthabhŕ̥taṃ sāmabhŕ̥tam bibharti
7.033.14b     grā^́vāṇam bíbhrat prá vadāti ágre
7.033.14c     úpainam ādhvaṃ sumanasyámānā
7.033.14d     ā^́ vo gachāti pratr̥do vásiṣṭhaḥ

34

7.034.01a     prá śukra étu devī^́ manīṣā^́
7.034.01b     asmát sútaṣṭo rátho ná vājī^́

7.034.02a     vidúḥ pr̥thivyā^́ divó janítraṃ
7.034.02b     śr̥ṇvánti ā^́po ádha kṣárantīḥ

7.034.03a     ā^́paś cid asmai pínvanta pr̥thvī^́r
7.034.03b     vr̥tréṣu śū^́rā máṃsanta ugrā^́ḥ

7.034.04a     ā^́ dhūrṣú asmai dádhāta áśvān
7.034.04b     índro ná vajrī^́ híraṇyabāhuḥ

7.034.05a     abhí prá sthāta áheva yajñáṃ
7.034.05b     yā^́teva pátman tmánā hinota

7.034.06a     tmánā samátsu hinóta yajñáṃ
7.034.06b     dádhāta ketúṃ jánāya vīrám

7.034.07a     úd asya śúṣmād bhānúr ná ārta
7.034.07b     bíbharti bhārám pr̥thivī^́ ná bhū^́ma

7.034.08a     hváyāmi devā^́m̐ áyātur agne
7.034.08b     sā^́dhann r̥téna dhíyaṃ dadhāmi

7.034.09a     abhí vo devī^́ṃ dhíyaṃ dadhidhvam
7.034.09b     prá vo devatrā^́ vā^́caṃ kr̥ṇudhvam

7.034.10a     ā^́ caṣṭa āsām pā^́tho nadī^́nāṃ
7.034.10b     váruṇa ugráḥ sahásracakṣāḥ

7.034.11a     rā^́jā rāṣṭrā^́nām péśo nadī^́nām
7.034.11b     ánuttam asmai kṣatráṃ viśvā^́yu

7.034.12a     áviṣṭo asmā^́n víśvāsu vikṣú
7.034.12b     ádyuṃ kr̥ṇota śáṃsaṃ ninitsóḥ

7.034.13a     ví etu didyúd dviṣā^́m áśevā
7.034.13b     yuyóta víṣvag rápas tanū^́nām

7.034.14a     ávīn no agnír havyā^́n námobhiḥ
7.034.14b     práyiṣṭho⁺ asmā adhāyi stómaḥ

7.034.15a     sajū^́r devébhir apā^́ṃ nápātaṃ
7.034.15b     sákhāyaṃ kr̥dhvaṃ śivó no astu

7.034.16a     abjã^́m ukthaír áhiṃ gr̥ṇīṣe
7.034.16b     budhné nadī^́nāṃ rájassu ṣī^́dan

7.034.17a     mā^́ no áhir budhníyo riṣé dhān
7.034.17b     mā^́ yajñó asya sridhad r̥tāyóḥ

7.034.18a     utá na eṣú nŕ̥ṣu śrávo dhuḥ
7.034.18b     prá rāyé yantu śárdhanto aryáḥ

7.034.19a     tápanti śátruṃ súvar ṇá bhū^́mā
7.034.19b     mahā^́senāso ámebhir eṣām

7.034.20a     ā^́ yán naḥ pátnīr gámanti áchā
7.034.20b     tváṣṭā supāṇír dádhātu vīrā^́n

7.034.21a     práti na stómaṃ tváṣṭā juṣeta
7.034.21b     siyā^́d asmé arámatir vasūyúḥ

7.034.22a     tā^́ no rāsan rātiṣā^́co vásūni
7.034.22b     ā^́ ródasī varuṇānī^́ śr̥ṇotu
7.034.22c     várūtrībhiḥ suśaraṇó no astu
7.034.22d     tváṣṭā sudátro ví dadhātu rā^́yaḥ

7.034.23a     tán no rā^́yaḥ párvatās tán na ā^́pas
7.034.23b     tád rātiṣā^́ca óṣadhīr utá dyaúḥ
7.034.23c     vánaspátibhiḥ pr̥thivī^́ sajóṣā
7.034.23d     ubhé ródasī pári pāsato naḥ

7.034.24a     ánu tád urvī^́ ródasī jihātām
7.034.24b     ánu dyukṣó váruṇa índrasakhā
7.034.24c     ánu víśve marúto yé sahā^́so
7.034.24d     rāyáḥ siyāma dharúṇaṃ dhiyádhyai

7.034.25a     tán na índro váruṇo mitró agnír
7.034.25b     ā^́pa óṣadhīr vaníno juṣanta
7.034.25c     śárman siyāma marútām upásthe
7.034.25d     yūyám pāta suastíbhiḥ sádā naḥ

35

7.035.01a     śáṃ na indrāgnī^́ bhavatām ávobhiḥ
7.035.01b     śáṃ na índrāváruṇā rātáhavyā
7.035.01c     śám índrāsómā suvitā^́ya śáṃ yóḥ
7.035.01d     śáṃ na índrāpūṣáṇā vā^́jasātau

7.035.02a     śáṃ no bhágaḥ śám u naḥ śáṃso astu
7.035.02b     śáṃ naḥ púraṃdhiḥ śám u santu rā^́yaḥ
7.035.02c     śáṃ naḥ satyásya suyámasya śáṃsaḥ
7.035.02d     śáṃ no aryamā^́ purujātó astu

7.035.03a     śáṃ no dhātā^́ śám u dhartā^́ no astu
7.035.03b     śáṃ na urūcī^́ bhavatu svadhā^́bhiḥ
7.035.03c     śáṃ ródasī br̥hatī^́ śáṃ no ádriḥ
7.035.03d     śáṃ no devā^́nāṃ suhávāni santu

7.035.04a     śáṃ no agnír jyótiranīko astu
7.035.04b     śáṃ no mitrā^́váruṇāv aśvínā śám
7.035.04c     śáṃ naḥ sukŕ̥tāṃ sukr̥tā^́ni santu
7.035.04d     śáṃ na iṣiró abhí vātu vā^́taḥ

7.035.05a     śáṃ no dyā^́vāpr̥thivī^́ pūrváhūtau
7.035.05b     śám antárikṣaṃ dr̥śáye no astu
7.035.05c     śáṃ na óṣadhīr vaníno bhavantu
7.035.05d     śáṃ no rájasas pátir astu jiṣṇúḥ

7.035.06a     śáṃ na índro vásubhir devó astu
7.035.06b     śám ādityébhir váruṇaḥ suśáṃsaḥ
7.035.06c     śáṃ no rudró rudarébhir⁺ jálāṣaḥ
7.035.06d     śáṃ nas tváṣṭā gnā^́bhir ihá śr̥ṇotu

7.035.07a     śáṃ naḥ sómo bhavatu bráhma śáṃ naḥ
7.035.07b     śáṃ no grā^́vāṇaḥ śám u santu yajñā^́ḥ
7.035.07c     śáṃ naḥ svárūṇām mitáyo bhavantu
7.035.07d     śáṃ naḥ prasúvaḥ śám u astu védiḥ

7.035.08a     śáṃ naḥ sū^́rya urucákṣā úd etu
7.035.08b     śáṃ naś cátasraḥ pradíśo bhavantu
7.035.08c     śáṃ naḥ párvatā dhruváyo bhavantu
7.035.08d     śáṃ naḥ síndhavaḥ śám u santu ā^́paḥ

7.035.09a     śáṃ no áditir bhavatu vratébhiḥ
7.035.09b     śáṃ no bhavantu marútaḥ suarkā^́ḥ
7.035.09c     śáṃ no víṣṇuḥ śám u pūṣā^́ no astu
7.035.09d     śáṃ no bhavítraṃ śám u astu vāyúḥ

7.035.10a     śáṃ no deváḥ savitā^́ trā^́yamāṇaḥ
7.035.10b     śáṃ no bhavantu uṣáso vibhātī^́ḥ
7.035.10c     śáṃ naḥ parjányo bhavatu prajā^́bhyaḥ
7.035.10d     śáṃ naḥ kṣétrasya pátir astu śambhúḥ

7.035.11a     śáṃ no devā^́ viśvádevā bhavantu
7.035.11b     śáṃ sárasvatī sahá dhībhír astu
7.035.11c     śám abhiṣā^́caḥ śám u rātiṣā^́caḥ
7.035.11d     śáṃ no divyā^́ḥ pā^́rthivāḥ śáṃ no ápyāḥ

7.035.12a     śáṃ naḥ satyásya pátayo bhavantu
7.035.12b     śáṃ no árvantaḥ śám u santu gā^́vaḥ
7.035.12c     śáṃ na r̥bhávaḥ sukŕ̥taḥ suhástāḥ
7.035.12d     śáṃ no bhavantu pitáro háveṣu

7.035.13a     śáṃ no ajá ékapād devó astu
7.035.13b     śáṃ no áhir budhníyaḥ śáṃ samudráḥ
7.035.13c     śáṃ no apã^́ṃ nápāt perúr astu
7.035.13d     śáṃ naḥ pŕ̥śnir bhavatu devágopā

7.035.14a     ādityā^́ rudrā^́ vásavo juṣanta
7.035.14b     idám bráhma kriyámāṇaṃ návīyaḥ
7.035.14c     śr̥ṇvántu no diviyā^́ḥ pā^́rthivāso
7.035.14d     gõ^́jātā utá yé yajñíyāsaḥ

7.035.15a     yé devā^́nāṃ yajñíyā yajñíyānām
7.035.15b     mánor yájatrā amŕ̥tā r̥tajñā^́ḥ
7.035.15c     té no rāsantām urugāyám adyá
7.035.15d     yūyám pāta suastíbhiḥ sádā naḥ

36

7.036.01a     prá bráhma etu sádanād r̥tásya
7.036.01b     ví raśmíbhiḥ sasr̥je sū^́riyo gā^́ḥ
7.036.01c     ví sā^́nunā pr̥thivī^́ sasra urvī^́
7.036.01d     pr̥thú prátīkam ádhi édhe agníḥ

7.036.02a     imā^́ṃ vām mitrāvaruṇā suvr̥ktím
7.036.02b     íṣaṃ ná kr̥ṇve asurā návīyaḥ
7.036.02c     inó vām anyáḥ padavī^́r ádabdho
7.036.02d     jánaṃ ca mitró yatati bruvāṇáḥ

7.036.03a     ā^́ vā^́tasya dhrájato ranta ityā^́
7.036.03b     ápīpayanta dhenávo ná sū^́dāḥ
7.036.03c     mahó diváḥ sádane jā^́yamāno
7.036.03d     ácikradad vr̥ṣabháḥ sásmin ū^́dhan

7.036.04a     girā^́ yá etā^́ yunájad dhárī ta
7.036.04b     índra priyā^́ suráthā śūra dhāyū^́
7.036.04c     prá yó manyúṃ rírikṣato minā^́ti
7.036.04d     ā^́ sukrátum aryamáṇaṃ vavr̥tyām

7.036.05a     yájante asya sakhiyáṃ váyaś ca
7.036.05b     namasvínaḥ suvá r̥tásya dhā^́man
7.036.05c     ví pŕ̥kṣo bābadhe nŕ̥bhi stávāna
7.036.05d     idáṃ námo rudarā^́ya⁺ práyiṣṭham⁺

7.036.06a     ā^́ yát sākáṃ yaśáso vāvaśānā^́ḥ
7.036.06b     sárasvatī saptáthī síndhumātā
7.036.06c     yā^́ḥ suṣváyanta sudúghāḥ sudhārā^́
7.036.06d     abhí svéna páyasā pī^́piyānāḥ

7.036.07a     utá tyé no marúto mandasānā^́
7.036.07b     dhíyaṃ tokáṃ ca vājíno avantu
7.036.07c     mā^́ naḥ pári khyad ákṣarā cáranti
7.036.07d     ávīvr̥dhan yújiyaṃ té rayíṃ naḥ

7.036.08a     prá vo mahī^́m arámatiṃ kr̥ṇudhvam
7.036.08b     prá pūṣáṇaṃ vidathíyaṃ ná vīrám
7.036.08c     bhágaṃ dhiyó avitā^́raṃ no asyā^́ḥ
7.036.08d     sātaú vā^́jaṃ rātiṣā^́cam púraṃdhim

7.036.09a     áchāyáṃ vo marutaḥ ślóka etu
7.036.09b     áchā víṣṇuṃ niṣiktapā^́m ávobhiḥ
7.036.09c     utá prajā^́yai gr̥ṇaté váyo dhur
7.036.09d     yūyám pāta suastíbhiḥ sádā naḥ

37

7.037.01a     ā^́ vo vā^́hiṣṭho vahatu stavádhyai
7.037.01b     rátho vājā r̥bhukṣaṇo ámr̥ktaḥ
7.037.01c     abhí tripr̥ṣṭhaíḥ sávaneṣu sómair
7.037.01d     máde suśiprā mahábhiḥ pr̥ṇadhvam

7.037.02a     yūyáṃ ha rátnam maghávatsu dhattha
7.037.02b     suvardŕ̥śa r̥bhukṣaṇo ámr̥ktam
7.037.02c     sáṃ yajñéṣu svadhāvantaḥ pibadhvaṃ
7.037.02d     ví no rā^́dhāṃsi matíbhir dayadhvam

7.037.03a     uvócitha hí maghavan dayiṣṇám⁺
7.037.03b     mahó árbhasya vásuno vibhāgé
7.037.03c     ubhā^́ te pūrṇā^́ vásunā gábhastī
7.037.03d     ná sūnŕ̥tā ní yamate vasavyā^̀

7.037.04a     tuvám indra suáyaśā r̥bhukṣā^́
7.037.04b     vā^́jo ná sādhúr ástam eṣi ŕ̥kvā
7.037.04c     vayáṃ nú te dāśuvā^́ṃsaḥ siyāma
7.037.04d     bráhma kr̥ṇvánto harivo vásiṣṭhāḥ

7.037.05a     sánitāsi praváto dāśúṣe cid
7.037.05b     yā^́bhir víveṣo hariaśva dhībhíḥ
7.037.05c     vavanmā^́ nú te yújiyābhir ūtī^́
7.037.05d     kadā^́ na indra rāyá ā^́ daśasyeḥ

7.037.06a     vāsáyasīva vedhásas tuváṃ naḥ
7.037.06b     kadā^́ na indra vácaso bubodhaḥ
7.037.06c     ástaṃ tātyā^́ dhiyā^́ rayíṃ suvī^́ram
7.037.06d     pr̥kṣó no árvā ní uhīta vājī^́

7.037.07a     abhí yáṃ devī^́ nírr̥tiś cid ī^́śe
7.037.07b     nákṣanta índraṃ śarádaḥ supŕ̥kṣaḥ
7.037.07c     úpa tribandhúr jarádaṣṭim eti
7.037.07d     ásvaveśaṃ yáṃ kr̥ṇávanta mártāḥ

7.037.08a     ā^́ no rā^́dhāṃsi savita stavádhyā
7.037.08b     ā^́ rā^́yo yantu párvatasya rātaú
7.037.08c     sádā no diviyáḥ pāyúḥ siṣaktu
7.037.08d     yūyám pāta suastíbhiḥ sádā naḥ

38

7.038.01a     úd u ṣyá deváḥ savitā^́ yayāma
7.038.01b     hiraṇyáyīm amátiṃ yā^́m áśiśret
7.038.01c     nūnám bhágo háviyo mā^́nuṣebhir
7.038.01d     ví yó rátnā purūvásur dádhāti

7.038.02a     úd u tiṣṭha savitaḥ śrudhí asyá
7.038.02b     híraṇyapāṇe prábhr̥tāv r̥tásya
7.038.02c     ví urvī^́m pr̥thvī^́m amátiṃ sr̥jāná
7.038.02d     ā^́ nŕ̥bhyo martabhójanaṃ suvānáḥ

7.038.03a     ápi ṣṭutáḥ savitā^́ devó astu
7.038.03b     yám ā^́ cid víśve vásavo gr̥ṇánti
7.038.03c     sá na stómān namasíyaś cáno dhād
7.038.03d     víśvebhiḥ pātu pāyúbhir ní sūrī^́n

7.038.04a     abhí yáṃ devī^́ áditir gr̥ṇā^́ti
7.038.04b     saváṃ devásya savitúr juṣāṇā^́
7.038.04c     abhí samrā^́jo váruṇo gr̥ṇanti
7.038.04d     abhí mitrā^́so aryamā^́ sajóṣāḥ

7.038.05a     abhí yé mithó vanúṣaḥ sápante
7.038.05b     rātíṃ divó rātiṣā^́caḥ pr̥thivyā^́ḥ
7.038.05c     áhir budhníya utá naḥ śr̥ṇotu
7.038.05d     várūtrī ékadhenubhir ní pātu

7.038.06a     ánu tán no jã^́spátir maṃsīṣṭa
7.038.06b     rátnaṃ devásya savitúr iyānáḥ
7.038.06c     bhágam ugró ávase jóhavīti
7.038.06d     bhágam ánugro ádha yāti rátnam

7.038.07a     śáṃ no bhavantu vājíno háveṣu
7.038.07b     devátātā mitádravaḥ suarkā^́ḥ
7.038.07c     jambháyanto áhiṃ vŕ̥kaṃ rákṣāṃsi
7.038.07d     sánemi asmád yuyavann ámīvāḥ

7.038.08a     vā^́je-vāje avata vājino no
7.038.08b     dháneṣu viprā amr̥tā r̥tajñāḥ
7.038.08c     asyá mádhvaḥ pibata mādáyadhvaṃ
7.038.08d     tr̥ptā^́ yāta pathíbhir devayā^́naiḥ

39

7.039.01a     ūrdhvó agníḥ sumatíṃ vásvo aśret
7.039.01b     pratīcī^́ jūrṇír devátātim eti
7.039.01c     bhejā^́te ádrī rathíyeva pánthām
7.039.01d     r̥táṃ hótā na iṣitó yajāti

7.039.02a     prá vāvr̥je suprayā^́ barhír eṣām
7.039.02b     ā^́ viśpátīva bī^́riṭa iyāte
7.039.02c     viśā^́m aktór uṣásaḥ pūrváhūtau
7.039.02d     vāyúḥ pūṣā^́ suastáye niyútvān

7.039.03a     jmayā^́ átra vásavo ranta devā^́
7.039.03b     urā^́v antárikṣe marjayanta śubhrā^́ḥ
7.039.03c     arvā^́k pathá urujrayaḥ kr̥ṇudhvaṃ
7.039.03d     śrótā dūtásya jagmúṣo no asyá

7.039.04a     té hí yajñéṣu yajñíyāsa ū^́māḥ
7.039.04b     sadhásthaṃ víśve abhí sánti devā^́ḥ
7.039.04c     tā^́m̐ adhvará uśató yakṣi agne
7.039.04d     śruṣṭī^́ bhágaṃ nā^́satiyā púraṃdhim

7.039.05a     ā^́ agne gíro divá ā^́ pr̥thivyā^́
7.039.05b     mitráṃ vaha váruṇam índram agním
7.039.05c     ā^́ryamáṇam áditiṃ víṣṇum eṣāṃ
7.039.05d     sárasvatī marúto mādayantām

