The Rigveda: Metrically Restored Text

Metrically Restored Text

Karen Thomson and Jonathan Slocum

Index

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103

---

N.B. An earlier version of this text was published in electronic form as:

RIG VEDA, A METRICALLY RESTORED TEXT, edited by Barend A. van Nooten and Gary B. Holland, Harvard Oriental Series, vol. 50.

That electronic text, itself derived from a much earlier UT Linguistics Research Center electronic text, bore the legend:

Copyright with the authors and Harvard Oriental Series. The electronic text may be used for research but not for commercial purposes.

Our use here is for research. The electronic text has been much revised (see our Introduction) and converted to Unicode/HTML in this online edition; re: the significance of color and smaller type size in particular, see the Popular Rigveda. Copyright to all revisions and HTML tagging is assigned to the University of Texas, though responsibility for content lies with the authors. This HTML edition may be used for research but not for commercial purposes.

---

1

8.001.01a     mā^́ cid anyád ví śaṃsata
8.001.01b     sákhāyo mā^́ riṣaṇyata
8.001.01c     índram ít stotā vŕ̥ṣaṇaṃ sácā suté
8.001.01d     múhur ukthā^́ ca śaṃsata

8.001.02a     avakrakṣíṇaṃ vr̥ṣabháṃ yathājúraṃ
8.001.02b     gã^́ṃ ná carṣaṇīsáham
8.001.02c     vidvéṣaṇaṃ saṃvánanobhayaṃkarám
8.001.02d     máṃhiṣṭham ubhayāvínam

8.001.03a     yác cid dhí tvā jánā imé
8.001.03b     nā^́nā hávanta ūtáye
8.001.03c     asmā^́kam bráhma idám indra bhūtu te
8.001.03d     áhā víśvā ca várdhanam

8.001.04a     ví tartūryante maghavan vipaścíto
8.001.04b     aryó vípo jánānãm
8.001.04c     úpa kramasva pururū^́pam ā^́ bhara
8.001.04d     vā^́jaṃ nédiṣṭham ūtáye

8.001.05a     mahé caná tvā^́m adrivaḥ
8.001.05b     párā śulkā^́ya dẽyām
8.001.05c     ná sahásrāya nā^́yútāya vajrivo
8.001.05d     ná śatā^́ya śatāmagha

8.001.06a     vásyām̐ indrāsi me pitúr
8.001.06b     utá bhrā^́tur ábhuñjataḥ
8.001.06c     mātā^́ ca me chadayathaḥ samā^́ vaso
8.001.06d     vasutvanā^́ya rā^́dhase

8.001.07a     kúveyatha kuvéd asi
8.001.07b     purutrā^́ cid dhí te mánaḥ
8.001.07c     álarṣi yudhma khajakr̥t puraṃdara
8.001.07d     prá gāyatrā^́ agāsiṣuḥ

8.001.08a     prā^́smai gāyatrám arcata
8.001.08b     vāvā^́tur yáḥ puraṃdaráḥ
8.001.08c     yā^́bhiḥ kāṇvásya úpa barhír āsádaṃ
8.001.08d     yā^́sad vajrī^́ bhinát púraḥ

8.001.09a     yé te sánti daśagvínaḥ
8.001.09b     śatíno yé sahasríṇaḥ
8.001.09c     áśvāso yé te vŕ̥ṣaṇo raghudrúvas
8.001.09d     tébhir nas tū^́yam ā^́ gahi

8.001.10a     ā^́ tú adyá sabardúghāṃ
8.001.10b     huvé gāyatrávepasam
8.001.10c     índraṃ dhenúṃ sudúghām ániyām íṣam
8.001.10d     urúdhārām araṃkŕ̥tam

8.001.11a     yát tudát sū^́ra étaśaṃ
8.001.11b     vaṅkū^́ vā^́tasya parṇínā
8.001.11c     váhat kútsam ārjuneyáṃ śatákratuḥ
8.001.11d     tsárad gandharvám ástr̥tam

8.001.12a     yá r̥té cid abhiśríṣaḥ
8.001.12b     purā^́ jatrúbhya ātŕ̥daḥ
8.001.12c     sáṃdhātā saṃdhím maghávā purūvásur
8.001.12d     íṣkartā víhrutam púnaḥ

8.001.13a     mā^́ bhūma níṣṭiyā iva
8.001.13b     índra tvád áraṇā iva
8.001.13c     vánāni ná prajahitā^́ni adrivo
8.001.13d     duróṣāso amanmahi

8.001.14a     ámanmahī^́d anāśávo
8.001.14b     anugrā^́saś ca vr̥trahan
8.001.14c     sakŕ̥t sú te mahatā^́ śūra rā^́dhasā
8.001.14d     ánu stómam mudīmahi

8.001.15a     yádi stómam máma śrávad
8.001.15b     asmā^́kam índram índavaḥ
8.001.15c     tiráḥ pavítraṃ sasr̥vā^́ṃsa āśávo
8.001.15d     mándantu tugriyāvŕ̥dhaḥ

8.001.16a     ā^́ tú adyá sadhástutiṃ
8.001.16b     vāvā^́tuḥ sákhyur ā^́ gahi
8.001.16c     úpastutir maghónām prá tvā avatu
8.001.16d     ádhā te vaśmi suṣṭutím

8.001.17a     sótā hí sómam ádribhir
8.001.17b     ém enam apsú dhāvata
8.001.17c     gavyā^́ vástreva vāsáyanta ín náro
8.001.17d     nír dhukṣan vakṣáṇābhiyaḥ

8.001.18a     ádha jmó ádha vā divó
8.001.18b     br̥ható rocanā^́d ádhi
8.001.18c     ayā^́ vardhasva tanúvā girā^́ máma
8.001.18d     ā^́ jātā^́ sukrato pr̥ṇa

8.001.19a     índrāya sú madíntamaṃ
8.001.19b     sómaṃ sotā váreṇiyam
8.001.19c     śakrá eṇam pīpayad víśvayā dhiyā^́
8.001.19d     hinuvānáṃ ná vājayúm

8.001.20a     mā^́ tvā sómasya gáldayā
8.001.20b     sádā yā^́cann aháṃ girā^́
8.001.20c     bhū^́rṇim mr̥gáṃ ná sávaneṣu cukrudhaṃ
8.001.20d     ká ī^́śānaṃ ná yāciṣat

8.001.21a     mádena iṣitám mádam
8.001.21b     ugrám ugréṇa śávasā
8.001.21c     víśveṣãṃ tarutā^́ram madacyútam
8.001.21d     máde hí ṣmā dádāti naḥ

8.001.22a     śévāre vā^́riyā purú
8.001.22b     devó mártāya dāśúṣe
8.001.22c     sá sunvaté ca stuvaté ca rāsate
8.001.22d     viśvágūrto ariṣṭutáḥ

8.001.23a     ā^́ indra yāhi mátsuva
8.001.23b     citréṇa deva rā^́dhasā
8.001.23c     sáro ná prāsi udáraṃ sápītibhir
8.001.23d     ā^́ sómebhir urú sphirám

8.001.24a     ā^́ tvā sahásram ā^́ śatáṃ
8.001.24b     yuktā^́ ráthe hiraṇyáye
8.001.24c     brahmayújo háraya indra keśíno
8.001.24d     váhantu sómapītaye

8.001.25a     ā^́ tvā ráthe hiraṇyáye
8.001.25b     hárī mayū^́raśepiyā
8.001.25c     śitipr̥ṣṭhā^́ vahatām mádhvo ándhaso
8.001.25d     vivákṣaṇasya pītáye

8.001.26a     píbā tú asyá girvaṇaḥ
8.001.26b     sutásya pūrvapā^́ iva
8.001.26c     páriṣkr̥tasya rasína iyám āsutíś
8.001.26d     cā^́rur mádāya patyate

8.001.27a     yá éko ásti daṃsánā
8.001.27b     mahā^́m̐ ugró abhí vrataíḥ
8.001.27c     gámat sá śiprī^́ ná sá yoṣad ā^́ gamad
8.001.27d     dhávaṃ ná pári varjati

8.001.28a     tuvám púraṃ cariṣṇúvaṃ
8.001.28b     vadhaíḥ śúṣṇasya sám piṇak
8.001.28c     tuvám bhã^́ ánu caro ádha dvitā^́
8.001.28d     yád indra háviyo bhúvaḥ

8.001.29a     máma tvā sū^́ra údite
8.001.29b     máma madhyáṃdine diváḥ
8.001.29c     máma prapitvé apiśarvaré vasav
8.001.29d     ā^́ stómāso avr̥tsata

8.001.30a     stuhí stuhī^́d eté ghā te
8.001.30b     máṃhiṣṭhāso maghónãm
8.001.30c     ninditā^́śvaḥ prapathī^́ paramajiyā^́
8.001.30d     maghásya medhiyātithe

8.001.31a     ā^́ yád áśvān vánanvataḥ
8.001.31b     śraddháyāháṃ ráthe ruhám
8.001.31c     utá vāmásya vásunaś ciketati
8.001.31d     yó ásti yā^́duvaḥ paśúḥ

8.001.32a     yá r̥jrā^́ máhya° māmahé
8.001.32b     sahá tvacā^́ hiraṇyáyā
8.001.32c     eṣá víśvāni abhí astu saúbhagā
8.001.32d     āsaṅgásya svanádrathaḥ

8.001.33a     ádha plā^́yogir áti dāsad anyā^́n
8.001.33b     āsaṅgó agne daśábhiḥ sahásraiḥ
8.001.33c     ádhokṣáṇo dáśa máhyaṃ rúśanto
8.001.33d     naḷā^́ iva sáraso nír atiṣṭhan

8.001.34a     ánv asya sthūráṃ dadr̥śe purástād
8.001.34b     anasthá ūrúr avarámbamāṇaḥ
8.001.34c     śáśvatī nā^́rī abhicákṣiyāha
8.001.34d     súbhadram arya bhójanam bibharṣi

2

8.002.01a     idáṃ vaso sutám ándhaḥ
8.002.01b     píbā súpūrṇam udáram
8.002.01c     ánābhayin rarimā^́ te

8.002.02a     nŕ̥bhir dhūtáḥ sutó áśnair
8.002.02b     ávyo vā^́raiḥ páripūtaḥ
8.002.02c     áśvo ná niktó nadī^́ṣu

8.002.03a     táṃ te yávaṃ yáthā góbhiḥ
8.002.03b     svādúm akarma śrīṇántaḥ
8.002.03c     índra tvāsmín sadhamā^́de

8.002.04a     índra ít somapā^́ éka
8.002.04b     índraḥ sutapā^́ viśvā^́yuḥ
8.002.04c     antár devā^́n mártiyāṃś ca

8.002.05a     ná yáṃ śukró ná dúrāśīr
8.002.05b     ná tr̥prā^́ uruvyácasam
8.002.05c     apaspr̥ṇvaté suhā^́rdam

8.002.06a     góbhir yád īm anyé asmán
8.002.06b     mr̥gáṃ ná vrā^́ mr̥gáyante
8.002.06c     abhitsáranti dhenúbhiḥ

8.002.07a     tráya índarasya⁺ sómāḥ
8.002.07b     sutā^́saḥ santu devásya
8.002.07c     suvé kṣáye sutapā^́vnaḥ

8.002.08a     tráyaḥ kóśāsa ścotanti
8.002.08b     tisráś camúvaḥ súpūrṇāḥ
8.002.08c     samāné ádhi bhā^́rman

8.002.09a     śúcir asi puruniṣṭhā^́ḥ
8.002.09b     kṣīraír madhyatá ā^́śīrtaḥ
8.002.09c     dadhnā^́ mándiṣṭhaḥ śū^́rasya

8.002.10a     imé ta indra sómās
8.002.10b     tīvrā^́ asmé sutā^́saḥ
8.002.10c     śukrā^́ āśíraṃ yācante

8.002.11a     tā^́m̐ āśíram puroḷā^́śam
8.002.11b     índremáṃ sómaṃ śrīṇīhi
8.002.11c     revántaṃ hí tvā śr̥ṇómi

8.002.12a     hr̥tsú pītā^́so yudhyante
8.002.12b     durmádāso ná súrāyām
8.002.12c     ū^́dhar ná nagnā^́ jarante

8.002.13a     revā^́m̐ íd reváta stotā^́
8.002.13b     syā^́t tuvā^́vato maghónaḥ
8.002.13c     préd u harivaḥ śrutásya

8.002.14a     uktháṃ caná śasyámānam
8.002.14b     ágor arír ā^́ ciketa
8.002.14c     ná gāyatráṃ gīyámānam

8.002.15a     mā^́ na indra pīyatnáve
8.002.15b     mā^́ śárdhate párā dāḥ
8.002.15c     śíkṣā śacīvaḥ śácībhiḥ

8.002.16a     vayám u tvā tadídarthā
8.002.16b     índra tvāyántaḥ sákhāyaḥ
8.002.16c     káṇvā ukthébhir jarante

8.002.17a     ná ghem anyád ā^́ papana
8.002.17b     vájrinn apáso náviṣṭau
8.002.17c     távéd u stómaṃ ciketa

8.002.18a     ichánti devā^́ḥ sunvántaṃ
8.002.18b     ná svápnāya spr̥hayanti
8.002.18c     yánti pramā^́dam átandrāḥ

8.002.19a     ó ṣú prá yāhi vā^́jebhir
8.002.19b     mā^́ hr̥ṇīthā abhí asmā^́n
8.002.19c     mahā^́m̐ iva yúvajāniḥ

8.002.20a     mó ṣú adyá durháṇāvān
8.002.20b     sāyáṃ karad āré asmát
8.002.20c     aśrīrá iva jā^́mātā

8.002.21a     vidmā^́ hí asya vīrásya
8.002.21b     bhūridā^́varīṃ sumatím
8.002.21c     triṣú jātásya mánāṃsi

8.002.22a     ā^́ tū^́ ṣiñca káṇvamantaṃ
8.002.22b     ná ghā vidma śavasānā^́t
8.002.22c     yaśástaraṃ śatámūteḥ

8.002.23a     jyéṣṭhena sotar índrāya
8.002.23b     sómaṃ vīrā^́ya śakrā^́ya
8.002.23c     bhárā píban náriyāya

8.002.24a     yó védiṣṭho avyathíṣu
8.002.24b     áśvāvantaṃ jaritŕ̥bhyaḥ
8.002.24c     vā^́jaṃ stotŕ̥bhyo gómantam

8.002.25a     pányam-panyam ít sotāra
8.002.25b     ā^́ dhāvata mádiyāya
8.002.25c     sómaṃ vīrā^́ya śū^́rāya

8.002.26a     pã^́tā vr̥trahā^́ sutám
8.002.26b     ā^́ ghā gaman nā^́ré asmát
8.002.26c     ní yamate śatámūtiḥ

8.002.27a     éhá hárī brahmayújā
8.002.27b     śagmā^́ vakṣataḥ sákhāyam
8.002.27c     gīrbhíḥ śrutáṃ gírvaṇasam

8.002.28a     svādávaḥ sómā ā^́ yāhi
8.002.28b     śrītā^́ḥ sómā ā^́ yāhi
8.002.28c     śíprinn ŕ̥ṣīvaḥ śácīvo
8.002.28d     nā^́yám áchā sadhamā^́dam

8.002.29a     stútaś ca yā^́s tvā várdhanti
8.002.29b     mahé rā^́dhase nr̥mṇā^́ya
8.002.29c     índra kāríṇaṃ vr̥dhántaḥ

8.002.30a     gíraś ca yā^́s te girvāha
8.002.30b     ukthā^́ ca túbhyaṃ tā^́ni
8.002.30c     satrā^́ dadhiré śávāṃsi

8.002.31a     evéd eṣá tuvikūrmír
8.002.31b     vā^́jām̐ éko vájrahastaḥ
8.002.31c     sanā^́d ámr̥kto dayate

8.002.32a     hántā vr̥tráṃ dákṣiṇena
8.002.32b     índraḥ purū^́ puruhūtáḥ
8.002.32c     mahā^́n mahī^́bhiḥ śácībhiḥ

8.002.33a     yásmin víśvāś carṣaṇáya
8.002.33b     utá cyautnā^́ jráyāṃsi ca
8.002.33c     ánu ghén mandī^́ maghónaḥ

8.002.34a     eṣá etā^́ni cakāra
8.002.34b     índro víśvā yó 'ti śr̥ṇvé
8.002.34c     vājadā^́vā maghónãm

8.002.35a     prábhartā ráthaṃ gavyántam
8.002.35b     apākā^́c cid yám ávati
8.002.35c     inó vásu sá hí vóḷhā

8.002.36a     sánitā vípro árvadbhir
8.002.36b     hántā vr̥tráṃ nŕ̥bhiḥ śū^́raḥ
8.002.36c     satyó avitā^́ vidhántam

8.002.37a     yájadhvainam priyamedhā
8.002.37b     índraṃ satrā^́cā mánasā
8.002.37c     yó bhū^́t sómaiḥ satyámadvā

8.002.38a     gātháśravasaṃ sátpatiṃ
8.002.38b     śrávaskāmam purutmā^́nam
8.002.38c     káṇvāso gātá vājínam

8.002.39a     yá r̥té cid gā^́s padébhyo
8.002.39b     dā^́t sákhā nŕ̥bhyaḥ śácīvān
8.002.39c     yé asmin kā^́mam áśriyan

8.002.40a     itthā^́ dhī^́vantam adrivaḥ
8.002.40b     kāṇuvám médhiyātithim
8.002.40c     meṣó bhūtó 'bhí yánn áyaḥ

8.002.41a     śíkṣā vibhindo asmai
8.002.41b     catvā^́ri ayútā dádat
8.002.41c     aṣṭā^́ paráḥ sahásrā

8.002.42a     utá sú tyé payovŕ̥dhā
8.002.42b     mākī^́ ráṇasya naptíyā
8.002.42c     janitvanā^́ya māmahe

3

8.003.01a     píbā sutásya rasíno
8.003.01b     mátsvā na indra gómataḥ
8.003.01c     āpír no bodhi sadhamā^́diyo vr̥dhé
8.003.01d     asmā^́m̐ avantu te dhíyaḥ

8.003.02a     bhūyā^́ma te sumataú vājíno vayám
8.003.02b     mā^́ na star abhímātaye
8.003.02c     asmā^́ñ citrā^́bhir avatād abhíṣṭibhir
8.003.02d     ā^́ naḥ sumnéṣu yāmaya

8.003.03a     imā^́ u tvā purūvaso
8.003.03b     gíro vardhantu yā^́ máma
8.003.03c     pavākávarṇāḥ⁺ śúcayo vipaścíto
8.003.03d     abhí stómair anūṣata

8.003.04a     ayáṃ sahásram ŕ̥ṣibhiḥ sáhaskr̥taḥ
8.003.04b     samudrá iva paprathe
8.003.04c     satyáḥ só asya mahimā^́ gr̥ṇe śávo
8.003.04d     yajñéṣu viprarā^́jiye

8.003.05a     índram íd devátātaya
8.003.05b     índram prayatí adhvaré
8.003.05c     índraṃ samīké vaníno havāmaha
8.003.05d     índraṃ dhánasya sātáye

8.003.06a     índro mahnā^́ ródasī paprathac cháva
8.003.06b     índraḥ sū^́ryam arocayat
8.003.06c     índre ha víśvā bhúvanāni yemira
8.003.06d     índre svānā^́sa° índavaḥ

8.003.07a     abhí tvā pūrvápītaya
8.003.07b     índra stómebhir āyávaḥ
8.003.07c     samīcīnā^́sa r̥bhávaḥ sám asvaran
8.003.07d     rudrā^́ gr̥ṇanta pū^́rviyam

8.003.08a     asyéd índro vāvr̥dhe vŕ̥ṣṇiyaṃ śávo
8.003.08b     máde sutásya víṣṇavi
8.003.08c     adyā^́ tám asya mahimā^́nam āyávo
8.003.08d     ánu ṣṭuvanti pūrváthā

8.003.09a     tát tvā yāmi suvī^́riyaṃ
8.003.09b     tád bráhma pūrvácittaye
8.003.09c     yénā yátibhyo bhŕ̥gave dháne hité
8.003.09d     yéna práskaṇvam ā^́vitha

8.003.10a     yénā samudrám ásr̥jo mahī^́r apás
8.003.10b     tád indra vŕ̥ṣṇi te śávaḥ
8.003.10c     sadyáḥ só asya mahimā^́ ná saṃnáśe
8.003.10d     yáṃ kṣoṇī^́r anucakradé

8.003.11a     śagdhī^́ na indra yát tuvā
8.003.11b     rayíṃ yā^́mi suvī^́riyam
8.003.11c     śagdhí vā^́jāya prathamáṃ síṣāsate
8.003.11d     śagdhí stómāya pūrviya

8.003.12a     śagdhī^́ no asyá yád dha paurám ā^́vitha
8.003.12b     dhíya indra síṣāsataḥ
8.003.12c     śagdhí yáthā rúśamaṃ śyā^́vakaṃ kŕ̥pam
8.003.12d     índra prā^́vaḥ súvarṇaram

8.003.13a     kán návyo atasī^́nãṃ
8.003.13b     turó gr̥ṇīta mártiyaḥ
8.003.13c     nahī^́ nú asya mahimā^́nam indriyáṃ
8.003.13d     súvar gr̥ṇánta ānaśúḥ

8.003.14a     kád u stuvánta r̥tayanta deváta
8.003.14b     ŕ̥ṣiḥ kó vípra ohate
8.003.14c     kadā^́ hávam maghavann indra sunvatáḥ
8.003.14d     kád u stuvatá ā^́ gamaḥ

8.003.15a     úd u tyé mádhumattamā
8.003.15b     gíra stómāsa īrate
8.003.15c     satrājíto dhanasā^́ ákṣitotayo
8.003.15d     vājayánto ráthā iva

8.003.16a     káṇvā iva bhŕ̥gavaḥ sū^́riyā iva
8.003.16b     víśvam íd dhītám ānaśuḥ
8.003.16c     índraṃ stómebhir maháyanta āyávaḥ
8.003.16d     priyámedhāso asvaran

8.003.17a     yukṣvā^́ hí vr̥trahantama
8.003.17b     hárī indra parāvátaḥ
8.003.17c     arvācīnó maghavan sómapītaya
8.003.17d     ugrá r̥ṣvébhir ā^́ gahi

8.003.18a     imé hí te kārávo vāvaśúr dhiyā^́
8.003.18b     víprāso medhásātaye
8.003.18c     sá tuváṃ no maghavann indra girvaṇo
8.003.18d     venó ná śr̥ṇudhī hávam

8.003.19a     nír indra br̥hatī^́bhiyo
8.003.19b     vr̥tráṃ dhánubhyo asphuraḥ
8.003.19c     nír árbudasya mŕ̥gayasya māyíno
8.003.19d     níḥ párvatasya gā^́ ājaḥ

8.003.20a     nír agnáyo rurucur nír u sū^́riyo
8.003.20b     níḥ sóma indriyó rásaḥ
8.003.20c     nír antárikṣād adhamo mahā^́m áhiṃ
8.003.20d     kr̥ṣé tád indra paúṃsiyam

8.003.21a     yám me dúr índro marútaḥ
8.003.21b     pā^́kasthāmā kaúrayāṇaḥ
8.003.21c     víśveṣāṃ tmánā śóbhiṣṭham
8.003.21d     úpeva diví dhā^́vamānam

8.003.22a     róhitam me pā^́kasthāmā
8.003.22b     sudhúraṃ kakṣiyaprã^́m
8.003.22c     ádād rāyó vibódhanam

8.003.23a     yásmā anyé dáśa práti
8.003.23b     dhúraṃ váhanti váhnayaḥ
8.003.23c     ástaṃ váyo ná túgriyam

8.003.24a     ātmā^́ pitús tanū^́r vā^́sa
8.003.24b     ojodā^́ abhiáñjanam
8.003.24c     turī^́yam íd róhitasya pā^́kasthāmānam
8.003.24d     bhojáṃ dātā^́ram abravam

4

8.004.01a     yád indra prā^́g ápāg údaṅ
8.004.01b     níag vā hūyáse nŕ̥bhiḥ
8.004.01c     símā purū^́ nŕ̥ṣūto asi ā^́nave
8.004.01d     ási praśardha turváśe

8.004.02a     yád vā rúme rúśame śyā^́vake kŕ̥pa
8.004.02b     índra mādáyase sácā
8.004.02c     káṇvāsas tvā bráhmabhi stómavāhasa
8.004.02d     índrā^́ yachanti ā^́ gahi

8.004.03a     yáthā gauró apā^́ kr̥táṃ
8.004.03b     tŕ̥ṣyann éti ávériṇam
8.004.03c     āpitvé naḥ prapitvé tū^́yam ā^́ gahi
8.004.03d     káṇveṣu sú sácā píba

8.004.04a     mándantu tvā maghavann indra índavo
8.004.04b     rādhodéyāya sunvaté
8.004.04c     āmúṣyā sómam apibaś camū^́ sutáṃ
8.004.04d     jyéṣṭhaṃ tád dadhiṣe sáhaḥ

8.004.05a     prá cakre sáhasā sáho
8.004.05b     babháñja manyúm ójasā
8.004.05c     víśve ta indra pr̥tanāyávo yaho
8.004.05d     ní vr̥kṣā^́ iva yemire

8.004.06a     sahásreṇeva sacate yavīyúdhā
8.004.06b     yás ta ā^́naḷ úpastutim
8.004.06c     putrám prāvargáṃ kr̥ṇute suvī^́riye
8.004.06d     dāśnóti námaüktibhiḥ

8.004.07a     mā^́ bhema mā^́ śramiṣma
8.004.07b     ugrásya sakhiyé táva
8.004.07c     mahát te vŕ̥ṣṇo abhicákṣiyaṃ kr̥tám
8.004.07d     páśyema turváśaṃ yádum

8.004.08a     savyā^́m ánu sphigíyaṃ vāvase vŕ̥ṣā
8.004.08b     ná dānó asya roṣati
8.004.08c     mádhvā sámpr̥ktāḥ sāraghéṇa dhenávas
8.004.08d     tū^́yam éhi drávā píba

8.004.09a     aśvī^́ rathī^́ surūpá íd
8.004.09b     gómām̐ íd indra te sákhā
8.004.09c     śvātrabhā^́jā váyasā sacate sádā
8.004.09d     candró yāti sabhā^́m úpa

8.004.10a     ŕ̥śyo ná tŕ̥ṣyann avapā^́nam ā^́ gahi
8.004.10b     píbā sómaṃ váśām̐ ánu
8.004.10c     niméghamāno maghavan divé-diva
8.004.10d     ójiṣṭhaṃ dadhiṣe sáhaḥ

8.004.11a     ádhvaryo drāváyā tuváṃ
8.004.11b     sómam índraḥ pipāsati
8.004.11c     úpa nūnáṃ yuyuje vŕ̥ṣaṇā hárī
8.004.11d     ā^́ ca jagāma vr̥trahā^́

8.004.12a     svayáṃ cit sá manyate dā^́śurir jáno
8.004.12b     yátrā sómasya tr̥mpási
8.004.12c     idáṃ te ánnaṃ yújiyaṃ sámukṣitaṃ
8.004.12d     tásyéhi prá dravā píba

8.004.13a     ratheṣṭhā^́ya adhvaryavaḥ
8.004.13b     sómam índrāya sotana
8.004.13c     ádhi bradhnásya ádrayo ví cakṣate
8.004.13d     sunvánto dāśúadhvaram

8.004.14a     úpa bradhnáṃ vāvā^́tā vŕ̥ṣaṇā hárī
8.004.14b     índram apásu vakṣataḥ
8.004.14c     arvā^́ñcaṃ tvā sáptayo adhvaraśríyo
8.004.14d     váhantu sávanéd úpa

8.004.15a     prá pūṣáṇaṃ vr̥ṇīmahe
8.004.15b     yújiyāya purūvásum
8.004.15c     sá śakra śikṣa puruhūta no dhiyā^́
8.004.15d     túje rāyé vimocana

8.004.16a     sáṃ naḥ śiśīhi bhuríjor iva kṣuráṃ
8.004.16b     rā^́sva rāyó vimocana
8.004.16c     tuvé tán naḥ suvédam usríyaṃ vásu
8.004.16d     yáṃ tváṃ hinóṣi mártiyam

8.004.17a     vémi tvā pūṣan r̥ñjáse
8.004.17b     vémi stótava āghr̥ṇe
8.004.17c     ná tásya vemi áraṇaṃ hí tád vaso
8.004.17d     stuṣé pajrā^́ya sā^́mane

8.004.18a     párā gā^́vo yávasaṃ kác cid āghr̥ṇe
8.004.18b     nítyaṃ rékṇo amartiya
8.004.18c     asmā^́kam pūṣann avitā^́ śivó bhava
8.004.18d     máṃhiṣṭho vā^́jasātaye

8.004.19a     sthūráṃ rā^́dhaḥ śatā^́śuvaṃ
8.004.19b     kuruṅgásya díviṣṭiṣu
8.004.19c     rā^́jñas tveṣásya subhágasya rātíṣu
8.004.19d     turváśeṣu amanmahi

8.004.20a     dhībhíḥ sātā^́ni kāṇuvásya vājínaḥ
8.004.20b     priyámedhair abhídyubhiḥ
8.004.20c     ṣaṣṭíṃ sahásrā ánu nírmajām aje
8.004.20d     nír yūthā^́ni gávām ŕ̥ṣiḥ

8.004.21a     vr̥kṣā^́ś cin me abhipitvé arāraṇuḥ
8.004.21b     gã^́m bhajanta mehánā
8.004.21c     áśvam bhajanta mehánā

5

8.005.01a     dūrā^́d ihéva yát satī^́
8.005.01b     aruṇápsur áśiśvitat
8.005.01c     ví bhānúṃ viśvádhātanat

8.005.02a     nr̥vád dasrā manoyújā
8.005.02b     ráthena pr̥thupā^́jasā
8.005.02c     sácethe aśvinoṣásam

8.005.03a     yuvā^́bhyāṃ vājinīvasū
8.005.03b     práti stómā adr̥kṣata
8.005.03c     vā^́caṃ dūtó yáthohiṣe

8.005.04a     purupriyā^́ ṇa ūtáye
8.005.04b     purumandrā^́ purūvásū
8.005.04c     stuṣé káṇvāso aśvínā

8.005.05a     máṃhiṣṭhā vājasā^́tamā
8.005.05b     iṣáyantā śubhás pátī
8.005.05c     gántārā dāśúṣo gr̥hám

8.005.06a     tā^́ sudevā^́ya dāśúṣe
8.005.06b     sumedhā^́m ávitāriṇīm
8.005.06c     ghr̥taír gávyūtim ukṣatam

8.005.07a     ā^́ na stómam úpa dravát
8.005.07b     tū^́yaṃ śyenébhir āśúbhiḥ
8.005.07c     yātám áśvebhir aśvinā

8.005.08a     yébhis tisráḥ parāváto
8.005.08b     divó víśvāni rocanā^́
8.005.08c     trī^́m̐r aktū^́n paridī^́yathaḥ

8.005.09a     utá no gómatīr íṣa
8.005.09b     utá sātī^́r aharvidā
8.005.09c     ví patháḥ sātáye sitam

8.005.10a     ā^́ no gómantam aśvinā
8.005.10b     suvī^́raṃ suráthaṃ rayím
8.005.10c     voḷhám áśvāvatīr íṣaḥ

8.005.11a     vāvr̥dhānā^́ śubhas patī
8.005.11b     dasrā híraṇyavartanī
8.005.11c     píbataṃ somiyám mádhu

8.005.12a     asmábhyaṃ vājinīvasū
8.005.12b     maghávadbhyaś ca sapráthaḥ
8.005.12c     chardír yantam ádābhiyam

8.005.13a     ní ṣú bráhma jánānãṃ
8.005.13b     yā^́viṣṭaṃ tū^́yam ā^́ gatam
8.005.13c     mó ṣú anyā^́m̐ úpāratam

8.005.14a     asyá pibatam aśvinā
8.005.14b     yuvám mádasya cā^́ruṇaḥ
8.005.14c     mádhvo rātásya dhiṣṇiyā

8.005.15a     asmé ā^́ vahataṃ rayíṃ
8.005.15b     śatávantaṃ sahasríṇam
8.005.15c     purukṣúṃ viśvádhāyasam

8.005.16a     purutrā^́ cid dhí vāṃ narā
8.005.16b     vihváyante manīṣíṇaḥ
8.005.16c     vāghádbhir aśvinā^́ gatam

8.005.17a     jánāso vr̥ktábarhiṣo
8.005.17b     havíṣmanto araṃkŕ̥taḥ
8.005.17c     yuvā^́ṃ havante aśvinā

8.005.18a     asmā^́kam adyá vām ayáṃ
8.005.18b     stómo vā^́hiṣṭho ántamaḥ
8.005.18c     yuvā^́bhyām bhūtu aśvinā

8.005.19a     yó ha vām mádhuno dŕ̥tir
8.005.19b     ā^́hito rathacárṣaṇe
8.005.19c     tátaḥ pibatam aśvinā

8.005.20a     téna no vājinīvasū
8.005.20b     páśve tokā^́ya śáṃ gáve
8.005.20c     váhatam pī^́varīr íṣaḥ

8.005.21a     utá no diviyā^́ íṣa
8.005.21b     utá síndhūm̐r aharvidā
8.005.21c     ápa dvā^́reva varṣathaḥ

8.005.22a     kadā^́ vāṃ taugriyó vidhat
8.005.22b     samudré jahitó narā
8.005.22c     yád vāṃ rátho víbhiṣ pátāt

8.005.23a     yuváṃ káṇvāya nāsatyā
8.005.23b     ápiriptāya harmiyé
8.005.23c     śáśvad ūtī^́r daśasyathaḥ

8.005.24a     tā^́bhir ā^́ yātam ūtíbhir
8.005.24b     návyasībhiḥ suśastíbhiḥ
8.005.24c     yád vāṃ vr̥ṣaṇvasū huvé

8.005.25a     yáthā cit káṇvam ā^́vatam
8.005.25b     priyámedham upastutám
8.005.25c     átriṃ śiñjā^́ram aśvinā

8.005.26a     yáthotá kŕ̥tviye dháne
8.005.26b     aṃśúṃ góṣu agástiyam
8.005.26c     yáthā vā^́jeṣu sóbharim

8.005.27a     etā^́vad vāṃ vr̥ṣaṇvasū
8.005.27b     áto vā bhū^́yo aśvinā
8.005.27c     gr̥ṇántaḥ sumnám īmahe

8.005.28a     ráthaṃ híraṇyavandhuraṃ
8.005.28b     híraṇyābhīśum aśvinā
8.005.28c     ā^́ hí sthā^́tho divispŕ̥śam

8.005.29a     hiraṇyáyī vãṃ rábhir
8.005.29b     īṣā^́ ákṣo hiraṇyáyaḥ
8.005.29c     ubhā^́ cakrā^́ hiraṇyáyā

8.005.30a     téna no vājinīvasū
8.005.30b     parāvátaś cid ā^́ gatam
8.005.30c     úpemā^́ṃ suṣṭutím máma

8.005.31a     ā^́ vahethe parākã^́t
8.005.31b     pūrvī^́r aśnántāv aśvinā
8.005.31c     íṣo dā^́sīr amartiyā

8.005.32a     ā^́ no dyumnaír ā^́ śrávobhir
8.005.32b     ā^́ rāyā^́ yātam aśvinā
8.005.32c     púruścandrā nā^́satiyā

8.005.33a     éhá vām pruṣitápsavo
8.005.33b     váyo vahantu parṇínaḥ
8.005.33c     áchā suadhvaráṃ jánam

8.005.34a     ráthaṃ vām ánugāyasaṃ
8.005.34b     yá iṣā^́ vártate sahá
8.005.34c     ná cakrám abhí bādhate

8.005.35a     hiraṇyáyena ráthena
8.005.35b     dravátpāṇibhir áśvaiḥ
8.005.35c     dhī^́javanā nā^́satiyā

8.005.36a     yuvám mr̥gáṃ jāgr̥vā^́ṃsaṃ
8.005.36b     svádatho vā vr̥ṣaṇvasū
8.005.36c     tā^́ naḥ pr̥ṅktam iṣā^́ rayím

8.005.37a     tā^́ me aśvinā sanīnā^́ṃ
8.005.37b     vidiyā^́taṃ návānãm
8.005.37c     yáthā cic caidiyáḥ kaśúḥ
8.005.37d     śatám úṣṭrānãṃ dádat
8.005.37e     sahásrā dáśa gónãm

8.005.38a     yó me híraṇyasaṃdr̥śo
8.005.38b     dáśa rā^́jño ámaṃhata
8.005.38c     adhaspadā^́ íc caidiyásya kr̥ṣṭáyaś
8.005.38d     carmamnā^́ abhíto jánāḥ

8.005.39a     mā^́kir enā^́ pathā^́ gãd
8.005.39b     yénemé yánti cedáyaḥ
8.005.39c     anyó nét sūrír óhate
8.005.39d     bhūridā^́vattaro jánaḥ

6

8.006.01a     mahā^́m̐ índro yá ójasā
8.006.01b     parjányo vr̥ṣṭimā^́m̐ iva
8.006.01c     stómair vatsásya vāvr̥dhe

8.006.02a     prajā^́m r̥tásya píprataḥ
8.006.02b     prá yád bháranta váhnayaḥ
8.006.02c     víprā r̥tásya vā^́hasā

8.006.03a     káṇvā índraṃ yád ákrata
8.006.03b     stómair yajñásya sā^́dhanam
8.006.03c     jāmí bruvata ā^́yudham

8.006.04a     sám asya manyáve víśo
8.006.04b     víśvā namanta kr̥ṣṭáyaḥ
8.006.04c     samudrā^́yeva síndhavaḥ

8.006.05a     ójas tád asya titviṣa
8.006.05b     ubhé yád samávartayat
8.006.05c     índraś cármeva ródasī

8.006.06a     ví cid vr̥trásya dódhato
8.006.06b     vájreṇa śatáparvaṇā
8.006.06c     śíro bibheda vr̥ṣṇínā

8.006.07a     imā^́ abhí prá ṇonumo
8.006.07b     vipā^́m ágreṣu dhītáyaḥ
8.006.07c     agnéḥ śocír ná didyútaḥ

8.006.08a     gúhā satī^́r úpa tmánā
8.006.08b     prá yác chócanta dhītáyaḥ
8.006.08c     káṇvā r̥tásya dhā^́rayā

8.006.09a     prá tám indra naśīmahi
8.006.09b     rayíṃ gómantam aśvínam
8.006.09c     prá bráhma pūrvácittaye

8.006.10a     ahám íd dhí pitúṣ pári
8.006.10b     medhā^́m r̥tásya jagrábha
8.006.10c     aháṃ sū^́rya ivājani

8.006.11a     ahám pratnéna mánmanā
8.006.11b     gíraḥ śumbhāmi kaṇvavát
8.006.11c     yénéndraḥ śúṣmam íd dadhé

8.006.12a     yé tvā^́m indra ná tuṣṭuvúr
8.006.12b     ŕ̥ṣayo yé ca tuṣṭuvúḥ
8.006.12c     máméd vardhasva súṣṭutaḥ

8.006.13a     yád asya manyúr ádhvanīd
8.006.13b     ví vr̥trám parvaśó ruján
8.006.13c     apáḥ samudrám aírayat

8.006.14a     ní śúṣṇa indra dharṇasíṃ
8.006.14b     vájraṃ jaghantha dásyavi
8.006.14c     vŕ̥ṣā hí ugra śr̥ṇviṣé

8.006.15a     ná dyā^́va índram ójasā
8.006.15b     nā^́ntárikṣāṇi vajríṇam
8.006.15c     ná vivyacanta bhū^́mayaḥ

8.006.16a     yás ta indra mahī^́r apá
8.006.16b     stabhūyámāna ā^́śayat
8.006.16c     ní tám pádyāsu śiśnathaḥ

8.006.17a     yá imé ródasī mahī^́
8.006.17b     samīcī^́ samájagrabhīt
8.006.17c     támobhir indra táṃ guhaḥ

8.006.18a     yá indra yátayas tuvā
8.006.18b     bhŕ̥gavo yé ca tuṣṭuvúḥ
8.006.18c     máméd ugra śrudhī hávam

8.006.19a     imā^́s ta indra pŕ̥śnayo
8.006.19b     ghr̥táṃ duhata āśíram
8.006.19c     enā^́m r̥tásya pipyúṣīḥ

8.006.20a     yā^́ indra prasúvas tuvā
8.006.20b     āsā^́ gárbham ácakriran
8.006.20c     pári dhármeva sū^́riyam

8.006.21a     tuvā^́m íc chavasas pate
8.006.21b     káṇvā ukthéna vāvr̥dhuḥ
8.006.21c     tuvā^́ṃ sutā^́sa índavaḥ

8.006.22a     távéd indra práṇītiṣu
8.006.22b     utá práśastir adrivaḥ
8.006.22c     yajñó vitantasā^́yiyaḥ

8.006.23a     ā^́ na indra mahī^́m íṣam
8.006.23b     púraṃ ná darṣi gómatīm
8.006.23c     utá prajā^́ṃ suvī^́riyam

8.006.24a     utá tyád āśuáśviyaṃ
8.006.24b     yád indra nā^́huṣīṣu ā^́
8.006.24c     ágre vikṣú pradī^́dayat

8.006.25a     abhí vrajáṃ ná tatniṣe
8.006.25b     sū^́ra upākácakṣasam
8.006.25c     yád indra mr̥̄ḷáyāsi⁺ naḥ

8.006.26a     yád aṅgá taviṣīyása
8.006.26b     índra prarā^́jasi kṣitī^́ḥ
8.006.26c     mahā^́m̐ apārá ójasā

8.006.27a     táṃ tvā havíṣmatīr víśa
8.006.27b     úpa bruvata ūtáye
8.006.27c     urujráyasam índubhiḥ

8.006.28a     upahvaré girīṇã^́ṃ
8.006.28b     saṃgathé ca nadī^́nãm
8.006.28c     dhiyā^́ vípro ajāyata

8.006.29a     átaḥ samudrám udvátaś
8.006.29b     cikitvā^́m̐ áva paśyati
8.006.29c     yáto vipāná éjati

8.006.30a     ā^́d ít pratnásya rétaso
8.006.30b     jyótiṣ paśyanti vāsarám
8.006.30c     paró yád idhyáte divā^́

8.006.31a     káṇvāsa indra te matíṃ
8.006.31b     víśve vardhanti paúṃsiyam
8.006.31c     utó śaviṣṭha vŕ̥ṣṇiyam

8.006.32a     imā^́m ma indra suṣṭutíṃ
8.006.32b     juṣásva prá sú mā^́m ava
8.006.32c     utá prá vardhayā matím

8.006.33a     utá brahmaṇiyā^́ vayáṃ
8.006.33b     túbhyam pravr̥ddha vajrivaḥ
8.006.33c     víprā atakṣma jīváse

8.006.34a     abhí káṇvā anūṣata
8.006.34b     ápo ná pravátā yatī^́ḥ
8.006.34c     índraṃ vánanvatī matíḥ

8.006.35a     índram ukthā^́ni vāvr̥dhuḥ
8.006.35b     samudrám iva síndhavaḥ
8.006.35c     ánuttamanyum ajáram

8.006.36a     ā^́ no yāhi parāváto
8.006.36b     háribhyāṃ haryatā^́bhiyām
8.006.36c     imám indra sutám piba

8.006.37a     tuvā^́m íd vr̥trahantama
8.006.37b     jánāso vr̥ktábarhiṣaḥ
8.006.37c     hávante vā^́jasātaye

8.006.38a     ánu tvā ródasī ubhé
8.006.38b     cakráṃ ná varti étaśam
8.006.38c     ánu svānā^́sa° índavaḥ

8.006.39a     mándasvā sú súvarṇara
8.006.39b     uténdra śaryaṇā^́vati
8.006.39c     mátsvā vívasvato matī^́

8.006.40a     vāvr̥dhāná úpa dyávi
8.006.40b     vŕ̥ṣā vajrī^́ aroravīt
8.006.40c     vr̥trahā^́ somapā^́tamaḥ

8.006.41a     ŕ̥ṣir hí pūrvajā^́ ási
8.006.41b     éka ī^́śāna ójasā
8.006.41c     índra coṣkūyáse vásu

8.006.42a     asmā^́kaṃ tvā sutā^́m̐ úpa
8.006.42b     vītápr̥ṣṭhā abhí práyaḥ
8.006.42c     śatáṃ vahantu hárayaḥ

8.006.43a     imā^́ṃ sú pūrviyā^́ṃ dhíyam
8.006.43b     mádhor ghr̥tásya pipyúṣīm
8.006.43c     káṇvā ukthéna vāvr̥dhuḥ

8.006.44a     índram íd vímahīnãm
8.006.44b     médhe vr̥ṇīta mártiyaḥ
8.006.44c     índraṃ saniṣyúr ūtáye

8.006.45a     arvā^́ñcaṃ tvā puruṣṭuta
8.006.45b     priyámedhastutā hárī
8.006.45c     somapéyāya vakṣataḥ

8.006.46a     śatám aháṃ tiríndire
8.006.46b     sahásram párśāv ā^́ dade
8.006.46c     rā^́dhāṃsi yā^́duvānãm

8.006.47a     trī^́ṇi śatā^́ni árvatāṃ
8.006.47b     sahásrā dáśa gónãm
8.006.47c     dadúṣ pajrā^́ya sā^́mane

8.006.48a     úd ānaṭ kakuhó dívam
8.006.48b     úṣṭrāñ caturyújo dádat
8.006.48c     śrávasā yā^́duvaṃ jánam

7

8.007.01a     prá yád vas triṣṭúbham íṣam
8.007.01b     máruto vípro ákṣarat
8.007.01c     ví párvateṣu rājatha

8.007.02a     yád aṅgá taviṣīyavo
8.007.02b     yā^́maṃ śubhrā ácidhuvam
8.007.02c     ní párvatā ahāsata

8.007.03a     úd īrayanta vāyúbhir
8.007.03b     vāśrā^́saḥ pŕ̥śnimātaraḥ
8.007.03c     dhukṣánta pipyúṣīm íṣam

8.007.04a     vápanti marúto míham
8.007.04b     prá vepayanti párvatān
8.007.04c     yád yā^́maṃ yā^́nti vāyúbhiḥ

8.007.05a     ní yád yā^́māya vo girír
8.007.05b     ní síndhavo vídharmaṇe
8.007.05c     mahé śúṣmāya yemiré

8.007.06a     yuṣmā^́m̐ u náktam ūtáye
8.007.06b     yuṣmā^́n dívā havāmahe
8.007.06c     yuṣmā^́n prayatí adhvaré

8.007.07a     úd u tyé aruṇápsavaś
8.007.07b     citrā^́ yā^́mebhir īrate
8.007.07c     vāśrā^́ ádhi ṣṇúnā diváḥ

8.007.08a     sr̥jánti raśmím ójasā
8.007.08b     pánthāṃ sū^́ryāya yā^́tave
8.007.08c     té bhānúbhir ví tasthire

8.007.09a     imā^́m me maruto gíram
8.007.09b     imáṃ stómam r̥bhukṣaṇaḥ
8.007.09c     imám me vanatā hávam

8.007.10a     trī^́ṇi sárāṃsi pŕ̥śnayo
8.007.10b     duduhré vajríṇe mádhu
8.007.10c     útsaṃ kávandham udríṇam

8.007.11a     máruto yád dha vo diváḥ
8.007.11b     sumnāyánto hávāmahe
8.007.11c     ā^́ tū^́ na úpa gantana

8.007.12a     yūyáṃ hí ṣṭhā^́ sudānavo
8.007.12b     rúdrā r̥bhukṣaṇo dáme
8.007.12c     utá prácetaso máde

8.007.13a     ā^́ no rayím madacyútam
8.007.13b     purukṣúṃ viśvádhāyasam
8.007.13c     íyartā maruto diváḥ

8.007.14a     ádhīva yád girīṇã^́ṃ
8.007.14b     yā^́maṃ śubhrā ácidhuvam
8.007.14c     svānaír° mandadhva índubhiḥ