7.039.06a     raré havyám matíbhir yajñíyānāṃ
7.039.06b     nákṣat kā^́mam mártiyānām ásinvan
7.039.06c     dhā^́tā rayím avidasyáṃ sadāsā^́ṃ
7.039.06d     sakṣīmáhi yújiyebhir nú devaíḥ

7.039.07a     nū^́ ródasī abhíṣṭute vásiṣṭhair
7.039.07b     r̥tā^́vāno váruṇo mitró agníḥ
7.039.07c     yáchantu candrā^́ upamáṃ no arkáṃ
7.039.07d     yūyám pāta suastíbhiḥ sádā naḥ

40

7.040.01a     õ^́ śruṣṭír vidathíyā sám etu
7.040.01b     práti stómaṃ dadhīmahi turā^́ṇām
7.040.01c     yád adyá deváḥ savitā^́ suvā^́ti
7.040.01d     siyā^́ma asya ratníno vibhāgé

7.040.02a     mitrás tán no váruṇo ródasī ca
7.040.02b     dyúbhaktam índro aryamā^́ dadātu
7.040.02c     dídeṣṭu devī^́ áditī rẽ^́kṇo
7.040.02d     vāyúś ca yán niyuvaíte bhágaś ca

7.040.03a     séd ugró astu marutaḥ sá śuṣmī^́
7.040.03b     yám mártiyam pr̥ṣadaśvā ávātha
7.040.03c     utém agníḥ sárasvatī junánti
7.040.03d     ná tásya rāyáḥ parietā^́ asti

7.040.04a     ayáṃ hí netā^́ váruṇa r̥tásya
7.040.04b     mitró rā^́jāno aryamā^́ ápo dhúḥ
7.040.04c     suhávā devī^́ áditir anarvā^́
7.040.04d     té no áṃho áti parṣann áriṣṭān

7.040.05a     asyá devásya mīḷhúṣo vayā^́
7.040.05b     víṣṇor eṣásya prabhr̥thé havírbhiḥ
7.040.05c     vidé hí rudró rudríyam mahitváṃ
7.040.05d     yāsiṣṭáṃ vartír aśvināv írāvat

7.040.06a     mā^́ átra pūṣan āghr̥ṇa irasyo
7.040.06b     várūtrī yád rātiṣā^́caś ca rā^́san
7.040.06c     mayobhúvo no árvanto ní pāntu
7.040.06d     vr̥ṣṭím párijmā vã^́to dadātu

7.040.07a     nū^́ ródasī abhíṣṭute vásiṣṭhair
7.040.07b     r̥tā^́vāno váruṇo mitró agníḥ
7.040.07c     yáchantu candrā^́ upamáṃ no arkáṃ
7.040.07d     yūyám pāta suastíbhiḥ sádā naḥ

41

7.041.01a     prātár agním prātár índraṃ havāmahe
7.041.01b     prātár mitrā^́váruṇā prātár aśvínā
7.041.01c     prātár bhágam pūṣáṇam bráhmaṇas pátim
7.041.01d     prātáḥ sómam utá rudráṃ huvema

7.041.02a     prātarjítam bhágam ugráṃ huvema
7.041.02b     vayám putrám áditer yó vidhartā^́
7.041.02c     ādhráś cid yám mányamānas turáś cid
7.041.02d     rā^́jā cid yám bhágam bhakṣī^́ti ā^́ha

7.041.03a     bhága práṇetar bhága sátyarādho
7.041.03b     bhágemā^́ṃ dhíyam úd avā dádan naḥ
7.041.03c     bhága prá ṇo janaya góbhir áśvair
7.041.03d     bhága prá nŕ̥bhir nr̥vántaḥ siyāma

7.041.04a     utédā^́nīm bhágavantaḥ siyāma
7.041.04b     utá prapitvá utá mádhye áhnām
7.041.04c     utóditā maghavan sū^́riyasya
7.041.04d     vayáṃ devā^́nāṃ sumataú siyāma

7.041.05a     bhága evá bhágavām̐ astu devās
7.041.05b     téna vayám bhágavantaḥ siyāma
7.041.05c     táṃ tvā bhaga sárva íj johavīti
7.041.05d     sá no bhaga puraetā^́ bhavehá

7.041.06a     sám adhvarā^́ya uṣáso namanta
7.041.06b     dadhikrā^́veva śúcaye padā^́ya
7.041.06c     arvācīnáṃ vasuvídam bhágaṃ no
7.041.06d     rátham 'vā^́śvā° vājína ā^́ vahantu

7.041.07a     áśvāvatīr gómatīr na uṣā^́so
7.041.07b     vīrávatīḥ sádam uchantu bhadrā^́ḥ
7.041.07c     ghr̥táṃ dúhānā viśvátaḥ prápītā
7.041.07d     yūyám pāta suastíbhiḥ sádā naḥ

42

7.042.01a     prá brahmā^́ṇo áṅgiraso nakṣanta
7.042.01b     prá krandanúr nabhaníyasya vetu
7.042.01c     prá dhenáva udaprúto navanta
7.042.01d     yujyā^́tām ádrī adhvarásya péśaḥ

7.042.02a     sugás te agne sánavitto ádhvā
7.042.02b     yukṣvā^́ suté haríto rohítaś ca
7.042.02c     yé vā sádmann aruṣā^́ vīravā^́ho
7.042.02d     huvé devā^́nāṃ jánimāni sattáḥ

7.042.03a     sám u vo yajñám mahayan námobhiḥ
7.042.03b     prá hótā mandró ririca upāké
7.042.03c     yájasva sú puruaṇīka devā^́n
7.042.03d     ā^́ yajñíyām arámatiṃ vavr̥tyāḥ

7.042.04a     yadā^́ vīrásya reváto duroṇé
7.042.04b     siyonaśī^́r átithir ācíketat
7.042.04c     súprīto agníḥ súdhito dáma ā^́
7.042.04d     sá viśé dāti vā^́riyam íyatyai

7.042.05a     imáṃ no agne adhvaráṃ juṣasva
7.042.05b     marútsu índre yaśásaṃ kr̥dhī naḥ
7.042.05c     ā^́ náktā barhíḥ sadatām uṣā^́sā
7.042.05d     uśántā mitrā^́váruṇā yajehá

7.042.06a     evá agníṃ sahasíyaṃ vásiṣṭho
7.042.06b     rāyáskāmo viśvápsniyasya staut
7.042.06c     íṣaṃ rayím paprathad vā^́jam asmé
7.042.06d     yūyám pāta suastíbhiḥ sádā naḥ

43

7.043.01a     prá vo yajñéṣu devayánto arcan
7.043.01b     dyā^́vā námobhiḥ pr̥thivī^́ iṣádhyai
7.043.01c     yéṣām bráhmāṇi ásamāni víprā
7.043.01d     víṣvag viyánti vaníno ná śā^́khāḥ

7.043.02a     prá yajñá etu hétuvo ná sáptir
7.043.02b     úd yachadhvaṃ sámanaso ghr̥tā^́cīḥ
7.043.02c     str̥ṇītá barhír adhvarā^́ya sādhú
7.043.02d     ūrdhvā^́ śocī^́ṃṣi devayū^́ni asthuḥ

7.043.03a     ā^́ putrā^́so ná mātáraṃ víbhr̥trāḥ
7.043.03b     sā^́nau devā^́so barhíṣaḥ sadantu
7.043.03c     ā^́ viśvā^́cī vidathíyām anaktu
7.043.03d     ágne mā^́ no devátātā mŕ̥dhas kaḥ

7.043.04a     té sīṣapanta jóṣam ā^́ yájatrā
7.043.04b     r̥tásya dhā^́rāḥ sudúghā dúhānāḥ
7.043.04c     jyéṣṭhaṃ vo adyá máha ā^́ vásūnām
7.043.04d     ā^́ gantana sámanaso yáti ṣṭhá

7.043.05a     evā^́ no agne vikṣú ā^́ daśasya
7.043.05b     tuváyā vayáṃ sahasāvan ā^́skrāḥ
7.043.05c     rāyā^́ yujā^́ sadhamā^́do áriṣṭā
7.043.05d     yūyám pāta suastíbhiḥ sádā naḥ

44

7.044.01a     dadhikrā^́ṃ vaḥ prathamám aśvínoṣásam
7.044.01b     agníṃ sámiddham bhágam ūtáye huve
7.044.01c     índraṃ víṣṇum pūṣáṇam bráhmaṇas pátim
7.044.01d     ādityā^́n dyā^́vāpr̥thivī^́ apáḥ súvaḥ

7.044.02a     dadhikrā^́m u námasā bodháyanta
7.044.02b     udī^́rāṇā yajñám upaprayántaḥ
7.044.02c     íḷāṃ devī^́m barhíṣi sādáyanto
7.044.02d     aśvínā víprā suhávā huvema

7.044.03a     dadhikrā^́vāṇam bubudhānó agním
7.044.03b     úpa bruva uṣásaṃ sū^́riyaṃ gā^́m
7.044.03c     bradhnám mām̐ścatór váruṇasya babhrúṃ
7.044.03d     té víśvāsmád duritā^́ yāvayantu

7.044.04a     dadhikrā^́vā prathamó vājī^́ árvā
7.044.04b     ágre ráthānām bhavati prajānán
7.044.04c     saṃvidāná uṣásā sū^́riyeṇa
7.044.04d     ādityébhir vásubhir áṅgirobhiḥ

7.044.05a     ā^́ no dadhikrā^́ḥ pathíyām anaktu
7.044.05b     r̥tásya pánthām ánuetavā^́ u
7.044.05c     śr̥ṇótu no daíviyaṃ śárdho agníḥ
7.044.05d     śr̥ṇvántu víśve mahiṣā^́ ámūrāḥ

45

7.045.01a     ā^́ devó yātu savitā^́ surátno
7.045.01b     antarikṣaprā^́ váhamāno áśvaiḥ
7.045.01c     háste dádhāno náriyā purū^́ṇi
7.045.01d     niveśáyañ ca prasuváñ ca bhū^́ma

7.045.02a     úd asya bāhū^́ śithirā^́ br̥hántā
7.045.02b     hiraṇyáyā divó ántām̐ anaṣṭām
7.045.02c     nūnáṃ só asya mahimā^́ paniṣṭa
7.045.02d     sū^́raś cid asmā ánu dād apasyā^́m

7.045.03a     sá ghā no deváḥ savitā^́ sahā^́vā
7.045.03b     ā^́ sāviṣad vásupatir vásūni
7.045.03c     viśráyamāṇo amátim urūcī^́m
7.045.03d     martabhójanam ádha rāsate naḥ

7.045.04a     imā^́ gíraḥ savitā^́raṃ sujihvám
7.045.04b     pūrṇágabhastim īḷate supāṇím
7.045.04c     citráṃ váyo br̥hád asmé dadhātu
7.045.04d     yūyám pāta suastíbhiḥ sádā naḥ

46

7.046.01a     imā^́ rudrā^́ya sthirádhanvane gíraḥ
7.046.01b     kṣipráiṣave devā^́ya svadhā^́vane
7.046.01c     áṣāḷhāya sáhamānāya vedháse
7.046.01d     tigmā^́yudhāya bharatā śr̥ṇótu naḥ

7.046.02a     sá hí kṣáyeṇa kṣámiyasya jánmanaḥ
7.046.02b     sā^́mrājiyena diviyásya cétati
7.046.02c     ávann ávantīr úpa no dúraś cara
7.046.02d     anamīvó rudara⁺ jā^́su no bhava

7.046.03a     yā^́ te didyúd ávasr̥ṣṭā divás pári
7.046.03b     kṣmayā^́ cárati pári sā^́ vr̥ṇaktu naḥ
7.046.03c     sahásraṃ te suapivāta bheṣajā^́
7.046.03d     mā^́ nas tokéṣu tánayeṣu rīriṣaḥ

7.046.04a     mā^́ no vadhī rudara⁺ mā^́ párā dā
7.046.04b     mā^́ te bhūma prásitau hīḷitásya
7.046.04c     ā^́ no bhaja barhíṣi jīvaśaṃsé
7.046.04d     yūyám pāta suastíbhiḥ sádā naḥ

47

7.047.01a     ā^́po yáṃ vaḥ prathamáṃ devayánta
7.047.01b     indrapā^́nam ūrmím ákr̥ṇvateḷáḥ
7.047.01c     táṃ vo vayáṃ śúcim ariprám adyá
7.047.01d     ghr̥taprúṣam mádhumantaṃ vanema

7.047.02a     tám ūrmím āpo mádhumattamaṃ vo
7.047.02b     apā^́ṃ nápād avatu āśuhémā
7.047.02c     yásminn índro vásubhir mādáyāte
7.047.02d     tám aśyāma devayánto vo adyá

7.047.03a     śatápavitrāḥ svadháyā mádantīr
7.047.03b     devī^́r devā^́nām ápi yanti pā^́thaḥ
7.047.03c     tā^́ índrasya ná minanti vratā^́ni
7.047.03d     síndhubhyo havyáṃ ghr̥távaj juhota

7.047.04a     yā^́ḥ sū^́riyo raśmíbhir ātatā^́na
7.047.04b     yā^́bhya índro áradad gātúm ūrmím
7.047.04c     té sindhavo várivo dhātanā no
7.047.04d     yūyám pāta suastíbhiḥ sádā naḥ

48

7.048.01a     ŕ̥bhukṣaṇo · vājā mādáyadhvam
7.048.01b     asmé naro maghavānaḥ sutásya
7.048.01c     ā^́ vo arvā^́caḥ krátavo ná yātā^́ṃ
7.048.01d     víbhvo ráthaṃ náriyaṃ vartayantu

7.048.02a     r̥bhúr r̥bhúbhir abhí vaḥ siyāma
7.048.02b     víbhvo vibhúbhiḥ śávasā śávāṃsi
7.048.02c     vā^́jo asmā^́m̐ avatu vā^́jasātāv
7.048.02d     índreṇa yujā^́ taruṣema vr̥trám

7.048.03a     té cid dhí pūrvī^́r abhí sánti śāsā^́
7.048.03b     víśvām̐ aryá uparátāti vanvan
7.048.03c     índro víbhvām̐ r̥bhukṣā^́ vā^́jo aryáḥ
7.048.03d     śátror mithatyā^́ kr̥ṇavan ví nr̥mṇám

7.048.04a     nū^́ devāso várivaḥ kartanā no
7.048.04b     bhūtá no víśve ávase sajóṣāḥ
7.048.04c     sám asmé íṣaṃ vásavo dadīran
7.048.04d     yūyám pāta suastíbhiḥ sádā naḥ

49

7.049.01a     samudrájyeṣṭhāḥ salilásya mádhyāt
7.049.01b     punānā^́ yanti ániviśamānāḥ
7.049.01c     índro yā^́ vajrī^́ vr̥ṣabhó rarā^́da
7.049.01d     tā^́ ā^́po devī^́r ihá mā^́m avantu

7.049.02a     yā^́ ā^́po divyā^́ utá vā srávanti
7.049.02b     khanítrimā utá vā yā^́ḥ svayaṃjā^́ḥ
7.049.02c     samudrā^́rthā yā^́ḥ śúcayaḥ pavākā^́s⁺
7.049.02d     tā^́ ā^́po devī^́r ihá mā^́m avantu

7.049.03a     yā^́sāṃ rā^́jā váruṇo yā^́ti mádhye
7.049.03b     satyānr̥té avapáśyañ jánānām
7.049.03c     madhuścútaḥ śúcayo yā^́ḥ pavākā^́s⁺
7.049.03d     tā^́ ā^́po devī^́r ihá mā^́m avantu

7.049.04a     yā^́su rā^́jā váruṇo yā^́su sómo
7.049.04b     víśve devā^́ yā^́su ū^́rjam mádanti
7.049.04c     vaiśvānaró yā^́su agníḥ práviṣṭas
7.049.04d     tā^́ ā^́po devī^́r ihá mā^́m avantu

50

7.050.01a     ā^́ mā^́m mitrāvaruṇā ihá rakṣataṃ
7.050.01b     kulāyáyad viśváyan mā^́ na ā^́ gan
7.050.01c     ajakāváṃ durdŕ̥śīkaṃ tiró dadhe
7.050.01d     mā^́ mā^́m pádyena rápasā vidat tsáruḥ

7.050.02a     yád vijā^́man páruṣi vándanam bhúvad
7.050.02b     aṣṭhīvántau pári kulphaú ca déhat
7.050.02c     agníṣ ṭác chócann ápa bādhatām itó
7.050.02d     mā^́ mā^́m pádyena rápasā vidat tsáruḥ

7.050.03a     yác chalmalaú bhávati yán nadī^́ṣu
7.050.03b     yád óṣadhībhyaḥ pári jā^́yate viṣám
7.050.03c     víśve devā^́ nír itás tát suvantu
7.050.03d     mā^́ mā^́m pádyena rápasā vidat tsáruḥ

7.050.04a     yā^́ḥ praváto niváta udváta
7.050.04b     udanvátīr anudakā^́ś ca yā^́ḥ
7.050.04c     tā^́ asmábhyam páyasā pínvamānāḥ
7.050.04d     śivā^́ devī^́r aśipadā^́ bhavantu
7.050.04e     sárvā nadyò aśimidā^́ bhavantu

51

7.051.01a     ādityā^́nām ávasā nū^́tanena
7.051.01b     sakṣīmáhi śármaṇā śáṃtamena
7.051.01c     anāgāstvé adititvé turā^́sa
7.051.01d     imáṃ yajñáṃ dadhatu śróṣamāṇāḥ

7.051.02a     ādityā^́so áditir mādayantām
7.051.02b     mitró aryamā^́ váruṇo rájiṣṭhāḥ
7.051.02c     asmā^́kaṃ santu bhúvanasya gopā^́ḥ
7.051.02d     píbantu sómam ávase no adyá

7.051.03a     ādityā^́ víśve marútaś ca víśve
7.051.03b     devā^́ś ca víśva r̥bhávaś ca víśve
7.051.03c     índro agnír aśvínā tuṣṭuvānā^́
7.051.03d     yūyám pāta suastíbhiḥ sádā naḥ

52

7.052.01a     ādityā^́so áditayaḥ siyāma
7.052.01b     pū^́r devatrā^́ vasavo martiyatrā^́
7.052.01c     sánema mitrāvaruṇā sánanto
7.052.01d     bhávema dyāvāpr̥thivī bhávantaḥ

7.052.02a     mitrás tán no váruṇo māmahanta
7.052.02b     śárma tokā^́ya tánayāya gopā^́ḥ
7.052.02c     mā^́ vo bhujema anyájātam éno
7.052.02d     mā^́ tát karma vasavo yác cáyadhve

7.052.03a     turaṇyávo áṅgiraso nakṣanta
7.052.03b     rátnaṃ devásya savitúr iyānā^́ḥ
7.052.03c     pitā^́ ca tán no mahā^́n yájatro
7.052.03d     víśve devā^́ḥ sámanaso juṣanta

53

7.053.01a     prá dyā^́vā yajñaíḥ pr̥thivī^́ námobhiḥ
7.053.01b     sabā^́dha īḷe br̥hatī^́ yájatre
7.053.01c     té cid dhí pū^́rve kaváyo gr̥ṇántaḥ
7.053.01d     puró mahī^́ dadhiré deváputre

7.053.02a     prá pūrvajé pitárā návyasībhir
7.053.02b     gīrbhíḥ kr̥ṇudhvaṃ sádane r̥tásya
7.053.02c     ā^́ no dyāvāpr̥thivī daíviyena
7.053.02d     jánena yātam máhi vāṃ várūtham

7.053.03a     utó hí vāṃ ratnadhéyāni sánti
7.053.03b     purū^́ṇi dyāvāpr̥thivī sudā^́se
7.053.03c     asmé dhattaṃ yád ásad áskr̥dhoyu
7.053.03d     yūyám pāta suastíbhiḥ sádā naḥ

54

7.054.01a     vā^́stoṣ pate práti jānīhi asmā^́n
7.054.01b     suāveśó anamīvó bhavā naḥ
7.054.01c     yát tvémahe práti tán no juṣasva
7.054.01d     śáṃ no bhava dvipáde śáṃ cátuṣpade

7.054.02a     vā^́stoṣ pate pratáraṇo na edhi
7.054.02b     gayasphā^́no góbhir áśvebhir indo
7.054.02c     ajárāsas te sakhiyé siyāma
7.054.02d     pitéva putrā^́n práti no juṣasva

7.054.03a     vā^́stoṣ pate śagmáyā saṃsádā te
7.054.03b     sakṣīmáhi raṇváyā gātumátyā
7.054.03c     pāhí kṣéma utá yóge váraṃ no
7.054.03d     yūyám pāta suastíbhiḥ sádā naḥ

55

7.055.01a     amīvahā^́ vāstoṣ pate
7.055.01b     víśvā rūpā^́ṇi āviśán
7.055.01c     sákhā suśéva edhi naḥ

7.055.02a     yád arjuna sārameya
7.055.02b     datáḥ piśaṅga yáchase
7.055.02c     vī^́va bhrājanta r̥ṣṭáya
7.055.02d     úpa srákveṣu bápsato
7.055.02e     ní ṣú svapa

7.055.03a     stenáṃ rāya sārameya
7.055.03b     táskaraṃ vā punaḥsara
7.055.03c     stotr̥̄^́n índrasya rāyasi
7.055.03d     kím asmā^́n duchunāyase
7.055.03e     ní ṣú svapa

7.055.04a     tváṃ sūkarásya dardr̥hi
7.055.04b     táva dardartu sūkaráḥ
7.055.04c     stotr̥̄^́n índrasya rāyasi
7.055.04d     kím asmā^́n duchunāyase
7.055.04e     ní ṣú svapa

7.055.05a     sástu mātā^́ sástu pitā^́
7.055.05b     sástu śvā^́ sástu viśpátiḥ
7.055.05c     sasántu sárve jñātáyaḥ
7.055.05d     sástv ayám abhíto jánaḥ

7.055.06a     yá ā^́ste yáś ca cárati
7.055.06b     yáś ca páśyati no jánaḥ
7.055.06c     téṣāṃ sáṃ hanmo akṣā^́ṇi
7.055.06d     yáthedáṃ harmiyáṃ táthā

7.055.07a     sahásraśr̥ṅgo vr̥ṣabhó
7.055.07b     yáḥ samudrā^́d udā^́carat
7.055.07c     ténā sahasyènā vayáṃ
7.055.07d     ní jánān svāpayāmasi

7.055.08a     proṣṭheśayā^́ vahyeśayā^́
7.055.08b     nā^́rīr yā^́s talpaśī^́varīḥ
7.055.08c     stríyo yā^́ḥ púṇyagandhās
7.055.08d     tā^́ḥ sárvāḥ svāpayāmasi

56

7.056.01a     ká īṃ víaktā náraḥ sánīḷā
7.056.01b     rudrásya máryā ádha suáśvāḥ
7.056.02a     nákir hí eṣāṃ janū^́ṃṣi véda
7.056.02b     té aṅgá vidre mithó janítram
7.056.03a     abhí svapū^́bhir mithó vapanta
7.056.03b     vā^́tasvanasaḥ śyenā^́ aspr̥dhran
7.056.04a     etā^́ni dhī^́ro niṇyā^́ ciketa
7.056.04b     pŕ̥śnir yád ū^́dho mahī^́ jabhā^́ra
7.056.05a     sā^́ víṭ suvī^́rā marúdbhir astu
7.056.05b     sanā^́t sáhantī púṣyantī nr̥mṇám
7.056.06a     yā^́maṃ yáyiṣṭhāḥ⁺ śubhā^́ śóbhiṣṭhāḥ
7.056.06b     śriyā^́ sámmiślā ójobhir ugrā^́ḥ
7.056.07a     ugráṃ va ója sthirā^́ śávāṃsi
7.056.07b     ádhā marúdbhir gaṇás túviṣmān
7.056.08a     śubhró vaḥ śúṣmaḥ krúdhmī mánāṃsi
7.056.08b     dhúnir múnir 'va° śárdhasya dhr̥ṣṇóḥ
7.056.09a     sánemi asmád yuyóta didyúm
7.056.09b     mā^́ vo durmatír ihá práṇaṅ naḥ
7.056.10a     priyā^́ vo nā^́ma huve turā^́ṇām
7.056.10b     ā^́ yát tr̥pán maruto vāvaśānā^́ḥ
7.056.11a     svāyudhā^́sa iṣmíṇaḥ suniṣkā^́
7.056.11b     utá svayáṃ tanvàḥ śúmbhamānāḥ
7.056.12a     śúcī vo havyā^́ marutaḥ śúcīnāṃ
7.056.12b     śúciṃ hinomi adhvaráṃ śúcibhyaḥ
7.056.12c     r̥téna satyám r̥tasā^́pa āyañ
7.056.12d     chúcijanmānaḥ śúcayaḥ pavākā^́ḥ⁺

7.056.13a     áṃseṣu ā^́ marutaḥ khādáyo vo
7.056.13b     vákṣassu rukmā^́ upaśiśriyāṇā^́ḥ
7.056.13c     ví vidyúto ná vr̥ṣṭíbhī rucānā^́
7.056.13d     ánu svadhā^́m ā^́yudhair yáchamānāḥ

7.056.14a     prá budhníyā va īrate máhāṃsi
7.056.14b     prá nā^́māni prayajyavas tiradhvam
7.056.14c     sahasríyaṃ dámiyam bhāgám etáṃ
7.056.14d     gr̥hamedhī^́yam maruto juṣadhvam

7.056.15a     yádi stutásya maruto adhīthá
7.056.15b     itthā^́ víprasya vājíno hávīman
7.056.15c     makṣū^́ rāyáḥ suvī^́riyasya dāta
7.056.15d     nū^́ cid yám anyá ādábhad árāvā

7.056.16a     átyāso ná yé marútaḥ suáñco
7.056.16b     yakṣadŕ̥śo ná śubháyanta máryāḥ
7.056.16c     té harmiyeṣṭhā^́ḥ śíśavo ná śubhrā^́
7.056.16d     vatsā^́so ná prakrīḷínaḥ payodhā^́ḥ

7.056.17a     daśasyánto no marúto mr̥ḷantu
7.056.17b     varivasyánto ródasī suméke
7.056.17c     āré gohā^́ nr̥hā^́ vadhó vo astu
7.056.17d     sumnébhir asmé vasavo namadhvam

7.056.18a     ā^́ vo hótā · johavīti sattáḥ
7.056.18b     satrā^́cīṃ rātím maruto gr̥ṇānáḥ
7.056.18c     yá ī^́vato vr̥ṣaṇo ásti gopā^́ḥ
7.056.18d     só ádvayāvī havate va ukthaíḥ

7.056.19a     imé turám marúto rāmayanti
7.056.19b     imé sáhaḥ sáhasa ā^́ namanti
7.056.19c     imé śáṃsaṃ vanuṣyató ní pānti
7.056.19d     gurú dvéṣo áraruṣe dadhanti

7.056.20a     imé radhráṃ cin marúto junanti
7.056.20b     bhŕ̥miṃ cid yáthā vásavo juṣánta
7.056.20c     ápa bādhadhvaṃ vr̥ṣaṇas támāṃsi
7.056.20d     dhattá víśvaṃ tánayaṃ tokám asmé

7.056.21a     mā^́ vo dātrā^́n maruto nír arāma
7.056.21b     mā^́ paścā^́d daghma rathiyo vibhāgé
7.056.21c     ā^́ na spārhé bhajatanā vasavyè
7.056.21d     yád īṃ sujātáṃ vr̥ṣaṇo vo ásti

7.056.22a     sáṃ yád dhánanta manyúbhir jánāsaḥ
7.056.22b     śū^́rā yahvī^́ṣu óṣadhīṣu vikṣú
7.056.22c     ádha smā no maruto rudriyāsas
7.056.22d     trātā^́ro bhūta pŕ̥tanāsu aryáḥ

7.056.23a     bhū^́ri cakra marutaḥ pítriyāṇi
7.056.23b     ukthā^́ni yā^́ vaḥ śasyánte purā^́ cit
7.056.23c     marúdbhir ugráḥ pŕ̥tanāsu sā^́ḷhā
7.056.23d     marúdbhir ít sánitā vā^́jam árvā

7.056.24a     asmé vīró marutaḥ śuṣmī^́ astu
7.056.24b     jánānãṃ yó ásuro vidhartā^́
7.056.24c     apó yéna sukṣitáye tárema
7.056.24d     ádha svám óko abhí vaḥ siyāma

7.056.25a     tán na índro váruṇo mitró agnír
7.056.25b     ā^́pa óṣadhīr vaníno juṣanta
7.056.25c     śárman siyāma marútām upásthe
7.056.25d     yūyám pāta suastíbhiḥ sádā naḥ

57

7.057.01a     mádhvo vo nā^́ma mā^́rutaṃ yajatrāḥ
7.057.01b     prá yajñéṣu · śávasā madanti
7.057.01c     yé rejáyanti ródasī cid urvī^́
7.057.01d     pínvanti útsaṃ yád áyāsur ugrā^́ḥ

7.057.02a     nicetā^́ro hí marúto gr̥ṇántam
7.057.02b     praṇetā^́ro yájamānasya mánma
7.057.02c     asmā^́kam adyá vidátheṣu barhír
7.057.02d     ā^́ vītáye sadata pipriyāṇā^́ḥ

7.057.03a     naítā^́vad anyé marúto yáthemé
7.057.03b     bhrā^́jante rukmaír ā^́yudhais tanū^́bhiḥ
7.057.03c     ā^́ ródasī viśvapíśaḥ piśānā^́ḥ
7.057.03d     samānám añjí añjate śubhé kám

7.057.04a     ŕ̥dhak sā^́ vo maruto didyúd astu
7.057.04b     yád va ā^́gaḥ puruṣátā kárāma
7.057.04c     mā^́ vas tásyām ápi bhūmā yajatrā
7.057.04d     asmé vo astu sumatíś cániṣṭhā

7.057.05a     kr̥té cid átra marúto raṇanta
7.057.05b     anavadyā^́saḥ śúcayaḥ pavākā^́ḥ⁺
7.057.05c     prá ṇo 'vata sumatíbhir yajatrāḥ
7.057.05d     prá vā^́jebhis tirata puṣyáse naḥ

7.057.06a     utá stutā^́so marúto viantu
7.057.06b     víśvebhir nā^́mabhir náro havī^́ṃṣi
7.057.06c     dádāta no amŕ̥tasya prajā^́yai
7.057.06d     jigr̥tá rāyáḥ sūnŕ̥tā maghā^́ni

7.057.07a     ā^́ stutā^́so maruto víśva ūtī^́
7.057.07b     áchā sūrī^́n sarvátātā jigāta
7.057.07c     yé nas tmánā śatíno vardháyanti
7.057.07d     yūyám pāta suastíbhiḥ sádā naḥ

58

7.058.01a     prá sākamúkṣe arcatā gaṇā^́ya
7.058.01b     yó daíviyasya dhā^́manas túviṣmān
7.058.01c     utá kṣodanti ródasī mahitvā^́
7.058.01d     nákṣante nā^́kaṃ nírr̥ter avaṃśā^́t

7.058.02a     janū^́ś cid vo marutas tveṣíyeṇa
7.058.02b     bhī^́māsas túvimanyavo áyāsaḥ
7.058.02c     prá yé máhobhir ójasotá sánti
7.058.02d     víśvo vo yā^́man bhayate suvardŕ̥k

7.058.03a     br̥hád váyo maghávadbhyo dadhāta
7.058.03b     jújoṣann ín marútaḥ suṣṭutíṃ naḥ
7.058.03c     gató ná ádhvā ví tirāti jantúm
7.058.03d     prá ṇa spārhā^́bhir ūtíbhis tireta

7.058.04a     yuṣmóto vípro marutaḥ śatasvī^́
7.058.04b     yuṣmóto árvā sáhuriḥ sahasrī^́
7.058.04c     yuṣmótaḥ samrā^́ḷ utá hanti vr̥trám
7.058.04d     prá tád vo astu dhūtayo dayiṣṇám⁺

7.058.05a     tā^́m̐ ā^́ rudrásya mīḷhúṣo vivāse
7.058.05b     kuvín náṃsante marútaḥ púnar naḥ
7.058.05c     yát sasvártā jihīḷiré yád āvír
7.058.05d     áva tád éna īmahe turā^́ṇām

7.058.06a     prá sā^́ vāci · suṣṭutír maghónām
7.058.06b     idáṃ suuktám marúto juṣanta
7.058.06c     ārā^́c cid dvéṣo vr̥ṣaṇo yuyota
7.058.06d     yūyám pāta suastíbhiḥ sádā naḥ

59

7.059.01a     yáṃ trā^́yadhva idám-idaṃ
7.059.01b     dévāso yáṃ ca náyatha
7.059.01c     tásmā agne váruṇa mítra áryaman
7.059.01d     márutaḥ śárma yachata

7.059.02a     yuṣmā^́kaṃ devā ávasā^́hani priyá
7.059.02b     ījānás tarati dvíṣaḥ
7.059.02c     prá sá kṣáyaṃ tirate ví mahī^́r íṣo
7.059.02d     yó vo várāya dā^́śati

7.059.03a     nahí vaś caramáṃ caná
7.059.03b     vásiṣṭhaḥ parimáṃsate
7.059.03c     asmā^́kam adyá marutaḥ suté sácā
7.059.03d     víśve pibata kāmínaḥ

7.059.04a     nahí va ūtíḥ pŕ̥tanāsu márdhati
7.059.04b     yásmā árādhuvaṃ naraḥ
7.059.04c     abhí va ā^́vart sumatír návīyasī
7.059.04d     tū^́yaṃ yāta pipīṣavaḥ

7.059.05a     õ^́ ṣú ghr̥ṣvirādhaso
7.059.05b     yātánā^́ndhāṃsi pītáye
7.059.05c     imā^́ vo havyā^́ maruto raré hí kam
7.059.05d     mó ṣú anyátra gantana

7.059.06a     ā^́ ca no barhíḥ sádatāvitā^́ ca na
7.059.06b     spārhā^́ṇi dā^́tave vásu
7.059.06c     ásredhanto marutaḥ somiyé mádhau
7.059.06d     svā^́hehá mādayādhuvai

7.059.07a     sasváś cid dhí tanúvaḥ śúmbhamānā
7.059.07b     ā^́ haṃsā^́so nī^́lapr̥ṣṭhā apaptan
7.059.07c     víśvaṃ śárdho abhíto mā ní ṣeda
7.059.07d     náro ná raṇvā^́ḥ sávane mádantaḥ

7.059.08a     yó no maruto abhí durhr̥ṇāyús
7.059.08b     tiráś cittā^́ni vasavo jíghāṃsati
7.059.08c     druháḥ pā^́śān práti sá mucīṣṭa
7.059.08d     tápiṣṭhena hánmanā hantanā tám

7.059.09a     sā^́ṃtapanā idáṃ havír
7.059.09b     márutas táj jujuṣṭana
7.059.09c     yuṣmā^́kotī^́ riśādasaḥ

7.059.10a     gŕ̥hamedhāsa ā^́ gata
7.059.10b     máruto mā^́pa bhūtana
7.059.10c     yuṣmā^́kotī^́ sudānavaḥ

7.059.11a     ihéha vaḥ svatavasaḥ
7.059.11b     kávayaḥ sū^́riyatvacaḥ
7.059.11c     yajñám maruta ā^́ vr̥ṇe

7.059.12a     tríyambakaṃ yajāmahe
7.059.12b     sugándhim puṣṭivárdhanam
7.059.12c     urvārukám 'va° bándhanān
7.059.12d     mr̥tyór mukṣīya mā^́mŕ̥tāt

60

7.060.01a     yád adyá sūriya brávo ánāgā
7.060.01b     udyán mitrā^́ya váruṇāya satyám
7.060.01c     vayáṃ devatrā^́ adite siyāma
7.060.01d     táva priyā^́so aryaman gr̥ṇántaḥ

7.060.02a     eṣá syá mitrāvaruṇā nr̥cákṣā
7.060.02b     ubhé úd eti sū^́riyo abhí jmán
7.060.02c     víśvasya sthātúr jágataś ca gopā^́
7.060.02d     r̥jú márteṣu vr̥jinā^́ ca páśyan

7.060.03a     áyukta saptá harítaḥ sadhásthād
7.060.03b     yā^́ īṃ váhanti sū^́riyaṃ ghr̥tā^́cīḥ
7.060.03c     dhā^́māni mitrāvaruṇā yuvā^́kuḥ
7.060.03d     sáṃ yó yūthéva jánimāni cáṣṭe

7.060.04a     úd vām pr̥kṣā^́so mádhumanto asthur
7.060.04b     ā^́ sū^́riyo aruhac chukrám árṇaḥ
7.060.04c     yásmā ādityā^́ ádhvano rádanti
7.060.04d     mitró aryamā^́ váruṇaḥ sajóṣāḥ

7.060.05a     imé cetā^́ro ánr̥tasya bhū^́rer
7.060.05b     mitró aryamā^́ váruṇo hí sánti
7.060.05c     imá r̥tásya vāvr̥dhur duroṇé
7.060.05d     śagmā^́saḥ putrā^́ áditer ádabdhāḥ

7.060.06a     imé mitró váruṇo dūḷábhāso
7.060.06b     acetásaṃ cic citayanti dákṣaiḥ
7.060.06c     ápi krátuṃ sucétasaṃ vátantas
7.060.06d     tiráś cid áṃhaḥ supáthā nayanti

7.060.07a     imé divó ánimiṣā pr̥thivyā^́ś
7.060.07b     cikitvā^́ṃso acetásaṃ nayanti
7.060.07c     pravrājé cin nadíyo gādhám asti
7.060.07d     pāráṃ no asyá viṣpitásya parṣan

7.060.08a     yád gopā^́vad áditiḥ śárma bhadrám
7.060.08b     mitró yáchanti váruṇaḥ sudā^́se
7.060.08c     tásminn ā^́ tokáṃ tánayaṃ dádhānā
7.060.08d     mā^́ karma devahéḷanaṃ turāsaḥ

7.060.09a     áva védiṃ hótarābhir yajeta
7.060.09b     rípaḥ kā^́ś cid · varuṇadhrútaḥ sáḥ
7.060.09c     pári dvéṣobhir aryamā^́ vr̥ṇaktu
7.060.09d     urúṃ sudā^́se vr̥ṣaṇā ulokám†