8.007.15a     etā^́vataś cid eṣãṃ
8.007.15b     sumnám bhikṣeta mártiyaḥ
8.007.15c     ádābhiyasya mánmabhiḥ

8.007.16a     yé drapsā^́ iva ródasī
8.007.16b     dhámanti ánu vr̥ṣṭíbhiḥ
8.007.16c     útsaṃ duhánto ákṣitam

8.007.17a     úd u svānébhir īrata
8.007.17b     úd ráthair úd u vāyúbhiḥ
8.007.17c     út stómaiḥ pŕ̥śnimātaraḥ

8.007.18a     yénāvá turváśaṃ yáduṃ
8.007.18b     yéna káṇvaṃ dhanaspŕ̥tam
8.007.18c     rāyé sú tásya dhīmahi

8.007.19a     imā^́ u vaḥ sudānavo
8.007.19b     ghr̥táṃ ná pipyúṣīr íṣaḥ
8.007.19c     várdhān kāṇvásya mánmabhiḥ

8.007.20a     kúva nūnáṃ sudānavo
8.007.20b     mádathā vr̥ktabarhiṣaḥ
8.007.20c     brahmā^́ kó vaḥ saparyati

8.007.21a     nahí ṣma yád dha vaḥ purā^́
8.007.21b     stómebhir vr̥ktabarhiṣaḥ
8.007.21c     śárdhām̐ r̥tásya jínvatha

8.007.22a     sám u tyé mahatī^́r apáḥ
8.007.22b     sáṃ kṣoṇī^́ sám u sū^́riyam
8.007.22c     sáṃ vájram parvaśó dadhuḥ

8.007.23a     ví vr̥trám parvaśó yayur
8.007.23b     ví párvatām̐ arājínaḥ
8.007.23c     cakrāṇā^́ vŕ̥ṣṇi paúṃsiyam

8.007.24a     ánu tritásya yúdhyataḥ
8.007.24b     śúṣmam āvann utá krátum
8.007.24c     ánv índraṃ vr̥tratū^́riye

8.007.25a     vidyúddhastā abhídyavaḥ
8.007.25b     śíprāḥ śīrṣán hiraṇyáyīḥ
8.007.25c     śubhrā^́ ví añjata śriyé

8.007.26a     uśánā yát parāváta
8.007.26b     ukṣṇó rándhram áyātana
8.007.26c     diyaúr ná cakradad bhiyā^́

8.007.27a     ā^́ no makhásya dāváne
8.007.27b     áśvair híraṇyapāṇibhiḥ
8.007.27c     dévāsa úpa gantana

8.007.28a     yád eṣām pŕ̥ṣatī ráthe
8.007.28b     práṣṭir váhati róhitaḥ
8.007.28c     yā^́nti śubhrā^́ riṇánn apáḥ

8.007.29a     suṣóme śaryaṇā^́vati
8.007.29b     ārjīké pastíyāvati
8.007.29c     yayúr nícakrayā náraḥ

8.007.30a     kadā^́ gachātha maruta
8.007.30b     itthā^́ vípraṃ hávamānam
8.007.30c     mārḍīkébhir nā^́dhamānam

8.007.31a     kád dha nūnáṃ kadhapriyo
8.007.31b     yád índram ájahātana
8.007.31c     kó vaḥ sakhitvá ohate

8.007.32a     sahó ṣú ṇo vájrahastaiḥ
8.007.32b     káṇvāso agním marúdbhiḥ
8.007.32c     stuṣé híraṇyavāśībhiḥ

8.007.33a     õ^́ ṣú vŕ̥ṣṇaḥ práyajyūn
8.007.33b     ā^́ návyase suvitā^́ya
8.007.33c     vavr̥tiyā^́ṃ citrávājān

8.007.34a     giráyaś cin ní jihate
8.007.34b     párśānāso mányamānāḥ
8.007.34c     párvatāś cin ní yemire

8.007.35a     ā^́kṣṇayā^́vāno vahanti
8.007.35b     antárikṣeṇa pátataḥ
8.007.35c     dhā^́tāra stuvaté váyaḥ

8.007.36a     agnír hí jā^́ni pūrviyáś
8.007.36b     chándo ná sū^́ro arcíṣā
8.007.36c     té bhānúbhir ví tasthire

8

8.008.01a     ā^́ no víśvābhir ūtíbhir
8.008.01b     áśvinā gáchataṃ yuvám
8.008.01c     dásrā híraṇyavartanī
8.008.01d     píbataṃ somiyám mádhu

8.008.02a     ā^́ nūnáṃ yātam aśvinā
8.008.02b     ráthena sū^́riyatvacā
8.008.02c     bhújī híraṇyapeśasā
8.008.02d     kávī gámbhīracetasā

8.008.03a     ā^́ yātaṃ náhuṣas pári
8.008.03b     ā^́ntárikṣāt suvr̥ktíbhiḥ
8.008.03c     píbātho aśvinā mádhu
8.008.03d     káṇvānāṃ sávane sutám

8.008.04a     ā^́ no yātaṃ divás pári
8.008.04b     ā^́ntárikṣād adhapriyā
8.008.04c     putráḥ káṇvasya vām ihá
8.008.04d     suṣā^́va somiyám mádhu

8.008.05a     ā^́ no yātam úpaśruti
8.008.05b     áśvinā sómapītaye
8.008.05c     svā^́hā stómasya vardhanā
8.008.05d     prá kavī dhītíbhir narā

8.008.06a     yác cid dhí vām purá ŕ̥ṣayo
8.008.06b     juhūré ávase narā
8.008.06c     ā^́ yātam aśvinā^́ gatam
8.008.06d     úpemā^́ṃ suṣṭutím máma

8.008.07a     diváś cid rocanā^́d ádhi
8.008.07b     ā^́ no gantaṃ suvarvidā
8.008.07c     dhībhír vatsapracetasā
8.008.07d     stómebhir havanaśrutā

8.008.08a     kím anyé pári āsate
8.008.08b     asmát stómebhir aśvínā
8.008.08c     putráḥ káṇvasya vām ŕ̥ṣir
8.008.08d     gīrbhír vatsó avīvr̥dhat

8.008.09a     ā^́ vāṃ vípra ihā^́vase
8.008.09b     áhvat stómebhir aśvinā
8.008.09c     áriprā vŕ̥trahantamā
8.008.09d     tā^́ no bhūtam mayobhúvā

8.008.10a     ā^́ yád vāṃ yóṣaṇā rátham
8.008.10b     átiṣṭhad vājinīvasū
8.008.10c     víśvāni aśvinā yuvám
8.008.10d     prá dhītā^́ni agachatam

8.008.11a     átaḥ sahásranirṇijā
8.008.11b     ráthenā^́ yātam aśvinā
8.008.11c     vatsó vām mádhumad váco
8.008.11d     áśaṃsīt kāviyáḥ kavíḥ

8.008.12a     purumandrā^́ purūvásū
8.008.12b     manotárā rayīṇã^́m
8.008.12c     stómam me aśvínāv imám
8.008.12d     abhí váhnī anūṣātām

8.008.13a     ā^́ no víśvāni aśvinā
8.008.13b     dhattáṃ rā^́dhāṃsi áhrayā
8.008.13c     kr̥táṃ na r̥tvíyāvato
8.008.13d     mā^́ no rīradhataṃ nidé

8.008.14a     yán nāsatyā parāváti
8.008.14b     yád vā sthó ádhi ámbare
8.008.14c     átaḥ sahásranirṇijā
8.008.14d     ráthenā^́ yātam aśvinā

8.008.15a     yó vāṃ nāsatiyāv ŕ̥ṣir
8.008.15b     gīrbhír vatsó ávīvr̥dhat
8.008.15c     tásmai sahásranirṇijam
8.008.15d     íṣaṃ dhattaṃ ghr̥taścútam

8.008.16a     prā^́smā ū^́rjaṃ ghr̥taścútam
8.008.16b     áśvinā yáchataṃ yuvám
8.008.16c     yó vāṃ sumnā^́ya tuṣṭávad
8.008.16d     vasūyā^́d dānunas patī

8.008.17a     ā^́ no gantaṃ riśādasā
8.008.17b     imáṃ stómam purubhujā
8.008.17c     kr̥táṃ naḥ suśríyo narā
8.008.17d     imā^́ dātam abhíṣṭaye

8.008.18a     ā^́ vāṃ víśvābhir ūtíbhiḥ
8.008.18b     priyámedhā ahūṣata
8.008.18c     rā^́jantāv adhvarā^́ṇãm
8.008.18d     áśvinā yā^́mahūtiṣu

8.008.19a     ā^́ no gantam mayobhúvā
8.008.19b     áśvinā śambhúvā yuvám
8.008.19c     yó vāṃ vipanyū dhītíbhir
8.008.19d     gīrbhír vatsó ávīvr̥dhat

8.008.20a     yā^́bhiḥ káṇvam médhātithiṃ
8.008.20b     yā^́bhir váśaṃ dáśavrajam
8.008.20c     yā^́bhir góśaryam ā^́vataṃ
8.008.20d     tā^́bhir no avataṃ narā

8.008.21a     yā^́bhir narā trasádasyum
8.008.21b     ā^́vataṃ kŕ̥tviye dháne
8.008.21c     tā^́bhiḥ ṣú asmā^́m̐ aśvinā
8.008.21d     prā^́vataṃ vā^́jasātaye

8.008.22a     prá vāṃ stómāḥ suvr̥ktáyo
8.008.22b     gíro vardhantu aśvinā
8.008.22c     púrutrā vŕ̥trahantamā
8.008.22d     tā^́ no bhūtam puruspŕ̥hā

8.008.23a     trī^́ṇi padā^́ni aśvínor
8.008.23b     āvíḥ sā^́nti gúhā paráḥ
8.008.23c     kavī^́ r̥tásya pátmabhir
8.008.23d     arvā^́g jīvébhiyas pári

9

8.009.01a     ā^́ nūnám aśvinā yuváṃ
8.009.01b     vatsásya gantam ávase
8.009.01c     prā^́smai yachatam avr̥kám pr̥thú chardír
8.009.01d     yuyutáṃ yā^́ árātayaḥ

8.009.02a     yád antárikṣe yád diví
8.009.02b     yát páñca mā^́nuṣām̐ ánu
8.009.02c     nr̥mṇáṃ tád dhattam aśvinā

8.009.03a     yé vāṃ dáṃsāṃsi aśvinā
8.009.03b     víprāsaḥ parimāmr̥śúḥ
8.009.03c     evét kāṇvásya bodhatam

8.009.04a     ayáṃ vāṃ gharmó aśvinā
8.009.04b     stómena pári ṣicyate
8.009.04c     ayáṃ sómo mádhumān vājinīvasū
8.009.04d     yéna vr̥tráṃ cíketathaḥ

8.009.05a     yád apsú yád vánaspátau
8.009.05b     yád óṣadhīṣu purudaṃsasā kr̥tám
8.009.05c     téna māviṣṭam aśvinā

8.009.06a     yán nāsatyā bhuraṇyátho
8.009.06b     yád vā deva bhiṣajyáthaḥ
8.009.06c     ayáṃ vāṃ vatsó matíbhir ná vindhate
8.009.06d     havíṣmantaṃ hí gáchathaḥ

8.009.07a     ā^́ nūnám aśvínor ŕ̥ṣi
8.009.07b     stómaṃ ciketa vāmáyā
8.009.07c     ā^́ sómam mádhumattamaṃ
8.009.07d     gharmáṃ siñcād átharvaṇi

8.009.08a     ā^́ nūnáṃ raghúvartaniṃ
8.009.08b     ráthaṃ tiṣṭhātho aśvinā
8.009.08c     ā^́ vāṃ stómā imé máma
8.009.08d     nábho ná cucyavīrata

8.009.09a     yád adyá vāṃ nāsatiyā
8.009.09b     ukthaír ācucyuvīmáhi
8.009.09c     yád vā vā^́ṇībhir aśvinā
8.009.09d     evét kāṇvásya bodhatam

8.009.10a     yád vāṃ kakṣī^́vām̐ utá yád víaśva
8.009.10b     ŕ̥ṣir yád vāṃ dīrghátamā juhā^́va
8.009.10c     pŕ̥thī yád vāṃ vainiyáḥ sā^́daneṣu
8.009.10d     evéd áto aśvinā cetayethām

8.009.11a     yātáṃ chardiṣpā^́ utá naḥ paraspā^́
8.009.11b     bhūtáṃ jagatpā^́ utá nas tanūpā^́
8.009.11c     vartís tokā^́ya tánayāya yātam

8.009.12a     yád índreṇa saráthaṃ yāthó aśvinā
8.009.12b     yád vā vāyúnā bhávathaḥ sámokasā
8.009.12c     yád ādityébhir r̥bhúbhiḥ sajóṣasā
8.009.12d     yád vā víṣṇor vikrámaṇeṣu tíṣṭhathaḥ

8.009.13a     yád adyá aśvínāv aháṃ
8.009.13b     huvéya vā^́jasātaye
8.009.13c     yát pr̥tsú turváṇe sáhas
8.009.13d     tác chréṣṭham aśvínor ávaḥ

8.009.14a     ā^́ nūnáṃ yātam aśvinā
8.009.14b     imā^́ havyā^́ni vāṃ hitā^́
8.009.14c     imé sómāso ádhi turváśe yádāv
8.009.14d     imé káṇveṣu vām átha

8.009.15a     yán nāsatiyā parāké
8.009.15b     arvāké ásti bheṣajám
8.009.15c     téna nūnáṃ vimadā^́ya pracetasā
8.009.15d     chardír vatsā^́ya yachatam

8.009.16a     ábhutsi u prá deviyā^́
8.009.16b     sākáṃ vācā^́hám aśvínoḥ
8.009.16c     ví āvar devi ā^́ matíṃ
8.009.16d     ví rātím mártiyebhiyaḥ

8.009.17a     prá bodhayoṣo aśvínā
8.009.17b     prá devi sūnr̥te mahi
8.009.17c     prá yajñahotar ānuṣák
8.009.17d     prá mádāya śrávo br̥hát

8.009.18a     yád uṣo yā^́si bhānúnā
8.009.18b     sáṃ sū^́riyeṇa rocase
8.009.18c     ā^́ hāyám aśvíno rátho
8.009.18d     vartír yāti nr̥pā^́yiyam

8.009.19a     yád ā^́pītāso aṃśávo
8.009.19b     gā^́vo ná duhrá ū^́dhabhiḥ
8.009.19c     yád vā vā^́ṇīr ánūṣata
8.009.19d     prá devayánto aśvínā

8.009.20a     prá dyumnā^́ya prá śávase
8.009.20b     prá nr̥ṣā^́hyāya śármaṇe
8.009.20c     prá dákṣāya pracetasā

8.009.21a     yán nūnáṃ dhībhír aśvinā
8.009.21b     pitúr yónā niṣī^́dathaḥ
8.009.21c     yád vā sumnébhir ukthiyā

10

8.010.01a     yát sthó dīrgháprasadmani
8.010.01b     yád vādó rocané diváḥ
8.010.01c     yád vā samudré ádhi ā^́kr̥te gr̥hé
8.010.01d     áta ā^́ yātam aśvinā

8.010.02a     yád vā yajñám mánave sammimikṣáthur
8.010.02b     evét kāṇvásya bodhatam
8.010.02c     bŕ̥haspátiṃ víśvān devā^́m̐ aháṃ huva
8.010.02d     índrāvíṣṇū aśvínāv āśuhéṣasā

8.010.03a     tiyā^́ nú aśvínā huve
8.010.03b     sudáṃsasā gr̥bhé kr̥tā^́
8.010.03c     yáyor ásti prá ṇaḥ sakhyáṃ
8.010.03d     devéṣu ádhi ā^́piyam

8.010.04a     yáyor ádhi prá yajñā^́
8.010.04b     asūré sánti sūráyaḥ
8.010.04c     tā^́ yajñásya adhvarásya prácetasā
8.010.04d     svadhā^́bhir yā^́ píbataḥ somiyám mádhu

8.010.05a     yád adyá aśvināv ápāg
8.010.05b     yát prā^́k sthó vājinīvasū
8.010.05c     yád druhyávi ánavi turváśe yádau
8.010.05d     huvé vām átha mā^́ gatam

8.010.06a     yád antárikṣe pátathaḥ purubhujā
8.010.06b     yád vemé ródasī ánu
8.010.06c     yád vā svadhā^́bhir adhitíṣṭhatho rátham
8.010.06d     áta ā^́ yātam aśvinā

11

8.011.01a     tvám agne vratapā^́ asi
8.011.01b     devá ā^́ mártiyeṣu ā^́
8.011.01c     tuváṃ yajñéṣu ī^́ḍiyaḥ

8.011.02a     tuvám asi praśásiyo
8.011.02b     vidátheṣu sahantiya
8.011.02c     ágne rathī^́r adhvarā^́ṇām

8.011.03a     sá tvám asmád ápa dvíṣo
8.011.03b     yuyodhí jātavedaḥ
8.011.03c     ádevīr agne árātīḥ

8.011.04a     ánti cit sántam áha
8.011.04b     yajñám mártasya ripóḥ
8.011.04c     nópa veṣi jātavedaḥ

8.011.05a     mártā ámartiyasya te
8.011.05b     bhū^́ri nā^́ma manāmahe
8.011.05c     víprāso jātávedasaḥ

8.011.06a     vípraṃ víprāso ávase
8.011.06b     devám mártāsa ūtáye
8.011.06c     agníṃ gīrbhír havāmahe

8.011.07a     ā^́ te vatsó máno yamat
8.011.07b     paramā^́c cit sadhásthãt
8.011.07c     ágne tvā^́ṃkāmayā girā^́

8.011.08a     purutrā^́ hí sadŕ̥ṅṅ ási
8.011.08b     víśo víśvā ánu prabhúḥ
8.011.08c     samátsu tvā havāmahe

8.011.09a     samátsu agním ávase
8.011.09b     vājayánto havāmahe
8.011.09c     vā^́jeṣu citrárādhasam

8.011.10a     pratnó hí kam ī^́ḍiyo adhvaréṣu
8.011.10b     sanā^́c ca hótā náviyaś ca sátsi
8.011.10c     suvā^́ṃ cāgne tanúvam pipráyasva
8.011.10d     asmábhyaṃ ca saúbhagam ā^́ yajasva

12

8.012.01a     yá indra somapā^́tamo
8.012.01b     mádaḥ śaviṣṭha cétati
8.012.01c     yénā háṃsi ní atríṇaṃ tám īmahe

8.012.02a     yénā dáśagvam ádhriguṃ
8.012.02b     vepáyantaṃ súvarṇaram
8.012.02c     yénā samudrám ā^́vithā tám īmahe

8.012.03a     yéna síndhum mahī^́r apó
8.012.03b     ráthām̐ iva pracodáyaḥ
8.012.03c     pánthām r̥tásya yā^́tave tám īmahe

8.012.04a     imáṃ stómam abhíṣṭaye
8.012.04b     ghr̥táṃ ná pūtám adrivaḥ
8.012.04c     yénā nú sadyá ójasā vavákṣitha

8.012.05a     imáṃ juṣasva girvaṇaḥ
8.012.05b     samudrá iva pinvate
8.012.05c     índra víśvābhir ūtíbhir vavákṣitha

8.012.06a     yó no deváḥ parāvátaḥ
8.012.06b     sakhitvanā^́ya māmahé
8.012.06c     divó ná vr̥ṣṭím pratháyan vavákṣitha

8.012.07a     vavakṣúr asya ketávo
8.012.07b     utá vájro gábhastiyoḥ
8.012.07c     yát sū^́riyo ná ródasī ávardhayat

8.012.08a     yádi pravr̥ddha satpate
8.012.08b     sahásram mahiṣā^́m̐ ághaḥ
8.012.08c     ā^́d ít ta indriyám máhi prá vāvr̥dhe

8.012.09a     índraḥ sū^́ryasya raśmíbhir
8.012.09b     ní arśasānám oṣati
8.012.09c     agnír váneva sāsahíḥ prá vāvr̥dhe

8.012.10a     iyáṃ ta r̥tvíyāvatī
8.012.10b     dhītír eti návīyasī
8.012.10c     saparyántī purupriyā^́ mímīta ít

8.012.11a     gárbho yajñásya devayúḥ
8.012.11b     krátum punīta ānuṣák
8.012.11c     stómair índrasya vāvr̥dhe mímīta ít

8.012.12a     sanír mitrásya papratha
8.012.12b     índraḥ sómasya pītáye
8.012.12c     prā^́cī vā^́śīva sunvaté mímīta ít

8.012.13a     yáṃ víprā ukthávāhaso
8.012.13b     abhipramandúr āyávaḥ
8.012.13c     ghr̥táṃ ná pipya āsáni r̥tásya yát

8.012.14a     utá svarā^́je áditi
8.012.14b     stómam índrāya jījanat
8.012.14c     purupraśastám ūtáya r̥tásya yát

8.012.15a     abhí váhnaya ūtáye
8.012.15b     ánūṣata práśastaye
8.012.15c     ná deva vívratā hárī r̥tásya yát

8.012.16a     yát sómam indra víṣṇavi
8.012.16b     yád vā gha tritá āptiyé
8.012.16c     yád vā marútsu mándase sám índubhiḥ

8.012.17a     yád vā śakra parāváti
8.012.17b     samudré ádhi mándase
8.012.17c     asmā^́kam ít suté raṇā sám índubhiḥ

8.012.18a     yád vā^́si sunvató vr̥dhó
8.012.18b     yájamānasya satpate
8.012.18c     ukthé vā yásya ráṇyasi sám índubhiḥ

8.012.19a     deváṃ-devaṃ vo ávasa
8.012.19b     índram-indraṃ gr̥ṇīṣáṇi
8.012.19c     ádhā yajñā^́ya turváṇe ví ānaśuḥ

8.012.20a     yajñébhir yajñávāhasaṃ
8.012.20b     sómebhiḥ somapā^́tamam
8.012.20c     hótrābhir índraṃ vāvr̥dhur ví ānaśuḥ

8.012.21a     mahī^́r asya práṇītayaḥ
8.012.21b     pūrvī^́r utá práśastayaḥ
8.012.21c     víśvā vásūni dāśúṣe ví ānaśuḥ

8.012.22a     índraṃ vr̥trā^́ya hántave
8.012.22b     devā^́so dadhire puráḥ
8.012.22c     índraṃ vā^́ṇīr anūṣatā sám ójase

8.012.23a     mahā^́ntam mahinā^́ vayáṃ
8.012.23b     stómebhir havanaśrútam
8.012.23c     arkaír abhí prá ṇonumaḥ sám ójase

8.012.24a     ná yáṃ viviktó ródasī
8.012.24b     nā^́ntárikṣāṇi vajríṇam
8.012.24c     ámād íd asya titviṣe sám ójasaḥ

8.012.25a     yád indra pr̥tanā^́jiye
8.012.25b     devā^́s tvā dadhiré puráḥ
8.012.25c     ā^́d ít te haryatā^́ hárī vavakṣatuḥ

8.012.26a     yadā^́ vr̥tráṃ nadīvŕ̥taṃ
8.012.26b     śávasā vajrin ávadhīḥ
8.012.26c     ā^́d ít te haryatā^́ hárī vavakṣatuḥ

8.012.27a     yadā^́ te víṣṇur ójasā
8.012.27b     trī^́ṇi padā^́ vicakramé
8.012.27c     ā^́d ít te haryatā^́ hárī vavakṣatuḥ

8.012.28a     yadā^́ te haryatā^́ hárī
8.012.28b     vāvr̥dhā^́te divé-dive
8.012.28c     ā^́d ít te víśvā bhúvanāni yemire

8.012.29a     yadā^́ te mā^́rutīr víśas
8.012.29b     túbhyam indra niyemiré
8.012.29c     ā^́d ít te víśvā bhúvanāni yemire

8.012.30a     yadā^́ sū^́ryam amúṃ diví
8.012.30b     śukráṃ jyótir ádhārayaḥ
8.012.30c     ā^́d ít te víśvā bhúvanāni yemire

8.012.31a     imā^́ṃ ta indra suṣṭutíṃ
8.012.31b     vípra iyarti dhītíbhiḥ
8.012.31c     jāmím padéva pípratīm prá adhvaré

8.012.32a     yád asya dhā^́mani priyé
8.012.32b     samīcīnā^́so ásvaran
8.012.32c     nā^́bhā yajñásya dohánā prá adhvaré

8.012.33a     suvī^́riyaṃ suaśviyaṃ
8.012.33b     sugávyam indra daddhi naḥ
8.012.33c     hóteva pūrvácittaye prá adhvaré

13

8.013.01a     índraḥ sutéṣu sómeṣu
8.013.01b     krátum punīta ukthíyam
8.013.01c     vidé vr̥dhásya dákṣaso mahā^́n hí ṣáḥ

8.013.02a     sá prathamé víomani
8.013.02b     devā^́nāṃ sádane vr̥dháḥ
8.013.02c     supāráḥ suśrávastamaḥ sám apsujít

8.013.03a     tám ahve vā^́jasātaya
8.013.03b     índram bhárāya śuṣmíṇam
8.013.03c     bhávā naḥ sumné ántamaḥ sákhā vr̥dhé

8.013.04a     iyáṃ ta indra girvaṇo
8.013.04b     rātíḥ kṣarati sunvatáḥ
8.013.04c     mandānó asyá barhíṣo ví rājasi

8.013.05a     nūnáṃ tád indra daddhi no
8.013.05b     yát tvā sunvánta ī^́mahe
8.013.05c     rayíṃ naś citrám ā^́ bharā suvarvídam

8.013.06a     stotā^́ yát te vícarṣaṇir
8.013.06b     atipraśardháyad gíraḥ
8.013.06c     vayā^́ ivā^́nu rohate juṣánta yát

8.013.07a     pratnaváj janayā gíraḥ
8.013.07b     śr̥ṇudhī^́ jaritúr hávam
8.013.07c     máde-made vavakṣithā sukŕ̥tvane

8.013.08a     krī^́ḷanti asya sūnŕ̥tā
8.013.08b     ā^́po ná pravátā yatī^́ḥ
8.013.08c     ayā^́ dhiyā^́ yá ucyáte pátir diváḥ

8.013.09a     utó pátir yá ucyáte
8.013.09b     kr̥ṣṭīnā^́m éka íd vaśī^́
8.013.09c     namovr̥dhaír avasyúbhiḥ suté raṇa

8.013.10a     stuhí śrutáṃ vipaścítaṃ
8.013.10b     hárī yásya prasakṣíṇā
8.013.10c     gántārā dāśúṣo gr̥háṃ namasvínaḥ

8.013.11a     tūtujānó mahemate
8.013.11b     áśvebhiḥ pruṣitápsubhiḥ
8.013.11c     ā^́ yāhi yajñám āśúbhiḥ śám íd dhí te

8.013.12a     índra śaviṣṭha satpate
8.013.12b     rayíṃ gr̥ṇátsu dhāraya
8.013.12c     śrávaḥ sūríbhyo amŕ̥taṃ vasutvanám

8.013.13a     háve tvā sū^́ra údite
8.013.13b     háve madhyáṃdine diváḥ
8.013.13c     juṣāṇá indra sáptibhir na ā^́ gahi

8.013.14a     ā^́ tū^́ gahi prá tú drava
8.013.14b     mátsvā sutásya gómataḥ
8.013.14c     tántuṃ tanuṣva pūrviyáṃ yáthā vidé

8.013.15a     yác chakrā^́si parāváti
8.013.15b     yád arvāváti vr̥trahan
8.013.15c     yád vā samudré ándhaso 'vitéd asi

8.013.16a     índraṃ vardhantu no gíra
8.013.16b     índraṃ sutā^́sa índavaḥ
8.013.16c     índre havíṣmatīr víśo arāṇiṣuḥ

8.013.17a     tám íd víprā avasyávaḥ
8.013.17b     pravátvatībhir ūtíbhiḥ
8.013.17c     índraṃ kṣoṇī^́r avardhayan vayā^́ iva

8.013.18a     tríkadrukeṣu cétanaṃ
8.013.18b     devā^́so yajñám atnata
8.013.18c     tám íd vardhantu no gíraḥ sadā^́vr̥dham

8.013.19a     stotā^́ yát te ánuvrata
8.013.19b     ukthā^́ni r̥tuthā^́ dadhé
8.013.19c     śúciḥ pavāká⁺ ucyate só ádbhutaḥ

8.013.20a     tád íd rudrásya cetati
8.013.20b     yahvám pratnéṣu dhā^́masu
8.013.20c     máno yátrā ví tád dadhúr vícetasaḥ

8.013.21a     yádi me sakhyám āvára
8.013.21b     imásya pāhi ándhasaḥ
8.013.21c     yéna víśvā áti dvíṣo átārima

8.013.22a     kadā^́ ta indra girvaṇa
8.013.22b     stotā^́ bhavāti śáṃtamaḥ
8.013.22c     kadā^́ no gávye áśviye vásau dadhaḥ

8.013.23a     utá te súṣṭutā hárī
8.013.23b     vŕ̥ṣaṇā vahato rátham
8.013.23c     ajuryásya madíntamaṃ yám ī^́mahe

8.013.24a     tám īmahe puruṣṭutáṃ
8.013.24b     yahvám pratnā^́bhir ūtíbhiḥ
8.013.24c     ní barhíṣi priyé sadad ádha dvitā^́

8.013.25a     várdhasvā sú puruṣṭuta
8.013.25b     ŕ̥ṣiṣṭutābhir ūtíbhiḥ
8.013.25c     dhukṣásva pipyúṣīm íṣam ávā ca naḥ

8.013.26a     índra tvám avitéd asi
8.013.26b     itthā^́ stuvató adrivaḥ
8.013.26c     r̥tā^́d iyarmi te dhíyam manoyújam

8.013.27a     ihá tyā^́ sadhamā^́diyā
8.013.27b     yujānáḥ sómapītaye
8.013.27c     hárī indra pratádvasū abhí svara

8.013.28a     abhí svarantu yé táva
8.013.28b     rudrā^́saḥ sakṣata śríyam
8.013.28c     utó marútvatīr víśo abhí práyaḥ

8.013.29a     imā^́ asya prátūrtayaḥ
8.013.29b     padáṃ juṣanta yád diví
8.013.29c     nā^́bhā yajñásya sáṃ dadhur yáthā vidé

8.013.30a     ayáṃ dīrghā^́ya cákṣase
8.013.30b     prā^́ci prayatí adhvaré
8.013.30c     mímīte yajñám ānuṣág vicákṣiya

8.013.31a     vŕ̥ṣāyám indra te rátha
8.013.31b     utó te vŕ̥ṣaṇā hárī
8.013.31c     vŕ̥ṣā tuváṃ śatakrato vŕ̥ṣā hávaḥ

8.013.32a     vŕ̥ṣā grā^́vā vŕ̥ṣā mádo
8.013.32b     vŕ̥ṣā sómo ayáṃ sutáḥ
8.013.32c     vŕ̥ṣā yajñó yám ínvasi vŕ̥ṣā hávaḥ

8.013.33a     vŕ̥ṣā tvā vŕ̥ṣaṇaṃ huve
8.013.33b     vájriñ citrā^́bhir ūtíbhiḥ
8.013.33c     vāvántha hí prátiṣṭutiṃ vŕ̥ṣā hávaḥ

14

8.014.01a     yád indrāháṃ yáthā tuvám
8.014.01b     ī^́śīya vásva éka ít
8.014.01c     stotā^́ me góṣakhā siyāt

8.014.02a     śíkṣeyam asmai dítseyaṃ
8.014.02b     śácīpate manīṣíṇe
8.014.02c     yád aháṃ gópatiḥ siyā^́m

8.014.03a     dhenúṣ ṭa indra sūnŕ̥tā
8.014.03b     yájamānāya sunvaté
8.014.03c     gā^́m áśvam pipyúṣī duhe

8.014.04a     ná te vartā^́sti rā^́dhasa
8.014.04b     índra devó ná mártiyaḥ
8.014.04c     yád dítsasi stutó maghám

8.014.05a     yajñá índram avardhayad
8.014.05b     yád bhū^́miṃ ví ávartayat
8.014.05c     cakrāṇá opaśáṃ diví

8.014.06a     vāvr̥dhānásya te vayáṃ
8.014.06b     víśvā dhánāni jigyúṣaḥ
8.014.06c     ūtím indrā^́ vr̥ṇīmahe

8.014.07a     ví antárikṣam atiran
8.014.07b     máde sómasya rocanā^́
8.014.07c     índro yád ábhinad valám

8.014.08a     úd gā^́ ājad áṅgirobhya
8.014.08b     āvíṣ kr̥ṇván gúhā satī^́ḥ
8.014.08c     arvā^́ñcaṃ nunude valám

8.014.09a     índreṇa rocanā^́ divó
8.014.09b     dr̥̄ḷhā^́ni⁺ dr̥ṃhitā^́ni ca
8.014.09c     sthirā^́ṇi ná parāṇúde

8.014.10a     apā^́m ūrmír mádann iva
8.014.10b     stóma indrājirāyate
8.014.10c     ví te mádā arājiṣuḥ

8.014.11a     tuváṃ hí stomavárdhana
8.014.11b     índrā^́si ukthavárdhanaḥ
8.014.11c     stotr̥̄ṇā^́m utá bhadrakŕ̥t

8.014.12a     índram ít keśínā hárī
8.014.12b     somapéyāya vakṣataḥ
8.014.12c     úpa yajñáṃ surā^́dhasam

8.014.13a     apā^́m phénena námuceḥ
8.014.13b     śíra indród avartayaḥ
8.014.13c     víśvā yád ájaya spŕ̥dhaḥ

8.014.14a     māyā^́bhir utsísr̥psata
8.014.14b     índra dyā^́m ārúrukṣataḥ
8.014.14c     áva dásyūm̐r adhūnuthāḥ

8.014.15a     asunvā^́m indra saṃsádaṃ
8.014.15b     víṣūcīṃ ví anāśayaḥ
8.014.15c     somapā^́ úttaro bhávan

15

8.015.01a     tám u abhí prá gāyata
8.015.01b     puruhūtám puruṣṭutám
8.015.01c     índraṃ gīrbhís taviṣám ā^́ vivāsata

8.015.02a     yásya dvibárhaso br̥hát
8.015.02b     sáho dādhā^́ra ródasī
8.015.02c     girī^́m̐r ájrām̐ apáḥ súvar vr̥ṣatvanā^́

8.015.03a     sá rājasi puruṣṭutam̐
8.015.03b     éko vr̥trā^́ṇi jighnase
8.015.03c     índra jaítrā śravasíyā ca yántave

8.015.04a     táṃ te mádaṃ gr̥ṇīmasi
8.015.04b     vŕ̥ṣaṇam pr̥tsú sāsahím
8.015.04c     ulokakr̥tnúm† adrivo hariśríyam

8.015.05a     yéna jyótīṃṣi āyáve
8.015.05b     mánave ca vivéditha
8.015.05c     mandānó asyá barhíṣo ví rājasi

8.015.06a     tád adyā^́ cit ta ukthíno
8.015.06b     ánu ṣṭuvanti pūrváthā
8.015.06c     vŕ̥ṣapatnīr apó jayā divé-dive

8.015.07a     táva tyád indriyám br̥hát
8.015.07b     táva śúṣmam utá krátum
8.015.07c     vájraṃ śiśāti dhiṣáṇā váreṇiyam

8.015.08a     táva dyaúr indra paúṃsiyam
8.015.08b     pr̥thivī^́ vardhati śrávaḥ
8.015.08c     tuvā^́m ā^́paḥ párvatāsaś ca hinvire

8.015.09a     tuvā^́ṃ víṣṇur br̥hán kṣáyo
8.015.09b     mitró gr̥ṇāti váruṇaḥ
8.015.09c     tuvā^́ṃ śárdho madati ánu mā^́rutam

8.015.10a     tuváṃ vŕ̥ṣā jánānãm
8.015.10b     máṃhiṣṭha indra jajñiṣe
8.015.10c     satrā^́ víśvā suapatyā^́ni dadhiṣe

8.015.11a     satrā^́ tuvám puruṣṭutam̐
8.015.11b     éko vr̥trā^́ṇi tośase
8.015.11c     nā^́nyá índrāt káraṇam bhū^́ya invati

8.015.12a     yád indra manmaśás tuvā
8.015.12b     nā^́nā hávanta ūtáye
8.015.12c     asmā^́kebhir nŕ̥bhir átrā súvar jaya

8.015.13a     áraṃ kṣáyāya no mahé
8.015.13b     víśvā rūpā^́ṇi āviśán
8.015.13c     índraṃ jaítrāya harṣayā śácīpátim

16

8.016.01a     prá samrā^́jaṃ carṣaṇīnā^́m
8.016.01b     índraṃ stotā návyaṃ gīrbhíḥ
8.016.01c     náraṃ nr̥ṣā^́ham máṃhiṣṭham

8.016.02a     yásminn ukthā^́ni ráṇyanti
8.016.02b     víśvāni ca śravasíyā
8.016.02c     apā^́m ávo ná samudré

8.016.03a     táṃ suṣṭutiyā^́ vivāse
8.016.03b     jyeṣṭharā^́jam bháre kr̥tnúm
8.016.03c     mahó vājínaṃ saníbhyaḥ

8.016.04a     yásya ánūnā gabhīrā^́
8.016.04b     mádā urávas tárutrāḥ
8.016.04c     harṣumántaḥ śū^́rasātau

8.016.05a     tám íd dháneṣu hitéṣu
8.016.05b     adhivākā^́ya havante
8.016.05c     yéṣām índras té jayanti

8.016.06a     tám íc cyautnaír ā^́riyanti
8.016.06b     táṃ kr̥tébhiś carṣaṇáyaḥ
8.016.06c     eṣá índro varivaskŕ̥t

8.016.07a     índro brahmā^́ índra ŕ̥ṣir
8.016.07b     índraḥ purū^́ puruhūtáḥ
8.016.07c     mahā^́n mahī^́bhiḥ śácībhiḥ

8.016.08a     sá stómiyaḥ sá háviyaḥ
8.016.08b     satyáḥ sátvā tuvikūrmíḥ
8.016.08c     ékaś cit sánn abhíbhūtiḥ

8.016.09a     tám arkébhis táṃ sā^́mabhis
8.016.09b     táṃ gāyatraíś carṣaṇáyaḥ
8.016.09c     índraṃ vardhanti kṣitáyaḥ

8.016.10a     praṇetā^́raṃ vásyo áchā
8.016.10b     kártāraṃ jyótiḥ samátsu
8.016.10c     sāsahvā^́ṃsaṃ yudhā^́mítrān

8.016.11a     sá naḥ pápriḥ pārayāti
8.016.11b     svastí nāvā^́ puruhūtáḥ
8.016.11c     índro víśvā áti dvíṣaḥ

8.016.12a     sá tváṃ na indra vā^́jebhir
8.016.12b     daśasyā^́ ca gātuyā^́ ca
8.016.12c     áchā ca naḥ sumnáṃ neṣi

17

8.017.01a     ā^́ yāhi suṣumā^́ hí ta
8.017.01b     índra sómam píbā imám
8.017.01c     édám barhíḥ sado máma

8.017.02a     ā^́ tvā brahmayújā hárī
8.017.02b     váhatām indra keśínā
8.017.02c     úpa bráhmāṇi naḥ śr̥ṇu

8.017.03a     brahmā^́ṇas tvā vayáṃ yujā^́
8.017.03b     somapā^́m indra somínaḥ
8.017.03c     sutā^́vanto havāmahe

8.017.04a     ā^́ no yāhi sutā^́vato
8.017.04b     asmā^́kaṃ suṣṭutī^́r úpa
8.017.04c     píbā sú śiprin ándhasaḥ

8.017.05a     ā^́ te siñcāmi kukṣiyór
8.017.05b     ánu gā^́trā ví dhāvatu
8.017.05c     gr̥bhāyá jihváyā mádhu

8.017.06a     svādúṣ ṭe astu saṃsúde
8.017.06b     mádhumān tanúve táva
8.017.06c     sómaḥ śám astu te hr̥dé

8.017.07a     ayám u tvā vicarṣaṇe
8.017.07b     jánīr ivābhí sáṃvr̥taḥ
8.017.07c     prá sóma indra sarpatu

8.017.08a     tuvigrī^́vo vapódaraḥ
8.017.08b     subāhúr ándhaso máde
8.017.08c     índro vr̥trā^́ṇi jighnate

8.017.09a     índra préhi purás tuváṃ
8.017.09b     víśvasyéśāna ójasā
8.017.09c     vr̥trā^́ṇi vr̥trahañ jahi

8.017.10a     dīrghás te astu aṅkuśó
8.017.10b     yénā vásu prayáchasi
8.017.10c     yájamānāya sunvaté

8.017.11a     ayáṃ ta indra sómo
8.017.11b     nípūto ádhi barhíṣi
8.017.11c     éhīm asyá drávā píba

8.017.12a     śā^́cigo śā^́cipūjana
8.017.12b     ayáṃ ráṇāya te sutáḥ
8.017.12c     ā^́khaṇḍala prá hūyase

8.017.13a     yás te śr̥ṅgavr̥ṣo napāt
8.017.13b     práṇapāt kuṇḍapā^́yiyaḥ
8.017.13c     ní asmin dadhra ā^́ mánaḥ

8.017.14a     vā^́stoṣ pate dhruvā^́ sthū^́ṇā
8.017.14b     áṃsatraṃ somiyā^́nãm
8.017.14c     drapsó bhettā^́ purã^́ṃ śáśvatīnãm
8.017.14d     índro múnīnãṃ sákhā

8.017.15a     pŕ̥dākusānur yajató gavéṣaṇa
8.017.15b     ékaḥ sánn abhí bhū^́yasaḥ
8.017.15c     bhū^́rṇim áśvaṃ nayat tujā^́ puró gr̥bhā
8.017.15d     índraṃ sómasya pītáye

18

8.018.01a     idáṃ ha nūnám eṣãṃ
8.018.01b     sumnám bhikṣeta mártiyaḥ
8.018.01c     ādityā^́nām ápūrviyaṃ sávīmani

8.018.02a     anarvā^́ṇo hí eṣãm
8.018.02b     pánthā āditiyā^́nãm
8.018.02c     ádabdhāḥ sánti pāyávaḥ sugevŕ̥dhaḥ

8.018.03a     tát sú naḥ savitā^́ bhágo
8.018.03b     váruṇo mitró aryamā^́
8.018.03c     śárma yachantu saprátho yád ī^́mahe

8.018.04a     devébhir devi adite
8.018.04b     áriṣṭabharman ā^́ gahi
8.018.04c     smát sūríbhiḥ purupriye suśármabhiḥ

8.018.05a     té hí putrā^́so áditer
8.018.05b     vidúr dvéṣāṃsi yótave
8.018.05c     aṃhóś cid urucákrayo anehásaḥ

8.018.06a     áditir no dívā paśúm
8.018.06b     áditir náktam ádvayāḥ
8.018.06c     áditiḥ pātu áṃhasaḥ sadā^́vr̥dhā

8.018.07a     utá syā^́ no dívā matír
8.018.07b     áditir ūtiyā^́ gamat
8.018.07c     sā^́ śáṃtāti máyas karad ápa srídhaḥ

8.018.08a     utá tyā^́ daívyā bhiṣájā
8.018.08b     śáṃ naḥ karato aśvínā
8.018.08c     yuyuyā^́tām itó rápo ápa srídhaḥ

8.018.09a     śám agnír agníbhiḥ karac
8.018.09b     cháṃ nas tapatu sū^́riyaḥ
8.018.09c     śáṃ vā^́to vātu arapā^́ ápa srídhaḥ

8.018.10a     ápā^́mīvām ápa srídham
8.018.10b     ápa sedhata durmatím
8.018.10c     ā^́dityāso yuyótanā no áṃhasaḥ

8.018.11a     yuyótā śárum asmád ā^́m̐
8.018.11b     ā^́dityāsa utā^́matim
8.018.11c     ŕ̥dhag dvéṣaḥ kr̥ṇuta viśvavedasaḥ

8.018.12a     tát sú naḥ śárma yachata
8.018.12b     ā^́dityā yán múmocati
8.018.12c     énasvantaṃ cid énasaḥ sudānavaḥ

8.018.13a     yó naḥ káś cid rírikṣati
8.018.13b     rakṣastuvéna mártiyaḥ
8.018.13c     suvaíḥ ṣá évai ririṣīṣṭa yúr jánaḥ

8.018.14a     sám ít tám aghám aśnavad
8.018.14b     duḥśáṃsam mártiyaṃ ripúm
8.018.14c     yó asmatrā^́ durháṇāvām̐ úpa dvayúḥ

8.018.15a     pākatrā^́ sthana devā
8.018.15b     hr̥tsú jānītha mártiyam
8.018.15c     úpa dvayúṃ ca ádvayuṃ ca vasavaḥ

8.018.16a     ā^́ śárma párvatānãm
8.018.16b     ótā^́pã^́ṃ vr̥ṇīmahe
8.018.16c     dyā^́vākṣāmā āré asmád rápas kr̥tam

8.018.17a     té no bhadréṇa śármaṇā
8.018.17b     yuṣmā^́kaṃ nāvā^́ vasavaḥ
8.018.17c     áti víśvāni duritā^́ pipartana

8.018.18a     tucé tánāya tát sú no
8.018.18b     drā^́ghīya ā^́yu° jīváse
8.018.18c     ā^́dityāsaḥ sumahasaḥ kr̥ṇótana

8.018.19a     yajñó hīḷó vo ántara
8.018.19b     ā^́dityā ásti mr̥̄ḷáta⁺
8.018.19c     yuṣmé íd vo ápi ṣmasi sajātíye

8.018.20a     br̥hád várūtham marútāṃ
8.018.20b     deváṃ trātā^́ram aśvínā
8.018.20c     mitrám īmahe váruṇaṃ suastáye

8.018.21a     anehó mitra aryaman
8.018.21b     nr̥vád varuṇa śáṃsiyam
8.018.21c     trivárūtham maruto yanta naś chardíḥ

8.018.22a     yé cid dhí mr̥tyúbandhava
8.018.22b     ā^́dityā mánavaḥ smási
8.018.22c     prá sū^́ na ā^́yu° jīváse tiretana

19

8.019.01a     táṃ gūrdhayā súvarṇaraṃ
8.019.01b     devā^́so devám aratíṃ dadhanvire
8.019.01c     devatrā^́ havyám óhire

8.019.02a     víbhūtarātiṃ vipra citráśociṣam
8.019.02b     agním īḷiṣva yantúram
8.019.02c     asyá médhasya somiyásya sobhare
8.019.02d     prém adhvarā^́ya pū^́rviyam

8.019.03a     yájiṣṭhaṃ tvā vavr̥mahe
8.019.03b     deváṃ devatrā^́ hótāram ámartiyam
8.019.03c     asyá yajñásya sukrátum

8.019.04a     ūrjó nápātaṃ subhágaṃ sudī^́ditim
8.019.04b     agníṃ śráyiṣṭhaśociṣam⁺
8.019.04c     sá no mitrásya váruṇasya só apā^́m
8.019.04d     ā^́ sumnáṃ yakṣate diví

8.019.05a     yáḥ samídhā yá ā^́hutī
8.019.05b     yó védena dadā^́śa márto agnáye
8.019.05c     yó námasā suadhvaráḥ

8.019.06a     tásyéd árvanto raṃhayanta āśávas
8.019.06b     tásya dyumnítamaṃ yáśaḥ
8.019.06c     ná tám áṃho devákr̥taṃ kútaś caná
8.019.06d     ná mártiyakr̥taṃ naśat

8.019.07a     suagnáyo vo agníbhiḥ
8.019.07b     siyā^́ma sūno sahasa ūrjām pate
8.019.07c     suvī^́ras tuvám asmayúḥ

8.019.08a     praśáṃsamāno átithir ná mitríyo
8.019.08b     agnī^́ rátho ná védiyaḥ
8.019.08c     tuvé kṣémāso ápi santi sādhávas
8.019.08d     tuváṃ rā^́jā rayīṇã^́m

8.019.09a     só addhā^́ dāśúadhvaro
8.019.09b     ágne mártaḥ subhaga sá praśáṃsiyaḥ
8.019.09c     sá dhībhír astu sánitā