7.060.10a     sasváś cid dhí sámr̥tis tveṣī^́ eṣām
7.060.10b     apīcíyena sáhasā sáhante
7.060.10c     yuṣmád bhiyā^́ vr̥ṣaṇo réjamānā
7.060.10d     dákṣasya cin mahinā^́ mr̥̄ḷátā⁺ naḥ

7.060.11a     yó bráhmaṇe sumatím āyájāte
7.060.11b     vā^́jasya sātaú paramásya rāyáḥ
7.060.11c     sī^́kṣanta manyúm maghávāno aryá
7.060.11d     urú kṣáyāya cakrire sudhā^́tu

7.060.12a     iyáṃ deva puróhitir yuvábhyāṃ
7.060.12b     yajñéṣu mitrāvaruṇāv akāri
7.060.12c     víśvāni durgā^́ pipr̥taṃ tiró no
7.060.12d     yūyám pāta suastíbhiḥ sádā naḥ

61

7.061.01a     úd vāṃ cákṣur varuṇa suprátīkaṃ
7.061.01b     deváyor eti sū^́riyas tatanvā^́n
7.061.01c     abhí yó víśvā bhúvanāni cáṣṭe
7.061.01d     sá manyúm mártiyeṣu ā^́ ciketa

7.061.02a     prá vāṃ sá mitrāvaruṇāv r̥tā^́vā
7.061.02b     vípro mánmāni dīrghaśrúd iyarti
7.061.02c     yásya bráhmāṇi sukratū ávātha
7.061.02d     ā^́ yát krátvā ná śarádaḥ pr̥ṇaíthe

7.061.03a     prá urór mitrāvaruṇā pr̥thivyā^́ḥ
7.061.03b     prá divá r̥ṣvā^́d br̥hatáḥ sudānū
7.061.03c     spáśo dadhāthe óṣadhīṣu vikṣú
7.061.03d     ŕ̥dhag yató 'nimiṣaṃ° rákṣamāṇā

7.061.04a     śáṃsā mitrásya váruṇasya dhā^́ma
7.061.04b     śúṣmo ródasī badbadhe mahitvā^́
7.061.04c     áyan mā^́sā áyajvanām avī^́rāḥ
7.061.04d     prá yajñámanmā vr̥jánaṃ tirāte

7.061.05a     ámūrā víśvā vr̥ṣaṇāv imā^́ vāṃ
7.061.05b     ná yā^́su citráṃ dádr̥śe ná yakṣám
7.061.05c     drúhaḥ sacante ánr̥tā jánānāṃ
7.061.05d     ná vāṃ niṇyā^́ni acíte abhūvan

7.061.06a     sám u vāṃ yajñám mahayaṃ námobhir
7.061.06b     huvé vām mitrāvaruṇā sabā^́dhaḥ
7.061.06c     prá vām mánmāni r̥cáse návāni
7.061.06d     kr̥tā^́ni bráhma jujuṣann imā^́ni

7.061.07a     iyáṃ deva puróhitir yuvábhyāṃ
7.061.07b     yajñéṣu mitrāvaruṇāv akāri
7.061.07c     víśvāni durgā^́ pipr̥taṃ tiró no
7.061.07d     yūyám pāta suastíbhiḥ sádā naḥ

62

7.062.01a     út sū^́riyo br̥hád arcī^́ṃṣi aśret
7.062.01b     purú víśvā jánima mā^́nuṣāṇām
7.062.01c     samó divā^́ dadr̥śe rócamānaḥ
7.062.01d     krátvā kr̥táḥ súkr̥taḥ kartŕ̥bhir bhūt

7.062.02a     sá sūriya práti puró na úd gā
7.062.02b     ebhí stómebhir etaśébhir évaiḥ
7.062.02c     prá no mitrā^́ya váruṇāya voco
7.062.02d     ánāgaso aryamṇé agnáye ca

7.062.03a     ví naḥ sahásraṃ śurúdho radantu
7.062.03b     r̥tā^́vāno váruṇo mitró agníḥ
7.062.03c     yáchantu candrā^́ upamáṃ no arkám
7.062.03d     ā^́ naḥ kā^́mam pūpurantu stávānāḥ

7.062.04a     dyā^́vābhūmī adite trā^́sīthāṃ no
7.062.04b     yé vāṃ jajñúḥ sujánimāna r̥ṣve
7.062.04c     mā^́ héḷe bhūma váruṇasya vāyór
7.062.04d     mā^́ mitrásya priyátamasya nr̥̄ṇā^́m⁺

7.062.05a     prá bāhávā sisr̥taṃ jīváse na
7.062.05b     ā^́ no gávyūtim ukṣataṃ ghr̥téna
7.062.05c     ā^́ no jáne śravayataṃ yuvānā
7.062.05d     śrutám me mitrāvaruṇā hávemā^́

7.062.06a     nũ^́ mitró váruṇo aryamā^́ nas
7.062.06b     tmáne tokā^́ya várivo dadhantu
7.062.06c     sugā^́ no víśvā supáthāni santu
7.062.06d     yūyám pāta suastíbhiḥ sádā naḥ

63

7.063.01a     úd ū eti subhágo viśvácakṣāḥ
7.063.01b     sā^́dhāraṇaḥ sū^́riyo mā^́nuṣāṇām
7.063.01c     cákṣur mitrásya váruṇasya deváś
7.063.01d     cármeva yáḥ samávivyak támāṃsi

7.063.02a     úd u eti prasavītā^́ jánānām
7.063.02b     mahā^́n ketúr arṇaváḥ sū^́riyasya
7.063.02c     samānáṃ cakrám pariāvívr̥tsan
7.063.02d     yád etaśó váhati dhūrṣú yuktáḥ

7.063.03a     vibhrā^́jamāna uṣásām upásthād
7.063.03b     rebhaír úd eti anumadyámānaḥ
7.063.03c     eṣá me deváḥ savitā^́ cachanda
7.063.03d     yáḥ samānáṃ ná praminā^́ti dhā^́ma

7.063.04a     divó rukmá urucákṣā úd eti
7.063.04b     dūréarthas taráṇir bhrā^́jamānaḥ
7.063.04c     nūnáṃ jánāḥ sū^́riyeṇa prásūtā
7.063.04d     áyann árthāni kr̥ṇávann ápāṃsi

7.063.05a     yátrā cakrúr amŕ̥tā gātúm asmai
7.063.05b     śyenó ná dī^́yann ánu eti pā^́thaḥ
7.063.05c     práti vāṃ sū^́ra údite vidhema
7.063.05d     námobhir mitrāvaruṇotá havyaíḥ

7.063.06a     nũ^́ mitró váruṇo aryamā^́ nas
7.063.06b     tmáne tokā^́ya várivo dadhantu
7.063.06c     sugā^́ no víśvā supáthāni santu
7.063.06d     yūyám pāta suastíbhiḥ sádā naḥ

64

7.064.01a     diví kṣáyantā rájasaḥ pr̥thivyā^́m
7.064.01b     prá vāṃ ghr̥tásya nirṇíjo dadīran
7.064.01c     havyáṃ no mitró aryamā^́ sújāto
7.064.01d     rā^́jā sukṣatró váruṇo juṣanta

7.064.02a     ā^́ rājānā maha r̥tasya gopā
7.064.02b     síndhupatī kṣatriyā yātam arvā^́k
7.064.02c     íḷāṃ no mitrāvaruṇotá vr̥ṣṭím
7.064.02d     áva divá invataṃ jīradānū

7.064.03a     mitrás tán no váruṇo devó aryáḥ
7.064.03b     prá sā^́dhiṣṭhebhiḥ pathíbhir nayantu
7.064.03c     brávad yáthā na ā^́d aríḥ sudā^́sa
7.064.03d     iṣā^́ madema sahá devágopāḥ

7.064.04a     yó vāṃ gártam mánasā tákṣad etám
7.064.04b     ūrdhvā^́ṃ dhītíṃ kr̥ṇávad dhāráyac ca
7.064.04c     ukṣéthām mitrāvaruṇā ghr̥téna
7.064.04d     tā^́ rājānā sukṣitī^́s tarpayethām

7.064.05a     eṣá stómo varuṇa mitra túbhyaṃ
7.064.05b     sómaḥ śukró ná vāyáve ayāmi
7.064.05c     aviṣṭáṃ dhíyo jigr̥tám púraṃdhīr
7.064.05d     yūyám pāta suastíbhiḥ sádā naḥ

65

7.065.01a     práti vāṃ sū^́ra údite suuktaír
7.065.01b     mitráṃ huve váruṇam pūtádakṣam
7.065.01c     yáyor asuryàm ákṣitaṃ jyáyiṣṭhaṃ⁺
7.065.01d     víśvasya yā^́man ācítā jigatnú

7.065.02a     tā^́ hí devā^́nām ásurā tā^́v aryā^́
7.065.02b     tā^́ naḥ kṣitī^́ḥ karatam ūrjáyantīḥ
7.065.02c     aśyā^́ma mitrāvaruṇā vayáṃ vāṃ
7.065.02d     dyā^́vā ca yátra pīpáyann áhā ca

7.065.03a     tā^́ bhū^́ripāśāv ánr̥tasya sétū
7.065.03b     duratyétū ripáve mártiyāya
7.065.03c     r̥tásya mitrāvaruṇā pathā^́ vām
7.065.03d     apó ná nāvā^́ duritā^́ tarema

7.065.04a     ā^́ no mitrāvaruṇā havyájuṣṭiṃ
7.065.04b     ghr̥taír gávyūtim ukṣatam íḷābhiḥ
7.065.04c     práti vām átra váram ā^́ jánāya
7.065.04d     pr̥ṇītám udnó diviyásya cā^́roḥ

7.065.05a     eṣá stómo varuṇa mitra túbhyaṃ
7.065.05b     sómaḥ śukró ná vāyáve ayāmi
7.065.05c     aviṣṭáṃ dhíyo jigr̥tám púraṃdhīr
7.065.05d     yūyám pāta suastíbhiḥ sádā naḥ

66

7.066.01a     prá mitráyor váruṇayo
7.066.01b     stómo na etu śūṣíyaḥ
7.066.01c     námasvān tuvijātáyoḥ

7.066.02a     yā^́ dhāráyanta devā^́ḥ
7.066.02b     sudákṣā dákṣapitarā
7.066.02c     asuryā^̀ya prámahasā

7.066.03a     tā^́ na stipā^́ tanūpã^́
7.066.03b     váruṇa jaritr̥̄ṇã^́m
7.066.03c     mítra sādháyataṃ dhíyaḥ

7.066.04a     yád adyá sū^́ra údite
7.066.04b     ánāgā mitró aryamā^́
7.066.04c     suvā^́ti savitā^́ bhágaḥ

7.066.05a     suprāvī^́r astu sá kṣáyaḥ
7.066.05b     prá nú yā^́man sudānavaḥ
7.066.05c     yé no áṃho 'tipíprati

7.066.06a     utá svarā^́jo áditir
7.066.06b     ádabdhasya vratásya yé
7.066.06c     mahó rā^́jāna īśate

7.066.07a     práti vāṃ sū^́ra údite
7.066.07b     mitráṃ gr̥ṇīṣe váruṇam
7.066.07c     aryamáṇaṃ riśā^́dasam

7.066.08a     rāyā^́ hiraṇyayā^́ matír
7.066.08b     iyám avr̥kā^́ya śávase
7.066.08c     iyáṃ víprā medhásātaye

7.066.09a     té syāma deva varuṇa
7.066.09b     té mitra sūríbhiḥ sahá
7.066.09c     íṣaṃ súvaś ca dhīmahi

7.066.10a     bahávaḥ sū^́racakṣaso
7.066.10b     agnijihvā^́ r̥tāvŕ̥dhaḥ
7.066.10c     trī^́ṇi yé yemúr vidáthāni dhītíbhir
7.066.10d     víśvāni páribhūtibhiḥ

7.066.11a     ví yé dadhúḥ śarádam mā^́sam ā^́d áhar
7.066.11b     yajñám aktúṃ ca ā^́d ŕ̥cam
7.066.11c     anāpiyáṃ váruṇo mitró aryamā^́
7.066.11d     kṣatráṃ rā^́jāna āśata

7.066.12a     tád vo adyá manāmahe
7.066.12b     suuktaíḥ sū^́ra údite
7.066.12c     yád óhate váruṇo mitró aryamā^́
7.066.12d     yūyám r̥tásya rathiyaḥ

7.066.13a     r̥tā^́vāna r̥tájātā r̥tāvŕ̥dho
7.066.13b     ghorā^́so anr̥tadvíṣaḥ
7.066.13c     téṣāṃ vaḥ sumné suchardíṣṭame naraḥ
7.066.13d     siyā^́ma yé ca sūráyaḥ

7.066.14a     úd u tyád darśatáṃ vápur
7.066.14b     divá eti pratihvaré
7.066.14c     yád īm āśúr váhati devá étaśo
7.066.14d     víśvasmai cákṣase áram

7.066.15a     śīrṣṇáḥ-śīrṣṇo jágatas tasthúṣas pátiṃ
7.066.15b     samáyā víśvam ā^́ rájaḥ
7.066.15c     saptá svásāraḥ suvitā^́ya sū^́riyaṃ
7.066.15d     váhanti haríto ráthe

7.066.16a     tác cákṣur deváhitaṃ śukrám uccárat
7.066.16b     páśyema śarádaḥ śatáṃ
7.066.16c     jī^́vema śarádaḥ śatám

7.066.17a     kā^́viyebhir adābhiyā
7.066.17b     ā^́ yātaṃ varuṇa dyumát
7.066.17c     mitráś ca sómapītaye

7.066.18a     divó dhā^́mabhir varuṇa
7.066.18b     mitráś cā^́ yātam adrúhā
7.066.18c     píbataṃ sómam ātujī^́

7.066.19a     ā^́ yātam mitrāvaruṇā
7.066.19b     juṣāṇā^́v ā^́hutiṃ narā
7.066.19c     pātáṃ sómam r̥tāvr̥dhā

67

7.067.01a     práti vāṃ ráthaṃ nr̥patī jarádhyai
7.067.01b     havíṣmatā mánasā yajñíyena
7.067.01c     yó vāṃ dūtó ná dhiṣṇiyāv ájīgar
7.067.01d     áchā sūnúr ná pitárā vivakmi

7.067.02a     áśoci agníḥ samidhānó asmé
7.067.02b     úpo adr̥śran támasaś cid ántāḥ
7.067.02c     áceti ketúr uṣásaḥ purástāc
7.067.02d     chriyé divó duhitúr jā^́yamānaḥ

7.067.03a     abhí vāṃ nūnám aśvinā súhotā
7.067.03b     stómaiḥ siṣakti nāsatyā vivakvā^́n
7.067.03c     pūrvī^́bhir yātam pathíyābhir arvā^́k
7.067.03d     suvarvídā vásumatā ráthena

7.067.04a     avór vāṃ nūnám aśvinā yuvā^́kur
7.067.04b     huvé yád vāṃ suté mādhvī vasūyúḥ
7.067.04c     ā^́ vāṃ vahantu sthávirāso áśvāḥ
7.067.04d     píbātho asmé súṣutā mádhūni

7.067.05a     prā^́cīm u devā aśvinā dhíyam me
7.067.05b     ámr̥dhrāṃ sātáye kr̥taṃ vasūyúm
7.067.05c     víśvā aviṣṭaṃ vā^́ja ā^́ púraṃdhīs
7.067.05d     tā^́ naḥ śaktaṃ śacīpatī śácībhiḥ

7.067.06a     aviṣṭáṃ dhīṣú aśvinā na āsú
7.067.06b     prajā^́vad réto áhrayaṃ no astu
7.067.06c     ā^́ vāṃ toké tánaye tū^́tujānāḥ
7.067.06d     surátnāso devávītiṃ gamema

7.067.07a     eṣá syá vām pūrvagátveva sákhye
7.067.07b     nidhír hitó mādhuvī rātó asmé
7.067.07c     áheḷatā mánasā^́ yātam arvā^́g
7.067.07d     aśnántā havyám mā^́nuṣīṣu vikṣú

7.067.08a     ékasmin yóge bhuraṇā samāné
7.067.08b     pári vāṃ saptá sraváto rátho gāt
7.067.08c     ná vāyanti subhúvo deváyuktā
7.067.08d     yé vāṃ dhūrṣú taráṇayo váhanti

7.067.09a     asaścátā maghávadbhyo hí bhūtáṃ
7.067.09b     yé rāyiyā^́ maghadéyaṃ junánti
7.067.09c     prá yé bándhuṃ sūnŕ̥tābhis tiránte
7.067.09d     gávyā pr̥ñcánto áśviyā maghā^́ni

7.067.10a     nū^́ me hávam ā^́ śr̥ṇutaṃ yuvānā
7.067.10b     yāsiṣṭáṃ vartír aśvināv írāvat
7.067.10c     dhattáṃ rátnāni járataṃ ca sūrī^́n
7.067.10d     yūyám pāta suastíbhiḥ sádā naḥ

68

7.068.01a     ā^́ śubhrā yātam aśvinā suáśvā
7.068.01b     gíro dasrā jujuṣāṇā^́ yuvā^́koḥ
7.068.01c     havyā^́ni ca prátibhr̥tā vītáṃ naḥ

7.068.02a     prá vām ándhāṃsi mádiyāni asthur
7.068.02b     áraṃ gantaṃ havíṣo vītáye me
7.068.02c     tiró aryó hávanāni śrutáṃ naḥ

7.068.03a     prá vāṃ rátho mánojavā iyarti
7.068.03b     tiró rájāṃsi aśvinā śatótiḥ
7.068.03c     asmábhyaṃ sūriyāvasū iyānáḥ

7.068.04a     ayáṃ ha yád vāṃ devayā^́ u ádrir
7.068.04b     ūrdhvó vívakti somasúd yuvábhyām
7.068.04c     ā^́ valgū^́ vípro vavr̥tīta havyaíḥ

7.068.05a     citráṃ ha yád vām bhójanaṃ nu ásti
7.068.05b     ní átraye máhiṣvantaṃ yuyotam
7.068.05c     yó vām omā^́naṃ dádhate priyáḥ sán

7.068.06a     utá tyád vāṃ juraté aśvinā bhūc
7.068.06b     cyávānāya pratī^́tiyaṃ havirdé
7.068.06c     ádhi yád várpa itáūti dhattháḥ

7.068.07a     utá tyám bhujyúm aśvinā sákhāyo
7.068.07b     mádhye jahur durévāsaḥ samudré
7.068.07c     nír īm parṣad árāvā yó yuvā^́kuḥ

7.068.08a     vŕ̥kāya cij jásamānāya śaktam
7.068.08b     utá śrutaṃ śayáve hūyámānā
7.068.08c     yā^́v aghniyā^́m ápinvatam apó ná
7.068.08d     staryàṃ cic chaktī^́ aśvinā śácībhiḥ

7.068.09a     eṣá syá kārúr jarate suuktaír
7.068.09b     ágre budhāná uṣásāṃ sumánmā
7.068.09c     iṣā^́ táṃ vardhad aghniyā^́ páyobhir
7.068.09d     yūyám pāta suastíbhiḥ sádā naḥ