8.019.10a     yásya tvám ūrdhvó adhvarā^́ya tíṣṭhasi
8.019.10b     kṣayádvīraḥ sá sādhate
8.019.10c     só árvadbhiḥ sánitā sá vipanyúbhiḥ
8.019.10d     sá śū^́raiḥ sánitā kr̥tám

8.019.11a     yásya agnír vápur gr̥hé
8.019.11b     stómaṃ cáno dádhīta viśvávāriyaḥ
8.019.11c     havyā^́ vā véviṣad víṣaḥ

8.019.12a     víprasya vā stuvatáḥ sahaso yaho
8.019.12b     makṣū^́tamasya rātíṣu
8.019.12c     avódevam upárimartiyaṃ kr̥dhi
8.019.12d     váso vividúṣo vácaḥ

8.019.13a     yó agníṃ havyádātibhir
8.019.13b     námobhir vā sudákṣam āvívāsati
8.019.13c     girā^́ vājiráśociṣam

8.019.14a     samídhā yó níśitī dā^́śad áditiṃ
8.019.14b     dhā^́mabhir asya mártiyaḥ
8.019.14c     víśvét sá dhībhíḥ subhágo jánām̐ áti
8.019.14d     dyumnaír udná 'va° tāriṣat

8.019.15a     tád agne dyumnám ā^́ bhara
8.019.15b     yát sāsáhat sádane káṃ cid atríṇam
8.019.15c     manyúṃ jánasya dūḍhíyaḥ

8.019.16a     yéna cáṣṭe váruṇo mitró aryamā^́
8.019.16b     yéna nā^́satiyā bhágaḥ
8.019.16c     vayáṃ tát te śávasā gātuvíttamā
8.019.16d     índratvotā vidhemahi

8.019.17a     té ghéd agne suādhíyo
8.019.17b     yé tvā vipra nidadhiré nr̥cákṣasam
8.019.17c     víprāso deva sukrátum

8.019.18a     tá íd védiṃ · subhaga tá ā^́hutiṃ
8.019.18b     té sótuṃ cakrire diví
8.019.18c     tá íd vā^́jebhir jigiyur mahád dhánaṃ
8.019.18d     yé tvé kā^́maṃ nieriré

8.019.19a     bhadró no agnír ā^́huto
8.019.19b     bhadrā^́ rātíḥ subhaga bhadró adhvaráḥ
8.019.19c     bhadrā^́ utá práśastayaḥ

8.019.20a     bhadrám mánaḥ kr̥ṇuṣva vr̥tratū^́riye
8.019.20b     yénā samátsu sāsáhaḥ
8.019.20c     áva sthirā^́ tanuhi bhū^́ri śárdhatāṃ
8.019.20d     vanémā te abhíṣṭibhiḥ

8.019.21a     ī^́ḷe girā^́ mánurhitaṃ
8.019.21b     yáṃ devā^́ dūtám aratíṃ nieriré
8.019.21c     yájiṣṭhaṃ havyavā^́hanam

8.019.22a     tigmájambhāya táruṇāya rā^́jate
8.019.22b     práyo gāyasi agnáye
8.019.22c     yáḥ piṃśáte sūnŕ̥tābhiḥ suvī^́riyam
8.019.22d     agnír ghr̥tébhir ā^́hutaḥ

8.019.23a     yádī ghr̥tébhir ā^́huto
8.019.23b     vā^́śīm agnír bhárata úc ca áva ca
8.019.23c     ásura iva nirṇíjam

8.019.24a     yó havyā^́ni aírayatā mánurhito
8.019.24b     devá āsā^́ sugandhínā
8.019.24c     vívāsate vā^́riyāṇi suadhvaró
8.019.24d     hótā devó ámartiyaḥ

8.019.25a     yád agne mártiyas tuváṃ
8.019.25b     siyā^́m ahám mitramaho ámartiyaḥ
8.019.25c     sáhasaḥ sūnav āhuta

8.019.26a     ná tvā rāsīya abhíśastaye vaso
8.019.26b     ná pāpatvā^́ya santiya
8.019.26c     ná me stotā^́ amatīvā^́ ná dúrhitaḥ
8.019.26d     siyā^́d agne ná pāpáyā

8.019.27a     pitúr ná putráḥ súbhr̥to duroṇá ā^́
8.019.27b     devā^́m̐ etu prá ṇo havíḥ

8.019.28a     távāhám agna ūtíbhir
8.019.28b     nédiṣṭhābhiḥ saceya jóṣam ā^́ vaso
8.019.28c     sádā devásya mártiyaḥ

8.019.29a     táva krátvā saneyaṃ táva rātíbhir
8.019.29b     ágne táva práśastibhiḥ
8.019.29c     tuvā^́m íd āhuḥ prámatiṃ vaso máma
8.019.29d     ágne hárṣasva dā^́tave

8.019.30a     prá só agne távotíbhiḥ
8.019.30b     suvī^́rābhis tirate vā^́jabharmabhiḥ
8.019.30c     yásya tváṃ sakhyám āváraḥ

8.019.31a     táva drapsó nī^́lavān vāśá r̥tvíya
8.019.31b     índhānaḥ siṣṇav ā^́ dade
8.019.31c     tuvám mahīnā^́m uṣásām asi priyáḥ
8.019.31d     kṣapó vástuṣu rājasi

8.019.32a     tám ā^́ganma sóbharayaḥ
8.019.32b     sahásramuṣkaṃ suabhiṣṭím ávase
8.019.32c     samrā^́jaṃ trā^́sadasyavam

8.019.33a     yásya te agne anyé agnáya
8.019.33b     upakṣíto vayā^́ iva
8.019.33c     vípo ná dyumnā^́ ní yuve jánānãṃ
8.019.33d     táva kṣatrā^́ṇi vardháyan

8.019.34a     yám ādityāso adruhaḥ
8.019.34b     pāráṃ náyatha mártiyam
8.019.34c     maghónãṃ víśveṣãṃ sudānavaḥ

8.019.35a     yūyáṃ rājānaḥ káṃ cic carṣaṇīsahaḥ
8.019.35b     kṣáyantam mā^́nuṣām̐ ánu
8.019.35c     vayáṃ té vo váruṇa mítra áryaman
8.019.35d     syā^́méd r̥tásya rathíyaḥ

8.019.36a     ádān me paurukutsiyáḥ
8.019.36b     pañcāśátaṃ trasádasyur vadhū^́nām
8.019.36c     máṃhiṣṭho aryáḥ sátpatiḥ

8.019.37a     utá me prayíyor vayíyoḥ
8.019.37b     suvā^́stvā ádhi túgvani
8.019.37c     tisr̥̄ṇā^́ṃ saptatīnã^́ṃ
8.019.37d     śyāváḥ praṇayitā^́+ bhuvad
8.019.37e     vásur díyānãm pátiḥ

20

8.020.01a     ā^́ gantā mā^́ riṣaṇyata
8.020.01b     prásthāvāno mā^́pa sthātā samanyavaḥ
8.020.01c     sthirā^́ cin namayiṣṇavaḥ

8.020.02a     vīḷupavíbhir maruta r̥bhukṣaṇa
8.020.02b     ā^́ rudrāsaḥ sudītíbhiḥ
8.020.02c     iṣā^́ no adyá ā^́ gatā puruspr̥ho
8.020.02d     yajñám ā^́ sobharīyávaḥ

8.020.03a     vidmā^́ hí rudríyāṇãṃ
8.020.03b     śúṣmam ugrám marútãṃ śímīvatām
8.020.03c     víṣṇor eṣásya mīḷhúṣām

8.020.04a     ví dvīpā^́ni pā^́patan tíṣṭhad duchúnā
8.020.04b     ubhé yujanta ródasī
8.020.04c     prá dhánvāni airata śubhrakhādayo
8.020.04d     yád éjatha svabhānavaḥ

8.020.05a     ácyutā cid vo ájman ā^́
8.020.05b     nā^́nadati párvatāso vánaspátiḥ
8.020.05c     bhū^́mir yā^́meṣu rejate

8.020.06a     ámāya vo maruto yā^́tave diyaúr
8.020.06b     jíhīta úttarā br̥hát
8.020.06c     yátrā náro dédiśate tanū^́ṣu ā^́
8.020.06d     tvákṣāṃsi bāhúojasaḥ

8.020.07a     svadhā^́m ánu śríyaṃ náro
8.020.07b     máhi tveṣā^́ ámavanto vŕ̥ṣapsavaḥ
8.020.07c     váhante áhrutapsavaḥ

8.020.08a     góbhir vāṇó ajyate sóbharīṇãṃ
8.020.08b     ráthe kóśe hiraṇyáye
8.020.08c     góbandhavaḥ sujātā^́sa iṣé bhujé
8.020.08d     mahā^́nto na spárase nú

8.020.09a     práti vo vr̥ṣadañjayo
8.020.09b     vŕ̥ṣṇe śárdhāya mā^́rutāya bharadhvam
8.020.09c     havyā^́ vŕ̥ṣaprayāvaṇe

8.020.10a     vr̥ṣaṇaśvéna maruto vŕ̥ṣapsunā
8.020.10b     ráthena vŕ̥ṣanābhinā
8.020.10c     ā^́ śyenā^́so ná pakṣíṇo vŕ̥thā naro
8.020.10d     havyā^́ no vītáye gata

8.020.11a     samānám añjí eṣãṃ
8.020.11b     ví bhrājante rukmā^́so ádhi bāhúṣu
8.020.11c     dávidyutati r̥ṣṭáyaḥ

8.020.12a     tá ugrā^́so vŕ̥ṣaṇa ugrábāhavo
8.020.12b     nákiṣ ṭanū^́ṣu yetire
8.020.12c     sthirā^́ dhánvāni ā^́yudhā rátheṣu vo
8.020.12d     ánīkeṣu ádhi śríyaḥ

8.020.13a     yéṣām árṇo ná saprátho
8.020.13b     nā^́ma tveṣáṃ śáśvatām ékam íd bhujé
8.020.13c     váyo ná pítriyaṃ sáhaḥ

8.020.14a     tā^́n vandasva marútas tā^́m̐ úpa stuhi
8.020.14b     téṣãṃ hí dhúnīnãm
8.020.14c     arā^́ṇãṃ ná caramás tád eṣãṃ
8.020.14d     dānā^́ mahnā^́ tád eṣãm

8.020.15a     subhágaḥ sá va ūtíṣu
8.020.15b     ā^́sa pū^́rvāsu maruto víuṣṭiṣu
8.020.15c     yó vā nūnám utā^́sati

8.020.16a     yásya vā yūyám práti vājíno nara
8.020.16b     ā^́ havyā^́ vītáye gathá
8.020.16c     abhí ṣá dyumnaír utá vā^́jasātibhiḥ
8.020.16d     sumnā^́ vo dhūtayo naśat

8.020.17a     yáthā rudrásya sūnávo
8.020.17b     divó váśanti ásurasya vedhásaḥ
8.020.17c     yúvānas táthā íd asat

8.020.18a     yé ca árhanti marútaḥ sudā^́navaḥ
8.020.18b     smán mīḷhúṣaś cáranti yé
8.020.18c     átaś cid ā^́ na úpa vásyasā hr̥dā^́
8.020.18d     yúvāna ā^́ vavr̥dhuvam

8.020.19a     yū^́na ū ṣú náviṣṭhayā
8.020.19b     vŕ̥ṣṇaḥ pavākā^́m̐⁺ abhí sobhare girā^́
8.020.19c     gā^́ya gā^́ iva cárkr̥ṣat

8.020.20a     sāhā^́ yé sánti muṣṭihéva háviyo
8.020.20b     víśvāsu pr̥tsú hótr̥ṣu
8.020.20c     vŕ̥ṣṇaś candrā^́n ná suśrávastamān girā^́
8.020.20d     vándasva marúto áha

8.020.21a     gā^́vaś cid ghā samanyavaḥ
8.020.21b     sajātíyena marutaḥ sábandhavaḥ
8.020.21c     rihaté kakúbho mitháḥ

8.020.22a     mártaś cid vo nr̥tavo rukmavakṣasa
8.020.22b     úpa bhrātr̥tvám ā^́yati
8.020.22c     ádhi no gāta marutaḥ sádā hí va
8.020.22d     āpitvám ásti nídhruvi

8.020.23a     máruto mā^́rutasya na
8.020.23b     ā^́ bheṣajásya vahatā sudānavaḥ
8.020.23c     yūyáṃ sakhāyaḥ saptayaḥ

8.020.24a     yā^́bhiḥ síndhum ávatha yā^́bhis tū^́rvatha
8.020.24b     yā^́bhir daśasyáthā krívim
8.020.24c     máyo no bhūta ūtíbhir mayobhuvaḥ
8.020.24d     śivā^́bhir asacadviṣaḥ

8.020.25a     yát síndhau yád ásikniyāṃ
8.020.25b     yát samudréṣu marutaḥ subarhiṣaḥ
8.020.25c     yát párvateṣu bheṣajám

8.020.26a     víśvam páśyanto bibhr̥thā tanū^́ṣu ā^́
8.020.26b     ténā no ádhi vocata
8.020.26c     kṣamā^́ rápo maruta ā^́turasya na
8.020.26d     íṣkartā víhrutam púnaḥ

21

8.021.01a     vayám u tvā^́m apūrviya
8.021.01b     sthūráṃ ná kác cid bháranto avasyávaḥ
8.021.01c     vā^́je citráṃ havāmahe

8.021.02a     úpa tvā kárman ūtáye sá no yúvā
8.021.02b     ugráś cakrāma yó dhr̥ṣát
8.021.02c     tuvā^́m íd dhí avitā^́raṃ vavr̥máhe
8.021.02d     sákhāya indra sānasím

8.021.03a     ā^́ yāhi imá índavo
8.021.03b     áśvapate gópata úrvarāpate
8.021.03c     sómaṃ somapate piba

8.021.04a     vayáṃ hí tvā bándhumantam abandhávo
8.021.04b     víprāsa indra yemimá
8.021.04c     yā^́ te dhā^́māni vr̥ṣabha tébhir ā^́ gahi
8.021.04d     víśvebhiḥ sómapītaye

8.021.05a     sī^́dantas te váyo yathā
8.021.05b     góśrīte mádhau madiré vivákṣaṇe
8.021.05c     abhí tvā^́m indra nonumaḥ

8.021.06a     áchā ca tvainā^́ námasā vádāmasi
8.021.06b     kím múhuś cid ví dīdhayaḥ
8.021.06c     sánti kā^́māso harivo dadíṣ ṭuváṃ
8.021.06d     smó vayáṃ sánti no dhíyaḥ

8.021.07a     nū^́tnā íd indra te vayám
8.021.07b     ūtī^́ abhūma nahí nū^́ te adrivaḥ
8.021.07c     vidmā^́ purā^́ párīṇasaḥ

8.021.08a     vidmā^́ sakhitvám utá śūra bhojíyam
8.021.08b     ā^́ te tā^́ vajrin īmahe
8.021.08c     utó samasmin ā^́ śiśīhi no vaso
8.021.08d     vā^́je suśipra gómati

8.021.09a     yó na idám-idam purā^́
8.021.09b     prá vásya āninā^́ya tám u va stuṣe
8.021.09c     sákhāya índram ūtáye

8.021.10a     háriaśvaṃ sátpatiṃ carṣaṇīsáhaṃ
8.021.10b     sá hí ṣmā yó ámandata
8.021.10c     ā^́ tú naḥ sá vayati gávyam áśviyaṃ
8.021.10d     stotŕ̥bhyo maghávā śatám

8.021.11a     tváyā ha svid yujā^́ vayám
8.021.11b     práti śvasántaṃ vr̥ṣabha bruvīmahi
8.021.11c     saṃsthé jánasya gómataḥ

8.021.12a     jáyema kāré puruhūta kāríṇo
8.021.12b     abhí tiṣṭhema dūḍhíyaḥ
8.021.12c     nŕ̥bhir vr̥tráṃ hanyā^́ma śūśuyā^́ma ca
8.021.12d     áver indra prá ṇo dhíyaḥ

8.021.13a     abhrātr̥vyó anā^́ tuvám
8.021.13b     ánāpir indra janúṣā sanā^́d asi
8.021.13c     yudhéd āpitvám ichase

8.021.14a     nákī revántaṃ sakhiyā^́ya vindase
8.021.14b     pī^́yanti te surāśúvaḥ
8.021.14c     yadā^́ kr̥ṇóṣi nadanúṃ sám ūhasi
8.021.14d     ā^́d ít pitéva hūyase

8.021.15a     mā^́ te amājúro yathā
8.021.15b     mūrā^́sa indra sakhiyé tuvā^́vataḥ
8.021.15c     ní ṣadāma sácā suté

8.021.16a     mā^́ te godatra nír arāma rā^́dhasa
8.021.16b     índra mā^́ te gr̥hāmahi
8.021.16c     dr̥̄ḷhā^́+ cid aryáḥ prá mr̥śābhi ā^́ bhara
8.021.16d     ná te dāmā^́na ādábhe

8.021.17a     índro vā ghéd íyan magháṃ
8.021.17b     sárasvatī vā subhágā dadír vásu
8.021.17c     tuváṃ vā citra dāśúṣe

8.021.18a     cítra íd rā^́jā rājakā^́ íd anyaké
8.021.18b     yaké sárasvatīm ánu
8.021.18c     parjánya iva tatánad dhí vr̥ṣṭiyā^́
8.021.18d     sahásram ayútā dádat

22

8.022.01a     õ^́ tyám ahva ā^́ rátham
8.022.01b     adyā^́ dáṃsiṣṭham ūtáye
8.022.01c     yám aśvinā suhavā rudravartanī
8.022.01d     ā^́ sūriyā^́yai tastháthuḥ

8.022.02a     pūrvaāyúṣaṃ suhávam puruspŕ̥ham
8.022.02b     bhujyúṃ vā^́jeṣu pū^́rviyam
8.022.02c     sacanā^́vantaṃ sumatíbhiḥ sobhare
8.022.02d     vídveṣasam anehásam

8.022.03a     ihá tyā^́ purubhū^́tamā
8.022.03b     devā^́ námobhir aśvínā
8.022.03c     arvācīnā^́ sú ávase karāmahe
8.022.03d     gántārā dāśúṣo gr̥hám

8.022.04a     yuvó ráthasya pári cakrám īyata
8.022.04b     īrmā^́nyád vām iṣaṇyati
8.022.04c     asmā^́m̐ áchā sumatír vāṃ śubhas patī
8.022.04d     ā^́ dhenúr iva dhāvatu

8.022.05a     rátho yó vāṃ trivandhuró
8.022.05b     híraṇyābhīśur aśvinā
8.022.05c     pári dyā^́vāpr̥thivī^́ bhū^́ṣati śrutás
8.022.05d     téna nāsatiyā^́ gatam

8.022.06a     daśasyántā mánave pūrviyáṃ diví
8.022.06b     yávaṃ vŕ̥keṇa karṣathaḥ
8.022.06c     tā^́ vām adyá sumatíbhiḥ śubhas patī
8.022.06d     áśvinā prá stuvīmahi

8.022.07a     úpa no vājinīvasū
8.022.07b     yātám r̥tásya pathíbhiḥ
8.022.07c     yébhis tr̥kṣíṃ vr̥ṣaṇā trāsadasyavám
8.022.07d     mahé kṣatrā^́ya jínvathaḥ

8.022.08a     ayáṃ vām ádribhiḥ sutáḥ
8.022.08b     sómo narā vr̥ṣaṇvasū
8.022.08c     ā^́ yātaṃ sómapītaye
8.022.08d     píbataṃ dāśúṣo gr̥hé

8.022.09a     ā^́ hí ruhátam aśvinā
8.022.09b     ráthe kóśe hiraṇyáye vr̥ṣaṇvasū
8.022.09c     yuñjā^́thām pī^́varīr íṣaḥ

8.022.10a     yā^́bhiḥ pakthám ávatho yā^́bhir ádhriguṃ
8.022.10b     yā^́bhir babhrúṃ víjoṣasam
8.022.10c     tā^́bhir no makṣū^́ tū^́yam aśvinā^́ gatam
8.022.10d     bhiṣajyátaṃ yád ā^́turam

8.022.11a     yád ádhrigāvo ádhrigū
8.022.11b     idā^́ cid áhno aśvínā hávāmahe
8.022.11c     vayáṃ gīrbhír vipanyávaḥ

8.022.12a     tā^́bhir ā^́ yātaṃ vr̥ṣaṇópa me hávaṃ
8.022.12b     viśvápsuṃ viśvávāriyam
8.022.12c     iṣā^́ máṃhiṣṭhā purubhū^́tamā narā
8.022.12d     yā^́bhiḥ kríviṃ vāvr̥dhús tā^́bhir ā^́ gatam

8.022.13a     tā^́v idā^́ cid áhānãṃ
8.022.13b     tā^́v aśvínā vándamāna úpa bruve
8.022.13c     tā^́ u námobhir īmahe

8.022.14a     tā^́v íd doṣā^́ tā^́ uṣási śubhás pátī
8.022.14b     tā^́ yā^́man rudrávartanī
8.022.14c     mā^́ no mártāya ripáve vājinīvasū
8.022.14d     paró rudrāv áti khyatam

8.022.15a     ā^́ súgmiyāya súgmiyam
8.022.15b     prātā^́ ráthena aśvínā vā sakṣáṇī
8.022.15c     huvé pitéva sóbharī

8.022.16a     mánojavasā vr̥ṣaṇā madacyutā
8.022.16b     makṣuṃgamā^́bhir ūtíbhiḥ
8.022.16c     ārā^́ttāc cid bhũtam asmé ávase
8.022.16d     pūrvī^́bhiḥ purubhojasā

8.022.17a     ā^́ no áśvāvad aśvinā
8.022.17b     vartír yāsiṣṭam madhupātamā narā
8.022.17c     gómad dasrā híraṇyavat

8.022.18a     suprāvargáṃ suvī^́ryaṃ suṣṭhú vā^́riyam
8.022.18b     ánādhr̥ṣṭaṃ rakṣasvínā
8.022.18c     asmínn ā^́ vām āyā^́ne vājinīvasū
8.022.18d     víśvā vāmā^́ni dhīmahi

23

8.023.01a     ī^́ḷiṣvā hí pratīvíyaṃ
8.023.01b     yájasva jātávedasam
8.023.01c     cariṣṇúdhūmam ágr̥bhītaśociṣam

8.023.02a     dāmā^́naṃ viśvacarṣaṇe
8.023.02b     agníṃ viśvamano girā^́
8.023.02c     utá stuṣe víṣpardhaso ráthānãm

8.023.03a     yéṣām ābādhá r̥gmíya
8.023.03b     iṣáḥ pr̥kṣáś ca nigrábhe
8.023.03c     upavídā · váhnir vindate vásu

8.023.04a     úd asya śocír asthãd
8.023.04b     dīdiyúṣo ví ajáram
8.023.04c     tápurjambhasya sudyúto gaṇaśríyaḥ

8.023.05a     úd u tiṣṭha suadhvara
8.023.05b     stávāno deviyā^́ kr̥pā^́
8.023.05c     abhikhyā^́ bhāsā^́ br̥hatā^́ śuśukvániḥ

8.023.06a     ágne yāhí suśastíbhir
8.023.06b     havyā^́ júhvāna ānuṣák
8.023.06c     yáthā dūtó babhū^́tha havyavā^́hanaḥ

8.023.07a     agníṃ vaḥ pūrviyáṃ huve
8.023.07b     hótāraṃ carṣaṇīnã^́m
8.023.07c     tám ayā^́ vācā^́ gr̥ṇe tám u va stuṣe

8.023.08a     yajñébhir ádbhutakratuṃ
8.023.08b     yáṃ kr̥pā^́ sūdáyanta ít
8.023.08c     mitráṃ ná jáne súdhitam r̥tā^́vani

8.023.09a     r̥tā^́vānam r̥tāyavo
8.023.09b     yajñásya sā^́dhanaṃ girā^́
8.023.09c     úpo enaṃ jujuṣur námasas padé

8.023.10a     áchā no áṅgirastamaṃ
8.023.10b     yajñā^́so yantu saṃyátaḥ
8.023.10c     hótā yó ásti vikṣú ā^́ yaśástamaḥ

8.023.11a     ágne táva tyé ajara
8.023.11b     índhānāso br̥hád bhã^́ḥ
8.023.11c     áśvā iva vŕ̥ṣaṇas taviṣīyávaḥ

8.023.12a     sá tváṃ na ūrjãm pate
8.023.12b     rayíṃ rāsva suvī^́riyam
8.023.12c     prā^́va nas toké tánaye samátsu ā^́

8.023.13a     yád vā^́ u viśpátiḥ śitáḥ
8.023.13b     súprīto mánuṣo viśí
8.023.13c     víśvéd agníḥ práti rákṣāṃsi sedhati

8.023.14a     śruṣṭī^́ agne návasya me
8.023.14b     stómasya vīra viśpate
8.023.14c     ní māyínas tápuṣā rakṣáso daha

8.023.15a     ná tásya māyáyā caná
8.023.15b     ripúr īśīta mártiyaḥ
8.023.15c     yó agnáye dadā^́śa havyádātibhiḥ

8.023.16a     víaśvas tvā vasuvídam
8.023.16b     ukṣaṇyúr apriṇād° ŕ̥ṣiḥ
8.023.16c     mahó rāyé tám u tvā sám idhīmahi

8.023.17a     uśánā kāviyás tuvā
8.023.17b     ní hótāram asādayat
8.023.17c     āyajíṃ tvā mánave jātávedasam

8.023.18a     víśve hí tvā sajóṣaso
8.023.18b     devā^́so dūtám ákrata
8.023.18c     śruṣṭī^́ deva prathamó yajñíyo bhuvaḥ

8.023.19a     imáṃ ghā vīró amŕ̥taṃ
8.023.19b     dūtáṃ kr̥ṇvīta mártiyaḥ
8.023.19c     pavākáṃ⁺ kr̥ṣṇávartaniṃ víhāyasam

8.023.20a     táṃ huvema yatásrucaḥ
8.023.20b     subhā^́saṃ śukráśociṣam
8.023.20c     viśā^́m agním ajáram pratnám ī^́ḍiyam

8.023.21a     yó asmai havyádātibhir
8.023.21b     ā^́hutim márto ávidhat
8.023.21c     bhū^́ri póṣaṃ sá dhatte vīrávad yáśaḥ

8.023.22a     prathamáṃ jātávedasam
8.023.22b     agníṃ yajñéṣu pūrviyám
8.023.22c     práti srúg eti námasā havíṣmatī

8.023.23a     ā^́bhir vidhema agnáye
8.023.23b     jyáyiṣṭhābhir⁺ viaśvavát
8.023.23c     máṃhiṣṭhābhir matíbhiḥ śukráśociṣe

8.023.24a     nūnám arca víhāyase
8.023.24b     stómebhi sthūrayūpavát
8.023.24c     ŕ̥ṣe vaiyaśva dámiyāya agnáye

8.023.25a     átithim mā^́nuṣāṇãṃ
8.023.25b     sūnúṃ vánaspátīnãm
8.023.25c     víprā agním ávase pratnám īḷate

8.023.26a     mahó víśvām̐ abhí ṣató
8.023.26b     abhí havyā^́ni mā^́nuṣā
8.023.26c     ágne ní ṣatsi námasā^́dhi barhíṣi

8.023.27a     váṃsvā no vā^́riyā purú
8.023.27b     váṃsva rāyáḥ puruspŕ̥haḥ
8.023.27c     suvī^́ryasya prajā^́vato yáśasvataḥ

8.023.28a     tuváṃ varo suṣā^́maṇe
8.023.28b     ágne jánāya codaya
8.023.28c     sádā vaso rātíṃ yaviṣṭha śáśvate

8.023.29a     tuváṃ hí supratū^́r ási
8.023.29b     tuváṃ no gómatīr íṣaḥ
8.023.29c     mahó rāyáḥ sātím agne ápā vr̥dhi

8.023.30a     ágne tuváṃ yaśā^́ asi
8.023.30b     ā^́ mitrā^́váruṇā vaha
8.023.30c     r̥tā^́vānā samrā^́jā pūtádakṣasā

24

8.024.01a     sákhāya ā^́ śiṣāmahi
8.024.01b     bráhma índrāya vajríṇe
8.024.01c     stuṣá ū ṣú vo nŕ̥tamāya dhr̥ṣṇáve

8.024.02a     śávasā hí ási śrutó
8.024.02b     vr̥trahátyena vr̥trahā^́
8.024.02c     maghaír maghóno áti śūra dāśasi

8.024.03a     sá na stávāna ā^́ bhara
8.024.03b     rayíṃ citráśravastamam
8.024.03c     nireké cid yó harivo vásur dadíḥ

8.024.04a     ā^́ nirekám utá priyám
8.024.04b     índra dárṣi jánānãm
8.024.04c     dhr̥ṣatā^́ dhr̥ṣṇo stávamāna ā^́ bhara

8.024.05a     ná te savyáṃ ná dákṣiṇaṃ
8.024.05b     hástaṃ varanta āmúraḥ
8.024.05c     ná paribā^́dho harivo gáviṣṭiṣu

8.024.06a     ā^́ tvā góbhir iva vrajáṃ
8.024.06b     gīrbhír r̥ṇomi adrivaḥ
8.024.06c     ā^́ smā kā^́maṃ jaritúr ā^́ mánaḥ pr̥ṇa

8.024.07a     víśvāni viśvámanaso
8.024.07b     dhiyā^́ no vr̥trahantama
8.024.07c     úgra praṇetar ádhi ṣū^́ vaso gahi

8.024.08a     vayáṃ te asyá vr̥trahan
8.024.08b     vidyā^́ma śūra návyasaḥ
8.024.08c     váso spārhásya puruhūta rā^́dhasaḥ

8.024.09a     índra yáthā hí ásti te
8.024.09b     áparītaṃ nr̥to śávaḥ
8.024.09c     ámr̥ktā rātíḥ puruhūta dāśúṣe

8.024.10a     ā^́ vr̥ṣasva mahāmaha
8.024.10b     mahé nr̥tama rā^́dhase
8.024.10c     dr̥̄ḷháś⁺ cid dr̥hya maghavan magháttaye

8.024.11a     nū^́ anyátrā cid adrivas
8.024.11b     tuván no jagmur āśásaḥ
8.024.11c     mághavañ chagdhí táva tán na ūtíbhiḥ

8.024.12a     nahí aṅgá nr̥to tuvád
8.024.12b     anyáṃ vindā^́mi rā^́dhase
8.024.12c     rāyé dyumnā^́ya śávase ca girvaṇaḥ

8.024.13a     éndum índrāya siñcata
8.024.13b     píbāti somiyám mádhu
8.024.13c     prá rā^́dhasā codayāte mahitvanā^́

8.024.14a     úpo hárīṇãm pátiṃ
8.024.14b     dákṣam pr̥ñcántam abravam
8.024.14c     nūnáṃ śrudhi stuvató aśviyásya

8.024.15a     nahí aṅgá purā^́ caná
8.024.15b     jajñé vīrátaras tuvát
8.024.15c     nákī rāyā^́ ná eváthā ná bhandánā

8.024.16a     éd u mádhvo madíntaraṃ
8.024.16b     siñcá vādhvaryo ándhasaḥ
8.024.16c     evā^́ hí vīrá stávate sadā^́vr̥dhaḥ

8.024.17a     índra sthātar harīṇãṃ
8.024.17b     nákiṣ ṭe pūrviyástutim
8.024.17c     úd ānaṃśa · śávasā ná bhandánā

8.024.18a     táṃ vo vā^́jānãm pátim
8.024.18b     áhūmahi śravasyávaḥ
8.024.18c     áprāyubhir yajñébhir vāvr̥dhéniyam

8.024.19a     éto nu índraṃ stávāma
8.024.19b     sákhāya stómiyaṃ náram
8.024.19c     kr̥ṣṭī^́r yó víśvā abhí ásti éka ít

8.024.20a     ágorudhāya gavíṣe
8.024.20b     dyukṣā^́ya dásmiyaṃ vácaḥ
8.024.20c     ghr̥tā^́t svā^́dīyo mádhunaś ca vocata

8.024.21a     yásyā^́mitāni vīríyā
8.024.21b     ná rā^́dhaḥ párietave
8.024.21c     jyótir ná víśvam abhí ásti dákṣiṇā

8.024.22a     stuhí índraṃ viaśvavád
8.024.22b     ánūrmiṃ vājínaṃ yámam
8.024.22c     aryó gáyam máṃhamānaṃ ví dāśúṣe

8.024.23a     evā^́ nūnám úpa stuhi
8.024.23b     vaíyaśva daśamáṃ návam
8.024.23c     súvidvāṃsaṃ carkŕ̥tyaṃ caráṇīnãm

8.024.24a     vétthā hí nírr̥tīnãṃ
8.024.24b     vájrahasta parivŕ̥jam
8.024.24c     áhar-ahaḥ śundhyúḥ paripádām iva

8.024.25a     tád indra áva ā^́ bhara
8.024.25b     yénā daṃsiṣṭha kŕ̥tvane
8.024.25c     dvitā^́ kútsāya śiśnatho ní codaya

8.024.26a     tám u tvā nūnám īmahe
8.024.26b     návyaṃ daṃsiṣṭha sányase
8.024.26c     sá tváṃ no víśvā abhímātīḥ sakṣáṇiḥ

8.024.27a     yá ŕ̥kṣād áṃhaso mucád
8.024.27b     yó vā^́ryāt saptá síndhuṣu
8.024.27c     vádhar dāsásya tuvinr̥mṇa nīnamaḥ

8.024.28a     yáthā varo suṣā^́maṇe
8.024.28b     saníbhya ā^́vaho rayím
8.024.28c     víaśvebhyaḥ subhage vājinīvati

8.024.29a     ā^́ nāriyásya dákṣiṇā
8.024.29b     víaśvām̐ etu somínaḥ
8.024.29c     sthūráṃ ca rā^́dhaḥ śatávat sahásravat

8.024.30a     yát tvā pr̥chā^́d ījānáḥ
8.024.30b     kuhayā^́ kuhayākr̥te
8.024.30c     eṣó ápaśrito való
8.024.30d     gomatī^́m áva tiṣṭhati

25

8.025.01a     tā^́ vāṃ víśvasya gopã^́
8.025.01b     devā^́ devéṣu yajñíyā
8.025.01c     r̥tā^́vānā yajase pūtádakṣasā

8.025.02a     mitrā^́ tánā ná rathíyā
8.025.02b     váruṇo yáś ca sukrátuḥ
8.025.02c     sanā^́t sujātā^́ tánayā dhr̥távratā

8.025.03a     tā^́ mātā^́ viśvávedasā
8.025.03b     asuryā^̀ya prámahasā
8.025.03c     mahī^́ jajāna áditir r̥tā^́varī

8.025.04a     mahā^́ntā mitrā^́váruṇā
8.025.04b     samrā^́jā devā^́v ásurā
8.025.04c     r̥tā^́vānāv r̥tám ā^́ ghoṣato br̥hát

8.025.05a     nápātā śávaso maháḥ
8.025.05b     sūnū^́ dákṣasya sukrátū
8.025.05c     sr̥prádānū iṣó vā^́stu ádhi kṣitaḥ

8.025.06a     sáṃ yā^́ dā^́nūni yemáthur
8.025.06b     diviyā^́ḥ pā^́rthivīr íṣaḥ
8.025.06c     nábhasvatīr ā^́ vāṃ carantu vr̥ṣṭáyaḥ

8.025.07a     ádhi yā^́ br̥ható divó
8.025.07b     abhí yūthéva páśyataḥ
8.025.07c     r̥tā^́vānā samrā^́jā námase hitā^́

8.025.08a     r̥tā^́vānā ní ṣedatuḥ
8.025.08b     sā^́mrājiyāya sukrátū
8.025.08c     dhr̥távratā kṣatríyā kṣatrám āśatuḥ

8.025.09a     akṣṇáś cid gātuvíttara
8.025.09b     anulbaṇéna cákṣasā
8.025.09c     ní cin miṣántā nicirā^́ ní cikyatuḥ

8.025.10a     utá no devī^́ áditir
8.025.10b     uruṣyátāṃ nā^́satiyā
8.025.10c     uruṣyántu marúto vr̥ddháśavasaḥ

8.025.11a     té no nāvám uruṣyata
8.025.11b     dívā náktaṃ sudānavaḥ
8.025.11c     áriṣyanto ní pāyúbhiḥ sacemahi

8.025.12a     ághnate víṣṇave vayám
8.025.12b     áriṣyantaḥ sudā^́nave
8.025.12c     śrudhí svayāvan sindho pūrvácittaye

8.025.13a     tád vā^́riyaṃ vr̥ṇīmahe
8.025.13b     váriṣṭhaṃ gopayátiyam
8.025.13c     mitró yát pā^́nti váruṇo yád aryamā^́

8.025.14a     utá naḥ síndhur apã^́ṃ
8.025.14b     tán marútas tád aśvínā
8.025.14c     índro víṣṇur mīḍhuvā^́ṃsaḥ sajóṣasaḥ

8.025.15a     té hí ṣmā vanúṣo náro
8.025.15b     abhímātiṃ káyasya cit
8.025.15c     tigmáṃ ná kṣódaḥ pratighnánti bhū^́rṇayaḥ

8.025.16a     ayám éka itthā^́ purú
8.025.16b     urú caṣṭe ví viśpátiḥ
8.025.16c     tásya vratā^́ni ánu vaś carāmasi

8.025.17a     ánu pū^́rvāṇi okíyā
8.025.17b     sāmrājiyásya saścima
8.025.17c     mitrásya vratā^́ váruṇasya dīrghaśrút

8.025.18a     pári yó raśmínā divó
8.025.18b     ántān mamé pr̥thiviyā^́ḥ
8.025.18c     ubhé ā^́ paprau ródasī mahitvā^́

8.025.19a     úd u ṣyá śaraṇé divó
8.025.19b     jyótir ayaṃsta sū^́riyaḥ
8.025.19c     agnír ná śukráḥ samidhāná ā^́hutaḥ

8.025.20a     váco dīrgháprasadmani
8.025.20b     ī^́śe vā^́jasya gómataḥ
8.025.20c     ī^́śe hí pitvó aviṣásya dāváne

8.025.21a     tát sū^́ryaṃ ródasī ubhé
8.025.21b     doṣā^́ vástor úpa bruve
8.025.21c     bhojéṣu asmā^́m̐ abhí úc carā sádā

8.025.22a     r̥jrám ukṣaṇiyā^́yane
8.025.22b     rajatáṃ hárayāṇe
8.025.22c     ráthaṃ yuktám asanāma suṣā^́maṇi

8.025.23a     tā^́ me áśviyānãṃ
8.025.23b     hárīṇãṃ nitóśanā
8.025.23c     utó nú kŕ̥tviyānãṃ nr̥vā^́hasā

8.025.24a     smádabhīśū káśāvantā
8.025.24b     víprā náviṣṭhayā matī^́
8.025.24c     mahó vājínāv árvantā sácāsanam

26

8.026.01a     yuvór u ṣū^́ ráthaṃ huve
8.026.01b     sadhástutyāya sūríṣu
8.026.01c     átūrtadakṣā vr̥ṣaṇā vr̥ṣaṇvasū

8.026.02a     yuváṃ varo suṣā^́maṇe
8.026.02b     mahé táne nāsatiyā
8.026.02c     ávobhir yātho vr̥ṣaṇā vr̥ṣaṇvasū

8.026.03a     tā^́ vām adyá havāmahe
8.026.03b     havyébhir vājinīvasū
8.026.03c     pūrvī^́r iṣá iṣáyantāv áti kṣapáḥ

8.026.04a     ā^́ vāṃ vā^́hiṣṭho aśvinā
8.026.04b     rátho yātu śrutó narā
8.026.04c     úpa stómān turásya darśathaḥ śriyé

8.026.05a     juhurāṇā^́ cid aśvinā
8.026.05b     ā^́ manyethāṃ vr̥ṣaṇvasū
8.026.05c     yuváṃ hí rudrā párṣatho áti dvíṣaḥ

8.026.06a     dasrā^́ hí víśvam ānuṣáṅ
8.026.06b     makṣū^́bhiḥ paridī^́yathaḥ
8.026.06c     dhiyaṃjinvā^́ mádhuvarṇā śubhás pátī

8.026.07a     úpa no yātam aśvinā
8.026.07b     rāyā^́ viśvapúṣā sahá
8.026.07c     maghávānā suvī^́rāv ánapacyutā

8.026.08a     ā^́ me asyá pratīvíyam
8.026.08b     índranāsatiyā gatam
8.026.08c     devā^́ devébhir adyá sacánastamā

8.026.09a     vayáṃ hí vāṃ hávāmaha
8.026.09b     ukṣaṇyánto viaśvavát
8.026.09c     sumatíbhir úpa viprāv ihā^́ gatam

8.026.10a     aśvínā sú r̥ṣe stuhi
8.026.10b     kuvít te śrávato hávam
8.026.10c     nédīyasaḥ kūḷayātaḥ paṇī^́m̐r utá

8.026.11a     vaiyaśvásya śrutaṃ narā
8.026.11b     utó me asyá vedathaḥ
8.026.11c     sajóṣasā váruṇo mitró aryamā^́

8.026.12a     yuvā^́dattasya dhiṣṇiyā
8.026.12b     yuvā^́nītasya sūríbhiḥ
8.026.12c     áhar-ahar vr̥ṣaṇa máhya° śikṣatam

8.026.13a     yó vāṃ yajñébhir ā^́vr̥to
8.026.13b     ádhivastrā vadhū^́r iva
8.026.13c     saparyántā śubhé cakrāte aśvínā

8.026.14a     yó vām uruvyácastamaṃ
8.026.14b     cíketati nr̥pā^́yiyam
8.026.14c     vartír aśvinā pári yātam asmayū^́

8.026.15a     asmábhyaṃ sú vr̥ṣaṇvasū
8.026.15b     yātáṃ vartír nr̥pā^́yiyam
8.026.15c     viṣudrúheva yajñám ūhathur girā^́

8.026.16a     vā^́hiṣṭho vāṃ hávānãṃ
8.026.16b     stómo dūtó huvan narā
8.026.16c     yuvā^́bhyām bhūtu aśvinā

8.026.17a     yád adó divó arṇavá
8.026.17b     iṣó vā mádatho gr̥hé
8.026.17c     śrutám ín me amartiyā

8.026.18a     utá syā^́ śvetayā^́varī
8.026.18b     vā^́hiṣṭhā vāṃ nadī^́nãm
8.026.18c     síndhur híraṇyavartaniḥ

8.026.19a     smád etáyā sukīrtiyā^́
8.026.19b     áśvinā śvetáyā dhiyā^́
8.026.19c     váhethe śubhrayāvānā

8.026.20a     yukṣvā^́ hí tváṃ rathāsáhā
8.026.20b     yuvásva póṣiyā vaso
8.026.20c     ā^́n no vāyo mádhu piba
8.026.20d     asmā^́kaṃ sávanā^́ gahi

8.026.21a     táva vāyav r̥taspate
8.026.21b     tváṣṭur jāmātar adbhuta
8.026.21c     ávāṃsi ā^́ vr̥ṇīmahe

8.026.22a     tváṣṭur jā^́mātaraṃ vayám
8.026.22b     ī^́śānaṃ rāyá īmahe
8.026.22c     sutā^́vanto vāyúṃ dyumnā^́ jánāsaḥ

8.026.23a     vā^́yo yāhí śivā^́ divó
8.026.23b     váhasvā sú suáśviyam
8.026.23c     váhasva maháḥ pr̥thupákṣasā ráthe

8.026.24a     tuvā^́ṃ hí supsárastamaṃ
8.026.24b     nr̥ṣádaneṣu hūmáhe
8.026.24c     grā^́vāṇaṃ ná áśvapr̥ṣṭham maṃhánā

8.026.25a     sá tváṃ no deva mánasā
8.026.25b     vā^́yo mandānó agriyáḥ
8.026.25c     kr̥dhí vā^́jām̐ apó dhíyaḥ

27

8.027.01a     agnír ukthé puróhito
8.027.01b     grā^́vāṇo barhír adhvaré
8.027.01c     r̥cā^́ yāmi marúto bráhmaṇas pátiṃ
8.027.01d     devā^́m̐ ávo váreṇiyam

8.027.02a     ā^́ paśúṃ gāsi pr̥thivī^́ṃ vánaspátīn
8.027.02b     uṣā^́sā náktam óṣadhīḥ
8.027.02c     víśve ca no vasavo viśvavedaso
8.027.02d     dhīnā^́m bhūta prāvitā^́raḥ

8.027.03a     prá sū^́ na etu adhvaró
8.027.03b     agnā^́ devéṣu pūrviyáḥ
8.027.03c     ādityéṣu prá váruṇe dhr̥távrate
8.027.03d     marútsu viśvábhānuṣu

8.027.04a     víśve hí ṣmā mánave viśvávedaso
8.027.04b     bhúvan vr̥dhé riśā^́dasaḥ
8.027.04c     áriṣṭebhiḥ pāyúbhir viśvavedaso
8.027.04d     yántā no avr̥káṃ chardíḥ

8.027.05a     ā^́ no adyá sámanaso
8.027.05b     gántā víśve sajóṣasaḥ
8.027.05c     r̥cā^́ girā^́ máruto dévi ádite
8.027.05d     sádane pástiye mahi

8.027.06a     abhí priyā^́ maruto yā^́ vo áśviyā
8.027.06b     havyā^́ mitra prayāthána
8.027.06c     ā^́ barhír índro váruṇas turā^́ nára
8.027.06d     ādityā^́saḥ sadantu naḥ

8.027.07a     vayáṃ vo vr̥ktábarhiṣo
8.027.07b     hitáprayasa ānuṣák
8.027.07c     sutásomāso varuṇa havāmahe
8.027.07d     manuṣvád iddháagnayaḥ

8.027.08a     ā^́ prá yāta máruto víṣṇo áśvinā
8.027.08b     pū^́ṣan mā^́kīnayā dhiyā^́
8.027.08c     índra ā^́ yātu prathamáḥ saniṣyúbhir
8.027.08d     vŕ̥ṣā yó vr̥trahā^́ gr̥ṇé

8.027.09a     ví no devāso adruho
8.027.09b     áchidraṃ śárma yachata
8.027.09c     ná yád dūrā^́d vasavo nū^́ cid ántito
8.027.09d     várūtham ādadhárṣati

8.027.10a     ásti hí vaḥ sajātíyaṃ riśādaso
8.027.10b     dévāso ásti ā^́piyam
8.027.10c     prá ṇaḥ pū^́rvasmai suvitā^́ya vocata
8.027.10d     makṣū^́ sumnā^́ya návyase

8.027.11a     idā^́ hí va úpastutim
8.027.11b     idā^́ vāmásya bhaktáye
8.027.11c     úpa vo viśvavedaso namasyúr ā^́m̐
8.027.11d     ásr̥kṣi ániyām iva

8.027.12a     úd u ṣyá vaḥ savitā^́ supraṇītayo
8.027.12b     ásthād ūrdhvó váreṇiyaḥ
8.027.12c     ní dvipā^́daś · cátuṣpādo arthíno
8.027.12d     áviśran patayiṣṇávaḥ

8.027.13a     deváṃ-devaṃ vo ávase
8.027.13b     deváṃ-devam abhíṣṭaye
8.027.13c     deváṃ-devaṃ huvema vā^́jasātaye
8.027.13d     gr̥ṇánto deviyā^́ dhiyā^́

8.027.14a     devā^́so hí ṣmā mánave sámanyavo
8.027.14b     víśve sākáṃ sárātayaḥ
8.027.14c     té no adyá té aparáṃ tucé tú no
8.027.14d     bhávantu varivovídaḥ

8.027.15a     prá vaḥ śaṃsāmi adruhaḥ
8.027.15b     saṃsthá úpastutīnãm
8.027.15c     ná táṃ dhūrtír varuṇa mitra mártiyaṃ
8.027.15d     yó vo dhā^́mabhyo ávidhat