69

7.069.01a     ā^́ vāṃ rátho ródasī badbadhānó
7.069.01b     hiraṇyáyo vŕ̥ṣabhir yātu áśvaiḥ
7.069.01c     ghr̥távartaniḥ pavíbhī rucāná
7.069.01d     iṣā^́ṃ voḷhā^́ nr̥pátir vājínīvān

7.069.02a     sá paprathānó abhí páñca bhū^́mā
7.069.02b     trivandhuró mánasā^́ yātu yuktáḥ
7.069.02c     víśo yéna gáchatho devayántīḥ
7.069.02d     kútrā cid yā^́mam aśvinā dádhānā

7.069.03a     suáśvā yaśásā ā^́ yātam arvā^́g
7.069.03b     dásrā nidhím mádhumantam pibāthaḥ
7.069.03c     ví vāṃ rátho vadhúvā yā^́damāno
7.069.03d     ántān divó bādhate vartaníbhyām

7.069.04a     yuvóḥ śríyam pári yóṣāvr̥ṇīta
7.069.04b     sū^́ro duhitā^́ páritakmiyāyām
7.069.04c     yád devayántam ávathaḥ śácībhiḥ
7.069.04d     pári ghraṃsám ománā vāṃ váyo gāt

7.069.05a     yó ha syá vāṃ rathirā vásta usrā^́
7.069.05b     rátho yujānáḥ pariyā^́ti vartíḥ
7.069.05c     téna naḥ śáṃ yór uṣáso víuṣṭau
7.069.05d     ní aśvinā vahataṃ yajñé asmín

7.069.06a     nárā gauréva vidyútaṃ tr̥ṣāṇā^́
7.069.06b     asmā^́kam adyá sávanópa yātam
7.069.06c     purutrā^́ hí vām matíbhir hávante
7.069.06d     mā^́ vām anyé ní yaman devayántaḥ

7.069.07a     yuvám bhujyúm ávaviddhaṃ samudrá
7.069.07b     úd ūhathur árṇaso ásridhānaiḥ
7.069.07c     patatríbhir aśramaír avyathíbhir
7.069.07d     daṃsánābhir aśvinā pāráyantā

7.069.08a     nū^́ me hávam ā^́ śr̥ṇutaṃ yuvānā
7.069.08b     yāsiṣṭáṃ vartír aśvināv írāvat
7.069.08c     dhattáṃ rátnāni járataṃ ca sūrī^́n
7.069.08d     yūyám pāta suastíbhiḥ sádā naḥ

70

7.070.01a     ā^́ viśvavārā aśvinā gataṃ naḥ
7.070.01b     prá tát sthā^́nam avāci vām pr̥thivyā^́m
7.070.01c     áśvo ná vājī^́ śunápr̥ṣṭho asthād
7.070.01d     ā^́ yát sedáthur dhruváse ná yónim

7.070.02a     síṣakti sā^́ vāṃ sumatíś cániṣṭhā
7.070.02b     átāpi gharmó mánuṣo duroṇé
7.070.02c     yó vāṃ samudrā^́n sarítaḥ píparti
7.070.02d     étagvā cin ná suyújā yujānáḥ

7.070.03a     yā^́ni sthā^́nāni aśvinā dadhā^́the
7.070.03b     divó yahvī^́ṣu óṣadhīṣu vikṣú
7.070.03c     ní párvatasya mūrdháni sádantā
7.070.03d     íṣaṃ jánāya dāśúṣe váhantā

7.070.04a     caniṣṭáṃ devā óṣadhīṣu apsú
7.070.04b     yád yogiyā^́ aśnávaithe ŕ̥ṣīṇām
7.070.04c     purū^́ṇi rátnā dádhatau ní asmé
7.070.04d     ánu pū^́rvāṇi cakhyathur yugā^́ni

7.070.05a     śuśruvā^́ṃsā cid aśvinā purū^́ṇi
7.070.05b     abhí bráhmāṇi cakṣāthe ŕ̥ṣīṇām
7.070.05c     práti prá yātaṃ váram ā^́ jánāya
7.070.05d     asmé vām astu sumatíś cániṣṭhā

7.070.06a     yó vāṃ yajñó nāsatiyā havíṣmān
7.070.06b     kr̥tábrahmā samaríyo bhávāti
7.070.06c     úpa prá yātaṃ váram ā^́ vásiṣṭham
7.070.06d     imā^́ bráhmāṇi r̥cyante yuvábhyām

7.070.07a     iyám manīṣā^́ iyám aśvinā gī^́r
7.070.07b     imā^́ṃ suvr̥ktíṃ vr̥ṣaṇā juṣethām
7.070.07c     imā^́ bráhmāṇi yuvayū^́ni agman
7.070.07d     yūyám pāta suastíbhiḥ sádā naḥ

71

7.071.01a     ápa svásur uṣáso nág jihīte
7.071.01b     riṇákti kr̥ṣṇī^́r aruṣā^́ya pánthām
7.071.01c     áśvāmaghā gómaghā vāṃ huvema
7.071.01d     dívā náktaṃ śárum asmád yuyotam

7.071.02a     upā^́yātaṃ dāśúṣe mártiyāya
7.071.02b     ráthena vāmám aśvinā váhantā
7.071.02c     yuyutám asmád ánirām ámīvāṃ
7.071.02d     dívā náktam mādhuvī trā^́sīthāṃ naḥ

7.071.03a     ā^́ vāṃ rátham avamásyāṃ víuṣṭau
7.071.03b     sumnāyávo vŕ̥ṣaṇo vartayantu
7.071.03c     syū^́magabhastim r̥tayúgbhir áśvair
7.071.03d     ā^́ aśvinā vásumantaṃ vahethām

7.071.04a     yó vāṃ rátho nr̥patī ásti voḷhā^́
7.071.04b     trivandhuró vásumām̐ usráyāmā
7.071.04c     ā^́ na enā^́ nāsatiyópa yātam
7.071.04d     abhí yád vāṃ viśvápsnio jígāti

7.071.05a     yuváṃ cyávānaṃ jaráso 'mumuktaṃ
7.071.05b     ní pedáva ūhathur āśúm áśvam
7.071.05c     nír áṃhasas támasa spartam átriṃ
7.071.05d     ní jāhuṣáṃ śithiré dhātam antáḥ

7.071.06a     iyám manīṣā^́ iyám aśvinā gī^́r
7.071.06b     imā^́ṃ suvr̥ktíṃ vr̥ṣaṇā juṣethām
7.071.06c     imā^́ bráhmāṇi yuvayū^́ni agman
7.071.06d     yūyám pāta suastíbhiḥ sádā naḥ

72

7.072.01a     ā^́ gómatā nāsatiyā ráthena
7.072.01b     áśvāvatā puruścandréṇa yātam
7.072.01c     abhí vāṃ víśvā niyútaḥ sacante
7.072.01d     spārháyā śriyā^́ tanúvā śubhānā^́

7.072.02a     ā^́ no devébhir úpa yātam arvā^́k
7.072.02b     sajóṣasā nāsatiyā ráthena
7.072.02c     yuvór hí naḥ sakhiyā^́ pítriyāṇi
7.072.02d     samānó bándhur utá tásya vittam

7.072.03a     úd u stómāso aśvínor abudhrañ
7.072.03b     jāmí bráhmāṇi uṣásaś ca devī^́ḥ
7.072.03c     āvívāsan ródasī dhíṣṇiyemé
7.072.03d     áchā vípro nā^́satiyā vivakti

7.072.04a     ví céd uchánti aśvinā uṣā^́saḥ
7.072.04b     prá vām bráhmāṇi kārávo bharante
7.072.04c     ūrdhvám bhānúṃ savitā^́ devó aśred
7.072.04d     br̥hád agnáyaḥ samídhā jarante

7.072.05a     ā^́ paścā^́tān nāsatiyā^́ purástād
7.072.05b     ā^́śvinā yātam adharā^́d údaktāt
7.072.05c     ā^́ viśvátaḥ pā^́ñcajanyena rāyā^́
7.072.05d     yūyám pāta suastíbhiḥ sádā naḥ

73

7.073.01a     átāriṣma támasas pārám asyá
7.073.01b     práti stómaṃ devayánto dádhānāḥ
7.073.01c     purudáṃsā purutámā purājā^́
7.073.01d     ámartiyā havate aśvínā gī^́ḥ

7.073.02a     ní u priyó mánuṣaḥ sādi hótā
7.073.02b     nā^́satyā yó yájate vándate ca
7.073.02c     aśnītám mádhvo aśvinā upāká
7.073.02d     ā^́ vāṃ voce vidátheṣu práyasvān

7.073.03a     áhema yajñám pathã^́m urāṇā^́
7.073.03b     imā^́ṃ suvr̥ktíṃ vr̥ṣaṇā juṣethām
7.073.03c     śruṣṭīvéva préṣito vām abodhi
7.073.03d     práti stómair járamāṇo vásiṣṭhaḥ

7.073.04a     úpa tyā^́ váhnī gamato víśaṃ no
7.073.04b     rakṣoháṇā sámbhr̥tā vīḷúpāṇī
7.073.04c     sám ándhāṃsi agmata matsarā^́ṇi
7.073.04d     mā^́ no mardhiṣṭam ā^́ gataṃ śivéna

7.073.05a     ā^́ paścā^́tān nāsatiyā^́ purástād
7.073.05b     ā^́śvinā yātam adharā^́d údaktāt
7.073.05c     ā^́ viśvátaḥ pā^́ñcajanyena rāyā^́
7.073.05d     yūyám pāta suastíbhiḥ sádā naḥ

74

7.074.01a     imā^́ u vāṃ díviṣṭaya
7.074.01b     usrā^́ havante aśvinā
7.074.01c     ayáṃ vām ahve ávase śacīvasū
7.074.01d     víśaṃ-viśaṃ hí gáchathaḥ

7.074.02a     yuváṃ citráṃ dadathur bhójanaṃ narā
7.074.02b     códethāṃ sūnŕ̥tāvate
7.074.02c     arvā^́g ráthaṃ sámanasā ní yachatam
7.074.02d     píbataṃ somiyám mádhu

7.074.03a     ā^́ yātam úpa bhūṣatam
7.074.03b     mádhvaḥ pibatam aśvinā
7.074.03c     dugdhám páyo vr̥ṣaṇā jeniyāvasū
7.074.03d     mā^́ no mardhiṣṭam ā^́ gatam

7.074.04a     áśvāso yé vām úpa dāśúṣo gr̥háṃ
7.074.04b     yuvā^́ṃ dī^́yanti bíbhrataḥ
7.074.04c     makṣūyúbhir narā háyebhir aśvinā
7.074.04d     ā^́ devā yātam asmayū^́

7.074.05a     ádhā ha yánto aśvínā
7.074.05b     pŕ̥kṣaḥ sacanta sūráyaḥ
7.074.05c     tā^́ yaṃsato maghávadbhyo dhruváṃ yáśaś
7.074.05d     chardír asmábhyaṃ nā^́satyā

7.074.06a     prá yé yayúr avr̥kā^́so ráthā iva
7.074.06b     nr̥pātā^́ro jánānãm
7.074.06c     utá svéna śávasā śūśuvur nára
7.074.06d     utá kṣiyanti sukṣitím

75

7.075.01a     ví uṣā^́ āvo divijā^́ r̥téna
7.075.01b     āviṣkr̥ṇvānā^́ mahimā^́nam ā^́gāt
7.075.01c     ápa drúhas táma āvar ájuṣṭam
7.075.01d     áṅgirastamā pathíyā ajīgaḥ

7.075.02a     mahé no adyá suvitā^́ya bodhi
7.075.02b     úṣo mahé saúbhagāya prá yandhi
7.075.02c     citráṃ rayíṃ yaśásaṃ dhehi asmé
7.075.02d     dévi márteṣu mānuṣi śravasyúm

7.075.03a     eté tiyé bhānávo darśatā^́yāś
7.075.03b     citrā^́ uṣáso amŕ̥tāsa ā^́guḥ
7.075.03c     janáyanto daíviyāni vratā^́ni
7.075.03d     āpr̥ṇánto antárikṣā ví asthuḥ

7.075.04a     eṣā^́ siyā^́ · yujānā^́ parākā^́t
7.075.04b     páñca kṣitī^́ḥ pári sadyó jigāti
7.075.04c     abhipáśyantī vayúnā jánānāṃ
7.075.04d     divó duhitā^́ bhúvanasya pátnī

7.075.05a     vājínīvatī sū^́riyasya yóṣā
7.075.05b     citrā^́maghā rāyá īśe vásūnām
7.075.05c     ŕ̥ṣiṣṭutā jaráyantī maghónī
7.075.05d     uṣā^́ uchati váhnibhir gr̥ṇānā^́

7.075.06a     práti dyutānā^́m aruṣā^́so áśvāś
7.075.06b     citrā^́ adr̥śrann uṣásaṃ váhantaḥ
7.075.06c     yā^́ti śubhrā^́ viśvapíśā ráthena
7.075.06d     dádhāti rátnaṃ vidhaté jánāya

7.075.07a     satyā^́ satyébhir mahatī^́ mahádbhir
7.075.07b     devī^́ devébhir yajatā^́ yájatraiḥ
7.075.07c     rujád dr̥̄ḷhā^́ni⁺ dádad usríyāṇām
7.075.07d     práti gā^́va uṣásaṃ vāvaśanta

7.075.08a     nū^́ no gómad vīrávad dhehi rátnam
7.075.08b     úṣo áśvāvad purubhójo asmé
7.075.08c     mā^́ no barhíḥ puruṣátā nidé kar
7.075.08d     yūyám pāta suastíbhiḥ sádā naḥ

76

7.076.01a     úd u jyótir amŕ̥taṃ viśvájanyaṃ
7.076.01b     viśvā^́naraḥ savitā^́ devó aśret
7.076.01c     krátvā devā^́nām ajaniṣṭa cákṣur
7.076.01d     āvír akar bhúvanaṃ víśvam uṣā^́ḥ

7.076.02a     prá me pánthā devayā^́nā adr̥śrann
7.076.02b     ámardhanto vásubhir íṣkr̥tāsaḥ
7.076.02c     ábhūd u ketúr uṣásaḥ purástāt
7.076.02d     pratīcī^́ ā^́gād ádhi harmiyébhyaḥ

7.076.03a     tā^́nī^́d áhāni bahulā^́ni āsan
7.076.03b     yā^́ prācī^́nam úditā sū^́riyasya
7.076.03c     yátaḥ pári jārá ivācárantī
7.076.03d     úṣo dadr̥kṣé ná púnar yatī^́va

7.076.04a     tá íd devā^́nāṃ sadhamā^́da āsann
7.076.04b     r̥tā^́vānaḥ kaváyaḥ pūrviyā^́saḥ
7.076.04c     gūḷháṃ jyótiḥ pitáro ánv avindan
7.076.04d     satyámantrā ajanayann uṣā^́sam

7.076.05a     samāná ūrvé ádhi sáṃgatāsaḥ
7.076.05b     sáṃ jānate ná yatante mithás té
7.076.05c     té devā^́nāṃ ná minanti vratā^́ni
7.076.05d     ámardhanto vásubhir yā^́damānāḥ

7.076.06a     práti tvā stómair īḷate vásiṣṭhā
7.076.06b     uṣarbúdhaḥ subhage tuṣṭuvā^́ṃsaḥ
7.076.06c     gávāṃ netrī^́ vā^́japatnī na ucha
7.076.06d     úṣaḥ sujāte prathamā^́ jarasva

7.076.07a     eṣā^́ netrī^́ rā^́dhasaḥ sūnŕ̥tānām
7.076.07b     uṣā^́ uchántī ribhyate vásiṣṭhaiḥ
7.076.07c     dīrghaśrútaṃ rayím asmé dádhānā
7.076.07d     yūyám pāta suastíbhiḥ sádā naḥ

77

7.077.01a     úpo ruruce yuvatír ná yóṣā
7.077.01b     víśvaṃ jīvám prasuvántī carā^́yai
7.077.01c     ábhūd agníḥ samídhe mā^́nuṣāṇām
7.077.01d     ákar jyótir bā^́dhamānā támāṃsi

7.077.02a     víśvam pratīcī^́ sapráthā úd asthād
7.077.02b     rúśad vā^́so bíbhratī śukrám aśvait
7.077.02c     híraṇyavarṇā sudŕ̥śīkasaṃdr̥g
7.077.02d     gávām mātā^́ netrī^́ áhnām aroci

7.077.03a     devā^́nāṃ cákṣuḥ subhágā váhantī
7.077.03b     śvetáṃ náyantī sudŕ̥śīkam áśvam
7.077.03c     uṣā^́ adarśi raśmíbhir víaktā
7.077.03d     citrā^́maghā víśvam ánu prábhūtā

7.077.04a     ántivāmā dūré amítram ucha
7.077.04b     urvī^́ṃ gávyūtim ábhayaṃ kr̥dhī naḥ
7.077.04c     yāváya dvéṣa ā^́ bharā vásūni
7.077.04d     codáya rā^́dho gr̥ṇaté maghoni

7.077.05a     asmé śréṣṭhebhir bhānúbhir ví bhāhi
7.077.05b     úṣo devi pratirántī na ā^́yuḥ
7.077.05c     íṣaṃ ca no dádhatī viśvavāre
7.077.05d     gómad áśvāvad ráthavac ca rā^́dhaḥ

7.077.06a     yā^́ṃ tvā divo duhitar vardháyanti
7.077.06b     úṣaḥ sujāte matíbhir vásiṣṭhāḥ
7.077.06c     sā^́smā^́su dhā rayím r̥ṣvám br̥hántaṃ
7.077.06d     yūyám pāta suastíbhiḥ sádā naḥ

78

7.078.01a     práti ketávaḥ prathamā^́ adr̥śrann
7.078.01b     ūrdhvā^́ asyā añjáyo ví śrayante
7.078.01c     úṣo arvā^́cā br̥hatā^́ ráthena
7.078.01d     jyótiṣmatā vāmám asmábhya° vakṣi

7.078.02a     práti ṣīm agnír jarate sámiddhaḥ
7.078.02b     práti víprāso matíbhir gr̥ṇántaḥ
7.078.02c     uṣā^́ yāti jyótiṣā bā^́dhamānā
7.078.02d     víśvā támāṃsi duritā^́pa devī^́

7.078.03a     etā^́ u tyā^́ḥ práty adr̥śran purástāj
7.078.03b     jyótir yáchantīr uṣáso vibhātī^́ḥ
7.078.03c     ájījanan sū^́riyaṃ yajñám agním
7.078.03d     apācī^́naṃ támo agād ájuṣṭam

7.078.04a     áceti divó duhitā^́ maghónī
7.078.04b     víśve paśyanti uṣásaṃ vibhātī^́m
7.078.04c     ā^́sthād ráthaṃ svadháyā yujyámānam
7.078.04d     ā^́ yám áśvāsaḥ suyújo váhanti

7.078.05a     práti tvādyá sumánaso budhanta
7.078.05b     asmā^́kāso maghávāno vayáṃ ca
7.078.05c     tilvilāyádhvam uṣaso vibhātī^́r
7.078.05d     yūyám pāta suastíbhiḥ sádā naḥ

79

7.079.01a     ví uṣā^́ āvaḥ pathíyā jánānām
7.079.01b     páñca kṣitī^́r mā^́nuṣīr bodháyantī
7.079.01c     susaṃdŕ̥gbhir ukṣábhir bhānúm aśred
7.079.01d     ví sū^́riyo ródasī cákṣasāvaḥ

7.079.02a     ví añjate divó ánteṣu aktū^́n
7.079.02b     víśo ná yuktā^́ uṣáso yatante
7.079.02c     sáṃ te gā^́vas táma ā^́ vartayanti
7.079.02d     jyótir yachanti savitéva bāhū^́

7.079.03a     ábhūd uṣā^́ índratamā maghónī
7.079.03b     ájījanat suvitā^́ya śrávāṃsi
7.079.03c     ví divó devī^́ duhitā^́ dadhāti
7.079.03d     áṅgirastamā sukŕ̥te vásūni

7.079.04a     tā^́vad uṣo rā^́dho asmábhya° rāsva
7.079.04b     yā^́vat stotŕ̥bhyo árado gr̥ṇānā^́
7.079.04c     yā^́ṃ tvā jajñúr vr̥ṣabhásyā ráveṇa
7.079.04d     ví dr̥̄ḷhásya⁺ dúro ádrer aūrṇoḥ

7.079.05a     deváṃ-devaṃ rā^́dhase codáyanti
7.079.05b     asmadríak sūnŕ̥tā īráyantī
7.079.05c     viuchántī naḥ sanáye dhíyo dhā
7.079.05d     yūyám pāta suastíbhiḥ sádā naḥ

80

7.080.01a     práti stómebhir uṣásaṃ vásiṣṭhā
7.080.01b     gīrbhír víprāsaḥ prathamā^́ abudhran
7.080.01c     vivartáyantīṃ rájasī sámante
7.080.01d     āviṣkr̥ṇvatī^́m bhúvanāni víśvā

7.080.02a     eṣā^́ siyā^́ návyam ā^́yur dádhānā
7.080.02b     gūḍhvī^́ támo jyótiṣoṣā^́ abodhi
7.080.02c     ágra eti yuvatír áhrayāṇā
7.080.02d     prā^́cikitat sū^́riyaṃ yajñám agním

7.080.03a     áśvāvatīr gómatīr na uṣā^́so
7.080.03b     vīrávatīḥ sádam uchantu bhadrā^́ḥ
7.080.03c     ghr̥táṃ dúhānā viśvátaḥ prápītā
7.080.03d     yūyám pāta suastíbhiḥ sádā naḥ

81

7.081.01a     práty u adarśi āyatī^́
7.081.01b     uchántī duhitā^́ diváḥ
7.081.01c     ápo máhi vyayati cákṣase támo
7.081.01d     jyótiṣ kr̥ṇoti sūnárī

7.081.02a     úd usríyāḥ sr̥jate sū^́riyaḥ sácām̐
7.081.02b     udyán nákṣatram arcivát
7.081.02c     távéd uṣo viúṣi sū^́riyasya ca
7.081.02d     sám bhakténa gamemahi

7.081.03a     práti tvā duhitar diva
7.081.03b     úṣo jīrā^́ abhutsmahi
7.081.03c     yā^́ váhasi purú spārháṃ vananvati
7.081.03d     rátnaṃ ná dāśúṣe máyaḥ

7.081.04a     uchántī yā^́ kr̥ṇóṣi maṃhánā mahi
7.081.04b     prakhyaí devi súvar dr̥śé
7.081.04c     tásyās te ratnabhā^́ja īmahe vayáṃ
7.081.04d     syā^́ma mātúr ná sūnávaḥ

7.081.05a     tác citráṃ rā^́dha ā^́ bhara
7.081.05b     úṣo yád dīrghaśrúttamam
7.081.05c     yát te divo duhitar martabhójanaṃ
7.081.05d     tád rāsva bhunájāmahai

7.081.06a     śrávaḥ sūríbhyo amŕ̥taṃ vasutvanáṃ
7.081.06b     vā^́jām̐ asmábhyaṃ gómataḥ
7.081.06c     codayitrī^́ maghónaḥ sūnŕ̥tāvatī
7.081.06d     uṣā^́ uchad ápa srídhaḥ

82

7.082.01a     índrāvaruṇā yuvám adhvarā^́ya no
7.082.01b     viśé jánāya máhi śárma yachatam
7.082.01c     dīrgháprayajyum áti yó vanuṣyáti
7.082.01d     vayáṃ jayema pŕ̥tanāsu dūḍhíyaḥ

7.082.02a     samrā^́ḷ anyáḥ svarā^́ḷ anyá ucyate vām
7.082.02b     mahā^́ntāv índrāváruṇā mahā^́vasū
7.082.02c     víśve devā^́saḥ paramé víomani
7.082.02d     sáṃ vām ójo vr̥ṣaṇā sám bálaṃ dadhuḥ

7.082.03a     ánu apā^́ṃ khā^́ni atr̥ntam ójasā
7.082.03b     ā^́ sū^́riyam airayataṃ diví prabhúm
7.082.03c     índrāvaruṇā máde asya māyíno
7.082.03d     ápinvatam apítaḥ pínvataṃ dhíyaḥ

7.082.04a     yuvā^́m íd yutsú pŕ̥tanāsu váhnayo
7.082.04b     yuvā^́ṃ kṣémasya prasavé mitájñavaḥ
7.082.04c     īśānā^́ vásva ubháyasya kāráva
7.082.04d     índrāvaruṇā suhávā havāmahe

7.082.05a     índrāvaruṇā yád imā^́ni cakráthur
7.082.05b     víśvā jātā^́ni bhúvanasya majmánā
7.082.05c     kṣémeṇa mitró váruṇaṃ duvasyáti
7.082.05d     marúdbhir ugráḥ śúbham anyá īyate

7.082.06a     mahé śulkā^́ya váruṇasya nú tviṣá
7.082.06b     ójo mimāte dhruvám asya yát suvám
7.082.06c     ájāmim anyáḥ śnatháyantam ā^́tirad
7.082.06d     dabhrébhir anyáḥ prá vr̥ṇoti bhū^́yasaḥ

7.082.07a     ná tám áṃho ná duritā^́ni mártiyam
7.082.07b     índrāvaruṇā ná tápaḥ kútaś caná
7.082.07c     yásya devā gáchatho vīthó adhvaráṃ
7.082.07d     ná tám mártasya naśate párihvr̥tiḥ

7.082.08a     arvā^́ṅ narā daíviyenā^́vasā^́ gataṃ
7.082.08b     śr̥ṇutáṃ hávaṃ yádi me jújoṣathaḥ
7.082.08c     yuvór hí sakhyám utá vā yád ā^́piyam
7.082.08d     mārḍīkám indrāvaruṇā ní yachatam

7.082.09a     asmā^́kam indrāvaruṇā bháre-bhare
7.082.09b     puroyodhā^́ bhavataṃ kr̥ṣṭiojasā
7.082.09c     yád vāṃ hávanta ubháye ádha spr̥dhí
7.082.09d     náras tokásya tánayasya sātíṣu

7.082.10a     asmé índro váruṇo mitró aryamā^́
7.082.10b     dyumnáṃ yachantu máhi śárma sapráthaḥ
7.082.10c     avadhráṃ jyótir áditer r̥tāvŕ̥dho
7.082.10d     devásya ślókaṃ savitúr manāmahe

83

7.083.01a     yuvā^́ṃ narā páśyamānāsa ā^́piyam
7.083.01b     prācā^́ gavyántaḥ pr̥thupárśavo yayuḥ
7.083.01c     dā^́sā ca vr̥trā^́ hatám ā^́riyāṇi ca
7.083.01d     sudā^́sam indrāvaruṇā^́vasāvatam

7.083.02a     yátrā náraḥ samáyante kr̥tádhvajo
7.083.02b     yásminn ājā^́ bhávati kíṃ caná priyám
7.083.02c     yátrā bháyante bhúvanā suvardŕ̥śas
7.083.02d     tátrā na indrāvaruṇā^́dhi vocatam

7.083.03a     sám bhū^́myā ántā dhvasirā^́ adr̥kṣata
7.083.03b     índrāvaruṇā diví ghóṣa ā^́ruhat
7.083.03c     ásthur jánānām úpa mā^́m árātayo
7.083.03d     arvā^́g ávasā havanaśrutā^́ gatam

7.083.04a     índrāvaruṇā vadhánābhir apratí
7.083.04b     bhedáṃ vanvántā prá sudā^́sam āvatam
7.083.04c     bráhmāṇi eṣāṃ śr̥ṇutaṃ hávīmani
7.083.04d     satyā^́ tŕ̥tsūnām abhavat puróhitiḥ

7.083.05a     índrāvaruṇāv abhí ā^́ tapanti mā
7.083.05b     aghā^́ni aryó vanúṣām árātayaḥ
7.083.05c     yuváṃ hí vásva ubháyasya rā^́jatho
7.083.05d     ádha smā no avatam pā^́riye diví

7.083.06a     yuvā^́ṃ havanta ubháyāsa ājíṣu
7.083.06b     índraṃ ca vásvo váruṇaṃ ca sātáye
7.083.06c     yátra rā^́jabhir daśábhir níbādhitam
7.083.06d     prá sudā^́sam ā^́vataṃ tŕ̥tsubhiḥ sahá

7.083.07a     dáśa rā^́jānaḥ sámitā áyajyavaḥ
7.083.07b     sudā^́sam indrāvaruṇā ná yuyudhuḥ
7.083.07c     satyā^́ nr̥̄ṇā^́m⁺ admasádām úpastutir
7.083.07d     devā^́ eṣām abhavan deváhūtiṣu

7.083.08a     dāśarājñé páriyattāya viśvátaḥ
7.083.08b     sudā^́sa indrāvaruṇāv aśikṣatam
7.083.08c     śvityáñco yátra námasā kapardíno
7.083.08d     dhiyā^́ dhī^́vanto ásapanta tŕ̥tsavaḥ

7.083.09a     vr̥trā^́ṇi anyáḥ samithéṣu jíghnate
7.083.09b     vratā^́ni anyó abhí rakṣate sádā
7.083.09c     hávāmahe vāṃ vr̥ṣaṇā suvr̥ktíbhir
7.083.09d     asmé indrāvaruṇā śárma yachatam

7.083.10a     asmé índro váruṇo mitró aryamā^́
7.083.10b     dyumnáṃ yachantu máhi śárma sapráthaḥ
7.083.10c     avadhráṃ jyótir áditer r̥tāvŕ̥dho
7.083.10d     devásya ślókaṃ savitúr manāmahe

84

7.084.01a     ā^́ vāṃ rājānāv adhvaré vavr̥tyāṃ
7.084.01b     havyébhir indrāvaruṇā námobhiḥ
7.084.01c     prá vāṃ ghr̥tā^́cī bāhuvór dádhānā
7.084.01d     pári tmánā víṣurūpā jigāti

7.084.02a     yuvó rāṣṭarám br̥hád invati dyaúr
7.084.02b     yaú setŕ̥bhir arajjúbhiḥ sinītháḥ
7.084.02c     pári no héḷo váruṇasya vr̥jyā
7.084.02d     urúṃ na índraḥ kr̥ṇavad ulokám†

7.084.03a     kr̥táṃ no yajñáṃ vidátheṣu cā^́ruṃ
7.084.03b     kr̥tám bráhmāṇi sūríṣu praśastā^́
7.084.03c     úpo rayír devájūto na etu
7.084.03d     prá ṇa spārhā^́bhir ūtíbhis tiretam

7.084.04a     asmé indrāvaruṇā viśvávāraṃ
7.084.04b     rayíṃ dhattaṃ vásumantam purukṣúm
7.084.04c     prá yá ādityó ánr̥tā minā^́ti
7.084.04d     ámitā śū^́ro dayate vásūni

7.084.05a     iyám índraṃ váruṇam aṣṭa me gī^́ḥ
7.084.05b     prā^́vat toké tánaye tū^́tujānā
7.084.05c     surátnāso devávītiṃ gamema
7.084.05d     yūyám pāta suastíbhiḥ sádā naḥ

85

7.085.01a     punīṣé vām arakṣásam manīṣā^́ṃ
7.085.01b     sómam índrāya váruṇāya júhvat
7.085.01c     ghr̥tápratīkām uṣásaṃ ná devī^́ṃ
7.085.01d     tā^́ no yā^́mann uruṣyatām abhī^́ke

7.085.02a     spárdhante vā^́ u devahū^́ye átra
7.085.02b     yéṣu dhvajéṣu didyávaḥ pátanti
7.085.02c     yuváṃ tā^́m̐ indrāvaruṇāv amítrān
7.085.02d     hatám párācaḥ śáruvā víṣūcaḥ

7.085.03a     ā^́paś cid dhí sváyaśasaḥ sádassu
7.085.03b     devī^́r índraṃ váruṇaṃ devátā dhúḥ
7.085.03c     kr̥ṣṭī^́r anyó dhāráyati práviktā
7.085.03d     vr̥trā^́ṇi anyó apratī^́ni hanti

7.085.04a     sá sukrátur r̥tacíd astu hótā
7.085.04b     yá āditya śávasā vāṃ námasvān
7.085.04c     āvavártad ávase vāṃ havíṣmān
7.085.04d     ásad ít sá suvitā^́ya práyasvān

7.085.05a     iyám índraṃ váruṇam aṣṭa me gī^́ḥ
7.085.05b     prā^́vat toké tánaye tū^́tujānā
7.085.05c     surátnāso devávītiṃ gamema
7.085.05d     yūyám pāta suastíbhiḥ sádā naḥ

86

7.086.01a     dhī^́rā tú asya mahinā^́ janū^́ṃṣi
7.086.01b     ví yás tastámbha ródasī cid urvī^́
7.086.01c     prá nā^́kam r̥ṣváṃ nunude br̥hántaṃ
7.086.01d     dvitā^́ nákṣatram papráthac ca bhū^́ma

7.086.02a     utá sváyā tanúvā sáṃ vade tát
7.086.02b     kadā^́ nú antár váruṇe bhuvāni
7.086.02c     kím me havyám áhr̥ṇāno juṣeta
7.086.02d     kadā^́ mr̥̄ḷīkáṃ⁺ sumánā abhí khyam

7.086.03a     pr̥ché tád éno varuṇa didŕ̥kṣu
7.086.03b     úpo emi cikitúṣo vipŕ̥cham
7.086.03c     samānám ín me kaváyaś cid āhur
7.086.03d     ayáṃ ha túbhyaṃ váruṇo hr̥ṇīte

7.086.04a     kím ā^́ga āsa varuṇa jyáyiṣṭhaṃ⁺
7.086.04b     yát stotā^́raṃ jíghāṃsasi sákhāyam
7.086.04c     prá tán me voco dūḷabha svadhāvo
7.086.04d     áva tvānenā^́ námasā turá iyām

7.086.05a     áva drugdhā^́ni pítriyā sr̥jā no
7.086.05b     áva yā^́ vayáṃ cakr̥mā^́ tanū^́bhiḥ
7.086.05c     áva rājan paśutŕ̥paṃ ná tāyúṃ
7.086.05d     sr̥jā^́ vatsáṃ ná dā^́mano vásiṣṭham

7.086.06a     ná sá svó dákṣo varuṇa dhrútiḥ sā^́
7.086.06b     súrā manyúr vibhī^́dako ácittiḥ
7.086.06c     ásti jyā^́yān kánīyasa upāré
7.086.06d     svápnaś canéd ánr̥tasya prayotā^́

7.086.07a     áraṃ dāsó ná mīḷhúṣe karāṇi
7.086.07b     aháṃ devā^́ya bhū^́rṇaye ánāgāḥ
7.086.07c     ácetayad acíto devó aryó
7.086.07d     gŕ̥tsaṃ rāyé kavítaro junāti

7.086.08a     ayáṃ sú túbhyaṃ varuṇa svadhāvo
7.086.08b     hr̥dí stóma úpaśritaś cid astu
7.086.08c     śáṃ naḥ kṣéme śám u yóge no astu
7.086.08d     yūyám pāta suastíbhiḥ sádā naḥ

87

7.087.01a     rádat pathó váruṇaḥ sū^́riyāya
7.087.01b     prá árṇāṃsi samudríyā nadī^́nām
7.087.01c     sárgo ná sr̥ṣṭó árvatīr r̥tāyáñ
7.087.01d     cakā^́ra mahī^́r avánīr áhabhyaḥ

7.087.02a     ātmā^́ te vā^́to rája ā^́ navīnot
7.087.02b     paśúr ná bhū^́rṇir yávase sasavā^́n
7.087.02c     antár mahī^́ br̥hatī^́ ródasīmé
7.087.02d     víśvā te dhā^́ma varuṇa priyā^́ṇi

7.087.03a     pári spáśo váruṇasya smádiṣṭā
7.087.03b     ubhé paśyanti ródasī suméke
7.087.03c     r̥tā^́vānaḥ kaváyo yajñádhīrāḥ
7.087.03d     prácetaso yá iṣáyanta mánma

7.087.04a     uvā^́ca me váruṇo médhirāya
7.087.04b     tríḥ saptá nā^́ma ághniyā bibharti
7.087.04c     vidvā^́n padásya gúhiyā ná vocad
7.087.04d     yugā^́ya vípra úparāya śíkṣan

7.087.05a     tisró dyā^́vo níhitā antár asmin
7.087.05b     tisró bhū^́mīr úparāḥ ṣáḍvidhānāḥ
7.087.05c     gŕ̥tso rā^́jā váruṇaś cakra etáṃ
7.087.05d     diví preṅkháṃ hiraṇyáyaṃ śubhé kám

7.087.06a     áva síndhuṃ váruṇo dyaúr iva sthād
7.087.06b     drapsó ná śvetó mr̥gás túviṣmān
7.087.06c     gambhīráśaṃso rájaso vimā^́naḥ
7.087.06d     supārákṣatraḥ sató asyá rā^́jā

7.087.07a     yó mr̥̄ḷáyāti⁺ cakrúṣe cid ā^́go
7.087.07b     vayáṃ siyāma váruṇe ánāgāḥ
7.087.07c     ánu vratā^́ni áditer r̥dhánto
7.087.07d     yūyám pāta suastíbhiḥ sádā naḥ

88

7.088.01a     prá śundhyúvaṃ váruṇāya práyiṣṭhām⁺
7.088.01b     matíṃ vasiṣṭha mīḷhúṣe bharasva
7.088.01c     yá īm arvā^́ñcaṃ kárate yájatraṃ
7.088.01d     sahásrāmaghaṃ vŕ̥ṣaṇam br̥hántam

7.088.02a     ádhā nú asya saṃdŕ̥śaṃ jaganvā^́n
7.088.02b     agnér ánīkaṃ váruṇasya maṃsi
7.088.02c     súvar yád áśmann adhipā^́ u ándho
7.088.02d     abhí mā vápur dr̥śáye ninīyāt

7.088.03a     ā^́ yád ruhā^́va váruṇaś ca nā^́vam
7.088.03b     prá yát samudrám īráyāva mádhyam
7.088.03c     ádhi yád apā^́ṃ sanúbhiś cárāva
7.088.03d     prá preṅkhá īṅkhayāvahai śubhé kám

7.088.04a     vásiṣṭhaṃ ha váruṇo nāví ā^́dhād
7.088.04b     ŕ̥ṣiṃ cakāra suápā máhobhiḥ
7.088.04c     stotā^́raṃ vípraḥ sudinatvé áhnāṃ
7.088.04d     yā^́n nú dyā^́vas tatánan yā^́d uṣā^́saḥ