8.027.16a     prá sá kṣáyaṃ tirate ví mahī^́r íṣo
8.027.16b     yó vo várāya dā^́śati
8.027.16c     prá prajā^́bhir jāyate dhármaṇas pári
8.027.16d     áriṣṭaḥ sárva edhate

8.027.17a     r̥té sá vindate yudháḥ
8.027.17b     sugébhir yāti ádhvanaḥ
8.027.17c     aryamā^́ mitró váruṇaḥ sárātayo
8.027.17d     yáṃ trā^́yante sajóṣasaḥ

8.027.18a     ájre cid asmai kr̥ṇuthā niáñcanaṃ
8.027.18b     durgé cid ā^́ susaraṇám
8.027.18c     eṣā^́ cid asmād aśániḥ paró nú sā^́
8.027.18d     ásredhantī ví naśyatu

8.027.19a     yád adyá sū^́rya udyatí
8.027.19b     príyakṣatrā r̥táṃ dadhá
8.027.19c     yán nimrúci prabúdhi viśvavedaso
8.027.19d     yád vā madhyáṃdine diváḥ

8.027.20a     yád vābhipitvé asurā r̥táṃ yaté
8.027.20b     chardír yemá ví dāśúṣe
8.027.20c     vayáṃ tád vo vasavo viśvavedasa
8.027.20d     úpa stheyāma mádhya ā^́

8.027.21a     yád adyá sū^́ra údite
8.027.21b     yán madhyáṃdina ātúci
8.027.21c     vāmáṃ dhatthá mánave viśvavedaso
8.027.21d     júhvānāya prácetase

8.027.22a     vayáṃ tád vaḥ samrāja ā^́ vr̥ṇīmahe
8.027.22b     putró ná bahupā^́yiyam
8.027.22c     aśyā^́ma tád ādityā júhvato havír
8.027.22d     yéna vásyo 'náśāmahai

28

8.028.01a     yé triṃśáti tráyas paró
8.028.01b     devā^́so barhír ā^́sadan
8.028.01c     vidánn áha dvitā^́sanan

8.028.02a     váruṇo mitró aryamā^́
8.028.02b     smádrātiṣāco agnáyaḥ
8.028.02c     pátnīvanto váṣaṭkr̥tāḥ

8.028.03a     té no gopā^́ apāciyā^́s
8.028.03b     tá údak tá itthā^́ níak
8.028.03c     purástāt sárvayā viśā^́

8.028.04a     yáthā váśanti devã^́s táthéd asat
8.028.04b     tád eṣāṃ nákir ā^́ minat
8.028.04c     árāvā caná mártiyaḥ

8.028.05a     saptānā^́ṃ saptá r̥ṣṭáyaḥ
8.028.05b     saptá dyumnā^́ni eṣãm
8.028.05c     saptó ádhi śríyo dhire

29

8.029.01a     babhrúr éko víṣuṇaḥ sūnáro yúvā
8.029.01b     añjí aṅkte hiraṇyáyam

8.029.02a     yónim éka ā^́ sasāda diyótano
8.029.02b     antár devéṣu médhiraḥ

8.029.03a     vā^́śīm éko bibharti hásta āyasī^́m
8.029.03b     antár devéṣu nídhruviḥ

8.029.04a     vájram éko bibharti hásta ā^́hitaṃ
8.029.04b     téna vr̥trā^́ṇi jighnate

8.029.05a     tigmám éko bibharti hásta ā^́yudhaṃ
8.029.05b     śúcir ugró jálāṣabheṣajaḥ

8.029.06a     pathá ékaḥ pipāya° táskaro yathām̐
8.029.06b     eṣá veda nidhīnã^́m

8.029.07a     trī^́ṇi éka urugāyó ví cakrame
8.029.07b     yátra devā^́so mádanti

8.029.08a     víbhir duvā^́ carata ékayā sahá
8.029.08b     prá pravāséva vasataḥ

8.029.09a     sádo duvā^́ cakrate° upamā^́ diví
8.029.09b     samrā^́jā sarpírāsutī

8.029.10a     árcanta éke máhi sā^́ma manvata
8.029.10b     téna sū^́ryam arocayan

30

8.030.01a     nahí vo ásti arbhakó
8.030.01b     dévāso ná kumārakáḥ
8.030.01c     víśve satómahānta ít

8.030.02a     íti stutā^́so asathā riśādaso
8.030.02b     yé sthá tráyaś ca triṃśác ca
8.030.02c     mánor devā yajñiyāsaḥ

8.030.03a     té nas trādhvaṃ té avata
8.030.03b     tá u no ádhi vocata
8.030.03c     mā^́ naḥ patháḥ pítriyān mānavā^́d ádhi
8.030.03d     dūráṃ naiṣṭa parāvátaḥ

8.030.04a     yé devāsa ihá sthána
8.030.04b     víśve vaiśvānarā^́ utá
8.030.04c     asmábhyaṃ śárma saprátho
8.030.04d     gáve áśvāya yachata

31

8.031.01a     yó yájāti yájāta ít
8.031.01b     sunávac ca pácāti ca
8.031.01c     brahméd índrasya cākanat

8.031.02a     puroḷā^́śaṃ yó asmai
8.031.02b     sómaṃ rárata āśíram
8.031.02c     pā^́d ít táṃ śakró áṃhasaḥ

8.031.03a     tásya dyumā^́m̐ asad rátho
8.031.03b     devájūtaḥ sá śūśuvat
8.031.03c     víśvā vanvánn amitríyā

8.031.04a     ásya prajā^́vatī gr̥hé
8.031.04b     ásaścantī divé-dive
8.031.04c     íḷā dhenumátī duhe

8.031.05a     yā^́ dámpatī sámanasā
8.031.05b     sunutá ā^́ ca dhā^́vataḥ
8.031.05c     dévāso nítyayāśírā

8.031.06a     práti prāśavíyām̐ itaḥ
8.031.06b     samyáñcā barhír āśate°
8.031.06c     ná tā^́ vā^́jeṣu vāyataḥ

8.031.07a     ná devā^́nām ápi hnutaḥ
8.031.07b     sumatíṃ ná jugukṣataḥ
8.031.07c     śrávo br̥hád vivāsataḥ

8.031.08a     putríṇā tā^́ kumāríṇā
8.031.08b     víśvam ā^́yur ví aśnutaḥ
8.031.08c     ubhā^́ híraṇyapeśasā

8.031.09a     vītíhotrā kr̥tádvasū
8.031.09b     daśasyántāmŕ̥tāya kám
8.031.09c     sám ū^́dho romaśáṃ hato
8.031.09d     devéṣu kr̥ṇuto dúvaḥ

8.031.10a     ā^́ śárma párvatānãṃ
8.031.10b     vr̥ṇīmáhe nadī^́nãm
8.031.10c     ā^́ víṣṇoḥ sacābhúvaḥ

8.031.11a     aítu pūṣā^́ rayír bhágaḥ
8.031.11b     suastí sarvadhā^́tamaḥ
8.031.11c     urúr ádhvā suastáye

8.031.12a     arámatir anarváṇo
8.031.12b     víśvo devásya mánasā
8.031.12c     ādityā^́nām anehá ít

8.031.13a     yáthā no mitró aryamā^́
8.031.13b     váruṇaḥ sánti gopã^́ḥ
8.031.13c     sugā^́ r̥tásya pánthãḥ

8.031.14a     agníṃ vaḥ pūrviyáṃ girā^́
8.031.14b     devám īḷe vásūnãm
8.031.14c     saparyántaḥ purupriyám
8.031.14d     mitráṃ ná kṣetrasā^́dhasam

8.031.15a     makṣū^́ devávato ráthaḥ
8.031.15b     śū^́ro vā pr̥tsú kā^́su cit
8.031.15c     devā^́nãṃ yá ín máno
8.031.15d     yájamāna íyakṣati
8.031.15e     abhī^́d áyajvano bhuvat

8.031.16a     ná yajamāna riṣyasi
8.031.16b     ná sunvāna ná devayo
8.031.16c     devā^́nãṃ yá ín máno
8.031.16d     yájamāna íyakṣati
8.031.16e     abhī^́d áyajvano bhuvat

8.031.17a     nákiṣ ṭáṃ kármaṇā naśan
8.031.17b     ná prá yoṣan ná yoṣati
8.031.17c     devā^́nãṃ yá ín máno
8.031.17d     yájamāna íyakṣati
8.031.17e     abhī^́d áyajvano bhuvat

8.031.18a     ásad átra suvī^́riyam
8.031.18b     utá tyád āśuáśviyam
8.031.18c     devā^́nãṃ yá ín máno
8.031.18d     yájamāna íyakṣati
8.031.18e     abhī^́d áyajvano bhuvat

32

8.032.01a     prá kr̥tā^́ni r̥jīṣíṇaḥ
8.032.01b     káṇvā índrasya gā^́thayā
8.032.01c     máde sómasya vocata

8.032.02a     yáḥ sŕ̥bindam ánarśanim
8.032.02b     pípruṃ dāsám ahīśúvam
8.032.02c     vádhīd ugró riṇánn apáḥ

8.032.03a     ní árbudasya viṣṭápaṃ
8.032.03b     varṣmā^́ṇam br̥hatás tira
8.032.03c     kr̥ṣé tád indra paúṃsiyam

8.032.04a     práti śrutā^́ya vo dhr̥ṣát
8.032.04b     tū^́rṇāśaṃ ná girér ádhi
8.032.04c     huvé suśiprám ūtáye

8.032.05a     sá gór áśvasya ví vrajám
8.032.05b     mandānáḥ somiyébhiyaḥ
8.032.05c     púraṃ ná śūra darṣasi

8.032.06a     yádi me rāráṇaḥ sutá
8.032.06b     ukthé vā dádhase cánaḥ
8.032.06c     ārā^́d úpa svadhā^́ gahi

8.032.07a     vayáṃ ghā te ápi ṣmasi
8.032.07b     stotā^́ra indra girvaṇaḥ
8.032.07c     tuváṃ no jinva somapāḥ

8.032.08a     utá naḥ pitúm ā^́ bhara
8.032.08b     saṃrarāṇó ávikṣitam
8.032.08c     mághavan bhū^́ri te vásu

8.032.09a     utá no gómatas kr̥dhi
8.032.09b     híraṇyavato aśvínaḥ
8.032.09c     íḷābhiḥ sáṃ rabhemahi

8.032.10a     br̥bádukthaṃ havāmahe
8.032.10b     sr̥prákarasnam ūtáye
8.032.10c     sā^́dhu kr̥ṇvántam ávase

8.032.11a     yáḥ saṃsthé cic chatákratur
8.032.11b     ā^́d īṃ kr̥ṇóti vr̥trahā^́
8.032.11c     jaritŕ̥bhyaḥ purūvásuḥ

8.032.12a     sá naḥ śakráś cid ā^́ śakad
8.032.12b     dā^́navām̐ antarābharáḥ
8.032.12c     índro víśvābhir ūtíbhiḥ

8.032.13a     yó rāyó avánir mahā^́n
8.032.13b     supāráḥ sunvatáḥ sákhā
8.032.13c     tám índram abhí gāyata

8.032.14a     āyantā^́ram máhi sthirám
8.032.14b     pŕ̥tanāsu śravojítam
8.032.14c     bhū^́rer ī^́śānam ójasā

8.032.15a     nákir asya śácīnãṃ
8.032.15b     niyantā^́ sūnŕ̥tānãm
8.032.15c     nákir vaktā^́ ná dād íti

8.032.16a     ná nūnám brahmáṇām r̥ṇám
8.032.16b     prāśūnā^́m asti sunvatā^́m
8.032.16c     ná sómo apratā^́ pape

8.032.17a     pánya íd úpa gāyata
8.032.17b     pánya ukthā^́ni śaṃsata
8.032.17c     bráhmā kr̥ṇota pánya ít

8.032.18a     pánya ā^́ dardirac chatā^́
8.032.18b     sahásrā vājī^́ ávr̥taḥ
8.032.18c     índro yó yájvano vr̥dháḥ

8.032.19a     ví ṣū^́ cara svadhā^́ ánu
8.032.19b     kr̥ṣṭīnā^́m ánu āhúvaḥ
8.032.19c     índra píba sutā^́nãm

8.032.20a     píba svádhainavānãm
8.032.20b     utá yás túgriye sácā
8.032.20c     utā^́yám indra yás táva

8.032.21a     átīhi manyuṣāvíṇaṃ
8.032.21b     suṣuvā^́ṃsam upā^́raṇe
8.032.21c     imáṃ rātáṃ sutám piba

8.032.22a     ihí tisráḥ parāváta
8.032.22b     ihí páñca jánām̐ áti
8.032.22c     dhénā indrāvacā^́kaśat

8.032.23a     sū^́ryo raśmíṃ yáthā sr̥ja
8.032.23b     ā^́ tvā yachantu me gíraḥ
8.032.23c     nimnám ā^́po ná sadhríak

8.032.24a     ádhvaryav ā^́ tú hí ṣiñcá
8.032.24b     sómaṃ vīrā^́ya śipríṇe
8.032.24c     bhárā sutásya pītáye

8.032.25a     yá udnáḥ phaligám bhinán
8.032.25b     níak síndhūm̐r avā^́sr̥jat
8.032.25c     yó góṣu pakváṃ dhāráyat

8.032.26a     áhan vr̥trám ŕ̥cīṣama
8.032.26b     aurṇavābhám ahīśúvam
8.032.26c     himénāvidhyad árbudam

8.032.27a     prá va ugrā^́ya niṣṭúre
8.032.27b     áṣāḷhāya prasakṣíṇe
8.032.27c     deváttam bráhma gāyata

8.032.28a     yó víśvāni abhí vratā^́
8.032.28b     sómasya máde ándhasaḥ
8.032.28c     índro devéṣu cétati

8.032.29a     ihá tyā^́ sadhamā^́diyā
8.032.29b     hárī híraṇyakeśiyā
8.032.29c     voḷhā^́m abhí práyo hitám

8.032.30a     arvā^́ñcaṃ tvā puruṣṭuta
8.032.30b     priyámedhastutā hárī
8.032.30c     somapéyāya vakṣataḥ

33

8.033.01a     vayáṃ gha tvā sutā^́vanta
8.033.01b     ā^́po ná vr̥ktábarhiṣaḥ
8.033.01c     pavítrasya prasrávaṇeṣu vr̥trahan
8.033.01d     pári stotā^́ra āsate

8.033.02a     sváranti tvā suté náro
8.033.02b     váso nireká ukthínaḥ
8.033.02c     kadā^́ sutáṃ tr̥ṣāṇá óka ā^́ gama
8.033.02d     índra svabdī^́va váṃsagaḥ

8.033.03a     káṇvebhir dhr̥ṣṇav ā^́ dhr̥ṣád
8.033.03b     vā^́jaṃ darṣi sahasríṇam
8.033.03c     piśáṅgarūpam maghavan vicarṣaṇe
8.033.03d     makṣū^́ gómantam īmahe

8.033.04a     pāhí gā^́yā^́ndhaso máda
8.033.04b     índrāya medhiyātithe
8.033.04c     yáḥ sámmiślo háriyor yáḥ suté sácā
8.033.04d     vajrī^́ rátho hiraṇyáyaḥ

8.033.05a     yáḥ suṣavyáḥ sudákṣiṇa
8.033.05b     inó yáḥ sukrátur gr̥ṇé
8.033.05c     yá ākaráḥ sahásrā yáḥ śatā^́magha
8.033.05d     índro yáḥ pūrbhíd āritáḥ

8.033.06a     yó dhr̥ṣitó yó ávr̥to
8.033.06b     yó ásti śmáśruṣu śritáḥ
8.033.06c     víbhūtadyumnaś cyávanaḥ puruṣṭutáḥ
8.033.06d     krátvā gaúr iva śākináḥ

8.033.07a     ká īṃ veda suté sácā
8.033.07b     píbantaṃ kád váyo dadhe
8.033.07c     ayáṃ yáḥ púro vibhinátti ójasā
8.033.07d     mandānáḥ śiprī^́ ándhasaḥ

8.033.08a     dānā^́ mr̥gó ná vāraṇáḥ
8.033.08b     purutrā^́ caráthaṃ dadhe
8.033.08c     nákiṣ ṭuvā ní yamad ā^́ suté gamo
8.033.08d     mahā^́ṃś carasi ójasā

8.033.09a     yá ugráḥ sánn ániṣṭr̥ta
8.033.09b     sthiró ráṇāya sáṃskr̥taḥ
8.033.09c     yádi stotúr maghávā śr̥ṇávad dhávaṃ
8.033.09d     néndro yoṣati ā^́ gamat

8.033.10a     satyám itthā^́ vŕ̥ṣéd asi
8.033.10b     vŕ̥ṣajūtir no ávr̥taḥ
8.033.10c     vŕ̥ṣā hí ugra śr̥ṇviṣé parāváti
8.033.10d     vŕ̥ṣo arvāváti śrutáḥ

8.033.11a     vŕ̥ṣaṇas te abhī^́śavo
8.033.11b     vŕ̥ṣā káśā hiraṇyáyī
8.033.11c     vŕ̥ṣā rátho maghavan vŕ̥ṣaṇā hárī
8.033.11d     vŕ̥ṣā tuváṃ śatakrato

8.033.12a     vŕ̥ṣā sótā sunotu te
8.033.12b     vŕ̥ṣann r̥jīpin ā^́ bhara
8.033.12c     vŕ̥ṣā dadhanve vŕ̥ṣaṇaṃ nadī^́ṣu ā^́
8.033.12d     túbhyaṃ sthātar harīṇãm

8.033.13a     ā^́ indra yāhi pītáye
8.033.13b     mádhu śaviṣṭha somiyám
8.033.13c     nā^́yám áchā maghávā śr̥ṇávad gíro
8.033.13d     bráhma ukthā^́ ca sukrátuḥ

8.033.14a     váhantu tvā ratheṣṭhã^́m
8.033.14b     ā^́ hárayo rathayújaḥ
8.033.14c     tiráś cid aryáṃ sávanāni vr̥trahann
8.033.14d     anyéṣāṃ yā^́ śatakrato

8.033.15a     asmā^́kam adyá ántamaṃ
8.033.15b     stómaṃ dhiṣva mahāmaha
8.033.15c     asmā^́kaṃ te sávanā santu śáṃtamā
8.033.15d     mádāya dyukṣa somapāḥ

8.033.16a     nahí ṣás táva nó máma
8.033.16b     śāstré anyásya ráṇyati
8.033.16c     yó asmā^́n vīrá ā^́nayat

8.033.17a     índraś cid ghā tád abravīt
8.033.17b     striyā^́ aśāsiyám mánaḥ
8.033.17c     utó áha krátuṃ raghúm

8.033.18a     sáptī cid ghā madacyútā
8.033.18b     mithunā^́ vahato rátham
8.033.18c     evéd dhū^́r vŕ̥ṣṇa úttarā

8.033.19a     adháḥ paśyasva mópári
8.033.19b     saṃtarā^́m pādakaú hara
8.033.19c     mā^́ te kaśaplakaú dr̥śan
8.033.19d     strī^́ hí brahmā^́ babhū^́vitha

34

8.034.01a     ā^́ indra yāhi háribhir
8.034.01b     úpa káṇvasya suṣṭutím
8.034.01c     divó amúṣya śā^́sato
8.034.01d     dívaṃ yayá divāvaso

8.034.02a     ā^́ tvā grā^́vā vádann ihá
8.034.02b     somī^́ ghóṣeṇa yachatu
8.034.02c     divó amúṣya śā^́sato
8.034.02d     dívaṃ yayá divāvaso

8.034.03a     átrā ví nemír eṣãm
8.034.03b     úrāṃ ná dhūnute vŕ̥kaḥ
8.034.03c     divó amúṣya śā^́sato
8.034.03d     dívaṃ yayá divāvaso

8.034.04a     ā^́ tvā káṇvā ihā^́vase
8.034.04b     hávante vā^́jasātaye
8.034.04c     divó amúṣya śā^́sato
8.034.04d     dívaṃ yayá divāvaso

8.034.05a     dádhāmi te sutā^́nãṃ
8.034.05b     vŕ̥ṣṇe ná pūrvapā^́yiyam
8.034.05c     divó amúṣya śā^́sato
8.034.05d     dívaṃ yayá divāvaso

8.034.06a     smátpuraṃdhir na ā^́ gahi
8.034.06b     viśvátodhīr na ūtáye
8.034.06c     divó amúṣya śā^́sato
8.034.06d     dívaṃ yayá divāvaso

8.034.07a     ā^́ no yāhi mahemate
8.034.07b     sáhasrote śátāmagha
8.034.07c     divó amúṣya śā^́sato
8.034.07d     dívaṃ yayá divāvaso

8.034.08a     ā^́ tvā hótā mánurhito
8.034.08b     devatrā^́ vakṣad ī^́ḍiyaḥ
8.034.08c     divó amúṣya śā^́sato
8.034.08d     dívaṃ yayá divāvaso

8.034.09a     ā^́ tvā madacyútā hárī
8.034.09b     śyenám pakṣéva vakṣataḥ
8.034.09c     divó amúṣya śā^́sato
8.034.09d     dívaṃ yayá divāvaso

8.034.10a     ā^́ yāhi aryá ā^́ pári
8.034.10b     svā^́hā sómasya pītáye
8.034.10c     divó amúṣya śā^́sato
8.034.10d     dívaṃ yayá divāvaso

8.034.11a     ā^́ no yāhi úpaśruti
8.034.11b     ukthéṣu raṇayā ihá
8.034.11c     divó amúṣya śā^́sato
8.034.11d     dívaṃ yayá divāvaso

8.034.12a     sárūpair ā^́ sú no gahi
8.034.12b     sámbhr̥taiḥ sámbhr̥tāśuvaḥ
8.034.12c     divó amúṣya śā^́sato
8.034.12d     dívaṃ yayá divāvaso

8.034.13a     ā^́ yāhi párvatebhiyaḥ
8.034.13b     samudrásyā^́dhi viṣṭápaḥ
8.034.13c     divó amúṣya śā^́sato
8.034.13d     dívaṃ yayá divāvaso

8.034.14a     ā^́ no gávyāni áśviyā
8.034.14b     sahásrā śūra dardr̥hi
8.034.14c     divó amúṣya śā^́sato
8.034.14d     dívaṃ yayá divāvaso

8.034.15a     ā^́ naḥ sahasraśó bhara
8.034.15b     ayútāni śatā^́ni ca
8.034.15c     divó amúṣya śā^́sato
8.034.15d     dívaṃ yayá divāvaso

8.034.16a     ā^́ yád índraś ca dádvahe
8.034.16b     sahásraṃ vásurociṣaḥ
8.034.16c     ójiṣṭham áśviyam paśúm

8.034.17a     yá r̥jrā^́ vā^́taraṃhaso
8.034.17b     aruṣā^́so raghuṣyádaḥ
8.034.17c     bhrā^́jante sū^́riyā iva

8.034.18a     pā^́rāvatasya rātíṣu
8.034.18b     draváccakreṣu āśúṣu
8.034.18c     tíṣṭhaṃ vánasya mádhya ā^́

35

8.035.01a     agnínéndreṇa váruṇena víṣṇunā
8.035.01b     ādityaí rudraír vásubhiḥ sacābhúvā
8.035.01c     sajóṣasā uṣásā sū^́riyeṇa ca
8.035.01d     sómam pibatam aśvinā

8.035.02a     víśvābhir dhībhír bhúvanena vājinā
8.035.02b     divā^́ pr̥thivyā^́ ádribhiḥ sacābhúvā
8.035.02c     sajóṣasā uṣásā sū^́riyeṇa ca
8.035.02d     sómam pibatam aśvinā

8.035.03a     víśvair devaís tribhír ekādaśaír ihá
8.035.03b     adbhír marúdbhir bhŕ̥gubhiḥ sacābhúvā
8.035.03c     sajóṣasā uṣásā sū^́riyeṇa ca
8.035.03d     sómam pibatam aśvinā

8.035.04a     juṣéthāṃ yajñám bódhataṃ hávasya me
8.035.04b     víśvehá devau sávanā^́va gachatam
8.035.04c     sajóṣasā uṣásā sū^́riyeṇa ca
8.035.04d     íṣaṃ no voḷham aśvinā

8.035.05a     stómaṃ juṣethāṃ yuvaśéva kanyánāṃ
8.035.05b     víśvehá devau sávanā^́va gachatam
8.035.05c     sajóṣasā uṣásā sū^́riyeṇa ca
8.035.05d     íṣaṃ no voḷham aśvinā

8.035.06a     gíro juṣethām adhvaráṃ juṣethãṃ
8.035.06b     víśvehá devau sávanā^́va gachatam
8.035.06c     sajóṣasā uṣásā sū^́riyeṇa ca
8.035.06d     íṣaṃ no voḷham aśvinā

8.035.07a     hāridravéva patatho vánéd úpa
8.035.07b     sómaṃ sutám mahiṣévā^́va gachathaḥ
8.035.07c     sajóṣasā uṣásā sū^́riyeṇa ca
8.035.07d     trír vartír yātam aśvinā

8.035.08a     haṃsā^́v iva patatho adhvagā^́v iva
8.035.08b     sómaṃ sutám mahiṣévā^́va gachathaḥ
8.035.08c     sajóṣasā uṣásā sū^́riyeṇa ca
8.035.08d     trír vartír yātam aśvinā

8.035.09a     śyenā^́v iva patatho havyádātaye
8.035.09b     sómaṃ sutám mahiṣévā^́va gachathaḥ
8.035.09c     sajóṣasā uṣásā sū^́riyeṇa ca
8.035.09d     trír vartír yātam aśvinā

8.035.10a     píbataṃ ca tr̥pṇutáṃ cā^́ ca gachatam
8.035.10b     prajā^́ṃ ca dhattáṃ dráviṇaṃ ca dhattam
8.035.10c     sajóṣasā uṣásā sū^́riyeṇa ca
8.035.10d     ū^́rjaṃ no dhattam aśvinā

8.035.11a     jáyataṃ ca prá stutaṃ ca prá cāvatam
8.035.11b     prajā^́ṃ ca dhattáṃ dráviṇaṃ ca dhattam
8.035.11c     sajóṣasā uṣásā sū^́riyeṇa ca
8.035.11d     ū^́rjaṃ no dhattam aśvinā

8.035.12a     hatáṃ ca śátrūn yátataṃ ca mitríṇaḥ
8.035.12b     prajā^́ṃ ca dhattáṃ dráviṇaṃ ca dhattam
8.035.12c     sajóṣasā uṣásā sū^́riyeṇa ca
8.035.12d     ū^́rjaṃ no dhattam aśvinā

8.035.13a     mitrā^́váruṇavantā utá dhármavantā
8.035.13b     marútvantā jaritúr gachatho hávam
8.035.13c     sajóṣasā uṣásā sū^́riyeṇa ca
8.035.13d     ādityaír yātam aśvinā

8.035.14a     áṅgirasvantā utá víṣṇuvantā
8.035.14b     marútvantā jaritúr gachatho hávam
8.035.14c     sajóṣasā uṣásā sū^́riyeṇa ca
8.035.14d     ādityaír yātam aśvinā

8.035.15a     r̥bhumántā vr̥ṣaṇā vā^́javantā
8.035.15b     marútvantā jaritúr gachatho hávam
8.035.15c     sajóṣasā uṣásā sū^́riyeṇa ca
8.035.15d     ādityaír yātam aśvinā

8.035.16a     bráhma jinvatam utá jinvataṃ dhíyo
8.035.16b     hatáṃ rákṣāṃsi sédhatam ámīvāḥ
8.035.16c     sajóṣasā uṣásā sū^́riyeṇa ca
8.035.16d     sómaṃ sunvató aśvinā

8.035.17a     kṣatráṃ jinvatam utá jinvataṃ nr̥̄^́n
8.035.17b     hatáṃ rákṣāṃsi sédhatam ámīvāḥ
8.035.17c     sajóṣasā uṣásā sū^́riyeṇa ca
8.035.17d     sómaṃ sunvató aśvinā

8.035.18a     dhenū^́r jinvatam utá jinvataṃ víśo
8.035.18b     hatáṃ rákṣāṃsi sédhatam ámīvāḥ
8.035.18c     sajóṣasā uṣásā sū^́riyeṇa ca
8.035.18d     sómaṃ sunvató aśvinā

8.035.19a     átrer iva śr̥ṇutam pūrviyástutiṃ
8.035.19b     śyāvā^́śuvasya sunvató madacyutā
8.035.19c     sajóṣasā uṣásā sū^́riyena ca
8.035.19d     áśvinā tiróahniyam

8.035.20a     sárgām̐ iva sr̥jataṃ suṣṭutī^́r úpa
8.035.20b     śyāvā^́śuvasya sunvató madacyutā
8.035.20c     sajóṣasā uṣásā sū^́riyeṇa ca
8.035.20d     áśvinā tiróahniyam

8.035.21a     raśmī^́m̐r iva yachatam adhvarā^́m̐ úpa
8.035.21b     śyāvā^́śuvasya sunvató madacyutā
8.035.21c     sajóṣasā uṣásā sū^́riyeṇa ca
8.035.21d     áśvinā tiróahniyam

8.035.22a     arvā^́g ráthaṃ ní yachatam
8.035.22b     píbataṃ somiyám mádhu
8.035.22c     ā^́ yātam aśvinā^́ gatam
8.035.22d     avasyúr vām aháṃ huve
8.035.22e     dhattáṃ rátnāni dāśúṣe

8.035.23a     namovāké prásthite adhvaré narā
8.035.23b     vivákṣaṇasya pītáye
8.035.23c     ā^́ yātam aśvinā^́ gatam
8.035.23d     avasyúr vām aháṃ huve
8.035.23e     dhattáṃ rátnāni dāśúṣe

8.035.24a     svā^́hākr̥tasya tr̥mpataṃ
8.035.24b     sutásya devāv ándhasaḥ
8.035.24c     ā^́ yātam aśvinā^́ gatam
8.035.24d     avasyúr vām aháṃ huve
8.035.24e     dhattáṃ rátnāni dāśúṣe

36

8.036.01a     avitā^́si sunvató vr̥ktábarhiṣaḥ
8.036.01b     píbā sómam mádāya káṃ śatakrato
8.036.01c     yáṃ te bhāgám ádhārayan
8.036.01d     víśvāḥ sehānáḥ pŕ̥tanā
8.036.01e     urú jráyaḥ sám apsujín
8.036.01f     marútvām̐ indra satpate

8.036.02a     prā^́va stotā^́ram maghavann áva tvā^́m
8.036.02b     píbā sómam mádāya káṃ śatakrato
8.036.02c     yáṃ te bhāgám ádhārayan
8.036.02d     víśvāḥ sehānáḥ pŕ̥tanā
8.036.02e     urú jráyaḥ sám apsujín
8.036.02f     marútvām̐ indra satpate

8.036.03a     ūrjā^́ devā^́m̐ ávasi ójasā tuvā^́m
8.036.03b     píbā sómam mádāya káṃ śatakrato
8.036.03c     yáṃ te bhāgám ádhārayan
8.036.03d     víśvāḥ sehānáḥ pŕ̥tanā
8.036.03e     urú jráyaḥ sám apsujín
8.036.03f     marútvām̐ indra satpate

8.036.04a     janitā^́ divó janitā^́ pr̥thivyā^́ḥ
8.036.04b     píbā sómam mádāya káṃ śatakrato
8.036.04c     yáṃ te bhāgám ádhārayan
8.036.04d     víśvāḥ sehānáḥ pŕ̥tanā
8.036.04e     urú jráyaḥ sám apsujín
8.036.04f     marútvām̐ indra satpate

8.036.05a     janitā^́śvānāṃ janitā^́ gávām asi
8.036.05b     píbā sómam mádāya káṃ śatakrato
8.036.05c     yáṃ te bhāgám ádhārayan
8.036.05d     víśvāḥ sehānáḥ pŕ̥tanā
8.036.05e     urú jráyaḥ sám apsujín
8.036.05f     marútvām̐ indra satpate

8.036.06a     átrīṇāṃ stómam adrivo mahás kr̥dhi
8.036.06b     píbā sómam mádāya káṃ śatakrato
8.036.06c     yáṃ te bhāgám ádhārayan
8.036.06d     víśvāḥ sehānáḥ pŕ̥tanā
8.036.06e     urú jráyaḥ sám apsujín
8.036.06f     marútvām̐ indra satpate

8.036.07a     śyāvā^́śuvasya sunvatás táthā śr̥ṇu
8.036.07b     yáthā^́śr̥ṇor átreḥ kármāṇi kr̥ṇvatáḥ
8.036.07c     prá trasádasyum āvitha
8.036.07d     tvám éka ín nr̥ṣā^́hiya
8.036.07e     índra bráhmāṇi vardháyan

37

8.037.01a     prédám bráhma vr̥tratū^́ryeṣu āvitha
8.037.01b     prá sunvatáḥ śacīpata
8.037.01c     índra víśvābhir ūtíbhiḥ
8.037.01d     mā^́dhyaṃdinasya sávanasya vr̥trahann anediya
8.037.01e     píbā sómasya vajrivaḥ

8.037.02a     sehāná ugra pŕ̥tanā abhí drúhaḥ śacīpata
8.037.02b     índra víśvābhir ūtíbhiḥ
8.037.02c     mā^́dhyaṃdinasya sávanasya vr̥trahann anediya
8.037.02d     píbā sómasya vajrivaḥ

8.037.03a     ekarā^́ḷ asyá bhúvanasya rājasi śacīpata
8.037.03b     índra víśvābhir ūtíbhiḥ
8.037.03c     mā^́dhyaṃdinasya sávanasya vr̥trahann anediya
8.037.03d     píbā sómasya vajrivaḥ

8.037.04a     sasthā^́vānā yavayasi tvám éka íc chacīpata
8.037.04b     índra víśvābhir ūtíbhiḥ
8.037.04c     mā^́dhyaṃdinasya sávanasya vr̥trahann anediya
8.037.04d     píbā sómasya vajrivaḥ

8.037.05a     kṣémasya ca prayújaś ca tvám īśiṣe śacīpata
8.037.05b     índra víśvābhir ūtíbhiḥ
8.037.05c     mā^́dhyaṃdinasya sávanasya vr̥trahann anediya
8.037.05d     píbā sómasya vajrivaḥ

8.037.06a     kṣatrā^́ya tvam ávasi ná tvam āvitha śacīpata
8.037.06b     índra víśvābhir ūtíbhiḥ
8.037.06c     mā^́dhyaṃdinasya sávanasya vr̥trahann anediya
8.037.06d     píbā sómasya vajrivaḥ

8.037.07a     śyāvā^́śuvasya rébhatas táthā śr̥ṇu
8.037.07b     yáthā^́śr̥ṇor átreḥ kármāṇi kr̥ṇvatáḥ
8.037.07c     prá trasádasyum āvitha tvám éka ín nr̥ṣā^́hiya
8.037.07d     índra kṣatrā^́ṇi vardháyan

38

8.038.01a     yajñásya hí sthá r̥tvíjā
8.038.01b     sásnī vā^́jeṣu kármasu
8.038.01c     índrāgnī tásya bodhatam

8.038.02a     tośā^́sā rathayā^́vānā
8.038.02b     vr̥traháṇā^́parājitā
8.038.02c     índrāgnī tásya bodhatam

8.038.03a     idáṃ vām madirám mádhu
8.038.03b     ádhukṣann ádribhir náraḥ
8.038.03c     índrāgnī tásya bodhatam

8.038.04a     juṣéthāṃ yajñám iṣṭáye
8.038.04b     sutáṃ sómaṃ sadhastutī
8.038.04c     índrāgnī ā^́ gataṃ narā

8.038.05a     imā^́ juṣethāṃ sávanā
8.038.05b     yébhir havyā^́ni ūháthuḥ
8.038.05c     índrāgnī ā^́ gataṃ narā

8.038.06a     imā^́ṃ gāyatrávartaniṃ
8.038.06b     juṣéthāṃ suṣṭutím máma
8.038.06c     índrāgnī ā^́ gataṃ narā

8.038.07a     prātaryā^́vabhir ā^́ gataṃ
8.038.07b     devébhir jeniyāvasū
8.038.07c     índrāgnī sómapītaye

8.038.08a     śyāvā^́śuvasya sunvató
8.038.08b     átrīṇāṃ śr̥ṇutaṃ hávam
8.038.08c     índrāgnī sómapītaye

8.038.09a     evā^́ vām ahva ūtáye
8.038.09b     yáthā^́huvanta médhirāḥ
8.038.09c     índrāgnī sómapītaye

8.038.10a     ā^́háṃ sárasvatīvator
8.038.10b     indrāgniyór ávo vr̥ṇe
8.038.10c     yā^́bhyāṃ gāyatrám r̥cyáte

39

8.039.01a     agním astoṣi r̥gmíyam
8.039.01b     agním īḷā^́ yajádhiyai
8.039.01c     agnír devā^́m̐ anaktu na
8.039.01d     ubhé hí vidáthe kavír
8.039.01e     antáś cárati dūtíyaṃ
8.039.01f     nábhantām anyaké same

8.039.02a     ní agne návyasā vácas
8.039.02b     tanū^́ṣu śáṃsam eṣãm
8.039.02c     ní árātī rárāvaṇāṃ†
8.039.02d     víśvā aryó árātĩr
8.039.02e     itó yuchantu āmúro
8.039.02f     nábhantām anyaké same

8.039.03a     ágne mánmāni túbhya° káṃ
8.039.03b     ghr̥táṃ ná juhva āsáni
8.039.03c     sá devéṣu prá cikiddhi
8.039.03d     tuváṃ hí ási pūrviyáḥ
8.039.03e     śivó dūtó vivásvato
8.039.03f     nábhantām anyaké same

8.039.04a     tát-tad agnír váyo dadhe
8.039.04b     yáthā-yathā kr̥paṇyáti
8.039.04c     ūrjā^́hutir vásūnãṃ
8.039.04d     śáṃ ca yóś ca máyo dadhe
8.039.04e     víśvasyai deváhūtiyai
8.039.04f     nábhantām anyaké same

8.039.05a     sá ciketa sáhīyasā
8.039.05b     agníś citréṇa kármaṇā
8.039.05c     sá hótā śáśvatīnãṃ
8.039.05d     dákṣiṇābhir abhī^́vr̥ta
8.039.05e     inóti ca pratīvíyaṃ
8.039.05f     nábhantām anyaké same

8.039.06a     agnír jātā^́ devā^́nãm
8.039.06b     agnír veda mártiānām° apīcíyam
8.039.06c     agníḥ sá draviṇodã^́
8.039.06d     agnír dvā^́rā ví ūrṇute
8.039.06e     súāhuto návīyasā
8.039.06f     nábhantām anyaké same

8.039.07a     agnír devéṣu sáṃvasuḥ
8.039.07b     sá vikṣú yajñíyāsu ā^́
8.039.07c     sá mudā^́ kā^́viyā purú
8.039.07d     víśvam bhū^́meva puṣyati
8.039.07e     devó devéṣu yajñíyo
8.039.07f     nábhantām anyaké same

8.039.08a     yó agníḥ saptámānuṣaḥ
8.039.08b     śritó víśveṣu síndhuṣu
8.039.08c     tám ā^́ganma tripastiyám
8.039.08d     mandhātúr dasyuhántamam
8.039.08e     agníṃ yajñéṣu pūrviyáṃ
8.039.08f     nábhantām anyaké same

8.039.09a     agnís trī^́ṇi tridhā^́tūni
8.039.09b     ā^́ kṣeti vidáthā kavíḥ
8.039.09c     sá trī^́m̐r ekādaśā^́m̐ ihá
8.039.09d     yákṣac ca pipráyac ca no
8.039.09e     vípro dūtáḥ páriṣkr̥to
8.039.09f     nábhantām anyaké same

8.039.10a     tuáṃ no agna āyúṣu
8.039.10b     tuáṃ devéṣu pūrvia
8.039.10c     vásva éka irajyasi
8.039.10d     tuā^́m ā^́paḥ parisrútaḥ
8.039.10e     pári yanti svásetavo
8.039.10f     nábhantām anyaké same

40

8.040.01a     índraagnī yuváṃ sú naḥ
8.040.01b     sáhantā dā^́satho rayím
8.040.01c     yéna dr̥̄ḷhā^́+ samátsu ā^́
8.040.01d     vīḷú cit sāhiṣīmáhi
8.040.01e     agnír váneva vā^́ta ín
8.040.01f     nábhantām anyaké same

8.040.02a     nahí vāṃ vavráyāmahé
8.040.02b     athéndram íd yajāmahe
8.040.02c     śáviṣṭhaṃ nr̥̄ṇã^́ṃ⁺ náram
8.040.02d     sá naḥ kadā^́ cid árvatā
8.040.02e     gámad ā^́ vā^́jasātaye
8.040.02f     gámad ā^́ medhásātaye
8.040.02g     nábhantām anyaké same

8.040.03a     tā^́ hí mádhyam bhárāṇãm
8.040.03b     indraagnī^́ adhikṣitáḥ
8.040.03c     tā^́ u kavitvanā^́ kavī^́
8.040.03d     pr̥chyámānā sakhīyaté
8.040.03e     sáṃ dhītám aśnutaṃ narā
8.040.03f     nábhantām anyaké same

8.040.04a     abhí arca nabhākavád
8.040.04b     indrāgnī^́ yajásā girā^́
8.040.04c     yáyor víśvam idáṃ jágad
8.040.04d     iyáṃ dyaúḥ pr̥thivī^́ mahī^́
8.040.04e     upásthe bibhr̥tó vásu
8.040.04f     nábhantām anyaké same

8.040.05a     prá bráhmāṇi nabhākavád
8.040.05b     indrāgníbhyām irajyata
8.040.05c     yā^́ saptábudhnam arṇaváṃ
8.040.05d     jihmábāram aporṇutá
8.040.05e     índra ī^́śāna ójasā
8.040.05f     nábhantām anyaké same

8.040.06a     ápi vr̥śca purāṇavád
8.040.06b     vratáter iva guṣpitám
8.040.06c     ójo dāsásya dambhaya
8.040.06d     vayáṃ tád asya sámbhr̥taṃ
8.040.06e     vásu índreṇa ví bhajemahi
8.040.06f     nábhantām anyaké same

8.040.07a     yád indrāgnī^́ jánā imé
8.040.07b     vihváyante tánā girā^́
8.040.07c     asmā^́kebhir nŕ̥bhir vayáṃ
8.040.07d     sāsahyā^́ma pr̥tanyató
8.040.07e     vanuyā^́ma vanuṣyató
8.040.07f     nábhantām anyaké same

8.040.08a     yā^́ nú śvetā^́v avó divá
8.040.08b     uccárāta úpa dyúbhiḥ
8.040.08c     indrāgniyór ánu vratám
8.040.08d     úhānā yanti síndhavo
8.040.08e     yā^́n sīm bandhā^́d ámuñcatāṃ
8.040.08f     nábhantām anyaké same

8.040.09a     pūrvī^́ṣ ṭa indrópamātayaḥ
8.040.09b     pūrvī^́r utá práśastayaḥ
8.040.09c     sū^́no hinvásya harivaḥ
8.040.09d     vásvo vīrásya apŕ̥co
8.040.09e     yā^́ nú sā^́dhanta no dhíyo
8.040.09f     nábhantām anyaké same

8.040.10a     táṃ śiśītā suvr̥ktíbhis
8.040.10b     tveṣáṃ sátvānam r̥gmíyam
8.040.10c     utó nú cid yá ójasā
8.040.10d     śúṣṇasyāṇḍā^́ni bhédati
8.040.10e     jéṣat súvarvatīr apó
8.040.10f     nábhantām anyaké same

8.040.11a     táṃ śiśītā suadhvaráṃ
8.040.11b     satyáṃ sátvānam r̥tvíyam
8.040.11c     utó nú cid yá óhata
8.040.11d     āṇḍā^́ śúṣṇasya bhédati
8.040.11e     ájaiḥ súvarvatīr apó
8.040.11f     nábhantām anyaké same

8.040.12a     evéndrāgníbhyām pitr̥ván návīyo
8.040.12b     mandhātr̥vád aṅgirasvád avāci
8.040.12c     tridhā^́tunā śármaṇā pātam asmā^́n
8.040.12d     vayáṃ siyāma pátayo rayīṇā^́m

41

8.041.01a     asmā^́ ū ṣú prábhūtaye
8.041.01b     váruṇāya marúdbhiyo
8.041.01c     árcā vidúṣṭarebhiyaḥ
8.041.01d     yó dhītā^́ mā^́nuṣāṇãm
8.041.01e     paśvó gā^́ iva rákṣati
8.041.01f     nábhantām anyaké same

8.041.02a     tám ū ṣú samanā^́ girā^́
8.041.02b     pitr̥̄ṇã^́ṃ ca mánmabhiḥ
8.041.02c     nābhākásya práśastibhir
8.041.02d     yáḥ síndhūnām úpodayé
8.041.02e     saptásvasā sá madhyamó
8.041.02f     nábhantām anyaké same

8.041.03a     sá kṣápaḥ pári ṣasvaje
8.041.03b     ní usró māyáyā dadhe
8.041.03c     sá víśvam pári darśatáḥ
8.041.03d     tásya vénīr ánu vratám
8.041.03e     uṣás tisró avardhayan
8.041.03f     nábhantām anyaké same

8.041.04a     yáḥ kakúbho nidhārayáḥ
8.041.04b     pr̥thivyā^́m ádhi darśatáḥ
8.041.04c     sá mā^́tā pūrviyám padáṃ
8.041.04d     tád váruṇasya sáptiyaṃ
8.041.04e     sá hí gopā^́ ivériyo
8.041.04f     nábhantām anyaké same

8.041.05a     yó dhartā^́ bhúvanānãṃ
8.041.05b     yá usrā^́ṇām apīcíyā
8.041.05c     véda nā^́māni gúhiyā
8.041.05d     sá kavíḥ kā^́viyā purú
8.041.05e     rūpáṃ dyaúr iva puṣyati
8.041.05f     nábhantām anyaké same

8.041.06a     yásmin víśvāni kā^́viyā
8.041.06b     cakré nā^́bhir iva śritā^́
8.041.06c     tritáṃ jūtī^́ saparyata
8.041.06d     vrajé gā^́vo ná saṃyúje
8.041.06e     yujé áśvām̐ ayukṣata
8.041.06f     nábhantām anyaké same

8.041.07a     yá āsu átka āśáye
8.041.07b     víśvā jātā^́ni eṣãm
8.041.07c     pári dhā^́māni mármr̥śad
8.041.07d     váruṇasya puró gáye
8.041.07e     víśve devā^́ ánu vratáṃ
8.041.07f     nábhantām anyaké same

8.041.08a     sá samudró apīcíyas
8.041.08b     turó dyā^́m iva rohati
8.041.08c     ní yád āsu yájur dadhé
8.041.08d     sá māyā^́ arcínā padā^́
8.041.08e     ástr̥ṇān nā^́kam ā^́ruhan
8.041.08f     nábhantām anyaké same

8.041.09a     yásya śvetā^́ vicakṣaṇā^́
8.041.09b     tisró bhū^́mīr adhikṣitáḥ
8.041.09c     trír úttarāṇi paprátur
8.041.09d     váruṇasya dhruváṃ sádaḥ
8.041.09e     sá saptānā^́m irajyati
8.041.09f     nábhantām anyaké same

8.041.10a     yáḥ śvetā^́m̐ ádhinirṇijaś
8.041.10b     cakré kr̥ṣṇā^́m̐ ánu vratā^́
8.041.10c     sá dhā^́ma pūrviyám mame
8.041.10d     yá skambhéna ví ródasī
8.041.10e     ajó ná dyā^́m ádhārayan
8.041.10f     nábhantām anyaké same

42

8.042.01a     ástabhnād dyā^́m ásuro viśvávedā
8.042.01b     ámimīta varimā^́ṇam pr̥thivyā^́ḥ
8.042.01c     ā^́sīdad víśvā bhúvanāni samrā^́ḍ
8.042.01d     víśvét tā^́ni váruṇasya vratā^́ni

8.042.02a     evā^́ vandasva váruṇam br̥hántaṃ
8.042.02b     namasyā^́ dhī^́ram amŕ̥tasya gopā^́m
8.042.02c     sá naḥ śárma trivárūthaṃ ví yaṃsat
8.042.02d     pātáṃ no dyāvāpr̥thivī upásthe