7.088.05a     kúva tyā^́ni nau sakhiyā^́ babhūvuḥ
7.088.05b     sácāvahe yád avr̥kám purā^́ cit
7.088.05c     br̥hántam mā^́naṃ varuṇa svadhāvaḥ
7.088.05d     sahásradvāraṃ jagamā gr̥háṃ te

7.088.06a     yá āpír nítyo varuṇa priyáḥ sán
7.088.06b     tuvā^́m ā^́gāṃsi kr̥ṇávat sákhā te
7.088.06c     mā^́ ta énasvanto yakṣin bhujema
7.088.06d     yandhí ṣmā vípra stuvaté várūtham

7.088.07a     dhruvā^́su tvāsú kṣitíṣu kṣiyánto
7.088.07b     ví asmát pā^́śaṃ váruṇo mumocat
7.088.07c     ávo vanvānā^́ áditer upásthād
7.088.07d     yūyám pāta suastíbhiḥ sádā naḥ

89

7.089.01a     mó ṣú varuṇa mr̥nmáyaṃ
7.089.01b     gr̥háṃ rājann aháṃ gamam
7.089.01c     mr̥̄ḷā^́+ sukṣatra mr̥̄ḷáya

7.089.02a     yád émi prasphuránn iva
7.089.02b     dŕ̥tir ná dhmātó adrivaḥ
7.089.02c     mr̥̄ḷā^́+ sukṣatra mr̥̄ḷáya

7.089.03a     krátvaḥ samaha dīnátā
7.089.03b     pratīpáṃ jagamā śuce
7.089.03c     mr̥̄ḷā^́+ sukṣatra mr̥̄ḷáya

7.089.04a     apā^́m mádhye tasthivā^́ṃsaṃ
7.089.04b     tŕ̥ṣṇāvidaj jaritā^́ram
7.089.04c     mr̥̄ḷā^́+ sukṣatra mr̥̄ḷáya

7.089.05a     yát kíṃ cedáṃ varuṇa daíviye jáne
7.089.05b     abhidrohám manuṣíyāś cárāmasi
7.089.05c     ácittī yát táva dhármā yuyopimá
7.089.05d     mā^́ nas tásmād énaso deva rīriṣaḥ

90

7.090.01a     prá vīrayā^́ śúcayo dadrire vām
7.090.01b     adhvaryúbhir mádhumantaḥ sutā^́saḥ
7.090.01c     váha vāyo niyúto yāhi áchā
7.090.01d     píbā sutásya ándhaso mádāya

7.090.02a     īśānā^́ya práhutiṃ yás ta ā^́naṭ
7.090.02b     chúciṃ sómaṃ śucipās túbhya° vāyo
7.090.02c     kr̥ṇóṣi tám mártiyeṣu praśastáṃ
7.090.02d     jātó-jāto jāyate vājī^́ asya

7.090.03a     rāyé nú yáṃ jajñátū ródasīmé
7.090.03b     rāyé devī^́ dhiṣáṇā dhāti devám
7.090.03c     ádha vāyúṃ niyútaḥ saścata svā^́
7.090.03d     utá śvetáṃ vásudhitiṃ nireké

7.090.04a     uchánn uṣásaḥ sudínā ariprā^́
7.090.04b     urú jyótir vividur dī^́dhiyānāḥ
7.090.04c     gávyaṃ cid ūrvám uśíjo ví vavrus
7.090.04d     téṣām ánu pradívaḥ sasrur ā^́paḥ

7.090.05a     té satyéna mánasā dī^́dhiyānāḥ
7.090.05b     svéna yuktā^́saḥ krátunā vahanti
7.090.05c     índravāyū vīravā^́haṃ ráthaṃ vām
7.090.05d     īśānáyor abhí pŕ̥kṣaḥ sacante

7.090.06a     īśānā^́so yé dádhate súvar ṇo
7.090.06b     góbhir áśvebhir vásubhir híraṇyaiḥ
7.090.06c     índravāyū sūráyo víśvam ā^́yur
7.090.06d     árvadbhir vīraíḥ pŕ̥tanāsu sahyuḥ

7.090.07a     árvanto ná śrávaso bhíkṣamāṇā
7.090.07b     indravāyū^́ suṣṭutíbhir vásiṣṭhāḥ
7.090.07c     vājayántaḥ sú ávase huvema
7.090.07d     yūyám pāta suastíbhiḥ sádā naḥ

91

7.091.01a     kuvíd aṅgá námasā yé vr̥dhā^́saḥ
7.091.01b     purā^́ devā^́ anavadyā^́sa ā^́san
7.091.01c     té vāyáve mánave bādhitā^́ya
7.091.01d     ávāsayann uṣásaṃ sū^́riyeṇa

7.091.02a     uśántā dūtā^́ ná dábhāya gopā^́
7.091.02b     māsáś ca pātháḥ śarádaś ca pūrvī^́ḥ
7.091.02c     índravāyū suṣṭutír vām iyānā^́
7.091.02d     mārḍīkám īṭṭe suvitáṃ ca návyam

7.091.03a     pī^́voannām̐ rayivŕ̥dhaḥ sumedhā^́ḥ
7.091.03b     śvetáḥ siṣakti niyútām abhiśrī^́ḥ
7.091.03c     té vāyáve sámanaso ví tasthur
7.091.03d     víśvén náraḥ suapatyā^́ni cakruḥ

7.091.04a     yā^́vat táras tanúvo yā^́vad ójo
7.091.04b     yā^́van náraś cákṣasā dī^́dhiyānāḥ
7.091.04c     śúciṃ sómaṃ śucipā pātam asmé
7.091.04d     índravāyū sádatam barhír édám

7.091.05a     niyuvānā^́ niyúta spārhávīrā
7.091.05b     índravāyū saráthaṃ yātam arvā^́k
7.091.05c     idáṃ hí vām prábhr̥tam mádhvo ágram
7.091.05d     ádha priṇānā^́+ ví mumuktam asmé

7.091.06a     yā^́ vāṃ śatáṃ niyúto yā^́ḥ sahásram
7.091.06b     índravāyū viśvávārāḥ sácante
7.091.06c     ā^́bhir yātaṃ suvidátrābhir arvā^́k
7.091.06d     pātáṃ narā prátibhr̥tasya mádhvaḥ

7.091.07a     árvanto ná śrávaso bhíkṣamāṇā
7.091.07b     indravāyū^́ suṣṭutíbhir vásiṣṭhāḥ
7.091.07c     vājayántaḥ sú ávase huvema
7.091.07d     yūyám pāta suastíbhiḥ sádā naḥ

92

7.092.01a     ā^́ vāyo bhūṣa śucipā úpa naḥ
7.092.01b     sahásraṃ te niyúto viśvavāra
7.092.01c     úpo te ándho mádiyam ayāmi
7.092.01d     yásya deva dadhiṣé pūrvapéyam

7.092.02a     prá sótā jīró adhvaréṣu asthāt
7.092.02b     sómam índrāya vāyáve píbadhyai
7.092.02c     prá yád vām mádhvo agriyám bháranti
7.092.02d     adhvaryávo devayántaḥ śácībhiḥ

7.092.03a     prá yā^́bhir yā^́si dāśuvā^́ṃsam áchā
7.092.03b     niyúdbhir vāyav iṣṭáye duroṇé
7.092.03c     ní no rayíṃ subhójasaṃ yuvasva
7.092.03d     ní vīráṃ gávyam áśviyaṃ ca rā^́dhaḥ

7.092.04a     yé vāyáva indaramā^́danāsa⁺
7.092.04b     ā^́devāso nitóśanāso aryáḥ
7.092.04c     ghnánto vr̥trā^́ṇi sūríbhiḥ ṣiyāma
7.092.04d     sāsahvā^́ṃso yudhā^́ nŕ̥bhir amítrān

7.092.05a     ā^́ no niyúdbhiḥ śatínībhir adhvaráṃ
7.092.05b     sahasríṇībhir úpa yāhi yajñám
7.092.05c     vā^́yo asmín sávane mādayasva
7.092.05d     yūyám pāta suastíbhiḥ sádā naḥ

93

7.093.01a     śúciṃ nú stómaṃ návajātam adyá
7.093.01b     índraagnī vr̥trahaṇā juṣéthām
7.093.01c     ubhā^́ hí vāṃ suhávā jóhavīmi
7.093.01d     tā^́ vā^́jaṃ sadyá uśaté dháyiṣṭhā⁺

7.093.02a     tā^́ sānasī^́ śavasānā hí bhūtáṃ
7.093.02b     sākaṃvŕ̥dhā śávasā śūśuvā^́ṃsā
7.093.02c     kṣáyantau rāyó yávasasya bhū^́reḥ
7.093.02d     pr̥ṅktáṃ vā^́jasya sthávirasya ghŕ̥ṣveḥ

7.093.03a     úpo ha yád vidáthaṃ vājíno gúr
7.093.03b     dhībhír víprāḥ prámatim ichámānāḥ
7.093.03c     árvanto ná kā^́ṣṭhãṃ nákṣamāṇā
7.093.03d     indraagnī^́ jóhuvato náras té

7.093.04a     gīrbhír vípraḥ prámatim ichámāna
7.093.04b     ī^́ṭṭe rayíṃ yaśásam pūrvabhā^́jam
7.093.04c     índraagnī vr̥trahaṇā suvajrā
7.093.04d     prá no návyebhis tirataṃ dayiṣṇaíḥ⁺

7.093.05a     sáṃ yán mahī^́ mithatī^́ spárdhamāne
7.093.05b     tanūrúcā śū^́rasātā yátaite
7.093.05c     ádevayuṃ vidáthe devayúbhiḥ
7.093.05d     satrā^́ hataṃ somasútā jánena

7.093.06a     imā^́m u ṣú sómasutim úpa na
7.093.06b     ā^́ indrāgnī saumanasā^́ya yātam
7.093.06c     nũ^́ cid dhí parimamnā^́the asmā^́n
7.093.06d     ā^́ vāṃ śáśvadbhir vavr̥tīya vā^́jaiḥ

7.093.07a     só agna enā^́ námasā sámiddho
7.093.07b     áchā mitráṃ váruṇam índraṃ voceḥ
7.093.07c     yát sīm ā^́gaś cakr̥mā^́ tát sú mr̥̄ḷa⁺
7.093.07d     tád aryamā^́ áditiḥ śiśrathantu

7.093.08a     etā^́ agna āśuṣāṇā^́sa iṣṭī^́r
7.093.08b     yuvóḥ sácā abhí aśyāma vā^́jān
7.093.08c     méndro no víṣṇur marútaḥ pári khyan
7.093.08d     yūyám pāta suastíbhiḥ sádā naḥ

94

7.094.01a     iyáṃ vām asyá mánmana
7.094.01b     índrāgnī pūrviyástutiḥ
7.094.01c     abhrā^́d vr̥ṣṭír ivājani

7.094.02a     śr̥ṇutáṃ jaritúr hávam
7.094.02b     índrāgnī vánataṃ gíraḥ
7.094.02c     īśānā^́ pipyataṃ dhíyaḥ

7.094.03a     mā^́ pāpatvā^́ya no narā
7.094.03b     índrāgnī mā^́bhíśastaye
7.094.03c     mā^́ no rīradhataṃ nidé

7.094.04a     índre agnā^́ námo br̥hát
7.094.04b     suvr̥ktím érayāmahe
7.094.04c     dhiyā^́ dhénā avasyávaḥ

7.094.05a     tā^́ hí śáśvanta ī^́ḷata
7.094.05b     itthā^́ víprāsa ūtáye
7.094.05c     sabā^́dho vā^́jasātaye

7.094.06a     tā^́ vāṃ gīrbhír vipanyávaḥ
7.094.06b     práyasvanto havāmahe
7.094.06c     medhásātā saniṣyávaḥ

7.094.07a     índrāgnī ávasā^́ gatam
7.094.07b     asmábhyaṃ carṣaṇīsahā
7.094.07c     mā^́ no duḥśáṃsa īśata

7.094.08a     mā^́ kásya no áraruṣo
7.094.08b     dhūrtíḥ práṇaṅ mártiyasya
7.094.08c     índrāgnī śárma yachatam

7.094.09a     gómad dhíraṇyavad vásu
7.094.09b     yád vām áśvāvad ī^́mahe
7.094.09c     índrāgnī tád vanemahi

7.094.10a     yát sóma ā^́ suté nára
7.094.10b     indraagnī^́ ájohavuḥ
7.094.10c     sáptīvantā saparyávaḥ

7.094.11a     ukthébhir vr̥trahántamā
7.094.11b     yā^́ mandānā^́ cid ā^́ girā^́
7.094.11c     āṅgūṣaír āvívāsataḥ

7.094.12a     tā^́v íd duḥśáṃsam mártiyaṃ
7.094.12b     dúrvidvāṃsaṃ rakṣasvínam
7.094.12c     ābhogáṃ hánmanā hatam
7.094.12d     udadhíṃ hánmanā hatam

95

7.095.01a     prá kṣódasā dhā^́yasā sasra eṣā^́
7.095.01b     sárasvatī dharúṇam ā^́yasī pū^́ḥ
7.095.01c     prabā^́badhānā rathíyeva yāti
7.095.01d     víśvā apó mahinā^́ síndhur anyā^́ḥ

7.095.02a     ékācetat sárasvatī nadī^́nāṃ
7.095.02b     śúcir yatī^́ giríbhya ā^́ samudrā^́t
7.095.02c     rāyáś cétantī bhúvanasya bhū^́rer
7.095.02d     ghr̥tám páyo duduhe nā^́huṣāya

7.095.03a     sá vāvr̥dhe náriyo yóṣaṇāsu
7.095.03b     vŕ̥ṣā śíśur vr̥ṣabhó yajñíyāsu
7.095.03c     sá vājínam maghávadbhyo dadhāti
7.095.03d     ví sātáye tanúvam māmr̥jīta

7.095.04a     utá syā^́ naḥ sárasvatī juṣāṇā^́
7.095.04b     úpa śravat subhágā yajṇé asmín
7.095.04c     mitájñubhir namasíyair iyānā^́
7.095.04d     rāyā^́ yujā^́ cid úttarā sákhibhyaḥ

7.095.05a     imā^́ júhvānā yuṣmád ā^́ námobhiḥ
7.095.05b     práti stómaṃ sarasvati juṣasva
7.095.05c     táva śárman priyátame dádhānā
7.095.05d     úpa stheyāma śaraṇáṃ ná vr̥kṣám

7.095.06a     ayám u te sarasvati vásiṣṭho
7.095.06b     dvā^́rāv r̥tásya subhage ví āvaḥ
7.095.06c     várdha śubhre stuvaté rāsi vā^́jān
7.095.06d     yūyám pāta suastíbhiḥ sádā naḥ

96

7.096.01a     br̥hád u gāyiṣe váco
7.096.01b     asuríyā nadī^́nãm
7.096.01c     sárasvatīm ín mahayā suvr̥ktíbhi
7.096.01d     stómair vasiṣṭha ródasī

7.096.02a     ubhé yát te mahinā^́ śubhre ándhasī
7.096.02b     adhikṣiyánti pūrávaḥ
7.096.02c     sā^́ no bodhi avitrī^́ marútsakhā
7.096.02d     códa rā^́dho maghónãm

7.096.03a     bhadrám íd bhadrā^́ kr̥ṇavat sárasvatī
7.096.03b     ákavārī cetati vājínīvatī
7.096.03c     gr̥ṇānā^́ jamadagnivát
7.096.03d     stuvānā^́ ca vasiṣṭhavát

7.096.04a     janīyánto nú ágravaḥ
7.096.04b     putrīyántaḥ sudā^́navaḥ
7.096.04c     sárasvantaṃ havāmahe

7.096.05a     yé te sarasva ūrmáyo
7.096.05b     mádhumanto ghr̥taścútaḥ
7.096.05c     tébhir no avitā^́ bhava

7.096.06a     pīpivā^́ṃsaṃ sárasvata
7.096.06b     stánaṃ yó viśvádarśataḥ
7.096.06c     bhakṣīmáhi prajā^́m íṣam

97

7.097.01a     yajñé divó nr̥ṣádane pr̥thivyā^́
7.097.01b     náro yátra devayávo mádanti
7.097.01c     índrāya yátra sávanāni sunvé
7.097.01d     gáman mádāya prathamáṃ váyaś ca

7.097.02a     ā^́ daíviyā vr̥ṇīmahe ávāṃsi
7.097.02b     bŕ̥haspátir no maha ā^́ sakhāyaḥ
7.097.02c     yáthā bhávema mīḷhúṣe ánāgā
7.097.02d     yó no dātā^́ parāvátaḥ pitéva

7.097.03a     tám u jyáyiṣṭhaṃ⁺ námasā havírbhiḥ
7.097.03b     suśévam bráhmaṇas pátiṃ gr̥ṇīṣe
7.097.03c     índraṃ ślóko máhi daívyaḥ siṣaktu
7.097.03d     yó bráhmaṇo devákr̥tasya rā^́jā

7.097.04a     sá ā^́ no yóniṃ sadatu práyiṣṭho⁺
7.097.04b     bŕ̥haspátir viśvávāro yó ásti
7.097.04c     kā^́mo rāyáḥ suvī^́riyasya táṃ dāt
7.097.04d     párṣan no áti saścáto áriṣṭān

7.097.05a     tám ā^́ no arkám amŕ̥tāya júṣṭam
7.097.05b     imé dhāsur amŕ̥tāsaḥ purājā^́ḥ
7.097.05c     śúcikrandaṃ yajatám pastiyā^́nām
7.097.05d     bŕ̥haspátim anarvā^́ṇaṃ huvema

7.097.06a     táṃ śagmā^́so · aruṣā^́so áśvā
7.097.06b     bŕ̥haspátiṃ sahavā^́ho vahanti
7.097.06c     sáhaś cid yásya nī^́lavat sadhásthaṃ
7.097.06d     nábho ná rūpám aruṣáṃ vásānāḥ

7.097.07a     sá hí śúciḥ śatápatraḥ sá śundhyúr
7.097.07b     híraṇyavāśīr iṣiráḥ suvarṣā^́ḥ
7.097.07c     bŕ̥haspátiḥ sá suāveśá r̥ṣváḥ
7.097.07d     purū^́ sákhibhya āsutíṃ káriṣṭhaḥ

7.097.08a     devī^́ devásya ródasī jánitrī
7.097.08b     bŕ̥haspátiṃ vāvr̥dhatur mahitvā^́
7.097.08c     dakṣā^́yiyāya dakṣatā sakhāyaḥ
7.097.08d     kárad bráhmaṇe sutárā sugādhā^́

7.097.09a     iyáṃ vām brahmaṇas pate suvr̥ktír
7.097.09b     bráhma índrāya vajríṇe akāri
7.097.09c     aviṣṭáṃ dhíyo jigr̥tám púraṃdhīr
7.097.09d     jajastám aryó vanúṣām árātīḥ

7.097.10a     bŕ̥haspate yuvám índraś ca vásvo
7.097.10b     divyásyeśāthe utá pā^́rthivasya
7.097.10c     dhattáṃ rayíṃ stuvaté kīráye cid
7.097.10d     yūyám pāta suastíbhiḥ sádā naḥ

98

7.098.01a     ádhvaryavo aruṇáṃ dugdhám aṃśúṃ
7.098.01b     juhótana vr̥ṣabhā^́ya kṣitīnā^́m
7.098.01c     gaurā^́d védīyām̐ avapā^́nam índro
7.098.01d     viśvā^́héd yāti sutásomam ichán

7.098.02a     yád dadhiṣé pradívi cā^́ru ánnaṃ
7.098.02b     divé-dive pītím íd asya vakṣi
7.098.02c     utá hr̥dótá mánasā juṣāṇá
7.098.02d     uśánn indra prásthitān pāhi sómān

7.098.03a     jajñānáḥ sómaṃ sáhase papātha
7.098.03b     prá te mātā^́ mahimā^́nam uvāca
7.098.03c     éndra paprātha urú antárikṣaṃ
7.098.03d     yudhā^́ devébhyo várivaś cakartha

7.098.04a     yád yodháyā maható mányamānān
7.098.04b     sā^́kṣāma tā^́n bāhúbhiḥ śā^́śadānān
7.098.04c     yád vā nŕ̥bhir vŕ̥ta indrābhiyúdhyās
7.098.04d     táṃ tváyājíṃ sauśravasáṃ jayema

7.098.05a     préndrasya vocam prathamā^́ kr̥tā^́ni
7.098.05b     prá nū^́tanā maghávā yā^́ cakā^́ra
7.098.05c     yadéd ádevīr ásahiṣṭa māyā^́
7.098.05d     áthābhavat kévalaḥ sómo asya

7.098.06a     távedáṃ víśvam abhítaḥ paśavyàṃ
7.098.06b     yát páśyasi cákṣasā sū^́riyasya
7.098.06c     gávām asi gópatir éka indra
7.098.06d     bhakṣīmáhi te práyatasya vásvaḥ

7.098.07a     bŕ̥haspate yuvám índraś ca vásvo
7.098.07b     divyásyeśāthe utá pā^́rthivasya
7.098.07c     dhattáṃ rayíṃ stuvaté kīráye cid
7.098.07d     yūyám pāta suastíbhiḥ sádā naḥ

99

7.099.01a     paró mā^́trayā tanúvā vr̥dhāna
7.099.01b     ná te mahitvám ánu aśnuvanti
7.099.01c     ubhé te vidma rájasī pr̥thivyā^́
7.099.01d     víṣṇo deva tvám paramásya vitse

7.099.02a     ná te viṣṇo jā^́yamāno ná jātó
7.099.02b     déva mahimnáḥ páram ántam āpa
7.099.02c     úd astabhnā nā^́kam r̥ṣvám br̥hántaṃ
7.099.02d     dādhártha prā^́cīṃ kakúbham pr̥thivyā^́ḥ

7.099.03a     írāvatī dhenumátī hí bhūtáṃ
7.099.03b     sūyavasínī mánuṣe daśasyā^́
7.099.03c     ví astabhnā ródasī viṣṇav eté
7.099.03d     dādhártha pr̥thivī^́m abhíto mayū^́khaiḥ

7.099.04a     urúṃ yajñā^́ya cakrathur ulokáṃ†
7.099.04b     janáyantā sū^́ryam uṣā^́sam agním
7.099.04c     dā^́sasya cid vr̥ṣaśiprásya māyā^́
7.099.04d     jaghnáthur narā pr̥tanā^́jiyeṣu

7.099.05a     índrāviṣṇū dr̥ṃhitā^́ḥ śámbarasya
7.099.05b     náva púro navatíṃ ca śnathiṣṭam
7.099.05c     śatáṃ varcínaḥ sahásraṃ ca sākáṃ
7.099.05d     hathó apratí ásurasya vīrā^́n

7.099.06a     iyám manīṣā^́ br̥hatī^́ br̥hántā
7.099.06b     urukramā^́ tavásā vardháyantī
7.099.06c     raré vāṃ stómaṃ vidátheṣu viṣṇo
7.099.06d     pínvatam íṣo vr̥jáneṣu indra

7.099.07a     váṣaṭ te viṣṇav āsá ā^́ kr̥ṇomi
7.099.07b     tán me juṣasva śipiviṣṭa havyám
7.099.07c     várdhantu tvā suṣṭutáyo gíro me
7.099.07d     yūyám pāta suastíbhiḥ sádā naḥ

100

7.100.01a     nũ^́ mártio° dayate saniṣyán
7.100.01b     yó víṣṇava urugāyā^́ya dā^́śat
7.100.01c     prá yáḥ satrā^́cā mánasā yájāta
7.100.01d     etā^́vantaṃ náriyam āvívāsāt

7.100.02a     tuváṃ viṣṇo sumatíṃ viśvájanyām
7.100.02b     áprayutām evayāvo matíṃ dāḥ
7.100.02c     párco yáthā naḥ suvitásya bhū^́rer
7.100.02d     áśvāvataḥ puruścandrásya rāyáḥ

7.100.03a     trír deváḥ · pr̥thivī^́m eṣá etā^́ṃ
7.100.03b     ví cakrame śatárcasam mahitvā^́
7.100.03c     prá víṣṇur astu tavásas távīyān
7.100.03d     tveṣáṃ hí asya sthávirasya nā^́ma

7.100.04a     ví cakrame pr̥thivī^́m eṣá etā^́ṃ
7.100.04b     kṣétrāya víṣṇur mánuṣe daśasyán
7.100.04c     dhruvā^́so asya kīráyo jánāsa
7.100.04d     urukṣitíṃ sujánimā cakāra

7.100.05a     prá tát te adyá śipiviṣṭa nā^́ma
7.100.05b     aryáḥ śaṃsāmi vayúnāni vidvā^́n
7.100.05c     táṃ tvā gr̥ṇāmi tavásam átavyān
7.100.05d     kṣáyantam asyá rájasaḥ parāké

7.100.06a     kím ít te viṣṇo paricákṣiyam bhūt
7.100.06b     prá yád vavakṣé śipiviṣṭó asmi
7.100.06c     mā^́ várpo asmád ápa gūha etád
7.100.06d     yád anyárūpaḥ samithé babhū^́tha

7.100.07a     váṣaṭ te viṣṇav āsá ā^́ kr̥ṇomi
7.100.07b     tán me juṣasva śipiviṣṭa havyám
7.100.07c     várdhantu tvā suṣṭutáyo gíro me
7.100.07d     yūyám pāta suastíbhiḥ sádā naḥ

101

7.101.01a     tisró vā^́caḥ prá vada jyótiragrā
7.101.01b     yā^́ etád duhré madhudoghám ū^́dhaḥ
7.101.01c     sá vatsáṃ kr̥ṇván gárbham óṣadhīnāṃ
7.101.01d     sadyó jātó vr̥ṣabhó roravīti

7.101.02a     yó várdhana óṣadhīnāṃ yó apā^́ṃ
7.101.02b     yó víśvasya jágato devá ī^́śe
7.101.02c     sá tridhā^́tu śaraṇáṃ śárma yaṃsat
7.101.02d     trivártu jyótiḥ suabhiṣṭí asmé

7.101.03a     starī^́r u tvad bhávati sū^́ta u tvad
7.101.03b     yathāvaśáṃ tanúvaṃ cakra eṣáḥ
7.101.03c     pitúḥ páyaḥ práti gr̥bhṇāti mātā^́
7.101.03d     téna pitā^́ vardhate téna putráḥ

7.101.04a     yásmin víśvāni bhúvanāni tasthús
7.101.04b     tisró dyā^́vas trẽdhā^́ sasrúr ā^́paḥ
7.101.04c     tráyaḥ kóśāsa upasécanāso
7.101.04d     mádhva ścotanti abhíto virapśám

7.101.05a     idáṃ vácaḥ parjányāya svarā^́je
7.101.05b     hr̥dó astu ántaraṃ táj jujoṣat
7.101.05c     mayobhúvo vr̥ṣṭáyaḥ santu asmé
7.101.05d     supippalā^́ óṣadhīr devágopāḥ

7.101.06a     sá retodhā^́ vr̥ṣabháḥ śáśvatīnāṃ
7.101.06b     tásminn ātmā^́ jágatas tasthúṣaś ca
7.101.06c     tán ma rtám pātu śatáśāradāya
7.101.06d     yūyám pāta suastíbhiḥ sádā naḥ

102

7.102.01a     parjányāya prá gāyata
7.102.01b     divás putrā^́ya mīḷhúṣe
7.102.01c     sá no yávasam ichatu

7.102.02a     yó gárbham óṣadhīnãṃ
7.102.02b     gávāṃ kr̥ṇóti árvatām
7.102.02c     parjányaḥ puruṣī^́ṇãm

7.102.03a     tásmā íd āsíye havír
7.102.03b     juhótā mádhumattamam
7.102.03c     íḷāṃ naḥ saṃyátaṃ karat

103

7.103.01a     saṃvatsaráṃ śaśayānā^́
7.103.01b     brāhmaṇā^́ vratacāríṇaḥ
7.103.01c     vā^́cam parjányajinvitām
7.103.01d     prá maṇḍū^́kā avādiṣuḥ

7.103.02a     divyā^́ ā^́po abhí yád enam ā^́yan
7.103.02b     dŕ̥tiṃ ná śúṣkaṃ sarasī^́ śáyānam
7.103.02c     gávām áha ná māyúr vatsínīnām
7.103.02d     maṇḍū^́kānāṃ vagnúr átrā sám eti

7.103.03a     yád īm enām̐ uśató abhy ávarṣīt
7.103.03b     tr̥ṣyā^́vataḥ prāvŕ̥ṣi ā^́gatāyām
7.103.03c     akhkhalīkŕ̥tyā pitáraṃ ná putró
7.103.03d     anyó anyám úpa vádantam eti

7.103.04a     anyó anyám ánu gr̥bhṇāti enor
7.103.04b     apā^́m prasargé yád ámandiṣātām
7.103.04c     maṇḍū^́ko yád abhívr̥ṣṭaḥ kániṣkan
7.103.04d     pŕ̥śniḥ sampr̥ṅkté háritena vā^́cam

7.103.05a     yád eṣãm anyó anyásya vā^́caṃ
7.103.05b     śāktásyeva vádati śíkṣamāṇaḥ
7.103.05c     sárvaṃ tád eṣāṃ samŕ̥dheva párva
7.103.05d     yát suvā^́co vádathanā^́dhi apsú

7.103.06a     gómāyur éko ajámāyur ékaḥ
7.103.06b     pŕ̥śnir éko hárita éka eṣām
7.103.06c     samānáṃ nā^́ma bíbhrato vírūpāḥ
7.103.06d     purutrā^́ vā^́cam pipiśur vádantaḥ

7.103.07a     brāhmaṇā^́so atirātré ná sóme
7.103.07b     sáro ná pūrṇám abhíto vádantaḥ
7.103.07c     saṃvatsarásya tád áhaḥ pári ṣṭha
7.103.07d     yán maṇḍūkāḥ prāvr̥ṣī^́ṇam babhū^́va

7.103.08a     brāhmaṇā^́saḥ somíno vā^́cam akrata
7.103.08b     bráhma kr̥ṇvántaḥ parivatsarī^́ṇam
7.103.08c     adhvaryávo gharmíṇaḥ siṣvidānā^́
7.103.08d     āvír bhavanti gúhiyā ná ké cit

7.103.09a     deváhitiṃ jugupur dvādaśásya
7.103.09b     r̥túṃ náro ná prá minanti eté
7.103.09c     saṃvatsaré prāvŕ̥ṣi ā^́gatāyāṃ
7.103.09d     taptā^́ gharmā^́ aśnuvate visargám

7.103.10a     gómāyur adād ajámāyur adāt
7.103.10b     pŕ̥śnir adād dhárito no vásūni
7.103.10c     gávām maṇḍū^́kā dádataḥ śatā^́ni
7.103.10d     sahasrasāvé prá tiranta ā^́yuḥ

104

7.104.01a     índrāsomā tápataṃ rákṣa ubjátaṃ
7.104.01b     ní arpayataṃ vr̥ṣaṇā tamovŕ̥dhaḥ
7.104.01c     párā śr̥ṇītam acíto ní oṣataṃ
7.104.01d     hatáṃ nudéthāṃ ní śiśītam atríṇaḥ

7.104.02a     índrāsomā sám agháśaṃsam abhy àgháṃ
7.104.02b     tápur yayastu carúr agnivā^́m̐ iva
7.104.02c     brahmadvíṣe kravyā^́de ghorácakṣase
7.104.02d     dvéṣo dhattam anavāyáṃ kimīdíne

7.104.03a     índrāsomā duṣkŕ̥to vavré antár
7.104.03b     anārambhaṇé támasi prá vidhyatam
7.104.03c     yáthā nā^́taḥ púnar ékaś canódáyat
7.104.03d     tád vām astu sáhase manyumác chávaḥ

7.104.04a     índrāsomā vartáyataṃ divó vadháṃ
7.104.04b     sám pr̥thivyā^́ agháśaṃsāya tárhaṇam
7.104.04c     út takṣataṃ svaríyam párvatebhiyo
7.104.04d     yéna rákṣo vāvr̥dhānáṃ nijū^́rvathaḥ

7.104.05a     índrāsomā vartáyataṃ divás pári
7.104.05b     agnitaptébhir yuvám áśmahanmabhiḥ
7.104.05c     tápurvadhebhir ajárebhir atríṇo
7.104.05d     ní párśāne vidhyataṃ yántu nisvarám

7.104.06a     índrāsomā pári vām bhūtu viśváta
7.104.06b     iyám matíḥ kakṣiyā^́śveva vājínā
7.104.06c     yā^́ṃ vāṃ hótrām parihinómi medháyā
7.104.06d     imā^́ bráhmāṇi nr̥pátīva jinvatam

7.104.07a     práti smarethāṃ tujáyadbhir évair
7.104.07b     hatáṃ druhó rakṣáso bhaṅgurā^́vataḥ
7.104.07c     índrāsomā duṣkŕ̥te mā^́ sugám bhūd
7.104.07d     yó naḥ kadā^́ cid abhidā^́sati druhā^́

7.104.08a     yó mā pā^́kena mánasā cárantam
7.104.08b     abhicáṣṭe ánr̥tebhir vácobhiḥ
7.104.08c     ā^́pa iva kāśínā sáṃgr̥bhītā
7.104.08d     ásann astu ā^́sata indra vaktā^́

7.104.09a     yé pākaśaṃsáṃ viháranta évair
7.104.09b     yé vā bhadráṃ dūṣáyanti svadhā^́bhiḥ
7.104.09c     áhaye vā tā^́n pradádātu sóma
7.104.09d     ā^́ vā dadhātu nírr̥ter upásthe

7.104.10a     yó no rásaṃ dípsati pitvó agne
7.104.10b     yó áśvānāṃ yó gávāṃ yás tanū^́nām
7.104.10c     ripú stená steyakŕ̥d dabhrám etu
7.104.10d     ní ṣá hīyatāṃ tanúvā tánā ca

7.104.11a     paráḥ só astu tanúvā tánā ca
7.104.11b     tisráḥ pr̥thivī^́r adhó astu víśvāḥ
7.104.11c     práti śuṣyatu yáśo asya devā
7.104.11d     yó no dívā dípsati yáś ca náktam

7.104.12a     suvijñānáṃ cikitúṣe jánāya
7.104.12b     sác cā^́sac ca vácasī paspr̥dhāte
7.104.12c     táyor yát satyáṃ yatarád ŕ̥jīyas
7.104.12d     tád ít sómo avati hánti ā^́sat

7.104.13a     ná vā^́ u sómo vr̥jináṃ hinoti
7.104.13b     ná kṣatríyam mithuyā^́ dhāráyantam
7.104.13c     hánti rákṣo hánti ā^́sad vádantam
7.104.13d     ubhā^́v índrasya prásitau śayāte

7.104.14a     yádi vāhám ánr̥tadeva ā^́sa
7.104.14b     móghaṃ vā devā^́m̐ apiūhé agne
7.104.14c     kím asmábhyaṃ jātavedo hr̥ṇīṣe
7.104.14d     droghavā^́cas te nirr̥tháṃ sacantām

7.104.15a     adyā^́ murīya yádi yātudhā^́no ásmi
7.104.15b     yádi vā^́yus tatápa pū^́ruṣasya
7.104.15c     ádhā sá vīraír daśábhir ví yūyā
7.104.15d     yó mā móghaṃ yā^́tudhānéti ā^́ha

7.104.16a     yó mā^́yātuṃ yā^́tudhānéti ā^́ha
7.104.16b     yó vā rakṣā^́ḥ śúcir asmī^́ti ā^́ha
7.104.16c     índras táṃ hantu mahatā^́ vadhéna
7.104.16d     víśvasya jantór adhamás padīṣṭa

7.104.17a     prá yā^́ jígāti khargáleva náktam
7.104.17b     ápa druhā^́ tanúvaṃ gū^́hamānā
7.104.17c     vavrā^́m̐ anantā^́m̐ áva sā^́ padīṣṭa
7.104.17d     grā^́vāṇo ghnantu rakṣása upabdaíḥ

7.104.18a     ví tiṣṭhadhvam maruto vikṣú icháta
7.104.18b     gr̥bhāyáta rakṣásaḥ sám pinaṣṭana
7.104.18c     váyo yé bhūtvī^́ patáyanti naktábhir
7.104.18d     yé vā rípo dadhiré devé adhvaré

7.104.19a     prá vartaya divó áśmānam indra
7.104.19b     sómaśitam maghavan sáṃ śiśādhi
7.104.19c     prā^́ktād ápāktād adharā^́d údaktād
7.104.19d     abhí jahi rakṣásaḥ párvatena

7.104.20a     etá u tyé patayanti śváyātava
7.104.20b     índraṃ dipsanti dipsávo ádābhiyam
7.104.20c     śíśīte śakráḥ píśunebhiyo vadháṃ
7.104.20d     nūnáṃ sr̥jad aśániṃ yātumádbhiyaḥ

7.104.21a     índro yātūnā^́m abhavat parāśaró
7.104.21b     havirmáthīnām abhí āvívāsatām
7.104.21c     abhī^́d u śakráḥ paraśúr yáthā vánam
7.104.21d     pā^́treva bhindán satá eti rakṣásaḥ

7.104.22a     úlūkayātuṃ śuśulū^́kayātuṃ
7.104.22b     jahí śváyātum utá kókayātum
7.104.22c     suparṇáyātum utá gŕ̥dhrayātuṃ
7.104.22d     dr̥ṣádeva prá mr̥ṇa rákṣa indra

7.104.23a     mā^́ no rákṣo abhí naḍ yātumā^́vatām
7.104.23b     ápochatu mithunā^́ yā^́ kimīdínā
7.104.23c     pr̥thivī^́ naḥ pā^́rthivāt pātu áṃhaso
7.104.23d     antárikṣaṃ diviyā^́t pātu asmā^́n

7.104.24a     índra jahí púmāṃsaṃ yātudhā^́nam
7.104.24b     utá stríyam māyáyā śā^́śadānām
7.104.24c     vígrīvāso mū^́radevā r̥dantu
7.104.24d     mā^́ té dr̥śan sū^́riyam uccárantam

7.104.25a     práti cakṣva ví cakṣuva
7.104.25b     índraś ca soma jāgr̥tam
7.104.25c     rákṣobhyo vadhám asyatam
7.104.25d     aśániṃ yātumádbhiyaḥ