8.042.03a     imā^́ṃ dhíyaṃ śíkṣamāṇasya deva
8.042.03b     krátuṃ dákṣaṃ varuṇa sáṃ śiśādhi
8.042.03c     yáyā^́ti víśvā duritā^́ tárema
8.042.03d     sutármāṇam ádhi nā^́vaṃ ruhema

8.042.04a     ā^́ vāṃ grā^́vāṇo aśvinā
8.042.04b     dhībhír víprā acucyavuḥ
8.042.04c     nā^́satyā sómapītaye
8.042.04d     nábhantām anyaké same

8.042.05a     yáthā vām átrir aśvinā
8.042.05b     gīrbhír vípro ájohavīt
8.042.05c     nā^́satyā sómapītaye
8.042.05d     nábhantām anyaké same

8.042.06a     evā^́ vām ahva ūtáye
8.042.06b     yáthā^́huvanta médhirāḥ
8.042.06c     nā^́satyā sómapītaye
8.042.06d     nábhantām anyaké same

43

8.043.01a     imé víprasya vedháso
8.043.01b     agnér ástr̥tayajvanaḥ
8.043.01c     gíra stómāsa īrate

8.043.02a     ásmai te pratiháryate
8.043.02b     jā^́tavedo vícarṣaṇe
8.043.02c     ágne jánāmi suṣṭutím

8.043.03a     ārokā^́ iva ghéd áha
8.043.03b     tigmā^́ agne táva tvíṣaḥ
8.043.03c     dadbhír vánāni bapsati

8.043.04a     hárayo dhūmáketavo
8.043.04b     vā^́tajūtā úpa dyávi
8.043.04c     yátante vŕ̥thag agnáyaḥ

8.043.05a     eté tyé vŕ̥thag agnáya
8.043.05b     iddhā^́saḥ sám adr̥kṣata
8.043.05c     uṣásām iva ketávaḥ

8.043.06a     kr̥ṣṇā^́ rájāṃsi patsutáḥ
8.043.06b     prayā^́ṇe jātávedasaḥ
8.043.06c     agnír yád ródhati kṣámi

8.043.07a     dhāsíṃ kr̥ṇvāná óṣadhīr
8.043.07b     bápsad agnír ná vāyati
8.043.07c     púnar yán táruṇīr ápi

8.043.08a     jihvā^́bhir áha nánnamad
8.043.08b     arcíṣā jañjaṇābhávan
8.043.08c     agnír váneṣu rocate

8.043.09a     apsú agne sádhiṣ ṭáva
8.043.09b     saúṣadhīr ánu rudhyase
8.043.09c     gárbhe sáñ jāyase púnaḥ

8.043.10a     úd agne táva tád ghr̥tā^́d
8.043.10b     arcī^́ rocata ā^́hutam
8.043.10c     níṃsānaṃ juhúvo múkhe

8.043.11a     ukṣā^́nnāya vaśā^́nnāya
8.043.11b     sómapr̥ṣṭhāya vedháse
8.043.11c     stómair vidhema agnáye

8.043.12a     utá tvā námasā vayáṃ
8.043.12b     hótar váreṇiyakrato
8.043.12c     ágne samídbhir īmahe

8.043.13a     utá tvā bhr̥guvác chuce
8.043.13b     manuṣvád agna āhuta
8.043.13c     aṅgirasvád dhavāmahe

8.043.14a     tuváṃ hí agne agnínā
8.043.14b     vípro vípreṇa sán satā^́
8.043.14c     sákhā sákhyā samidhyáse

8.043.15a     sá tváṃ víprāya dāśúṣe
8.043.15b     rayíṃ dehi sahasríṇam
8.043.15c     ágne vīrávatīm íṣam

8.043.16a     ágne bhrā^́taḥ sáhaskr̥ta
8.043.16b     róhidaśva śúcivrata
8.043.16c     imáṃ stómaṃ juṣasva me

8.043.17a     utá tvāgne máma stúto
8.043.17b     vāśrā^́ya pratiháryate
8.043.17c     goṣṭháṃ gā^́va ivāśata

8.043.18a     túbhyaṃ tā^́ aṅgirastama
8.043.18b     víśvāḥ sukṣitáyaḥ pŕ̥thak
8.043.18c     ágne kā^́māya yemire

8.043.19a     agníṃ dhībhír manīṣíṇo
8.043.19b     médhirāso vipaścítaḥ
8.043.19c     admasádyāya hinvire

8.043.20a     táṃ tvā^́m ájmeṣu vājínaṃ
8.043.20b     tanvānā^́ agne adhvarám
8.043.20c     váhniṃ hótāram īḷate

8.043.21a     purutrā^́ hí sadŕ̥ṅṅ ási
8.043.21b     víśo víśvā ánu prabhúḥ
8.043.21c     samátsu tvā havāmahe

8.043.22a     tám īḷiṣva yá ā^́huto
8.043.22b     agnír vibhrā^́jate ghr̥taíḥ
8.043.22c     imáṃ naḥ śr̥ṇavad dhávam

8.043.23a     táṃ tvā vayáṃ havāmahe
8.043.23b     śr̥ṇvántaṃ jātávedasam
8.043.23c     ágne ghnántam ápa dvíṣaḥ

8.043.24a     viśā^́ṃ rā^́jānam ádbhutam
8.043.24b     ádhyakṣaṃ dhármaṇām imám
8.043.24c     agním īḷe sá u śravat

8.043.25a     agníṃ viśvā^́yuvepasam
8.043.25b     máryaṃ ná vājínaṃ hitám
8.043.25c     sáptiṃ ná vājayāmasi

8.043.26a     ghnán mr̥dhrā^́ṇi ápa dvíṣo
8.043.26b     dáhan rákṣāṃsi viśváhā
8.043.26c     ágne tigména dīdihi

8.043.27a     yáṃ tvā jánāsa indhaté
8.043.27b     manuṣvád aṅgirastama
8.043.27c     ágne sá bodhi me vácaḥ

8.043.28a     yád agne divijā^́ ási
8.043.28b     apsujā^́ vā sahaskr̥ta
8.043.28c     táṃ tvā gīrbhír havāmahe

8.043.29a     túbhyaṃ ghét té jánā imé
8.043.29b     víśvāḥ sukṣitáyaḥ pŕ̥thak
8.043.29c     dhāsíṃ hinvanti áttave

8.043.30a     té ghéd agne suādhiyó
8.043.30b     áhā víśvā nr̥cákṣasaḥ
8.043.30c     tárantaḥ syāma durgáhā

8.043.31a     agním mandrám purupriyáṃ
8.043.31b     śīrám pavākáśociṣam⁺
8.043.31c     hr̥dbhír mandrébhir īmahe

8.043.32a     sá tvám agne vibhā^́vasuḥ
8.043.32b     sr̥ján sū^́ryo ná raśmíbhiḥ
8.043.32c     śárdhan támāṃsi jighnase

8.043.33a     tát te sahasva īmahe
8.043.33b     dātráṃ yán nópadásyati
8.043.33c     tvád agne vā^́riyaṃ vásu

44

8.044.01a     samídhāgníṃ duvasyata
8.044.01b     ghr̥taír bodhayatā^́tithim
8.044.01c     ā^́smin havyā^́ juhotana

8.044.02a     ágne stómaṃ juṣasva me
8.044.02b     várdhasvānéna mánmanā
8.044.02c     práti sūktā^́ni harya naḥ

8.044.03a     agníṃ dūtám puró dadhe
8.044.03b     havyavā^́ham úpa bruve
8.044.03c     devā^́m̐ ā^́ sādayād ihá

8.044.04a     út te br̥hánto arcáyaḥ
8.044.04b     samidhānásya dīdivaḥ
8.044.04c     ágne śukrā^́sa īrate

8.044.05a     úpa tvā juhúvo máma
8.044.05b     ghr̥tā^́cīr yantu haryata
8.044.05c     ágne havyā^́ juṣasva naḥ

8.044.06a     mandráṃ hótāram r̥tvíjaṃ
8.044.06b     citrábhānuṃ vibhā^́vasum
8.044.06c     agním īḷe sá u śravat

8.044.07a     pratnáṃ hótāram ī^́ḍiyaṃ
8.044.07b     júṣṭam agníṃ kavíkratum
8.044.07c     adhvarā^́ṇām abhiśríyam

8.044.08a     juṣāṇó aṅgirastama
8.044.08b     imā^́ havyā^́ni ānuṣák
8.044.08c     ágne yajñáṃ naya rtuthā^́

8.044.09a     samidhāná u santiya
8.044.09b     śúkraśoca ihā^́ vaha
8.044.09c     cikitvā^́n daíviyaṃ jánam

8.044.10a     vípraṃ hótāram adrúhaṃ
8.044.10b     dhūmáketuṃ vibhā^́vasum
8.044.10c     yajñā^́nāṃ ketúm īmahe

8.044.11a     ágne ní pāhi nas tuvám
8.044.11b     práti ṣma deva rī^́ṣataḥ
8.044.11c     bhindhí dvéṣaḥ sahaskr̥ta

8.044.12a     agníḥ pratnéna mánmanā
8.044.12b     śúmbhānas tanúvaṃ suvā^́m
8.044.12c     kavír vípreṇa vāvr̥dhe

8.044.13a     ūrjó nápātam ā^́ huve
8.044.13b     agním pavākáśociṣam⁺
8.044.13c     asmín yajñé suadhvaré

8.044.14a     sá no mitramahas tuvám
8.044.14b     ágne śukréṇa śocíṣā
8.044.14c     devaír ā^́ satsi barhíṣi

8.044.15a     yó agníṃ tanúvo dáme
8.044.15b     devám mártaḥ saparyáti
8.044.15c     tásmā íd dīdayad vásu

8.044.16a     agnír mūrdhā^́ diváḥ kakút
8.044.16b     pátiḥ pr̥thiviyā^́ ayám
8.044.16c     apā^́ṃ rétāṃsi jinvati

8.044.17a     úd agne śúcayas táva
8.044.17b     śukrā^́ bhrā^́janta īrate
8.044.17c     táva jyótīṃṣi arcáyaḥ

8.044.18a     ī^́śiṣe vā^́riyasya hí
8.044.18b     dātrásyāgne súvarpatiḥ
8.044.18c     stotā^́ syāṃ táva śármaṇi

8.044.19a     tuvā^́m agne manīṣíṇas
8.044.19b     tuvā^́ṃ hinvanti cíttibhiḥ
8.044.19c     tuvā^́ṃ vardhantu no gíraḥ

8.044.20a     ádabdhasya svadhā^́vato
8.044.20b     dūtásya rébhataḥ sádā
8.044.20c     agnéḥ sakhyáṃ vr̥ṇīmahe

8.044.21a     agníḥ śúcivratatamaḥ
8.044.21b     śúcir vípraḥ śúciḥ kavíḥ
8.044.21c     śúcī rocata ā^́hutaḥ

8.044.22a     utá tvā dhītáyo máma
8.044.22b     gíro vardhantu viśváhā
8.044.22c     ágne sakhyásya bodhi naḥ

8.044.23a     yád agne syā^́m aháṃ tuváṃ
8.044.23b     tuváṃ vā ghā siyā^́ ahám
8.044.23c     syúṣ ṭe satyā^́ ihā^́śíṣaḥ

8.044.24a     vásur vásupatir hí kam
8.044.24b     ási agne vibhā^́vasuḥ
8.044.24c     syā^́ma te sumatā^́v ápi

8.044.25a     ágne dhr̥távratāya te
8.044.25b     samudrā^́yeva síndhavaḥ
8.044.25c     gíro vāśrā^́sa īrate

8.044.26a     yúvānaṃ viśpátiṃ kavíṃ
8.044.26b     viśvā^́dam puruvépasam
8.044.26c     agníṃ śumbhāmi mánmabhiḥ

8.044.27a     yajñā^́nāṃ rathíye vayáṃ
8.044.27b     tigmájambhāya vīḷáve
8.044.27c     stómair iṣema agnáye

8.044.28a     ayám agne tuvé ápi
8.044.28b     jaritā^́ bhūtu santiya
8.044.28c     tásmai pavāka⁺ mr̥̄ḷaya⁺

8.044.29a     dhī^́ro hí ási admasád
8.044.29b     vípro ná jā^́gr̥viḥ sádā
8.044.29c     ágne dīdáyasi dyávi

8.044.30a     purā^́gne duritébhiyaḥ
8.044.30b     purā^́ mr̥dhrébhiyaḥ kave
8.044.30c     prá ṇa ā^́yur vaso tira

45

8.045.01a     ā^́ ghā yé agním indhaté
8.045.01b     str̥ṇánti barhír ānuṣák
8.045.01c     yéṣām índro yúvā sákhā

8.045.02a     br̥hánn íd idhmá eṣãm
8.045.02b     bhū^́ri śastám pr̥thúḥ sváruḥ
8.045.02c     yéṣām índro yúvā sákhā

8.045.03a     áyuddha íd yudhā^́ vŕ̥taṃ
8.045.03b     śū^́ra ā^́jati sátvabhiḥ
8.045.03c     yéṣām índro yúvā sákhā

8.045.04a     ā^́ bundáṃ vr̥trahā^́ dade
8.045.04b     jātáḥ pr̥chad ví mātáram
8.045.04c     ká ugrā^́ḥ ké ha śr̥ṇvire

8.045.05a     práti tvā śavasī^́ vadad
8.045.05b     girā^́v ápso ná yodhiṣat
8.045.05c     yás te śatrutvám ācaké

8.045.06a     utá tvám maghavañ chr̥ṇu
8.045.06b     yás te váṣṭi vavákṣi tát
8.045.06c     yád vīḷáyāsi vīḷú tát

8.045.07a     yád ājíṃ yā^́ti ājikŕ̥d
8.045.07b     índraḥ suaśvayúr úpa
8.045.07c     rathī^́tamo rathī^́nãm

8.045.08a     ví ṣú víśvā abhiyújo
8.045.08b     vájrin víṣvag yáthā vr̥ha
8.045.08c     bhávā naḥ suśrávastamaḥ

8.045.09a     asmā^́kaṃ sú rátham purá
8.045.09b     índraḥ kr̥ṇotu sātáye
8.045.09c     ná yáṃ dhū^́rvanti dhūrtáyaḥ

8.045.10a     vr̥jyā^́ma te pári dvíṣo
8.045.10b     áraṃ te śakra dāváne
8.045.10c     gaméméd indra gómataḥ

8.045.11a     śánaiś cid yánto adrivo
8.045.11b     áśvāvantaḥ śatagvínaḥ
8.045.11c     vivákṣaṇā anehásaḥ

8.045.12a     ūrdhvā^́ hí te divé-dive
8.045.12b     sahásrā sūnŕ̥tā śatā^́
8.045.12c     jaritŕ̥bhyo vimáṃhate

8.045.13a     vidmā^́ hí tvā dhanaṃjayám
8.045.13b     índra dr̥̄ḷhā^́+ cid ārujám
8.045.13c     ādāríṇaṃ yáthā gáyam

8.045.14a     kakuháṃ cit tuvā kave
8.045.14b     mándantu dhr̥ṣṇav índavaḥ
8.045.14c     ā^́ tvā paṇíṃ yád ī^́mahe

8.045.15a     yás te revā^́m̐ ádāśuriḥ
8.045.15b     pramamárṣa magháttaye
8.045.15c     tásya no véda ā^́ bhara

8.045.16a     imá u tvā ví cakṣate
8.045.16b     sákhāya indra somínaḥ
8.045.16c     puṣṭā^́vanto yáthā paśúm

8.045.17a     utá tvā^́badhiraṃ vayáṃ
8.045.17b     śrútkarṇaṃ sántam ūtáye
8.045.17c     dūrā^́d ihá havāmahe

8.045.18a     yác chuśrūyā^́ imáṃ hávaṃ
8.045.18b     durmárṣaṃ cakriyā utá
8.045.18c     bháver āpír no ántamaḥ

8.045.19a     yác cid dhí te ápi vyáthir
8.045.19b     jaganvā^́ṃso ámanmahi
8.045.19c     godā^́ íd indra bodhi naḥ

8.045.20a     ā^́ tvā rambháṃ ná jívrayo
8.045.20b     rarabhmā^́ śavasas pate
8.045.20c     uśmási tvā sadhástha ā^́

8.045.21a     stotrám índrāya gāyata
8.045.21b     purunr̥mṇā^́ya sátvane
8.045.21c     nákir yáṃ vr̥ṇvaté yudhí

8.045.22a     abhí tvā vr̥ṣabhā suté
8.045.22b     sutáṃ sr̥jāmi pītáye
8.045.22c     tr̥mpā^́ ví aśnuhī mádam

8.045.23a     mā^́ tvā mūrā^́ aviṣyávo
8.045.23b     mópahásvāna ā^́ dabhan
8.045.23c     mā^́kīm brahmadvíṣo vanaḥ

8.045.24a     ihá tvā góparīṇasā
8.045.24b     mahé mandantu rā^́dhase
8.045.24c     sáro gauró yáthā piba

8.045.25a     yā^́ vr̥trahā^́ parāváti
8.045.25b     sánā návā ca cucyuvé
8.045.25c     tā^́ saṃsátsu prá vocata

8.045.26a     ápibat kadrúvaḥ sutám
8.045.26b     índraḥ sahásrabāhuve
8.045.26c     átrādediṣṭa paúṃsiyam

8.045.27a     satyáṃ tát turváśe yádau
8.045.27b     vídāno ahnavāyiyám
8.045.27c     ví ānaṭ turváṇe śámi

8.045.28a     taráṇiṃ vo jánānãṃ
8.045.28b     tradáṃ vā^́jasya gómataḥ
8.045.28c     samānám u prá śaṃsiṣam

8.045.29a     r̥bhukṣáṇaṃ ná vártava
8.045.29b     ukthéṣu tugriyāvŕ̥dham
8.045.29c     índraṃ sóme sácā suté

8.045.30a     yáḥ kr̥ntád íd ví yoniyáṃ
8.045.30b     triśókāya girím pr̥thúm
8.045.30c     góbhyo gātúṃ níretave

8.045.31a     yád dadhiṣé manasyási
8.045.31b     mandānáḥ préd íyakṣasi
8.045.31c     mā^́ tát kar indra mr̥̄ḷáya⁺

8.045.32a     dabhráṃ cid dhí tuvā^́vataḥ
8.045.32b     kr̥táṃ śr̥ṇvé ádhi kṣámi
8.045.32c     jígātu indra te mánaḥ

8.045.33a     távéd u tā^́ḥ sukīrtáyo
8.045.33b     ásann utá práśastayaḥ
8.045.33c     yád indra mr̥̄ḷáyāsi⁺ naḥ

8.045.34a     mā^́ na ékasminn ā^́gasi
8.045.34b     mā^́ duváyor utá triṣú
8.045.34c     vádhīr mā^́ śūra bhū^́riṣu

8.045.35a     bibháyā hí tuvā^́vata
8.045.35b     ugrā^́d abhiprabhaṅgíṇaḥ
8.045.35c     dasmā^́d ahám r̥tīṣáhaḥ

8.045.36a     mā^́ sákhyuḥ śū^́nam ā^́ vide
8.045.36b     mā^́ putrásya prabhūvaso
8.045.36c     āvŕ̥tvad bhūtu te mánaḥ

8.045.37a     kó nú maryā ámithitaḥ
8.045.37b     sákhā sákhāyam abravīt
8.045.37c     jahā^́ kó asmád īṣate

8.045.38a     evā^́re vr̥ṣabhā suté
8.045.38b     ásinvan bhū^́ri āvayaḥ
8.045.38c     śvaghnī^́va nivátā cáran

8.045.39a     ā^́ ta etā^́ vacoyújā
8.045.39b     hárī gr̥bhṇe sumádrathā
8.045.39c     yád īm brahmábhya íd dádaḥ

8.045.40a     bhindhí víśvā ápa dvíṣaḥ
8.045.40b     pári bā^́dho jahī^́ mŕ̥dhaḥ
8.045.40c     vásu spārháṃ tád ā^́ bhara

8.045.41a     yád vīḷā^́v indra yát sthiré
8.045.41b     yát párśāne párābhr̥tam
8.045.41c     vásu spārháṃ tád ā^́ bhara

8.045.42a     yásya te viśvámānuṣo
8.045.42b     bhū^́rer dattásya védati
8.045.42c     vásu spārháṃ tád ā^́ bhara

46

8.046.01a     tuvā^́vataḥ purūvaso
8.046.01b     vayám indra praṇayitaḥ⁺
8.046.01c     smási sthātar harīṇãm

8.046.02a     tuvā^́ṃ hí satyám adrivo
8.046.02b     vidmá dātā^́ram iṣã^́m
8.046.02c     vidmá dātā^́raṃ rayīṇā^́m

8.046.03a     ā^́ yásya te mahimā^́naṃ
8.046.03b     śátamūte śátakrato
8.046.03c     gīrbhír gr̥ṇánti kārávaḥ

8.046.04a     sunīthó ghā sá mártiyo
8.046.04b     yám marúto yám aryamā^́
8.046.04c     mitráḥ pã^́nti adrúhaḥ

8.046.05a     dádhāno gómad áśvavat
8.046.05b     suvī^́riyam ādityájūta edhate
8.046.05c     sádā rāyā^́ puruspŕ̥hā

8.046.06a     tám índraṃ dā^́nam īmahe
8.046.06b     śavasānám ábhīruvam
8.046.06c     ī^́śānaṃ rāyá īmahe

8.046.07a     tásmin hí sánti ūtáyo
8.046.07b     víśvā ábhīravaḥ sácā
8.046.07c     tám ā^́ vahantu sáptayaḥ purūvásum
8.046.07d     mádāya hárayaḥ sutám

8.046.08a     yás te mádo váreṇiyo
8.046.08b     yá indra vr̥trahántamaḥ
8.046.08c     yá ādadíḥ súvar nŕ̥bhir
8.046.08d     yáḥ pŕ̥tanāsu duṣṭáraḥ

8.046.09a     yó duṣṭáro viśvavāra śravā^́yiyo
8.046.09b     vā^́jeṣu ásti tarutā^́
8.046.09c     sá naḥ śaviṣṭha sávanā^́ vaso gahi
8.046.09d     gaméma gómati vrajé

8.046.10a     gavyó ṣú ṇo yáthā purā^́
8.046.10b     aśvayā^́ utá rathayā^́
8.046.10c     varivasyá mahāmaha

8.046.11a     nahí te śūra rā^́dhaso
8.046.11b     ántaṃ vindā^́mi satrā^́
8.046.11c     daśasyā^́ no maghavan nū^́ cid adrivo
8.046.11d     dhíyo vā^́jebhir āvitha

8.046.12a     yá r̥ṣváḥ śrāvayátsakhā
8.046.12b     víśvét sá veda jánimā puruṣṭutáḥ
8.046.12c     táṃ víśve mā^́nuṣā yugā^́
8.046.12d     índraṃ havante taviṣáṃ yatásrucaḥ

8.046.13a     sá no vā^́jeṣu avitā^́ purūvásuḥ
8.046.13b     purasthātā^́ maghávā vr̥trahā^́ bhuvat

8.046.14a     abhí vo vīrám ándhaso mádeṣu gāya
8.046.14b     girā^́ mahā^́ vícetasam
8.046.14c     índraṃ nā^́ma śrútiyaṃ śākínaṃ váco yáthā

8.046.15a     dadī^́ rékaṇas tanúve dadír vásu
8.046.15b     dadír vā^́jeṣu puruhūta vājínam
8.046.15c     nūnám átha

8.046.16a     víśveṣãm irajyántaṃ vásūnāṃ
8.046.16b     sāsahvā^́ṃsaṃ cid asyá várpasaḥ
8.046.16c     kr̥payató nūnám áti átha

8.046.17a     maháḥ sú vo áram iṣe
8.046.17b     stávāmahe
8.046.17c     mīḷhúṣe araṃgamā^́ya jágmaye
8.046.17d     yajñébhir gīrbhír
8.046.17e     viśvámanuṣām marútām iyakṣasi
8.046.17f     gā^́ye tvā námasā girā^́

8.046.18a     yé pātáyante ájmabhir
8.046.18b     girīṇā^́ṃ snúbhir eṣãm
8.046.18c     yajñám mahiṣváṇīnãṃ
8.046.18d     sumnáṃ tuviṣváṇīnãm
8.046.18e     prá adhvaré

8.046.19a     prabhaṅgáṃ durmatīnã^́m
8.046.19b     índra śaviṣṭha ā^́ bhara
8.046.19c     rayím asmábhyaṃ yújyaṃ codayanmate
8.046.19d     jyáyiṣṭhaṃ⁺ codayanmate

8.046.20a     sánitaḥ súsanitar úgra
8.046.20b     cítra cétiṣṭha sū^́nr̥ta
8.046.20c     prāsáhā samrāṭ sáhuriṃ sáhantam
8.046.20d     bhujyúṃ vā^́jeṣu pū^́rviyam

8.046.21a     ā^́ sá etu yá ī^́vad ā^́m̐
8.046.21b     ádevaḥ pūrtám ādadé
8.046.21c     yáthā cid váśo aśviyáḥ
8.046.21d     pr̥thuśrávasi kānīté
8.046.21e     asyā^́ viúṣi ādadé

8.046.22a     ṣaṣṭíṃ sahásrā áśvyasyāyútāsanam
8.046.22b     úṣṭrānāṃ viṃśatíṃ śatā^́
8.046.22c     dáśa śyā^́vīnãṃ śatā^́
8.046.22d     dáśa tríaruṣīṇãṃ
8.046.22e     dáśa gávãṃ sahásrā

8.046.23a     dáśa śyāvā^́ r̥dhádrayo
8.046.23b     vītávārāsa āśávaḥ
8.046.23c     mathrā^́ nemíṃ ní vāvr̥tuḥ

8.046.24a     dā^́nāsaḥ pr̥thuśrávasaḥ
8.046.24b     kānītásya surā^́dhasaḥ
8.046.24c     ráthaṃ hiraṇyáyaṃ dádan
8.046.24d     máṃhiṣṭhaḥ sūrír abhũd
8.046.24e     várṣiṣṭham akr̥ta śrávaḥ

8.046.25a     ā^́ no vāyo mahé táne
8.046.25b     yāhí makhā^́ya pā^́jase
8.046.25c     vayáṃ hí te cakr̥mā^́ bhū^́ri dāváne
8.046.25d     sadyáś cin máhi dāváne

8.046.26a     yó áśvebhir váhate vásta usrā^́s
8.046.26b     tríḥ saptá saptatīnã^́m
8.046.26c     ebhíḥ sómebhiḥ somasúdbhiḥ somapā
8.046.26d     dānā^́ya śukrapūtapāḥ

8.046.27a     yó ma imáṃ cid u tmánā
8.046.27b     ámandac citráṃ dāváne
8.046.27c     araṭvé ákṣe náhuṣe sukŕ̥tvani
8.046.27d     sukŕ̥ttarāya sukrátuḥ

8.046.28a     ucathíye vápuṣi yáḥ suvarā^́ḷ
8.046.28b     utá vāyo ghr̥tasnã^́ḥ
8.046.28c     áśveṣitaṃ rájeṣitaṃ śúneṣitam
8.046.28d     prá ájma tád idáṃ nú tát

8.046.29a     ádha priyám iṣirā^́ya
8.046.29b     ṣaṣṭíṃ sahásrāsanam
8.046.29c     áśvānām ín ná vŕ̥ṣṇãm

8.046.30a     gā^́vo ná yūthám úpa yanti vádhraya
8.046.30b     úpa mā^́ yanti vádhrayaḥ

8.046.31a     ádha yác cā^́rathe gaṇé
8.046.31b     śatám úṣṭrām̐ ácikradat
8.046.31c     ádha śvítneṣu viṃśatíṃ śatā^́

8.046.32a     śatáṃ dāsé balbūthé
8.046.32b     vípras tárukṣa ā^́ dade
8.046.32c     té te vāyav imé jánā
8.046.32d     mádanti índragopā
8.046.32e     mádanti devágopāḥ

8.046.33a     ádha syā^́ yóṣaṇā mahī^́
8.046.33b     pratīcī^́ váśam aśviyám
8.046.33c     ádhirukmā ví nīyate

47

8.047.01a     máhi vo mahatā^́m ávo
8.047.01b     váruṇa mítra dāśúṣe
8.047.01c     yám ādityā abhí druhó
8.047.01d     rákṣathā ném agháṃ naśad
8.047.01e     aneháso va ūtáyaḥ
8.047.01f     suūtáyo va ūtáyaḥ

8.047.02a     vidā^́ devā aghā^́nãm
8.047.02b     ā^́dityāso apā^́kr̥tim
8.047.02c     pakṣā^́ váyo yáthopári
8.047.02d     ví asmé śárma yachata
8.047.02e     aneháso va ūtáyaḥ
8.047.02f     suūtáyo va ūtáyaḥ

8.047.03a     ví asmé ádhi śárma tát
8.047.03b     pakṣā^́ váyo ná yantana
8.047.03c     víśvāni viśvavedaso
8.047.03d     varūthíyā manāmahe
8.047.03e     aneháso va ūtáyaḥ
8.047.03f     suūtáyo va ūtáyaḥ

8.047.04a     yásmā árāsata kṣáyaṃ
8.047.04b     jīvā^́tuṃ ca prácetasaḥ
8.047.04c     mánor víśvasya ghéd imá
8.047.04d     ādityā^́ rāyá īśate
8.047.04e     aneháso va ūtáyaḥ
8.047.04f     suūtáyo va ūtáyaḥ

8.047.05a     pári ṇo vr̥ṇajann aghā^́
8.047.05b     durgā^́ṇi rathíyo yathā
8.047.05c     syā^́méd índrasya śármaṇi
8.047.05d     ādityā^́nām utā^́vasi
8.047.05e     aneháso va ūtáyaḥ
8.047.05f     suūtáyo va ūtáyaḥ

8.047.06a     parihvr̥téd anā^́ jáno
8.047.06b     yuṣmā^́dattasya vāyati
8.047.06c     dévā ádabhram āśa vo
8.047.06d     yám ādityā áhetana
8.047.06e     aneháso va ūtáyaḥ
8.047.06f     suūtáyo va ūtáyaḥ

8.047.07a     ná táṃ tigmáṃ caná tyájo
8.047.07b     ná drāsad abhí táṃ gurú
8.047.07c     yásmā u śárma saprátha
8.047.07d     ā^́dityāso árādhuvam
8.047.07e     aneháso va ūtáyaḥ
8.047.07f     suūtáyo va ūtáyaḥ

8.047.08a     yuṣmé devā ápi ṣmasi
8.047.08b     yúdhyanta iva vármasu
8.047.08c     yūyám mahó na énaso
8.047.08d     yūyám árbhād uruṣyata
8.047.08e     aneháso va ūtáyaḥ
8.047.08f     suūtáyo va ūtáyaḥ

8.047.09a     áditir na uruṣyatu
8.047.09b     áditiḥ śárma yachatu
8.047.09c     mātā^́ mitrásya reváto
8.047.09d     aryamṇó váruṇasya ca
8.047.09e     aneháso va ūtáyaḥ
8.047.09f     suūtáyo va ūtáyaḥ

8.047.10a     yád devāḥ śárma śaraṇáṃ
8.047.10b     yád bhadráṃ yád anāturám
8.047.10c     tridhā^́tu yád varūthíyaṃ
8.047.10d     tád asmā^́su ví yantana
8.047.10e     aneháso va ūtáyaḥ
8.047.10f     suūtáyo va ūtáyaḥ

8.047.11a     ā^́dityā áva hí khyáta
8.047.11b     ádhi kū^́lād iva spáśaḥ
8.047.11c     sutīrthám árvato yathā
8.047.11d     ánu no neṣathā sugám
8.047.11e     aneháso va ūtáyaḥ
8.047.11f     suūtáyo va ūtáyaḥ

8.047.12a     néhá bhadráṃ rakṣasvíne
8.047.12b     nā^́vayaí nópayā^́ utá
8.047.12c     gáve ca bhadráṃ dhenáve
8.047.12d     vīrā^́ya ca śravasyaté
8.047.12e     aneháso va ūtáyaḥ
8.047.12f     suūtáyo va ūtáyaḥ

8.047.13a     yád āvír yád apīcíyaṃ
8.047.13b     dévāso ásti duṣkr̥tám
8.047.13c     trité tád víśvam āptiyá
8.047.13d     āré asmád dadhātana
8.047.13e     aneháso va ūtáyaḥ
8.047.13f     suūtáyo va ūtáyaḥ

8.047.14a     yác ca góṣu duṣvápniyaṃ
8.047.14b     yác cāsmé duhitar divaḥ
8.047.14c     tritā^́ya tád vibhāvari
8.047.14d     āptiyā^́ya párā vaha
8.047.14e     aneháso va ūtáyaḥ
8.047.14f     suūtáyo va ūtáyaḥ

8.047.15a     niṣkáṃ vā ghā kr̥ṇávate
8.047.15b     srájaṃ vā duhitar divaḥ
8.047.15c     trité duṣvápniyaṃ sárvam
8.047.15d     āptiyé pári dadmasi
8.047.15e     aneháso va ūtáyaḥ
8.047.15f     suūtáyo va ūtáyaḥ

8.047.16a     tádannāya tádapase
8.047.16b     tám bhāgám upasedúṣe
8.047.16c     tritā^́ya ca dvitā^́ya ca
8.047.16d     úṣo duṣvápniyaṃ vaha
8.047.16e     aneháso va ūtáyaḥ
8.047.16f     suūtáyo va ūtáyaḥ

8.047.17a     yáthā kalā^́ṃ yáthā śapháṃ
8.047.17b     yátha rṇáṃ saṃnáyāmasi
8.047.17c     evā^́ duṣvápniyaṃ sárvam
8.047.17d     āptiyé sáṃ nayāmasi
8.047.17e     aneháso va ūtáyaḥ
8.047.17f     suūtáyo va ūtáyaḥ

8.047.18a     ájaiṣmādyā^́sanāma ca
8.047.18b     ábhūmā^́nāgaso vayám
8.047.18c     úṣo yásmād duṣvápniyād
8.047.18d     ábhaiṣmā^́pa tád uchatu
8.047.18e     aneháso va ūtáyaḥ
8.047.18f     suūtáyo va ūtáyaḥ

48

8.048.01a     svādór abhakṣi váyasaḥ sumedhā^́ḥ
8.048.01b     suādhíyo varivovíttarasya
8.048.01c     víśve yáṃ devā^́ utá mártiyāso
8.048.01d     mádhu bruvánto abhí saṃcáranti

8.048.02a     antáś ca prā^́gā áditir bhavāsi
8.048.02b     avayātā^́ háraso daíviyasya
8.048.02c     índav índrasya sakhiyáṃ juṣāṇáḥ
8.048.02d     śraúṣṭīva dhúram ánu rāyá r̥dhyāḥ

8.048.03a     ápāma sómam amŕ̥tā abhūma
8.048.03b     áganma jyótir ávidāma devā^́n
8.048.03c     kíṃ nūnám asmā^́n kr̥ṇavad árātiḥ
8.048.03d     kím u dhūrtír amr̥ta mártiyasya

8.048.04a     śáṃ no bhava hr̥dá ā^́ pītá indo
8.048.04b     pitéva soma sūnáve suśévaḥ
8.048.04c     sákheva sákhya uruśaṃsa dhī^́raḥ
8.048.04d     prá ṇa ā^́yur jīváse soma tārīḥ

8.048.05a     imé mā pītā^́ yaśása uruṣyávo
8.048.05b     ráthaṃ ná gā^́vaḥ sám anāha párvasu
8.048.05c     té mā rakṣantu visrásaś carítrãd
8.048.05d     utá mā srā^́mād yavayantu índavaḥ

8.048.06a     agníṃ ná mā mathitáṃ sáṃ didīpaḥ
8.048.06b     prá cakṣaya kr̥ṇuhí vásyaso naḥ
8.048.06c     áthā hí te máda ā^́ soma mánye
8.048.06d     revā^́m̐ iva prá carā puṣṭím ácha

8.048.07a     iṣiréṇa te mánasā sutásya
8.048.07b     bhakṣīmáhi pítriyasyeva rāyáḥ
8.048.07c     sóma rājan prá ṇa ā^́yūṃṣi tārīr
8.048.07d     áhānīva sū^́riyo vāsarā^́ṇi

8.048.08a     sóma rājan mr̥̄ḷáyā⁺ naḥ suastí
8.048.08b     táva smasi vratíyās tásya viddhi
8.048.08c     álarti dákṣa utá manyúr indo
8.048.08d     mā^́ no aryó anukāmám párā dāḥ

8.048.09a     tuváṃ hí nas tanúvaḥ soma gopā^́
8.048.09b     gā^́tre-gātre niṣasátthā nr̥cákṣāḥ
8.048.09c     yát te vayám praminā^́ma vratā^́ni
8.048.09d     sá no mr̥̄ḷa⁺ suṣakhā^́ deva vásyaḥ

8.048.10a     r̥dūdáreṇa sákhiyā saceya
8.048.10b     yó mā ná ríṣyed dhariaśva pītáḥ
8.048.10c     ayáṃ yáḥ sómo ní ádhāyi asmé
8.048.10d     tásmā índram pratíram emi ā^́yuḥ

8.048.11a     ápa tyā^́ asthur ánirā ámīvā
8.048.11b     nír atrasan támiṣīcīr ábhaiṣuḥ
8.048.11c     ā^́ sómo asmā^́m̐ aruhad víhāyā
8.048.11d     áganma yátra pratiránta ā^́yuḥ

8.048.12a     yó na índuḥ pitaro hr̥tsú pītó
8.048.12b     ámartiyo mártiyām̐ āvivéśa
8.048.12c     tásmai sómāya havíṣā vidhema
8.048.12d     mr̥̄ḷīké⁺ asya sumataú siyāma

8.048.13a     tuváṃ soma pitŕ̥bhiḥ saṃvidānó
8.048.13b     ánu dyā^́vāpr̥thivī^́ ā^́ tatantha
8.048.13c     tásmai ta indo havíṣā vidhema
8.048.13d     vayáṃ siyāma pátayo rayīṇā^́m

8.048.14a     trā^́tāro devā ádhi vocatā no
8.048.14b     mā^́ no nidrā^́ īśata mótá jálpiḥ
8.048.14c     vayáṃ sómasya viśváha priyā^́saḥ
8.048.14d     suvī^́rāso vidátham ā^́ vadema

8.048.15a     tuváṃ naḥ soma viśváto vayodhā^́s
8.048.15b     tuváṃ suvarvíd ā^́ viśā nr̥cákṣāḥ
8.048.15c     tuváṃ na inda ūtíbhiḥ sajóṣāḥ
8.048.15d     pāhí paścā^́tād utá vā purástāt

49

8.049.01a     abhí prá vaḥ surā^́dhasam
8.049.01b     índram arca yáthā vidé
8.049.01c     yó jaritŕ̥bhyo maghávā purūvásuḥ
8.049.01d     sahásreṇeva śíkṣati

8.049.02a     śatā^́nīkeva prá jigāti dhr̥ṣṇuyā^́
8.049.02b     hánti vr̥trā^́ṇi dāśúṣe
8.049.02c     girér iva prá rásā asya pinvire
8.049.02d     dátrāṇi purubhójasaḥ

8.049.03a     ā^́ tvā sutā^́sa índavo
8.049.03b     mádā yá indra girvaṇaḥ
8.049.03c     ā^́po ná vajrinn ánu okíyaṃ sáraḥ
8.049.03d     pr̥ṇánti śūra rā^́dhase

8.049.04a     anehásam pratáraṇaṃ vivákṣaṇam
8.049.04b     mádhvaḥ svā^́diṣṭham īm piba
8.049.04c     ā^́ yáthā · mandasānáḥ kirā^́si naḥ
8.049.04d     prá kṣudréva tmánā dhr̥ṣát

8.049.05a     ā^́ na stómam úpa dravád
8.049.05b     dhyānó° áśvo ná sótr̥bhiḥ
8.049.05c     yáṃ te svadhāvan svadáyanti dhenáva
8.049.05d     índra káṇveṣu rātáyaḥ

8.049.06a     ugráṃ ná vīráṃ námasópa sedima
8.049.06b     víbhūtim ákṣitāvasum
8.049.06c     udrī^́va vajrinn avató ná siñcaté
8.049.06d     kṣáranti indra dhītáyaḥ

8.049.07a     yád dha nūnáṃ yád vā yajñé
8.049.07b     yád vā pr̥thiviyā^́m ádhi
8.049.07c     áto no yajñám āśúbhir mahemata
8.049.07d     ugrá ugrébhir ā^́ gahi

8.049.08a     ajirā^́so hárayo yé ta āśávo
8.049.08b     vā^́tā iva prasakṣíṇaḥ
8.049.08c     yébhir ápatyam mánuṣaḥ parī^́yase
8.049.08d     yébhir víśvaṃ súvar dr̥śé

8.049.09a     etā^́vatas ta īmaha
8.049.09b     índra sumnásya gómataḥ
8.049.09c     yáthā prā^́vo maghavan médhiyātithiṃ
8.049.09d     yáthā nī^́pātithiṃ dháne

8.049.10a     yáthā káṇve maghavan trasádasyavi
8.049.10b     yáthā pakthé dáśavraje
8.049.10c     yáthā góśarye ásanor r̥jíśvani
8.049.10d     índra gómad dhíraṇyavat

50

8.050.01a     prá sú śrutáṃ surā^́dhasam
8.050.01b     árcā śakrám abhíṣṭaye
8.050.01c     yáḥ sunvaté stuvaté kā^́miyaṃ vásu
8.050.01d     sahásreṇeva máṃhate

8.050.02a     śatā^́nīkā hetáyo asya duṣṭárā
8.050.02b     índrasya samíṣo mahī^́ḥ
8.050.02c     girír ná bhujmā^́ maghávatsu pinvate
8.050.02d     yád īṃ sutā^́ ámandiṣuḥ

8.050.03a     yád īṃ sutā^́sa índavo
8.050.03b     abhí priyám ámandiṣuḥ
8.050.03c     ā^́po ná dhāyi sávanam ma ā^́ vaso
8.050.03d     dúghā ivópa dāśúṣe

8.050.04a     anehásaṃ vo hávamānam ūtáye
8.050.04b     mádhvaḥ kṣaranti dhītáyaḥ
8.050.04c     ā^́ tvā vaso hávamānāsa índava
8.050.04d     úpa stotréṣu dadhire

8.050.05a     ā^́ naḥ sóme suadhvará
8.050.05b     iyānó 'tyo° ná tośate
8.050.05c     yáṃ te svadāvan suádanti gūrtáyaḥ
8.050.05d     pauré chandayase hávam

8.050.06a     prá vīrám ugráṃ víviciṃ dhanaspŕ̥taṃ
8.050.06b     víbhūtiṃ rā^́dhaso maháḥ
8.050.06c     udrī^́va vajrinn avató vasutvanā^́
8.050.06d     sádā pīpetha dāśúṣe

8.050.07a     yád dha nūnám parāváti
8.050.07b     yád vā pr̥thiviyā^́ṃ diví
8.050.07c     yujāná indra háribhir mahemata
8.050.07d     r̥ṣvá r̥ṣvébhir ā^́ gahi

8.050.08a     rathirā^́so hárayo yé te asrídha
8.050.08b     ójo vā^́tasya píprati
8.050.08c     yébhir ní dásyum mánuṣo nighóṣayo
8.050.08d     yébhiḥ súvaḥ parī^́yase

8.050.09a     etā^́vatas te vaso
8.050.09b     vidyā^́ma śūra návyasaḥ
8.050.09c     yáthā prā^́va étaśaṃ kŕ̥tviye dháne
8.050.09d     yáthā váśaṃ dáśavraje

8.050.10a     yáthā káṇve maghavan médhe adhvaré
8.050.10b     dīrghánīthe dámūnasi
8.050.10c     yáthā góśarye ásiṣāso adrivo
8.050.10d     máyi gotráṃ hariśríyam

51

8.051.01a     yáthā mánau sā^́ṃvaraṇau
8.051.01b     sómam indrā^́pibaḥ sutám
8.051.01c     nī^́pātithau maghavan médhiyātithau
8.051.01d     púṣṭigau śrúṣṭigau sácā

8.051.02a     pārṣadvāṇáḥ práskaṇvaṃ sám asādayac
8.051.02b     cháyānaṃ jívrim úddhitam
8.051.02c     sahásrāṇi asiṣāsad gávām ŕ̥ṣis
8.051.02d     tuvóto dásyave vŕ̥kaḥ

8.051.03a     yá ukthébhir ná vindháte
8.051.03b     cikíd yá r̥ṣicódanaḥ
8.051.03c     índraṃ tám áchā vada návyasyā matī^́
8.051.03d     áriṣyantaṃ ná bhójase

8.051.04a     yásmā arkáṃ saptáśīrṣāṇam ānr̥cús
8.051.04b     tridhā^́tum uttamé padé
8.051.04c     sá tv ìmā^́ víśvā bhúvanāni cikradad
8.051.04d     ā^́d íj janiṣṭa paúṃsiyam

8.051.05a     yó no dātā^́ vásūnãm
8.051.05b     índraṃ táṃ hūmahe vayám
8.051.05c     vidmā^́ hí asya sumatíṃ návīyasīṃ
8.051.05d     gaméma gómati vrajé

8.051.06a     yásmai tuváṃ vaso dānā^́ya śíkṣasi
8.051.06b     sá rāyás póṣam aśnute
8.051.06c     táṃ tvā vayám maghavann indra girvaṇaḥ
8.051.06d     sutā^́vanto havāmahe

8.051.07a     kadā^́ caná starī^́r asi
8.051.07b     néndra saścasi dāśúṣe
8.051.07c     úpopén nú maghavan bhū^́ya ín nú te
8.051.07d     dā^́naṃ devásya pr̥cyate

8.051.08a     prá yó nanakṣé abhí ójasā kríviṃ
8.051.08b     vadhaíḥ śúṣṇaṃ nighoṣáyan
8.051.08c     yadéd ástambhīt pratháyann amū^́ṃ dívam
8.051.08d     ā^́d íj janiṣṭa pā^́rthivaḥ

8.051.09a     yásyāyáṃ víśva ā^́riyo
8.051.09b     dā^́saḥ śevadhipā^́ aríḥ
8.051.09c     tiráś cid aryé rúśame pávīravi
8.051.09d     túbhyét só ajyate rayíḥ

8.051.10a     turaṇyávo mádhumantaṃ ghr̥taścútaṃ
8.051.10b     víprāso arkám ānr̥cuḥ
8.051.10c     asmé rayíḥ paprathe vŕ̥ṣṇiyaṃ śávo
8.051.10d     asmé svānā^́sa° índavaḥ

52

8.052.01a     yáthā mánau vívasvati
8.052.01b     sómaṃ śakrā^́pibaḥ sutám
8.052.01c     yáthā trité chánda indra jújoṣasi
8.052.01d     āyaú mādayase sácā

8.052.02a     pŕ̥ṣadhre médhiye mātaríśvani
8.052.02b     índra svāné° ámandathāḥ
8.052.02c     yáthā sómaṃ dáśaśipre dáśoṇiye
8.052.02d     syū^́maraśmāv ŕ̥jūnasi

8.052.03a     yá ukthā^́ kévalā dadhé
8.052.03b     yáḥ sómaṃ dhr̥ṣitā^́pibat
8.052.03c     yásmai víṣṇus trī^́ṇi padā^́ vicakramá
8.052.03d     úpa mitrásya dhármabhiḥ

8.052.04a     yásya tvám · indra stómeṣu cākáno
8.052.04b     vā^́je vājiñ chatakrato
8.052.04c     táṃ tvā vayáṃ sudúghām iva godúho
8.052.04d     juhūmási śravasyávaḥ

8.052.05a     yó no dātā^́ sá naḥ pitā^́
8.052.05b     mahā^́m̐ ugrá īśānakŕ̥t
8.052.05c     áyāmann ugró maghávā purūvásur
8.052.05d     gór áśvasya prá dātu naḥ

8.052.06a     yásmai tuváṃ vaso dānā^́ya máṃhase
8.052.06b     sá rāyás póṣam invati
8.052.06c     vasūyávo vásupatiṃ śatákratuṃ
8.052.06d     stómair índraṃ havāmahe

8.052.07a     kadā^́ caná prá yuchasi
8.052.07b     ubhé ní pāsi jánmanī
8.052.07c     túrīyāditya hávanaṃ ta indriyám
8.052.07d     ā^́ tasthāv amŕ̥taṃ diví

8.052.08a     yásmai tuvám maghavann indra girvaṇaḥ
8.052.08b     śíkṣo śíkṣasi dāśúṣe
8.052.08c     asmā^́kaṃ gíra utá suṣṭutíṃ vaso
8.052.08d     kaṇvavác chr̥ṇudhī hávam

8.052.09a     ástāvi mánma pūrviyám
8.052.09b     bráhma índrāya vocata
8.052.09c     pūrvī^́r r̥tásya br̥hatī^́r anūṣata
8.052.09d     stotúr medhā^́ asr̥kṣata

8.052.10a     sám índro rā^́yo br̥hatī^́r adhūnuta
8.052.10b     sáṃ kṣoṇī^́ sám u sū^́riyam
8.052.10c     sáṃ śukrā^́saḥ śúcayaḥ sáṃ gávāśiraḥ
8.052.10d     sómā índram amandiṣuḥ

53

8.053.01a     upamáṃ tvā maghónãṃ
8.053.01b     jyéṣṭhaṃ ca vr̥ṣabhā^́ṇãm
8.053.01c     pūrbhíttamam maghavann indra govídam
8.053.01d     ī^́śānaṃ rāyá īmahe

8.053.02a     yá āyúṃ kútsam atithigvám árdayo
8.053.02b     vāvr̥dhānó divé-dive
8.053.02c     táṃ tvā vayáṃ háriaśvaṃ śatákratuṃ
8.053.02d     vājayánto havāmahe

8.053.03a     ā^́ no víśveṣãṃ rásam
8.053.03b     mádhvaḥ siñcantu ádrayaḥ
8.053.03c     yé parāváti sunviré jáneṣu ā^́
8.053.03d     yé arvāváti índavaḥ

8.053.04a     víśvā dvéṣāṃsi jahí cā^́va cā^́ kr̥dhi
8.053.04b     víśve sanvantu ā^́ vásu
8.053.04c     śī^́ṣṭeṣu cit te madirā^́so aṃśávo
8.053.04d     yátrā sómasya tr̥mpási

8.053.05a     índra nédīya éd ihi
8.053.05b     mitámedhābhir ūtíbhiḥ
8.053.05c     ā^́ śaṃtama śáṃtamābhir abhíṣṭibhir
8.053.05d     ā^́ suāpe suāpíbhiḥ

8.053.06a     ājitúraṃ sátpatiṃ viśvácarṣaṇiṃ
8.053.06b     kr̥dhí prajā^́su ā^́bhagam
8.053.06c     prá sū^́ tirā śácībhir yé ta ukthínaḥ
8.053.06d     krátum punatá ānuṣák

8.053.07a     yás te sā^́dhiṣṭho ávase
8.053.07b     té siyāma bháreṣu te
8.053.07c     vayáṃ hótrābhir utá deváhūtibhiḥ
8.053.07d     sasavā^́ṃso manāmahe

8.053.08a     aháṃ hí te harivo bráhma vājayúr
8.053.08b     ājíṃ yā^́mi sádotíbhiḥ
8.053.08c     tuvā^́m íd evá tám áme sám aśvayúr
8.053.08d     gavyúr ágre mathīnã^́m

54

8.054.01a     etát ta indra vīríyaṃ
8.054.01b     gīrbhír gr̥ṇánti kārávaḥ
8.054.01c     té stóbhanta ū^́rjam āvan ghr̥taścútam
8.054.01d     paurā^́so nakṣan dhītíbhiḥ

8.054.02a     nákṣanta índram ávase sukr̥tyáyā
8.054.02b     yéṣāṃ sutéṣu mándase
8.054.02c     yáthā saṃvarté ámado yáthā kr̥śá
8.054.02d     evā^́smé indra matsuva

8.054.03a     ā^́ no víśve sajóṣaso
8.054.03b     dévāso gántanópa naḥ
8.054.03c     vásavo rudrā^́ ávase na ā^́ gamañ
8.054.03d     chr̥ṇvántu marúto hávam

8.054.04a     pūṣā^́ víṣṇur hávanam me sárasvatī
8.054.04b     ávantu saptá síndhavaḥ
8.054.04c     ā^́po vā^́taḥ párvatāso vánaspátiḥ
8.054.04d     śr̥ṇótu pr̥thivī^́ hávam

8.054.05a     yád indra rā^́dho ásti te
8.054.05b     mā^́ghonam maghavattama
8.054.05c     téna no bodhi sadhamā^́diyo vr̥dhé
8.054.05d     bhágo dānā^́ya vr̥trahan

8.054.06a     ā^́jipate nr̥pate tuvám íd dhí no
8.054.06b     vā^́ja ā^́ vakṣi sukrato
8.054.06c     vītī^́ hótrābhir utá devávītibhiḥ
8.054.06d     sasavā^́ṃso ví śr̥ṇvire

8.054.07a     sánti hí aryá āśíṣa
8.054.07b     índra ā^́yur jánānãm
8.054.07c     asmā^́n nakṣasva maghavann úpā^́vase
8.054.07d     dhukṣásva pipyúṣīm íṣam

8.054.08a     vayáṃ ta indra stómebhir vidhema
8.054.08b     tvám asmā^́kaṃ śatakrato
8.054.08c     máhi sthūráṃ śaśayáṃ rā^́dho áhrayam
8.054.08d     práskaṇvāya ní tośaya

55

8.055.01a     bhū^́rī^́d índrasya vīríyaṃ
8.055.01b     ví ákhyam abhí ā^́yati
8.055.01c     rā^́dhas te dasyave vr̥ka

8.055.02a     śatáṃ śvetā^́sa ukṣáṇo
8.055.02b     diví tā^́ro ná rocante
8.055.02c     mahnā^́ dívaṃ ná tastabhuḥ

8.055.03a     śatáṃ veṇū^́ñ chatáṃ śúnaḥ
8.055.03b     śatáṃ cármāṇi mlātā^́ni
8.055.03c     śatám me balbajastukā^́
8.055.03d     áruṣīṇāṃ cátuḥśatam

8.055.04a     sudevā^́ stha kāṇvāyanā
8.055.04b     váyo-vayo vicarántaḥ
8.055.04c     áśvāso ná caṅkramata

8.055.05a     ā^́d ít sāptásya carkirann
8.055.05b     ā^́nūnasya máhi śrávaḥ
8.055.05c     śyā^́vīr atidhvasán patháś
8.055.05d     cákṣuṣā caná saṃnáśe

56

8.056.01a     práti te dasyave vr̥ka
8.056.01b     rā^́dho adarśi áhrayam
8.056.01c     diyaúr ná prathinā^́ śávaḥ

8.056.02a     dáśa máhyam pautakratáḥ
8.056.02b     sahásrā dásyave vŕ̥kaḥ
8.056.02c     nítyād rāyó amaṃhata

8.056.03a     śatám me gardabhā^́nãṃ
8.056.03b     śatám ū^́rṇāvatīnãm
8.056.03c     śatáṃ dāsā^́m̐ áti srájaḥ

8.056.04a     tátro ápi prā^́ṇīyata
8.056.04b     pūtákratāyai víaktā
8.056.04c     áśvānām ín ná yūthíyām

8.056.05a     áceti agníś cikitúr
8.056.05b     havyavā^́ṭ sá sumádrathaḥ
8.056.05c     agníḥ śukréṇa śocíṣā
8.056.05d     br̥hát sū^́ro arocata
8.056.05e     diví sū^́ryo arocata

57

8.057.01a     yuváṃ devā krátunā pūrviyéṇa
8.057.01b     yuktā^́ ráthena taviṣáṃ yajatrā
8.057.01c     ā^́gachataṃ nāsatiyā śácībhir
8.057.01d     idáṃ tr̥tī^́yaṃ sávanam pibāthaḥ

8.057.02a     yuvā^́ṃ devā^́s tráya ekādaśā^́saḥ
8.057.02b     satyā^́ḥ satyásya dadr̥śe purástāt
8.057.02c     asmā^́kaṃ yajñáṃ sávanaṃ juṣāṇā^́
8.057.02d     pātáṃ sómam aśvinā dī^́diagnī

8.057.03a     panā^́yiyaṃ tád aśvinā kr̥táṃ vāṃ
8.057.03b     vr̥ṣabhó divó rájasaḥ pr̥thivyā^́ḥ
8.057.03c     sahásraṃ śáṃsā utá yé gáviṣṭau
8.057.03d     sárvām̐ ít tā^́m̐ úpa yātā píbadhyai

8.057.04a     ayáṃ vām bhāgó níhito yajatrā
8.057.04b     imā^́ gíro nāsatiyópa yātam
8.057.04c     píbataṃ sómam mádhumantam asmé
8.057.04d     prá dāśuvā^́ṃsam avataṃ śácībhiḥ

58

8.058.01a     yám r̥tvíjo bahudhā^́ kalpáyantaḥ
8.058.01b     sácetaso yajñám imáṃ váhanti
8.058.01c     yó 'nūcānó° brāhmaṇó yuktá āsīt
8.058.01d     kā^́ svit tátra yájamānasya saṃvít

8.058.02a     éka evā^́gnír bahudhā^́ sámiddha
8.058.02b     ékaḥ sū^́ryo víśvam ánu prábhūtaḥ
8.058.02c     ékaivóṣā^́ḥ sárvam idáṃ ví bhāti
8.058.02d     ékaṃ vā^́ idáṃ ví babhūva sárvam

8.058.03a     jyótiṣmantaṃ ketumántaṃ tricakráṃ
8.058.03b     sukháṃ ráthaṃ suṣádam bhū^́rivāram
8.058.03c     citrā^́maghā yásya yóge 'dhijajñe
8.058.03d     táṃ vāṃ huvé áti riktam† píbadhyai

59

8.059.01a     imā^́ni vām bhāgadhéyāni sisrata
8.059.01b     índrāvaruṇā prá mahé sutéṣu vām
8.059.01c     yajñé-yajñe ha sávanā bhuraṇyátho
8.059.01d     yát sunvaté yájamānāya śíkṣathaḥ

8.059.02a     niṣṣídhvarīr óṣadhīr ā^́pa āstām
8.059.02b     índrāvaruṇā mahimā^́nam ā^́śata
8.059.02c     yā^́ sísratū rájasaḥ pāré ádhvano
8.059.02d     yáyoḥ śátrur nákir ā^́deva óhate

8.059.03a     satyáṃ tád indrāvaruṇā kr̥śásya vām
8.059.03b     mádhva ūrmíṃ duhate saptá vā^́ṇīḥ
8.059.03c     tā^́bhir dāśvā^́ṃsam avataṃ śubhas patī
8.059.03d     yó vām ádabdho abhí pā^́ti cíttibhiḥ

8.059.04a     ghr̥taprúṣaḥ saúmiyā jīrádānavaḥ
8.059.04b     saptá svásāraḥ sádana r̥tásya
8.059.04c     yā^́ ha vām indrāvaruṇā ghr̥taścútas
8.059.04d     tā^́bhir dhattaṃ yájamānāya śikṣatam

8.059.05a     ávocāma mahaté saúbhagāya satyáṃ
8.059.05b     tveṣā^́bhiyām mahimā^́nam indriyám
8.059.05c     asmā^́n sú indrāvaruṇā ghr̥taścútas
8.059.05d     tríbhiḥ sāptébhir avataṃ śubhas patī

8.059.06a     índrāvaruṇā yád r̥ṣíbhyo manīṣā^́ṃ
8.059.06b     vācó matíṃ śrutám adattam ágre
8.059.06c     yā^́ni sthā^́nāni asr̥janta dhī^́rā
8.059.06d     yajñáṃ tanvānā^́s tápasābhy àpaśyam

8.059.07a     índrāvaruṇā saumanasám ádr̥ptaṃ
8.059.07b     rāyás póṣaṃ yájamāneṣu dhattam
8.059.07c     prajā^́m puṣṭím bhūtim asmā^́su dhattaṃ
8.059.07d     dīrghāyutvā^́ya prá tirataṃ na ā^́yuḥ

60

8.060.01a     ágna ā^́ yāhi agníbhir
8.060.01b     hótāraṃ tvā vr̥ṇīmahe
8.060.01c     ā^́ tvā^́m anaktu práyatā havíṣmatī
8.060.01d     yájiṣṭham barhír āsáde

8.060.02a     áchā hí tvā sahasaḥ sūno aṅgiraḥ
8.060.02b     srúcaś cáranti adhvaré
8.060.02c     ūrjó nápātaṃ ghr̥tákeśam īmahe
8.060.02d     agníṃ yajñéṣu pūrviyám

8.060.03a     ágne kavír vedhā^́ asi
8.060.03b     hótā pavāka⁺ yákṣiyaḥ
8.060.03c     mandró yájiṣṭho adhvaréṣu ī^́ḍiyo
8.060.03d     víprebhiḥ śukra mánmabhiḥ

8.060.04a     ádrogham ā^́ vahośató yaviṣṭhiya
8.060.04b     devā^́m̐ ajasra vītáye
8.060.04c     abhí práyāṃsi súdhitā^́ vaso gahi
8.060.04d     mándasva dhītíbhir hitáḥ

8.060.05a     tuvám ít sapráthā asi
8.060.05b     ágne trātar r̥tás kavíḥ
8.060.05c     tuvā^́ṃ víprāsaḥ samidhāna dīdiva
8.060.05d     ā^́ vivāsanti vedhásaḥ

8.060.06a     śócā śociṣṭha dīdihí viśé máyo
8.060.06b     rā^́sva stotré mahā^́m̐ asi
8.060.06c     devā^́nāṃ śárman máma santu sūráyaḥ
8.060.06d     śatrūṣā^́haḥ suagnáyaḥ

8.060.07a     yáthā cid vr̥ddhám atasám
8.060.07b     ágne saṃjū^́rvasi kṣámi
8.060.07c     evā^́ daha mitramaho yó asmadhrúg
8.060.07d     durmánmā káś ca vénati

8.060.08a     mā^́ no mártāya ripáve rakṣasvíne
8.060.08b     mā^́gháśaṃsāya rīradhaḥ
8.060.08c     ásredhadbhis taráṇibhir yaviṣṭhiya
8.060.08d     śivébhiḥ pāhi pāyúbhiḥ

8.060.09a     pāhí no agna ékayā
8.060.09b     pāhí utá dvitī^́yayā
8.060.09c     pāhí gīrbhís tisŕ̥bhir ūrjãm pate
8.060.09d     pāhí catasŕ̥bhir vaso

8.060.10a     pāhí víśvasmād rakṣáso árāvaṇaḥ
8.060.10b     prá sma vā^́jeṣu no ava
8.060.10c     tuvā^́m íd dhí nédiṣṭhaṃ devátātaya
8.060.10d     āpíṃ nákṣāmahe vr̥dhé

8.060.11a     ā^́ no agne vayovŕ̥dhaṃ
8.060.11b     rayím pavāka⁺ śáṃsiyam
8.060.11c     rā^́svā ca na upamāte puruspŕ̥haṃ
8.060.11d     súnītī sváyaśastaram

8.060.12a     yéna váṃsāma pŕ̥tanāsu śárdhatas
8.060.12b     táranto aryá ādíśaḥ
8.060.12c     sá tváṃ no vardha práyasā śacīvaso
8.060.12d     jínvā dhíyo vasuvídaḥ

8.060.13a     śíśāno vr̥ṣabhó yathā
8.060.13b     agníḥ śŕ̥ṅge dávidhuvat
8.060.13c     tigmā^́ asya hánavo ná pratidhŕ̥ṣe
8.060.13d     sujámbhaḥ sáhaso yahúḥ

8.060.14a     nahí te agne vr̥ṣabha pratidhŕ̥ṣe
8.060.14b     jámbhāso yád vitíṣṭhase
8.060.14c     sá tváṃ no hotaḥ súhutaṃ havíṣ kr̥dhi
8.060.14d     váṃsvā no vā^́riyā purú

8.060.15a     śéṣe váneṣu mātaróḥ
8.060.15b     sáṃ tvā mártāsa indhate
8.060.15c     átandro havyā^́ vahasi haviṣkŕ̥ta
8.060.15d     ā^́d íd devéṣu rājasi

8.060.16a     saptá hótāras tám íd īḷate tuvā
8.060.16b     ágne sutyájam áhrayam
8.060.16c     bhinátsi ádriṃ tápasā ví śocíṣā
8.060.16d     prā^́gne tiṣṭha jánām̐ áti

8.060.17a     agním-agniṃ vo ádhriguṃ
8.060.17b     huvéma vr̥ktábarhiṣaḥ
8.060.17c     agníṃ hitáprayasaḥ śaśvatī^́ṣu ā^́
8.060.17d     hótāraṃ carṣaṇīnã^́m

8.060.18a     kétena śárman sacate suṣāmáṇi
8.060.18b     ágne túbhyaṃ cikitvánā
8.060.18c     iṣaṇyáyā naḥ pururū^́pam ā^́ bhara
8.060.18d     vā^́jaṃ nédiṣṭham ūtáye

8.060.19a     ágne járitar viśpátis
8.060.19b     tepānó deva rakṣásaḥ
8.060.19c     áproṣivān gr̥hápatir mahā^́m̐ asi
8.060.19d     divás pāyúr duroṇayúḥ

8.060.20a     mā^́ no rákṣa ā^́ veśīd āghr̥ṇīvaso
8.060.20b     mā^́ yātúr yātumā^́vatām
8.060.20c     parogavyūtí ánirām ápa kṣúdham
8.060.20d     ágne sédha rakṣasvínaḥ

61

8.061.01a     ubháyaṃ śr̥ṇávac ca na
8.061.01b     índro arvā^́g idáṃ vácaḥ
8.061.01c     satrā^́ciyā maghávā sómapītaye
8.061.01d     dhiyā^́ śáviṣṭha ā^́ gamat

8.061.02a     táṃ hí svarā^́jaṃ vr̥ṣabháṃ tám ójase
8.061.02b     dhiṣáṇe niṣṭatakṣátuḥ
8.061.02c     utópamā^́nām prathamó ní ṣīdasi
8.061.02d     sómakāmaṃ hí te mánaḥ

8.061.03a     ā^́ vr̥ṣasva purūvaso
8.061.03b     sutásya indra ándhasaḥ
8.061.03c     vidmā^́ hí tvā harivaḥ pr̥tsú sāsahím
8.061.03d     ádhr̥ṣṭaṃ cid dadhr̥ṣváṇim

8.061.04a     áprāmisatya maghavan táthéd asad
8.061.04b     índra krátvā yáthā váśaḥ
8.061.04c     sanéma vā^́jaṃ táva śiprin ávasā
8.061.04d     makṣū^́ cid yánto adrivaḥ

8.061.05a     śagdhí ū ṣú śacīpata
8.061.05b     índra víśvābhir ūtíbhiḥ
8.061.05c     bhágaṃ ná hí tvā yaśásaṃ vasuvídam
8.061.05d     ánu śūra cárāmasi

8.061.06a     pauró áśvasya purukŕ̥d gávām asi
8.061.06b     útso deva hiraṇyáyaḥ
8.061.06c     nákir hí dā^́nam parimárdhiṣat tuvé
8.061.06d     yád-yad yā^́mi tád ā^́ bhara

8.061.07a     tuváṃ hí éhi cérave
8.061.07b     vidā^́ bhágaṃ vásuttaye
8.061.07c     úd vāvr̥ṣasva maghavan gáviṣṭaya
8.061.07d     úd indra áśvamiṣṭaye

8.061.08a     tuvám purū^́ sahásrāṇi śatā^́ni ca
8.061.08b     yūthā^́ dānā^́ya maṃhase
8.061.08c     ā^́ puraṃdaráṃ cakr̥ma vípravacasa
8.061.08d     índraṃ gā^́yanto ávase

8.061.09a     avipró vā yád ávidhad
8.061.09b     vípro vā indra te vácaḥ
8.061.09c     sá prá mamandat tuvāyā^́ śatakrato
8.061.09d     prā^́cāmanyo áhaṃsana

8.061.10a     ugrábāhur mrakṣakŕ̥tvā puraṃdaró
8.061.10b     yádi me śr̥ṇávad dhávam
8.061.10c     vasūyávo vásupatiṃ śatákratuṃ
8.061.10d     stómair índraṃ havāmahe

8.061.11a     ná pāpā^́so manāmahe
8.061.11b     nā^́rāyāso ná jáḷhavaḥ
8.061.11c     yád ín nu índraṃ vŕ̥ṣaṇaṃ sácā suté
8.061.11d     sákhāyaṃ kr̥ṇávāmahai

8.061.12a     ugráṃ yuyujma pŕ̥tanāsu sāsahím
8.061.12b     r̥ṇákātim ádābhiyam
8.061.12c     védā bhr̥máṃ cit sánitā rathī^́tamo
8.061.12d     vājínaṃ yám íd ū náśat

8.061.13a     yáta indra bháyāmahe
8.061.13b     táto no ábhayaṃ kr̥dhi
8.061.13c     mághavañ chagdhí táva tán na ūtíbhir
8.061.13d     ví dvíṣo ví mŕ̥dho jahi

8.061.14a     tuváṃ hí rādhaspate rā^́dhaso maháḥ
8.061.14b     kṣáyasya ási vidhatáḥ
8.061.14c     táṃ tvā vayám maghavann indra girvaṇaḥ
8.061.14d     sutā^́vanto havāmahe

8.061.15a     índra spáḷ utá vr̥trahā^́
8.061.15b     paraspā^́ no váreṇiyaḥ
8.061.15c     sá no rakṣiṣac caramáṃ sá madhyamáṃ
8.061.15d     sá paścā^́t pātu naḥ puráḥ

8.061.16a     tváṃ naḥ paścā^́d adharā^́d uttarā^́t purá
8.061.16b     índra ní pāhi viśvátaḥ
8.061.16c     āré asmát kr̥ṇuhi daíviyam bhayám
8.061.16d     āré hetī^́r ádevĩḥ

8.061.17a     adyá-adyā śuváḥ-śuva
8.061.17b     índra trā^́sva paré ca naḥ
8.061.17c     víśvā ca no jaritr̥̄^́n satpate áhā
8.061.17d     dívā náktaṃ ca rakṣiṣaḥ

8.061.18a     prabhaṅgī^́ śū^́ro maghávā tuvī^́maghaḥ
8.061.18b     sámmiślo viríyāya kám
8.061.18c     ubhā^́ te bāhū^́ vŕ̥ṣaṇā śatakrato
8.061.18d     ní yā^́ vájram mimikṣátuḥ

62

8.062.01a     prá ū asmā úpastutim
8.062.01b     bháratā yáj jújoṣati
8.062.01c     ukthaír índrasya mā^́hinaṃ
8.062.01d     váyo vardhanti somíno
8.062.01e     bhadrā^́ índrasya rātáyaḥ

8.062.02a     ayujó ásamo nŕ̥bhir
8.062.02b     ékaḥ kr̥ṣṭī^́r ayā^́siyaḥ
8.062.02c     pūrvī^́r áti prá vāvr̥dhe
8.062.02d     víśvā jātā^́ni ójasā
8.062.02e     bhadrā^́ índrasya rātáyaḥ

8.062.03a     áhitena cid árvatā
8.062.03b     jīrádānuḥ siṣāsati
8.062.03c     pravā^́cyam indra tát táva
8.062.03d     vīríyāṇi kariṣyató
8.062.03e     bhadrā^́ índrasya rātáyaḥ

8.062.04a     ā^́ yāhi kr̥ṇávāma ta
8.062.04b     índra bráhmāṇi várdhanā
8.062.04c     yébhiḥ śaviṣṭha cākáno
8.062.04d     bhadrám ihá śravasyaté
8.062.04e     bhadrā^́ índrasya rātáyaḥ

8.062.05a     dhr̥ṣatáś cid dhr̥ṣán mánaḥ
8.062.05b     kr̥ṇóṣi indra yát tuvám
8.062.05c     tīvraíḥ sómaiḥ saparyató
8.062.05d     námobhiḥ pratibhū^́ṣato
8.062.05e     bhadrā^́ índrasya rātáyaḥ

8.062.06a     áva caṣṭa ŕ̥cīṣamo
8.062.06b     avatā^́m̐ iva mā^́nuṣaḥ
8.062.06c     juṣṭvī^́ dákṣasya somínaḥ
8.062.06d     sákhāyaṃ kr̥ṇute yújam
8.062.06e     bhadrā^́ índrasya rātáyaḥ

8.062.07a     víśve ta indra vīríyaṃ
8.062.07b     devā^́ ánu krátuṃ daduḥ
8.062.07c     bhúvo víśvasya gópatiḥ puruṣṭuta
8.062.07d     bhadrā^́ índrasya rātáyaḥ

8.062.08a     gr̥ṇé tád indra te śáva
8.062.08b     upamáṃ devátātaye
8.062.08c     yád dháṃsi vr̥trám ójasā śacīpate
8.062.08d     bhadrā^́ índrasya rātáyaḥ

8.062.09a     sámaneva vapuṣyatáḥ
8.062.09b     kr̥ṇávan mā^́nuṣā yugā^́
8.062.09c     vidé tád índraś cétanam ádha śrutó
8.062.09d     bhadrā^́ índrasya rātáyaḥ

8.062.10a     új jātám indra te śáva
8.062.10b     út tuvā^́m út táva krátum
8.062.10c     bhū^́rigo bhū^́ri vāvr̥dhur
8.062.10d     mághavan táva śármaṇi
8.062.10e     bhadrā^́ índrasya rātáyaḥ

8.062.11a     aháṃ ca tváṃ ca vr̥trahan
8.062.11b     sáṃ yujyāva saníbhya ā^́
8.062.11c     arātīvā^́ cid adrivo
8.062.11d     ánu nau śūra maṃsate
8.062.11e     bhadrā^́ índrasya rātáyaḥ

8.062.12a     satyám íd vā^́ u táṃ vayám
8.062.12b     índraṃ stavāma nā^́nr̥tam
8.062.12c     mahā^́m̐ ásunvato vadhó
8.062.12d     bhū^́ri jyótīṃṣi sunvató
8.062.12e     bhadrā^́ índrasya rātáyaḥ

63

8.063.01a     sá pūrviyó mahā^́nãṃ
8.063.01b     venáḥ krátubhir ānaje
8.063.01c     yásya dvā^́rā mánuṣ pitā^́
8.063.01d     devéṣu dhíya ānajé

8.063.02a     divó mā^́naṃ ná út sadan
8.063.02b     sómapr̥ṣṭhāso ádrayaḥ
8.063.02c     ukthā^́ bráhma ca śáṃsiyā

8.063.03a     sá vidvā^́m̐ áṅgirobhiya
8.063.03b     índro gā^́ avr̥ṇod ápa
8.063.03c     stuṣé tád asya paúṃsiyam

8.063.04a     sá pratnáthā kavivr̥dhá
8.063.04b     índro vākásya vakṣáṇiḥ
8.063.04c     śivó arkásya hómani
8.063.04d     asmatrā^́ gantu ávase

8.063.05a     ā^́d ū nú te ánu krátuṃ
8.063.05b     svā^́hā várasya yájyavaḥ
8.063.05c     śvātrám arkā^́ anūṣata
8.063.05d     índra gotrásya dāváne

8.063.06a     índre víśvāni vīríyā
8.063.06b     kr̥tā^́ni kártuvāni ca
8.063.06c     yám arkā^́ adhvaráṃ vidúḥ

8.063.07a     yát pā^́ñcajanyayā viśā^́
8.063.07b     índre ghóṣā ásr̥kṣata
8.063.07c     ástr̥ṇād barháṇā vipó
8.063.07d     aryó mā^́nasya sá kṣáyaḥ

8.063.08a     iyám u te ánuṣṭutiś
8.063.08b     cakr̥ṣé tā^́ni paúṃsiyā
8.063.08c     prā^́vaś cakrásya vartaním

8.063.09a     asyá vŕ̥ṣṇo viódana
8.063.09b     urú kramiṣṭa jīváse
8.063.09c     yávaṃ ná paśvá ā^́ dade

8.063.10a     tád dádhānā avasyávo
8.063.10b     yuṣmā^́bhir dákṣapitaraḥ
8.063.10c     syā^́ma marútvato vr̥dhé

8.063.11a     báḷ r̥tvíyāya dhā^́mana
8.063.11b     ŕ̥kvabhiḥ śūra nonumaḥ
8.063.11c     jéṣāmendra tváyā yujā^́

8.063.12a     asmé rudrā^́ mehánā párvatāso
8.063.12b     vr̥trahátye bhárahūtau sajóṣāḥ
8.063.12c     yáḥ śáṃsate stuvaté dhā^́yi pajrá
8.063.12d     índrajyeṣṭhā asmā^́m̐ avantu devā^́ḥ

64

8.064.01a     út tvā mandantu stómāḥ
8.064.01b     kr̥ṇuṣvá rā^́dho adrivaḥ
8.064.01c     áva brahmadvíṣo jahi

8.064.02a     padā^́ paṇī^́m̐r arādháso
8.064.02b     ní bādhasva mahā^́m̐ asi
8.064.02c     nahí tvā káś caná práti

8.064.03a     tvám īśiṣe sutā^́nãm
8.064.03b     índra tvám ásutānãm
8.064.03c     tuváṃ rā^́jā jánānãm

8.064.04a     éhi préhi kṣáyo diví
8.064.04b     āghóṣañ carṣaṇīnã^́m
8.064.04c     óbhé pr̥ṇāsi ródasī

8.064.05a     tiyáṃ cit párvataṃ giríṃ
8.064.05b     śatávantaṃ sahasríṇam
8.064.05c     ví stotŕ̥bhyo rurojitha

8.064.06a     vayám u tvā dívā suté
8.064.06b     vayáṃ náktaṃ havāmahe
8.064.06c     asmā^́kaṃ kā^́mam ā^́ pr̥ṇa

8.064.07a     kúva syá vr̥ṣabhó yúvā
8.064.07b     tuvigrī^́vo ánānataḥ
8.064.07c     brahmā^́ kás táṃ saparyati

8.064.08a     kásya svit sávanaṃ vŕ̥ṣā
8.064.08b     jujuṣvā^́m̐ áva gachati
8.064.08c     índraṃ ká u svid ā^́ cake

8.064.09a     káṃ te dānā^́ asakṣata
8.064.09b     vŕ̥trahan káṃ suvī^́riyā
8.064.09c     ukthé ká u svid ántamaḥ

8.064.10a     ayáṃ te mā^́nuṣe jáne
8.064.10b     sómaḥ pūrúṣu sūyate
8.064.10c     tásyéhi prá dravā píba

8.064.11a     ayáṃ te śaryaṇā^́vati
8.064.11b     suṣómāyām ádhi priyáḥ
8.064.11c     ārjīkī^́ye madíntamaḥ

8.064.12a     tám adyá rā^́dhase mahé
8.064.12b     cā^́rum mádāya ghŕ̥ṣvaye
8.064.12c     éhīm indra drávā píba

65

8.065.01a     yád indra prā^́g ápāg údaṅ
8.065.01b     níag vā hūyáse nŕ̥bhiḥ
8.065.01c     ā^́ yāhi tū^́yam āśúbhiḥ

8.065.02a     yád vā prasrávaṇe divó
8.065.02b     mādáyāse súvarṇare
8.065.02c     yád vā samudré ándhasaḥ

8.065.03a     ā^́ tvā gīrbhír mahā^́m urúṃ
8.065.03b     huvé gā^́m iva bhójase
8.065.03c     índra sómasya pītáye

8.065.04a     ā^́ ta indra mahimā^́naṃ
8.065.04b     hárayo deva te máhaḥ
8.065.04c     ráthe vahantu bíbhrataḥ

8.065.05a     índra gr̥ṇīṣá u stuṣé
8.065.05b     mahā^́m̐ ugrá īśānakŕ̥t
8.065.05c     ā^́ ihi naḥ sutám píba

8.065.06a     sutā^́vantas tuvā vayám
8.065.06b     práyasvanto havāmahe
8.065.06c     idáṃ no barhír āsáde

8.065.07a     yác cid dhí śáśvatām ási
8.065.07b     índra sā^́dhāraṇas tuvám
8.065.07c     táṃ tvā vayáṃ havāmahe

8.065.08a     idáṃ te somiyám mádhu
8.065.08b     ádhukṣann ádribhir náraḥ
8.065.08c     juṣāṇá indra tát piba

8.065.09a     víśvām̐ aryó vipaścíto
8.065.09b     áti khyas tū^́yam ā^́ gahi
8.065.09c     asmé dhehi śrávo br̥hát

8.065.10a     dātā^́ me pŕ̥ṣatīnãṃ
8.065.10b     rā^́jā hiraṇyavī^́nãm
8.065.10c     mā^́ devā maghávā riṣat

8.065.11a     sahásre pŕ̥ṣatīnãm
8.065.11b     ádhi ścandrám br̥hát pr̥thú
8.065.11c     śukráṃ híraṇyam ā^́ dade

8.065.12a     nápāto durgáhasya me
8.065.12b     sahásreṇa surā^́dhasaḥ
8.065.12c     śrávo devéṣu akrata

66

8.066.01a     tárobhir vo vidádvasum
8.066.01b     índraṃ sabā^́dha ūtáye
8.066.01c     br̥hád gā^́yantaḥ sutásome adhvaré
8.066.01d     huvé bháraṃ ná kāríṇam

8.066.02a     ná yáṃ dudhrā^́ várante ná sthirā^́ múro
8.066.02b     máde suśiprám ándhasaḥ
8.066.02c     yá ādŕ̥tyā śaśamānā^́ya sunvaté
8.066.02d     dā^́tā jaritrá ukthíyam

8.066.03a     yáḥ śakró mr̥kṣó áśviyo
8.066.03b     yó vā kī^́jo hiraṇyáyaḥ
8.066.03c     sá ūrvásya rejayati ápāvr̥tim
8.066.03d     índro gávyasya vr̥trahā^́

8.066.04a     níkhātaṃ cid yáḥ purusambhr̥táṃ vásu
8.066.04b     úd íd vápati dāśúṣe
8.066.04c     vajrī^́ suśipró háriaśva ít karad
8.066.04d     índraḥ krátvā yáthā váśat

8.066.05a     yád vāvántha puruṣṭuta
8.066.05b     purā^́ cic chūra nr̥̄ṇã^́m⁺
8.066.05c     vayáṃ tát ta indara⁺ sám bharāmasi
8.066.05d     yajñám uktháṃ turáṃ vácaḥ

8.066.06a     sácā sómeṣu puruhūta vajrivo
8.066.06b     mádāya dyukṣa somapāḥ
8.066.06c     tvám íd dhí brahmakŕ̥te kā^́miyaṃ vásu
8.066.06d     dáyiṣṭhaḥ⁺ sunvaté bhúvaḥ

8.066.07a     vayám enam idā^́ hiyó
8.066.07b     ápīpemehá vajríṇam
8.066.07c     tásmā u adyá samanā^́ sutám bhara
8.066.07d     ā^́ nūnám bhūṣata śruté

8.066.08a     vŕ̥kaś cid asya vāraṇá urāmáthir
8.066.08b     ā^́ vayúneṣu bhūṣati
8.066.08c     sémáṃ na stómaṃ jujuṣāṇá ā^́ gahi
8.066.08d     índra prá citráyā dhiyā^́

8.066.09a     kád ū nú asya ákr̥tam
8.066.09b     índrasya asti paúṃsiyam
8.066.09c     kéno nú kaṃ śrómatena ná śuśruve
8.066.09d     janúṣaḥ pári vr̥trahā^́

8.066.10a     kád ū mahī^́r ádhr̥ṣṭā asya táviṣīḥ
8.066.10b     kád u vr̥traghnó ástr̥tam
8.066.10c     índro víśvān bekanā^́ṭām̐ ahardŕ̥śa
8.066.10d     utá krátvā paṇī^́m̐r abhí

8.066.11a     vayáṃ ghā te ápūrviya
8.066.11b     índra bráhmāṇi vr̥trahan
8.066.11c     purūtámāsaḥ puruhūta vajrivo
8.066.11d     bhr̥tíṃ ná prá bharāmasi

8.066.12a     pūrvī^́ś cid dhí tvé tuvikūrmin āśáso
8.066.12b     hávanta indra ūtáyaḥ
8.066.12c     tiráś cid aryáḥ sávanā^́ vaso gahi
8.066.12d     śáviṣṭha śrudhí me hávam

8.066.13a     vayáṃ ghā te tuvé íd u
8.066.13b     índra víprā ápi ṣmasi
8.066.13c     nahí tvád anyáḥ puruhūta káś caná
8.066.13d     mághavann ásti marḍitā^́

8.066.14a     tuváṃ no asyā^́ ámater utá kṣudhó
8.066.14b     abhíśaster áva spr̥dhi
8.066.14c     tuváṃ na ūtī^́ táva citráyā dhiyā^́
8.066.14d     śíkṣā śaciṣṭha gātuvít

8.066.15a     sóma íd vaḥ sutó astu
8.066.15b     kálayo mā^́ bibhītana
8.066.15c     ápéd eṣá dhvasmā^́yati
8.066.15d     svayáṃ ghaiṣó ápāyati

67

8.067.01a     tiyā^́n nú kṣatríyām̐ áva
8.067.01b     ādityā^́n yāciṣāmahe
8.067.01c     sumr̥̄ḷīkā^́m̐⁺ abhíṣṭaye

8.067.02a     mitró no áti aṃhatíṃ
8.067.02b     váruṇaḥ parṣad aryamā^́
8.067.02c     ādityā^́so yáthā vidúḥ

8.067.03a     téṣāṃ hí citrám ukthíyaṃ
8.067.03b     várūtham ásti dāśúṣe
8.067.03c     ādityā^́nām araṃkŕ̥te

8.067.04a     máhi vo mahatā^́m ávo
8.067.04b     váruṇa mítra áryaman
8.067.04c     ávāṃsi ā^́ vr̥ṇīmahe

8.067.05a     jīvā^́n no abhí dhetana
8.067.05b     ā^́dityāsaḥ purā^́ háthāt
8.067.05c     kád dha stha havanaśrutaḥ

8.067.06a     yád vaḥ śrāntā^́ya sunvaté
8.067.06b     várūtham ásti yác chardíḥ
8.067.06c     ténā no ádhi vocata

8.067.07a     ásti devā aṃhór urú
8.067.07b     ásti rátnam ánāgasaḥ
8.067.07c     ā^́dityā ádbhutainasaḥ

8.067.08a     mā^́ naḥ sétuḥ siṣed ayám
8.067.08b     mahé vr̥ṇaktu nas pári
8.067.08c     índra íd dhí śrutó vaśī^́

8.067.09a     mā^́ no mr̥cā^́ ripūṇã^́ṃ
8.067.09b     vr̥jinā^́nām aviṣyavaḥ
8.067.09c     dévā abhí prá mr̥kṣata

8.067.10a     utá tvā^́m adite mahi
8.067.10b     aháṃ devi úpa bruve
8.067.10c     sumr̥̄ḷīkā^́m⁺ abhíṣṭaye

8.067.11a     párṣi dīné gabhīrá ā^́m̐
8.067.11b     úgraputre jíghāṃsataḥ
8.067.11c     mā^́kis tokásya no riṣat

8.067.12a     anehó na uruvraja
8.067.12b     úrūci ví prásartave
8.067.12c     kr̥dhí tokā^́ya jīváse

8.067.13a     yé mūrdhā^́naḥ kṣitīnã^́m
8.067.13b     ádabdhāsaḥ sváyaśasaḥ
8.067.13c     vratā^́ rákṣante adrúhaḥ

8.067.14a     té na āsnó vŕ̥kāṇãm
8.067.14b     ā^́dityāso mumócata
8.067.14c     stenám baddhám ivādite

8.067.15a     ápo ṣú ṇa iyáṃ śárur
8.067.15b     ā^́dityā ápa durmatíḥ
8.067.15c     asmád etu ájaghnuṣī

8.067.16a     śáśvad dhí vaḥ sudānava
8.067.16b     ā^́dityā ūtíbhir vayám
8.067.16c     purā^́ nūnám bubhujmáhe

8.067.17a     śáśvantaṃ hí pracetasaḥ
8.067.17b     pratiyántaṃ cid énasaḥ
8.067.17c     dévāḥ kr̥ṇuthá jīváse

8.067.18a     tát sú no návyaṃ sányasa
8.067.18b     ā^́dityā yán múmocati
8.067.18c     bandhā^́d baddhám ivādite

8.067.19a     nā^́smā^́kam asti tát tára
8.067.19b     ā^́dityāso atiṣkáde
8.067.19c     yūyám asmábhya° mr̥̄ḷata⁺

8.067.20a     mā^́ no hetír vivásvata
8.067.20b     ā^́dityāḥ kr̥trímā śáruḥ
8.067.20c     purā^́ nú jaráso vadhīt

8.067.21a     ví ṣú dvéṣo ví aṃhatím
8.067.21b     ā^́dityāso ví sáṃhitam
8.067.21c     víṣvag ví vr̥hatā rápaḥ

68

8.068.01a     ā^́ tvā ráthaṃ yáthotáye
8.068.01b     sumnā^́ya vartayāmasi
8.068.01c     tuvikūrmím r̥tīṣáham
8.068.01d     índra śáviṣṭha sátpate

8.068.02a     túviśuṣma túvikrato
8.068.02b     śácīvo víśvayā mate
8.068.02c     ā^́ paprātha mahitvanā^́

8.068.03a     yásya te mahinā^́ maháḥ
8.068.03b     pári jmāyántam īyátuḥ
8.068.03c     hástā vájraṃ hiraṇyáyam

8.068.04a     viśvā^́narasya vas pátim
8.068.04b     ánānatasya śávasaḥ
8.068.04c     évaiś ca carṣaṇīnã^́m
8.068.04d     ūtī^́ huve ráthānãm

8.068.05a     abhíṣṭaye sadā^́vr̥dhaṃ
8.068.05b     súvarmīḷheṣu yáṃ náraḥ
8.068.05c     nā^́nā hávanta ūtáye

8.068.06a     parómātram ŕ̥cīṣamam
8.068.06b     índram ugráṃ surā^́dhasam
8.068.06c     ī^́śānaṃ cid vásūnãm

8.068.07a     táṃ-tam íd rā^́dhase mahá
8.068.07b     índraṃ codāmi pītáye
8.068.07c     yáḥ pūrviyā^́m ánuṣṭutim
8.068.07d     ī^́śe kr̥ṣṭīnã^́ṃ nr̥túḥ

8.068.08a     ná yásya te śavasāna
8.068.08b     sakhyám ānáṃśa mártiyaḥ
8.068.08c     nákiḥ śávāṃsi te naśat

8.068.09a     tuvótāsas tuvā^́ yujā^́
8.068.09b     apsú sū^́rye mahád dhánam
8.068.09c     jáyema pr̥tsú vajrivaḥ

8.068.10a     táṃ tvā yajñébhir īmahe
8.068.10b     táṃ gīrbhír girvaṇastama
8.068.10c     índra yáthā cid ā^́vitha
8.068.10d     vā^́jeṣu purumā^́yiyam

8.068.11a     yásya te svādú sakhiyáṃ
8.068.11b     svādvī^́ práṇītir adrivaḥ
8.068.11c     yajñó vitantasā^́yiyaḥ

8.068.12a     urú ṇas tanúve tána
8.068.12b     urú kṣáyāya nas kr̥dhi
8.068.12c     urú ṇo yandhi jīváse

8.068.13a     urúṃ nŕ̥bhya urúṃ gáva
8.068.13b     urúṃ ráthāya pánthãm
8.068.13c     devávītim manāmahe

8.068.14a     úpa mā ṣáḍ duvā^́-duvā
8.068.14b     náraḥ sómasya hárṣiyā
8.068.14c     tíṣṭhanti svādurātáyaḥ

8.068.15a     r̥jrā^́v indrotá ā^́ dade
8.068.15b     hárī ŕ̥kṣasya sūnávi
8.068.15c     āśvamedhásya róhitā

8.068.16a     suráthām̐ ātithigvé
8.068.16b     suabhīśū^́m̐r ãrkṣé
8.068.16c     āśvamedhé supéśasaḥ

8.068.17a     ṣáḷ áśvām̐ ātithigvá
8.068.17b     indraūté vadhū^́mataḥ
8.068.17c     sácā pūtákratau sanam

8.068.18a     aíṣu cetad vŕ̥ṣaṇvatī
8.068.18b     antár r̥jréṣu áruṣī
8.068.18c     suabhīśúḥ káśāvatī

8.068.19a     ná yuṣmé vājabandhavo
8.068.19b     ninitsúś caná mártiyaḥ
8.068.19c     avadyám ádhi dīdharat

69

8.069.01a     prá-pra vas triṣṭúbham íṣam
8.069.01b     mandádvīrāya índave
8.069.01c     dhiyā^́ vo medhásātaye
8.069.01d     púraṃdhiyā^́ vivāsati

8.069.02a     nadáṃ va ódatīnãṃ
8.069.02b     nadáṃ yóyuvatīnãm
8.069.02c     pátiṃ vo ághniyānãṃ
8.069.02d     dhenūnã^́m iṣudhyasi

8.069.03a     tā^́ asya sū^́dadohasaḥ
8.069.03b     sómaṃ śrīṇanti pŕ̥śnayaḥ
8.069.03c     jánman devā^́nãṃ víśas
8.069.03d     triṣú ā^́ rocané diváḥ

8.069.04a     abhí prá gópatiṃ girā^́
8.069.04b     índram arca yáthā vidé
8.069.04c     sūnúṃ satyásya sátpatim

8.069.05a     ā^́ hárayaḥ sasr̥jrire
8.069.05b     áruṣīr ádhi barhíṣi
8.069.05c     yátrābhí saṃnávāmahe

8.069.06a     índrāya gā^́va āśíraṃ
8.069.06b     duduhré vajríṇe mádhu
8.069.06c     yát sīm upahvaré vidát

8.069.07a     úd yád bradhnásya viṣṭápaṃ
8.069.07b     gr̥hám índraś ca gánvahi
8.069.07c     mádhvaḥ pītvā^́ sacevahi
8.069.07d     tríḥ saptá sákhiyuḥ padé

8.069.08a     árcata prá arcata
8.069.08b     príyamedhāso árcata
8.069.08c     árcantu putrakā^́ utá
8.069.08d     púraṃ ná dhr̥ṣṇú arcata

8.069.09a     áva svarāti gárgaro
8.069.09b     godhā^́ pári saniṣvaṇat
8.069.09c     píṅgā pári caniṣkadad
8.069.09d     índrāya bráhma údyatam

8.069.10a     ā^́ yát pátanti eníyaḥ
8.069.10b     sudúghā ánapasphuraḥ
8.069.10c     apasphúraṃ gr̥bhāyata
8.069.10d     sómam índrāya pā^́tave

8.069.11a     ápād índro ápād agnír
8.069.11b     víśve devā^́ amatsata
8.069.11c     váruṇa íd ihá kṣayat
8.069.11d     tám ā^́po abhy ànūṣata
8.069.11e     vatsáṃ saṃśíśvarīr iva

8.069.12a     sudevó asi varuṇa
8.069.12b     yásya te saptá síndhavaḥ
8.069.12c     anukṣáranti kākúdaṃ
8.069.12d     sūrmíyaṃ suṣirā^́m iva

8.069.13a     yó vyátīm̐r áphāṇayat
8.069.13b     súyuktām̐ úpa dāśúṣe
8.069.13c     takvó netā^́ tád íd vápur
8.069.13d     upamā^́ yó ámucyata

8.069.14a     átī^́d u śakrá ohata
8.069.14b     índro víśvā áti dvíṣaḥ
8.069.14c     bhinát kanī^́na odanám
8.069.14d     pacyámānam paró girā^́

8.069.15a     arbhakó ná kumārakó
8.069.15b     ádhi tiṣṭhan návaṃ rátham
8.069.15c     sá pakṣan mahiṣám mr̥gám
8.069.15d     pitré mātré vibhukrátum

8.069.16a     ā^́ tū^́ suśipra dampate
8.069.16b     ráthaṃ tiṣṭhā hiraṇyáyam
8.069.16c     ádha dyukṣáṃ sacevahi
8.069.16d     sahásrapādam aruṣáṃ
8.069.16e     suastigā^́m anehásam

8.069.17a     táṃ ghem itthā^́ namasvína
8.069.17b     úpa svarā^́jam āsate
8.069.17c     árthaṃ cid asya súdhitaṃ yád étava
8.069.17d     āvartáyanti dāváne

8.069.18a     ánu pratnásya ókasaḥ
8.069.18b     priyámedhāsa eṣãm
8.069.18c     pū^́rvām ánu práyatiṃ vr̥ktábarhiṣo
8.069.18d     hitáprayasa āśata

70

8.070.01a     yó rā^́jā carṣaṇīnã^́ṃ
8.070.01b     yā^́tā ráthebhir ádhriguḥ
8.070.01c     víśvāsãṃ tarutā^́ pŕ̥tanānãṃ
8.070.01d     jyéṣṭho yó vr̥trahā^́ gr̥ṇé

8.070.02a     índraṃ táṃ śumbha puruhanman ávase
8.070.02b     yásya dvitā^́ vidhartári
8.070.02c     hástāya vájraḥ práti dhāyi darśató
8.070.02d     mahó divé ná sū^́riyaḥ

8.070.03a     nákiṣ ṭáṃ kármaṇā naśad
8.070.03b     yáś cakā^́ra sadā^́vr̥dham
8.070.03c     índraṃ ná yajñaír viśvágūrtam ŕ̥bhvasam
8.070.03d     ádhr̥ṣṭaṃ dhr̥ṣṇúojasam

8.070.04a     áṣāḷham ugrám pŕ̥tanāsu sāsahíṃ
8.070.04b     yásmin mahī^́r urujráyaḥ
8.070.04c     sáṃ dhenávo jā^́yamāne anonavur
8.070.04d     dyā^́vaḥ kṣā^́mo anonavuḥ

8.070.05a     yád dyā^́va indra te śatáṃ
8.070.05b     śatám bhū^́mīr utá siyúḥ
8.070.05c     ná tvā vajrin sahásraṃ sū^́riyā ánu
8.070.05d     ná jātám aṣṭa ródasī

8.070.06a     ā^́ paprātha mahinā^́ vŕ̥ṣṇiyā vr̥ṣan
8.070.06b     víśvā śaviṣṭha śávasā
8.070.06c     asmā^́m̐ ava maghavan gómati vrajé
8.070.06d     vájriñ citrā^́bhir ūtíbhiḥ

8.070.07a     ná sīm ádeva āpad
8.070.07b     íṣaṃ dīrghāyo mártiyaḥ
8.070.07c     étagvā cid yá étaśā yuyójate
8.070.07d     hárī índro yuyójate

8.070.08a     táṃ vo mahó mahā^́yiyam
8.070.08b     índraṃ dānā^́ya sakṣáṇim
8.070.08c     yó gādhéṣu yá ā^́raṇeṣu háviyo
8.070.08d     vā^́jeṣu ásti háviyaḥ

8.070.09a     úd ū ṣú ṇo vaso mahé
8.070.09b     mr̥śásva śūra rā^́dhase
8.070.09c     úd ū ṣú mahyaí maghavan magháttaya
8.070.09d     úd indra śrávase mahé

8.070.10a     tuváṃ na indra r̥tayús
8.070.10b     tuvānído ní tr̥mpasi
8.070.10c     mádhye vasiṣva tuvinr̥mṇa ūruvór
8.070.10d     ní dāsáṃ śiśnatho háthaiḥ

8.070.11a     anyávratam ámānuṣam
8.070.11b     áyajvānam ádevayum
8.070.11c     áva sváḥ sákhā dudhuvīta párvataḥ
8.070.11d     sughnā^́ya dásyum párvataḥ

8.070.12a     tuváṃ na indra āsãṃ
8.070.12b     háste śaviṣṭha dāváne
8.070.12c     dhānā^́nãṃ ná sáṃ gr̥bhāya asmayúr
8.070.12d     dvíḥ sáṃ gr̥bhāya asmayúḥ

8.070.13a     sákhāyaḥ krátum ichata
8.070.13b     kathā^́ rādhāma śarásya
8.070.13c     úpastutim bhojáḥ sūrír yó áhrayaḥ

8.070.14a     bhū^́ribhiḥ samaha ŕ̥ṣibhir
8.070.14b     barhíṣmadbhi staviṣyase
8.070.14c     yád itthám ékam-ekam íc
8.070.14d     chára vatsā^́n parādádaḥ

8.070.15a     karṇagŕ̥hyā maghávā śauradeviyó
8.070.15b     vatsáṃ nas tribhyá ā^́nayat
8.070.15c     ajā^́ṃ sūrír ná dhā^́tave

71

8.071.01a     tuváṃ no agne máhobhiḥ
8.071.01b     pāhí víśvasyā árāteḥ
8.071.01c     utá dviṣó mártiyasya

8.071.02a     nahí manyúḥ paúruṣeya
8.071.02b     ī^́śe hí vaḥ priyajāta
8.071.02c     tuvám íd asi kṣápāvān

8.071.03a     sá no víśvebhir devébhir
8.071.03b     ū^́rjo napād bhádraśoce
8.071.03c     rayíṃ dehi viśvávāram

8.071.04a     ná tám agne árātayo
8.071.04b     mártaṃ yuvanta rãyáḥ
8.071.04c     yáṃ trā^́yase dāśuvā^́ṃsam

8.071.05a     yáṃ tváṃ vipra medhásātāv
8.071.05b     ágne hinóṣi dhánāya
8.071.05c     sá távotī^́ góṣu gántā

8.071.06a     tuváṃ rayím puruvī^́ram
8.071.06b     ágne dāśúṣe mártāya
8.071.06c     prá ṇo naya vásyo ácha

8.071.07a     uruṣyā^́ ṇo mā^́ párā dā
8.071.07b     aghāyaté jātavedaḥ
8.071.07c     durādhíye mártiāya°

8.071.08a     ágne mā^́kiṣ ṭe devásya
8.071.08b     rātím ádevo yuyota
8.071.08c     tuvám īśiṣe vásūnām

8.071.09a     sá no vásva úpa māsi
8.071.09b     ū^́rjo napān mā^́hinasya
8.071.09c     sákhe vaso jaritŕ̥bhyaḥ

8.071.10a     áchā naḥ śīráśociṣaṃ
8.071.10b     gíro yantu darśatám
8.071.10c     áchā yajñā^́so námasā purūvásum
8.071.10d     purupraśastám ūtáye

8.071.11a     agníṃ sūnúṃ sáhaso jātávedasaṃ
8.071.11b     dānā^́ya vā^́riyāṇãm
8.071.11c     dvitā^́ yó bhū^́d amŕ̥to mártiyeṣu ā^́
8.071.11d     hótā mandrátamo viśí

8.071.12a     agníṃ vo devayajyáyā
8.071.12b     agním prayatí adhvaré
8.071.12c     agníṃ dhīṣú prathamám agním árvati
8.071.12d     agníṃ kṣaítrāya sā^́dhase

8.071.13a     agnír iṣã^́ṃ sakhiyé dadātu na
8.071.13b     ī^́śe yó vā^́riyāṇãm
8.071.13c     agníṃ toké tánaye śáśvad īmahe
8.071.13d     vásuṃ sántaṃ tanūpã^́m

8.071.14a     agním īḷiṣva ávase
8.071.14b     gā^́thābhiḥ śīráśociṣam
8.071.14c     agníṃ rāyé purumīḷha śrutáṃ náro
8.071.14d     agníṃ sudītáye chardíḥ

8.071.15a     agníṃ dvéṣo yótavaí no gr̥ṇīmasi
8.071.15b     agníṃ śáṃ yóś ca dā^́tave
8.071.15c     víśvāsu vikṣú avitéva háviyo
8.071.15d     bhúvad vástur r̥ṣūṇã^́m

72

8.072.01a     havíṣ kr̥ṇudhvam ā^́ gamad
8.072.01b     adhvaryúr vanate púnaḥ
8.072.01c     vidvā^́m̐ asya praśā^́sanam

8.072.02a     ní tigmám abhí aṃśúṃ
8.072.02b     sī^́dad dhótā manā^́v ádhi
8.072.02c     juṣāṇó asya sakhiyám

8.072.03a     antár ichanti táṃ jáne
8.072.03b     rudrám paró manīṣáyā
8.072.03c     gr̥bhṇánti jihváyā sasám

8.072.04a     jāmí atītape dhánur
8.072.04b     vayodhā^́ aruhad vánam
8.072.04c     dr̥ṣádaṃ jihváyā^́vadhīt

8.072.05a     cáran vatsó rúśann ihá
8.072.05b     nidātā^́raṃ ná vindate
8.072.05c     véti stótava ambíyam

8.072.06a     utó nú asya yán mahád
8.072.06b     áśvāvad yójanam br̥hád
8.072.06c     dāmā^́ ráthasya dádr̥śe

8.072.07a     duhánti saptá ékām
8.072.07b     úpa dvā^́ páñca sr̥jataḥ
8.072.07c     tīrthé síndhor ádhi svaré

8.072.08a     ā^́ daśábhir vivásvata
8.072.08b     índraḥ kóśam acucyavīt
8.072.08c     khédayā trivŕ̥tā diváḥ

8.072.09a     pári tridhā^́tur adhvaráṃ
8.072.09b     jūrṇír eti návīyasī
8.072.09c     mádhvā hótāro añjate

8.072.10a     siñcánti námasāvatám
8.072.10b     uccā^́cakram párijmānam
8.072.10c     nīcī^́nabāram ákṣitam

8.072.11a     abhiā^́ram íd ádrayo
8.072.11b     níṣiktam púṣkare mádhu
8.072.11c     avatásya visárjane

8.072.12a     gā^́va úpāvatāvatám
8.072.12b     mahī^́ yajñásya rapsúdā
8.072.12c     ubhā^́ kárṇā hiraṇyáyā

8.072.13a     ā^́ suté siñcata śríyaṃ
8.072.13b     ródasīyor abhiśríyam
8.072.13c     rasā^́ dadhīta vr̥ṣabhám

8.072.14a     té jānata svám okíyaṃ
8.072.14b     sáṃ vatsā^́so ná mātŕ̥bhiḥ
8.072.14c     mithó nasanta jāmíbhiḥ

8.072.15a     úpa srákveṣu bápsataḥ
8.072.15b     kr̥ṇvaté dharúṇaṃ diví
8.072.15c     índre agnā^́ námaḥ súvaḥ

8.072.16a     ádhukṣat pipyúṣīm íṣam
8.072.16b     ū^́rjaṃ saptápadīm aríḥ
8.072.16c     sū^́ryasya saptá raśmíbhiḥ

8.072.17a     sómasya mitrāvaruṇā
8.072.17b     úditā sū^́ra ā^́ dade
8.072.17c     tád ā^́turasya bheṣajám

8.072.18a     utó nú asya yát padáṃ
8.072.18b     haryatásya nidhāníyam
8.072.18c     pári dyā^́ṃ jihváyātanat

73

8.073.01a     úd īrāthām r̥tāyaté
8.073.01b     yuñjā^́thām aśvinā rátham
8.073.01c     ánti ṣád bhūtu vām ávaḥ

8.073.02a     nimíṣaś cij jávīyasā
8.073.02b     ráthenā^́ yātam aśvinā
8.073.02c     ánti ṣád bhūtu vām ávaḥ

8.073.03a     úpa str̥ṇītam átraye
8.073.03b     hiména gharmám aśvinā
8.073.03c     ánti ṣad bhūtu vām ávaḥ

8.073.04a     kúha sthaḥ kúha jagmathuḥ
8.073.04b     kúha śyenéva petathuḥ
8.073.04c     ánti ṣad bhūtu vām ávaḥ

8.073.05a     yád adyá kárhi kárhi cic
8.073.05b     chuśrūyā^́tam imáṃ hávam
8.073.05c     ánti ṣad bhūtu vām ávaḥ

8.073.06a     aśvínā yāmahū^́tamā
8.073.06b     nédiṣṭhaṃ yāmi ā^́piyam
8.073.06c     ánti ṣad bhūtu vām ávaḥ

8.073.07a     ávantam átraye gr̥háṃ
8.073.07b     kr̥ṇutáṃ yuvám aśvinā
8.073.07c     ánti ṣad bhūtu vām ávaḥ

8.073.08a     várethe agním ātápo
8.073.08b     vádate valgú átraye
8.073.08c     ánti ṣad bhūtu vām ávaḥ

8.073.09a     prá saptávadhrir āśásā
8.073.09b     dhā^́rām agnér aśāyata
8.073.09c     ánti ṣad bhūtu vām ávaḥ

8.073.10a     ihā^́ gataṃ vr̥ṣaṇvasū
8.073.10b     śr̥ṇutám ma imáṃ hávam
8.073.10c     ánti ṣad bhūtu vām ávaḥ

8.073.11a     kím idáṃ vām purāṇaváj
8.073.11b     járator iva śasyate
8.073.11c     ánti ṣad bhūtu vām ávaḥ

8.073.12a     samānáṃ vāṃ sajātíyaṃ
8.073.12b     samānó bándhur aśvinā
8.073.12c     ánti ṣad bhūtu vām ávaḥ

8.073.13a     yó vāṃ rájāṃsi aśvinā
8.073.13b     rátho viyā^́ti ródasī
8.073.13c     ánti ṣad bhūtu vām ávaḥ

8.073.14a     ā^́ no gávyebhir áśviyaiḥ
8.073.14b     sahásrair úpa gachatam
8.073.14c     ánti ṣad bhūtu vām ávaḥ

8.073.15a     mā^́ no gávyebhir áśviyaiḥ
8.073.15b     sahásrebhir áti khyatam
8.073.15c     ánti ṣad bhūtu vām ávaḥ

8.073.16a     aruṇápsur uṣā^́ abhūd
8.073.16b     ákar jyótir r̥tā^́varī
8.073.16c     ánti ṣad bhūtu vām ávaḥ

8.073.17a     aśvínā sú vicā^́kaśad
8.073.17b     vr̥kṣám paraśumā^́m̐ iva
8.073.17c     ánti ṣad bhūtu vām ávaḥ

8.073.18a     púraṃ ná dhr̥ṣṇav ā^́ ruja
8.073.18b     kr̥ṣṇáyā bādhitó viśā^́
8.073.18c     ánti ṣad bhūtu vām ávaḥ

74

8.074.01a     viśó-viśo vo átithiṃ
8.074.01b     vājayántaḥ purupriyám
8.074.01c     agníṃ vo dúriyaṃ váca
8.074.01d     stuṣé śūṣásya mánmabhiḥ

8.074.02a     yáṃ jánāso havíṣmanto
8.074.02b     mitráṃ ná sarpírāsutim
8.074.02c     praśáṃsanti práśastibhiḥ

8.074.03a     pányāṃsaṃ jātávedasaṃ
8.074.03b     yó devátāti údyatā
8.074.03c     havyā^́ni aírayat diví

8.074.04a     ā^́ganma vr̥trahántamaṃ
8.074.04b     jyáyiṣṭham⁺ agním ā^́navam
8.074.04c     yásya śrutárvā br̥hánn
8.074.04d     ārkṣó ánīka édhate

8.074.05a     amŕ̥taṃ jātávedasaṃ
8.074.05b     tirás támāṃsi darśatám
8.074.05c     ghr̥tā^́havanam ī^́ḍiyam

8.074.06a     sabā^́dho yáṃ jánā imé
8.074.06b     agníṃ havyébhir ī^́ḷate
8.074.06c     júhvānāso yatásrucaḥ

8.074.07a     iyáṃ te návyasī matír
8.074.07b     ágne ádhāyi asmád ā^́
8.074.07c     mándra sújāta súkrato
8.074.07d     ámūra dásma átithe

8.074.08a     sā^́ te agne śáṃtamā
8.074.08b     cániṣṭhā bhavatu priyā^́
8.074.08c     táyā vardhasva súṣṭutaḥ

8.074.09a     sā^́ dyumnaír dyumnínī br̥hád
8.074.09b     úpopa śrávasi śrávaḥ
8.074.09c     dádhīta vr̥tratū^́riye

8.074.10a     áśvam íd gā^́ṃ rathaprã^́ṃ
8.074.10b     tveṣám índraṃ ná sátpatim
8.074.10c     yásya śrávāṃsi tū^́rvatha
8.074.10d     pányam-panyaṃ ca kr̥ṣṭáyaḥ

8.074.11a     yáṃ tvā gopávano girā^́
8.074.11b     cániṣṭhad agne aṅgiraḥ
8.074.11c     sá pavāka⁺ śrudhī hávam

8.074.12a     yáṃ tvā jánāsa ī^́ḷate
8.074.12b     sabā^́dho vā^́jasātaye
8.074.12c     sá bodhi vr̥tratū^́riye

8.074.13a     aháṃ huvāná ārkṣé
8.074.13b     śrutárvaṇi madacyúti
8.074.13c     śárdhāṃsīva stukāvínām
8.074.13d     mr̥kṣā^́ śīrṣā^́ caturṇã^́m

8.074.14a     mã^́ṃ catvā^́ra āśávaḥ
8.074.14b     śáviṣṭhasya dravitnávaḥ
8.074.14c     suráthāso abhí práyo
8.074.14d     vákṣan váyo ná túgriyam

8.074.15a     satyám ít tvā mahenadi
8.074.15b     páruṣṇi áva dediśam
8.074.15c     ném āpo aśvadā^́taraḥ
8.074.15d     śáviṣṭhād asti mártiyaḥ

75

8.075.01a     yukṣvā^́ hí devahū^́tamām̐
8.075.01b     áśvām̐ agne rathī^́r iva
8.075.01c     ní hótā pūrviyáḥ sadaḥ

8.075.02a     utá no deva devā^́m̐
8.075.02b     áchā voco vidúṣṭaraḥ
8.075.02c     śrád víśvā vā^́riyā kr̥dhi

8.075.03a     tuváṃ ha yád yaviṣṭhiya
8.075.03b     sáhasaḥ sūnav āhuta
8.075.03c     r̥tā^́vā yajñíyo bhúvaḥ

8.075.04a     ayám agníḥ sahasríṇo
8.075.04b     vā^́jasya śatínas pátiḥ
8.075.04c     mūrdhā^́ kavī^́ rayīṇã^́m

8.075.05a     táṃ nemím r̥bhávo yathā
8.075.05b     ā^́ namasva sáhūtibhiḥ
8.075.05c     nédīyo yajñám aṅgiraḥ

8.075.06a     tásmai nūnám abhídyave
8.075.06b     vācā^́ virūpa nítyayā
8.075.06c     vŕ̥ṣṇe codasva suṣṭutím

8.075.07a     kám u ṣvid asya sénayā
8.075.07b     agnér ápākacakṣasaḥ
8.075.07c     paṇíṃ góṣu starāmahe

8.075.08a     mā^́ no devā^́nãṃ víśaḥ
8.075.08b     prasnātī^́r iva usrā^́ḥ
8.075.08c     kr̥śáṃ ná hāsur ághniyāḥ

8.075.09a     mā^́ naḥ samasya dūḍhíyaḥ
8.075.09b     páridveṣaso aṃhatíḥ
8.075.09c     ūrmír ná nā^́vam ā^́ vadhīt

8.075.10a     námas te agna ójase
8.075.10b     gr̥ṇánti deva kr̥ṣṭáyaḥ
8.075.10c     ámair amítram ardaya

8.075.11a     kuvít sú no gáviṣṭaye
8.075.11b     ágne saṃvéṣiṣo rayím
8.075.11c     úrukr̥d urú ṇas kr̥dhi

8.075.12a     mā^́ no asmín mahādhané
8.075.12b     párā varg bhārabhŕ̥d yathā
8.075.12c     saṃvárgaṃ sáṃ rayíṃ jaya

8.075.13a     anyám asmád bhiyā^́ iyám
8.075.13b     ágne síṣaktu duchúnā
8.075.13c     várdhā no ámavac chávaḥ

8.075.14a     yásyā^́juṣan namasvínaḥ
8.075.14b     śámīm ádurmakhasya vā
8.075.14c     táṃ ghéd agnír vr̥dhā^́vati

8.075.15a     párasyā ádhi saṃváto
8.075.15b     ávarām̐ abhí ā^́ tara
8.075.15c     yátrāhám ásmi tā^́m̐ ava

8.075.16a     vidmā^́ hí te purā^́ vayám
8.075.16b     ágne pitúr yáthā^́vasaḥ
8.075.16c     ádhā te sumnám īmahe

76

8.076.01a     imáṃ nú māyínaṃ huva
8.076.01b     índram ī^́śānam ójasā
8.076.01c     marútvantaṃ ná vr̥ñjáse

8.076.02a     ayám índro marútsakhā
8.076.02b     ví vr̥trásyābhinac chíraḥ
8.076.02c     vájreṇa śatáparvaṇā

8.076.03a     vāvr̥dhānó marútsakhā
8.076.03b     índro ví vr̥trám airayat
8.076.03c     sr̥ján samudríyā apáḥ

8.076.04a     ayáṃ ha yéna vā^́ idáṃ
8.076.04b     súvar marútvatā jitám
8.076.04c     índreṇa sómapītaye

8.076.05a     marútvantam r̥jīṣíṇam
8.076.05b     ójasvantaṃ virapśínam
8.076.05c     índraṃ gīrbhír havāmahe

8.076.06a     índram pratnéna mánmanā
8.076.06b     marútvantaṃ havāmahe
8.076.06c     asyá sómasya pītáye

8.076.07a     marútvām̐ indra mīḍhuvaḥ
8.076.07b     píbā sómaṃ śatakrato
8.076.07c     asmín yajñé puruṣṭuta

8.076.08a     túbhyéd indra marútvate
8.076.08b     sutā^́ḥ sómāso adrivaḥ
8.076.08c     hr̥dā^́ hūyanta ukthínaḥ

8.076.09a     píbéd indra marútsakhā
8.076.09b     sutáṃ sómaṃ díviṣṭiṣu
8.076.09c     vájraṃ śíśāna ójasā

8.076.10a     uttíṣṭhann ójasā sahá
8.076.10b     pītvī^́ śípre avepayaḥ
8.076.10c     sómam indra camū^́ sutám

8.076.11a     ánu tvā ródasī ubhé
8.076.11b     krákṣamāṇam akr̥petām
8.076.11c     índra yád dasyuhā^́bhavaḥ

8.076.12a     vā^́cam aṣṭā^́padīm aháṃ
8.076.12b     návasraktim r̥taspŕ̥śam
8.076.12c     índrāt pári tanvàm mame

77

8.077.01a     jajñānó nú śatákratur
8.077.01b     ví pr̥chad íti mātáram
8.077.01c     ká ugrā^́ḥ ké ha śr̥ṇvire

8.077.02a     ā^́d īṃ śavasí abravīd
8.077.02b     aurṇavābhám ahīśúvam
8.077.02c     té putra santu niṣṭúraḥ

8.077.03a     sám ít tā^́n vr̥trahā^́khidat
8.077.03b     khé arā^́m̐ iva khédayā
8.077.03c     právr̥ddho dasyuhā^́bhavat

8.077.04a     ékayā pratidhā^́pibat
8.077.04b     sākáṃ sárāṃsi triṃśátam
8.077.04c     índraḥ sómasya kāṇukā^́

8.077.05a     abhí gandharvám atr̥ṇad
8.077.05b     abudhnéṣu rájassu ā^́
8.077.05c     índro brahmábhya íd vr̥dhé

8.077.06a     nír āvidhyad giríbhya ā^́
8.077.06b     dhāráyat pakvám odanám
8.077.06c     índro bundáṃ súātatam

8.077.07a     śatábradhna íṣus táva
8.077.07b     sahásraparṇa éka ít
8.077.07c     yám indra cakr̥ṣé yújam

8.077.08a     téna stotŕ̥bhya ā^́ bhara
8.077.08b     nŕ̥bhyo nā^́ribhyo áttave
8.077.08c     sadyó jātá r̥bhuṣṭhira

8.077.09a     etā^́ cyautnā^́ni te kr̥tā^́
8.077.09b     várṣiṣṭhāni párīṇasā
8.077.09c     hr̥dā^́ vīḍú adhārayaḥ

8.077.10a     víśvét tā^́ víṣṇur ā^́bharad
8.077.10b     urukramás tuvéṣitaḥ
8.077.10c     śatám mahiṣā^́n kṣīrapākám odanáṃ
8.077.10d     varāhám índra emuṣám

8.077.11a     tuvikṣáṃ te súkr̥taṃ sūmáyaṃ dhánuḥ
8.077.11b     sādhúr bundó hiraṇyáyaḥ
8.077.11c     ubhā^́ te bāhū^́ ráṇiyā súsaṃskr̥ta
8.077.11d     r̥dūpé cid r̥dūvŕ̥dhā

78

8.078.01a     puroḷā^́śaṃ no ándhasa
8.078.01b     índra sahásram ā^́ bhara
8.078.01c     śatā^́ ca śūra gónãm

8.078.02a     ā^́ no bhara viáñjanaṃ
8.078.02b     gā^́m áśvam abhiáñjanam
8.078.02c     sácā manā^́ hiraṇyáyā

8.078.03a     utá naḥ karṇaśóbhanā
8.078.03b     purū^́ṇi dhr̥ṣṇav ā^́ bhara
8.078.03c     tuváṃ hí śr̥ṇviṣé vaso

8.078.04a     nákīṃ vr̥dhīká indra te
8.078.04b     ná suṣā^́ ná sudā^́ utá
8.078.04c     nā^́nyás tvác chūra vāghátaḥ

8.078.05a     nákīm índro níkartave
8.078.05b     ná śakráḥ páriśaktave
8.078.05c     víśvaṃ śr̥ṇoti páśyati

8.078.06a     sá manyúm mártiyānãm
8.078.06b     ádabdho ní cikīṣate
8.078.06c     purā^́ nidáś cikīṣate

8.078.07a     krátva ít pūrṇám udáraṃ
8.078.07b     turásya asti vidhatáḥ
8.078.07c     vr̥traghnáḥ somapā^́vanaḥ

8.078.08a     tuvé vásūni sáṃgatā
8.078.08b     víśvā ca soma saúbhagā
8.078.08c     sudā^́tu áparihvr̥tā

8.078.09a     tuvā^́m íd yavayúr máma
8.078.09b     kā^́mo gavyúr hiraṇyayúḥ
8.078.09c     tuvā^́m aśvayúr éṣate

8.078.10a     távéd indrāhám āśásā
8.078.10b     háste dā^́traṃ canā^́ dade
8.078.10c     dinásya vā maghavan sámbhr̥tasya vā
8.078.10d     pūrdhí yávasya kāśínā

79

8.079.01a     ayáṃ kr̥tnúr ágr̥bhīto
8.079.01b     viśvajíd udbhíd ít sómaḥ
8.079.01c     ŕ̥ṣir vípraḥ kā^́viyena

8.079.02a     abhí ūrṇoti yán nagnám
8.079.02b     bhiṣákti víśvaṃ yát turám
8.079.02c     prém andháḥ khyan níḥ śroṇó bhūt

8.079.03a     tuváṃ soma tanūkŕ̥dbhyo
8.079.03b     dvéṣobhyo anyákr̥tebhyaḥ
8.079.03c     urú yantā^́si várūtham

8.079.04a     tuváṃ cittī^́ táva dákṣair
8.079.04b     divá ā^́ pr̥thivyā^́ rjīṣin
8.079.04c     yā^́vīr aghásya cid dvéṣaḥ

8.079.05a     arthíno yánti céd árthaṃ
8.079.05b     gáchān íd dadúṣo rātím
8.079.05c     vavr̥jyús tŕ̥ṣyataḥ kā^́mam

8.079.06a     vidád yát pūrviyáṃ naṣṭám
8.079.06b     úd īm r̥tāyúm īrayat
8.079.06c     prém ā^́yus tārīd átīrṇam

8.079.07a     suśévo no mr̥̄ḷayā^́kur⁺
8.079.07b     ádr̥ptakratur avātáḥ
8.079.07c     bhávā naḥ soma śáṃ hr̥dé

8.079.08a     mā^́ naḥ soma sáṃ vīvijo
8.079.08b     mā^́ ví bībhiṣathā rājan
8.079.08c     mā^́ no hā^́rdi tviṣā^́ vadhīḥ

8.079.09a     áva yát suvé sadhásthe
8.079.09b     devā^́nāṃ durmatī^́r ī^́kṣe
8.079.09c     rā^́jann ápa dvíṣaḥ sedha
8.079.09d     mī^́ḍhvo ápa srídhaḥ sedha

80

8.080.01a     nahí anyám baḷā^́karam
8.080.01b     marḍitā^́raṃ śatakrato
8.080.01c     tuváṃ na indra mr̥̄ḷaya⁺

8.080.02a     yó naḥ śáśvat purā^́vitha
8.080.02b     ámr̥dhro vā^́jasātaye
8.080.02c     sá tváṃ na indra mr̥̄ḷaya⁺

8.080.03a     kím aṅgá radhracódanaḥ
8.080.03b     sunvānásyāvitéd asi
8.080.03c     kuvít sú indra ṇaḥ śákaḥ

8.080.04a     índra prá ṇo rátham ava
8.080.04b     paścā^́c cit sántam adrivaḥ
8.080.04c     purástād enam me kr̥dhi

8.080.05a     hánta ū nú kím āsase
8.080.05b     prathamáṃ no ráthaṃ kr̥dhi
8.080.05c     upamáṃ vājayú śrávaḥ

8.080.06a     ávā no vājayúṃ ráthaṃ
8.080.06b     sukáraṃ te kím ít pári
8.080.06c     asmā^́n sú jigyúṣas kr̥dhi

8.080.07a     índra dŕ̥hyasva pū^́r asi
8.080.07b     bhadrā^́ ta eti niṣkr̥tám
8.080.07c     iyáṃ dhī^́r r̥tvíyāvatī

8.080.08a     mā^́ sīm avadyá ā^́ bhāg
8.080.08b     urvī^́ kā^́ṣṭhā hitáṃ dhánam
8.080.08c     apā^́vr̥ktā aratnáyaḥ

8.080.09a     turī^́yaṃ nā^́ma yajñíyaṃ
8.080.09b     yadā^́ káras tád uśmasi
8.080.09c     ā^́d ít pátir na ohase

8.080.10a     ávīvr̥dhad vo amr̥tā ámandīd
8.080.10b     ekadyū^́r devā utá yā^́ś ca devīḥ
8.080.10c     tásmā u rā^́dhaḥ kr̥ṇuta praśastám
8.080.10d     prātár makṣū^́ dhiyā^́vasur jagamyāt

81

8.081.01a     ā^́ tū^́ na indra kṣumántaṃ
8.081.01b     citráṃ grābháṃ sáṃ gr̥bhāya
8.081.01c     mahāhastī^́ dákṣiṇena

8.081.02a     vidmā^́ hí tvā tuvikūrmíṃ
8.081.02b     tuvídeṣṇaṃ tuvī^́magham
8.081.02c     tuvimātrám ávobhiḥ

8.081.03a     nahí tvā śūra devā^́
8.081.03b     ná mártāso dítsantam
8.081.03c     bhīmáṃ ná gā^́ṃ vāráyante

8.081.04a     éto nu índraṃ stávāma
8.081.04b     íśānaṃ vásvaḥ svarā^́jam
8.081.04c     ná rā^́dhasā mardhiṣan naḥ

8.081.05a     prá stoṣad úpa gāsiṣac
8.081.05b     chrávat sā^́ma gīyámānam
8.081.05c     abhí rā^́dhasā jugurat

8.081.06a     ā^́ no bhara dákṣiṇena
8.081.06b     abhí savyéna prá mr̥śa
8.081.06c     índra mā^́ no vásor nír bhāk

8.081.07a     úpa kramasva ā^́ bhara
8.081.07b     dhr̥ṣatā^́ dhr̥ṣṇo jánānām
8.081.07c     ádāśūṣṭarasya védaḥ

8.081.08a     índra yá u nú te ásti
8.081.08b     vā^́jo víprebhiḥ sánitvaḥ
8.081.08c     asmā^́bhiḥ sú táṃ sanuhi

8.081.09a     sadyojúvas te vā^́jā
8.081.09b     asmábhyaṃ viśváścandrāḥ
8.081.09c     váśaiś ca makṣū^́ jarante

82

8.082.01a     ā^́ prá drava parāváto
8.082.01b     arvāvátaś ca vr̥trahan
8.082.01c     mádhvaḥ práti prábharmaṇi

8.082.02a     tīvrā^́ḥ sómāsa ā^́ gahi
8.082.02b     sutā^́so mādayiṣṇávaḥ
8.082.02c     píbā dadhŕ̥g yáthociṣé

8.082.03a     iṣā^́ mandasva ā^́d u te
8.082.03b     áraṃ várāya manyáve
8.082.03c     bhúvat ta indra śáṃ hr̥dé

8.082.04a     ā^́ tú aśatrav ā^́ gahi
8.082.04b     ní ukthā^́ni ca hūyase
8.082.04c     upamé rocané diváḥ

8.082.05a     túbhyāyám ádribhiḥ sutó
8.082.05b     góbhiḥ śrītó mádāya kám
8.082.05c     prá sóma indra hūyate

8.082.06a     índra śrudhí sú me hávam
8.082.06b     asmé sutásya gómataḥ
8.082.06c     ví pītíṃ tr̥ptím aśnuhi

8.082.07a     yá indra camaséṣu ā^́
8.082.07b     sómaś camū^́ṣu te sutáḥ
8.082.07c     píbéd asya tvám īśiṣe

8.082.08a     yó apsú candrámā iva
8.082.08b     sómaś camū^́ṣu dádr̥śe
8.082.08c     píbéd asya tvám īśiṣe

8.082.09a     yáṃ te śyenáḥ padā^́bharat
8.082.09b     tiró rájāṃsi áspr̥tam
8.082.09c     píbéd asya tvám īśiṣe

83

8.083.01a     devā^́nām íd ávo mahát
8.083.01b     tád ā^́ vr̥ṇīmahe vayám
8.083.01c     vŕ̥ṣṇām asmábhyam ūtáye

8.083.02a     té naḥ santu yújaḥ sádā
8.083.02b     váruṇo mitró aryamā^́
8.083.02c     vr̥dhā^́saś ca prácetasaḥ

8.083.03a     áti no viṣpitā^́ purú
8.083.03b     naubhír apó ná parṣatha
8.083.03c     yūyám r̥tásya rathiyaḥ

8.083.04a     vāmáṃ no astu aryaman
8.083.04b     vāmáṃ varuṇa śáṃsiyam
8.083.04c     vāmáṃ hí āvr̥ṇīmáhe

8.083.05a     vāmásya hí pracetasa
8.083.05b     ī^́śānāśo riśādasaḥ
8.083.05c     ném ādityā aghásya yát

8.083.06a     vayám íd vaḥ sudānavaḥ
8.083.06b     kṣiyánto yā^́nto ádhvan ā^́
8.083.06c     dévā vr̥dhā^́ya hūmahe

8.083.07a     ádhi na indra eṣãṃ
8.083.07b     víṣṇo sajātíyānãm
8.083.07c     itā^́ máruto áśvinā

8.083.08a     prá bhrātr̥tváṃ sudānavo
8.083.08b     ádha dvitā^́ samāniyā^́
8.083.08c     mātúr gárbhe bharāmahe

8.083.09a     yūyáṃ hí ṣṭhā^́ sudānava
8.083.09b     índrajyeṣṭhā abhídyavaḥ
8.083.09c     ádhā cid va utá bruve

84

8.084.01a     práyiṣṭhaṃ⁺ vo átithiṃ
8.084.01b     stuṣé mitrám iva priyám
8.084.01c     agníṃ ráthaṃ ná védiyam

8.084.02a     kavím iva prácetasaṃ
8.084.02b     yáṃ devā^́so ádha dvitā^́
8.084.02c     ní mártiyeṣu ādadhúḥ

8.084.03a     tuváṃ yaviṣṭha dāśúṣo
8.084.03b     nr̥̄^́m̐ḥ pāhi śr̥ṇudhī^́ gíraḥ
8.084.03c     rákṣā tokám utá tmánā

8.084.04a     káyā te agne aṅgira
8.084.04b     ū^́rjo napād úpastutim
8.084.04c     várāya deva manyáve

8.084.05a     dā^́śema kásya mánasā
8.084.05b     yajñásya sahaso yaho
8.084.05c     kád u voca idáṃ námaḥ

8.084.06a     ádhā tuváṃ hí nas káro
8.084.06b     víśvā asmábhyaṃ sukṣitī^́ḥ
8.084.06c     vā^́jadraviṇaso gíraḥ

8.084.07a     kásya nūnám párīṇaso
8.084.07b     dhíyo jinvasi dampate
8.084.07c     góṣātā yásya te gíraḥ

8.084.08a     tám marjayanta sukrátum
8.084.08b     puroyā^́vānam ājíṣu
8.084.08c     svéṣu kṣáyeṣu vājínam

8.084.09a     kṣéti kṣémebhiḥ sādhúbhir
8.084.09b     nákir yáṃ ghnánti hánti yáḥ
8.084.09c     ágne suvī^́ra edhate

85

8.085.01a     ā^́ me hávaṃ nāsatiyā
8.085.01b     áśvinā gáchataṃ yuvám
8.085.01c     mádhvaḥ sómasya pītáye

8.085.02a     imám me stómam aśvinā
8.085.02b     imám me śr̥ṇutaṃ hávam
8.085.02c     mádhvaḥ sómasya pītáye

8.085.03a     ayáṃ vāṃ kŕ̥ṣṇo aśvinā
8.085.03b     hávate vājinīvasū
8.085.03c     mádhvaḥ sómasya pītáye

8.085.04a     śr̥ṇutáṃ jaritúr hávaṃ
8.085.04b     kŕ̥ṣṇasya stuvató narā
8.085.04c     mádhvaḥ sómasya pītáye

8.085.05a     chardír yantam ádābhiyaṃ
8.085.05b     víprāya stuvaté narā
8.085.05c     mádhvaḥ sómasya pītáye

8.085.06a     gáchataṃ dāśúṣo gr̥hám
8.085.06b     itthā^́ stuvató aśvinā
8.085.06c     mádhvaḥ sómasya pītáye

8.085.07a     yuñjā^́thāṃ rā^́sabhaṃ ráthe
8.085.07b     vīḍúaṅge vr̥ṣaṇvasū
8.085.07c     mádhvaḥ sómasya pītáye

8.085.08a     trivandhuréṇa trivŕ̥tā
8.085.08b     ráthenā^́ yātam aśvinā
8.085.08c     mádhvaḥ sómasya pītáye

8.085.09a     nū^́ me gíro nāsatiyā
8.085.09b     áśvinā prā^́vataṃ yuvám
8.085.09c     mádhvaḥ sómasya pītáye

86

8.086.01a     ubhā^́ hí dasrā^́ bhiṣájā mayobhúvā
8.086.01b     ubhā^́ dákṣasya vácaso babhūváthuḥ
8.086.01c     tā^́ vāṃ víśvako havate tanūkr̥thé
8.086.01d     mā^́ no ví yauṣṭaṃ sakhiyā^́ mumócatam

8.086.02a     kathā^́ nūnáṃ vāṃ vímanā úpa stavad
8.086.02b     yuváṃ dhíyaṃ dadathur vásyaïṣṭaye
8.086.02c     tā^́ vāṃ víśvako havate tanūkr̥thé
8.086.02d     mā^́ no ví yauṣṭaṃ sakhiyā^́ mumócatam

8.086.03a     yuváṃ hí ṣmā purubhujemám edhatúṃ
8.086.03b     viṣṇāpúve dadáthur vásyaïṣṭaye
8.086.03c     tā^́ vāṃ víśvako havate tanūkr̥thé
8.086.03d     mā^́ no ví yauṣṭaṃ sakhiyā^́ mumócatam

8.086.04a     utá tyáṃ vīráṃ dhanasā^́m r̥jīṣíṇaṃ
8.086.04b     dūré cit sántam ávase havāmahe
8.086.04c     yásya svā^́diṣṭhā sumatíḥ pitúr yathā
8.086.04d     mā^́ no ví yauṣṭaṃ sakhiyā^́ mumócatam

8.086.05a     r̥téna deváḥ savitā^́ śamāyata
8.086.05b     r̥tásya śŕ̥ṅgam urviyā^́ ví paprathe
8.086.05c     r̥táṃ sāsāha máhi cit pr̥tanyató
8.086.05d     mā^́ no ví yauṣṭaṃ sakhiyā^́ mumócatam

87

8.087.01a     dyumnī^́ vāṃ stómo aśvinā
8.087.01b     krívir ná séka ā^́ gatam
8.087.01c     mádhvaḥ sutásya sá diví priyó narā
8.087.01d     pātáṃ gaurā^́v ivériṇe

8.087.02a     píbataṃ gharmám mádhumantam aśvinā
8.087.02b     ā^́ barhíḥ sīdataṃ narā
8.087.02c     tā^́ mandasānā^́ mánuṣo duroṇá ā^́
8.087.02d     ní pātaṃ védasā váyaḥ

8.087.03a     ā^́ vāṃ víśvābhir ūtíbhiḥ
8.087.03b     priyámedhā ahūṣata
8.087.03c     tā^́ vartír yātam úpa vr̥ktábarhiṣo
8.087.03d     júṣṭaṃ yajñáṃ díviṣṭiṣu

8.087.04a     píbataṃ sómam mádhumantam aśvinā
8.087.04b     ā^́ barhíḥ sīdataṃ sumát
8.087.04c     tā^́ vāvr̥dhānā^́ úpa suṣṭutíṃ divó
8.087.04d     gantáṃ gaurā^́v ivériṇam

8.087.05a     ā^́ nūnáṃ yātam aśvinā
8.087.05b     áśvebhiḥ pruṣitápsubhiḥ
8.087.05c     dásrā híraṇyavartanī śubhas patī
8.087.05d     pātáṃ sómam r̥tāvr̥dhā

8.087.06a     vayáṃ hí vāṃ hávāmahe vipanyávo
8.087.06b     víprāso vā^́jasātaye
8.087.06c     tā^́ valgū^́ dasrā^́ purudáṃsasā dhiyā^́
8.087.06d     áśvinā śruṣṭī^́ ā^́ gatam

88

8.088.01a     táṃ vo dasmám r̥tīṣáhaṃ
8.088.01b     vásor mandānám ándhasaḥ
8.088.01c     abhí vatsáṃ ná svásareṣu dhenáva
8.088.01d     índraṃ gīrbhír navāmahe

8.088.02a     dyukṣáṃ sudā^́nuṃ táviṣībhir ā^́vr̥taṃ
8.088.02b     giríṃ ná purubhójasam
8.088.02c     kṣumántaṃ vā^́jaṃ śatínaṃ sahasríṇam
8.088.02d     makṣū^́ gómantam īmahe

8.088.03a     ná tvā br̥hánto ádrayo
8.088.03b     váranta indra vīḷávaḥ
8.088.03c     yád dítsasi stuvaté mā^́vate vásu
8.088.03d     nákiṣ ṭád ā^́ mināti te

8.088.04a     yóddhāsi krátvā śávasotá daṃsánā
8.088.04b     víśvā jātā^́bhí majmánā
8.088.04c     ā^́ tvāyám arká ūtáye vavartati
8.088.04d     yáṃ gótamā ájījanan

8.088.05a     prá hí ririkṣá ójasā
8.088.05b     divó ántebhiyas pári
8.088.05c     ná tvā vivyāca rája indra pā^́rthivam
8.088.05d     ánu svadhā^́ṃ vavakṣitha

8.088.06a     nákiḥ páriṣṭir maghavan maghásya te
8.088.06b     yád dāśúṣe daśasyási
8.088.06c     asmā^́kam bodhi ucáthasya coditā^́
8.088.06d     máṃhiṣṭho vā^́jasātaye

89

8.089.01a     br̥hád índrāya gāyata
8.089.01b     máruto vr̥trahántamam
8.089.01c     yéna jyótir ájanayann r̥tāvŕ̥dho
8.089.01d     deváṃ devā^́ya jā^́gr̥vi

8.089.02a     ápādhamad abhíśastīr aśastihā^́
8.089.02b     áthéndro dyumnī^́ ā^́bhavat
8.089.02c     devā^́s ta indra sakhiyā^́ya yemire
8.089.02d     bŕ̥hadbhāno márudgaṇa

8.089.03a     prá va índrāya br̥haté
8.089.03b     máruto bráhma arcata
8.089.03c     vr̥tráṃ hanati vr̥trahā^́ śatákratur
8.089.03d     vájreṇa śatáparvaṇā

8.089.04a     abhí prá bhara dhr̥ṣatā^́ dhr̥ṣanmanaḥ
8.089.04b     śrávaś cit te asad br̥hát
8.089.04c     árṣantu ā^́po jávasā ví mātáro
8.089.04d     háno vr̥tráṃ jáyā súvaḥ

8.089.05a     yáj jā^́yathā apūrviya
8.089.05b     mághavan vr̥trahátyāya
8.089.05c     tát pr̥thivī^́m aprathayas
8.089.05d     tád astabhnā utá dyã^́m

8.089.06a     tát te yajñó ajāyata
8.089.06b     tád arká utá háskr̥tiḥ
8.089.06c     tád víśvam abhibhū^́r asi
8.089.06d     yáj jātáṃ yác ca jántuvam

8.089.07a     āmā^́su pakvám aíraya
8.089.07b     ā^́ sū^́ryaṃ rohayo diví
8.089.07c     gharmáṃ ná sā^́man tapatā suvr̥ktíbhir
8.089.07d     júṣṭaṃ gírvaṇase br̥hát

90

8.090.01a     ā^́ no víśvāsu háviya
8.090.01b     índraḥ samátsu bhūṣatu
8.090.01c     úpa bráhmāṇi sávanāni vr̥trahā^́
8.090.01d     paramajyā^́ ŕ̥cīṣamaḥ

8.090.02a     tuváṃ dātā^́ prathamó rā^́dhasām asi
8.090.02b     ási satyá īśānakŕ̥t
8.090.02c     tuvidyumnásya yújiyā^́ vr̥ṇīmahe
8.090.02d     putrásya śávaso maháḥ

8.090.03a     bráhmā ta indra girvaṇaḥ
8.090.03b     kriyánte ánatidbhutā
8.090.03c     imā^́ juṣasva hariaśva yójanā
8.090.03d     índra yā^́ te ámanmahi

8.090.04a     tuváṃ hí satyó maghavann ánānato
8.090.04b     vr̥trā^́ bhū^́ri nir̥ñjáse
8.090.04c     sá tváṃ śaviṣṭha vajrahasta dāśúṣe
8.090.04d     arvā^́ñcaṃ rayím ā^́ kr̥dhi

8.090.05a     tuvám indra yaśā^́ asi
8.090.05b     r̥jīṣī^́ śavasas pate
8.090.05c     tváṃ vr̥trā^́ṇi haṃsy apratī^́ni éka íd
8.090.05d     ánuttā carṣaṇīdhŕ̥tā

8.090.06a     tám u tvā nūnám asura prácetasaṃ
8.090.06b     rā^́dho bhāgám ivemahe
8.090.06c     mahī^́va kŕ̥ttiḥ śaraṇā^́ ta indra
8.090.06d     prá te sumnā^́ no aśnavan

91

8.091.01a     kaníyā vā^́r avāyatī^́
8.091.01b     sómam ápi srutā^́vidat
8.091.01c     ástam bháranti abravīd
8.091.01d     índrāya sunavai tuvā
8.091.01e     śakrā^́ya sunavai tuvā

8.091.02a     asaú yá éṣi vīrakó
8.091.02b     gr̥háṃ-gr̥haṃ vicā^́kaśad
8.091.02c     imáṃ jámbhasutam piba
8.091.02d     dhānā^́vantaṃ karambhíṇam
8.091.02e     apūpávantam ukthínam

8.091.03a     ā^́ caná tvā cikitsāmo
8.091.03b     ádhi caná tvā némasi
8.091.03c     śánair 'va° śanakaír iva
8.091.03d     índrāyendo pári srava

8.091.04a     kuvíc chákat kuvít kárat
8.091.04b     kuvín no vásyasas kárat
8.091.04c     kuvít patidvíṣo yatī^́r
8.091.04d     índreṇa saṃgámāmahai

8.091.05a     imā^́ni trī^́ṇi viṣṭápā
8.091.05b     tā^́ni indra ví rohaya
8.091.05c     śíras tatásya urvárām
8.091.05d     ā^́d idám ma úpodáre

8.091.06a     asaú ca yā^́ na urvárā
8.091.06b     ā^́d imā^́ṃ tanúvam máma
8.091.06c     átho tatásya yác chíraḥ
8.091.06d     sárvā tā^́ romaśā^́ kr̥dhi

8.091.07a     khé ráthasya khé ánasaḥ
8.091.07b     khé yugásya śatakrato
8.091.07c     apālā^́m indra tríṣ pūtvī^́
8.091.07d     ákr̥ṇoḥ sū^́riyatvacam

92

8.092.01a     pã^́ntam ā^́ vo ándhasa
8.092.01b     índram abhí prá gāyata
8.092.01c     viśvāsā^́haṃ śatákratum
8.092.01d     máṃhiṣṭhaṃ carṣaṇīnã^́m

8.092.02a     puruhūtám puruṣṭutáṃ
8.092.02b     gāthāníyaṃ sánaśrutam
8.092.02c     índra íti bravītana

8.092.03a     índra ín no mahā^́nãṃ
8.092.03b     dātā^́ vā^́jānãṃ nr̥túḥ
8.092.03c     mahā^́m̐ abhijñú ā^́ yamat

8.092.04a     ápād u śiprī^́ ándhasaḥ
8.092.04b     sudákṣasya prahoṣíṇaḥ
8.092.04c     índor índro yávāśiraḥ

8.092.05a     tám u abhí prá arcata
8.092.05b     índraṃ sómasya pītáye
8.092.05c     tád íd dhí asya várdhanam

8.092.06a     asyá pītvā^́ mádānãṃ
8.092.06b     devó devásya ójasā
8.092.06c     víśvābhí bhúvanā bhuvat

8.092.07a     tiyám u vaḥ satrāsā^́haṃ
8.092.07b     víśvāsu gīrṣú ā^́yatam
8.092.07c     ā^́ cyāvayasi ūtáye

8.092.08a     yudhmáṃ sántam anarvā^́ṇaṃ
8.092.08b     somapā^́m ánapacyutam
8.092.08c     náram avāriyákratum

8.092.09a     śíkṣā ṇa indra rāyá ā^́
8.092.09b     purú vidvā^́m̐ r̥cīṣama
8.092.09c     ávā naḥ pā^́riye dháne

8.092.10a     átaś cid indra ṇa úpa
8.092.10b     ā^́ yāhi śatávājayā
8.092.10c     iṣā^́ sahásravājayā

8.092.11a     áyāma dhī^́vato dhíyo
8.092.11b     árvadbhiḥ śakra godare
8.092.11c     jáyema pr̥tsú vajrivaḥ

8.092.12a     vayám u tvā śatakrato
8.092.12b     gā^́vo ná yávaseṣu ā^́
8.092.12c     ukthéṣu raṇayāmasi

8.092.13a     víśvā hí martiyatvanā^́
8.092.13b     anukāmā^́ śatakrato
8.092.13c     áganma vajrinn āśásaḥ

8.092.14a     tuvé sú putra śavaso
8.092.14b     ávr̥tran kā^́makātayaḥ
8.092.14c     ná tvā^́m indrā^́ti ricyate

8.092.15a     sá no vr̥ṣan sániṣṭhayā
8.092.15b     sáṃ ghoráyā dravitnuvā^́
8.092.15c     dhiyā^́viḍḍhi púraṃdhiyā

8.092.16a     yás te nūnáṃ śatakratav
8.092.16b     índra dyumnítamo mádaḥ
8.092.16c     téna nūnám máde madeḥ

8.092.17a     yás te citráśravastamo
8.092.17b     yá indra vr̥trahántamaḥ
8.092.17c     yá ojodā^́tamo mádaḥ

8.092.18a     vidmā^́ hí yás te adrivas
8.092.18b     tvā^́dattaḥ satya somapāḥ
8.092.18c     víśvāsu dasma kr̥ṣṭíṣu

8.092.19a     índrāya mádvane sutám
8.092.19b     pári ṣṭobhantu no gíraḥ
8.092.19c     arkám arcantu kārávaḥ

8.092.20a     yásmin víśvā ádhi śríyo
8.092.20b     ráṇanti saptá saṃsádaḥ
8.092.20c     índraṃ suté havāmahe

8.092.21a     tríkadrukeṣu cétanaṃ
8.092.21b     devā^́so yajñám atnata
8.092.21c     tám íd vardhantu no gíraḥ

8.092.22a     ā^́ tvā viśantu índavaḥ
8.092.22b     samudrám iva síndhavaḥ
8.092.22c     ná tvā^́m indrā^́ti ricyate

8.092.23a     vivyáktha mahinā^́ vr̥ṣan
8.092.23b     bhakṣáṃ sómasya jāgr̥ve
8.092.23c     yá indra jaṭháreṣu te

8.092.24a     áraṃ ta indra kukṣáye
8.092.24b     sómo bhavatu vr̥trahan
8.092.24c     áraṃ dhā^́mabhya índavaḥ

8.092.25a     áram áśvāya gāyati
8.092.25b     śrutákakṣo áraṃ gáve
8.092.25c     áram índrasya dhā^́mane

8.092.26a     áraṃ hí ṣma sutéṣu ṇaḥ
8.092.26b     sómeṣu indra bhū^́ṣasi
8.092.26c     áraṃ te śakra dāváne

8.092.27a     parākā^́ttāc cid adrivas
8.092.27b     tuvā^́ṃ nakṣanta no gíraḥ
8.092.27c     áraṃ gamāma te vayám

8.092.28a     evā^́ hí ási vīrayúr
8.092.28b     evā^́ śū^́ra utá sthiráḥ
8.092.28c     evā^́ te rā^́dhiyam mánaḥ

8.092.29a     evā^́ rātís tuvīmagha
8.092.29b     víśvebhir dhāyi dhātŕ̥bhiḥ
8.092.29c     ádhā cid indra me sácā

8.092.30a     mó ṣú brahméva tandrayúr
8.092.30b     bhúvo vājānãm pate
8.092.30c     mátsvā sutásya gómataḥ

8.092.31a     mā^́ na indrābhí ādíśaḥ
8.092.31b     sū^́ro aktúṣu ā^́ yaman
8.092.31c     tuvā^́ yujā^́ vanema tát

8.092.32a     tváyéd indra yujā^́ vayám
8.092.32b     práti bruvīmahi spŕ̥dhaḥ
8.092.32c     tvám asmā^́kaṃ táva smasi

8.092.33a     túvā^́m íd dhí tuvāyávo
8.092.33b     anunónuvataś cárān
8.092.33c     sákhāya indra kārávaḥ

93

8.093.01a     úd ghéd abhí śrutā^́maghaṃ
8.093.01b     vr̥ṣabháṃ náriyāpasam
8.093.01c     ástāram eṣi sūriya

8.093.02a     náva yó navatím púro
8.093.02b     bibhéda bāhúojasā
8.093.02c     áhiṃ ca vr̥trahā^́vadhīt

8.093.03a     sá na índraḥ śiváḥ sákhā
8.093.03b     áśvāvad gómad yávamat
8.093.03c     urúdhāreva dohate

8.093.04a     yád adyá kác ca vr̥trahann
8.093.04b     udágā abhí sūriya
8.093.04c     sárvaṃ tád indra te váśe

8.093.05a     yád vā pravr̥ddha satpate
8.093.05b     ná marā íti mányase
8.093.05c     utó tát satyám ít táva

8.093.06a     yé sómāsaḥ parāváti
8.093.06b     yé arvāváti sunviré
8.093.06c     sárvāṃs tā^́m̐ indra gachasi

8.093.07a     tám índraṃ vājayāmasi
8.093.07b     mahé vr̥trā^́ya hántave
8.093.07c     sá vŕ̥ṣā vr̥ṣabhó bhuvat

8.093.08a     índraḥ sá dā^́mane kr̥tá
8.093.08b     ójiṣṭhaḥ sá máde hitáḥ
8.093.08c     dyumnī^́ ślokī^́ sá somiyáḥ

8.093.09a     girā^́ vájro ná sámbhr̥taḥ
8.093.09b     sábalo ánapacyutaḥ
8.093.09c     vavakṣá r̥ṣvó ástr̥taḥ

8.093.10a     durgé cin naḥ sugáṃ kr̥dhi
8.093.10b     gr̥ṇāná indra girvaṇaḥ
8.093.10c     tuváṃ ca maghavan váśaḥ

8.093.11a     yásya te nū^́ cid ādíśaṃ
8.093.11b     ná minánti svarā^́jiyam
8.093.11c     ná devó nā^́dhrigur jánaḥ

8.093.12a     ádhā te ápratiṣkutaṃ
8.093.12b     devī^́ śúṣmaṃ saparyataḥ
8.093.12c     ubhé suśipra ródasī

8.093.13a     tuvám etád adhārayaḥ
8.093.13b     kr̥ṣṇā^́su róhiṇīṣu ca
8.093.13c     páruṣṇīṣu rúśat páyaḥ

8.093.14a     ví yád áher ádha tviṣó
8.093.14b     víśve devā^́so ákramuḥ
8.093.14c     vidán mr̥gásya tā^́m̐ ámaḥ

8.093.15a     ā^́d u me nivaró bhuvad
8.093.15b     vr̥trahā^́diṣṭa paúṃsiyam
8.093.15c     ájātaśatrur ástr̥taḥ

8.093.16a     śrutáṃ vo vr̥trahántamam
8.093.16b     prá śárdhaṃ carṣaṇīnã^́m
8.093.16c     ā^́ śuṣe rā^́dhase mahé

8.093.17a     ayā^́ dhiyā^́ ca gavyayā^́
8.093.17b     púruṇāman púruṣṭuta
8.093.17c     yát sóme-soma ā^́bhavaḥ

8.093.18a     bodhínmanā íd astu no
8.093.18b     vr̥trahā^́ bhū^́riāsutiḥ
8.093.18c     śr̥ṇótu śakrá āśíṣam

8.093.19a     káyā tuváṃ na ūtiyā^́
8.093.19b     abhí prá mandase vr̥ṣan
8.093.19c     káyā stotŕ̥bhya ā^́ bhara

8.093.20a     kásya vŕ̥ṣā suté sácā
8.093.20b     niyútvān vr̥ṣabhó raṇat
8.093.20c     vr̥trahā^́ sómapītaye

8.093.21a     abhī^́ ṣú ṇas tuváṃ rayím
8.093.21b     mandasānáḥ sahasríṇam
8.093.21c     prayantā^́ bodhi dāśúṣe

8.093.22a     pátnīvantaḥ sutā^́ imá
8.093.22b     uśánto yanti vītáye
8.093.22c     apā^́ṃ jágmir nicumpuṇáḥ

8.093.23a     iṣṭā^́ hótrā asr̥kṣata
8.093.23b     índraṃ vr̥dhā^́so adhvaré
8.093.23c     áchāvabhr̥thám ójasā

8.093.24a     ihá tyā^́ sadhamā^́diyā
8.093.24b     hárī híraṇyakeśiyā
8.093.24c     voḷhā^́m abhí práyo hitám

8.093.25a     túbhyaṃ sómāḥ sutā^́ imé
8.093.25b     stīrṇám barhír vibhāvaso
8.093.25c     stotŕ̥bhya índram ā^́ vaha

8.093.26a     ā^́ te dákṣaṃ ví rocanā^́
8.093.26b     dádhad rátnā ví dāśúṣe
8.093.26c     stotŕ̥bhya índram arcata

8.093.27a     ā^́ te dadhāmi indriyám
8.093.27b     ukthā^́ víśvā śatakrato
8.093.27c     stotŕ̥bhya indra mr̥̄ḷaya⁺

8.093.28a     bhadrám-bhadraṃ na ā^́ bhara
8.093.28b     íṣam ū^́rjaṃ śatakrato
8.093.28c     yád indra mr̥̄ḷáyāsi⁺ naḥ

8.093.29a     sá no víśvāni ā^́ bhara
8.093.29b     suvitā^́ni śatakrato
8.093.29c     yád indra mr̥̄ḷáyāsi⁺ naḥ

8.093.30a     tuvā^́m íd vr̥trahantama
8.093.30b     sutā^́vanto havāmahe
8.093.30c     yád indra mr̥̄ḷáyāsi⁺ naḥ

8.093.31a     úpa no háribhiḥ sutáṃ
8.093.31b     yāhí madānãm pate
8.093.31c     úpa no háribhiḥ sutám

8.093.32a     dvitā^́ yó vr̥trahántamo
8.093.32b     vidá índraḥ śatákratuḥ
8.093.32c     úpa no háribhiḥ sutám

8.093.33a     tváṃ hí vr̥trahann eṣãm
8.093.33b     pātā^́ sómānãm ási
8.093.33c     úpa no háribhiḥ sutám

8.093.34a     índra iṣé dadātu na
8.093.34b     r̥bhukṣáṇam r̥bhúṃ rayím
8.093.34c     vājī^́ dadātu vājínam

94

8.094.01a     gaúr dhayati marútãṃ
8.094.01b     śravasyúr mātā^́ maghónām
8.094.01c     yuktā^́ váhnī ráthānãm

8.094.02a     yásyā devā^́ upásthe
8.094.02b     vratā^́ víśve dhāráyante
8.094.02c     sū^́riyāmā^́sā dr̥śé kám

8.094.03a     tát sú no víśve aryá ā^́
8.094.03b     sádā gr̥ṇanti kārávaḥ
8.094.03c     marútaḥ sómapītaye

8.094.04a     ásti sómo ayáṃ sutáḥ
8.094.04b     píbanti asya marútaḥ
8.094.04c     utá svarā^́jo aśvínā

8.094.05a     píbanti mitró aryamā^́
8.094.05b     tánā pūtásya váruṇaḥ
8.094.05c     triṣadhasthásya jā^́vataḥ

8.094.06a     utó nú asya jóṣam ā^́m̐
8.094.06b     índraḥ sutásya gómataḥ
8.094.06c     prātár hóteva matsati

8.094.07a     kád atviṣanta sūráyas
8.094.07b     tirá ā^́pa iva srídhaḥ
8.094.07c     árṣanti pūtádakṣasaḥ

8.094.08a     kád vo adyá mahā^́nãṃ
8.094.08b     devā^́nãm ávo vr̥ṇe
8.094.08c     tmánā ca dasmávarcasām

8.094.09a     ā^́ yé víśvā pā^́rthivāni
8.094.09b     papráthan rocanā^́ diváḥ
8.094.09c     marútaḥ sómapītaye

8.094.10a     tiyā^́n nú pūtádakṣaso
8.094.10b     divó vo maruto huve
8.094.10c     asyá sómasya pītáye

8.094.11a     tiyā^́n nú yé ví ródasī
8.094.11b     tastabhúr marúto huve
8.094.11c     asyá sómasya pītáye

8.094.12a     tiyáṃ nú mā^́rutaṃ gaṇáṃ
8.094.12b     giriṣṭhā^́ṃ vŕ̥ṣaṇaṃ huve
8.094.12c     asyá sómasya pītáye

95

8.095.01a     ā^́ tvā gíro rathī^́r iva
8.095.01b     ásthuḥ sutéṣu girvaṇaḥ
8.095.01c     abhí tvā sám anūṣata
8.095.01d     índra vatsáṃ ná mātáraḥ

8.095.02a     ā^́ tvā śukrā^́ acucyavuḥ
8.095.02b     sutā^́sa indra girvaṇaḥ
8.095.02c     píbā tú asya ándhasa
8.095.02d     índra víśvāsu te hitám

8.095.03a     píbā sómam mádāya kám
8.095.03b     índra śyenā^́bhr̥taṃ sutám
8.095.03c     tuváṃ hí śáśvatīnãm
8.095.03d     pátī rā^́jā viśā^́m ási

8.095.04a     śrudhī^́ hávaṃ tiraściyā^́
8.095.04b     índra yás tvā saparyáti
8.095.04c     suvī^́riyasya gómato
8.095.04d     rāyás pūrdhi mahā^́m̐ asi

8.095.05a     índra yás te návīyasīṃ
8.095.05b     gíram mandrā^́m ájījanat
8.095.05c     cikitvínmanasaṃ dhíyam
8.095.05d     pratnā^́m r̥tásya pipyúṣīm

8.095.06a     tám u ṣṭavāma yáṃ gíra
8.095.06b     índram ukthā^́ni vāvr̥dhúḥ
8.095.06c     purū^́ṇi asya paúṃsiyā
8.095.06d     síṣāsanto vanāmahe

8.095.07a     éto nu índraṃ stávāma
8.095.07b     śuddháṃ śuddhéna sā^́manā
8.095.07c     śuddhaír ukthaír vāvr̥dhvā^́ṃsaṃ
8.095.07d     śuddhá āśī^́rvān mamattu

8.095.08a     índra śuddhó na ā^́ gahi
8.095.08b     śuddháḥ śuddhā^́bhir ūtíbhiḥ
8.095.08c     śuddhó rayíṃ ní dhāraya
8.095.08d     śuddhó mamaddhi somiyáḥ

8.095.09a     índra śuddhó hí no rayíṃ
8.095.09b     śuddhó rátnāni dāśúṣe
8.095.09c     śuddhó vr̥trā^́ṇi jighnase
8.095.09d     śuddhó vā^́jaṃ siṣāsasi

96

8.096.01a     asmā^́ uṣā^́sa ā^́tiranta yā^́mam
8.096.01b     índrāya náktam ū^́rmiyāḥ suvā^́caḥ
8.096.01c     asmā^́ ā^́po mātáraḥ saptá tasthur
8.096.01d     nŕ̥bhyas tárāya síndhavaḥ supārā^́ḥ

8.096.02a     átividdhā vithuréṇā cid ástrā
8.096.02b     tríḥ saptá sā^́nu sáṃhitā girīṇā^́m
8.096.02c     ná tád devó ná mártiyas tuturyād
8.096.02d     yā^́ni právr̥ddho vr̥ṣabháś cakā^́ra

8.096.03a     índrasya vájra āyasó nímiśla
8.096.03b     índrasya bāhuvór bhū^́yiṣṭham ójaḥ
8.096.03c     śīrṣánn índrasya krátavo nireká
8.096.03d     āsánn éṣanta śrútiyā upāké

8.096.04a     mánye tvā yajñíyaṃ yajñíyānām
8.096.04b     mánye tvā cyávanam ácyutānām
8.096.04c     mánye tvā sátvanām indra ketúm
8.096.04d     mánye tvā vr̥ṣabháṃ carṣaṇīnā^́m

8.096.05a     ā^́ yád vájram bāhuvór indra dhátse
8.096.05b     madacyútam áhaye hántavā^́ u
8.096.05c     prá párvatā ánavanta prá gā^́vaḥ
8.096.05d     prá brahmā^́ṇo abhinákṣanta índram

8.096.06a     tám u ṣṭavāma yá imā^́ jajā^́na
8.096.06b     víśvā jātā^́ni ávarāṇi asmāt
8.096.06c     índreṇa mitráṃ didhiṣema gīrbhír
8.096.06d     úpo námobhir vr̥ṣabháṃ viśema

8.096.07a     vr̥trásya tvā śvasáthād ī^́ṣamāṇā
8.096.07b     víśve devā^́ ajahur yé sákhāyaḥ
8.096.07c     marúdbhir indra sakhiyáṃ te astu
8.096.07d     áthemā^́ víśvāḥ pŕ̥tanā jayāsi

8.096.08a     tríḥ ṣaṣṭís tvā marúto vāvr̥dhānā^́
8.096.08b     usrā^́ iva rāśáyo yajñíyāsaḥ
8.096.08c     úpa tvémaḥ kr̥dhí no bhāgadhéyaṃ
8.096.08d     śúṣmaṃ ta enā^́ havíṣā vidhema

8.096.09a     tigmám ā^́yudham marútām ánīkaṃ
8.096.09b     kás ta indra práti vájraṃ dadharṣa
8.096.09c     anāyudhā^́so ásurā adevā^́ś
8.096.09d     cakréṇa tā^́m̐ ápa vapa r̥jīṣin

8.096.10a     mahá ugrā^́ya taváse suvr̥ktím
8.096.10b     prá īraya śivátamāya paśváḥ
8.096.10c     gírvāhase gíra índrāya pūrvī^́r
8.096.10d     dhehí tanúve kuvíd aṅgá védat

8.096.11a     ukthávāhase vibhúve manīṣā^́ṃ
8.096.11b     drúṇā ná pārám īrayā nadī^́nām
8.096.11c     ní spr̥śa dhiyā^́ tanúvi śrutásya
8.096.11d     júṣṭatarasya kuvíd aṅgá védat

8.096.12a     tád viviḍḍhi yát ta índro jújoṣat
8.096.12b     stuhí suṣṭutíṃ námasā^́ vivāsa
8.096.12c     úpa bhūṣa jaritar mā^́ ruvaṇyaḥ
8.096.12d     śrāváyā vā^́caṃ kuvíd aṅgá védat

8.096.13a     áva drapsó aṃśumátīm atiṣṭhad
8.096.13b     iyānáḥ kr̥ṣṇó daśábhiḥ sahásraiḥ
8.096.13c     ā^́vat tám índraḥ śáciyā dhámantam
8.096.13d     ápa snéhitīr nr̥máṇā adhatta

8.096.14a     drapsám apaśyaṃ víṣuṇe cárantam
8.096.14b     upahvaré nadíyo aṃśumátyāḥ
8.096.14c     nábho ná kr̥ṣṇám avatasthivā^́ṃsam
8.096.14d     íṣyāmi vo vr̥ṣaṇo yúdhyatājaú

8.096.15a     ádha drapsó aṃśumátyā upásthe
8.096.15b     ádhārayat tanúvaṃ titviṣāṇáḥ
8.096.15c     víśo ádevīr abhí ācárantīr
8.096.15d     bŕ̥haspátinā yujéndraḥ sasāhe

8.096.16a     tuváṃ ha tyát saptábhyo jā^́yamāno
8.096.16b     aśatrúbhyo abhavaḥ śátrur indra
8.096.16c     gūḷhé dyā^́vāpr̥thivī^́ ánv avindo
8.096.16d     vibhumádbhyo bhúvanebhyo ráṇaṃ dhāḥ

8.096.17a     tuváṃ ha tyád apratimānám ójo
8.096.17b     vájreṇa vajrin dhr̥ṣitó jaghantha
8.096.17c     tváṃ śúṣṇasya ávātiro vádhatrais
8.096.17d     tuváṃ gā^́ indra śáciyéd avindaḥ

8.096.18a     tuváṃ ha tyád vr̥ṣabha carṣaṇīnā^́ṃ
8.096.18b     ghanó vr̥trā^́ṇāṃ taviṣó babhūtha
8.096.18c     tuváṃ síndhūm̐r asr̥jas tastabhānā^́n
8.096.18d     tuvám apó ajayo dāsápatnīḥ

8.096.19a     sá sukrátū ráṇitā yáḥ sutéṣu
8.096.19b     ánuttamanyur yó áheva revā^́n
8.096.19c     yá éka ín nári ápāṃsi kártā
8.096.19d     sá vr̥trahā^́ práti íd anyám āhuḥ

8.096.20a     sá vr̥trahā^́ índaraś⁺ carṣaṇīdhŕ̥t
8.096.20b     táṃ suṣṭutiyā^́ háviyaṃ huvema
8.096.20c     sá prāvitā^́ maghávā no 'dhivaktā^́
8.096.20d     sá vā^́jasya śravasíyasya dātā^́

8.096.21a     sá vr̥trahā^́ índara⁺ r̥bhukṣā^́ḥ
8.096.21b     sadyó jajñānó háviyo babhūva
8.096.21c     kr̥ṇvánn ápāṃsi náriyā purū^́ṇi
8.096.21d     sómo ná pītó háviyaḥ sákhibhyaḥ

97

8.097.01a     yā^́ indra bhúja ā^́bharaḥ
8.097.01b     súvarvām̐ ásurebhiyaḥ
8.097.01c     stotā^́ram ín maghavann asya vardhaya
8.097.01d     yé ca tvé vr̥ktábarhiṣaḥ

8.097.02a     yám indra dadhiṣé tuvám
8.097.02b     áśvaṃ gā^́m bhāgám ávyayam
8.097.02c     yájamāne sunvatí dákṣiṇāvati
8.097.02d     tásmin táṃ dhehi mā^́ paṇaú

8.097.03a     yá indra sásti avrató
8.097.03b     anuṣvā^́pam ádevayuḥ
8.097.03c     svaíḥ ṣá évair mumurat póṣiyaṃ rayíṃ
8.097.03d     sanutár dhehi táṃ tátaḥ

8.097.04a     yác chakrā^́si parāváti
8.097.04b     yád arvāváti vr̥trahan
8.097.04c     átas tvā gīrbhír dyugád indra keśíbhiḥ
8.097.04d     sutā^́vām̐ ā^́ vivāsati

8.097.05a     yád vā^́si rocané diváḥ
8.097.05b     samudrásyā^́dhi viṣṭápi
8.097.05c     yát pā^́rthive sádane vr̥trahantama
8.097.05d     yád antárikṣa ā^́ gahi

8.097.06a     sá naḥ sómeṣu somapāḥ
8.097.06b     sutéṣu śavasas pate
8.097.06c     mādáyasva rā^́dhasā sūnŕ̥tāvata
8.097.06d     índra rāyā^́ párīṇasā

8.097.07a     mā^́ na indra párā vr̥ṇag
8.097.07b     bhávā naḥ sadhamā^́diyaḥ
8.097.07c     tuváṃ na ūtī^́ tuvám ín na ā^́piyam
8.097.07d     mā^́ na indra párā vr̥ṇak

8.097.08a     asmé indra sácā suté
8.097.08b     ní ṣadā pītáye mádhu
8.097.08c     kr̥dhī^́ jaritré maghavann ávo mahád
8.097.08d     asmé indra sácā suté

8.097.09a     ná tvā devā^́sa āśata
8.097.09b     ná mártiyāso adrivaḥ
8.097.09c     víśvā jātā^́ni śávasābhibhū^́r asi
8.097.09d     ná tvā devā^́sa āśata

8.097.10a     víśvāḥ pŕ̥tanā abhibhū^́taraṃ náraṃ
8.097.10b     sajū^́s tatakṣur índraṃ jajanúś ca rājáse
8.097.10c     krátvā váriṣṭhaṃ vára āmúrim utá
8.097.10d     ugrám ójiṣṭhaṃ tavásaṃ tarasvínam

8.097.11a     sám īṃ rebhā^́so asvarann
8.097.11b     índraṃ sómasya pītáye
8.097.11c     súvarpatiṃ yád īṃ vr̥dhé
8.097.11d     dhr̥távrato hí ójasā sám ūtíbhiḥ

8.097.12a     nemíṃ namanti cákṣasā
8.097.12b     meṣáṃ víprā abhisvárā
8.097.12c     sudītáyo vo adrúho ápi kárṇe
8.097.12d     tarasvínaḥ sám ŕ̥kvabhiḥ

8.097.13a     tám índraṃ johavīmi maghávānam ugráṃ
8.097.13b     satrā^́ dádhānam ápratiṣkutaṃ śávāṃsi
8.097.13c     máṃhiṣṭho gīrbhír ā^́ ca yajñíyo vavártad
8.097.13d     rāyé no víśvā supáthā kr̥ṇotu vajrī^́

8.097.14a     tuvám púra indara⁺ cikíd enā
8.097.14b     ví ójasā śaviṣṭha śakra nāśayádhyai
8.097.14c     tuvád víśvāni bhúvanāni vajrin
8.097.14d     dyā^́vā rejete pr̥thivī^́ ca bhīṣā^́

8.097.15a     tán ma r̥tám indra śūra citra pātu
8.097.15b     apó ná vajrin duritā^́ti parṣi bhū^́ri
8.097.15c     kadā^́ na indra rāyá ā^́ daśasyer
8.097.15d     viśvápsnyasya spr̥hayā^́yiyasya rājan

98

8.098.01a     índrāya sā^́ma gāyata
8.098.01b     víprāya br̥haté br̥hát
8.098.01c     dharmakŕ̥te vipaścíte panasyáve

8.098.02a     tuvám indrābhibhū^́r asi
8.098.02b     tuváṃ sū^́ryam arocayaḥ
8.098.02c     viśvákarmā viśvádevo mahā^́m̐ asi

8.098.03a     vibhrā^́jañ jyótiṣā súvar
8.098.03b     ágacho rocanáṃ diváḥ
8.098.03c     devā^́s ta indra sakhiyā^́ya yemire

8.098.04a     ā^́ indra no gadhi priyáḥ
8.098.04b     satrājíd ágohiyaḥ
8.098.04c     girír ná viśvátas pr̥thúḥ pátir diváḥ

8.098.05a     abhí hí satya somapā
8.098.05b     ubhé babhū^́tha ródasī
8.098.05c     índrā^́si sunvató vr̥dháḥ pátir diváḥ

8.098.06a     tuváṃ hí śáśvatīnãm
8.098.06b     índra dartā^́ purā^́m ási
8.098.06c     hantā^́ dásyor mánor vr̥dháḥ pátir diváḥ

8.098.07a     ádhā hí indra girvaṇa
8.098.07b     úpa tvā kā^́mān maháḥ sasr̥jmáhe
8.098.07c     udéva yánta udábhiḥ

8.098.08a     vã^́r ṇá tvā yaviyā^́bhir
8.098.08b     várdhanti śūra bráhmāṇi
8.098.08c     vāvr̥dhvā^́ṃsaṃ cid adrivo divé-dive

8.098.09a     yuñjánti hárī iṣirásya gā^́thayā
8.098.09b     uraú rátha urúyuge
8.098.09c     indravā^́hā vacoyújā

8.098.10a     tuváṃ na indra ā^́ bharam̐
8.098.10b     ójo nr̥mṇáṃ śatakrato vicarṣaṇe
8.098.10c     ā^́ vīrám pr̥tanāṣáham

8.098.11a     tuváṃ hí naḥ pitā^́ vaso
8.098.11b     tuvám mātā^́ śatakrato babhū^́vitha
8.098.11c     ádhā te sumnám īmahe

8.098.12a     tuvā^́ṃ śuṣmin puruhūta vājayántam
8.098.12b     úpa bruve śatakrato
8.098.12c     sá no rāsva suvī^́riyam

99

8.099.01a     tuvā^́m idā^́ hiyó náro
8.099.01b     ápīpyan vajrin bhū^́rṇayaḥ
8.099.01c     sá indra stómavāhasām ihá śrudhi
8.099.01d     úpa svásaram ā^́ gahi

8.099.02a     mátsvā suśipra harivas tád īmahe
8.099.02b     tvé ā^́ bhūṣanti vedhásaḥ
8.099.02c     táva śrávāṃsi upamā^́ni ukthíyā
8.099.02d     sutéṣu indra girvaṇaḥ

8.099.03a     śrā^́yanta iva sū^́riyaṃ
8.099.03b     víśvéd índrasya bhakṣata
8.099.03c     vásūni jāté jánamāna ójasā
8.099.03d     práti bhāgáṃ ná dīdhima

8.099.04a     ánarśarātiṃ vasudā^́m úpa stuhi
8.099.04b     bhadrā^́ índrasya rātáyaḥ
8.099.04c     só asya kā^́maṃ vidható ná roṣati
8.099.04d     máno dānā^́ya codáyan

8.099.05a     tuvám indra prátūrtiṣu
8.099.05b     abhí víśvā asi spŕ̥dhaḥ
8.099.05c     aśastihā^́ janitā^́ viśvatū^́r asi
8.099.05d     tuváṃ tūrya taruṣyatáḥ

8.099.06a     ánu te śúṣmaṃ turáyantam īyatuḥ
8.099.06b     kṣoṇī^́ śíśuṃ ná mātárā
8.099.06c     víśvās te spŕ̥dhaḥ śnathayanta† manyáve
8.099.06d     vr̥tráṃ yád indra tū^́rvasi

8.099.07a     itá ūtī^́ vo ajáram
8.099.07b     prahetā^́ram áprahitam
8.099.07c     āśúṃ jétāraṃ hétāraṃ rathī^́tamam
8.099.07d     átūrtaṃ tugriyāvŕ̥dham

8.099.08a     iṣkartā^́ram ániṣkr̥taṃ sáhaskr̥taṃ
8.099.08b     śatámūtiṃ śatákratum
8.099.08c     samānám índram ávase havāmahe
8.099.08d     vásavānaṃ vasūjúvam

100

8.100.01a     ayáṃ ta emi tanúvā purástād
8.100.01b     víśve devā^́ abhí mā yanti paścā^́t
8.100.01c     yadā^́ máhyaṃ dī^́dharo bhāgám indra
8.100.01d     ā^́d ín máyā kr̥ṇavo vīríyāṇi

8.100.02a     dádhāmi te mádhuno bhakṣám ágre
8.100.02b     hitás te bhāgáḥ sutó astu sómaḥ
8.100.02c     ásaś ca tváṃ dakṣiṇatáḥ sákhā me
8.100.02d     ádhā vr̥trā^́ṇi jaṅghanāva bhū^́ri

8.100.03a     prá sú stómam bharata vājayánta
8.100.03b     índrāya satyáṃ yádi satyám ásti
8.100.03c     néndro astī^́ti néma u tva āha
8.100.03d     ká īṃ dadarśa kám abhí ṣṭavāma

8.100.04a     ayám asmi jaritaḥ páśya mehá
8.100.04b     víśvā jātā^́ni abhí asmi mahnā^́
8.100.04c     r̥tásya mā pradíśo vardhayanti
8.100.04d     ādardiró bhúvanā dardarīmi

8.100.05a     ā^́ yán mā venā^́ áruhann r̥tásyam̐
8.100.05b     ékam ā^́sīnaṃ haryatásya pr̥ṣṭhé
8.100.05c     mánaś cin me hr̥dá ā^́ práty avocad
8.100.05d     ácikradañ chíśumantaḥ sákhāyaḥ

8.100.06a     víśvét tā^́ te sávaneṣu pravā^́ciyā
8.100.06b     yā^́ cakártha maghavann indra sunvaté
8.100.06c     pā^́rāvataṃ yát purusambhr̥táṃ vásu
8.100.06d     apā^́vr̥ṇoḥ śarabhā^́ya ŕ̥ṣibandhave

8.100.07a     prá nūnáṃ dhāvatā pŕ̥thaṅ
8.100.07b     néhá yó vo ávāvarīt
8.100.07c     ní ṣīṃ vr̥trásya mármaṇi
8.100.07d     vájram índro apīpatat

8.100.08a     mánojavā áyamāna
8.100.08b     āyasī^́m atarat púram
8.100.08c     dívaṃ suparṇó gatvā^́ya
8.100.08d     sómaṃ vajríṇa ā^́bharat

8.100.09a     samudré antáḥ śayata
8.100.09b     udnā^́ vájro abhī^́vr̥taḥ
8.100.09c     bháranti asmai saṃyátaḥ
8.100.09d     puráḥprasravaṇā balím

8.100.10a     yád vā^́g vádanti avicetanā^́ni
8.100.10b     rā^́ṣṭrī devā^́nāṃ niṣasā^́da mandrā^́
8.100.10c     cátasra ū^́rjaṃ duduhe páyāṃsi
8.100.10d     kúva svid asyāḥ paramáṃ jagāma

8.100.11a     devī^́ṃ vā^́cam ajanayanta devā^́s
8.100.11b     tā^́ṃ viśvárūpāḥ paśávo vadanti
8.100.11c     sā^́ no mandrā^́ íṣam ū^́rjaṃ dúhānā
8.100.11d     dhenúr vā^́g asmā^́n úpa súṣṭutaítu

8.100.12a     sákhe viṣṇo vitaráṃ ví kramasva
8.100.12b     diyaúr dehí lokáṃ vájrāya viṣkábhe
8.100.12c     hánāva vr̥tráṃ riṇácāva síndhūn
8.100.12d     índrasya yantu prasavé vísr̥ṣṭāḥ

101

8.101.01a     ŕ̥dhag itthā^́ sá mártiyaḥ
8.101.01b     śaśamé devátātaye
8.101.01c     yó nūnám mitrā^́váruṇāv abhíṣṭaya
8.101.01d     ācakré havyádātaye

8.101.02a     várṣiṣṭhakṣatrā urucákṣasā nárā
8.101.02b     rā^́jānā dīrghaśrúttamā
8.101.02c     tā^́ bāhútā ná daṃsánā ratharyataḥ
8.101.02d     sākáṃ sū^́ryasya raśmíbhiḥ

8.101.03a     prá yó vām mitrāvaruṇā
8.101.03b     ajiró dūtó ádravat
8.101.03c     áyaḥśīrṣā máderaghuḥ

8.101.04a     ná yáḥ sampŕ̥che ná púnar hávītave
8.101.04b     ná saṃvādā^́ya rámate
8.101.04c     tásmān no adyá sámr̥ter uruṣyatam
8.101.04d     bāhúbhyāṃ na uruṣyatam

8.101.05a     prá mitrā^́ya prá aryamṇé
8.101.05b     sacathíyam r̥tāvaso
8.101.05c     varūthíyaṃ váruṇe chándiyaṃ váca
8.101.05d     stotráṃ rā^́jasu gāyata

8.101.06a     té hinvire aruṇáṃ jéniyaṃ vásu
8.101.06b     ékam putráṃ tisr̥̄ṇã^́m
8.101.06c     té dhā^́māni amŕ̥tā mártiyānãm
8.101.06d     ádabdhā abhí cakṣate

8.101.07a     ā^́ me vácāṃsi údyatā
8.101.07b     dyumáttamāni kártuvā
8.101.07c     ubhā^́ yātaṃ nāsatiyā sajóṣasā
8.101.07d     práti havyā^́ni vītáye

8.101.08a     rātíṃ yád vām arakṣásaṃ hávāmahe
8.101.08b     yuvā^́bhyāṃ vājinīvasū
8.101.08c     prā^́cīṃ hótrām pratirántāv itaṃ narā
8.101.08d     gr̥ṇānā^́ jamádagninā

8.101.09a     ā^́ no yajñáṃ divispŕ̥śaṃ
8.101.09b     vā^́yo yāhí sumánmabhiḥ
8.101.09c     antáḥ pavítra upári śriṇānó°
8.101.09d     ayáṃ śukró ayāmi te

8.101.10a     véti adhvaryúḥ pathíbhī rájiṣṭhaiḥ
8.101.10b     práti havyā^́ni vītáye
8.101.10c     ádhā niyutva ubháyasya naḥ piba
8.101.10d     śúciṃ sómaṃ gávāśiram

8.101.11a     báṇ mahā^́m̐ asi sūriya
8.101.11b     báḷ āditya mahā^́m̐ asi
8.101.11c     mahás te sató mahimā^́ panasyate
8.101.11d     addhā^́ deva mahā^́m̐ asi

8.101.12a     báṭ sūriya · śrávasā mahā^́m̐ asi
8.101.12b     satrā^́ deva mahā^́m̐ asi
8.101.12c     mahnā^́ devā^́nām asuryàḥ puróhito
8.101.12d     vibhú jyótir ádābhiyam

8.101.13a     iyáṃ yā^́ nī^́cī arkíṇī
8.101.13b     rūpā^́ róhiṇiyā kr̥tā^́
8.101.13c     citrā^́ iva práti adarśi āyatī^́
8.101.13d     antár daśásu bāhúṣu

8.101.14a     prajā^́ ha tisró atiā^́yam īyur
8.101.14b     ní anyā^́ arkám abhíto viviśre
8.101.14c     br̥hád dha tasthau bhúvaneṣu antáḥ
8.101.14d     pávamāno haríta ā^́ viveśa

8.101.15a     mātā^́ rudrā^́ṇāṃ duhitā^́ vásūnāṃ
8.101.15b     svásādityā^́nām amŕ̥tasya nā^́bhiḥ
8.101.15c     prá nú vocaṃ cikitúṣe jánāya
8.101.15d     mā^́ gā^́m ánāgām áditiṃ vadhiṣṭa

8.101.16a     vacovídaṃ vā^́cam udīráyantīṃ
8.101.16b     víśvābhir dhībhír upatíṣṭhamānām
8.101.16c     devī^́ṃ devébhyaḥ pári eyúṣīṃ gā^́m
8.101.16d     ā^́ māvr̥kta mártiyo dabhrácetāḥ

102

8.102.01a     tuvám agne br̥hád váyo
8.102.01b     dádhāsi deva dāśúṣe
8.102.01c     kavír gr̥hápatir yúvā

8.102.02a     sá na ī^́ḷānayā sahá
8.102.02b     devā^́m̐ agne duvasyúvā
8.102.02c     cikíd vibhānav ā^́ vaha

8.102.03a     tváyā ha svid yujā^́ vayáṃ
8.102.03b     códiṣṭhena yaviṣṭhiya
8.102.03c     abhí ṣmo vā^́jasātaye

8.102.04a     aurvabhr̥guvác chúcim
8.102.04b     apnavānavád ā^́ huve
8.102.04c     agníṃ samudrávāsasam

8.102.05a     huvé vā^́tasvanaṃ kavím
8.102.05b     parjányakrandiyaṃ sáhaḥ
8.102.05c     agníṃ samudrávāsasam

8.102.06a     ā^́ saváṃ savitúr yathā
8.102.06b     bhágasyeva bhujíṃ huve
8.102.06c     agníṃ samudrávāsasam

8.102.07a     agníṃ vo vr̥dhántam
8.102.07b     adhvarā^́ṇām purūtámam
8.102.07c     áchā náptre sáhasvate

8.102.08a     ayáṃ yáthā na ābhúvat
8.102.08b     tváṣṭā rūpéva tákṣiyā
8.102.08c     asyá krátvā yáśasvataḥ

8.102.09a     ayáṃ víśvā abhí śríyo
8.102.09b     agnír devéṣu patyate
8.102.09c     ā^́ vā^́jair úpa no gamat

8.102.10a     víśveṣãm ihá stuhi
8.102.10b     hótr̥̄ṇãṃ yaśástamam
8.102.10c     agníṃ yajñéṣu pūrviyám

8.102.11a     śīrám pavākáśociṣaṃ⁺
8.102.11b     jyáyiṣṭho⁺ yó dámeṣu ā^́
8.102.11c     dīdā^́ya dīrghaśrúttamaḥ

8.102.12a     tám árvantaṃ ná sānasíṃ
8.102.12b     gr̥ṇīhí vipra śuṣmíṇam
8.102.12c     mitráṃ ná yātayájjanam

8.102.13a     úpa tvā jāmáyo gíro
8.102.13b     dédiśatīr haviṣkŕ̥taḥ
8.102.13c     vāyór ánīke asthiran

8.102.14a     yásya tridhā^́tu ávr̥tam
8.102.14b     barhís tasthā^́v ásaṃdinam
8.102.14c     ā^́paś cin ní dadhā padám

8.102.15a     padáṃ devásya mīḷhúṣo
8.102.15b     ánādhr̥ṣṭābhir ūtíbhiḥ
8.102.15c     bhadrā^́ sū^́rya ivopadŕ̥k

8.102.16a     ágne ghr̥tásya dhītíbhis
8.102.16b     tepānó deva śocíṣā
8.102.16c     ā^́ devā^́n vakṣi yákṣi ca

8.102.17a     táṃ tvājananta mātáraḥ
8.102.17b     kavíṃ devā^́so aṅgiraḥ
8.102.17c     havyavā^́ham ámartiyam

8.102.18a     prácetasaṃ tuvā kave
8.102.18b     ágne dūtáṃ váreṇiyam
8.102.18c     havyavā^́haṃ ní ṣedire

8.102.19a     nahí me ásti ághniyā
8.102.19b     ná svádhitir vánanvati
8.102.19c     áthaitādŕ̥g bharāmi te

8.102.20a     yád agne kā^́ni kā^́ni cid
8.102.20b     ā^́ te dā^́rūṇi dadhmási
8.102.20c     tā^́ juṣasva yaviṣṭhiya

8.102.21a     yád átti upajíhvikā
8.102.21b     yád vamró atisárpati
8.102.21c     sárvaṃ tád astu te ghr̥tám

8.102.22a     agním índhāno mánasā
8.102.22b     dhíyaṃ saceta mártiyaḥ
8.102.22c     agním īdhe vivásvabhiḥ

103

8.103.01a     ádarśi gātuvíttamo
8.103.01b     yásmin vratā^́ni ādadhúḥ
8.103.01c     úpo ṣú jātám ā^́riyasya várdhanam
8.103.01d     agníṃ nakṣanta no gíraḥ

8.103.02a     prá daívodāso agnír
8.103.02b     devā^́m̐ áchā ná majmánā
8.103.02c     ánu mātáram pr̥thivī^́ṃ ví vāvr̥te
8.103.02d     tasthaú nā^́kasya sā^́navi

8.103.03a     yásmād réjanta kr̥ṣṭáyaś
8.103.03b     carkŕ̥tiyāni kr̥ṇvatáḥ
8.103.03c     sahasrasā^́m medhásātāv iva tmánā
8.103.03d     agníṃ dhībhíḥ saparyata

8.103.04a     prá yáṃ rāyé nínīṣasi
8.103.04b     márto yás te vaso dā^́śat
8.103.04c     sá vīráṃ dhatte agna ukthaśaṃsínaṃ
8.103.04d     tmánā sahasrapoṣíṇam

8.103.05a     sá dr̥̄ḷhé⁺ cid abhí tr̥ṇatti vā^́jam
8.103.05b     árvatā sá dhatte ákṣiti śrávaḥ
8.103.05c     tuvé devatrā^́ sádā purūvaso
8.103.05d     víśvā vāmā^́ni dhīmahi

8.103.06a     yó víśvā dáyate vásu
8.103.06b     hótā mandró jánānãm
8.103.06c     mádhor ná pā^́trā prathamā^́ni asmai
8.103.06d     prá stómā yanti agnáye

8.103.07a     áśvaṃ ná gīrbhī^́ rathíyaṃ sudā^́navo
8.103.07b     marmr̥jyánte devayávaḥ
8.103.07c     ubhé toké tánaye dasma viśpate
8.103.07d     párṣi rā^́dho maghónãm

8.103.08a     prá máṃhiṣṭhāya gāyata
8.103.08b     r̥tā^́vane br̥haté śukráśociṣe
8.103.08c     úpastutāso agnáye

8.103.09a     ā^́ vaṃsate maghávā vīrávad yáśaḥ
8.103.09b     sámiddho dyumnī^́ ā^́hutaḥ
8.103.09c     kuvín no asya sumatír návīyasī
8.103.09d     áchā vā^́jebhir āgámat

8.103.10a     práyiṣṭham⁺ u priyā^́ṇãṃ
8.103.10b     stuhí āsāva átithim
8.103.10c     agníṃ ráthānãṃ yámam

8.103.11a     úditā yó níditā véditā vásu
8.103.11b     ā^́ yajñíyo vavártati
8.103.11c     duṣṭárā yásya pravaṇé ná ūrmáyo
8.103.11d     dhiyā^́ vā^́jaṃ síṣāsataḥ

8.103.12a     mā^́ no hr̥ṇītām átithir
8.103.12b     vásur agníḥ purupraśastá eṣáḥ
8.103.12c     yáḥ suhótā suadhvaráḥ

8.103.13a     mó té riṣan yé áchaüktibhir vaso
8.103.13b     ágne kébhiś cid évaiḥ
8.103.13c     kīríś cid dhí tvā^́m ī^́ṭṭe dūtíyāya
8.103.13d     rātáhavyaḥ suadhvaráḥ

8.103.14a     ā^́gne yāhi marútsakhā
8.103.14b     rudrébhiḥ sómapītaye
8.103.14c     sóbharyā úpa suṣṭutím
8.103.14d     mādáyasva súvarṇare